DUTHERONOMI

1 Lawa ngemavi Mosi lawasho kuwo onkhe ema-Israyeli esifundzeni saseJordane, ehlane lelisembikweSufi, emkhatsini wePharani, iThofeli, iLabani, iHaserothi neDizahabi. 2 Kungatsatsa emalanga langu-11 kusuka eHorebe uye eKhadeshi-bhaneya+ nawuhamba ngendlela yaseNtsabeni iSeyiri. 3 Ngelilanga lekucala lenyanga yesi-11 emnyakeni wesi-40,+ Mosi wakhuluma nema-Israyeli* wawatjela konkhe loko Jehova labetsite awatjele kona. 4 Loku kwenteka ngemuva kwekutsi ancobe Sihoni+ inkhosi yema-Amori, labehlala eHeshboni, nangemuva kwekutsi ancobe Ogi+ inkhosi yaseBhashani, labehlala e-Ashtarothe, e-Edreyi.+ 5 Esifundzeni saseJordane, eveni lakaMowabi, Mosi wachaza uMtsetfo+ waNkulunkulu watsi:

6 “Jehova Nkulunkulu wetfu wakhuluma natsi eHorebe, watsi: ‘Sekuphele sikhatsi lesidze nihleti kulesifundza lesinetintsaba.+ 7 Ngako-ke sukani niye esifundzeni lesinetintsaba sema-Amori+ futsi niye ngakuto tonkhe tive letibomakhelwane bawo letise-Arabha,+ esifundzeni lesinetintsaba, eShefela, eNegebhu, elugwini,+ eveni laseKhenani naseLebanoni,*+ nize niyewufika emfuleni lomkhulu iYufrathe.+ 8 Bukani, lelive lelisembikwenu ngininika lona. Ngenani kulo, nitsatse lelive Jehova lafunga kubobabe benu, lokungu-Abrahama, Isaka+ naJakobe,+ kutsi utabanika lona libe labo kanye nebantfwana* babo labatawuvela emvakwabo.’+

9 “Ngaleso sikhatsi nganitjela ngatsi: ‘Angisakhoni kunetfwala ngingedvwana.+ 10 Jehova Nkulunkulu wenu sewunandzisile, futsi lamuhla senibanyenti ngangetinkhanyeti letisemazulwini.+ 11 Shengatsi Jehova Nkulunkulu wabokhokho benu angaphindze anandzise+ tikhatsi letiyinkhulungwane, anibusise njengobe anetsembisile.+ 12 Ngitawukhona kanjani kunetfwala ngingedvwa njengobe ningumtfwalo, ngetfwale netinkinga tenu kanye nalokukhonona kwenu?+ 13 Etiveni tenu, khetsani emadvodza lahlakaniphile, nalanekucondza kanye nelwati, futsi ngitawabeka abe tinhloko tenu.’+ 14 Nine nangiphendvula natsi: ‘Loku lotsi asikwente kukahle.’ 15 Ngako-ke ngatsatsa lamadvodza latinhloko tetive tenu, lokungemadvodza lahlakaniphile nalanelwati, ngawabeka ngetulu kwenu, aba baholi betinkhulungwane, baholi bemakhulu, baholi bemashumi lasihlanu, baholi bemashumi kanye netindvuna tetive tenu.+

16 “Ngaleso sikhatsi ngatjela nebehluleli benu ngatsi: ‘Naniteka licala emkhatsini webantfu bakini, nibokwehlulela ngekulunga+ emkhatsini wem-Israyeli nemnakabo nobe nemuntfu wekuhamba.+ 17 Nanehlulela akukafaneli nikhetse.+ Umuntfukatana kufanele nimlalele ngendlela lefanako nemuntfu lomkhulu.+ Ningabobesaba bantfu,+ ngobe kwehlulela kwaNkulunkulu.+ Nangabe indzaba imatima kakhulu kini, niboyendlulisela kimi kuze ngiyive.’+ 18 Ngaleso sikhatsi nganitjela tonkhe tintfo lokufanele nitente.

19 “Sesuka eHorebe sadzabula lonkhe lelihlane lelikhulu nalelesabekako,+ lenalibona ngesikhatsi siya esifundzeni lesinetintsaba sema-Amori,+ njengobe nje Jehova Nkulunkulu wetfu abesitjelile, futsi sagcine sifikile eKhadeshi-bhaneya.+ 20 Ngemuva kwaloko ngatsi kini: ‘Senifikile esifundzeni lesinetintsaba sema-Amori, leso Jehova Nkulunkulu wetfu lasinika sona. 21 Jehova Nkulunkulu wenu uninikete lelive. Hambani nilitsatse libe lenu, njengobe nje Jehova Nkulunkulu wabokhokho benu anitjelile.+ Ngako-ke ningesabi.’

22 “Kodvwa-ke nonkhe neta kimi natsi: ‘Asitfumele emadvodza embikwetfu kuze ayewusihlolela lelive futsi abuye asichazele kutsi nguyiphi indlela lokufanele siyitsatse nekutsi anjani emadolobha lesitawatfola.’+ 23 Lombono ngawutsandza, ngako ngakhetsa emadvodza langu-12 emkhatsini wenu, kwaba yindvodza yinye esiveni ngasinye.+ 24 Lamadvodza esuka akhuphukela esifundzeni lesinetintsaba,+ efika eSigodzini sase-Eshkoli futsi asihlola. 25 Akha titselo kuleyo ndzawo, atetfwala abuya nato kitsi, futsi asitjela atsi: ‘Lelive Jehova Nkulunkulu wetfu lasinika lona lihle.’+ 26 Kodvwa nine nala kukhuphukela kulelo live, nemyalo waJehova Nkulunkulu wenu anizange niwulalele.+ 27 Benisolo nikhonona emathendeni enu nitsi: ‘Jehova wasikhipha eveni laseGibhithe ngobe asenyanya, kungako nje asinikela kuma-Amori kuze asibhubhise asicedze. 28 Kantsi injani lendzawo lesiya kuyo? Bomnaketfu basente sesaba,*+ ngobe batsite: “Labantfu banemandla futsi badze kunatsi, nemadolobha abo makhulu futsi anetivikelo leticinile letifika emazulwini,*+ siphindze sabona nemadvodzana a-Anaki+ kuleya ndzawo.”’

29 “Ngako ngatsi kini: ‘Labantfu abanganetfusi futsi abanganesabisi.+ 30 Jehova Nkulunkulu wenu utawuhamba embikwenu futsi anilwele,+ njengobe nje nani natibonela eGibhithe.+ 31 Nabona nasehlane kutsi Jehova Nkulunkulu wenu wanetfwala njani kuto tonkhe tindzawo lebenihamba kuto naze nefika lapha, njengababe atfwele indvodzana yakhe.’ 32 Ngisho nangetulu kwako konkhe loku, anizange nikholwe kuJehova Nkulunkulu wenu,+ 33 lobekahamba embikwenu kuze anitfolele indzawo lenitawumisa kuyo emathende enu. Ebusuku abebonakala ngemlilo, emini abonakale ngelifu kuze anikhombise indlela lokufanele nihambe ngayo.+

34 “Jehova abesolo akuva konkhe loku lebenikusho, ngako watfukutsela futsi wafunga+ watsi: 35 ‘Kute ngisho namunye kulabantfu balesitukulwane lotawubona lelive lelihle lengafunga kutsi ngitalinika bobabe benu,+ 36 ngaphandle kwaKhalebi indvodzana yaJefune. Yena utalibona, futsi lelive lanyatsele kulo ngitalinika yena nemadvodzana akhe, ngobe ulandzele Jehova ngenhlitiyo yakhe yonkhe.*+ 37 (Jehova wangitfukutselela nami ngenca yenu, watsi: “Nawe angeke ungene kulelive.+ 38 Joshuwa indvodzana yaNuni, loyinceku yakho,+ nguye lotawungena kulelive.+ Mcinise*+ ngobe utawungenisa ema-Israyeli kulo.”) 39 Ngetulu kwaloko, bantfwana benu lenitsite batawutfunjwa,+ nemadvodzana enu lamuhla langakwati lokuhle nobe lokubi atawungena kulelive, futsi ngitawaniketa lona libe ngelawo.+ 40 Kodvwa nine, jikani ngendlela lehamba ngaseLwandle Lolubovu,+ niye ehlane.’

41 “Naniva loku natsi kimi: ‘Sonile kuJehova. Nyalo sitawukhuphuka siyewukulwa njengobe nje Jehova Nkulunkulu wetfu ashito.’ Ngako ngamunye wenu watsatsa tikhali takhe temphi, futsi benicabanga kutsi nitawenyuka melula kulentsaba+ kuze niyewukulwa. 42 Kodvwa Jehova watsi kimi: ‘Batjele naku: “Ningakhuphuki niyewukulwa, ngobe angeke ngibe nani.+ Nanikhuphuka, titsa tenu titawunincoba.”’ 43 Ngakhuluma nani kodvwa aningilalelanga. Anizange niwulalele umyalo waJehova futsi nachubeka nakhuphukela kulentsaba. 44 Ema-Amori labehlala kulentsaba aphuma anihlangabeta. Njengetinyosi, anicosha futsi anihlakata nagcwala eSeyiri naze nayofika eHoma. 45 Nabese niyabuya, nakhala embikwaJehova, kodvwa Jehova akazange anilalele nome aninake. 46 Kungako nachubeka nihleti eKhadeshi sonkhe leso sikhatsi.

2 “Ngemuva kwaloko sajika saya ehlane ngendlela yaseLwandle Lolubovu njengobe nje Jehova abengitjelile,+ futsi sahamba sikhatsi lesidze sigudla iNtsaba iSeyiri. 2 Ekugcineni Jehova watsi kimi: 3 ‘Sekuphele sikhatsi lesidze nigudla lentsaba. Jikani niye ngasenyakatfo. 4 Khuluma nalabantfu utsi: “Nitakwendlula emnceleni wabomnakenu, lokubantfwana ba-Esawu+ labahlala eSeyiri.+ Batawunesaba,+ kodvwa kufanele nicaphelisise. 5 Ningalwi* nabo ngobe ngeke ngininike ngisho nalencane indzawo yabo, ngisho nendzawo yekubeka lunyawo, ngobe iNtsaba iSeyiri ngiyinike Esawu kutsi ibe lifa lakhe.+ 6 Kufanele nibanike imali yekudla lenitakudla kanye neyemanti labataninika wona.+ 7 Ngobe Jehova Nkulunkulu wenu unibusisile kuko konkhe lenikwentile. Yena ulwati kahle neluhambo lwenu lwakulelihlane lelikhulu. Kuleminyaka lengu-40, Jehova Nkulunkulu wenu abesolo anani, futsi anikaze neswele lutfo.”’+ 8 Ngako sendlula ngakubanaketfu, lokubantfwana ba-Esawu+ labahlala eSeyiri, sayigega indlela lehamba ngase-Arabha, e-Elathi nase-Esiyoni-geberi.+

“Ngemuva kwaloko sajika sahamba ngendlela yasehlane lakaMowabi.+ 9 Jehova wabese utsi kimi: ‘Ningacabani nemaMowabi nobe nilwe nawo, ngobe kute ngisho nalencane indzawo eveni lawo lengitaninika yona kutsi ibe ngeyenu, ngenca yekutsi i-Ari ngayinika bantfwana baLoti.+ 10 (Kuleyo ndzawo bekuke kwahlala ema-Emi,+ lobekubantfu labanemandla, labanyenti nalabadze njengema-Anaki. 11 EmaRefa+ nawo abetsatfwa njengema-Anaki,+ futsi bantfu bakaMowabi bebawabita ngekutsi ngema-Emi. 12 Ngaphambi kwaloku, emaHori+ abehlala eSeyiri, kodvwa bantfwana ba-Esawu bayitsatsa, bawancoba base bahlala kulendzawo yawo,+ njengobe nje ema-Israyeli atawukwenta kulelive lelitawuba ngelawo, lelo Jehova latawaniketa lona.) 13 Ngako-ke hambani niwele Sigodzi saseZeredi.’+ Sabese siyahamba-ke sasewela lesigodzi. 14 Kwasitsatsa iminyaka lengu-38 kuhamba sisuke eKhadeshi-bhaneya size sewele sigodzi saseZeredi, kwaze kwaba ngulapho sifa sonkhe lesitukulwane semadvodza labekasebutfweni, njengobe nje Jehova abefungile kuwo.+ 15 Sandla saJehova besimelene nawo, futsi wawabhubhisa wawacedza kulendzawo lebekuhlalwa kuyo, aze aphela onkhe.+

16 “Kwatsi nje nasekafe onkhe lamadvodza labekasebutfweni lemphi,+ 17 Jehova waphindze wakhuluma nami watsi: 18 ‘Lamuhla nitakwendlula e-Ari, lokuyindzawo yemaMowabi. 19 Nanisondzela ngakuma-Amoni, ningawahluphi nobe niwasukele ngobe kute ngisho nendzawo lencane lengitaninika yona eveni lawo, ngobe ngalinika bantfwana baLoti kutsi libe ngelabo.+ 20 Lendzawo nayo beyitsatfwa njengelive lemaRefa.+ (EmaRefa ake ahlala kuyo, futsi ema-Amoni abewabita ngekutsi ngemaZamzumi. 21 Abebantfu labanemandla, labanyenti nalabadze njengema-Anaki,+ kodvwa Jehova wawancoba embikwema-Amoni, futsi ema-Amoni awacosha lamaRefa, abese ahlala kulendzawo yawo. 22 Nguloko Nkulunkulu lakwentela nebantfwana ba-Esawu lesebahlala eSeyiri,+ ngesikhatsi ancoba emaHori+ embikwabo, kute batsatse lendzawo yawo futsi bahlale kuyo kudzimate kube ngulamuhla. 23 Ema-Avi wona abehlala etindzaweni letingakabiyelwa, lebetihamba tize tiyewufika eGaza,+ kwaze kwaba ngulapho emaKhaftori+ labesuka eKhaftori* awancoba futsi atsatsa nendzawo yawo.)

24 “‘Hambani newele sigodzi sase-Anoni.+ Sihoni+ um-Amori, inkhosi yaseHeshboni ngimnikele esandleni senu. Ngako hambani nitsatse lelive lakhe libe ngelenu futsi nilwe naye. 25 Lamuhla ngitakwenta kutsi bonkhe bantfu ngephansi kwemazulu batfutfumele futsi besabe nabeva ngani. Batawudideka futsi betfuke* ngenca yenu.’+

26 “Ngabese ngitfumela titfunywa, tesuka ehlane laseKhedemothi+ taya kuSihoni inkhosi yaseHeshboni, kuze tendlulisele nankha emavi ekuthula:+ 27 ‘Ngicela kwendlula eveni lakho. Ngitawuhlala kulomgwaco, ngingajikeli ngesekudla nobe ngesencele.+ 28 Ngitawukudla loko longinika kona kuphela, nginatse nemanti lotangitsengisela wona. Ngicela nje ungivumele ngendlule ngetinyawo kulelive lakho, 29 ngize ngewelele eJordane, lokulive Jehova Nkulunkulu wetfu lasinike lona. Nguloko lengakwentelwa bantfwana ba-Esawu labahlala eSeyiri nemaMowabi lahlala e-Ari.’ 30 Kodvwa Sihoni inkhosi yaseHeshboni wala kutsi sendlule, ngobe Jehova Nkulunkulu wenu wamvumela kutsi abe nenkhani+ nenhlitiyo yakhe ibe lukhuni kuze amnikele esandleni senu, njengobe nje entile.+

31 “Ngemuva kwaloko Jehova watsi kimi: ‘Sihoni sengivele ngimnikele esandleni senu, yena nelive lakhe. Ngako ngenani nilitsatse libe ngelenu.’+ 32 Ngesikhatsi Sihoni nabo bonkhe bantfu bakhe baphuma kuze batekulwa natsi eJahasi,+ 33 Jehova Nkulunkulu wetfu wamnikela esandleni setfu futsi samncoba, yena nemadvodzana akhe kanye nabo bonkhe bantfu bakhe. 34 Ngaleso sikhatsi sancoba onkhe emadolobha akhe futsi onkhe lamadolobha sawanikela ekubhujisweni, lokufaka ekhatsi emadvodza, bafati, nebantfwana. Kute umuntfu lowasindza.+ 35 Tsine satitsatsela imfuyo kuphela kanye netintfo lebesititfole kulamadolobha lesawancoba. 36 Kute lidolobha lesehluleka kufika kulo, kusuka e-Aroyeri+ leseceleni kweSigodzi sase-Anoni (lokufaka ekhatsi nelidolobha lelikulesigodzi) kuze kuyewufika eGileyadi. Jehova Nkulunkulu wetfu wawanikela kitsi onkhe lamadolobha.+ 37 Kodvwa-ke anizange niye eveni lema-Amoni,+ kuyo yonkhe indzawo leseceleni kweSigodzi saseJabhoki,+ nasemadolobheni lasesifundzeni lesinetintsaba kanye nakuto tonkhe letinye tindzawo Jehova Nkulunkulu wetfu labetsite singayi kuto.

3 “Sabese siyesuka sakhuphuka ngeNdlela yaseBhashani. Ogi, inkhosi yaseBhashani waphuma akanye nabo bonkhe bantfu bakhe kuze alwe natsi e-Edreyi.+ 2 Ngako Jehova watsi kimi: ‘Ningamesabi, ngobe ngitawunikela yena nabo bonkhe bantfu bakhe kanye nelive lakhe esandleni senu, futsi nitakwenta kuye loko lenakwenta kuSihoni, inkhosi yema-Amori lobekahlala eHeshboni.’ 3 Ngaleyo ndlela Jehova Nkulunkulu wetfu wanikela Ogi inkhosi yaseBhashani kanye nabo bonkhe bantfu bakhe esandleni setfu. Sachubeka sibabulala kwaze kwangasali ngisho namunye kubo. 4 Sabese sitsatsa onkhe emadolobha akhe, kute ngisho nalinye lesingazange silitsatse. Kwakungemadolobha langu-60 aseBhashani,+ lokungiso sonkhe sifundza sase-Agobhu lesisembusweni wa-Ogi. 5 Onkhe lamadolobha abevikelwe ngelubondza loluphakeme, ngemagede kanye nemishudo, futsi kwakunalamanye emadolobha lamanyenti langakabiyelwa. 6 Kodvwa sawanikela ekubhujisweni,+ njengobe besentile kuSihoni inkhosi yaseHeshboni ngesikhatsi siwanikela ekubhujisweni onkhe emadolobha akhe, lokufaka ekhatsi emadvodza, bafati kanye nebantfwana.+ 7 Saphindze satsatsa yonkhe imfuyo kanye netintfo lesatitfola kulawo madolobha, kwaba kwetfu.

8 “Ngaleso sikhatsi satsatsa nelive lemakhosi lamabili ema-Amori+ labesesifundzeni saseJordane, kusukela eSigodzini sase-Anoni kuya eNtsabeni iHemoni+ 9 (lentsaba emaSidoni abeyibita ngekutsi yiSiriyoni, ema-Amori wona ayibita ngekutsi yiSeniri), 10 satsatsa onkhe emadolobha labesetintsabeni, nayo yonkhe iGileyadi, kanye nayo yonkhe iBhashani kuze kuyewufika eSalekha nase-Edreyi,+ lokungemadolobha labesembusweni wa-Ogi eBhashani. 11 Ogi inkhosi yaseBhashani besekunguye wekugcina losele kumaRefa. Luhlaka lwekumngcwaba* belwentiwe ngensimbi* futsi nalamuhla lusekhona eRabha, lokuyindzawo yema-Amoni. Loluhlaka lungemamitha langaba mane* budze kanye nemamitha langaba mabili* bubanti, ngekwesikali lesisemtsetfweni. 12 Ngaleso sikhatsi satsatsa lelive laba letfu, kusukela e-Aroyeri+ lengaseSigodzini sase-Anoni, kanye nencenye yesifundza saseGileyadi lesinetintsaba, futsi emadolobha alo ngiwanikete sive sakaRubeni nesakaGadi.+ 13 Incenye yesive sakaManase+ ngiyinike indzawo yaseGileyadi lebeseyisele kanye nayo yonkhe iBhashani, lesembusweni wa-Ogi. Sonkhe sifundza sase-Agobhu lesiseBhashani besatiwa ngekutsi live lemaRefa.

14 “Jayire+ indvodzana yaManase wasitsatsa sonkhe sifundza sase-Agobhu+ waze wayewufika emnceleni wemaGeshuri kanye nemaMakhathi,+ futsi leto tindzawo taseBhashani watetsa ngelibito lakhe. Kuze kube ngulamuhla tibitwa ngekutsi yiHavothi-jayire.*+ 15 IGileyadi yona ngiyinikete Makhire.+ 16 Sive sakaRubeni nesakaGadi+ ngisinike indzawo lesuka eGileyadi kuya eSigodzini sase-Anoni, futsi umncele wayo usemkhatsini walesigodzi. Lendzawo ichubekela naseJabhoki, lokusigodzi lesingumncele wema-Amoni, 17 iphindze ichubekele nase-Arabha, naseJordane kanye nasendzaweni leseceleni kwayo, kusukela eKhinerethi kuye eLwandle Lwase-Arabha, lokuLwandle Lweluswayi* lolungephansi kwePhisga ngasemphumalanga.+

18 “Ngabese nginitjela nangu umyalo: ‘Jehova Nkulunkulu wenu uninike lelive kutsi libe lenu. Onkhe emadvodza lanemandla emkhatsini wenu atawutsatsa tikhali futsi ewele embikwabomnakenu, ema-Israyeli.+ 19 Bafati benu, bantfwana benu kanye nemfuyo yenu (ngati kahle kutsi ninemfuyo lenyenti) ngibo kuphela labatawuchubeka bahleti kulamadolobha lengininike wona, 20 kuze kube ngulapho Jehova anika bomnakenu kuthula njengobe nje entile kini, futsi nabo sebalitsetse laba labo lelive Jehova Nkulunkulu wenu latawubanika lona ngesheya kweJordane. Ngemuva kwaloko nguloyo naloyo kini sekangabuyela endzaweni yakhe lengimnike yona.’+

21 “Ngaleso sikhatsi, naku lengakusho kuJoshuwa:+ ‘Wena utibonele ngewakho loko Jehova Nkulunkulu wakho lakwentile kulamakhosi lamabili. Jehova utawukwenta intfo lefanako nakuyo yonkhe lemibuso lenitakwewela niye kuyo.+ 22 Kufanele ningayesabi, ngobe Jehova Nkulunkulu wenu nguye lonilwelako.’+

23 “Ngaleso sikhatsi ngancenga Jehova ngatsi: 24 ‘Awu Nkhosi Lephakeme Jehova, sewuvele ucalile kukhombisa inceku yakho bukhulu bakho kanye nesandla sakho lesinemandla,+ ngobe ngumuphi nje lomunye nkulunkulu emazulwini nobe emhlabeni lowenta tintfo letinkhulu kangaka njengawe?+ 25 Ngicela ungivumele ngewele futsi ngibone lelive lelihle lelingesheya kweJordane, lesifundza lesihle lesinetintsaba kanye neLebanoni.’+ 26 Kodvwa Jehova abesolo angitfukutselele ngenca yenu,+ ngako akazange angilalele kulebengikusho. Kunaloko Jehova watsi kimi: ‘Sekwenele! Ungaphindze ukhulume nami ngalendzaba. 27 Khuphukela esicongweni sePhisga,+ ubuke enshonalanga, enyakatfo, eningizimu kanye nasemphumalanga, ubuke lelive ngobe ngeke uyewele leJordane.+ 28 Beka Joshuwa+ kutsi abe ngumholi, umkhutsate uphindze umcinise ngobe nguye lotakwewela+ embikwalabantfu futsi nguye lotawubangenisa kulelive lotalibona.’ 29 Konkhe loku kwenteka ngesikhatsi sisahleti esigodzini lesisembikweBhethi-pheyori.+

4 “Nine ma-Israyeli, lalelani lemitsetfo nalemiyalo lenginifundzisa yona nalokufanele niyigcine, kuze niphile+ futsi ningene nilitsatse lelive Jehova Nkulunkulu wabokhokho benu laninike lona. 2 Ningengeti lutfo kulamavi lenginitjela wona, futsi ningakhiphi lutfo kuwo,+ kuze nigcine imitsetfo yaJehova Nkulunkulu wenu lenginitjela yona.

