Yesus Krestes—A krakti di a boskopu fu en abi

„A no de fu taki dati a koniman fu Kaperna-um ben gi leri na wan switi fasi, èn te now ete den leri dati abi krakti tapu na ati nanga a frustan fu sma.”a—SKRIFIMAN GREGG EASTERBROOK.

WORTU abi krakti. Wortu di taki na a yoisti momenti kan abi krakti tapu sma ati, a kan gi howpu, èn a kan kenki sma libi. Boiti Yesus Krestes, nowan sma ben de di taki sani di ben abi so furu krakti tapu trawan. Wan sma di ben yere Yesus en Bergitaki ben skrifi bakaten: „Di Yesus kaba taki den sani disi, dan ala den sma fruwondru fu a fasi fa a ben gi leri.”—Mateyus 7:28.

Te na a dei fu tide, sma na ala sei fu grontapu sabi furu fu den sani di Yesus taki. Luku wan tu eksempre fu prenspari sani di a ben taki.

„Unu no kan dini Gado èn dini Gudu na a srefi ten.”—Mateyus 6:24.

„Ala sani di unu wani meki sma du gi unu, na dati un musu du gi den tu.”—Mateyus 7:12.

„Pai Caesar den sani di de fu Caesar, ma pai Gado den sani di de fu Gado.”—Mateyus 22:21.

„Wan sma sa de moro koloku te a e gi sani, leki te a e kisi sani.”—Tori fu den Apostel 20:35.

Ma Yesus du moro leki fu taki prenspari sani. A boskopu fu en ben abi furu krakti fu di a ben taki fu tru tori di abi fu du nanga Gado, èn a ben leri sma fa fu de trutru koloku. Boiti dati a ben tyari kon na krin san na a lusu gi ala a pina di libisma e pina, èn dati na Gado Kownukondre. Te wi o ondrosuku a boskopu disi fu en na ini den artikel di e kon, dan wi o si fu san ede Yesus ’di ben gi leri na wan switi fasi, abi krakti te now ete tapu na ati nanga a frustan fu sma’.

[Futuwortu]