Phetro Na-Ananiyase Bacamba Emanga—Ngusiphi Sifundvo Lesisitfolako?

Njengobe nawe wati, emanga yintfo loyishoko kodvwa ube wati kahle kutsi ayisilo liciniso. Wake wawacamba yini emanga?—a Ngisho nebantfu labadzala labatsandza Nkulunkulu bake bawacamba emanga. Kungenteka kutsi uyamati umuntfu eBhayibhelini lowacamba emanga. Ligama lakhe nguPhetro, longulomunye webaphostoli baJesu labangu-12. Asesilalele nayi indzaba letasitjela kutsi wawacambelani emanga.

Ngemuva kwekuboshwa kwakhe, Jesu uyatsatfwa ayiswe ekhaya lemphristi lomkhulu. Sekusentsatsakusa. Phetro ungena esibuyeni selikhaya lemphristi angabonwa ngumuntfu. Intfombatana lesisebenti sakalomphristi lengenise Phetro esibuyeni, seyiyambona kutsi ungubani, njengobe akhanyiswe ngumlilo. Ibese itsi: “Nawe bewunaye lomGalile longuJesu.” Ngekwesaba Phetro uyaphika.

LiBhayibheli litsi ngekuhamba kwesikhatsi “lenye intfombatana yambuka,” yase itsi: “Nalona abenaye loJesu waseNazaretha.” Phetro wabuye waphika. Ngemuva kwesikhashana, labanye baya kuPhetro batsi: “Ngempela nawe ungulomunye wabo.”

Phetro uyesaba. Nyalo sewuphika kwesitsatfu utsi: “Angimati lomuntfu!” Lichudze liyakhala. Jesu ubuka Phetro bese Phetro uyakhumbula kutsi ema-aweni lambalwa lengcile Jesu umtjelile kutsi: “Lichudze litakutsi likhala utawube sewungiphike katsatfu.” Phetro uyehluleka kutibamba akhale. Uva buhlungu kakhulu.

Kungenteka yini loku kuwe?— Nawusesikolweni ungase uve labanye bantfwabesikolwa bakhuluma ngaboFakazi BaJehova. Lomunye atsi: “BoFakazi abawushayeli indesheni umjeka welive.” Lomunye atsi: “Abalilweli live lakubo.” Kantsi lomunye atsi: “Abasiwo emaKhristu mbamba, ngoba abawugubhi Khisimusi.” Lomunye ete kuwe akubute kutsi, “unguFakazi waJehova yini?” Utawuphendvula utsini?—

Kudzingeka uhlale ukulungele kuphendvula kahle basengakakubuti lemibuto. Phetro abengakakulungeli kuphendvula. Ngalesikhatsi ahlonywa imibuto, wacamba emanga. Noma kunjalo, kwamvisa buhlungu kakhulu lakwenta futsi Nkulunkulu wamtsetselela.

Lomunye umfundzi waJesu longu-Ananiyase, naye wacamba emanga. Nkulunkulu akazange amtsetselele Ananiyase naSafira umkakhe. Wavumelana nendvodza yakhe kutsi batawucamba emanga. Ase sibone kutsi yini leyenta Nkulunkulu wangabatsetseleli bobabili.

Ngemuva kwemalanga lalishumi Jesu ashiye bafundzi bakhe wabuyela kuNkulunkulu ezulwini, bantfu labangu-3 000 babhajatiswa eJerusalema. Labanyenti kulabafundzi basuka emaveni lakhashane kutogubha Umkhosi wePhentekhoste, futsi ngemuva kwekwemukela inkholo yebuKhristu bafisa kuhlala sikhatsi lesidze eJerusalema kuze bafundze lokunyenti ngenkholo yabo lensha lebesebayitfolile. Ngaleyondlela, labanye bafundzi baJesu basebentisa imali yabo kuze banakekele labanye bafundzi.

Ananiyase nemfati wakhe batsengisa indzawo yabo kuze batfole imali letawusita labafundzi labasandza kubhajatiswa. Nakayiletsa kubaphostoli lemali, Ananiyase utsi uyiphetse yonkhe. Unemanga. Ufihla lenye yayo kuze ayisebentise. Nkulunkulu wembulela Phetro ngaloko, Phetro wase utsi ku-Ananiyase: “Awukacali emanga kubantfu kodvwa kuNkulunkulu.” Watsi nakeva lamavi Ananiyase washayeka phansi wafa. Emuva kwema-awa lamatsatfu, kwafika umkakhe lapho. Bekangati kutsi kwentekeni endvodzeni yakhe, naye wacala emanga, washayeka phansi, wafa ngaleso sikhatsi.

Lesi sifundvo lesibalulekile sekutsi kukhuluma liciniso kubalulekile. Sonkhe lendzaba isifundzisa kubaluleka kwekukhuluma liciniso. Noma kunjalo, sitawenta emaphutsa ikakhulukati nasisebancane ngeminyaka. Kuyakujabulisa yini kutsi Jehova uyakutsandza futsi utakutsetselela njengobe enta kuPhetro?— Khumbula kutsi kudzingeka sikhulume liciniso. Nakwenteka siwela esilingweni sekukhuluma emanga, kudzingeka sicele Nkulunkulu asitsetselele. Mhlawumbe Phetro wenta njalo futsi watsetselelwa. Nasetama kungasawacambi emanga, Nkulunkulu utasitsetselela natsi.