3 “Natibonela ngewenu loko Jehova lakwenta endzabeni yaBhali wasePheyori. Jehova Nkulunkulu wenu wabacotfula bonkhe bantfu lebebalandzela Bhali.+ 4 Kodvwa nonkhe nine lenibambelele kuJehova Nkulunkulu wenu nisaphila nalamuhla. 5 Mine nginifundzisile imitsetfo kanye nemiyalo,+ njengobe nje Jehova Nkulunkulu wami angitjelile, kuze niyigcine nasenikulelive lenitalitsatsa libe ngelenu. 6 Kufanele niyigcine ngekucophelela+ ngobe loku kutawukwenta bantfu labatakuva ngayo yonkhe lemitsetfo babone kutsi nihlakaniphile+ futsi ninekucondza.+ Labantfu batawutsi: ‘Kuyacaca kutsi lesive lesikhulu sihlakaniphile futsi sinekucondza.’+ 7 Ngusiphi nje sive lesikhulu lesinabonkulunkulu labasondzelene naso ngendlela Jehova Nkulunkulu wetfu lasedvute ngayo natsi nobe nini nasimbita?+ 8 Ngusiphi nje sive lesikhulu lesinemitsetfo nemiyalo lelungile njengawo wonkhe loMtsetfo lengininika wona lamuhla?+

9 “Nibocaphela niphindze nitigadzisise kuze ningatikhohlwa tintfo lenitibonile, futsi tingasuki etinhlitiyweni tenu, kuko konkhe kuphila kwenu. Nibotitjela emadvodzana enu nebatukulu benu.+ 10 Ngelilanga lenema ngalo embikwaJehova Nkulunkulu wenu eHorebe, Jehova watsi kimi: ‘Hlanganisa labantfu ndzawonye embikwami kuze beve emavi lengitabatjela wona,+ khona batewufundza kungesaba+ kuwo onkhe emalanga ekuphila kwabo emhlabeni futsi bafundzise nemadvodzana abo.’+

11 “Ngako nasondzela nema ngephansi kwalentsaba lebeyivutsa umlilo kuyewufika etulu emazulwini.* Kwakumnyama futsi kunemafu lamakhulu lamnyama.+ 12 Jehova wabese ukhuluma nani akulomlilo.+ Naweva emavi akhe, kodvwa anibonanga lutfo+—kwakuvakala livi nje kuphela.+ 13 Wanitjela ngesivumelwane sakhe,+ leso laniyala kutsi nisigcine, lokuyiMitsetfo Lelishumi.*+ Ngemuva kwaloko lemitsetfo wayibhala etibhelekeceni tematje letimbili.+ 14 Ngaleso sikhatsi Jehova wangitjela kutsi nginifundzise imitsetfo nemiyalo lokufanele niyigcine kulelive lenitalitsatsa libe ngelenu.

15 “Ngako-ke, njengobe ningabonanga lutfo ngelilanga Jehova lakhuluma ngalo nani eHorebe, ekhatsi emlilweni, ticaphelisiseni 16 kute ningenti lokubi ngekutentela tithico letibatiwe letingumfanekiso wanobe yini, ningenti nemfanekiso wemuntfu lomdvuna nobe walomsikati,+ 17 nobe umfanekiso wanobe ngusiphi silwane lesisemhlabeni, newanobe nguyiphi inyoni lendiza esibhakabhakeni,+ 18 nobe umfanekiso wanobe yini lehumako emhlabatsini, newanobe nguyiphi inhlanti lesemantini ngephansi kwemhlaba.+ 19 Naniphakamisa emehlo enu nibuka emazulwini, futsi nibone lilanga, inyeti netinkhanyeti, lokungilo lonkhe libutfo lasemazulwini, ningalingeki bese niyakukhotsamela niphindze nikukhonte.+ Leto tintfo, Jehova Nkulunkulu wenu utinike bonkhe bantfu labangephansi kwemazulu. 20 Kodvwa nine Jehova wanitsatsa wanikhipha eGibhithe, eveni lelifana nemlilo lomkhulu wekuncibilikisa insimbi, kuze nibe bantfu bakhe,*+ njengobe nje ningibo lamuhla.

21 “Jehova wangitfukutselela ngenca yenu,+ wafunga nekutsi ngeke ngiyewele iJordane nobe ngingene kulelive lelihle Jehova Nkulunkulu wenu laninike lona kutsi libe lifa lenu.+ 22 Mine ngitawufela lapha, ngeke ngiyewele iJordane,+ kodvwa nine nitayewela, nilitsatse lelive lelihle. 23 Nibociniseka kutsi anisikhohlwa sivumelwane Jehova Nkulunkulu wenu lasenta nani.+ Ningatenteli tithico letibatiwe letingumfanekiso wanobe yini, njengobe nje Jehova Nkulunkulu wenu analele kutsi nente loko.+ 24 Ngobe Jehova Nkulunkulu wenu ungumlilo locotfulako,+ unguNkulunkulu lofuna kukhontwe yena yedvwa.+

25 “Naseninemadvodzana kanye nebatukulu, seniphile nesikhatsi lesidze kulelive futsi nenta ngekukhohlakala, nakha tithico letibatiwe+ tanobe nguluphi luhlobo, naphindze nenta lokubi emehlweni aJehova Nkulunkulu wenu futsi ngaleyo ndlela namcansula,+ 26 lamuhla ngenta emazulu nemhlaba abe bofakazi labamelene nani, bekutsi ngekushesha nitawuphela nya kulelive lenitakwewela iJordane kuze nilitsatse libe ngelenu. Ngeke nihlale sikhatsi lesidze kulo kodvwa nitawucotfulwa niphele.+ 27 Jehova utanihlakatela etiveni,+ futsi kutawusindza labambalwa kuphela kini+ nanisemkhatsini waletive Jehova latawube anihlakatele kuto. 28 Kuleyo ndzawo nitawukhonta bonkulunkulu labentiwe bantfu ngesigodvo nangematje,+ lokubonkulunkulu labangaboni, labangeva, labangadli nalabangahogeli.

29 “Nanitawufuna Jehova Nkulunkulu wenu nikuleyo ndzawo, nimfune ngenhlitiyo yenu yonkhe nangemphefumulo* wenu wonkhe,+ nakanjani nitamtfola.+ 30 Ngekuhamba kwesikhatsi, nasenicindzeteleke kakhulu futsi tonkhe letintfo setentekile kini, nitawubuyela kuJehova Nkulunkulu wenu niphindze nilalele livi lakhe.+ 31 Ngobe Jehova Nkulunkulu wenu unguNkulunkulu lonesihawu.+ Ngeke anilahle nobe anicotfule nobe asikhohlwe sivumelwane lafunga ngaso kubokhokho benu.+

32 “Nyalo-ke butani ngemalanga asendvulo, ngaphambi kwesikhatsi senu, kusukela ngelilanga Nkulunkulu ladala ngalo umuntfu emhlabeni; hlolani kusukela ngale kwemazulu kuya ngale kwawo. Ikhona yini intfo lenkhulu kangaka leyake yenteka nobe lenjengayo leyake yevakala?+ 33 Bakhona yini labanye bantfu labake beva Nkulunkulu akhuluma asemlilweni, ngendlela nine lenamuva ngayo kodvwa nachubeka niphila?+ 34 Nkulunkulu wake watitsatsela yini sive emkhatsini walesinye sive, asebentisa tehlulelo, tibonakaliso, timangaliso,+ imphi,+ sandla lesinemandla,+ nesandla leselulekile kanye netintfo letimangalisako,+ njengobe Jehova Nkulunkulu wenu anentela eGibhithe embikwemehlo enu? 35 Nine nikhonjisiwe letintfo kuze nati kutsi Jehova unguNkulunkulu weliciniso,+ kute lomunye ngaphandle kwakhe.+ 36 Wanenta neva livi lakhe lelisuka emazulwini kuze aneluleke, wenta nekutsi nibone umlilo lomkhulu emhlabeni, futsi neva nemavi akhe labephuma emlilweni.+

37 “Ngenca yekutsi abebatsandza bokhokho benu nangenca yekutsi ukhetse intalelwane* yabo leta emvakwabo,+ wanikhulula embikwakhe eGibhithe asebentisa emandla akhe lamakhulu. 38 Waticosha embikwenu tive letinkhulu naletinemandla kunani, kuze aningenise futsi aninike live lato libe lifa lenu, njengobe nje kunjalo lamuhla.+ 39 Ngako-ke lamuhla yatini futsi nikhumbule kutsi Jehova unguNkulunkulu weliciniso etulu emazulwini naphansi emhlabeni.+ Kute lomunye Nkulunkulu ngaphandle kwakhe.+ 40 Niboyigcina lemitsetfo nalemiyalo yakhe lenginitjela yona lamuhla, kuze kunihambele kahle nine nemadvodzana enu latawukuta emvakwenu, khona nitewuhlala sikhatsi lesidze kulelive Jehova Nkulunkulu wenu laninike lona.”+

41 Ngaleso sikhatsi Mosi wakhetsa emadolobha lamatsatfu emphumalanga yeJordane.+ 42 Nakwenteka lotsite abulala umuntfu wakubo ngeliphutsa, kodvwa kungasiko kutsi abemtondza,+ bekufanele abalekele kulinye lalamadolobha futsi achubeke aphila.+ 43 Lamadolobha bekuyiBheseri+ lebeyisentsabeni ehlane, yona iyesive sakaRubeni, kube yiRamothi+ leseGileyadi, yona iyesive sakaGadi, bese kuba yiGolani+ leseBhashani, yona iyesive sakaManase.+

44 Lona nguMtsetfo+ Mosi lawunika bantfu baka-Israyeli. 45 Nguleto-ke tikhumbuto, timiso nemiyalo Mosi layinika ema-Israyeli ngemuva kwekuphuma kwawo eGibhithe,+ 46 ngesikhatsi asesifundzeni saseJordane, esigodzini lesibukene neBhethi-pheyori,+ leseveni laSihoni inkhosi yema-Amori lobekahlala eHeshboni,+ loyo Mosi nema-Israyeli lamncoba ngemuva kwekuphuma eGibhithe.+ 47 Ema-Israyeli atsatsa live laSihoni nelive la-Ogi+ inkhosi yaseBhashani, lokungemakhosi lamabili ema-Amori labesesifundzeni lesisemphumalanga yeJordane, 48 kusuka e-Aroyeri+ leseceleni kwesigodzi sase-Anoni, kuze kuyewufika eNtsabeni iSiyoni, lokuyiHemoni,+ 49 atsatsa nayo yonkhe i-Arabha, lesesifundzeni lesisemphumalanga yeJordane, kuze kuyewufika eLwandle lwase-Arabha,* lolungephansi kwePhisga.+

5 Mosi wabese ubita onkhe ema-Israyeli, watsi kuwo: “Ma-Israyeli, lalelani lemitsetfo nalemiyalo lenginitjela yona lamuhla. Kufanele niyifundze niphindze niyigcine ngekucophelela. 2 Jehova Nkulunkulu wetfu wenta sivumelwane natsi eHorebe.+ 3 Lesivumelwane Jehova akasentanga nabokhokho betfu kodvwa wasenta natsi, sonkhe tsine lesisaphila lamuhla. 4 Jehova wakhuluma nani buso nebuso asemlilweni entsabeni.+ 5 Ngaleso sikhatsi mine bengime emkhatsini wenu naJehova+ kuze ngendlulisele emavi aJehova kini, ngobe benesaba kukhuphukela kulentsaba ngenca yalomlilo.+ Nkulunkulu watsi:

6 “‘Mine nginguJehova Nkulunkulu wakho, lowakukhipha eveni laseGibhithe, live lebewugcilatwa kulo.+ 7 Ungacali ube nalabanye bonkulunkulu ngaphandle kwami.*+

8 “‘Ungatenteli sithico+ nobe umfanekiso wanobe yini lesemazulwini, nobe lesemhlabeni nobe lesemantini ngephansi kwemhlaba. 9 Ungakukhotsameli nobe uyengelwe kutsi ukukhonte,+ ngobe mine Jehova Nkulunkulu wakho nginguNkulunkulu lofuna kutsi kukhontwe yena yedvwa.+ NginguNkulunkulu loletsa sijeziso sesono lesentiwa bobabe, ngisiletsele emadvodzana abo, situkulwane sesitsatfu nesitukulwane sesine salabo labangitondzako,+ 10 kodvwa ngikhombise lutsandvo lolucotfo nasetinkhulungwaneni tetitukulwane talabo labangitsandzako futsi labagcina imiyalo yami.

11 “‘Ungalisebentisi kabi libito laJehova Nkulunkulu wakho,+ ngobe Jehova ngeke amyekele angamjezisi loyo longalihloniphi libito lakhe.+

12 “‘Ubogcina liSabatha futsi ulitsatse njengalelingcwele, njengobe nje Jehova Nkulunkulu wakho akutjelile.+ 13 Utawusebenta futsi wente tonkhe tintfo takho emalanga lasitfupha,+ 14 kodvwa lilanga lesi-7 lilisabatha kuJehova Nkulunkulu wakho.+ Kute umsebenti lokufanele uwente,+ wena kanye nendvodzana nobe indvodzakati yakho, sigcili nobe sigcilikati sakho, inkhabi nobe imbongolo yakho, kanye nanobe ngusiphi silwane losifuyile, ngisho nemuntfu losihambi lohlala emagcekeni* akho,+ kuze sigcili nesigcilikati sakho sitfole kuphumula njengawe.+ 15 Khumbula kutsi waba sigcili eveni laseGibhithe nekutsi Jehova Nkulunkulu wakho wakukhipha kulelo live ngesandla sakhe lesinemandla nangesandla sakhe leseluliwe.+ Kungako Jehova Nkulunkulu wakho akutjela kutsi ugcine lilanga leliSabatha.

16 “‘Ubohlonipha babe wakho namake wakho,+ njengobe nje Jehova Nkulunkulu wakho ashito, kuze utewuphila sikhatsi lesidze futsi uphumelele* kulelive Jehova Nkulunkulu wakho lakunika lona.+

17 “‘Ungabulali.+

18 “‘Ungaphingi.+

19 “‘Ungebi.+

20 “‘Ungafakazi emanga ngemuntfu wakini.+

21 “‘Ungamfisi umfati wemuntfu wakini.+ Ungayihawukeli indlu nobe insimu yakhe, nobe sigcili nobe sigcilikati sakhe, nobe inkhabi nobe imbongolo yakhe kanye nanobe yini lanayo.’+

22 “Lemitsetfo* Jehova wayisho kini nonkhe entsabeni, ngelivi lelikhulu asemlilweni, asefini, nasebumnyameni lobukhulu,+ futsi akengetanga lutfo kuyo. Ngemuva kwaloko wayibhala etibhelekeceni tematje letimbili wase unginiketa yona.+

23 “Kwatsi ngekushesha nje naniva lelivi lebelivela kulobumnyama, ngesikhatsi lentsaba isavutsa,+ tonkhe tinhloko tetive tenu kanye nemadvodza lamadzala eta kimi. 24 Natsi: ‘Jehova Nkulunkulu wetfu usikhombise inkhatimulo yakhe kanye nebukhulu bakhe, seva nelivi lakhe livela kulomlilo.+ Lamuhla sibonile kutsi Nkulunkulu angakhuluma nemuntfu futsi loyo muntfu achubeke aphila.+ 25 Kungani-ke kufanele sife? Phela lomlilo lomkhulu ungasicedza nya. Nasichubeka siva lelivi laJehova Nkulunkulu wetfu, nakanjani sitawufa. 26 Ukhona yini umuntfu love livi laNkulunkulu lophilako livela emlilweni njengobe tsine silivile futsi wachubeka aphila? 27 Wena kufanele ukhuphuke uyewukuva konkhe loko Jehova Nkulunkulu wetfu lakushoko, futsi nguwe lotasitjela tonkhe tintfo Jehova Nkulunkulu wetfu latawutisho kuwe, tsine sitawutilalela futsi sitente.’+

28 “Jehova wakuva loko lebenikusho kimi, ngako Jehova watsi kimi: ‘Ngikuvile loko labantfu labakushito kuwe, futsi konkhe kukahle.+ 29 Nangabe nje tinhlitiyo tabo tingahlale tingesaba,+ futsi bagcine yonkhe imitsetfo yami,+ tintfo tingabahambela kahle, bona nemadvodzana abo, kuze kube phakadze!+ 30 Ngako-ke hamba ufike utsi kubo: “Buyelani emathendeni enu.” 31 Kodvwa wena kufanele uhlale nami lapha. Mine ngitakutjela yonkhe imitsetfo, timiso, nemiyalo lokufanele ubafundzise yona. Konkhe loku kufanele bakugcine kulelive lengibaniketa lona kutsi balitsatse libe labo.’ 32 Nine nibociniseka kutsi nenta njengobe Jehova Nkulunkulu wenu anitjelile.+ Ningabophambuka niye ngesekudla nobe ngesencele.+ 33 Kufanele nihambe kuyo yonkhe indlela Jehova Nkulunkulu wenu lanitjele+ yona kuze nitewuphila, niphumelele, futsi niphile sikhatsi lesidze kulelive lenitawulitsatsa libe ngelenu.+

6 “Ngulena-ke imitsetfo, timiso kanye nemiyalo Jehova Nkulunkulu wenu laninike yona kuze anifundzise, khona niteyigcina nanewelela kulelive lenitawulitsatsa libe ngelenu, 2 niphindze nimesabe Jehova Nkulunkulu wenu, futsi nine nemadvodzana enu kanye nebatukulu benu+ niyigcine yonkhe imitsetfo nemiyalo yakhe lengininika yona kuwo onkhe emalanga ekuphila kwenu, kuze nitewuphila sikhatsi lesidze.+ 3 Kufanele nilalele nine ma-Israyeli, niyigcine ngekucophelela lemitsetfo kute nitewuphumelela futsi nandze kulelive leligeleta lubisi neluju, njengobe nje Jehova Nkulunkulu wabokhokho benu anetsembisile.

4 “Lalelani ma-Israyeli: Jehova Nkulunkulu wetfu nguye yedvwa longuJehova.+ 5 Kufanele nitsandze Jehova Nkulunkulu wenu ngayo yonkhe inhlitiyo yenu, nangawo wonkhe umphefumulo* wenu,+ nangawo onkhe emandla* enu.+ 6 Lamavi lenginiyala ngawo lamuhla kufanele abe setinhlitiyweni tenu, 7 futsi kufanele niwanamatselise* emadvodzaneni enu,+ nikhulume ngawo nanihleti etindlini tenu, nanihamba endleleni, nanilala, nalapho nivuka.+ 8 Nibowabophela etandleni tenu abe sikhumbuto, futsi kufanele abe njengelibhande emabuntini* enu.+ 9 Nibowabhala etinsikeni teminyango yetindlu tenu nasemagedeni enu.

10 “Jehova Nkulunkulu wenu nasekaningenisile kulelive lafunga kubokhokho benu bo-Abrahama, Isaka naJakobe kutsi utaninika lona,+ lokungemadolobha lamakhulu futsi lamahle leningazange niwakhe,+ 11 netindlu letigcwele yonkhe inhlobo yetintfo letinhle leningazange nitisebentele, nemitfombo leningazange niyigubhe, kanye nemasimu emagilebisi netihlahla temncumo leningazange nitihlanyele, nalapho senidlile natenetisa,+ 12 nibocaphela kutsi ningamkhohlwa Jehova,+ lowanikhipha eveni laseGibhithe, live lebenigcilatwa kulo. 13 Jehova Nkulunkulu wenu nguye lokufanele nimesabe+ niphindze nimkhonte,+ futsi nifunge ngelibito lakhe.+ 14 Ningabobalandzela labanye bonkulunkulu, lokungunobe ngubaphi bonkulunkulu labakhontwa bantfu labanitungeletile,+ 15 ngobe Jehova Nkulunkulu wenu lohlala emkhatsini wenu unguNkulunkulu lofuna kukhontwe yena kuphela.+ Naningakwenti loko, intfukutselo yaJehova itawunivutsela+ futsi utanibhubhisa niphele emhlabeni.+

16 “Ningabomlinga Jehova Nkulunkulu wenu,+ njengobe namlinga eMasa.+ 17 Kufanele nitimisele kugcina imitsetfo, tikhumbuto kanye nemiyalo yaJehova Nkulunkulu wenu, leyo latsite niyigcine. 18 Nibokwenta lokulungile nalokuhle emehlweni aJehova, kuze nitewuphumelela futsi ningene nilitsatse libe lenu lelive lelihle Jehova lafunga ngalo kubokhokho benu,+ 19 ngekutsi niticoshe embikwenu tonkhe titsa tenu njengobe nje Jehova anetsembisile.+

20 “Esikhatsini lesitako, emadvodzana enu nakanibuta atsi: ‘Kungani Jehova Nkulunkulu wetfu aniniketa letikhumbuto nalemitsetfo kanye nalemiyalo?’ 21 nibotsi: ‘Besitigcili taFaro eGibhithe, kodvwa Jehova wasikhipha lapho ngesandla lesinemandla. 22 Ngako Jehova abechubeka enta tibonakaliso netimangaliso eGibhithe+ nakuFaro, kanye nakuyo yonkhe indlu yakhe,+ futsi watenta embikwemehlo etfu. Betitinkhulu tiphindze tinemiphumela lemibi. 23 Wasikhipha kulelo live kuze asiletse lapha, asinike lelive labefunge ngalo kubokhokho betfu.+ 24 Ngemuva kwaloko Jehova wasitjela kutsi sigcine yonkhe lemitsetfo futsi simesabe Jehova Nkulunkulu wetfu, kuze tintfo tihlale tisihambela kahle+ siphindze sichubeke siphila,+ njengobe nje siphila nalamuhla. 25 Ngako kutawutsiwa silungile nangabe silalela Jehova Nkulunkulu wetfu ngekutsi siyigcine ngekucophelela yonkhe lemitsetfo, njengobe nje asitjelile.’+

7 “Jehova Nkulunkulu wenu nasekaniletsa kulelive lenitawungena nilitsatse libe ngelenu,+ utawucosha tive letinkhulu embikwenu,+ lokungemaHethi, emaGirigashi, ema-Amori,+ emaKhenani, emaPheresi, emaHivi nemaJebhusi.+ Leti tive letingu-7 letinkhulu naletinemandla kunani.+ 2 Jehova Nkulunkulu wenu utawunikela letive esandleni senu futsi nitawutincoba.+ Kufanele nakanjani nitinikele ekubhujisweni.+ Ningabokwenta tivumelwane nato futsi ningabi nemusa kuto.+ 3 Ningabokwendziselana nato. Emadvodzakati enu ningawendziseli emadvodzana ato, nemadvodzana enu ningawatsatseli emadvodzakati ato.+ 4 Ngobe atawukwenta kutsi emadvodzana enu afulatsele Nkulunkulu bese akhonta labanye bonkulunkulu,+ futsi intfukutselo yaJehova itawunivutsela, anibhubhise ngekushesha niphele nya.+

5 “Esikhundleni saloko, naku lokufanele nikwente: Nibodzilita ema-al’thare ato, nibhidlite ematje ato langcwele,+ niphihlite tinsika tato letingcwele,*+ nishise netithico tato letibatiwe.+ 6 Ngobe nine nibantfu labangcwele kuJehova Nkulunkulu wenu, futsi Jehova Nkulunkulu wenu unikhetsile kutsi nibe bantfu bakhe, nibe yimphahla yakhe lekhetsekile* kuto tonkhe tive letisemhlabeni.+

7 “Jehova wanitsandza futsi wanikhetsa+ hhayi ngobe benibanyenti kuto tonkhe letinye tive. Nine benisive lesincane kunato tonkhe tive.+ 8 Kodvwa ngenca yekutsi Jehova uyanitsandza nangenca yekutsi wasigcina sifungo labesente kubokhokho benu,+ Jehova wanikhipha ngesandla lesinemandla kute anikhulule esandleni saFaro inkhosi yaseGibhithe, eveni lebenigcilatwa kulo.+ 9 Nati kahle kutsi Jehova Nkulunkulu wenu unguNkulunkulu weliciniso nalowetsembekile, logcina sivumelwane sakhe futsi atsandze* tinkhulungwane tetitukulwane talabo labamtsandzako nalabagcina imiyalo yakhe.+ 10 Kodvwa labo labamtondzako utawuphindzisela kubo ngalokucondzile ngekutsi ababhubhise.+ Angeke ephute kubajezisa, futsi utabajezisa babuka. 11 Ngako-ke nibociniseka kutsi niyayigcina lemitsetfo naletimiso kanye nalemiyalo lenginitjela yona lamuhla, niyilandzele.

