September

Phetro wasebentisa emagama lebekehluke kancane kulawo lawacaphuna esiphrofethweni saJoweli. (Imis. 2:16, 17) Kunekutsi acale lamavi lawacaphuna ngekutsi “emvakwaloko,” Phetro watsi: “Emalangeni ekugcina” lobekusho emalanga ekugcina ekuphela kwelive ngesikhatsi semaJuda. Loku kukhombisa kutsi kwendlula sikhatsi lesitsite ngaphambi kwekutsi siphrofetho saJoweli sigcwaliseke. Ngemuva kwekutsi Nkulunkulu atfululele umoya wakhe longcwele kumaKhristu angelikhulu lekucala, lamaKhristu acala kwenta lomsebenti lobekutawutsi ngemuva kwesikhatsi ufike kuto tonkhe tincenye temhlaba. Ngesikhatsi umphostoli Pawula abhala incwadzi lebeyiya kubaseKholose cishe nga-61 C.E., bekaveta kutsi letindzaba letimnandzi betishunyayelwa “kuyo yonkhe indalo lengephansi kwelizulu.” (Khol. 1:23) Ngesikhatsi Pawula atsi “yonkhe indalo” bekasho tonkhe tincenye temhlaba. Njengobe sisitwa ngumoya longcwele waJehova lonemandla, umsebenti wekushumayela sewentiwa ngelizinga lelisetulu kakhulu lamuhla, wentiwa “kuto tonkhe tincenye temhlaba.”​—Imis. 13:47. w20.04 6-7 ¶15-16

Jehova usitsandza sonkhe, lokufaka ekhatsi nemvu leseyisukile emhlambini wakhe. (Mat. 18:12-14) Nkulunkulu wetsembisa kutsi utatifuna timvu takhe letilahlekile futsi atisite kuze tiphindze tibe nebuhlobo lobuhle naye. Waveta tintfo letiyinhloko lebekatawutenta, lokutintfo lebetingentiwa ngumelusi longum-Israyeli nangabe alahlekelwe yimvu. (Hez. 34:12-16) Kwekucala, lomelusi bekatawufuna lemvu, lokuyintfo lebeyitawudzinga sikhatsi nemetamo. Nasekayitfolile lemvu lelahlekile, lomelusi bekayiletsa emhlambini. Ngetulu kwaloko, nangabe lemvu beyilimele nobe ilambile, lomelusi bekayisita ayibhandishe emanceba, ayetfwale futsi ayiphe nekudla. Labadzala lababelusi ‘bemhlambi waNkulunkulu’ kufanele bente lokufanako kuze basite bantfu labangasatihlanganisi nelibandla. (1 Phet. 5:2, 3) Labadzala bayabafuna, babasite kuze babuyele ebandleni futsi bayabakhombisa kutsi bayabatsandza ngekubasita kuze baphindze babe bangani baJehova. w20.06 20 ¶10

Ngesikhatsi Jesu atsi emasimu sekalungele kuvunwa, bekalindzele kutsi bantfu labanyenti bamlandzele yini? Cha. ImiBhalo beyibiketele kutsi bambalwa bantfu lebebatawukholwa kuye. (Joh. 12:37, 38) Jesu bekanelikhono lelimangalisako lekufundza tinhlitiyo. (Mat. 9:4) Bekabanaka labo labambalwa lebebakholwa kuye, futsi bekashumayela ngemdlandla kubo bonkhe bantfu. Asikwati kufundza tinhlitiyo, ngako kufanele singabehluleli bantfu labasensimini yakitsi! Kunaloko, kufanele sibone kutsi bangaba bafundzi. Khumbula loko Jesu lakusho kubafundzi bakhe. Emasimu amhlophe, lokusho kutsi sekalungele kuvunwa. Bantfu bangashintja futsi babe bafundzi baKhristu. Jehova ubona bantfu lesibashumayelako njengebafundzi futsi ubatsatsa ‘njengalokulangatelelwako.’ (Hag. 2:7) Nangabe sibona bantfu ngendlela Jehova naJesu labababona ngayo, sitawufundza ngendlela labakhuliswe ngayo nangetintfo labatitsandzako. Angeke sibatsatse njengebantfu lesingabati, kodvwa sitabatsatsa njengebazalwane nabodzadzewetfu. w20.04 13 ¶18-19

