‘Wahamba NaNkulunkulu’

ASEWUBONE Nowa ngeliso lengcondvo atelula bese uhlala esigodvweni atsi kuphumula kancane emsebentini wakhe, abuka lobhazabhaza wemkhumbi lebebawakha. Bekugcwele liphunga lelitiyela lelinuka kabi, kuvakala nemsindvo wekugawulwa kwetingondvo. Lapho Nowa abehleti khona abebona emadvodzana akhe asebenta kamatima etincenyeni letehlukehlukene talomkhumbi. Emadvodzana akhe, bomalukatane bakhe kanye nemkakhe, bonkhe bebasebenta kanye naye kulomsebenti lomkhulu lobesewutsetse emashumi eminyaka. Besebahambe indzima lendze nalomsebenti kodvwa beluseludze lukhalo.

Bantfu bakulendzawo bebacabanga kutsi Nowa nebantfwabakhe batilima. Njengobe bachubeka nalomsebenti wekwakha, bantfu bebahleka nakakhulu nabacabanga kutsi kutsiwa kutawuba nazamcolo emhlabeni wonkhe. Lenhlekelele Nowa lebekabacwayisa ngayo bebayitsatsa njengentfo lengeke seyenteke nalenganangcondvo. Bebangakholwa kutsi indvodza ingacitsa sikhatsi sayo nesemndeni wayo entfweni lebulima ngalendlela. Nobe kunjalo, Nkulunkulu waNowa, Jehova abengamtsatsi ngaleyondlela.

LiVi laNkulunkulu litsi: ‘Nowa wahamba naNkulunkulu.’ (Genesisi 6:9) Bekusho kutsini loko? Bekungasiko kutsi Nkulunkulu wahamba naNowa lapha emhlabeni, nobe kutsi ngandlelatsite Nowa waya ezulwini. Esikhundleni saloko, Nowa walalela Nkulunkulu kuko konkhe lakusho futsi wamtsandza kakhulu kangangekutsi kwaba shengatsi yena naJehova bahambisana njengebangani. Ngemuva kwetinkhulungwane teminyaka, naku liBhayibheli lelakusho ngaNowa: “Ngekukholwa wadalula bubi belive.” (Hebheru 11:7) Wakwenta njani loko? Yini tsine lamuhla lesingayifundza ngekukholwa kwakhe?

INDVODZA LENGASOLEKI EVENI LELONAKELE

Nowa wakhulela eveni lebeliya ngekuba libi kakhulu. Bekugcwele bubi nangesikhatsi sakhokho wakhe Enoki, longulenye indvodza lebeyilungile leyahamba naNkulunkulu. Enoki abeshito kutsi bekuta lilanga lekwehlulela bantfu labangamhloniphi Nkulunkulu. Ngesikhatsi saNowa bubi besebudlange kakhulu. Ecinisweni, ngembono waJehova umhlaba bewonakele ngobe bewugcwele budlova. (Genesisi 5:22; 6:11; Juda 14, 15) Yini leyenta lesimo saba sibi kangaka?

Tingilosi tangenwa ngumoya lomubi. Lenye yato beseyivele ivukele Jehova yaba nguSathane Develi ngenca yekunyundzela Nkulunkulu nekuhuha Adamu na-Eva kutsi bone. Ngesikhatsi saNowa, letinye tingilosi nato tavukela Jehova. Tashiya indzawo yato ezulwini, teta lapha emhlabeni, tatigucula taba bantfu, tatsatsa tintfombi letinhle tatenta bafati bato. Letingilosi lebetitibona tincono futsi tinebugovu, betinemjovo lomubi kubantfu.—Genesisi 3:1-5; 6:1, 2; Juda 6, 7.

Kulalana kwetingilosi nebantfu lokuyintfo lephambene nemvelo kwabangela kutsi kutalwe bantfwana labatidlakela. LiBhayibheli libabita ngekutsi Tichwaga. Leligama nalihunyushwa njengobe linjalo lisho “bawisi”—bantfu labawisa labanye. Letichwaga letinebudlova tabhebhetela lunya nekungamhloniphi Nkulunkulu. Akumangalisi-ke kutsi uMdali wabona “kutsi kukhulu kona kwemuntfu emhlabeni, nekutsi yonkhe imizindlo nemicabango yenhlitiyo yakhe mibi ngaso sonkhe sikhatsi.” Jehova wancuma kutsi utababhubhisa bantfu lababi ingakapheli iminyaka lengu-120.—Genesisi 6:3-5.

