Aksi fu leisiman

Hebrewsma 4:12 e taki dati „a wortu fu Gado de na libi” èn „a abi krakti”. San na a wortu dati?

Den vers na fesi e sori taki na apostel Paulus ben e taki fu den sani di Gado taki dati a o du, soleki fa wi e leisi na ini Bijbel.

Furu leisi wi e gebroiki Hebrewsma 4:12 na ini den buku nanga tijdschrift fu wi, fu sori taki Bijbel abi a krakti fu kenki sma libi. A no fowtu fu fruklari a tekst disi so. Ma a bun fu luku san Paulus ben e taki na ini den vers na fesi. A ben e gi den Hebrew Kresten a deki-ati fu wroko makandra nanga Gado te a e du san a abi na prakseri. Furu fu den sani di Gado abi na prakseri, skrifi na ini den Santa Buku. Fu eksempre, Paulus ben taki fu den Israelsma di ben kon fri fu Egepte. Gado ben pramisi den taki den ben o go na ini wan kondre „di lai merki nanga oni”. Drape den ben o feni rostu.​—Eks. 3:8; Deut. 12:9, 10.

Na dati Gado ben taki dati a o du gi den. Ma bakaten den Israelsma trangayesi Gado èn den no sori bribi. Dati meki furu fu den no feni a rostu di a pramisi den (Num. 14:30; Yos. 14:6-10). Ma Paulus taigi den Kresten taki ’wan pramisi de ete taki den kan rostu leki Gado’ (Hebr. 3:16-19; 4:1). A pramisi disi na wan fu den sani di Gado ben abi na prakseri gi libisma. Neleki den Hebrew Kresten, wi kan leri wan sani fu a pramisi disi èn wi kan wroko makandra nanga Gado te a e du san a abi na prakseri. Paulus ben meki den Kresten frustan krin taki a pramisi disi komoto fu Bijbel. Dati meki a taki fu sani di skrifi na Genesis 2:2 nanga Psalm 95:11.

Te wi e leisi taki „wan pramisi de ete taki wi kan rostu leki Gado”, dan a sani disi musu naki wi ati. Wi e bribi taki wi kan feni rostu neleki Gado èn wi e du ala san de fanowdu fu feni a rostu dati. A tru taki wi no e hori a Wet fu Moses èn wi no e du bun sani soso fu di wi wani meki Yehovah prisiri nanga wi. Dan san wi e du? We, fu di wi abi bribi, meki wi e wroko makandra nanga Gado èn wi e tan sori bribi na ini den sani di a o du. Ma soleki fa wi taki na a bigin, dan „a wortu fu Gado” soleki fa skrifi na Hebrewsma 4:12 kan abi fu du tu nanga Bijbel. Dusundusun sma na heri grontapu bigin studeri Bijbel èn den leri san Gado o du. Disi meki taki den kenki den libi, den sori bribi èn den tron dopu Kresten. A fasi fa den e libi e sori krin taki „a wortu fu Gado de na libi” èn taki „a abi krakti”. Iya, den sani di Gado taki dati a o du soleki fa skrifi na ini Bijbel, ben abi krakti tapu wi libi èn den o tan abi krakti na wi tapu.