Yu ben sabi a sani disi?
San na a „krutuman-sturu” pe sma ben tyari na apostel Paulus go?
▪ Tori fu den apostel 18:12, 13 e sori taki den Dyu na ini Korente ben krutu Paulus taki a ben pasa a wèt, fu di a ben e preiki gi sma. Fu dati ede den tyari en go na fesi „a krutuman-sturu”, noso a bema (wan Griki wortu di wani taki „stupu”). Na ini owruten Korente wan podium, noso wan hei stupu ben de pikinso go na mindrisei fu na agora, noso a wowoyo, èn a no ben de fara fu a snoga. Fu di a podium ben de na a presi dati, meki sma ben kan gebroiki en fu taki nanga a pipel. A podium disi ben meki fu blaw nanga weti marmer-ston, èn wan lo moimoi sani ben koti na ini den ston. Yu ben abi sosrefi tu kamra drape pe sma ben kan wakti, èn bangi fu marmer-ston ben de na ini den kamra disi pe moimoi plata ston ben seti na tapu a gron.
Soleki fa a sori, dan na fesi a podium disi di sma ben kari a krutuman-sturu, den ben tyari na apostel Paulus go fu meki Galio, wan Romesma di ben de granman fu Akaya, krutu en. Na drape den heiheiman ben e sidon fu koti krutu èn den ben e taigi a pipel di ben kon makandra san den ben bosroiti.
Na ini Griki foto a ben de wan gwenti taki a pipel ben e miti na fesi so wan bema pe sma ben e poti prakseri na ala sortu afersi fu a pipel. A tori fu a krutu-afersi fu Yesus di skrifi na Mateyus 29:19 nanga Yohanes 19:13, e taki dati Pontius Pilatus ben taki nanga a pipel komoto fu a bema fu en.—Tori fu den apostel 12:21.
Fu san ede a fasi fa Yesus dede, meki taki son Dyu naki futu?
▪ Na apostel Paulus ben taki fu den fosi Kresten: „Wi e preiki fu Krestes di sma spikri na wan postu. Disi na wan sani di e meki den Dyu fadon èn gi den sma di no de Dyu, a de wan don sani” (1 Korentesma 1:23). Fu san ede a fasi fa Yesus dede ben meki taki son sma naki futu?
Ben Witherington III, wan sabiman fu Bijbel, e taki dati te yu e luku a kulturu fu den sma di ben e libi na a Mindri-Owstusei na ini a fosi yarihondro, dan a fasi fa Yesus dede, na „a moro syen fasi fa wan sma ben kan dede na ini a ten dati. Nowan sma ben o wani dede na so wan fasi fu a bribi fu en ede.” Witherington e taki moro fara: „Sma fu a kulturu dati ben e bribi taki a fasi fa yu dede e sori suma yu ben de. Fu dati ede sma ben e si Yesus leki wan bedrigiman, leki wan man di opo ensrefi teige a tirimakti, èn leki wan man di frudini en fu kisi a strafu di tranga-ede srafu ben e kisi.” Te yu e luku a kulturu fu den sma fu a ten dati, dan sma no man taki dati den tori di den fosi Kresten ben fruteri fu a dede nanga na opobaka fu Yesus, na leitori.