Asewucabange nje kutsi bekumatima kanjani kukhulisa bantfwana endzaweni lenjalo! Nome kunjalo, Nowa wabakhulisela khona. Watfola umfati sibili. Nasekaneminyaka lengu-500 budzala Nowa, umkakhe wamtalela emadvodzana lamatsatfu. Emabito awo bekunguShemi, Hhamu naJafethi.a Babobabili labatali bekufanele babambisane ekuvikeleni labafana babo kutsi bangangenwa ngulomoya lomubi lobewukulendzawo lebebahlala kuyo. Bafana labasebancane bavame kutsatseka futsi babajabulele bantfu ‘labangemachawe nalabadvumile.’ Kungenteka labantfwana bebatitsandza leTichwaga ngobe nato betinjalo. Nobe bekungaba matima kuNowa nemkakhe kuvikela bantfwana babo kuyo yonkhe imibiko labebayiva ngaletichwaga kodvwa bebangabafundzisa emaciniso ngaNkulunkulu Jehova, lobuzondako bubi. Bekufanele basite bafana babo babone kutsi Jehova uva buhlungu nakabona budlova nekuvukela emhlabeni.—Genesisi 6:6.

Batali lamuhla bangavelana kufanele naNowa nemkakhe. Live lesiphila kulo nalo ligcwele budlova nekuvukela. Ngisho naletinye tindlela tekutilibatisa letentelwe bantfwana tigcwele budlova nekuvukela. Batali labahlakaniphile benta konkhe lokusemandleni abo kute bavikele bantfwababo kuloko ngekubafundzisa ngaJehova, Nkulunkulu wekuthula lotabucedza budlova ngalelinye lilanga. (Tihlabelelo 11:5; 37:10, 11) Batali bangakhona kukwenta loko. Nowa nemkakhe bakwenta ngemphumelelo. Emadvodzana abo akhula aba ngemadvodza lakahle futsi atsatsa bafati nabo lebebatimisele kubeka Nkulunkulu weliciniso Jehova kucala ekuphileni kwabo.

“YAKHA UMKHUMBI”

Langa limbe, kuphila kwaNowa kwashintja. Jehova wakhuluma nalenceku yakhe letsandzekako wayitjela ngenjongo yakhe yekubhubhisa live langaleso sikhatsi. Nkulunkulu watsi kuNowa: “Yakha umkhumbi ngemapulangwe egofari.”—Genesisi 6:14.

Lomkhumbi bewungafani nhlobo nemikhumbi yalamuhla. Wona, bewumise kwelibhokisi lelikhulu. Jehova waniketa Nowa tilinganiso tawo, imininingwane yekuma kwawo nanekutsi bekatawupenda njani ngekhatsi nangephandle asebentisa litiyela. Wase utjela Nowa sizatfu sekuwakha watsi: “Ngitawuletsa zamcolo emhlabeni . . . Konkhe lokusemhlabeni kutawubhubha.” Nome kunjalo, Jehova watsi kuNowa: “Utawungena emkhunjini wena, nemadvodzana akho, nemkakho, nabomalukatana bakho.” Nowa bekufanele afake tonkhe tinhlobonhlobo tetilwane emkhunjini. Bekutawusindza tilwane letisemkhunjini kuphela kuloZamcolo lebewuta.—Genesisi 6:17-20.

Nowa bekamelwe ngumsebenti lomkhulu. Lomkhumbi bekufanele ube mkhulu, ube ngemamitha langu-133 budze, bubanti bawo bube ngemamitha langu-22 bese uba ngemamitha langu-13 kuphakama. Bewumkhulu kakhulu kwendlula imikhumbi lemikhulu leyentiwa ngemapulangwe esikhatsini sanyalo. Nowa wawuyekela yini lomsebenti wakhe wakhonona ngekutsi umatima noma washintja lipulani lawo walenta ngendlela yakhe? LiBhayibheli litsi: “Nowa wakwenta konkhe layalwa nguNkulunkulu kutsi akwente.”—Genesisi 6:22.