12 “Nanitawuchubeka nilalela lemitsetfo, niyigcine futsi niyilandzele, Jehova Nkulunkulu wenu naye utasigcina sivumelwane sakhe aphindze anitsandze njengobe afunga kubokhokho benu. 13 Utanitsandza, anibusise, futsi anandzise. Kulelive lafunga kubokhokho benu kutsi utaninika lona,+ utawunibusisa ngebantfwana labanyenti,*+ anibusise nangemkhicito wemhlaba, ngalokutinhlavu, ngeliwayini lelisha, ngemafutsa,+ nangematfole etinkhomo tenu nemazinyane emihlambi yenu yetimvu neyetimbuti. 14 Nitawuba bantfu lababusiswe kakhulu kunato tonkhe tive.+ Kute indvodza nobe umfati emkhatsini wenu lotawuba bete bantfwana, kute nemfuyo yenu lengeke itale.+ 15 Jehova utakususa konkhe kugula kini, futsi angeke aniletsele nobe ngutiphi tifo letimbi lebenitati eGibhithe,+ kodvwa utawutiletsela bonkhe labanitondzako. 16 Kufanele nibabulale* bonkhe bantfu Jehova Nkulunkulu wenu labanikele esandleni senu.+ Labantfu ningabaveli buhlungu+ futsi ningabakhonti nabonkulunkulu babo,+ ngobe loko kungaba lugibe kini.+

17 “Nakwenteka nicabange nitsi: ‘Letive tinyenti kakhulu kunatsi. Sitawuticosha njani?’+ 18 ningabokwesaba.+ Kufanele nikhumbule loko Jehova Nkulunkulu wenu lakwenta kuFaro nakuyo yonkhe iGibhithe,+ 19 nikhumbule tehlulelo letinkhulu lenatibona, tibonakaliso netimangaliso,+ sandla lesinemandla kanye nesandla leseluliwe Jehova Nkulunkulu wenu lanikhipha ngaso.+ Nguloko Jehova Nkulunkulu wenu latawukwenta kuto tonkhe letive lenitesabako.+ 20 Jehova Nkulunkulu wenu utawukwenta letive tiphelelwe ngemandla,* kuze kube ngulapho baphela labo lebebasele+ nalabo lebebanibhacela. 21 Ningafikelwa kwesaba ngenca yato ngobe Jehova Nkulunkulu wenu unani,+ futsi unguNkulunkulu lomkhulu nalowesabekako.+

22 “Jehova Nkulunkulu wenu utawuticosha kancane kancane letive embikwenu.+ Ngeke anivumele kutsi niticedze ngekushesha, kuze tilwane tesiganga tingandzi bese tiyanilimata. 23 Jehova Nkulunkulu wenu utawunikela letive esandleni senu futsi atincobe ngalokuphelele tize tiphele nya.+ 24 Utawunikela emakhosi ato esandleni senu,+ futsi emabito ato nitawacedza emhlabeni.+ Kute umuntfu lotawumelana nani,+ kuze kube ngulapho seniticotfule tonkhe letive.+ 25 Bonkulunkulu bato lababatiwe nibobashisa ngemlilo.+ Ningalihawukeli lisiliva neligolide lelikubo, nobe nilitsatse libe ngelenu,+ kuze lingabi lugibe kini, ngobe liyintfo leyenyanyekako kuJehova Nkulunkulu wenu.+ 26 Intfo leyenyanyekako ningaboyiletsa etindlini tenu ngobe ngaleyo ndlela nani nitawunikelwa ekubhujisweni njengayo. Kufanele niyenyanye ngalokuphelele futsi niyitondze, ngobe iyintfo lenikelwe ekubhujisweni.

8 “Nibociniseka kutsi niyigcina yonkhe lemitsetfo lengininiketa yona lamuhla, kuze nitewuchubeka niphila,+ nandze futsi ningene nitsatse lelive Jehova lafunga ngalo kubokhokho benu.+ 2 Khumbulani indlela lendze Jehova Nkulunkulu wenu lanihambise ngayo ehlane kuleminyaka lengu-40+ kuze anifundzise kutfobeka aphindze anivivinye,+ kute abone kutsi tinhlitiyo tenu tinjani,+ kutsi nitayilalela yini imitsetfo yakhe nobe cha. 3 Ngako wanifundzisa kutfobeka, waniyekela nalamba.+ Wanipha nemana+ kute nidle, lokuyintfo lebeningakaze nayibona, nabobabe benu bebangayati. Loku wakwenta kute nati kutsi umuntfu ngeke aphile ngesinkhwa sodvwa, kodvwa uphila ngawo onkhe emavi laphuma emlonyeni waJehova.+ 4 Timphahla lebenitembatsa atizange tiguge, netinyawo tenu atikaze tivuvuke kuleminyaka lengu-40.+ 5 Etinhlitiyweni tenu nati kahle kutsi njengobe nje babe ayicondzisa indvodzana yakhe, naJehova Nkulunkulu wenu abenicondzisa.+

6 “Ngako-ke niboyigcina imitsetfo yaJehova Nkulunkulu wenu ngekutsi nihambe etindleleni takhe futsi nimesabe. 7 Ngobe Jehova Nkulunkulu wenu uniyisa eveni lelihle,+ live lelinemifula yemanti, imitfombo netiyalu* letigeleta ematsafeni nasesifundzeni lesinetintsaba, 8 live lelinakolo nebhali, netihlahla temagilebisi, tihlahla temakhiwa netemahananandza,*+ live lelinemafutsa emncumo kanye neluju,+ 9 live lapho kungeke kuswelakale khona kudla, nalapho ningeke neswele lutfo khona, lokulive lelinematje lanensimbi nalenitawukumba litfusi etintsabeni talo.

10 “Nasenidlile futsi nesutsa, nibodvumisa Jehova Nkulunkulu wenu ngalelive lelihle laninikete lona.+ 11 Nibocaphela kutsi animkhohlwa Jehova Nkulunkulu wenu ngekubese anisayigcini lemitsetfo, timiso nalemiyalo yakhe lenginitjela yona lamuhla. 12 Nasenidlile futsi nesutsa, nakha netindlu letinhle nahlala kuto,+ 13 nalapho imihlambi yenu yetinkhomo neyetimvu neyetimbuti seyandzile, nelisiliva neligolide lenu selilinyenti futsi tonkhe tintfo tenu setitinyenti, 14 ningayivumeli inhlitiyo yenu kutsi itigabatise+ bese inenta niyamkhohlwa Jehova Nkulunkulu wenu, loyo lowanikhipha eveni laseGibhithe, lapho benigcilatwa khona,+ 15 nalowanihambisa ehlane lelikhulu nalelesabekako,+ lelinetinyoka letinesihlungu nalelinabofecela, futsi lelilugwadvule. Wenta kutsi kugelete emanti edvwaleni lelicinile,+ 16 wanondla nangemana+ ehlane, lebekuyintfo bobabe benu lebebangayati, kuze anifundzise kutfobeka+ aphindze anivivinye kute kusitakale nine esikhatsini lesitako.+ 17 Nakwenteka nitsi etinhlitiyweni tenu: ‘Lomcebo ngiwutfole ngemandla ami nangetikhwepha tami,’+ 18 nibokhumbula kutsi nguJehova Nkulunkulu wenu loninikete emandla kuze nitfole lomcebo,+ kute agcine sivumelwane lafunga ngaso kubokhokho benu, njengobe nje entile kuze kube ngulamuhla.+

19 “Nakutakwenteka nimkhohlwe Jehova Nkulunkulu wenu, nilandzele labanye bonkulunkulu, niphindze nibakhonte futsi nibakhotsamele, lamuhla ngiyanitjela ngitsi nakanjani nitawufa.+ 20 Nitawufa niphele nya njengaletive Jehova latibhubhisako embikwenu, ngobe nitawube ningakalilaleli livi laJehova Nkulunkulu wenu.+

9 “Lalelani ma-Israyeli, lamuhla newela iJordane+ kuze ningene futsi nitsatse indzawo yetive letinkhulu naletinemandla kunani,+ indzawo lenemadolobha lamakhulu nalanetivikelo leticinile letifika emazulwini,*+ 2 nalanebantfu labanemandla futsi labadze, lokungemadvodzana a-Anaki+ leniwatiko, nalenivile kutsiwa ngawo: ‘Ngubani longamelana nemadvodzana a-Anaki?’ 3 Ngako-ke kufanele nati lamuhla kutsi Jehova Nkulunkulu wenu utakwewela embikwenu.+ Ungumlilo locotfulako,+ futsi utawubhubhisa letive tiphele nya. Utawutincoba embikwemehlo enu kuze niticoshe* ngekushesha futsi niticedze, njengobe nje Jehova anetsembisile.+

4 “Jehova Nkulunkulu wenu nasekaticosha embikwenu letive, ningabosho etinhlitiyweni tenu nitsi: ‘Jehova usingenise kulelive kuze libe ngeletfu ngenca yekutsi sibantfu labalungile.’+ Kodvwa Jehova ucosha letive embikwenu ngenca yebubi bato.+ 5 Akusiko kutsi nine nibantfu labalungile nobe kutsi nicotfo etinhlitiyweni tenu lokunenta ningene futsi nitsatse lelive lato. Kodvwa Jehova Nkulunkulu wenu uyaticosha embikwenu letive ngenca yebubi bato+ nangenca yekutsi Jehova ufuna kugcina livi lakhe lafunga ngalo kubokhokho benu, bo-Abrahama,+ Isaka+ naJakobe.+ 6 Kufanele nati-ke kutsi akusiko kutsi nibantfu labalungile lokwenta Jehova Nkulunkulu wenu aninike lelive lelihle kutsi libe ngelenu, ngobe phela nine nibantfu labangalaleli.*+

7 “Ningayikhohlwa indlela lenamtfukutselisa ngayo Jehova Nkulunkulu wenu ehlane.+ Kusukela ngelilanga lenaphuma ngalo eveni laseGibhithe naze natewufika kulendzawo, benisolo ningamlaleli Jehova.+ 8 Ngisho nangesikhatsi niseHorebe namcansula Jehova, ngako Jehova wanitfukutselela kakhulu futsi abesatsi uyanibhubhisa.+ 9 Ngesikhatsi ngikhuphukela entsabeni kuze ngiyewutfola tibhelekece tematje,+ lokutibhelekece tesivumelwane Jehova lasenta nani,+ ngahlala kulentsaba emalanga langu-40 nebusuku lobungu-40.+ Kute lebengikudla nobe lebengikunatsa. 10 Jehova wabese unginiketa letibhelekece letimbili tematje lebetibhalwe ngesandla sakhe,* futsi kuto bekubhalwe onkhe emavi Jehova lawakhuluma kini emlilweni ngelilanga sonkhe sive lebesihlangene ngalo entsabeni.+ 11 Nakuphela lamalanga langu-40 nebusuku lobungu-40, Jehova wanginiketa letibhelekece letimbili tematje, lokutibhelekece tesivumelwane, 12 futsi Jehova watsi kimi: ‘Yehla ngekushesha ngobe labantfu bakho lowabakhipha eGibhithe sebente intfo lembi.+ Sebaphambuke ngekushesha kuloko lebengibatjele kona, batentela nesithico.’*+ 13 Ngemuva kwaloko Jehova watsi kimi: ‘Sengibonile kutsi laba bantfu labangalaleli.*+ 14 Ngako ngiyekele ngibacotfule, ngicedze nelibito labo emhlabeni futsi ngikwente ube sive lesinemandla nalesikhulu kunabo.’+

15 “Ngemuva kwaloko ngesuka ngase ngiyehla kulentsaba, futsi beyisavutsa umlilo.+ Bengiphetse letibhelekece letimbili tesivumelwane etandleni tami.+ 16 Ngatsi nangibuka ngabona kutsi senonile kuJehova Nkulunkulu wenu. Besenitentele sithico* selitfole. Naphambuka ngekushesha kuloko Jehova labenitjele kona.+ 17 Ngako ngatsatsa letibhelekece letimbili ngatilahla phansi ngetandla tami totimbili, ngatiphihlita embikwenu.+ 18 Ngemuva kwaloko ngaguca embikwaJehova emalanga langu-40 kanye nebusuku lobungu-40, njengakucala. Angizange ngidle lutfo futsi kute nalengakunatsa,+ ngenca yato tonkhe tono lebenitentile ngekwenta lokubi emehlweni aJehova nangekumcansula. 19 Bengesaba ngesizatfu sekutsi Jehova abenitfukutselele kakhulu,+ kangangekutsi abesatsi uyanibhubhisa. Nome kunjalo, Jehova wangilalela nangaleso sikhatsi.+

20 “Jehova wamtfukutselela kakhulu na-Aroni, futsi abesafuna kumbhubhisa,+ kodvwa naye ngamncengela ngaleso sikhatsi. 21 Ngabese ngitsatsa lelitfole, lokwaba sono kutsi nilente,+ ngalishisa ngemlilo, ngaliphihlita futsi ngaligaya laze laba njengelutfuli, ngemuva kwaloko ngalujika emfuleni logeleta usuka entsabeni.+

22 “Ngetulu kwaloko, naphindze namtfukutselisa Jehova ngesikhatsi niseThabera,+ eMasa+ kanye naseKhibrothi-hathava.+ 23 Ngesikhatsi Jehova anitjela kutsi nisuke eKhadeshi-bhaneya+ futsi atsi kini: ‘Khuphukani nitsatse lelive lengitawuninika lona!’ nalapho anizange nikwente loko Jehova Nkulunkulu wenu+ labenitjele kona, anizange nimkholwe+ futsi anizange nimlalele. 24 Kusukela ngacala kunati benisolo ningamlaleli Jehova.

25 “Ngako-ke ngaguca embikwaJehova emalanga langu-40 nebusuku lobungu-40,+ futsi loku ngakwenta ngenca yekutsi Jehova abetsite utanibhubhisa. 26 Ngamncenga Jehova, ngatsi: ‘Awu Nkhosi Lephakeme Jehova, ungababhubhisi labantfu. Babantfu bakho*+ lowabasindzisa ngemandla akho lamakhulu, wabakhipha eGibhithe ngesandla lesinemandla.+ 27 Khumbula tinceku takho bo-Abrahama, Isaka naJakobe.+ Ungakunaki kungalaleli kwalabantfu, bubi babo kanye nesono sabo.+ 28 Nawungenti njalo, bantfu balelive lowasikhipha kulo bangase batsi: “Jehova abengasakhoni kubangenisa kulelive labetsembisa lona, futsi bekabenyanya, kungako nje abakhipha lapha kuze ababulale ehlane.”+ 29 Ngobe labantfu ngebakho*+ futsi wabakhipha ngemandla akho lamakhulu nangesandla sakho leseluliwe.’+

10 “Ngaleso sikhatsi, Jehova watsi kimi: ‘Tentele tibhelekece letimbili tematje, letinjengaleti takucala+ futsi ute kimi lapha entsabeni. Ubokwenta nelibhokisi ngesigodvo. 2 Kuletibhelekece ngitawubhala lamavi lebengiwabhale kuleti takucala lotiphihlitile, futsi kufanele utifake kulelibhokisi.’ 3 Ngako ngenta libhokisi ngesigodvo sesihlahla semgamba, ngenta netibhelekece letimbili tematje letifana naleti takucala, ngase ngikhuphukela entsabeni ngiphetse letibhelekece letimbili esandleni sami.+ 4 Kuletibhelekece Nkulunkulu wabese ubhala lamavi lebekawabhale ekucaleni,+ lokuyiMitsetfo Lelishumi,*+ leyo Jehova lebekanitjele yona emlilweni+ ngelilanga sonkhe sive lebesihlangene ngalo+ entsabeni. Ngemuva kwaloko Jehova wanginiketa tona. 5 Ngabese ngiyesuka, ngehla kulentsaba+ ngafike ngafaka letibhelekece kulelibhokisi lebengilakhile, futsi tiselapho nalamuhla, njengobe nje Jehova abengitjelile.

6 “Ngemuva kwaloko ema-Israyeli esuka eBherothi Bhene-jakani aya eMosera. Aroni wafela lapho futsi wangcwatjelwa khona.+ Eliyezeri indvodzana yakhe wabese uba ngumphristi esikhundleni sakhe.+ 7 Nakesuka lapho, ema-Israyeli aya eGudgoda, esuka eGudgoda aya eJotbatha,+ lokulive lelinemifula legeleta emanti.

8 “Ngaleso sikhatsi Jehova wakhetsa sive semaLevi+ kutsi sitfwale libhokisi lesivumelwane saJehova,+ sime embikwaJehova kuze sente umsebenti wakhe, futsi sibusise egameni lakhe,+ njengobe nje senta nalamuhla. 9 Kungako emaLevi ete sabelo nobe lifa emkhatsini webanakabo. Jehova ulifa lawo, njengobe nje Jehova Nkulunkulu wenu awatjela.+ 10 Mine ngahlala kulentsaba emalanga langu-40 nebusuku lobungu-40+ njengobe bengentile ekucaleni, futsi Jehova wangilalela nangaleso sikhatsi.+ Jehova abengafuni kunibhubhisa. 11 Jehova wabese utsi kimi: ‘Hamba embikwalabantfu futsi nilungele kusuka, khona batawungena batsatse lelive lengifunge kubokhokho babo kutsi ngitabanika lona.’+

12 “Manje-ke ma-Israyeli, yini Jehova Nkulunkulu wenu layilindzele kini?+ Nguloku kuphela lakulindzele: kutsi nesabe Jehova Nkulunkulu wenu,+ nihambe ngato tonkhe tindlela takhe,+ nimtsandze, nikhonte Jehova Nkulunkulu wenu ngayo yonkhe inhlitiyo yenu nangawo wonkhe umphefumulo* wenu,+ 13 futsi nigcine lemitsetfo nemiyalo yaJehova lengininika yona lamuhla kuze kuzuze nine.+ 14 Emazulu ngewaJehova Nkulunkulu wenu, ngisho nemazulu lasetulu kakhulu, kanye nemhlaba nako konkhe lokukuwo ngekwakhe.+ 15 Jehova wasondzelana nabokhokho benu kuphela futsi ngibo lakhomba kutsi uyabatsandza, nani unikhetsile, nine bantfwana babo,+ wanikhetsa kuto tonkhe tive, njengobe kunjalo nje nalamuhla. 16 Nyalo kufanele nihlante* tinhlitiyo tenu,+ niyekele nekuba nenkhani,*+ 17 ngobe Jehova Nkulunkulu wenu unguNkulunkulu wabonkulunkulu+ neNkhosi yemakhosi, unguNkulunkulu lomkhulu, lonemandla, nalowesabekako, longakhetsi muntfu+ nalongavumi kudizelwa. 18 Uyiphatsa kahle intsandzane kanye nemfelokati,+ amtsandze nemuntfu losihambi,+ amnikete kudla nekwekwembatsa. 19 Kufanele nibatsandze bantfu bekuhamba, ngobe nani benitihambi eveni laseGibhithe.+

20 “Nibokwesaba Jehova Nkulunkulu wenu, nimkhonte,+ ninamatsele kuye, futsi nifunge ngelibito lakhe. 21 Nguye lokufanele nimdvumise.+ UnguNkulunkulu wenu, nguye lonentele tonkhe letintfo letinkhulu naletesabekako lenitibonile.+ 22 Ngesikhatsi bokhokho benu behlela eGibhithe,+ bebangu-70, futsi nyalo Jehova Nkulunkulu wenu sewunente naba banyenti ngangetinkhanyeti letisemazulwini.+

11 “Kufanele nitsandze Jehova Nkulunkulu wenu+ futsi ngaso sonkhe sikhatsi nente tintfo latilindzele kini, nigcine imitsetfo yakhe, timiso takhe kanye nemiyalo yakhe. 2 Niyati kutsi lamuhla ngikhuluma nani hhayi nemadvodzana enu, wona langasati sijeziso lesivela kuJehova Nkulunkulu wenu+ futsi langazange sekasibone, langabati nebukhulu bakhe,+ nesandla sakhe lesinemandla+ kanye nesandla sakhe leseluliwe. 3 Lamadvodzana enu akazange atibone tibonakaliso takhe kanye netintfo latenta eGibhithe kuFaro inkhosi yakhona, nakulo lonkhe live lakhe;+ 4 akazange akubone naloko lakwenta emabutfweni aseGibhithe, emahhashini aFaro nasetinkalishini takhe temphi, konkhe lokwambonywa ngemanti eLwandle Lolubovu ngesikhatsi anicosha. Jehova wababhubhisa baphela nya!*+ 5 Lamadvodzana enu akazange akubone naloko Nkulunkulu lanentela* kona ehlane, naze nefika kulendzawo, 6 naloko lakwenta kuboDathani na-Abiramu, emadvodzana a-Eliyabe indvodzana yaRubeni, ngesikhatsi umhlaba uvuleka futsi ubagwinya embikwawo onkhe ema-Israyeli, bona kanye nemindeni yabo, emathende abo nabo bonkhe bantfu lebebabalandzela kanye netilwane tabo.+ 7 Emehlo enu atibonile tonkhe letintfo letinkhulu Jehova latentile.

8 “Niboyigcina yonkhe lemitsetfo lengininiketa yona lamuhla, kuze nitewuba nemandla, newelele kulelive lenitawulitsatsa libe lenu, 9 niphindze niphile sikhatsi lesidze+ kulelive Jehova lafunga kutsi utalinika bokhokho benu nentalelwane* yabo,+ live leligeleta lubisi neluju.+

10 “Lelive lenitawulitsatsa alifani nelive laseGibhithe, live lenaphuma kulo, lapho benihlanyela khona niphindze nisebente kamatima ninisela umhlaba,* njengengadze yetibhidvo. 11 Kodvwa lelive lesenitakwewelela kulo futsi nilitsatse, lona lilive lelinetintsaba nematsafa.+ Liniselwa ngemanti emvula levela emazulwini.+ 12 Leli live Jehova Nkulunkulu wenu lalinakekelako. Emehlo aJehova Nkulunkulu wenu ahlale akulo, kusukela ekucaleni kwemnyaka kuze kube sekupheleni kwawo.

13 “Nanitawutimisela kutsi nilalele imitsetfo yaNkulunkulu lengininika yona lamuhla, nimtsandze Jehova Nkulunkulu wenu futsi nimkhonte ngayo yonkhe inhlitiyo yenu nangawo wonkhe umphefumulo* wenu,+ 14 naye* utawuletsa imvula kulelive lenu ngesikhatsi lesifanele, lokuyimvula lebakhona nakungena busika nalebakhona entfwasahlobo. Nitawubutsa lokutinhlavu kwenu, nitfole neliwayini lenu lelisha kanye nemafutsa.+ 15 Utawuveta netitjalo emadlelweni kuze kudle imfuyo yenu, nani nitawudla nenetiseke.+ 16 Nibocaphela kutsi inhlitiyo yenu ingayengeki kutsi iphambuke, bese nikhonta labanye bonkulunkulu futsi nibakhotsamele.+ 17 Ngobe intfukutselo yaJehova itawunivutsela, bese uvala emazulu kuze imvula ingani+ futsi nemhlaba angeke usakhicita, nani nitawushabalala ngekushesha kulelive lelihle Jehova laninika lona.+

18 “Nibogcina lamavi ami etinhlitiyweni tenu kanye nangekhatsi kini, niphindze niwabophe abe sikhumbuto etandleni tenu, futsi kufanele abe njengelibhande emabuntini enu.*+ 19 Nibowafundzisa bantfwana benu, nikhulume ngawo nanihleti etindlini tenu, nanihamba endleleni, nanilala nalapho nivuka.+ 20 Nibowabhala etinsikeni teminyango yetindlu tenu nasemagedeni enu, 21 kuze nine nemadvodzana enu nitewuphila sikhatsi lesidze+ kulelive Jehova lafunga kutsi utalinika bokhokho benu,+ yingci nje emazulu nakasengetulu kwemhlaba.

