Zamcolo Lomkhulu

BANTFU labangazange bangene emkhunjini, bachubeka baphila ngendlela lebebaphila ngayo. Bebangakholelwa kutsi Zamcolo utawufika. Bebahleka Nowa nemndeni wakhe. Kepha ngekushesha kwaphela loko kuhleka.

Bangakanaki, litulu lacala kuna. Lana ngemandla shengatsi kucitseka emanti ebhakedeni. Nowa abecinisile! Kodvwa besekwephutile ngoba bekungekho muntfu longakwati kungena emkhunjini. Phela umnyango bewuvalwe nguJehova.

Ngekushesha emanti ambonya wonkhe umhlaba. Aba manyenti njengemifula lemikhulu. Awisa tihlahla, agicita ematje lamakhulu futsi abanga umsindvo lomkhulu. Bantfu bacala kwesaba futsi bakhuphukela etintsabeni. Bebafisa shengatsi ngabe bamlalele Nowa, bangena emkhunjini ngesikhatsi umnyango usebavulekele. Kodvwa kwase kwephutile.

Emanti achubeka akhula kancane kancane. Litulu layitsela emhlabeni emalanga langu-40 nebusuku lobungu-40. Emanti ambonya tonkhe tintsaba temhlaba ngisho naletindze kakhulu. Njengobe Nkulunkulu abeshito, bantfu labangazange bangene emkhunjini bafa, netilwane letingazange tingene kuwo nato tafa. Kodvwa bonkhe labo labangena emkhunjini basindza.

Nowa nemadvodzana akhe bebente umsebenti lomuhle ngekwakha umkhumbi. Emanti awuphakamisa umkhumbi, wase untanta etikwawo. Ngalelinye lilanga selihhamukile litulu, lilanga lacala kubalela. Bekungumbono lomangalisako kubona yonkhe indzawo ilwandle lolukhulu. Lokukuphela kwentfo lebeyibonakala kwakungumkhumbi lontantako.

Tasetingekho tidlakela. Besetingeke tisakwati kuphindze tihluphe bantfu. Tonkhe besetifile, kanye nabomake bato ngisho nabobonkhe bantfu labangakalungi. Kwentekani kubobabe bato?

Bobabe baletidlakela bekungasibo bantfu labafanana natsi. Bekutingilosi letehla tatewuhlala emhlabeni njengebantfu. Ngalesikhatsi kufika Zamcolo, letingilosi atizange tife kanye nalabanye bantfu. Tashiya imitimba yato lenjengeyebantfu, tabuyela ezulwini tayophila njengetingilosi. Kodvwa atizange tisavunyelwa kutsi tibe yincenye yemndeni waNkulunkulu lowakhiwa tingilosi letetsembekile. Ngako taba tingilosi taSathane. EBhayibhelini tibitwa ngekutsi ngemadimoni.

Nkulunkulu wabangela kutsi kube nemoya lowenta kutsi emanti abohle emhlabeni. Ngemuva kwetinyanga letisihlanu umkhumbi wahlala etikwentsaba. Kwendlula emalanga lamanyenti, futsi labo labebasemkhunjini besebakwati kubuka ngephandle babone ticongo tetintsaba. Emanti wona abesolo abohla kancane kancane.

Nowa wakhipha inyoni lemnyama lebitwa ngekutsi ligwababa. Beyindiza sikhashana iphindze ibuye ngoba beyingayitfoli indzawo lekahle yekuhlala. Beyichubeka ikwenta loko ibuye bese ihlala emkhunjini.

Nowa abefuna kubona kutsi emanti asaphelile yini, kungako wabese utfumela lituba. Nalo labuya ngoba aliyitfolanga indzawo lekahle yekuhlala. Waphindze walitfumela futsi kwesibili, labuya seliphetse licembe lesihlahla semncumo. Nowa wavele wati-ke kutsi emanti asabohlile emhlabeni. Walitfumela futsi kwesitsatfu, kepha alibuyanga ngoba latfola indzawo leyomile yekuhlala.

Nkulunkulu watsi kuNowa: ‘Phuma emkhunjini. Khipha wonkhe umndeni wakho netilwane.’ Besekuphele sikhatsi lesingetulu kwemnyaka basemkhunjini. Ungacabanga nje kutsi bajabula kanjani nabaphindze baphumela ngephandle, baphile saka!