Lomsebenti watsatsa emashumi eminyaka, mhlawumbe iminyaka lengu-40 kuya kulengu-50. Bekufanele kugawulwe, kwetfwalwe tingodvo, tijutjwe, tibatwe bese tiyahlanganiswa. Lomkhumbi bekufanele ube titezi letintsatfu, nemakamelo lamanyenti bese uba nemnyango munye emhlubulweni wawo. Asingabati kutsi bekunemafasitelo kuletitezi neluphahla lobelutse kuphakama emkhatsini kuze lukhone kuwacitsa kahle emanti nalina.—Genesisi 6:14-16.

Njengobe iminyaka ihamba lomkhumbi uchubeka nekwakhiwa, kufanele kutsi Nowa bekumjabulisa kutsi umndeni wakhe uyamelekelela. Kunalesinye sabelo lokungenteka besimatima kwendlula kwakha umkhumbi. LiBhayibheli litsi Nowa ‘abengumshumayeli wekulunga.’ (2 Phetro 2:5) Bekahola ekwecwayiseni bantfu ngembubhiso lebeyitawufikela lababi nalabangamhloniphi Nkulunkulu, loko akwenta ngesibindzi. Bamlalela yini? Jesu wakhuluma ngebantfu bangaleso sikhatsi watsi abazange banake. Watsi bebalibele kwenta tintfo tabo—badla, banatsa, labadvuna nalabasikati batsatsana, abazange bamlalele Nowa. (Matewu 24:37-39) Asingabati kutsi labanyenti bamhleka bulima Nowa kanye nemndeni wakhe, labanye kungenteka kutsi bebamesabisa futsi baze bafune nekumshaya.

Nome kunjalo, Nowa nemndeni wakhe abazange baphonse lithawula. Bebachubeka nekwakha ngisho nome bebaphila eveni lebelinebantfu labamatasatasa ngekwenta tintfo tabo, batsatsa kwakha umkhumbi njengentfo lengenangcondvo, lekudukiswa nobe lebulima. Imindeni yemaKhristu lamuhla, ingafundza lukhulu ekukholweni kwaNowa nemndeni wakhe. Ngetulu kwaloko, siphila esikhatsini liBhayibheli lelisibita ngekutsi ‘ngemalanga ekugcina.’ (2 Thimothi 3:1) Jesu watsi sikhatsi lesiphila kuso sitawufana ncamashi nesikhatsi Nowa lakha ngaso umkhumbi. EmaKhristu enta kahle kukhumbula Nowa nangabe bantfu bangawunaki umlayeto lomayelana neMbuso, bawahleka bulima nobe baze bawahluphe. Akucali ngawo kubhekana netintfo letinjalo.

“NGENA EMKHUNJINI”

Kwendlula iminyaka, kancane kancane umkhumbi waya ngasekupheleni. Nowa abesafelwe nguletinye tihlobo takhe nasasondzele eminyakeni lengu-600 budzala. Uyise Lameki wafa.b Ngemuva kweminyaka lesihlanu kwafa mkhulu wakhe Methusela aneminyaka lengu-969, yena lowaphila sikhatsi lesidze kwendlula bonkhe bantfu lokukhulunywa ngabo eBhayibhelini. (Genesisi 5:27) Methusela naLameki baphila asekhona na-Adamu, umuntfu wekucala.

Ngawo lowo mnyaka lafa ngawo Lameki, Nowa watfola umlayeto lovela kuNkulunkulu lotsi: “Ngena emkhunjini wena nendlu yakho.” Ngaso leso sikhatsi Nkulunkulu wamtjela nekutsi atsatse tonkhe tinhlobonhlobo tetilwane atifake emkhunjini—letihlambulukile atsatse tibe sikhombisa letindvuna naletinsikati tibe sikhombisa, letifanele kutsi kwentiwe ngato umhlatjelo nakuto tinhlobo tetilwane letingakahlambuluki atsatse tibe timbili lesidvuna nalesisikati.—Genesisi 7:1-3.