22 “Nanitawugcina ngekucophelela lomyalo lengininiketa wona futsi niwulandzele, lokukutsi nitsandze Jehova Nkulunkulu wenu,+ nihambe ngato tonkhe tindlela takhe futsi ninamatsele kuye,+ 23 Jehova utaticosha tonkhe letive letisembikwenu.+ Nine nitayitsatsa indzawo yaletive letinemandla naletinkhulu kakhulu kunani.+ 24 Yonkhe indzawo leninyatsela kuyo itawuba ngeyenu.+ Umncele wenu utawusuka ehlane uze uyewufika eLebanoni, usuke naseMfuleni iYufrathe uze uyewufika elwandle* lolusenshonalanga.+ 25 Kute umuntfu lotawumelana nani.+ Jehova Nkulunkulu wenu utakwenta kutsi bantfu kuyo yonkhe indzawo lenihamba kuyo bachachatele futsi banesabe,+ njengobe nje anetsembisa.

26 “Lamuhla ngibeka sibusiso nesicalekiso embikwenu.+ 27 Nitawubusiswa nangabe nilalela lemitsetfo yaJehova Nkulunkulu wenu lengininika yona lamuhla,+ 28 kantsi nitawucalekiswa nangabe ningayilaleli lemitsetfo yaJehova Nkulunkulu wenu,+ nanangabe niphambuka endleleni lenginitjela kutsi nihambe ngayo lamuhla, bese nilandzela bonkulunkulu leningabati.

29 “Kutawutsi lapho Jehova Nkulunkulu wenu aningenisa kulelive lenitawulitsatsa libe lenu, kufanele nibusise niseNtsabeni iGerizimu, futsi nicalekise niseNtsabeni i-Ebali.+ 30 Angitsi letintsaba tingale kweJordane, nawuya ngasenshonalanga, eveni lemaKhenani lahlala e-Arabha, macondzana neGilgali eceleni kwetihlahla letinkhulu taseMore?+ 31 Nyalo newela iJordane kuze ningene nitsatse lelive Jehova Nkulunkulu wenu laninika lona.+ Nasenilitsetse lelive futsi senihlala kulo, 32 nibociniseka kutsi niyayigcina yonkhe lemitsetfo netimiso lengininiketa tona lamuhla.+

12 “Ngulena imitsetfo nemiyalo lokufanele nitimisele kuyigcina kuko konkhe kuphila kwenu kulelive Jehova Nkulunkulu wabokhokho benu latawuninika lona. 2 Kufanele nitibhubhise ngalokuphelele tonkhe tindzawo letive lenitawutsatsa live lato lebetikhontela khona bonkulunkulu bato,+ kungaba setulu etintsabeni nobe emagcumeni nobe ngaphansi kwanome ngusiphi sihlahla lesikhulu. 3 Nibodzilita ema-al’thare ato, nibhidlite ematje ato langcwele,+ nitishise ngemlilo netinsika tato letingcwele* futsi niphihlite bonkulunkulu bato lababatiwe,+ niwacedze nya nemabito abo kuleyo ndzawo.+

4 “Jehova Nkulunkulu wenu ningabomkhonta ngaleyo ndlela.+ 5 Kunekutsi nente njalo, kufanele nifune Jehova Nkulunkulu wenu kunobe nguyiphi indzawo lakhetsa kubeka libito lakhe kuyo nalakhetsa kuhlala kuyo emkhatsini wetive tenu, bese niya kuleyo ndzawo.+ 6 Kulapho nitawuletsa khona iminikelo yenu yekushiswa,+ imihlatjelo, kwelishumi,+ tipho,+ iminikelo yekufunga, iminikelo yekutitsandzela+ kanye nematibulo emihlambi yenu yetinkhomo, yetimvu kanye neyetimbuti.+ 7 Nine kanye nemindeni yenu kufanele nidlele lapho embikwaJehova Nkulunkulu wenu+ futsi nijabule ngako konkhe lenikwentile,+ ngobe Jehova Nkulunkulu wenu unibusisile.

8 “Ningabokwenta ngendlela lesenta ngayo lapha lamuhla, kutsi nguloyo naloyo ente lakubona kukuhle emehlweni akhe,* 9 njengobe nisengakefiki endzaweni yekuphumula+ nakulelifa Jehova Nkulunkulu wenu laninika lona. 10 Naseniyewelile iJordane,+ senihlala kulelive Jehova Nkulunkulu wenu laninika lona kutsi libe lenu, yena utaninika kuphumula kuto tonkhe titsa tenu letihlala eceleni kwenu, futsi nitawuhlala ngekuthula.+ 11 Kulendzawo Jehova Nkulunkulu wenu latawukhetsa kubeka libito lakhe kuyo,+ nitawuletsa konkhe loku lenginitjela kona, lokuyiminikelo yenu yekushishwa, imihlatjelo, kwelishumi,+ tipho kanye nayo yonkhe iminikelo yekufunga lenifunge kutsi nitayinika Jehova. 12 Nitawujabula embikwaJehova Nkulunkulu wenu,+ nine nemadvodzana enu nemadvodzakati enu, tigcili tenu netigcilikati tenu kanye nemaLevi lahlala emagcekeni* enu, ngobe wona ete sabelo nobe lifa emkhatsini wenu.+ 13 Iminikelo yenu yekushiswa ningaboyentela kunome nguyiphi indzawo leniyibonako.+ 14 Iminikelo yenu yekushiswa kufanele niyentele kuphela kulenye yetindzawo tetive tenu, leyo lekhetfwe nguJehova, futsi kulapho lakufanele nikwentele khona konkhe loku lenginitjela kona.+

15 “Kodvwa nobe nini nanifisa kudla inyama, ningahlaba nidle,+ kuwo onkhe emagceke* enu, kuye ngesibusiso Jehova Nkulunkulu wenu laninike sona. Umuntfu longcolile nalohlantekile angayidla lenyama, njengobe nje ningadla inswephe nobe inyamatane. 16 Ingati yona kufanele ningayidli,+ niboyitfululela emhlabatsini njengemanti.+ 17 Kwelishumi kwenu kwalokutinhlavu, kweliwayini, nekwemafutsa, kanye nematibulo emihlambi yenu yetinkhomo, yetimvu neyetimbuti,+ nanobe ngumiphi iminikelo yenu yekufunga lenifunge kutsi nitayinika Nkulunkulu, neminikelo yenu yekutitsandzela nobe tipho tenu, kona ngeke nivunyelwe kutsi nikudlele emagcekeni* enu. 18 Letintfo kufanele nitidle embikwaJehova Nkulunkulu wenu kulendzawo Jehova Nkulunkulu wenu latayikhetsa,+ nine nemadvodzana enu kanye nemadvodzakati enu, tigcili tenu netigcilikati tenu, kanye nemaLevi lasemagcekeni* enu, futsi nitawujabula embikwaJehova Nkulunkulu wenu ngako konkhe lenikwentile. 19 Kuko konkhe kuphila kwenu eveni lenu ningabowakhohlwa emaLevi.+

20 “Jehova Nkulunkulu wenu nasekayandzisa indzawo yenu,+ njengobe nje anetsembisile,+ bese nikhanuka inyama, ningayidla nobe nini naniyikhanuka.+ 21 Nangabe ikhashane lendzawo Jehova Nkulunkulu wenu lakhetse kutsi libito lakhe libe kuyo,+ nibohlaba emhlambini wenu wetinkhomo, nobe wetimvu nobe wetimbuti, loyo Jehova laninike wona, njengobe nje nganiyala, futsi lenyama niboyidlela emagcekeni* enu nobe nini naniyikhanuka.* 22 Ningayidla njengobe nidla inswephe kanye nenyamatane,+ futsi ingadliwa ngumuntfu longcolile nalohlantekile. 23 Kufanele niciniseke nje kutsi aniyidli ingati,+ ngobe ingati ikuphila,*+ ngako-ke akukafaneli nidle kuphila* kanye nenyama. 24 Ningaboyidla ingati, kodvwa niboyitfululela emhlabatsini njengemanti.+ 25 Ingati kufanele ningayidli kuze kunihambele kahle nine nebantfwana benu labatawukuta emvakwenu, ngobe nitawube nenta lokulungile emehlweni aJehova. 26 Naniya kulendzawo Jehova latayikhetsa, niboletsa tintfo tenu letingcwele kanye neminikelo yenu yekufunga kuphela. 27 Kuleyo ndzawo nitawukwenta iminikelo yekushiswa e-al’thare laJehova Nkulunkulu wenu, lokuyinyama kanye nengati.+ Lengati yemihlatjelo yenu kufanele itfululelwe phansi eceleni kweli-al’thare+ laJehova Nkulunkulu wenu, kodvwa lenyama yona ningayidla.

28 “Nibowalalelisisa onkhe lamavi lenginitjela wona, kuze tintfo tihlale tinihambela kahle nine nemadvodzana enu latawukuta emvakwenu, ngobe nitawube nenta lokuhle nalokulungile emehlweni aJehova Nkulunkulu wenu.

29 “Jehova Nkulunkulu wenu nasaticotfulile letive lenitawutsatsa indzawo yato,+ futsi nani senihlala kulelo live, 30 nibocaphela kutsi anitilandzeli tindlela tato ngemuva kwekutsi tona setibhujisiwe. Ningabuti ngabonkulunkulu bato, nitsi: ‘Letive betivame kubakhonta njani bonkulunkulu bato? Natsi sitawukwenta njengato.’+ 31 Loku ningabokwenta kuJehova Nkulunkulu wenu, ngobe letive tentela labonkulunkulu bato yonkhe inhlobo yetintfo letenyanyekako, leto Jehova langatitsandzi, tize tishise ngisho nemadvodzana ato nemadvodzakati ato emlilweni, tinikele ngawo kubonkulunkulu bato.+ 32 Kufanele niwagcine ngekucophelela onkhe lamavi lenginitjela wona.+ Ningengeti lutfo kuwo nobe nisuse lokutsite.+

13 “Nakwenteka umphrofethi nobe umuntfu lophengula likusasa ngekusebentisa emaphupho avela emkhatsini wenu futsi ente sibonakaliso nobe aphrofethe, 2 bese lesibonakaliso nobe loko lakuphrofethile kini kuyenteka, futsi atsi: ‘Asilandzeleni labanye bonkulunkulu, lokubonkulunkulu leningabati, futsi sibakhonte,’ 3 ningabokulalela loko lomphrofethi nobe lomphuphi lakushoko,+ ngobe Jehova Nkulunkulu wenu uyanivivinya+ kuze abone kutsi niyamtsandza yini Jehova Nkulunkulu wenu ngenhlitiyo yenu yonkhe nangemphefumulo* wenu wonkhe.+ 4 NguJehova Nkulunkulu wenu lokufanele nimlandzele, nguye nalokufanele nimesabe, nigcine imitsetfo yakhe, nilalele livi lakhe, nimkhonte, futsi kufanele nibambelele kuye.+ 5 Kodvwa lomphrofethi nobe lomphuphi wemaphupho nibombulala,+ ngobe unikhutsate kutsi nihlubuke kuJehova Nkulunkulu wenu lowanikhipha eveni laseGibhithe, wanikhulula eveni lebenigcilatwa kulo. Lomuntfu abetama kuniphambukisa endleleni Jehova Nkulunkulu wenu latsite nihambe ngayo. Kufanele nibususe bubi emkhatsini wenu.+

6 “Nangabe umnakenu, indvodzana yakho, indvodzakati yakho, umfati wakho lomtsandzako nobe umngani wakho lomkhulu etama kukuhunga ngasense atsi: ‘Asihambe sikhonte labanye bonkulunkulu,’+ lokubonkulunkulu longabati, nabokhokho bakho lebebangabati, 7 bonkulunkulu labakhontwa bantfu labahlala eceleni kwenu, kungaba bantfu labasedvutane nani nobe labakhashane, kusukela ngala kwalelive kuze kuyewufika ngale kwalo, 8 ungabovuma kutsi loyo muntfu akuyenge futsi ungamlaleli,+ ungamveli ungabi nemusa kuye futsi ungamvikeli, 9 kodvwa kufanele nakanjani umbulale.+ Kuboba nguwe lomgcoba kucala ngematje kuze afe, bese-ke sonkhe lesive siyalandzela.+ 10 Nibomgcoba ngematje aze afe,+ ngobe abetama kuniphambukisa kuJehova Nkulunkulu wenu, lonikhiphe eveni laseGibhithe, live lebenigcilatwa kulo. 11 Onkhe ema-Israyeli atawukuva ngaloku esabe, futsi angeke aphindze ente nobe yini lembi lefana nalena emkhatsini wenu.+

12 “Nakwenteka uva kutsi kulelinye lemadolobha Jehova Nkulunkulu wenu laninika wona kutsiwa: 13 ‘Kunemadvodza langenamsebenti lapha emkhatsini wenu laphume ngenjongo yekuphambukisa bantfu bakubo atsi: “Asambeni sikhonte labanye bonkulunkulu,” lokubonkulunkulu leningabati,’ 14 leyo ndzaba kufanele niyihlole, niphindze niphenyisise futsi nibute ngayo.+ Nangabe vele kuliciniso kutsi lentfo lembi yentekile emkhatsini wenu, 15 nakanjani bantfu bakulelo dolobha kufanele nibabulale ngenkemba.+ Lelidolobha kanye nako konkhe lokukulo, lokufaka ekhatsi imfuyo, nibokunikela ekubhujisweni.+ 16 Tonkhe letintfo lenititsetse nibotibeka emkhatsini wesigcawu salelidolobha, bese niyalishisa futsi letintfo lenititsetse kulo titawunikelwa ngalokuphelele kuJehova Nkulunkulu wenu. Lelidolobha litawuhlala litindzala, akukafaneli liphindze lakhiwe. 17 Kute ngisho nakunye lokunikelwe ekubhujisweni*+ lokufanele nikutsatse, kuze Jehova abohlise intfukutselo yakhe, anentele umusa, anivele futsi anandzise, njengobe nje afunga kubokhokho benu.+ 18 Nibomlalela* Jehova Nkulunkulu wenu ngekutsi nigcine yonkhe lemitsetfo yakhe lenginitjela yona lamuhla, ngaleyo ndlela nitawube nenta lokulungile emehlweni aJehova Nkulunkulu wenu.+

14 “Nine ningemadvodzana aJehova Nkulunkulu wenu. Ningatisiki+ nobe nihhule emashiya* enu ngenca yemuntfu lofile.+ 2 Ngobe nibantfu labangcwele+ kuJehova Nkulunkulu wenu futsi Jehova unikhetsile kutsi nibe bantfu bakhe, nibe yimphahla yakhe lekhetsekile* emkhatsini wato tonkhe tive letikhona emhlabeni.+

3 “Ningaboyidla intfo leyenyanyekako.+ 4 Nati tilwane leningatidla:+ inkhomo, imvu, imbuti, 5 inyamatane, inswephe, lincala, imbuti yesiganga, lingcina, liwula neligoga. 6 Ningadla nobe ngutiphi tilwane letehlukanisa inselo ngalokuphelele futsi letihlwabulako. 7 Kodvwa ningatidli letilwane letilandzelako letihlwabulako nobe letehlukanisa inselo: likamela, logwaja kanye nembila, ngobe tiyahlwabula kodvwa atiyehlukanisi inselo. Ngako tiyintfo lengcolile kini.+ 8 Ningayidli nengulube, ngobe yehlukanisa inselo kodvwa ayihlwabuli. Iyintfo lengcolile kini. Ningayidli inyama yaletilwane nobe nititsintse natifile.

9 “Kuto tonkhe tilwane letihlala emantini, ningatidla tonkhe letinetimphiko tekuntjweza kanye netincwencwe.+ 10 Ningayidli nobe yini lete timphiko tekuntjweza kanye netincwencwe, ngobe iyintfo lengcolile kini.

11 “Nobe nguyiphi inyoni lehlantekile ningayidla. 12 Kodvwa ningabotidla leti letilandzelako: lusweti, lingce, ingculungculu,+ 13 nhloyile lobovu, nhloyile lomnyama, tonkhe tinhlobo tabolohheya, 14 tonkhe tinhlobo temahhwabayi, 15 inshi,* sikhova, inkanku, tonkhe tinhlobo taboloklebe, 16 sikhova lesincane, sikhova lesinetindlebe letindze, imfuketi, 17 livuba, inkwazi, sahhukulu, 18 dvoye, tonkhe tinhlobo tabomatalatingwenya, tsekwane kanye nelilulwane. 19 Tonkhe tilwane letinetimphiko futsi letihamba tilibulo* nato titintfo letingcolile kini. Akukafaneli nitidle. 20 Ningatidla nobe ngutiphi tilwane letindizako letihlantekile.

21 “Ningabosidla silwane lenisikhandze sifile.+ Ningasiniketa umuntfu wekuhamba lohlala emagcekeni* enu futsi yena angasidla, nobe-ke nisitsengisele umuntfu losihambi. Ngobe nine nibantfu labangcwele kuJehova Nkulunkulu wenu.

“Ningalibilisi lizinyane lembuti elubisini lwenina.+

22 “Umnyaka ngamunye, niboletsa kwelishumi kwawo wonkhe umkhicito wemhlaba wenu.+ 23 Nitawudla kwelishumi kwalokutinhlavu kwenu, kweliwayini lelisha, kwemafutsa kanye nematibulo emihlambi yenu yetinkhomo, yetimvu neyetimbuti. Kufanele nikudlele embikwaJehova Nkulunkulu wenu, endzaweni latawukhetsa kubeka libito lakhe kuyo,+ kuze ngaso sonkhe sikhatsi nifundze kwesaba Jehova Nkulunkulu wenu.+

24 “Kodvwa nangabe loluhambo lutawuba ludze kakhulu kini ngenca yekutsi lendzawo Jehova latawukhetsa kubeka libito lakhe kuyo+ ikhashane, futsi ningeke nikhone kutetfwala letintfo niye nato kuyo (njengobe Jehova Nkulunkulu wenu atawunibusisa), 25 ningatitsengisa bese nitsatsa lemali niye kulendzawo Jehova Nkulunkulu wenu latayikhetsa. 26 Lemali ningayisebentisela kutsenga nobe yini leniyifunako, kungaba tinkhomo, timvu, timbuti, liwayini naletinye tinatfo letidzakanako, kanye nanobe yini leniyifunako. Letintfo nitawutidlela kuleyo ndzawo, embikwaJehova Nkulunkulu wenu futsi nijabule, nine kanye nemindeni yenu.+ 27 Ningabowakhohlwa emaLevi lahlala emadolobheni enu,+ ngobe wona ete sabelo nobe lifa emkhatsini wenu.+

28 “Njalo ekupheleni kweminyaka lemitsatfu, niboletsa kwelishumi kwemkhicito wenu waloyo mnyaka, nikubeke ngekhatsi emadolobheni enu.+ 29 Ngemuva kwaloko umLevi, yena lote sabelo nobe lifa emkhatsini wenu, nemuntfu losihambi, nentsandzane kanye nemfelokati, bonkhe labangekhatsi kwemadolobha enu, batawuta badle futsi besutse,+ kuze Jehova Nkulunkulu wenu anibusise kuko konkhe lenikwentako.+

15 “Ngaso sonkhe sikhatsi nakuphela umnyaka wesi-7, kufanele utesule tikweleti lokweletwa tona.+ 2 Naku lokutakwentiwa: Wonkhe umuntfu lokweletwako utawesula sikweleti lasikweletwa ngumakhelwane wakhe. Akukafaneli amhambele lomakhelwane wakhe nobe umnakabo, ngobe letikweleti titawesulwa embikwaJehova.+ 3 Ungamhambela sikweleti umuntfu wekuhamba,+ kodvwa nobe yini umnakenu lakukweleta yona kufanele ungasayihambeli. 4 Akukafaneli kube nemuntfu loweswele emkhatsini wenu, ngobe nakanjani Jehova utawunibusisa+ kulelive Jehova Nkulunkulu wenu laninika lona kutsi libe lifa lenu. 5 Kodvwa-ke loko kutawukwenteka kuphela nangabe nililalelisisa livi laJehova Nkulunkulu wenu futsi niyigcina ngekucophelela yonkhe lemiyalo lengininika yona lamuhla.+ 6 Ngobe Jehova Nkulunkulu wenu utanibusisa njengobe nje anetsembisile, futsi nitawuboleka* tive letinyenti, kodvwa nine ngeke nidzinge kuboleka lutfo.+ Nitawuba ngetulu kwetive letinyenti, kepha tona ngeke tibe ngetulu kwenu.+

7 “Nakwenteka lomunye kubanakenu eswela kulelinye lemadolobha enu kulelive Jehova Nkulunkulu wenu laninika lona, ningabi netinhlitiyo letilukhuni nobe ningamuphi lomnakenu loweswele.+ 8 Kufanele nimuphe ngesandla lesivulekile+ futsi nente konkhe lokusemandleni enu kutsi nimboleke* nobe yini layidzingako nanobe yini layeswele. 9 Ningabi nalomcondvo lomubi etinhlitiyweni tenu, nitsi: ‘Umnyaka wesi-7, lokungumnyaka wekwesula tikweleti sewusondzele,’+ bese anisamuphi ngesandla lesivulekile umnakenu loweswele futsi ningasamniki lutfo. Nakwenteka akhala ngani kuJehova, nine nitawuba nesono.+ 10 Nibomupha ngesandla lesivulekile,+ hhayi ngenhlitiyo lebuhlungu, ngobe nguleso sizatfu lesitakwenta Jehova Nkulunkulu wenu abusise konkhe lenikwentako kanye nemsebenti wenu.+ 11 Bantfu labeswele batawuhlale bakhona eveni lenu.+ Kungako nginiyala ngitsi: ‘Umnakenu loweswele futsi lohluphekako eveni lenu kufanele nimuphe ngesandla lesivulekile.’+

12 “Nakwenteka lomunye kubanakenu atsengiswa kuwe kutsi abe sigcili, kungaba yindvodza nobe umfati longumHebheru, futsi asakusebentele iminyaka lesitfupha, ngemnyaka wesi-7 kufanele umkhulule.+ 13 Nawumkhulula, ungamhambisi alengisa tandla. 14 Ubomupha lokutsite lokutsetse emhlambini wakho wetimvu nobe wetimbuti, nalokutsetse ebaleni lakho lekubhulela, etjeni lekuhlutela emafutsa nasetjeni lekuhlutela liwayini. Njengobe nje Jehova Nkulunkulu wakho akubusisile, nawe ubomupha umnakenu. 15 Khumbulani kutsi nani naba tigcili eveni laseGibhithe nekutsi Jehova Nkulunkulu wenu wanikhulula. Kungako lamuhla nginitjela kutsi nente loku.

16 “Kodvwa nakatsi kuwe: ‘Angeke ngihambe!’ futsi loko akusho ngobe akutsandza wena kanye nendlu yakho, njengobe abejabula kulesikhatsi asenawe,+ 17 ubomtsatsa umyamise emnyango bese ubhobosa indlebe yakhe ngelusungulo, futsi utawubese uba sigcili sakho kuko konkhe kuphila kwakhe. Ubokwenta ngendlela lefanako nakuloyo losigcilikati sakho. 18 Ungeva buhlungu nawumkhulula futsi ahamba, ngobe umsebenti lakwentele wona kuleminyaka lesitfupha ulingana nemsebenti lophindvwe kabili wesisebenti lesicashiwe, naJehova Nkulunkulu wakho ukubusise kuto tonkhe tintfo letentiwe kuleso sikhatsi.

