LES 40
Gado wani taki wi de krin
Prakseri fa wan mama e sreka a boi fu en fu go na skoro. A e sorgu taki a boi e wasi, taki a e weri krin krosi èn taki a netjes. Na so a boi o tan gosontu èn tra sma o si taki en papa nanga mama e sorgu bun gi en. Na a srefi fasi wi Papa, Yehovah, wani taki wi de krin èn taki wi libi wan krin libi. Te wi e du dati, dan a o tyari wini kon gi wi èn wi o gi Yehovah grani.
1. Fa yu kan sorgu taki yu krin?
Yehovah e taigi wi: „Un musu de santa” (1 Petrus 1:16). Efu wi wani de sma di santa, dan wi musu de krin èn wi musu libi wan krin libi. Efu wi wani de krin, dan wi musu wasi, wi musu weri krin krosi èn wi musu krin wi oso nanga wagi. Wi kan yepi tu fu krin a Kownukondre zaal. Te wi e du den sani disi, dan Yehovah o kisi glori.—2 Korentesma 6:3, 4.
2. Efu wi wani de krin, dan sortu gwenti wi no musu abi?
Bijbel e taigi wi fu „krin wisrefi fu ibri sani di kan doti wi skin nanga wi denki” (2 Korentesma 7:1). Dati meki wi no o du sani di kan meki taki wi siki noso di kan pori wi frustan. Wan tra sani, na taki wi musu du ala san wi man fu prakseri sani di Yehovah feni bun (Psalm 19:14). Wi musu luku bun tu san wi e taki.—Leisi Kolosesma 3:8.
Sortu tra sani kan meki taki wi no de krin? Wi no musu smoko noso kaw tabaka èn wi no musu gebroiki drugs fu di den sani disi kan pori wi gosontu. Te wi no e du den sani disi, dan wi o de gosontu èn wi o sori taki wi e lespeki a libi di Yehovah gi wi. Wan tra sani na taki wi no musu prei nanga wi syenpresi èn wi no musu luku porno (Psalm 119:37; Efeisesma 5:5). A kan muilek fu tapu nanga den gwenti disi, ma Yehovah kan yepi wi.—Leisi Yesaya 41:13.
SORTU TRA SANI YU KAN LERI?
Wi o si taki te wi krin, dan wi e gi Yehovah grani. Wi o si tu san o yepi wi fu tapu nanga gwenti di no bun.
3. Te wi de krin, dan wi e gi Yehovah grani
Te wi e luku den wet di Yehovah ben gi den Israelsma, dan dati e sori wi o prenspari a de gi en taki a pipel fu en de krin. Leisi Eksodes 19:10 nanga 30:17-19. Baka dati taki fu den aksi disi:
Fa den vers disi e sori taki a prenspari gi Yehovah taki wi krin?
San yu kan du fu de krin?
Wi musu meki muiti fu de krin. Awinsi pe wi e libi noso awinsi wi gudu noso pôti, wi kan de sma di de krin. Prei a FELEM èn taki fu na aksi disi:
Te wi e preiki gi sma, dan fu san ede den o lespeki Yehovah te den e si taki den sani fu wi krin?
4. Yu kan tapu nanga gwenti di no bun
Yehovah kan yepi wi fu tapu nanga iniwan takru gwenti
Efu yu e smoko noso yu e gebroiki drugs, dan yu sabi o muilek a de fu tapu nanga a gwenti dati. San kan yepi yu? Prakseri sortu takru bakapisi a abi te yu abi so wan gwenti. Leisi Mateyus 22:37-39. Baka dati taki fu den aksi disi. Fa tabaka nanga drugs . . .
kan pori yu nanga Yehovah?
kan pori yu nanga yu famiri nanga den tra sma di yu sabi?
Luku san yu musu du fu tapu nanga wan takru gwenti.a Prei a FELEM.