LiVi laNkulunkulu lifundzisa kutsi kufanele sihlale simtsandza Jesu kuze sijabulise Jehova. Lenye intfo lesingayenta kuze sibe bangani naJesu kutsi simati. Singamati Jesu ngekutsi sifundze tincwadzi letiseBhayibhelini, letifaka ekhatsi incwadzi yaMatewu, yaMakho, yaLukha neyaJohane. Nasizindla ngaloko lesikufundza eBhayibhelini ngekuphila kwaJesu, sitamtsandza futsi simhloniphe ngobe wabaphatsa ngemusa bantfu. Sibonelo saloko kutsi ngisho nobe bekayiNkhosi, akazange abaphatse njengetigcila bafundzi bakhe. Kunaloko, wabatjela tintfo lebekaticabanga nendlela lebekativa ngayo. Jesu bekabuva buhlungu lebebabuva futsi bekakhala kanye nabo. (Joh. 11:32-36) Ngisho netitsa takhe tabona kutsi bantfu lebebawemukela umlayeto wakhe bebaba bangani bakhe. (Mat. 11:19) Nangabe silingisa Jesu endleleni lebekaphatsa ngayo bafundzi bakhe, buhlobo betfu nalabanye butawucina, sitawenetiseka, sijabule futsi simtsandze kakhulu Khristu siphindze simhloniphe. w20.04 22 ¶9-10

Nga-1870, iBritain beseyivele ingumbuso lonemandla emhlabeni futsi beyinemasotja lanemandla kakhulu. Siphrofetho saDanyela sakhuluma ngeluphondvo loluncane lolwancoba letinye timphondvo letintsatfu. Loluphondvo loluncane lumelelwa yiBritain futsi leti letinye timphondvo timelelwa yiFrance, Spain, neNetherlands. (Dan. 7:7, 8) IBritain beyiyinkhosi yaseningizimu kwaze kwaba sikhatsi seMphi Yelive Yekucala. Ngaleso sikhatsi, i-United States of America beseyingumbuso lobewunemandla kutekutsengiselana futsi beyakha bungani neBritain. NgeMphi Yelive Yekucala, i-United States neBritain tabambisana kuze tilwe, futsi yomibili lemibuso yaba nemandla kakhulu. Ngaleso sikhatsi, iBritain kanye ne-United States taba bangani futsi taba ngumbuso lonemandla kakhulu emhlabeni. Njengobe Danyela abiketela, lenkhosi yahlanganisa ‘libutfo lelikhulu nalelinemandla kakhulu.’ Kulamalanga ekugcina, iBritain beyisolo iyinkhosi yaseningizimu ikanye ne-United States. w20.05 4 ¶7-8

Ngesizatfu sekutsi umhlaba ukhweshelene nelilanga ngelibanga lelikahle, emazinga ekushisa enta kutsi emanti angabi lichwa. Kube lilanga belingaba sedvute kancane, onkhe emanti bekangasha, nemhlaba ungashisa kakhulu uze wome futsi kungaba bete lokungaphila kuwo. Kube umhlaba bowungakhwesha kancane nje elangeni, onkhe emanti angaba lichwa futsi umhlaba ungagcwala lichwa. Ngenca yekutsi Jehova wawubeka endzaweni lekahle umhlaba, kujikeleta kwemanti lakuwo kwenta kutsi tintfo letidaliwe tikhone kuphila. Lilanga lishisisa umhlaba nemanti laselwandle, bese kwakheka umswakama logucuka ube ngemafu. Njalo ngemnyaka, lilanga lenta umswakama wemanti (water evaporation) lamanyenti kwendlula onkhe emanti lasemadanyini lakhona emhlabeni. Lamanti ahlala emkhatsini wemhlaba emalanga langaba ngu-10 ngaphambi kwekutsi abe yimvula nobe sitfwatfwa. Lamanti aphindze abuyele elwandle nasemifuleni, futsi lokujikeleta kuphindze kucalele phansi. Jehova wadala lokujikeleta kuze umhlaba uhlale unemanti. Loku kuyakhombisa kutsi Jehova unemandla futsi uhlakaniphile.​—Jobe 36:27, 28. w20.05 22 ¶6