Lena bekuyintfo lebeyingasoze ilibaleke. Emakhulukhulu etilwane angena emkhunjini, lokufaka ekhatsi letihambako, letindizako, letinyonyobako, letikhushutelako naletinwabulukako, tonkhe tinebukhulu, kwakheka netimo letehlukehlukene. Ungambona ngeliso lengcondvo Nowa aphishanekile etama kutifaka emkhunjini, ativimba, atichuba ngekutincenga kuze tingene ngekhatsi. Kulandzisa kutsi “tangena naNowa emkhunjini.”—Genesisi 7:9.

Labanye baphikisi bangase batsi: ‘Ingenteka kanjani nje intfo lenjena? Kungenteka kanjani kutsi tonkhe letilwane tihlalisane ngekuthula emkhunjini?’ Asewucabange ngaloku: Kungamehlula yini uMdali wendzawo yonkhe kulawula tilwane latidalile nakudzingeka? Khumbula kutsi Jehova nguNkulunkulu lowehlukanisa Lwandle Lolubovu nalowenta lilanga lema. Bekungamehlula yini kwenta tonkhe letintfo letichazwe endzabeni yaNowa? Bekungeke kumehlule futsi nguloko lakwenta.

Nkulunkulu abengasebentisa lenye indlela kuze asindzise tilwane latidalile, kodvwa ngekuhlakanipha wasebentisa indlela letasikhumbuta ngemsebenti wekunakekela tonkhe tilwane lawuniketa umuntfu kusukela ekucaleni. (Genesisi 1:28) Batali labanyenti lamuhla basebentisa lendzaba yaNowa kuze bafundzise bantfwababo kutsi Jehova uyabatsandza bantfu kanye netilwane latidalile.

Jehova watjela Nowa kutsi sekusele liviki Zamcolo ufike. Kufanele kutsi umndeni wakhe bewumatasa kakhulu ngaleso sikhatsi. Ase ucabange nje ngemsebenti wekufaka tonkhe tilwane nekudla kwato ngabolonina emkhunjini kanye nekufaka tintfo tabo njengemndeni. Umfati waNowa nabomalukatana bakhe bebamatasatasa balungisa indzawo labatawuhlala kuyo emkhunjini kube ngatsi kusekhaya.

Kwabatsintsa yini bantfu kubona loko? Bebasolo banganaki ngisho nome bebabona kutsi Jehova uyambusisa Nowa nemisebenti yakhe. Kufanele kutsi batibona tilwane tingena emkhunjini kodvwa naloko akuzange kubatsintse. Akukafaneli kusimangalise kunganaki kwabo. Lamuhla bantfu ababunaki bufakazi lobukhanyela nome ngabe ngubani bekutsi nyalo siphila emalangeni ekugcina. Kunjengobe umphostoli Phetro asho kutsi kutawufika baphukuti labatawubahleka bulima labo labalalela tecwayiso letivela kuNkulunkulu. (2 Phetro 3:3-6) Nangesikhatsi saNowa bekunjalo.

Kwaphelelaphi loko? Kulandzisa kusitjela kutsi Nowa watsi nasangenile emkhunjini nemndeni wakhe kanye netilwane “Simakadze wavala umnyango.” Nangabe bantfu lebebabahleka bulima bakubona loko, asingabati kutsi lesento saNkulunkulu sabavala umlomo. Nangabe bangazange bakubone loko, zamcolo nakanjani wabavala umlomo. Layidliva, umhlaba wagcwala emanti njengobe Jehova bekashito.—Genesisi 7:16-21.

Jehova wakujabulela yini kufa kwalabo bantfu lababi? Chake. (Hezekeli 33:11) Kunekutsi ajabule, wabaniketa litfuba lekushintja etindleleni tabo bente lokulungile. Bebangashintja yini? Indlela Nowa lenta ngayo iyawuphendvula lombuto. Ngekuhamba naJehova, amlalele kuto tonkhe tintfo, Nowa wakhombisa kutsi kungenteka loko. Ngaleyondlela, kukholwa kwakhe kwadalula bubi belive langesikhatsi sakhe. Kukholwa kwakhe kwasindzisa yena nemndeni wakhe. Nawulingisa Nowa ngekukholwa, nawe ungatisindzisa kanye netihlobo takho. NjengaNowa, ungahamba naNkulunkulu Jehova abe ngumngani wakho. Ningaba bangani phakadze.