Aksi fu leisiman

Di Satan taigi Eva taki a no ben o dede te a ben nyan fu a bon di nen „Sabi san bun èn san ogri”, dan a ben leri en taki libisma abi wan sili di no man dede?

A no sori so. Didibri no taigi Eva taki te a ben nyan fu a froktu fu a bon, dan en skin ben o dede, ma en sili ben o libi go doro na wan tra presi. Satan gebroiki wan sneki fu taigi Eva taki te a nyan fu a froktu fu a bon ’a no o dede kwetikweti’. A ben wani meki Eva bribi taki a ben o tan na libi, taki a libi fu en ben o moro bun èn taki a no ben o abi Gado fanowdu.​—Gen. 2:17; 3:3-5.

Sobun, a leri taki libisma abi wan sili di no e dede, no bigin na ini a dyari fu Eden. Dan pe a leri disi komoto? Wi no sabi seiker. Wi sabi taki ala falsi anbegi lasi gowe di Gado tyari a Frudu kon na ini a ten fu Noa. Ala den falsi sani di sma ben bribi na a ten dati lasi gowe fu di soso Noa nanga en osofamiri ben tan na libi. Èn den ben anbegi a tru Gado.

Sobun, na baka a Frudu sma bigin bribi na ini wan sili di no man dede. Ma fa a leri disi panya? Di Gado bruya a tongo fu den sma na Babel, dan sma panya go na „ala sei fu grontapu”. A musu fu de so taki na den sma disi panya a leri taki libisma abi wan sili di no man dede (Gen. 11:8, 9). Ma awinsi pe a leri disi komoto, wi kan de seiker taki Satan Didibri, „a tata fu ala lei” kon nanga a leri disi. Wi sabi taki a breiti taki sma na ala sei fu grontapu e bribi a lei disi.​—Yoh. 8:44.