Jesu wasikhutsata kutsi sichubeke sithantazela umoya longcwele. (Luk. 11:9, 13) Jehova usebentisa umoya wakhe kuze asinike emandla, ‘lokungemandla lamakhulu kakhulu.’ (2 Khor. 4:7) Ngekusitwa ngumoya longcwele waNkulunkulu, singakhona kubeketelela nobe ngubuphi bumatima lesihlangabetana nabo. Umoya longcwele ungasisita sikhone kwenta tabelo tetfu emsebentini waJehova futsi sitfutfukise emakhono lesinawo. Siyati kutsi siyakhona kwenta tintfo letinhle emsebentini waNkulunkulu ngobe sisitwa ngumoya wakhe longcwele. Singakhombisa kutsi siyabonga ngemoya longcwele, ngekutsi sithantazele kutsi usisite sibone nobe ngutiphi tifiso letimbi kanye nemicabango lemibi enhlitiyweni yetfu. (Hla. 139:23, 24) Nasikuthantazela loku, Jehova utawusebentisa umoya wakhe longcwele kuze usisite siyicaphele imicabango lemibi kanye netifiso letimbi. Ngako kufanele sithantazele umoya longcwele waNkulunkulu kutsi usinike emandla ekulwisana nalemicabango lemibi naletifiso letimbi. Nasenta njalo sitawube sikhombisa kutsi sitimisele kugwema nobe yini lengenta Jehova ayekele kusisita ngemoya wakhe longcwele.​—Ef. 4:30. w20.05 28-29 ¶10-12

Sisuke silingisa sibonelo saJesu Khristu nasivikela libito laJehova. Jesu wenta libito laNkulunkulu latiwa, hhayi ngekulisebentisa kuphela kodvwa nangekufundzisa bantfu kutsi Jehova unjani. Sibonelo saloko kutsi, Jesu akazange avumelane nebaFarisi lebebatsi Jehova unelunya, ute bungani nemusa. Jesu wenta bantfu babona kutsi Jehova unguBabe locabangelako, lobeketelako, lobatsandzako bantfu futsi lotsetselelako. Indlela lalingisa ngayo buntfu baBabe wakhe ngesikhatsi alapha emhlabeni yasita bantfu kutsi bamati Jehova. (Joh. 14:9) NjengaJesu, singabatjela bantfu loko lesikwatiko ngaJehova, sibafundzise kutsi unguNkulunkulu lolutsandvo nalonemusa. Nasenta njalo sitawube sikhombisa kutsi tintfo letimbi letishiwo baphikisi ngaJehova tingemanga. Singcwelisa libito laJehova futsi silente libe ngcwele etingcondvweni nasetinhlitiyweni tebantfu. Lesikushoko, nendlela lesenta ngayo tintfo ingakhombisa kutsi Jehova unjani. Singcwelisa libito lakhe ngekutsi sitjele bantfu liciniso ngaNkulunkulu. w20.06 6 ¶17-18

Tekuchumana tingasetjentiswa ngendlela lekahle, sibonelo saloko kutsi siyakhona kuchumana nemindeni yetfu kanye nebangani. Unakile yini kutsi labanye bantfu batfumela imilayeto, titfombe kanye nema-video kuze bente labanye bantfu babanake? Nabafaka letintfo kutekuchumana, kungase kufanane nekutsi batsi, “asewungibuke phela.” Labanye babhala imilayeto lengatsandzeki etitfombeni labatifakile nobe etitfombeni letifakwe ngulabanye. EmaKhristu akhutsatwa kutsi atfobeke futsi abe neluvelo. Ngako angeke asebentise tekuchumana ngendlela lekabi. (1 Phet. 3:8) Nangabe usebentisa tekuchumana, tibute: ‘Lengikubhalako, titfombe lengitifakako nema-video kukhombisa labanye kutsi ngiyatigcabha yini? Ngingabenta yini labanye kutsi babe nemona?’ EmaKhristu akasiboni sidzingo sekufuna kubonakala abalulekile nobe sekunakwa ngulabanye. Alandzela seluleko lesiseBhayibhelini lesitfolakala kulomBhalo welusuku walamuhla. Nangabe sitfobekile ngeke sifane nebantfu balelive lesiphila kulo labatigcabhako futsi labafuna labanye bababone babakhulu kunaloko labangiko.​—1 Joh. 2:16. w20.07 6 ¶14-15