19 “Ematibulo lamadvuna emhlambi wenu wetinkhomo, wetimvu newetimbuti nibowanikela kuJehova Nkulunkulu wenu.+ Kute umsebenti lokufanele niwente ngalamatibulo etinkhomo,* futsi ematibulo etimvu newetimbuti kufanele ningawahhuli. 20 Njalo ngemnyaka, wena nendlu yakho nibodlela lamatibulo embikwaJehova Nkulunkulu wakho, kulendzawo Jehova latayikhetsa.+ 21 Kodvwa nangabe lelitibulo linesici, kungaba kutsi lephukile, aliboni, nobe linalesinye sici lesikhulu, ungabolinikela kuJehova Nkulunkulu wakho.+ 22 Kufanele nilidlele ngekhatsi emagcekeni* enu. Umuntfu lohlantekile nalongcolile angalidla, njengobe nje ningayidla inswephe nobe inyamatane.+ 23 Kodvwa ingati yalo ningaboyidla,+ niboyitfululela emhlabatsini njengemanti.+

16 “Nibokhumbula inyanga ya-Abibi,* futsi nigubhe liPhasika laJehova Nkulunkulu wenu,+ ngobe Jehova Nkulunkulu wenu wanikhipha eGibhithe ebusuku ngenyanga ya-Abibi.+ 2 Nibonikela kuJehova Nkulunkulu wenu ngesilwane lesingumnikelo weliPhasika.+ Kufanele nisitsatse emhlambini wenu wetimvu newetimbuti kanye nasemhlambini wetinkhomo,+ futsi ninikele ngaso kulendzawo Jehova latawukhetsa kubeka libito lakhe kuyo.+ 3 Lesilwane ningasidli nanoma ngabe yini lenemvubelo.+ Emalanga langu-7 kufanele nidle sinkhwa lesite imvubelo, lokusinkhwa selusizi, ngobe naphuma seniphutfuma eveni laseGibhithe.+ Loku nibokwenta kuze nikhumbule lilanga lenaphuma ngalo eveni laseGibhithe, yingci nje nanisaphila.+ 4 Kute inhlama lenemvubelo lokufanele itfolakale kuwo onkhe emagceke enu kulamalanga langu-7,+ nalenyama yalesilwane lenitawunikela ngaso kusihlwa ngalelilanga lekucala ingabosala kuze kube sekuseni ngelilanga lelilandzelako.+ 5 Akukafaneli ninikele ngalesilwane lesingumnikelo weliPhasika kunobe nguliphi nje lidolobha Jehova Nkulunkulu wenu lataninika lona. 6 Kodvwa kufanele ninikele ngaso endzaweni Jehova Nkulunkulu wenu latawukhetsa kubeka libito lakhe kuyo. Lesilwane lesingumnikelo weliPhasika nibonikela ngaso kusihlwa, ngekushesha nje nakushona lilanga,+ ngesikhatsi lenaphuma ngaso eGibhithe. 7 Nibosipheka futsi nisidlele+ kulendzawo Jehova Nkulunkulu wenu latayikhetsa,+ bese ekuseni nibuyela emathendeni enu. 8 Kufanele nidle sinkhwa lesite imvubelo emalanga lasitfupha, bese kutsi ngelilanga lesi-7 kube nembutsano lokhetsekile leniwentela Jehova Nkulunkulu wenu. Akukafaneli nisebente ngalelolanga.+

9 “Nibobala emaviki langu-7. Lamaviki nibocala kuwabala ngesikhatsi lenicala ngaso kuvuna lokutinhlavu kwenu.+ 10 Ngemuva kwaloko nibogubha uMkhosi Wemaviki leniwentela Jehova Nkulunkulu wenu.+ Nitawuletsa umnikelo wekutitsandzela, futsi lomnikelo kufanele uhambelane nelizinga Jehova Nkulunkulu wenu lanibusise ngalo.+ 11 Nibojabula embikwaJehova Nkulunkulu wenu, nine nemadvodzana enu, nemadvodzakati enu, netigcili netigcilikati tenu, emaLevi lasemagcekeni* enu, nebantfu bekuhamba, tintsandzane kanye nebafelokati labasemkhatsini wenu, futsi loku kufanele nikwentele kulendzawo Jehova Nkulunkulu wenu latawukhetsa kubeka libito lakhe kuyo.+ 12 Khumbulani kutsi nani nake naba tigcili eGibhithe,+ ngako-ke niboyigcina lemiyalo niphindze niyilalele.

13 “Nibogubha uMkhosi Wemadlangala*+ emalanga langu-7, nanibutsa loko lenikutsetse ebaleni lenu lekubhulela nasetjeni lenu lekuhlutela emafutsa nelekuhlutela liwayini. 14 Ngesikhatsi salomkhosi kufanele nijabule,+ nine nemadvodzana enu, nemadvodzakati enu, netigcili netigcilikati tenu, nemaLevi, nebantfu bekuhamba, netintsandzane kanye nebafelokati, bonkhe labasemagcekeni enu. 15 Jehova Nkulunkulu wenu nitawumentela lomkhosi emalanga langu-7,+ endzaweni Jehova layikhetsile, ngobe Jehova Nkulunkulu wenu utawubusisa wonkhe umkhicito wenu nako konkhe lenikwentako,+ nine nitawujabula nje kuphela.+

16 “Katsatfu ngemnyaka, bonkhe labadvuna kini kufanele baye embikwaJehova Nkulunkulu wenu endzaweni layikhetsile. Loku kutawukwenteka ngeMkhosi Wesinkhwa Lesite Imvubelo,+ ngeMkhosi Wemaviki,+ nangeMkhosi Wemadlangala.*+ Kute ngisho namunye kubo lokufanele aye embikwaJehova angakaphatsi lutfo. 17 Ngamunye wabo aboletsa sipho lesihambelana nelizinga Jehova Nkulunkulu wenu lanibusise ngalo.+

18 “Esiveni ngasinye kuwo onkhe emadolobha* Jehova Nkulunkulu wenu laninike wona, nibobeka behluleli+ kanye netindvuna, futsi kufanele behlulele lesive ngendlela lelungile. 19 Nibokwehlulela ngekulunga,+ ningakhetsi,+ nobe nivume kudizelwa, ngobe kudizelwa kuyawavala emehlo emuntfu lohlakaniphile+ kuwashintje nemavi emuntfu lolungile. 20 Nibokwenta tintfo ngekulunga futsi ngiko lokufanele nilwele kuba nako,+ kuze nitewuchubeka niphila, nitsatse nalelive Jehova Nkulunkulu wenu laninika lona.

21 “Akube bete sihlahla lenisihlanyela ngenjongo yekutsi sibe yinsika lengcwele,*+ eceleni kweli-al’thare lenilentele Jehova Nkulunkulu wenu.

22 “Akukafaneli nitibekele nelitje lelingcwele,+ ngobe Jehova Nkulunkulu wenu uyakwenyanya loko.

17 “Ningabonikela kuJehova Nkulunkulu wenu ngenkhabi nobe ngemvu lenesici, nome lenayiphi lenye inkinga, ngobe lomnikelo utawuba yintfo leyenyanyekako kuJehova Nkulunkulu wenu.+

2 “Nakwenteka kunome nguliphi lidolobha Jehova Nkulunkulu wenu laninika lona kutfolakala indvodza nome umfati lowenta lokubi emehlweni aJehova Nkulunkulu wenu nalowephula sivumelwane sakhe,+ 3 aphambuke aphindze akhonte labanye bonkulunkulu, futsi abakhotsamele, nobe akhotsamele lilanga nobe inyeti nobe lonkhe libutfo lasezulwini,+ lokuyintfo lengingakasho kutsi niyente,+ 4 nibotsi nanibikelwa nobe naniva ngako, niyihlolisise lendzaba. Nangabe kuliciniso+ kutsi lentfo leyenyanyekako yentekile ka-Israyeli, 5 nibotsatsa lendvodza nobe lomfati lowente lobubi nimkhiphele ngephandle emagedeni elidolobha, futsi kufanele agcotjwe ngematje aze afe.+ 6 Kufanele abulawe nangabe kunebufakazi* bebantfu lababili nobe labatsatfu.+ Kodvwa-ke angabobulawa nakunafakazi munye.+ 7 Labofakazi ngibo bekucala lokufanele bamgcobe ngematje kuze afe, bese-ke sonkhe lesive siyalandzela. Kufanele nibususe bubi emkhatsini wenu.+

8 “Nangabe kulelinye lemadolobha enu kuvela inkinga lematima kakhulu kutsi ningayehlulela, kungaba kutsi yindzaba letsintsa kucitfwa kwengati,+ nobe kutsi kunalabatsite labamangalelene, nobe kunebudlova lobentiwe nobe leminye nje imibango, nibohamba niye kulendzawo Jehova Nkulunkulu wenu layikhetsile.+ 9 Nibokuya kubaphristi labangemaLevi nakuloyo lotawube angumehluleli+ ngaleso sikhatsi, nifike nibute kubo, futsi batanitjela sincumo sabo.+ 10 Nibosilandzela lesincumo labatanitjela sona kulendzawo Jehova layikhetsile. Kufanele nikwente konkhe loko labatsi nikwente. 11 Nibowulandzela lomtsetfo labatanikhombisa wona, futsi nisilalele nesincumo labataninika sona.+ Ningaphambuki kuso, niye ngesekudla nobe ngesencele.+ 12 Umuntfu lotawuba nenkhani, angamlaleli umphristi lowenta umsebenti waJehova Nkulunkulu wenu nobe angamlaleli umehluleli, kufanele afe.+ Nibobususa bubi ka-Israyeli.+ 13 Sonkhe lesive sitawubese siyeva ngaloko futsi sesabe, ngako ngeke siphindze sibe nenkhani.+

14 “Naseningenile kulelive Jehova Nkulunkulu wenu laninika lona, senilitsetse laba lenu futsi senihlala kulo, bese nitsi: ‘Asitibekele inkhosi letawuba setikwetfu, njengato tonkhe letinye tive letiseceleni kwetfu,’+ 15 nibotibekela-ke inkhosi, kube ngumuntfu lotawukhetfwa nguJehova Nkulunkulu wenu.+ Lomuntfu lenitambeka kutsi abe yinkhosi kufanele aphume kubomnakenu. Anikavumeleki kutsatsa umuntfu wekuhamba longasuye umnakenu nimbeke abe yinkhosi. 16 Kodvwa-ke lenkhosi akukafaneli ibe nemahhashi lamanyenti,+ nobe yente lesive sibuyele eGibhithe kuze itfole emahhashi lamanyenti,+ ngobe Jehova watsi kini: ‘Ningabobuyela eGibhithe.’ 17 Ingabotitsatsela nebafati labanyenti, kuze inhlitiyo yayo ingaphambuki,+ futsi ingabotandzisela lisiliva kanye neligolide.+ 18 Naseyitsatsa sihlalo sayo sebukhosi, kufanele itibhalele ikhophi yaloMtsetfo encwadzini,* itsatsele kulowo logcinwe baphristi labangemaLevi.+

19 “Lenkhosi kufanele igcine lekhophi futsi iyifundze kuko konkhe kuphila kwayo,+ kute ifundze kwesaba Jehova Nkulunkulu wayo, iphindze igcine onkhe emavi aloMtsetfo kanye naletimiso futsi itilandzele.+ 20 Nayenta njalo ngeke itiphakamise kubanakabo futsi ngeke iphambuke kulomtsetfo, iye ngesekudla nobe ngesencele, kuze yona nemadvodzana ayo baphile sikhasi lesidze embusweni wayo, emkhatsini wema-Israyeli.

18 “Baphristi labangemaLevi, ngisho naso sonkhe sive semaLevi, ngeke babe nesabelo nobe lifa emkhatsini wema-Israyeli. Batakudla iminikelo leyentiwa ngemlilo leya kuJehova, leyo lelifa lakhe.+ 2 Ngako-ke kufanele bangabi nelifa emkhatsini webanakabo. Jehova ulifa labo, njengobe nje ashito kubo.

3 “Naku lokutawuba sabelo sebaphristi, futsi kutawutsatfwa kulesive: Nobe ngubani lowenta umhlatjelo, kungaba ngumhlatjelo wenkhomo nobe wemvu, kufanele anikete umphristi siphanga, imihlatsi kanye nekwangekhatsi. 4 Nibomniketa sivuno sekucala salokutinhlavu kwenu, liwayini lelisha lekucala, nemafutsa ekucala, kanye neboya bekucala lenibuhhule emihlambini yenu yetimvu neyetimbuti.+ 5 Kuto tonkhe tive tenu, Jehova Nkulunkulu wenu ukhetse emaLevi nemadvodzana awo kutsi ahlale asebentela Jehova.+

6 “Kodvwa nangabe umLevi esuka lapho abehlala khona kulelinye lemadolobha aka-Israyeli+ futsi afisa kuya kulendzawo Jehova latayikhetsa,*+ 7 angamsebentela Jehova Nkulunkulu wakhe kuleyo ndzawo njengabo bonkhe banakabo labangemaLevi, labasebenta lapho embikwaJehova.+ 8 Utawutfola sabelo sekudla lesilingana nesabo,+ ngetulu kwaloko lakutfole nakatsengisa lifa labokhokho bakhe.

9 “Naseningenile kulelive Jehova Nkulunkulu wenu laninika lona, ningabofundza kwenta imikhuba leyenyanyekako leyentiwa nguleto tive.+ 10 Kufanele kungatfolakali muntfu emkhatsini wenu loshisa indvodzana yakhe nobe indvodzakati yakhe emlilweni,+ lophengulako,+ lowenta imilingo,+ lobhulako,+ nobe losangoma,+ 11 nanobe ngubani lotsakatsa labanye, lobuta etangomeni+ nobe kulababiketela inhlanhla,+ nobe lobuta kulabafile.+ 12 Ngobe nobe ngubani lowenta letintfo uyenyanyeka kuJehova, futsi Jehova Nkulunkulu wenu uyaticosha embikwenu letive ngenca yalemikhuba leyenyanyekako. 13 Kufanele ningabi nesici embikwaJehova Nkulunkulu wenu.+

14 “Letive lenitawutsatsa indzawo yato betilalela labo labenta imilingo+ nalabaphengulako,+ kodvwa Jehova Nkulunkulu wenu akanivumeli kutsi nente tintfo letinjalo. 15 Jehova Nkulunkulu wenu utanivetela umphrofethi lofana nami kubantfu bakini, futsi nibomlalela.+ 16 Loku kungenca yaloko lenakucela kuJehova Nkulunkulu wenu eHorebe ngelilanga sonkhe sive sihlangene ndzawonye,+ nanitsi: ‘Sicela kungaphindze sive livi laJehova Nkulunkulu wetfu futsi sibone nalomlilo lomkhulu, kuze singafi.’+ 17 Jehova watsi kimi: ‘Loku labakushoko kukahle. 18 Ngitawubavetela umphrofethi lofana nawe emkhatsini wabomnakabo,+ futsi ngitawubeka emavi ami emlonyeni wakhe,+ yena utawubatjela konkhe lengikushoko.+ 19 Umuntfu longeke awalalele emavi ami, lawo lomphrofethi latawasho egameni lami, nakanjani kutawudzingeka aphendvule kimi.+

20 “‘Nakwenteka nobe ngumuphi umphrofethi enta shengatsi ukhuluma egameni lami kodvwa ngibe ngingakamtfumi kutsi akhulume, nobe nakwenteka akhuluma egameni lalabanye bonkulunkulu, loyo mphrofethi kufanele afe.+ 21 Kodvwa-ke ningase nitsi etinhlitiyweni tenu: “Sitawukwati ngani kutsi loku lakushoko akuveli kuJehova?” 22 Nangabe lomphrofethi akhuluma egameni laJehova futsi lalakushoko kungafezeki nobe kungenteki, loko kusho kutsi akuveli kuJehova. Lomphrofethi abengakatfunywa nguNkulunkulu. Kufanele ningamesabi.’

19 “Jehova Nkulunkulu wenu nasatibhubhisile letive letikulelive Jehova Nkulunkulu wenu laninike lona futsi nani senilitsetse, senihlala emadolobheni ato nasetindlini tato,+ 2 kufanele nikhetse emadolobha lamatsatfu kulelive Jehova Nkulunkulu wenu laninika lona kutsi libe lenu.+ 3 Lendzawo Jehova Nkulunkulu wenu laninika yona niboyehlukanisa ibe tincenye letintsatfu, nente nemigwaco kuze nobe ngubani lobulele umuntfu abalekele kulinye lalamadolobha.

4 “Naku lokufanele kwentiwe mayelana nemuntfu lobulele lomunye futsi lotawubalekela kulamadolobha kuze aphile: Nangabe abulele umuntfu wakubo ngesiphosiso futsi kungasiko kutsi bekamtondza,+ 5 njengalapho ahamba naye baya ehlatsini kuyewutfota, bese utsi uphakamisa lizembe ugawula sihlahla, lelizembe liphume emphinini walo lishaye lolomunye umuntfu afe, lona lobulele kufanele abalekele kulinye lalamadolobha kuze aphile.+ 6 Ngaphandle kwaloko, ngentfukutselo* umphindziseli wengati+ angamcosha amkhandze bese uyambulala, ngobe bekukukhashane kulelidolobha lekukhosela. Kodvwa-ke lomuntfu bekungakafaneli abulawe, ngobe bekangamtondzi lomuntfu wakubo.+ 7 Kungako-ke ngitsi kini: ‘Khetsani emadolobha lamatsatfu.’

8 “Lapho Jehova Nkulunkulu wenu sekayandzisile lendzawo yenu njengobe afunga kubokhokho benu,+ waphindze waninika lonkhe live lafunga kutsi utalinika bokhokho benu,+ 9 futsi nangabe nani niyilalela ngekwetsembeka yonkhe imitsetfo lengininika yona lamuhla, kutsi nitsandze Jehova Nkulunkulu wenu niphindze nihambe etindleleni takhe ngaso sonkhe sikhatsi,+ kufanele nibese nengeta lamanye emadolobha lamatsatfu.+ 10 Nanenta kanjalo, kute ingati lengenacala letawucitfwa+ eveni Jehova Nkulunkulu wenu laninika lona kutsi libe lifa lenu, kute nelicala lengati lenitawuba nalo.+

11 “Kodvwa nangabe umuntfu abetondza umuntfu wakubo,+ waze wamlalela endleleni kuze amhlasele futsi wamshaya wafa, wabese sewubalekela kulinye lalamadolobha ekukhosela, 12 emadvodza lamadzala akulelidolobha lakubo kufanele ambite, bese amletsa kulomphindziseli wengati, yena lotawubese uyambulala.+ 13 Lomuntfu ningabomvela buhlungu. Kufanele nilisuse licala lekucitfwa kwengati lengenacala ka-Israyeli,+ kuze tintfo titewunihambela kahle.

14 “Nasenitfola lifa lenu kulelive Jehova Nkulunkulu wenu laninika lona, ningabosisusa sikhonkwane semncele+ wamakhelwane wenu endzaweni bokhokho benu labasibeka kuyo.

15 “Bufakazi bemuntfu munye abukeneli kutsi kungalahlwa* ngabo lomunye umuntfu ngenca yanobe nguliphi licala nobe sono lasentile.+ Kudzingeka kube nabofakazi* lababili nobe labatsatfu kuze kucinisekiswe kutsi indzaba iliciniso.+ 16 Nangabe lotsite afakaza emanga ngalomunye umuntfu futsi abe anetinhloso letimbi, ammangalela nangekutsi wente intfo lembi,+ 17 labo bantfu lababili kufanele beme embikwaJehova, nasembikwebaphristi kanye nebehluleli labatawube behlulela ngaleso sikhatsi.+ 18 Labehluleli batayiphenyisisa lendzaba.+ Nakutfolakala kutsi lomuntfu abefakaza emanga futsi abemangalela umuntfu wakubo ngentfo lengekho, 19 nibokwenta kuye loko labehlose kukwenta kulomuntfu wakubo.+ Ngako-ke nibobususa bubi emkhatsini wenu.+ 20 Labanye bantfu batawukuva ngaloku futsi besabe, ngaleyo ndlela ngeke baphindze bente intfo lembi kanjena emkhatsini wenu.+ 21 Ningabobuva buhlungu,+ ngobe kufanele kwenanwe kuphila ngekuphila, liso ngeliso, litinyo ngelitinyo, sandla ngesandla, lunyawo ngelunyawo.+

20 “Naniyokulwa netitsa tenu bese nibona kutsi tinemahhashi, netinkalishi kanye nemabutfo lamanyenti kakhulu kunewenu, ningatesabi ngobe Jehova Nkulunkulu wenu lowanikhipha eveni laseGibhithe unani.+ 2 Nasenitawuphuma niye emphini, umphristi kufanele ete kulesive akhulume naso.+ 3 Abotsi kuso: ‘Lalelani ma-Israyeli, nyalo niya emphini niyewukulwa netitsa tenu. Ningaphelelwa ngemandla. Ningesabi futsi ningetfuki nobe nichachatele ngenca yato, 4 ngobe Jehova Nkulunkulu wenu uhamba nani kuze anilwele etitseni tenu aphindze anisindzise.’+

5 “Tindvuna nato kufanele tikhulume nalesive titsi: ‘Ukhona yini lowakhe indlu kodvwa losengakayivuli? Akabuyele endlini yakhe, ngobe angasuke afe emphini bese lendlu ivulwa ngulomunye umuntfu. 6 Ukhona yini lohlanyele insimu yemagilebisi kodvwa losengakacali kudla titselo tayo? Akahambe abuyele endlini yakhe, ngobe angasuke afe emphini bese letitselo tidliwa ngulomunye umuntfu. 7 Ukhona yini lowetsembisene nentfombi letsite kodvwa losengakayitsatsi? Akahambe abuyele endlini yakhe,+ ngobe kungenteka afe emphini bese lentfombi itsatfwa ngulomunye umuntfu.’ 8 Letindvuna kufanele tibute lesive titsi: ‘Ukhona yini lowesabako nalophelelwe ngemandla?+ Akabuyele endlini yakhe kuze angabangeli kutsi bomnakabo besabe njengaye.’*+ 9 Naseticedzile kukhuluma nalesive, letindvuna kufanele tibeke baholi bemabutfo, labatawuhola labantfu.

10 “Nibotsi nasenisondzela edolobheni lelitsite leniyokulwa nalo, nitjele bantfu bakhona kutsi banelitfuba lekwakha kuthula nani.+ 11 Nangabe bavuma kwakha kuthula futsi banivulela emasango abo, bonkhe bantfu balapho batawuba tigcili tenu baphindze banisebentele.+ 12 Nabala kwakha kuthula bese balwa nani, kufanele nilivimbetele lelidolobha labo, 13 futsi nakanjani Jehova Nkulunkulu wenu utalinikela esandleni senu. Bonkhe bantfu labadvuna labakulelo dolobha nibobabulala ngenkemba. 14 Kodvwa-ke bafati, bantfwana, imfuyo, nayo yonkhe intfo lekulelidolobha, lokungiko konkhe lenitakutfola kulo, ningakutsatsa kube kwenu,+ futsi tintfo tetitsa tenu, leto Jehova Nkulunkulu wenu laninikete tona nitawutitsatsa.+

15 “Nguloko-ke lenitakwenta kuwo onkhe emadolobha lakhashane kakhulu nani, langasiwo aletive letibomakhelwane benu. 16 Kodvwa emadolobheni aletive letibomakhelwane benu, lawo Jehova laninikete wona kutsi abe lifa lenu, akube bete lokuphefumulako lenikushiya kuphila.+ 17 Esikhundleni saloko emaHethi, ema-Amori, emaKhenani, emaPheresi, emaHivi, kanye nemaJebhusi,+ nibowanikela ngalokuphelele ekubhujisweni, njengobe nje Jehova Nkulunkulu wenu anitjelile, 18 kuze anganifundzisi kwenta yonkhe lemikhuba yawo leyenyanyekako layentela bonkulunkulu bawo, ngaleyo ndlela anente none kuJehova Nkulunkulu wenu.+

19 “Nangabe nivimbetela lidolobha futsi nilincoba ngemuva kwekulwa nalo emalanga lamanyenti, ningaliphakamisi lizembe nigawule tihlahla takhona. Ningatidla titselo tato kepha akukafaneli nitigawule.+ Kufanele yini ubulale sihlahla lesisesigangeni njengobe ungabulala umuntfu? 20 Kuphela kwetihlahla leningatibulala ngulenatiko kutsi atidliwa. Ningatigawula bese nakha tintfo tekuvimbetela lelidolobha lelilwa nani, nize nilincobe.

21 “Nangabe kutfolakala umuntfu esigangeni abulewe kulelive Jehova Nkulunkulu wenu laninika lona kutsi libe lenu, futsi kungatiwa kutsi ubulewe ngubani, 2 emadvodza lamadzala kanye nebehluleli+ benu kufanele baphume bakale kutsi lingakanani libanga kusuka lapho kutfolakele khona lesidvumbu kuya emadolobheni lasedvute naso. 3 Ngemuva kwaloko, emadvodza lamadzala asedolobheni lelisedvute nalapho kutfolakele khona lesidvumbu kufanele atsatse inkhomo leseyincane lengakaze isetjentiswe nobe iboshelwe. 4 Lenkhomo aboyichuba ayiyise esihosheni lesigeleta emanti, lapho kungakaze kulinywe nobe kuhlanyelwe khona. Nakefika kulesihosha aboyephula intsamo.+

5 “Baphristi labangemaLevi batakuta kuze babusise egameni laJehova, ngobe Jehova Nkulunkulu wenu ukhetse bona kutsi bamentele umsebenti.+ Batawukusho kutsi kufanele ticatululwe njani tonkhe tincabano letitsintsa budlova.+ 6 Ngemuva kwaloko, onkhe emadvodza lamadzala akulelidolobha lelidvutane nalapho kutfolakele khona lesidvumbu kufanele ageze tandla+ tawo etikwalenkhomo leseyincane leyephulwe intsamo esihosheni, 7 bese atsi: ‘Tandla tetfu atikayicitsi lengati, futsi asikaboni nayicitfwa. 8 Awu Jehova, lelicala ungalibeki kuma-Israyeli, bantfu bakho lowabakhulula,+ ungavumi nekutsi lelicala lekucitfwa kwengati lengenacala lichubeke likulabantfu bakho.’+ Ngako-ke ema-Israyeli ngeke asabekwa lelicala lengati. 9 Ngaleyo ndlela nitalisusa lelicala lekucitfwa kwengati lengenacala emkhatsini wenu, ngekutsi nente lokulungile emehlweni aJehova.