Leisi Filipisma 4:13 èn taki fu na aksi disi:
Te wan sma abi a gwenti fu begi, fu studeri èn fu go na konmakandra, dan fa dati kan gi en a krakti fu tapu nanga wan takru gwenti?
5. Du muiti fu no prakseri sani di no krin èn fu no du sani di no krin
Leisi Kolosesma 3:5 èn taki fu den aksi disi:
Fa wi du sabi taki porno, sextingb nanga a prei di wan sma e prei nanga en syenpresi na sani di Yehovah no lobi?
Yu denki taki wi man libi wan krin libi soleki fa Yehovah wani? Fu san ede yu taki dati?
Na ini a felem disi yu o si san o yepi yu fu no prakseri sani di no krin. Prei a FELEM.
Yesus gebroiki wan agersitori fu sori taki wi musu du ala san de fanowdu fu tan krin. Leisi Mateyus 5:29, 30 èn taki fu na aksi disi:
Yesus no taki dati wi musu gi wisrefi mankeri, ma a ben wani sori taki wi no musu draidrai fu kenki sani. San kan yepi wan sma fu no prakseri sani di no bun?c
Yehovah breiti nanga a muiti di yu e meki fu no prakseri sani di no krin. Leisi Psalm 103:13, 14 èn taki fu na aksi disi:
Efu yu e du muiti fu tapu nanga wan gwenti di no bun, dan fa a tekst disi kan yepi yu fu no gi abra?
No gi abra!
Efu yu e feti nanga wan takru gwenti èn wan leisi yu no ben man hori yusrefi, dan kande yu e denki: ’Dan betre mi gi abra.’ Ma prakseri a sani disi: Efu wan sma de na ini wan streilon èn a fadon, dan dati no wani taki dati a lasi noso taki a musu bigin na a bigin baka. Na so a de tu taki efu yu no ben man hori yusrefi wan leisi, dan dati no wani taki dati yu lasi a feti. A no wani taki tu dati ala a muiti di yu ben du fu tapu nanga a gwenti disi ben de fu soso. Te yu e du muiti fu tapu nanga wan takru gwenti, dan den sani disi kan pasa. Ma no gi abra! Yehovah kan yepi yu fu tapu nanga a takru gwenti.
SON SMA E TAKI: „Mi no man tapu nanga a gwenti disi.”
Sortu tekst yu ben o gebroiki fu sori a sma taki Yehovah kan yepi en fu tapu nanga a gwenti dati?
SAN YU LERI?
Yehovah breiti te wi e du muiti fu de krin, te wi e prakseri sani di bun èn te wi e libi wan krin libi.
Fa yu ben o piki den aksi disi?
Fu san ede a prenspari fu de krin?
San yu musu du fu de krin?
San kan yepi yu fu prakseri sani di bun èn fu tapu nanga gwenti di no krin?
TRA SANI DI YU KAN LUKU
Sortu sani yu kan du fu tan krin efu yu pôti?
Na ini na artikel disi yu o si san yu kan du fu tapu nanga smoko.
Na ini na artikel disi yu o si fu san ede a no bun fu luku porno.
Na ini na artikel disi yu o si san yepi wan man fu tapu nanga a gwenti fu luku porno.
„Mi fadon furu leisi, fosi mi wini a strei” (A Waktitoren Nr. 4 2016)
a Na ini a pisi „Tra sani di yu kan luku” yu abi wan Ontwaakt! di nen „Fa yu kan tapu nanga smoko”. A tijdschrift disi e sori san yu kan du fu tapu nanga a takru gwenti disi.
b Sexting na te sma e gebroiki den telefon fu seni boskopu, fowtow, noso felem gi trawan di e wiki seks firi.
c Efu yu wani sabi san kan yepi yu fu tapu nanga a gwenti fu prei nanga yu syenpresi, dan luku kapitel 25 „Fa mi kan tapu nanga a gwenti fu prei nanga mi syenpresi?” na ini a buku Sani di yongusma e aksi—Piki di kan yepi den, Pisi 1.