Ngaphambi kwekutsi umphostoli Pawula abe ngumlandzeli waKhristu, bekalijaha lelingahloniphi futsi lebelihlupha balandzeli baJesu. (Imis. 7:58) Jesu wavimba Pawula lobekatiwa ngekutsi nguSawula kutsi angalihlaseli libandla lebuKhristu. Jesu wakhuluma naSawula asezulwini futsi waba yimphumphutse. Kuze aphindze abone emehlweni, kwadzingeka kutsi atfole lusito kulabantfu lebekabahlupha. Ngekutfobeka, walwemukela lusito kumfundzi lobekutsiwa ngu-Ananiyase lowamsita kuze aphindze abone. (Imis. 9:3-9, 17, 18) Ngekuhamba kwesikhatsi, Pawula waba lilunga lelatiwako lelibandla lebuKhristu, futsi akazange asikhohlwe sifundvo Jesu lamfundzisa sona ngesikhatsi asendleleni leya eDamaseku. Pawula wahlala atfobekile, futsi bekalwemukela lusito lwebazalwane bakhe nabodzadze. Wavuma kutsi ‘baba yindvudvuto lenkhulu kuye.’​—Khol. 4:10, 11. w20.07 18-19 ¶16-17

Ngisho nobe Jehova anemandla, kodvwa uyabanika labanye imisebenti. Nasi sibonelo, wabeka Jesu kutsi abe yiNkhosi yeMbuso wakhe futsi utawuniketa licembu lebantfu labangu-144000 lilungelo lekubusa naJesu. Kuliciniso kutsi Jehova wacecesha Jesu kutsi abe yiNkhosi nemPhristi loPhakeme. (Heb. 5:8, 9) Uphindze aceceshe nalabo labatawubusa naJesu kutsi bawente kahle umsebenti wabo, kodvwa akabalandzeleli kuze abuke kutsi bawenta kahle yini lomsebenti. Kunaloko, uyabetsemba kutsi batakwenta kahle loko lakufunako. (Semb. 5:10) Nangabe Babe wetfu losezulwini ngisho nobe angaludzingi lusito, kodvwa abaniketa labanye imisebenti, tsine kufanele sikwente kangakanani loko? Uyinhloko yemndeni yini, nobe ungulomdzala ebandleni? Lingisa sibonelo saJehova ngekutsi ubanike labanye imisebenti, futsi ungabalandzeleli kakhulu kutsi bawenta njani. Nangabe ulingisa Jehova, lomsebenti utokwenteka futsi utawucecesha labanye uphindze ubasite kutsi batetsembe.​—Isa. 41:10. w20.08 9 ¶5-6

Jehova ufuna sitive njani ngetimvu takhe letilahlekile? Jesu wasibekela sibonelo lesingafundza kuso. Bekati kutsi tonkhe timvu taJehova tiligugu emehlweni aNkulunkulu, ngako Jesu wenta konkhe langakwenta kuze asite ‘timvu letilahlekile taka-Israyeli’ kutsi tibuyele kuJehova. (Mat. 15:24) Njengobe angumelusi lokahle, Jesu wenta konkhe langakwenta kuze agweme kulahlekelwa nguyinye yetimvu taJehova. (Joh. 6:39) Umphostoli Pawula wakhutsata labadzala belibandla lase-Efesu kutsi balingise sibonelo saJesu. Watsi: “Kufanele nisite lababutsakatsaka ngekutsi nikhandleke, futsi kufanele nikhumbule emavi iNkhosi Jesu leyawasho, latsi: ‘Kunenjabulo lenyenti ekupheni kunasekwemukeleni.’” (Imis. 20:17, 35) Kuyacaca kutsi lamuhla, labadzala kufanele banakekele timvu taJehova. Salvador longulomdzala wase-Spain utsi: “Nangicabanga indlela Jehova latinakekela ngayo timvu takhe letilahlekile, ngiyakhutsateka kutsi ngente konkhe lengingakwenta kuze ngitisite. Ngiyaciniseka kutsi ufuna ngitinakekele timvu takhe.” w20.06 23 ¶15-16