10 “Nanihamba niyokulwa netitsa tenu, futsi Jehova Nkulunkulu wenu anincobele tona, nine nititfumbe,+ 11 bese wena ubona intfombi lenhle kulabantfu lenibatfumbile, uyitsandze, ufise nekuyitsatsa ibe ngumfati wakho, 12 ungayitsatsa ute nayo endlini yakho. Kufanele ihhule enhloko, ilungise tingalo tayo, 13 ikhumule netingubo lebeyitigcoke nayitfunjwa bese ihlala endlini yakho. Lentfombi itawulilela babe wayo namake wayo inyanga yonkhe,+ ngemuva kwaloko sewungaya nayo ecansini. Wena utawuba yindvodza yayo, nayo ibe ngumfati wakho. 14 Kodvwa-ke nawungajabuli ngaye, ubomkhulula+ aye lapho afuna khona. Awukavumeleki kutsi umtsengise nobe umphatse kabi, ngobe sewumhlazisile.

15 “Nangabe indvodza inebafati lababili kodvwa kube khona lemtsandza kakhulu kunalomunye,* futsi bobabili babe bayitalele emadvodzana, kepha litibulo libe lilalona longatsandvwa,+ 16 ngelilanga lendvodza letawehlukanisela ngalo lamadvodzana ayo lifa, ayikavumeleki kutsatsa lilungelo lebutibulo ilinike lendvodzana yalomfati lotsandvwako esikhundleni salendvodzana yalona longatsandvwa, lekungiyo lelitibulo. 17 Lendvodza kufanele ihloniphe lilungelo lebutibulo lalendvodzana yalomfati longatsandvwa ngekutsi iyinike sabelo lesiphindvwe kabili kuto tonkhe tintfo lenato, ngobe lendvodzana isicalo semandla ayo ekutala. Lelilungelo lebutibulo ngelayo.+

18 “Nangabe umuntfu anendvodzana lenenkhani nalelihlongandlebe, lengamlaleli babe wayo nobe make wayo,+ futsi batali bayo babe betamile kuyekhuta kodvwa yangabalaleli,+ 19 batali bayo kufanele bayitsatse bayiletse egedeni lelidolobha, emadvodzeni lamadzala, 20 batsi kuwo: ‘Lendvodzana yetfu inenkhani futsi ilihlongandlebe, ayifuni nekusilalela. Isimiti,+ injalo nje isidzakwa.’+ 21 Onkhe emadvodza akulelidolobha lakubo kufanele ayigcobe ngematje ize ife. Ngako-ke kufanele nibususe bubi emkhatsini wenu, futsi onkhe ema-Israyeli atawukuva ngaloku bese ayesaba.+

22 “Nangabe umuntfu ente sono lesimenta afanelwe kufa,+ futsi asabulewe walengiswa elugodvweni,+ 23 sidvumbu sakhe akukafaneli sihlale busuku bonkhe kulolugodvo.+ Esikhundleni saloko, nibosingcwaba ngalo lelolanga, ngobe umuntfu lolengiswe elugodvweni ucalekisiwe kuNkulunkulu.+ Ningalingcolisi lelive Jehova Nkulunkulu wenu laninika lona kutsi libe lifa lenu.+

22 “Nangabe ubona inkhabi yemuntfu wakini nobe imvu yakhe ilahleka, ungayishiyi ngemabomu.+ Kufanele uyihole uyibuyisele kulomuntfu wakini. 2 Kodvwa nangabe lomuntfu ahlala khashane nobe ungamati kutsi ngubani, ubositsatsa lesilwane sakhe uye naso ekhaya lakho. Sitawuhlala kuwe kuze kube ngulapho asifuna, futsi ubosibuyisela kuye.+ 3 Nguloko lokufanele ukwente nawutfola imbongolo yemuntfu wakini, ingubo yakhe nanobe yini lenye lemlahlekele. Akukafaneli wente shengatsi awuyiboni.

4 “Nawubona imbongolo nobe inkhabi yemuntfu wakini iwa emgwacweni, ungaboyishiya ngemabomu. Kufanele nakanjani umsite ayivuse.+

5 “Umuntfu lomsikati akukafaneli agcoke timphahla temuntfu lomdvuna, nemuntfu lomdvuna akukafaneli agcoke timphahla temuntfu lomsikati, ngobe nobe ngubani lowenta loku uyenyanyeka kuJehova Nkulunkulu wenu.

6 “Nawukhandza sidleke senyoni emgwacweni sinemazini nobe emacandza, kungaba kutsi sisesihlahleni nobe siphansi emhlabatsini, futsi unina ahleti etikwalamazini nobe etikwalamacandza, ungabomtsatsa lonina kanye nemazini akhe.+ 7 Ungatitsatsela lamazini, kodvwa ubociniseka kutsi unina wawo uyamyekela ahambe. Loku ubokwenta kuze tintfo tikuhambele kahle futsi uphile sikhatsi lesidze.

8 “Nawakha indlu, ubokwakha nemtsangala lotawutungeleta luphahla lwakho,+ kuze kube bete umuntfu lowa kuloluphahla bese indlu yakho iba nelicala lengati.

9 “Ungahlanyeli tinhlobo letehlukene tetinhlanyelo ensimini yakho yemagilebisi.+ Nawenta njalo, konkhe lokuvune kulensimu yakho nako konkhe lotakukhicita ngalokutfole kuyo kutawunikelwa endzaweni lengcwele.

10 “Ungayibopheli inkhabi nembongolo kanye kanye nawulima.+

11 “Ungatigcoki timphahla letentiwe ngeboya nangelineni lokuhlanganiswe ndzawonye.+

12 “Nibokwenta imijijimba emakoneni lamane etingubo tenu lenitigcokako.+

13 “Nangabe umuntfu atsatsa umfati, futsi aye naye ecansini bese uyamtondza,* 14 amsole nangekutsi utiphetse kabi, bese umakhela ligama lelibi ngekutsi atsi: ‘Ngitsetse lomfati, kodvwa ngitsite nangiya naye ecansini ngatfola kutsi akasiyo intfombi ntfo,’ 15 batali balentfombatana kufanele bamikise bufakazi bekutsi lentfombatana beyiyintfombi ntfo, babunike emadvodza lamadzala lasegedeni lalelidolobha. 16 Babe walentfombatana kufanele atsi kulamadvodza lamadzala: ‘Lomuntfu ngamniketa indvodzakati yami kutsi ibe ngumfati wakhe, kodvwa sewuyayitondza,* 17 futsi uyisola kutsi itiphetse kabi ngekutsi atsi: “Ngitfole kutsi indvodzakati yakho ayisiyo intfombi ntfo.” Nabu-ke bufakazi bekutsi indvodzakati yami beyiyintfombi ntfo.’ Ngemuva kwaloko labatali batawendlala indvwangu embikwemadvodza lamadzala alelidolobha. 18 Lamadvodza lamadzala+ atawutsatsa lendvodza ayijezise.+ 19 Atayihlawulisa lisiliva lelingaba likhilogremu,* alinikete babe walentfombatana, ngobe lendvodza ihlazise intfombi yaka-Israyeli.+ Lentfombi itawuchubeka ingumfati wayo, futsi lendvodza ayikavumeleki kutsi yehlukane naye kuko konkhe kuphila kwayo.

20 “Kodvwa nangabe letinsolo tiliciniso, futsi kute bufakazi bekutsi lentfombatana beyiyintfombi ntfo, 21 baboyikhiphela ngephandle esangweni lendlu yababe wayo. Emadvodza akulelidolobha kufanele ayigcobe ngematje ize ife ngobe yente intfo lelihlazo+ ka-Israyeli ngekutsi itiphatse kabi ngekwelicansi* endlini yababe wayo.+ Ngako-ke nibobususa bubi emkhatsini wenu.+

22 “Nangabe indvodza itfolakala iya ecansini nemfati walenye indvodza, bobabili kufanele babulawe kanye kanye, lomfati kanye nalendvodza laye nayo ecansini.+ Kufanele nibususe bubi ka-Israyeli.

23 “Nangabe intfombi yetsembisene umshado nendvodza letsite, bese lenye indvodza ihlangana nalentfombi edolobheni, iye nayo ecansini, 24 kufanele bobabili bakhishelwe ngephandle egedeni lalelidolobha futsi bagcotjwe ngematje baze bafe. Lentfombatana itawugcotjwa ngenca yekutsi ayizange ihlabe inyandzaleyo ledolobheni, lendvodza yona itawugcotjwa ngenca yekutsi ihlazise umfati wemuntfu wakubo.+ Ngako-ke kufanele nibususe bubi emkhatsini wenu.

25 “Kodvwa nangabe lendvodza iyikhandze esigangeni lentfombi letsembisene nalenye indvodza, futsi yayibamba ngenkhani yalala nayo, ngulendvodza kuphela lokufanele ibulawe. 26 Ningabokwenta lutfo kulentfombi ngobe kute sono lesentile lesenta ifanelwe kufa. Loku lokwentekile kufanana nalapho umuntfu ahlasela lomunye bese uyambulala.*+ 27 Ngobe lendvodza ikhandze lentfombi esigangeni, futsi lentfombi iyihlabile inyandzaleyo, kodvwa kwaba bete loyisitako.

28 “Nakwenteka indvodza ihlangana nentfombi lengakatsembisani nalenye indvodza umshado, futsi iyibambe iye nayo ecansini bese loko kuyevakala,+ 29 lendvodza kufanele inike babe walentfombi emagremu langu-570* elisiliva, futsi lentfombi itawuba ngumfati wayo.+ Lendvodza ngeke ivunyelwe kutsi yehlukane naye kuko konkhe kuphila kwayo, ngobe imhlazisile.

30 “Kute umuntfu lokufanele atsatse umfati wababe wakhe, kuze angamhlazisi babe wakhe.*+

23 “Kute umuntfu lomdvuna lophakulwe ngekulinyatwa sitfo sakhe sangasense nome lonesitfo sangasense lesijutjiwe longaba yincenye yesive saJehova.+

2 “Kute nendvodzana letelwe ngalokungekho emtsetfweni lengaba yincenye yesive saJehova.+ Ngisho nebantfwana bayo besitukulwane sayo selishumi ngeke babe yincenye yalesive saJehova.

3 “Um-Amoni nobe umMowabi naye ngeke abe yincenye yesive saJehova.+ Ngisho nebantfwana babo besitukulwane sabo selishumi abayoze babe yincenye yalesive saJehova, 4 ngobe abazange baniphe kudla kanye nemanti ngesikhatsi nisendleleni ngemuva kwekuphuma eGibhithe,+ nangenca yekutsi batsenga Bhalamu indvodzana yaBheyori wasePhethori leseMesophothamiya kutsi anicalekise.+ 5 Kodvwa Jehova Nkulunkulu wenu akazange amlalele Bhalamu.+ Esikhundleni saloko, Jehova Nkulunkulu wenu washintja lesicalekiso wenta kutsi sibe sibusiso kini,+ ngobe Jehova Nkulunkulu wenu abenitsandza.+ 6 Kuso sonkhe sikhatsi sekuphila kwenu, ningalokotsi nibasite kutsi babe nekuthula nobe baphumelele.+

7 “Ningamenyanyi umuntfu longum-Edomu, ngobe ungumnakenu.+

“Nemuntfu longumGibhithe naye ningamenyanyi, ngobe nine naba tihambi eveni lakhe.+ 8 Bantfwana babo labasitukulwane sesitsatfu bangaba yincenye yesive saJehova.

9 “Nangabe nivimbetele titsa tenu kuze nilwe nato, kuboba bete intfo lembi* leniyentako.+ 10 Nangabe indvodza iba ngulengcolile ngenca yekutsi iphume sidvodza ebusuku,+ kufanele iphume kulendzawo lenikuyo futsi ingabuyi. 11 Nasekuhlwile, lendvodza ibogeza ngemanti, ngemuva kwaloko seyingabuya kulendzawo nasekushona lilanga.+ 12 Kufanele nilungise indzawo* ngephandle kwalapho nikhona khona, futsi nitakuya kuyo nakunesidzingo. 13 Nibohlale ninentfo yekumba. Nakwenteka niya ngaphandle niyotikhulula, nibokumba ngayo, ngemuva kwaloko nigcibe lamangcoliso. 14 Ngobe Jehova Nkulunkulu wenu uhambahamba kulendzawo lenikuyo+ kuze anisindzise, aphindze anikele netitsa tenu kini. Ngako-ke lendzawo kufanele ibe ngcwele,+ kuze angaboni lutfo lolungcolile kini bese uyanishiya.

15 “Sigcili nasibalekile enkhosini yaso seta kuwe, ungabosibuyisela kuyo. 16 Singahlala nawe kunobe nguyiphi indzawo lesiyikhetsako kulinye lemadolobha enu, lapho sona sitsandza khona. Ungabosiphatsa kabi.+

17 “Kute umuntfu lomsikati ka-Israyeli lokufanele abe yingwadla,*+ nemuntfu lomdvuna wakhona naye akukafaneli abe yingwadla.+ 18 Imali lokubhadelwe* ngayo umuntfu lomsikati loyingwadla nobe umuntfu lomdvuna loyingwadla* ningaboyiletsa endlini yaJehova Nkulunkulu wenu kuze nifeze sifungo, ngobe labo bantfu bayenyanyeka kuJehova Nkulunkulu wenu.

19 “Ungambhadalisi intalo umuntfu wakini,+ kungaba yemali, yekudla, neyanobe yini lokudzingeka kubhadalwe kuyo intalo. 20 Umuntfu wekuhamba ungambhadalisa intalo,+ kodvwa umuntfu wakini ungabombhadalisa,+ kuze Jehova Nkulunkulu wenu atenibusisa kuko konkhe lenikwentako kulelive lenitalitsatsa libe lenu.+

21 “Nawenta sifungo kuJehova Nkulunkulu wakho,+ ungephuti kusifeza.+ Jehova Nkulunkulu wakho ulindzele kutsi usifeze, futsi nawungakwenti loko utawuba nelicala.+ 22 Kodvwa nawungasenti sifungo, angeke ube nelicala.+ 23 Ubowagcina emavi lowakhulumako,+ naloko lofunge kutsi utakuletsa kube ngumnikelo wekutitsandzela kuJehova Nkulunkulu wakho ubokuletsa.+

24 “Nawungena ensimini yemagilebisi yamakhelwane wakho, ungawadla lamagilebisi uze wesutse, kodvwa akukafaneli kube khona lowafaka entfweni letsite kuze uhambe nawo.+

25 “Nawungena ensimini yalokutinhlavu yamakhelwane wakho, ungakukha loko lesekulungele kudliwa, kodvwa ungalifaki lisikela kulolokutinhlavu kwakhe.+

24 “Nangabe indvodza itsatsa umfati kodvwa ingajabuli ngaye ngobe itfole intfo lengayitsandzi kuye, kufanele imbhalele incwadzi yekumdivosa,+ imnikete yona futsi imkhiphe endlini yayo.+ 2 Nasekahambile ekhaya layo, angaba ngumfati walenye indvodza.+ 3 Nangabe lendvodza yesibili imenyanya* bese imbhalela incwadzi yekumdivosa, imnikete yona futsi imkhiphe endlini yayo nobe nangabe ifa, 4 indvodza yakhe yekucala leyamhambisa ayikavumeleki kutsi iphindze imtsatse abe ngumfati wayo ngobe sewungcolile. Leyo yintfo leyenyanyekako kuJehova. Ungabosiletsa sono eveni Jehova Nkulunkulu wenu laninika lona kutsi libe lifa lenu.

5 “Nangabe indvodza isandza kutsatsa umfati, akukafaneli iye emphini nobe iniketwe leminye imisebenti. Ibokhululwa umnyaka munye, ihlale ekhaya futsi yente umfati wayo ajabule.+

6 “Kute umuntfu lokufanele atsatse litje lekusila lalomunye umuntfu nobe atsatse imbokodvo yalo kube sibambiso semali lamboleke yona,+ ngobe loko kungafana nekutsatsa kuphila kwakhe* kube sibambiso.

7 “Nangabe kutfolakala kutsi umuntfu utfumbe umnakabo* longum-Israyeli, wamphatsa kabi futsi wamtsengisa,+ lona lomtfumbile abobulawa.+ Kufanele nibususe bubi emkhatsini wenu.+

8 “Nakubhedvuka bulephelo* nibociniseka kutsi nikwenta konkhe loko baphristi labangemaLevi labatawunitjela kona.+ Nibokwenta njengobe nje ngibatjelile. 9 Nibokhumbula loko Jehova Nkulunkulu wenu lakwenta kuMiriyamu ngesikhatsi nisendleleni ngemuva kwekuphuma eGibhithe.+

10 “Nawuboleka makhelwane wakho lokutsite,+ ungabongena endlini yakhe utsatse loko latsite utakunika kona kube sibambiso. 11 Ubokuma ngephandle futsi lomuntfu lombolekile utawuta lapho ngephandle akunike loko labambisa ngako. 12 Nangabe lomuntfu eswele, akukafaneli uze uyewulala ungakakubuyiseli loko labambise ngako.+ 13 Kufanele nakanjani nalishona lilanga ukubuyisele loko labambise ngako, futsi lengubo yakhe utawulala ngayo,+ aphindze akubusise. Ngaleyo ndlela wena kutawutsiwa ulungile embikwaJehova Nkulunkulu wakho.

14 “Akukafaneli ugebenge sisebenti lesicashiwe leseswele futsi lesihluphekako, kungaba ngumuntfu wakini nobe umuntfu wekuhamba lohlala eveni lenu, ngekhatsi emadolobheni* enu.+ 15 Kufanele umholele lingakashoni lelolanga,+ ngobe weswele, futsi uyalidzinga leliholo kute aphile. Nawungenti njalo, utawukhala ngawe kuJehova futsi wena utawuba nelicala.+

16 “Bobabe akukafaneli babulawelwe loko lokwentiwe bantfwana babo, nebantfwana akukafaneli babulawelwe loko lokwentiwe bobabe babo.+ Umuntfu kufanele afele sono sakhe kuphela.+

17 “Ubomehlulela ngekulunga umuntfu wekuhamba nobe intsandzane,+ futsi akukafaneli utsatse imphahla yemfelokati ibe sibambiso saloko lomboleke kona.+ 18 Nibokhumbula kutsi naba tigcili eGibhithe futsi Jehova Nkulunkulu wenu wanikhulula.+ Kungako nginitjela kutsi nente loku.

19 “Nangabe uvuna ensimini yakho wase ukhohlwa sitfungo, ungabuyeli emuva uyositsatsa. Ubosishiyela umuntfu wekuhamba, intsandzane kanye nemfelokati,+ kuze Jehova Nkulunkulu wakho akubusise kuko konkhe lokwentako.+

20 “Nawuhhohlota titselo temncumo esihlahleni, akukafaneli uphindze uhhohlote kwesibili. Loko lokusele ubokushiyela umuntfu wekuhamba, intsandzane nemfelokati.+

21 “Nawuvuna emagilebisi ensimini yakho, ungabobuyela emuva uyovuna lasele. Ubowashiyela umuntfu wekuhamba, intsandzane nemfelokati. 22 Ubokhumbula kutsi nani naba tigcili eveni laseGibhithe. Kungako nginitjela kutsi nente loku.

25 “Nakwenteka bantfu lababili bacabana, bangaya kubehluleli,+ futsi batakwehlulela emkhatsini wabo, basho kutsi ngubani lonelicala nekutsi ngubani lote.+ 2 Nangabe lona lonelicala ufanelwe kushaywa,+ umehluleli utamlalisa phansi bese ushaywa embikwakhe. Lomuntfu kufanele ashaywe imivimba lelingana nebubi labentile. 3 Lomehluleli angamshaya imivimba lengu-40,+ kodvwa angendluli kuyo. Nakangamshaya imivimba lengetulu kwaleyo, lomuntfu wakini utawuhlazeka embikwenu.

4 “Ungayifaki sifonyo inkhabi nayibhula.+

5 “Nangabe bantfu bandzawonye bakhelene bese lona lomunye uyafa ete indvodzana, umfati wakhe kufanele angatsatfwa ngumuntfu longasiye wakulomndeni. Umnakabomufi kufanele aye kuye kuze amtsatse abe ngumfati wakhe futsi amngene.+ 6 Litibulo latawuba nalo litawulondvolota libito lemufi,+ kuze lelibito lichubeke likhona ka-Israyeli.+

7 “Nangabe lendvodza ingafuni kutsatsa lomfelokati wemnakabo, lomfelokati abokuya emadvodzeni lamadzala lasegedeni lalelidolobha, atsi kuwo: ‘Umkhula wami walile kulondvolota libito lemnakabo ka-Israyeli. Akafuni kungingena.’ 8 Lamadvodza lamadzala akulelidolobha aboyibita lendvodza akhulume nayo. Nangabe vele iphikelela itsi: ‘Angifuni kumtsatsa,’ 9 lomfelokati wemnakabo kufanele ete kuyo embikwalamadvodza lamadzala, ayikhumule incabule+ futsi ayikhafunele ebusweni, atsi: ‘Naku-ke lokufanele kwentiwe kumuntfu longafuni kwakha indlu yemnakabo.’ 10 Ngemuva kwaloko, umndeni* walendvodza ka-Israyeli utakwatiwa ngekutsi: ‘Yindlu yaloyo lowakhunyulwa incabule.’

11 “Nakwenteka emadvodza lamabili alwa bese umfati walena lenye uyangenela kuze avikele indvodza yakhe, futsi elule sandla sakhe abambe sitfo sangasense salona loshaya indvodza yakhe, 12 nibosijuba lesandla salomfati. Ningabomvela buhlungu.

13 “Esikhwameni sakho akukafaneli kube nematje lamabili ekukala lanetisindvo letingalingani,+ lelinye libe likhulu lelinye libe lincane. 14 Endlini yakho kungaboba netitja tekukala letingalingani,*+ lesinye sibe sikhulu, lesinye sibe sincane. 15 Kufanele ube nekwekukala sisindvo lokukala kahle futsi lokungiko, kanye nesikali lesikala kahle futsi lesingiso, kuze uphile sikhatsi lesidze kulelive Jehova Nkulunkulu wakho lakunika lona.+ 16 Ngobe wonkhe umuntfu longaketsembeki, lowenta tintfo letinjalo uyenyanyeka kuJehova Nkulunkulu wenu.+

17 “Nibokhumbula kutsi ema-Amaleki anentani ngesikhatsi nisendleleni ngemuva kwekuphuma eGibhithe,+ 18 nakahlangana nani endleleni futsi ahlasela bonkhe labo lebebasalele emuva ngesikhatsi senidziniwe futsi seniphelelwe ngemandla. Akazange amesabe Nkulunkulu. 19 Jehova Nkulunkulu wenu nasekaninike kuphumula kuto tonkhe titsa tenu kulelive Jehova Nkulunkulu wenu laninika lona kutsi libe lifa lenu,+ kufanele nilicedze ligama lema-Amaleki emhlabeni.+ Ningakukhohlwa loku.