Jehova utawulindzela kutsi sibe bete sono nasekuphele iminyaka leyinkhulungwane. Jehova utaticolela tono tetfu kuze kufike leso sikhatsi. Ngako kufanele silingise yena ngekutsi sibuke lokuhle kulabanye futsi sibabeketelele. Jesu netingilosi, bajabula kakhulu nakudalwa umhlaba. Cabanga kutsi batawujabula kanganani nababona umhlaba sewugcwele bantfu labete sono, labatsandza Jehova futsi labamkhontako. Cabanga kutsi batawujabula kanganani labo labatawubusa naKhristu ezulwini nababona bantfu emhlabeni bajabulela umsebenti wabo. (Semb. 4:4, 9-11; 5:9, 10) Cabanga ngesikhatsi lapho tinyembeti tebuhlungu setitinyembeti tenjabulo, lapho kugula, lusizi nekufa sekungasekho. Ngako timisele kulingisa Babe lonelutsandvo, lohlakaniphile futsi lobeketelako. Nawenta njalo utawujabula ngisho ubhekana natiphi tinkinga. (Jak. 1:2-4) Sijabula kakhulu ngesetsembiso saJehova sekutsi “kutawuba neluvuko”!​—Imis. 24:15. w20.08 19 ¶18-19

LiBhayibheli lisipho lesivela kuNkulunkulu futsi lesikhombisa kutsi uyasitsandza. Babe wetfu losezulwini waphefumulela bantfu kutsi balibhale ngobe usitsandza kakhulu. Jehova usebentisa liBhayibheli kuze aphendvule imibuto lebalulekile lesitibuta yona, njengaletsi: Savelaphi? Iyini injongo yekuphila? nalotsi, Likusasa lisiphatseleni? Jehova ufuna kutsi bonkhe bantfu batfole timphendvulo talemibuto, ngako wente kutsi bantfu bahumushe liBhayibheli ngetilwimi letinyenti. Lamuhla, liBhayibheli leliphelele nobe tincenye talo, liyatfolakala ngetilwimi letingetulu kwa-3 000! LiBhayibheli liyincwadzi lehunyushelwe etilwimini letinyenti futsi letfolakala emhlabeni wonkhe. Singakhombisa kutsi siyabonga ngeliBhayibheli ngekutsi silifundze onkhe malanga, sizindle ngaloko lesikufundzako futsi sente konkhe lesingakwenta kuze sikusebentise ekuphileni kwetfu. Ngetulu kwaloko, sikhombisa kutsi siyambonga Nkulunkulu ngekutsi sifundzise bantfu labanyenti ngaloko liBhayibheli lelikushoko.​—Hla. 1:1-3; Mat. 28:19, 20. w20.05 24-25 ¶15-16

Umphrofethi Jeremiya waniketwa umsebenti wekuyoshumayela endzaweni lebekumatima kushumayela kuyo. Wadvumateka kakhulu kangangekutsi waze wafuna kuyekela kushumayela. Kodvwa akazange. Leni? “Livi laJehova” belifana nemlilo kuJeremiya futsi bekangasakhoni kuthula! (Jer. 20:9) Kwenteka lokufanako nakitsi nasifundza liVi laNkulunkulu. Lesi ngulesinye sizatfu lesisenta sifundze liBhayibheli malanga onkhe futsi sizindle ngalo. Loko kutasenta sijabule kakhulu emsebentini wekushumayela futsi bantfu labanyenti batasilalela. (Jer. 15:16) Ngako nawutiva udvumatekile, ncenga Jehova kutsi akusite. Utakusita kuze ukhone kubhekana nemaphutsa lowentile nobe nawugula. Utakusita ube nembono lokahle ngetabelo lotitfolako. Utakusita nekutsi ube nembono lokahle ngemsebenti wakho wekushumayela. Ngetulu kwaloko, thantaza kuJehova futsi umtjele indlela lotiva ngayo. Yena angakusita kutsi uncobe kudvumateka. w20.12 27 ¶20-21

Kulabanye bodzadze, imihlangano ikuphela kwelitfuba lababanalo lekuba nebazalwane babo. Ngako sifuna kulisebentisa kahle lelitfuba kuze sibemukele, sikhulume nabo futsi sibente babone kutsi sinendzaba nabo. NjengaJesu, natsi singasihlela sikhatsi kuze sibe nabodzadzewetfu. (Luk. 10:38-42) Singabamema emakhaya etfu kuze sidle nabo nobe sitijabulise nabo. Nangabe sibamemile, kufanele siciniseke kutsi tintfo lesitishoko tiyabakhutsata. (Rom. 1:11, 12) Labadzala belibandla kufanele babe nesimo sengcondvo lesifana nesaJesu. Jesu bekati kutsi kulabanye kutawuba matima kuhlala bangakashadi, kodvwa bekati kutsi kuze umuntfu ahlale ajabulile akuyi ngekutsi ushadile yini nangekutsi unabo yini bantfwana. (Luk. 11:27, 28) Kunaloko, injabulo lehlala njalo sitayitfola nangabe kukhonta Jehova kuyintfo leta kucala ekuphileni kwetfu. (Mat. 19:12) Labadzala belibandla ngibo lokufanele bahambe embili ekuphatseni kahle bodzadze, kube shengatsi bomake babo nobe bosisi babo. Labadzala benta kahle ngekusebentisa sikhatsi sabo kuze bakhulume nabodzadze ngaphambi kwemhlangano nobe ngemuva kwawo. w20.09 21-22 ¶7-9

Ka-Israyeli umlimi bekahlanyela nakucala timvula tekucala tasenkwindla bese uyavuna ngemuva kwetimvula tekugcina tasentfwasanhlobo. (Mak. 4:28) Sitawube sikhombisa kutsi sihlakaniphile nasilingisa sineke salomlimi. Nobe kunjalo, loko ngeke kube melula. Ngalokuvamile, bantfu labanesono bafuna kubona imiphumela yaloko labakwentako ngaleso sikhatsi. Nangabe sifuna kutsi titjalo tikhule futsi sikuvune loko lesikuhlanyele, kufanele sikunakekele ngaso sonkhe sikhatsi. Kufanele silime, sihlanyele, sihlakule futsi sikunisele loko lesikuhlanyele. Ngako nangabe sifuna kwenta bafundzi kufanele sisebente kamatima. Kutsatsa sikhatsi kutsi sifundzise labo lesifundza nabo liBhayibheli kutsi bangabandlululi futsi babe nelutsandvo. Nangabe sinesineke ngeke siphele emandla ngisho nobe bantfu bangasilaleli. Nangabe labanye bantfu banesifiso sekusilalela nesekufundza, kufanele sichubeke siba nesineke. Ngeke sibaphocelele labo lesifundza nabo liBhayibheli kutsi babe nekukholwa. Ngaletinye tikhatsi, bafundzi baJesu bebangakucondzi loko Jesu lebekakufundzisa. (Joh. 14:9) Kufanele sikhumbule kutsi singahlanyela futsi sinisele, kodvwa nguNkulunkulu lokhulisako.​—1 Khor. 3:6. w20.09 11 ¶10-11

Sonkhe siyafuna kutsi bantfu lesibafundzelako batfutfuke baze babhajatiswe. Lenye indlela lesingabasita ngayo kubakhutsata kutsi baye emihlanganweni yelibandla. Ngalokuvamile umfundzi locala kuya emihlanganweni ngekushesha, uyashesha nekutfutfuka. Labanye bafundzisi bachazela labo lababafundzelako kutsi kuze bafundze lokunyenti ngeliBhayibheli kufanele baye emihlanganweni. Fundza KumaHebheru 10:24, 25 nemfundzi, futsi umchazele kutsi utawuzuza ngani ngekuya emihlanganweni yelibandla. Ngemdlandla, mtjele tintfo losandza kutifundza emihlanganweni yelibandla. Loko kutamkhutsata kakhulu kunekumane nje umtjele kutsi aye emihlanganweni. Loko umfundzi latakuva futsi akubone emhlanganweni wakhe wekucala welibandla, kutawuba ncono kwengca loko lake wakubona futsi wakuva emihlanganweni yenkholo. (1 Khor. 14:24, 25) Utawati labanye bantfu labatibonelo letinhle langatilingisa futsi labatamsita atfutfuke aze abhajatiswe. w20.10 10-11 ¶14-15

Umoya waNkulunkulu utakusita kutsi ukusebentise loko lokutfolako nawufundza futsi udadisha liVi laKhe. Thantaza njengemhlabeleli utsi: “Ngifundzise indlela yakho, [Jehova], ngiyawuhamba ecinisweni lakho; yenta inhlitiyo yami ihlose intfo yinye: kutsi ilesabe libito lakho.” (Hla. 86:11) Ngako chubeka ufundza futsi udadisha liBhayibheli kanye naletinye tincwadzi lesitinikwa yinhlangano yaJehova. Umgomo wakho awusiwo nje kuphela kutsi utfole lwati. Ufuna kuciniseka kutsi leli liciniso futsi ulisebentise ekuphileni kwakho. Umoya waJehova ungakusita kutsi ukwente loko. Ufuna nekukhutsata bazalwane nabodzadze. (Heb. 10:24, 25) Leni? Ngobe bangumndeni wakho. Thantazela umoya waNkulunkulu kutsi ukusite uphendvule ngalokusuka enhlitiyweni emihlangweni yebuKhristu futsi ukusite wente konkhe longakwenta nawuniketwe sabelo. Nawenta njalo utawube ukhombisa Jehova neNdvodzana yakhe kutsi uyawatsandza “emawundlu” abo laligugu. (Joh. 21:15-17) Ngako lalela uMfundzisi wakho Lomkhulu ngekutsi ukusebentise konkhe lakuniketa kona. w20.10 24-25 ¶15-17