26 “Nase nifikile kulelive Jehova Nkulunkulu wenu laninika lona kutsi libe lifa lenu, senilitsetse futsi senihlala kulo, 2 kufanele utsatse letinye tetitselo tekucala tawo wonkhe umkhicito* wemhlaba lotawutitfola kulelive Jehova Nkulunkulu wenu laninika lona, utifake kubhasikidi bese uya kulendzawo Jehova Nkulunkulu wenu latawukhetsa kubeka libito lakhe kuyo.+ 3 Ubokuya kumphristi lotawube enta umsebenti ngalawo malanga, utsi kuye: ‘Lamuhla ngitewubika kuJehova Nkulunkulu wetfu kutsi sengingenile kulelive Jehova lafunga kubokhokho betfu kutsi utasinika lona.’+

4 “Lomphristi utawubese utsatsa lobhasikidi esandleni sakho, awubeke embikweli-al’thare laJehova Nkulunkulu wakho. 5 Ngemuva kwaloko kufanele ukhulume embikwaJehova Nkulunkulu wakho utsi: ‘Khokho wami abengum-Aramu lozulazulako,*+ futsi waya eGibhithe+ wahlala khona njengesihambi, nemndeni wakhe bewumncane.+ Kodvwa wefike waba sive lesikhulu, lesinemandla nalesinebantfu labanyenti.+ 6 Bantfu baseGibhithe basiphatsa kabi, basicindzetela futsi basigcilata kabuhlungu.+ 7 Ngako sakhala kuJehova Nkulunkulu wabokhokho betfu. Jehova wakuva loko lebesikusho, futsi wakunaka kuhlupheka kwetfu, tinkinga tetfu kanye nekucindzeteleka kwetfu.+ 8 Ekugcineni Jehova wasikhipha eGibhithe ngesandla lesinemandla nangesandla leseluliwe,+ ngetintfo letesabisako, ngetibonakaliso nangetimangaliso.+ 9 Ngemuva kwaloko wasiletsa kulendzawo futsi wasiniketa lelive, lokulive leligeleta lubisi neluju.+ 10 Ngako-ke nyalo ngiletse titselo tekucala temkhicito walelive Jehova langinike lona.’+

“Ubotibeka embikwaJehova Nkulunkulu wakho futsi ukhotsame embikwaJehova Nkulunkulu wakho. 11 Wena nemLevi kanye nemuntfu wekuhamba lohlala nawe, nitawujabula ngako konkhe lokuhle Jehova lakunike kona, wena nendlu yakho.+

12 “Nawucedza kubutsa konkhe kwelishumi+ kwemkhicito wakho ngemnyaka wesitsatfu, lokungumnyaka wekwelishumi, ubokunika umLevi, umuntfu losihambi, intsandzane kanye nemfelokati, futsi batakudla besutse emagcekeni*+ akho. 13 Ubobese ukhuluma embikwaJehova Nkulunkulu wakho utsi: ‘Sengikukhiphile endlini yami loko lokuyincenye lengcwele ngakunika umLevi, umuntfu wekuhamba, intsandzane kanye nemfelokati,+ njengobe nje bewungitjelile. Angikawephuli umtsetfo wakho futsi ngiwulalele. 14 Loko angizange ngikudle ngesikhatsi sekulila, nobe ngikhiphe ngisho lokuncane kwako ngibe ngingcolile nobe nginikele ngisho nalokuncane kwako kulabafile. Ngililalele livi laJehova Nkulunkulu wami, ngenta konkhe loko lebewungitjele kona. 15 Ngako ngicela ubuke phansi usemazulwini, indzawo yakho yekuhlala lengcwele futsi ubusise ema-Israyeli, lokubantfu bakho, ubusise nalelive losinikete lona,+ lokulive leligeleta lubisi neluju,+ njengobe nje wafunga kubokhokho betfu.’+

16 “Lamuhla Jehova Nkulunkulu wenu uniyala kutsi nigcine imitsetfo yakhe netimiso takhe. Kufanele nitigcine futsi nitilandzele ngenhlitiyo yenu yonkhe+ nangemphefumulo* wenu wonkhe. 17 Nine nitfole sicinisekiso kuJehova lamuhla sekutsi utawuba nguNkulunkulu wenu nangabe nitawuhamba etindleleni takhe, nilandzele imiyalo yakhe,+ imitsetfo yakhe+ netimiso takhe,+ niphindze nilalele livi lakhe. 18 NaJehova usitfolile lamuhla sicinisekiso kini sekutsi nitawuba bantfu bakhe, lokuyimphahla yakhe lekhetsekile*+ njengobe nje anetsembisile, nekutsi nitayilalela yonkhe imitsetfo yakhe, 19 futsi nangabe nitawuba bantfu labangcwele kuJehova Nkulunkulu wenu, yena utaniphakamisa nibe ngetulu kwato tonkhe letinye tive latentile,+ anente nidvunyiswe, natiwe niphindze nibe nenkhatimulo,+ njengobe nje anetsembisile.”

27 Ngemuva kwaloko Mosi akanye nemadvodza lamadzala aka-Israyeli watjela lesive watsi: “Niboyigcina yonkhe lemitsetfo lengininika yona lamuhla. 2 Ngelilanga lenitakwewela ngalo iJordane ningene kulelive Jehova Nkulunkulu wenu laninika lona, nibobeka ematje lamakhulu futsi niwahuce ngemcakaco.+ 3 Nasenewelile, onkhe lamavi aloMtsetfo nibowabhala kulamatje, kuze nitewungena kulelive Jehova Nkulunkulu wenu laninika lona, lokulive leligeleta lubisi neluju, njengobe nje Jehova Nkulunkulu wabokhokho benu anetsembisile.+ 4 Naseniyewelile iJordane, lamatje kufanele niwabeke eNtsabeni i-Ebali+ futsi niwahuce ngemcakaco, njengobe nje nginitjela lamuhla. 5 Kulentsaba nibophindze nakhele Jehova Nkulunkulu wenu li-al’thare ngematje. Ningabowasebentisa emathulusi ensimbi kulamatje.+ 6 Leli-al’thare laJehova Nkulunkulu wenu nibolakha ngematje langakacetulwa, futsi nentele Jehova Nkulunkulu wenu umnikelo wekushiswa kulo. 7 Kufanele nente imihlatjelo yekuthula+ niphindze niyidlele lapho,+ futsi nijabule embikwaJehova Nkulunkulu wenu.+ 8 Onkhe emavi aloMtsetfo nibowabhala ngalokucacile kulamatje.”+

9 Mosi kanye nebaphristi labangemaLevi babese bakhuluma nawo onkhe ema-Israyeli batsi: “Ma-Israyeli, thulani nilalele. Lamuhla nine senibe bantfu baJehova Nkulunkulu wenu.+ 10 Nibolilalela livi laJehova Nkulunkulu wenu, nigcine nemitsetfo yakhe+ kanye netimiso takhe, lenginitjela tona lamuhla.”

11 Ngalelolanga Mosi watjela lesive watsi: 12 “Letive letilandzelako titawukuma eNtsabeni iGerizimu+ kuze kutsi naseniyewelile iJordane tibusise labantfu: Sive sakaSimeyoni, sakaLevi, sakaJuda, saka-Isakhari, sakaJosefa nesakaBhenjamini. 13 Leti letilandzelako tona titawukuma eNtsabeni i-Ebali+ kute tikhiphe sicalekiso: Sive sakaRubeni, sakaGadi, saka-Asheri, sakaZebuloni, sakaDani nesakaNaftali. 14 EmaLevi atawuphakamisa livi akhulume nawo onkhe ema-Israyeli atsi:+

15 “‘Ucalekisiwe umuntfu lowenta sithico lesibatiwe+ nobe sithico sensimbi,*+ lokuyintfo leyenyanyekako kuJehova,+ naleyentiwe tandla tesisebenti lesinelikhono,* futsi wasifihla.’ (Bonkhe bantfu batawuphendvula batsi: ‘Amen!’*)

16 “‘Ucalekisiwe umuntfu lowedzelela babe wakhe nobe make wakhe.’+ (Bonkhe bantfu batawutsi: ‘Amen!’)

17 “‘Ucalekisiwe umuntfu losusa sikhonkwane semncele wamakhelwane wakhe.’+ (Bonkhe bantfu batawutsi: ‘Amen!’)

18 “‘Ucalekisiwe loyo lowenta umuntfu longaboni emehlweni aduke endleleni yakhe.’+ (Bonkhe bantfu batawutsi: ‘Amen!’)

19 “‘Ucalekisiwe loyo longamehluleli ngendlela lelungile+ umuntfu losihambi, intsandzane nobe umfelokati.’+ (Bonkhe bantfu batawutsi: ‘Amen!’)

20 “‘Ucalekisiwe umuntfu loya ecansini nemfati wababe wakhe, ngobe usuke ahlazise babe wakhe.’*+ (Bonkhe bantfu batawutsi: ‘Amen!’)

21 “‘Ucalekisiwe umuntfu lolala nesilwane.’+ (Bonkhe bantfu batawutsi: ‘Amen!’)

22 “‘Ucalekisiwe umuntfu loya ecansini nadzadzewabo, kungaba yindvodzakati yababe wakhe nobe yamake wakhe.’+ (Bonkhe bantfu batawutsi: ‘Amen!’)

23 “‘Ucalekisiwe umuntfu loya ecansini namaketala wakhe.’+ (Bonkhe bantfu batawutsi: ‘Amen!’)

24 “‘Ucalekisiwe umuntfu lolalela makhelwane wakhe endleleni futsi ambulale.’+ (Bonkhe bantfu batawutsi: ‘Amen!’)

25 “‘Ucalekisiwe loyo lovuma kudizelwa kuze abulale umuntfu longenacala.’+ (Bonkhe bantfu batawutsi: ‘Amen!’)

26 “‘Ucalekisiwe umuntfu longeke awalalele emavi aloMtsetfo futsi angawagcini.’+ (Bonkhe bantfu batawutsi: ‘Amen!’)

28 “Nangabe nitalilalela livi laJehova Nkulunkulu wenu ngekutsi niyilandzele yonkhe lemitsetfo yakhe lenginitjela yona lamuhla, nakanjani Jehova Nkulunkulu wenu utanenta nibe ngetulu kwato tonkhe letinye tive temhlaba.+ 2 Tonkhe letibusiso titakwehlela kini futsi tibe tinyenti,+ ngobe nichubeka nililalela livi laJehova Nkulunkulu wenu:

3 “Nitawubusiswa emadolobheni, nibusiswe nasemasimini.+

4 “Nitawubusiswa ngebantfwana*+ labanyenti, ngetitselo temhlaba wenu, nangemfuyo lenyenti, lokungematfole etinkhomo nemazinyane etimvu.+

5 “Utawubusiswa bhasikidi+ wenu kanye nesitja+ senu sekubhucela inhlama.

6 “Nitawubusiswa kuto tonkhe tindzawo leniya kuto, niphindze nibusiswe nakuko konkhe lenikwentako.

7 “Jehova utakwenta kutsi titsa tenu letinihlaselako tincotjwe embikwenu.+ Titawuchamuka ngendlela yinye natinihlasela, kodvwa titawutsatsa tindlela letingu-7 letehlukene nasetinibalekela.+ 8 Jehova utaniletsela sibusiso kuto tonkhe tincolobane+ tenu nakuko konkhe lenikwentako, futsi nakanjani utawunibusisa kulelive Jehova Nkulunkulu wenu laninika lona. 9 Jehova utawunenta nibe bantfu labangcwele kuye,+ njengobe nje anetsembisile,+ ngobe niyachubeka nilalela imitsetfo yaJehova Nkulunkulu wenu nangenca yekutsi nihamba etindleleni takhe. 10 Bonkhe bantfu labasemhlabeni kutawudzingeka babone kutsi nibitwa ngelibito laJehova,+ futsi batawunesaba.+

11 “Kulelive Jehova lafunga kubokhokho benu kutsi utaninika lona,+ Jehova utakwenta kutsi nibe nebantfwana labanyenti, nibe nemfuyo lenyenti, ente nekutsi umhlaba wenu ukhicite.+ 12 Jehova utanivulela incolobane yakhe lenhle, lokungemazulu, kuze anise imvula ngesikhatsi sayo+ kulelive lenu aphindze anibusise kuko konkhe lenikwentako. Nitawuboleka tive letinyenti, kodvwa nine ngeke kudzingeke niboleke lutfo.+ 13 Jehova utaniphakamisa nibe ngetulu kwaletinye tive futsi ngeke tinibuse; nine nitawuba ncono kunato,+ ningabi ngephansi kwato, nangabe nje nitawuchubeka nilalela imitsetfo yaJehova Nkulunkulu wenu lenginitjela yona lamuhla kutsi niyigcine futsi niyente. 14 Kufanele ningakhweshi kuwo onkhe lamavi lenginitjela wona lamuhla, ningayi ngesekudla nobe ngesencele,+ bese nilandzela labanye bonkulunkulu futsi nibakhonte.+

15 “Kodvwa nangabe ningeke nililalele livi laJehova Nkulunkulu wenu ngekutsi ningayilandzeli yonkhe lemitsetfo kanye netimiso takhe lenginitjela tona lamuhla, nitawukwehlelwa ngito tonkhe leticalekiso futsi titawuba tinyenti:+

16 “Nitawucalekiswa emadolobheni, niphindze nicalekiswe nasemasimini.+

17 “Utawucalekiswa bhasikidi+ wenu kanye nesitja+ senu sekubhucela inhlama.

18 “Batawucalekiswa bantfwana benu,*+ futsi titawucalekiswa titselo temhlaba wenu kanye nematfole etinkhomo tenu nemazinyane etimvu tenu.+

19 “Nitawucalekiswa kuto tonkhe tindzawo lenitawukuya kuto, nako konkhe lenikwentako kutawucalekiswa.

20 “Jehova utawunehlisela sicalekiso, anente nidideke futsi anijezise kuko konkhe lenikwentako kuze kube ngulapho senicotfuliwe futsi senicedvwe ngekushesha, ngenca yetintfo letimbi lenitentile nangenca yekungishiya kwenu.+ 21 Jehova utaniletsela sifo lesingeke sisuke kuze kube ngulapho asanicedzile kulelive lenitawulitsatsa libe ngelenu.+ 22 Jehova utawunishaya ngesifo sesifuba sengati, ngemkhuhlane lomatima,+ ngekuvuvuka, ngekushisa lokukhulu, ngenkemba,+ ngemoya loshisako futsi titjalo tenu titakufa;+ letintfo titawunihlasela nize niphele. 23 Emazulu langetulu kwenu atawufana nelitfusi, umhlaba longephansi kwenu wona ufane nensimbi.+ 24 Jehova utawukwenta kutsi imvula letakuna eveni lenu ibe njengemphuphu nanjengelutfuli lolwehla luvela emazulwini, kuze kube ngulapho nine seniphelile. 25 Jehova utawubangela kutsi nincotjwe embikwetitsa tenu.+ Nitawuchamuka ngendlela yinye nanitihlasela, kodvwa nasenitibalekela nitawutsatsa tindlela letingu-7 letehlukene, futsi nitawuba yintfo leyetfusako kuyo yonkhe imibuso yemhlaba.+ 26 Tidvumbu tenu titawuba kudla kwato tonkhe tinyoni letisesibhakabhakeni nekwetilwane letisemhlabeni, futsi kute nalotaticosha.+

27 “Jehova utanishaya ngematfumba aseGibhithe, netilondza, nekucubuka nangekubhadluka kwesikhumba, lokutintfo leningeke nelapheke kuto. 28 Jehova utawunenta nihlanye, ningaboni emehlweni+ futsi nidideke.* 29 Nitawuphumphutsa emini, njengemuntfu longaboni emehlweni lophumphutsa ebumnyameni,+ futsi ngeke niphumelele kunobe yini leniyentako. Bantfu batawuhlale banihumusha baphindze banigebenge, kube kute nalonganisita.+ 30 Utawetsembisana nemuntfu lomsikati, kodvwa kufike lenye indvodza imgagadlele. Utawukwakha indlu, kodvwa ngeke uhlale kuyo.+ Utawuhlanyela insimu yemagilebisi, kodvwa ngeke utidle titselo tayo.+ 31 Inkhabi yakho itawuhlatjwa embikwakho, kodvwa kute ngisho nalencane inyama yayo lotawuyidla. Imbongolo yakho itakwebiwa embikwakho, futsi ngeke iphindze ibuye kuwe. Timvu takho titawuniketwa titsa takho, futsi kute lotakusita. 32 Emadvodzana nemadvodzakati enu atawuniketwa labanye bantfu nibuka,+ futsi nitawuhlale niwakhumbula, kodvwa tandla tenu ngeke tibe nemandla. 33 Titselo temhlaba wenu kanye nako konkhe lenikukhicitako kutawudliwa bantfu leningabati.+ Bantfu batawuhlale banigebenga futsi nitawuva buhlungu lobukhulu. 34 Lenitakubona ngemehlo enu kutanihlanyisa.

35 “Jehova utanishaya ngematfumba labuhlungu langelapheki. Lamatfumba atawuba semadvolweni nasemilenteni yenu, kusukela phansi etinyaweni kuze kuyewufika etulu enhloko. 36 Nine kanye nenkhosi lenitawutibekela yona, Jehova utawuniyisa eveni leningalati, nabokhokho benu lebebangalati.+ Kulelo live nitawukhonta labanye bonkulunkulu, lokubonkulunkulu labentiwe ngesigodvo nangematje.+ 37 Kuto tonkhe tive Jehova latawuniyisa kuto, bantfu batawetfuka nabanibona, banedzelele,* baphindze bahlekise ngani.+

38 “Nitawuhlanyela inhlanyelo lenyenti emasimini enu, kodvwa nitawuvuna lokuncane+ ngobe kutawudliwa sikhonyane. 39 Nitawuhlanyela emagilebisi ensimini yenu futsi niyinakekele, kodvwa kute liwayini lenitawulinatsa, kute nalenitakuvuna,+ ngobe kutawube kudliwe tibungu. 40 Nitawuba netihlahla temncumo kuyo yonkhe indzawo lenihlala kuyo, kodvwa kute emafutsa lenitawagcobisa ngobe titselo tenu temncumo titawube tihhohlokile. 41 Nitawutala emadvodzana nemadvodzakati, kodvwa ngeke ahlale angewenu, ngobe atawutfunjwa.+ 42 Libulo letilwanyakatane litawugcwala kuto tonkhe tihlahla tenu nakuto tonkhe titselo temhlaba wenu. 43 Umuntfu wekuhamba losemkhatsini wenu utawuchubeka aphakama kancane kancane abe ngetulu kwenu, futsi nine nitawuchubeka nehla kancane kancane. 44 Yena utaneboleka lokutsite, kodvwa nine kute lenitamboleka kona.+ Utawuba ngetulu kwenu, nine nibe ngephansi kwakhe.+

45 “Tonkhe leticalekiso+ titawuba setikwenu, tinehlele futsi tibe tinyenti kuze kube ngulapho senicotfuliwe,+ ngobe anizange nililalele livi laJehova Nkulunkulu wenu ngekutsi nigcine imitsetfo netimiso takhe lanitjele tona.+ 46 Leticalekiso titawuchubeka tinehlela, nine nebantfwana benu, tibe sibonakaliso nesecwayiso+ lesihlala njalo, 47 ngobe anizange nikhonte Jehova Nkulunkulu wenu ngekutfokota nangenhlitiyo lejabulako ngesikhatsi nisenenala yato tonkhe tintfo.+ 48 Jehova utawukwenta kutsi titsa tenu tinihlasele, futsi tona nitawutisebentela+ kodvwa nibe nilambile,+ nomile, nembetse emanikiniki futsi neswele yonkhe intfo. Utawubeka lijoka lensimbi etintsanyeni tenu kuze kube ngulapho anicotfula.

49 “Jehova utawukwenta kutsi nihlaselwe sive lesikhashane nani,+ lesisuka ekugcineni kwemhlaba. Lesive sitawunihlasela njengelusoti,+ futsi ngeke nilucondze lulwimi lwaso,+ 50 sive lesesabekako, lesingeke sibe neluvelo kulabakhulile nobe sibe nemusa kulabancane.+ 51 Bantfu bakuleso sive batawukudla ematfole etinkhomo tenu, emazinyane etimvu newetimbuti tenu, badle netitselo temhlaba wenu, kuze kube ngulapho nine senicotfuliwe. Ngeke banishiyele lutfo lolutinhlavu, liwayini lelisha nobe emafutsa, tinkhomo letisetincane nobe timvu, kuze kube ngulapho sebanincobile.+ 52 Batawunivimbetela, banivalele ngekhatsi kuwo onkhe emadolobha* enu lakulo lonkhe lelive lenu, kuze kube ngulapho tindvonga tenu letiphakeme naleticinile futsi lenetsembele kuto tiwa. Nakanjani batawunihlasela kuwo onkhe emadolobha lakulo lonkhe lelive Jehova Nkulunkulu wenu laninika lona.+ 53 Kutawudzingeka kutsi nidle bantfwana benu,* nidle inyama yemadvodzana enu nemadvodzakati enu,+ lawo Jehova Nkulunkulu wenu laninike wona, ngenca yekutsi nitawube nihlaselwe kamatima nangenca yekutsi titsa tenu tinibangela buhlungu.

54 “Ngisho nendvodza lenemusa futsi lephila kamnandzi ngeke isamvela umuntfu wakubo nobe umfati wayo lemtsandzako nobe emadvodzana ayo lasele, 55 futsi ngeke ibaphe inyama yemadvodzana ayo letawube iyidla, ngobe itawube ite lutfo ngenca yekutsi nitawuhlaselwa kamatima nangenca yekutsi titsa tenu titawube tinibangela buhlungu emadolobheni enu.+ 56 Nemfati lonemusa futsi lophila kamnandzi emkhatsini wenu, lobekangeke aze akucabange nekubeka lunyawo lwakhe emhlabatsini ngenca yekutsi uphila kamnandzi,+ ngeke asayivela indvodza yakhe layitsandzako, nendvodzana yakhe nobe indvodzakati yakhe, 57 ngeke asaba nendzaba ngisho nangaloko lokuphuma esiswini sakhe nakacedza kubeleka, ngisho nangemadvodzana akhe lawatele, ngobe konkhe loku utawukudla angabonwa, ngenca yekutsi nitawuhlaselwa kamatima nangenca yekutsi titsa tenu titawube tinibangela buhlungu emadolobheni enu.

58 “Naningeke niwagcine ngekucophelela onkhe lamavi aloMtsetfo labhalwe kulencwadzi,+ futsi ningeke nilesabe nelibito laJehova+ Nkulunkulu wenu lelikhatimulako nalelibabatekako,+ 59 Jehova utaniletsela tishayo letimatima kakhulu, nine kanye nebantfwana benu. Kutawuba tishayo letinkhulu naletingapheli,+ kanye netifo letibuhlungu naletingancamuki. 60 Utawukwenta kutsi niphindze nihlaselwe ngito tonkhe tifo taseGibhithe lebenitesaba, futsi nakanjani titawunibamba. 61 Ngetulu kwaloko, Jehova utawuniletsela tonkhe tinhlobo tetifo nobe tishayo letingakabhalwa kulencwadzi yeMtsetfo, kuze kube ngulapho senicotfuliwe. 62 Ngisho nobe nitawube senibanyenti ngangetinkhanyeti letisemazulwini,+ kutawusala labambalwa+ kakhulu kini ngenca yekutsi anikalilaleli livi laJehova Nkulunkulu wenu.

63 “Njengobe nje Jehova ake wakujabulela kunenta niphumelele futsi nibe banyenti, Jehova utawuphindze akujabulele kunibhubhisa nekunicotfula. Nitawucedvwa kulelive lesenitawulitsatsa libe ngelenu.

64 “Jehova utawunisakatela kuto tonkhe tive, kusukela ngale kwemhlaba kuze kuyewufika ngale kwawo,+ futsi nasenilapho kutawudzingeka nikhonte bonkulunkulu labentiwe ngesigodvo nangematje, lokubonkulunkulu nine nabokhokho benu lebeningabati.+ 65 Ngeke nibe nekuthula kuleto tive,+ netinyawo tenu ngeke tibe nayo indzawo yekuphumula. Esikhundleni saloko Jehova utawukwenta kutsi tinhlitiyo tenu tikhatsateke,+ nemehlo enu angaboni kahle futsi niphelelwe ngemandla.+ 66 Kuphila kwenu kutawuba sengotini lenkhulu futsi nitawuhlale netfukile busuku nemini. Nitawube ningaciniseki nangekutsi nitawusindza yini. 67 Ekuseni nitawutsi: ‘Kube mane sekuhlwile!’ kantsi nasekuhlwile nitawutsi: ‘Kube mane sekusile!’ ngenca yekutsi tinhlitiyo tenu titawube tetfukile nangenca yaloko lenitawube nikubona ngemehlo enu. 68 Nakanjani Jehova utawunibuyisela eGibhithe ngemkhumbi, nihambe endleleni lengakhuluma ngayo kini, ngatsi: ‘Angeke niphindze niyibone.’ Nasenilapho kutawudzingeka nititsengise etitseni tenu kuze nibe tigcili netigcilikati, kodvwa kutawuba bete longanitsenga.”