Yini Jesu layenta ngesikhatsi baphostoli bakhe badvumatekile? Ngemuva nje kwekuvuswa kwakhe, Jesu watjela balandzeli bakhe watsi: “Ningesabi! Hambani niyewubikela bafundzi bami [kutsi ngivusiwe].” (Mat. 28:10a) Jesu akazange abalahle baphostoli bakhe. Ngisho nobe bebamshiyile, wachubeka ababita ngekutsi ‘bafundzi bakhe.’ NjengaJehova, Jesu bekanemusa futsi atsetselela. (2 Khos. 13:23) Ngendlela lefanako, sibakhatsalela kakhulu labo lesebayekele kushumayela. Babazalwane nabodzadzewetfu, futsi siyabatsandza! Sisakukhumbula kutikhandla kwalabazalwane nabodzadze, futsi labanye besebasebentele Jehova iminyaka leminyenti. (Heb. 6:10) Sibakhumbula kakhulu! (Luk. 15:4-7) Ngako khutsata labo lesebayekele kushumayela kutsi bete emihlanganweni yelibandla. Nangabe umuntfu losayekele kushumayela afika eHholweni LeMbuso, kufanele kube ngitsi lesiya kuye futsi simemukele kahle. w20.11 6 ¶14-17

Jakobe naJohane kanye namake wabo bacela Jesu kutsi ente intfo lebekete lilungelo lekuyenta. Ngaphandle kwekungabata, Jesu wabatjela kutsi nguBabe wakhe lotawuncuma kutsi ngubani lotawuhlala ngesekudla nobe ngesencele sakhe eMbusweni wakhe. (Mat. 20:20-23) Jesu wakhombisa kutsi bekakwati loko lebekangeke akhone kukwenta. Bekatfobekile. Akazange ente tintfo Jehova lebekangakamniki lilungelo lekutenta. (Joh. 12:49) Singasilingisa njani sibonelo saJesu lesihle? Silingisa sibonelo saJesu sekutfobeka nasisebentisa seluleko lesiseBhayibhelini lesitfolakala kulomBhalo welusuku walamuhla. Nangabe siniketa seluleko, kufanele singabaphoceleli bantfu kutsi bente loko lesikucabangako nobe sikhulume singakacabangisisi ngendzaba. Kunaloko, kufanele leseluleko setfu sisekelwe eBhayibhelini nasetincwadzini tetfu. Ngaleyondlela sisuke sikhombisa kutsi siyakwati loko lesingeke sesikhone kukwenta. Ngekutfobeka, sisuke sidvumisa ‘imitsetfo yaJehova lelungile.’​—Semb. 15:3, 4. w20.08 11-12 ¶14-15

Nawucabanga kweluleka umngani wakho, ngutiphi tintfo lokufanele utikhumbule? Ngaphambi kwekutsi ukhulume nemngani wakho tibute kutsi, ‘Ngitenta “lolunge kakhulu” yini?’ Umuntfu lolunge kakhulu, akabehluleli labanye ngetimiso taJehova, kunaloko ubehlulela ngetakhe futsi akakavami kuba nemusa. Nangabe sewutihlolile futsi ubona sidzingo sekukhuluma nemngani wakho, mtjele inkinga yakhe futsi usebentise imibuto kuze umsite alibone liphutsa lakhe. Ciniseka kutsi lokushoko kusekelwe emiBhalweni futsi ukhumbule kutsi ngumngani wakho lotawutilandzisela kuJehova hhayi wena. (Rom. 14:10) Sebentisa kuhlakanipha lokuseVini laNkulunkulu, futsi naweluleka lotsite, bani nemusa njengaJesu. (Taga 3:5; Mat. 12:20) Leni? Ngobe Jehova utasiphatsa ngendlela lesibaphatsa ngayo labanye.​—Jak. 2:13. w20.11 21 ¶13