29 Lawa ngemavi alesivumelwane Jehova latjela Mosi kutsi asente nesive saka-Israyeli eveni lakaMowabi, ngetulu kwaleso lasenta nalesive eHorebe.+

2 Mosi wabitela ndzawonye onkhe ema-Israyeli, watsi kuwo: “Nikubone konkhe loko Jehova lakwenta embikwenu kuFaro eveni laseGibhithe, kuto tonkhe tinceku takhe nakulo lonkhe live lakhe,+ 3 lokutijeziso* letimatima lenatibona ngemehlo enu, netibonakaliso letinkhulu kanye netimangaliso.+ 4 Kodvwa kuze kube ngulamuhla,+ Jehova akakaniniki inhlitiyo lecondzako, emehlo labonako kanye netindlebe letivako. 5 ‘Ngesikhatsi ngichubeka nginihola iminyaka lengu-40 ehlane,+ timphahla lebenitembetse atizange tiguge, netincabule lebenitigwabele atizange tiguge.+ 6 Anizange nidle sinkhwa, ninatse liwayini nanobe yini ledzakanako, kuze nati kutsi nginguJehova Nkulunkulu wenu.’ 7 Ekugcineni nefika kulendzawo, futsi boSihoni inkhosi yaseHeshboni+ na-Ogi inkhosi yaseBhashani+ beta kuze batewukulwa natsi, kodvwa sabancoba.+ 8 Ngemuva kwaloko satsatsa live labo saliniketa sive sakaRubeni, sakaGadi nencenye yesive sakaManase+ kuze libe lifa lato. 9 Ngako-ke wagcineni emavi alesivumelwane niphindze niwalalele, kuze tonkhe tintfo lenitentako titewuphumelela.+

10 “Lamuhla nonkhe nime embikwaJehova Nkulunkulu wenu: tinhloko tetive tenu, emadvodza lamadzala, tindvuna tenu, onkhe emadvodza aka-Israyeli, 11 bantfwana benu, bafati benu,+ nebantfu bekuhamba+ labahlala nani, kusukela kuloyo lonitfotela tinkhuni kuyewufika kuloyo lonikhela emanti. 12 Nilapha kuze nitewungena esivumelwaneni saJehova Nkulunkulu wenu, leso Jehova Nkulunkulu wenu lasenta nani lamuhla ngesifungo,+ 13 kuze anente nibe sive+ sakhe lamuhla, naye abe nguNkulunkulu wenu,+ njengobe nje anetsembisile futsi afunga kubokhokho benu, bo-Abrahama,+ Isaka+ naJakobe.+

14 “Lesivumelwane kanye nalesifungo angikwenti nani kuphela, 15 kodvwa ngikwenta nabo bonkhe labalapha embikwaJehova Nkulunkulu wetfu kanye nalabo labangekho lapha lamuhla. 16 (Ngobe nati kahle kutsi besiphila njani eveni laseGibhithe nekutsi sendlula njani etiveni letehlukehlukene ngesikhatsi sisesendleleni.+ 17 Benihlale nitibona tintfo tato letenyanyekako, kanye netithico tato letenyanyekako*+ letentiwe ngesigodvo, ngelitje, ngelisiliva nangeligolide, leto lebetisemkhatsini waletive.) 18 Nibocaphela kutsi emkhatsini wenu lamuhla kube bete indvodza nobe umfati, umndeni nobe sive lesinenhlitiyo letawukhwesha kuJehova Nkulunkulu wetfu, bese ikhonta bonkulunkulu baleto tive,+ nekutsi kube bete imphandze emkhatsini wenu lekhipha sitselo lesinashevu kanye nesihlahla lesibabako.+

19 “Kodvwa nangabe ukhona lova lamavi alesifungo futsi atikhukhumete ngekhatsi enhlitiyweni atsi: ‘Ngitawuba nekuthula, nanobe ngichubeka ngilandzela inhlitiyo yami,’ bese loko kubangela umonakalo kuto tonkhe tintfo* letisendleleni yakhe, 20 Jehova ngeke amcolele.+ Esikhundleni saloko, intfukutselo lenkhulu yaJehova itamvutsela loyo muntfu, nato tonkhe leticalekiso letibhalwe kulencwadzi titawumehlela,+ futsi nakanjani Jehova utawulicedza libito laloyo muntfu ngaphansi kwemazulu. 21 Jehova utawubese uyamehlukanisa kuto tonkhe tive taka-Israyeli kuze ehlelwe yinhlekelele, ngekuvumelana nato tonkhe leticalekiso letikulesivumelwane lesibhalwe kulencwadzi yeMtsetfo.

22 “Kutawutsi lapho situkulwane lesitako semadvodzana enu kanye nebantfu bekuhamba labavela eveni lelikhashane babona letishayo letehlele lelive, tifo Jehova latiletse kulo, 23 lokusibabule, luswayi kanye nekushisa, lokwenta kutsi kulo lonkhe live kube bete lokuhlanyelwako nobe lokumilako, nekutsi kube bete ngisho netitjalo letihlumako, njengaseSodoma naseGomora,+ e-Adma naseZeboyimu,+ tindzawo Jehova latibhubhisa ngenca yentfukutselo nelulaka lwakhe, 24 lesitukulwane kanye nato tonkhe letive kutawutsi: ‘Jehova ukwenteleni loku kulelive?+ Yini lebangele kutsi atfukutsele kangaka?’ 25 Batawubese batsi: ‘Kungenca yekutsi basishiyile sivumelwane saJehova+ Nkulunkulu wabokhokho babo, leso lasenta nabo ngesikhatsi abakhipha eveni laseGibhithe.+ 26 Kodvwa bahambe bayokhonta labanye bonkulunkulu futsi babakhotsamela, lokubonkulunkulu labangabati nalangazange abavumele kutsi babakhonte.*+ 27 Intfukutselo yaJehova yabese yehlela kulelo live, yaletsa tonkhe leticalekiso letibhalwe kulencwadzi.+ 28 Ngako-ke Jehova wabasusa emhlabeni wabo, ngentfukutselo,+ ngelulaka nangekucansuka lokukhulu futsi wabayisa kulelinye live, lokulive labakulo lamuhla.’+

29 “Tintfo letifihliwe taJehova Nkulunkulu wetfu,+ kodvwa tintfo letembuliwe titawuhlale titetfu kanye nebantfwana betfu, kuze sitewukwenta konkhe lokushiwo nguloMtsetfo.+

30 “Nasafezekile kini onkhe lamavi, lokungulesibusiso nesicalekiso lengisibeke embikwenu,+ futsi seniwakhumbulile*+ nasenikuto tonkhe letive Jehova Nkulunkulu wenu laniyise kuto,+ 2 nabuyela nakuJehova Nkulunkulu+ wenu futsi nine nemadvodzana enu nalilalela livi lakhe ngayo yonkhe inhlitiyo yenu nangawo wonkhe umphefumulo*+ wenu, kuko konkhe loku lenginitjela kona, 3 Jehova Nkulunkulu wenu utawubese ubuyisa labo lebebatfunjiwe,+ anentele nemusa+ aphindze anilandze kuto tonkhe letive Jehova Nkulunkulu wenu bekanisakatele kuto.+ 4 Ngisho nobe bantfu benu basakatekele kuto tonkhe tincenye temazulu, Jehova Nkulunkulu wenu utanilandza kuto futsi anibuyise.+ 5 Jehova Nkulunkulu wenu utanibuyisela kulelive lebelilabobabe benu, nihlale kulo. Yena utawunenta niphumelele aphindze anandzise kwendlula bobabe benu.+ 6 Jehova Nkulunkulu wenu utawuhlanta* tinhlitiyo tenu kanye netebantfwana benu,+ kute nitsandze Jehova Nkulunkulu wenu ngayo yonkhe inhlitiyo yenu nangawo wonkhe umphefumulo* wenu futsi niphile.+ 7 Jehova Nkulunkulu wenu utawubese uletsa tonkhe leticalekiso etitseni tenu, lebetinenyanya futsi tiniphatsa kabi.+

8 “Nitawubese niyabuya, nilalele livi laJehova, niphindze nigcine yonkhe imitsetfo yakhe lenginitjela yona lamuhla. 9 Jehova Nkulunkulu wenu utawukwenta kutsi niphumelele kakhulu kuyo yonkhe imisebenti yenu,+ andzise bantfwana benu nemfuyo yenu kanye nemkhicito wemhlaba wenu, ngobe Jehova utawuphindze akujabulele kunenta niphumelele, njengobe abejabula ngabokhokho benu.+ 10 Ngaleso sikhatsi nitalilalela livi laJehova Nkulunkulu wenu, nigcine imiyalo yakhe netimiso takhe letibhalwe kulencwadzi yeMtsetfo. Nitawubuyela kuJehova Nkulunkulu wenu ngayo yonkhe inhlitiyo yenu nangawo wonkhe umphefumulo*+ wenu.

11 “Lomtsetfo lenginitjela wona lamuhla awusilukhuni kakhulu kini, futsi awukho khashane nani.+ 12 Awukho emazulwini kutsi ningatsi: ‘Ngubani lotasiyela emazulwini ayositsatsela wona kute siwulalele futsi siwugcine?’+ 13 Awukho nangale kwelwandle, kutsi ningatsi: ‘Ngubani lotasewelela aye ngale kwalolwandle ayositsatsela wona kute siwulalele futsi siwugcine?’ 14 Ngobe lelivi lidvutane kakhulu nani, lisemilonyeni nasetinhlitiyweni tenu+ kute nililalele.+

15 “Lamuhla ngibeka embikwenu kuphila nalokuhle, kufa nalokubi.+ 16 Nangabe niyilalela imitsetfo yaJehova Nkulunkulu wenu lenginitjela yona lamuhla ngekutsi nitsandze Jehova Nkulunkulu wenu,+ nihambe etindleleni takhe, nigcine imitsetfo yakhe, timiso takhe nemiyalo yakhe, nitawuphila+ futsi nandze, naJehova Nkulunkulu wenu utanibusisa kulelive lenitawulitsatsa libe ngelenu.+

17 “Kodvwa nangabe tinhlitiyo tenu tikhwesha+ bese anisalaleli, niyengeke futsi nikhotsamele labanye bonkulunkulu, niphindze nibakhonte,+ 18 ngiyanitjela lamuhla kutsi nakanjani nitawuphela.+ Angeke niphile sikhatsi lesidze kulelive lenewela iJordane kute nilitsatse libe ngelenu. 19 Lamuhla ngibeka emazulu nemhlaba kutsi kube bofakazi labamelene nani, bekutsi ngibeke kuphila nekufa embikwenu, sibusiso nesicalekiso;+ nibokhetsa kuphila kute niphile,+ nine nebantfwana benu,+ 20 ngekutsi nitsandze Jehova Nkulunkulu wenu,+ nilalele livi lakhe niphindze ninamatsele kuye,+ ngobe yena ukuphila kwenu, futsi ngaye nitawuhlala sikhatsi lesidze kulelive Jehova lafunga kutsi utalinika bokhokho benu, bo-Abrahama, Isaka, naJakobe.”+

31 Ngemuva kwaloko, Mosi wahamba wayokhuluma lamavi kuwo onkhe ema-Israyeli, 2 watsi kuwo: “Lamuhla ngineminyaka lengu-120 budzala.+ Ngeke ngisakhona kunihola* ngobe Jehova utsite kimi: ‘Angeke uyewele iJordane.’+ 3 Jehova Nkulunkulu wenu nguye lotakwewela embikwenu, futsi utawuncoba letive letisembikwenu, nine niticoshe.+ Joshuwa utanihola nanewela iJordane,+ njengobe nje Jehova ashito. 4 Letive Jehova utawutenta loko lakwenta emakhosini ema-Amori, boSihoni+ na-Ogi,+ naloko lakwenta eveni lawo ngesikhatsi awacotfula.+ 5 Jehova utanincobela tona, futsi kufanele nente kuto konkhe loko lokushiwo ngulomtsetfo lengininikete wona.+ 6 Banini nesibindzi futsi nicine.+ Ningesabi nobe netfuke embikwaletive,+ ngobe Jehova Nkulunkulu wenu nguye lohamba nani. Ngeke anilahle nobe anishiye.”+

7 Mosi wabese ubita Joshuwa, wakhuluma naye embikwawo onkhe ema-Israyeli watsi: “Bani nesibindzi futsi ucine,+ ngobe nguwe lotawungenisa labantfu kulelive Jehova lafunga kubokhokho babo kutsi utabanika lona, futsi wena utawubanika lona libe lifa labo.+ 8 Jehova nguye lohamba embikwakho, futsi utawuhlale anawe.+ Ngeke akulahle nobe akushiye. Ngako ungesabi futsi ungetfuki.”+

9 Ngemuva kwaloko Mosi wabhala loMtsetfo+ wase uwunika baphristi labangemaLevi, lokungibo labetfwala libhokisi lesivumelwane saJehova, wawunika nawo onkhe emadvodza lamadzala aka-Israyeli. 10 Mosi wakhuluma nabo watsi: “Njalo nakuphela iminyaka lengu-7, ngesikhatsi lesibekiwe ngemnyaka wekwesula tikweleti,+ nakwentiwa uMkhosi Wemadlangala,*+ 11 lokusikhatsi lapho onkhe ema-Israyeli eta embikwaJehova+ Nkulunkulu wenu endzaweni layikhetsile, kufanele nifundzele onkhe ema-Israyeli loMtsetfo kuze awuve.+ 12 Nibobitela labantfu ndzawonye,+ emadvodza, bafati, bantfwana,* kanye nebantfu bekuhamba labahlala emadolobheni* enu, kute batewulalela, bafundze ngaJehova Nkulunkulu wenu, bamesabe, baphindze bagcine onkhe emavi aloMtsetfo. 13 Emadvodzana abo langawati loMtsetfo atawulalela,+ afundze nekwesaba Jehova Nkulunkulu wenu kuwo onkhe emalanga lenitawaphila kulelive lenewela iJordane kuze nilitsatse.”+

14 Ngemuva kwaloko Jehova watsi kuMosi: “Nyalo sekusedvute kutsi ufe.+ Bita Joshuwa, bese nita* ethendeni lekuhlangana kuze ngimtfume.”+ Ngako boMosi naJoshuwa bahamba baya ethendeni lekuhlangana. 15 Jehova wabonakala kulelithende lekuhlangana ngensika yelifu, futsi lensika yelifu yema ngasemnyango walelithende.+

16 Jehova wabese utsi kuMosi: “Wena sewutakufa,* futsi labantfu batawucala kungetsembeki kimi ngekukhonta* bonkulunkulu bemanga labatawube baseceleni kwabo kulelive labaya kulo.+ Batangishiya,+ bephule nesivumelwane lengisente nabo.+ 17 Ngaleso sikhatsi intfukutselo yami itawubavutsela,+ futsi ngitawubashiya,+ ngibafihlele nebuso bami+ kuze kube ngulapho sebacotfuliwe. Nasebehlelwe tinhlekelele netinkinga letinyenti,+ batawutsi: ‘Letinhlekelele letisehlelako atibangelwa yini kutsi Nkulunkulu wetfu akasekho emkhatsini wetfu?’+ 18 Kodvwa ngaleso sikhatsi ngitawuchubeka ngibafihlela buso bami ngenca yabo bonkhe lobubi lababentile ngekutsi bakhonte labanye bonkulunkulu.+

19 “Ngako-ke tibhaleleni lengoma+ bese niyifundzisa ema-Israyeli.+ Nibowafundzisa* yona kuze ibe ngufakazi wami lomelene nawo.+ 20 Nasengibangenisile kulelive lengafunga ngalo kubokhokho babo,+ lokulive leligeleta lubisi neluju,+ futsi sebadle besutsa baphindze baphumelela,*+ batawuya kulabanye bonkulunkulu, babakhonte, futsi bangedzelele, baphindze bephule nesivumelwane sami.+ 21 Nasebehlelwa tinhlekelele netinkinga letinyenti,+ lengoma itawuba bufakazi kubo (ngobe bantfwana babo akukafaneli bayikhohlwe), ngenca yekutsi sengivele ngiyawati umcondvo wabo+ ngisho nangaphambi kwekutsi ngibangenise kulelive lengafunga ngalo.”

22 Ngako-ke ngalelolanga Mosi wayibhala phansi lengoma, futsi wayifundzisa ema-Israyeli.

23 Nkulunkulu wabese utfuma Joshuwa+ indvodzana yaNuni, watsi kuye: “Bani nesibindzi futsi ucine,+ ngobe nguwe lotawungenisa ema-Israyeli kulelive lengafunga ngalo kuwo.+ Mine ngitawuhlale nginawe.”

24 Ngekushesha nje Mosi nakacedza kubhala onkhe emavi aloMtsetfo encwadzini,+ 25 wakhuluma nemaLevi, lokungiwo latfwala libhokisi lesivumelwane saJehova, watsi: 26 “Tsatsani lencwadzi yeMtsetfo+ niyibeke eceleni kwelibhokisi+ lesivumelwane saJehova Nkulunkulu wenu, futsi itawuba ngufakazi lomelene nani. 27 Ngobe ngikwati kahle kungalaleli+ kwalabantfu nenkhani*+ yabo. Nangabe bebangamlaleli kangaka Jehova ngisaphila, kangakanani-ke nasengifile! 28 Bitelani ndzawonye onkhe emadvodza lamadzala etive tenu, kanye netindvuna tenu, bete kimi kuze bangive nangikhuluma lamavi, futsi ngitawubeka emazulu nemhlaba abe bofakazi labamelene nalesive.+ 29 Ngobe ngati kahle kutsi nasengifile nitawukwenta lokubi,+ niyishiye nendlela lenginitjele yona. Nakanjani nitawukwehlelwa tinhlekelele+ esikhatsini lesitako ngobe nitawukwenta lokubi emehlweni aJehova futsi nitamcansula ngemisebenti yenu.”

30 Ngemuva kwaloko Mosi wakhuluma embikwawo onkhe ema-Israyeli, washo emavi alengoma kusukela ekucaleni kuze kuyewufika ekugcineni,+ watsi:

 3 Ngobe ngitalimemetela libito laJehova.+

Ngikhulume nangebukhulu baNkulunkulu wetfu!+

 5 Ngibo labente ngekukhohlakala.+

Abasibo bantfwana bakhe, futsi liphutsa likubo.+

Basitukulwane lesigwegwile nalesonakele!+

15 Ngesikhatsi Jeshuruni* asakhuluphele, wabese uyavukela.

Awu Jeshuruni, sewukhuluphele waba mkhulu, futsi wesutsa kakhulu.+

29 Kube mane bebahlakaniphile!+ Bebatawucabangisisa ngaloku.+

Bebatawucabanga ngaloko lokutawubehlela.+

Abavuke futsi banisite.

Ababe yindzawo lenitawuphephela kuyo.

Ngiyabulala, ngiphindze ngiphilise.+

44 Ngako Mosi weta, futsi yena naHosheya*+ indvodzana yaNuni bawasho onkhe emavi alengoma kulabantfu.+ 45 Mosi nasacedzile kukhuluma onkhe lamavi kuwo onkhe ema-Israyeli, 46 watsi kuwo: “Wagcineni etinhlitiyweni tenu onkhe lamavi lenginecwayisa ngawo lamuhla,+ kuze nitjele emadvodzana enu kutsi kufanele aciniseke kutsi awagcina onkhe emavi aloMtsetfo.+ 47 Ngobe lelivi alisilo lite kini, kodvwa lisho kuphila,+ futsi ngalo nitawuphila sikhatsi lesidze kulelive lenewela iJordane kuyewulitsatsa.”

48 Ngalo lelolanga, Jehova wakhuluma naMosi watsi: 49 “Khuphukela kulentsaba yase-Abarimu,+ lokuyiNtsaba iNebo+ leseveni lakaMowabi, futsi lebukene neJerikho, ufike ubuke live laseKhenani, lelo lengilinika ema-Israyeli kutsi libe ngelawo.+ 50 Ngemuva kwaloko utawufela kulentsaba lokhuphukela kuyo, futsi ungcwatjwe njengabo bonkhe bantfu bakini,* njengobe nje na-Aroni umnakenu afela eNtsabeni iHori,+ wangcwatjwa njengabo bonkhe bantfu bakubo, 51 ngobe nine nobabili anizange netsembeke kimi emkhatsini wema-Israyeli emantini aseMeribha+ leseKhadeshi, ehlane laseZini. Anizange ningingcwelise embikwebantfu baka-Israyeli.+ 52 Lelive lengitalinika ema-Israyeli utalibonela khashane, kodvwa ngeke ungene kulo.”+

33 Leti tibusiso Mosi, umuntfu waNkulunkulu weliciniso latitjela bantfu baka-Israyeli ngaphambi kwekutsi afe.+ 2 Watsi:

 7 Nati tibusiso latitjela sive sakaJuda:+

 8 Esiveni sakaLevi watsi:+

12 Esiveni sakaBhenjamini watsi:+

13 Esiveni sakaJosefa watsi:+

18 Esiveni sakaZebuloni watsi:+

19 Batawubitela bantfu entsabeni.

Nabefika lapho bente imihlatjelo yekulunga.

20 Esiveni sakaGadi watsi:+

“Ubusisiwe loyo lonweba imincele yakaGadi.+

Tinhloko talesive titawuhlangana ndzawonye.

22 Esiveni sakaDani watsi:+

“Dani uliwundlu lelibhubesi.+

Utawuphuma eBhashani.”+

23 Esiveni sakaNaftali watsi:+

Utawutsatsa indzawo lengasenshonalanga nalengaseningizimu.”

24 Esiveni saka-Asheri watsi:+

“Asheri ubusiswe ngemadvodzana.

29 Maye uyajabula Israyeli!+

34 Ngemuva kwaloko Mosi wesuka ehlane lakaMowabi, waya eNtsabeni iNebo,+ esicongweni sePhisga,+ lebukene neJerikho.+ Jehova wamkhombisa lonkhe lelive kusukela eGileyadi kuze kuyewufika kaDani,+ 2 nalo lonkhe live lakaNaftali, live laka-Efrayimu nelakaManase, nalo lonkhe live lakaJuda kuze kuyewufika elwandle lolusenshonalanga,*+ 3 wamkhombisa neNegebhu+ neSifundza+ saseJordane, lokufaka ekhatsi ematsafa aseJerikho, lokulidolobha lelinetihlahla telusundvu, kuze kuyewufika eSowari.+

4 Jehova wabese utsi kuye: “Leli ngulelive lengafunga ngalo kubo-Abrahama, Isaka naJakobe, ngatsi: ‘Ngitalinika intalelwane* yakho.’+ Ngikuvumele kutsi ulibone, kodvwa angeke wewelele kulo.”+

5 Ngemuva kwaloko, Mosi inceku yaJehova wafela eveni lakaMowabi, njengobe nje Jehova abeshito.+ 6 Wamngcwaba esihosheni lesiseveni lakaMowabi, lesibukene neBhethi-pheyori, futsi kuze kube ngulamuhla kute umuntfu lowatiko kutsi lithuna lakhe likuphi.+ 7 Mosi wafa aneminyaka lengu-120.+ Abesolo abona kahle emehlweni futsi asenemandla. 8 Bantfu baka-Israyeli bakhalela Mosi ehlane lakaMowabi emalanga langu-30.+ Ngemuva kwaloko, emalanga ekukhalela Mosi newekumlilela aphela.

9 Joshuwa indvodzana yaNuni abegcwele umoya wekuhlakanipha ngobe Mosi abebeke sandla sakhe kuye.+ Ema-Israyeli amlalela aphindze enta njengobe Jehova abetjele Mosi.+ 10 Kodvwa ka-Israyeli akuzange kuphindze kube nemphrofethi lofana naMosi,+ lobekatiwa nguJehova buso nebuso.+ 11 Wenta tonkhe tibonakaliso netimangaliso Jehova labemtfume kutsi atente eveni laseGibhithe kuFaro nakuto tonkhe tinceku takhe nakulo lonkhe live lakhe.+ 12 Mosi wakhombisa sandla sakhe lesinemandla kanye nemandla lesabekako embikwawo onkhe ema-Israyeli.+