Ungatsandza yini kutsi bantfu bakwehlulele ngelibala lakho lesikhumba, ngendlela buso bakho lobungayo, nobe ngekutsi umkhulu nobe uncama kanganani? Angeke. Kuyasisidvudvuta kwati kutsi Jehova akasehluleli ngaloko bantfu labakubonako! Nasi sibonelo, ngesikhatsi Samuweli abuka emadvodzana aJese, akazange akubone loko Jehova lebekakubona kuwo. Jehova bekatjele Samuweli kutsi yinye yemadvodzana aJese beyitawuba yinkhosi yaka-Israyeli. Kodvwa bekutawuba nguyiphi? Ngesikhatsi Samuweli abona Eliyabe loyindvodzana yaJese lendzala, watsi: ‘Nguye lona logcotjiwe waJehova.’ Eliyabe bekabukeka njengenkhosi. “Kodvwa Jehova wakhuluma kuSamuweli, watsi: ‘Ungabheki kubukeka nebudze bakhe, ngobe yena ngimalile.’” Ngusiphi sifundvo lesisitfolako? Jehova wachubeka watsi: “Umuntfu ubuka lingaphandle lemuntfu, kodvwa Jehova ubuka inhlitiyo.” (1 Sam. 16:1, 6, 7) Senta kahle ngekutsi silingise Jehova ngendlela lesiphatsa ngayo bazalwane nabodzadzewetfu. w20.04 14 ¶1; 15 ¶3

Jesu bekahamba emasimini, lokungenteka bekawakolo losakhula. (Joh. 4:3-6) Bekutawutsatsa tinyanga letine kutsi lokolo ulungele kuvunwa. Jesu washo intfo lokungenteka beyingakavami, watsi: “Bukani emasimu, asamhlophe alungele kuvunwa.” (Joh. 4:35, 36) Bekasho kutsini? Kungenteka Jesu bekakhuluma ngekubutsiswa kwebantfu, hhayi kwakolo. Cabanga ngalobekusandza kwenteka. Ngisho nobe emaJuda bekangevani nemaSamariya, Jesu washumayela umfati longumSamariya futsi walalela! Ecinisweni, ngesikhatsi Jesu akhuluma ngemasimu ‘lamhlophe lalungele kuvunwa,’ sicumbi semaSamariya leseva ngaJesu kulomfati, seta kuye kuze sitofundza lokunyenti. (Joh. 4:9, 39-42) Naku lokunye lokushiwo ngulenye inchazelo yeliBhayibheli ngalendzaba, itsi: “Lesento sekutsi labantfu bete ngekushesha kuJesu kuze bamlalele, sakhomba kutsi bebafana nakolo lobekalungele kuvunwa.” w20.04 8 ¶1-2

Imihlangano yetfu iyasisita kuze sitfutfukise emakhono etfu ekufundzisa newekushumayela. Sibonelo saloko kutsi sitfola indlela yekutisebentisa kahle tincwadzi letitfolakala Emathulusini Ekufundzisa. Ngako yilungiselele kahle imihlangano yelibandla. Nakusachubeka imihlangano, lalelisisa. Ngemuva kwemihlangano, kusebentise lokuceceshwa lokutfolile. Nawutenta letintfo utawuba ‘lisotja lelihle laKhristu Jesu.’ (2 Thim. 2:3) Siphindze sisitwe tigidzigidzi tetingilosi letinemandla. Cabanga nje ngaloko lokungentiwa yingilosi yinye! (Isa. 37:36) Nyalo, cabanga ngaloko lokungafezwa libutfo lelikhulu letingilosi. Kute umuntfu nobe lidimoni lelingancoba libutfo laJehova lelinemandla. Jehova unemandla lamakhulu, ngako nangabe anatsi sitawuhlale sinemandla kunalabasiphikisako ngisho nobe banemandla kangakanani. (Khu. 6:16) Lelo liciniso! Hlale ukukhumbula loko nawudvunyatwa ngulokwentiwa nobe lokushiwo ngulosebenta naye, lofundza naye nobe sihlobo lesingasiye Fakazi. Khumbula kutsi awusiwedvwa kulemphi. Ulandzela sicondziso saJehova. w21.03 29 ¶13-14

Kungenteka umphostoli Pawula bekacaphuna Isaya 22:13, lokhuluma ngesimo sengcondvo sema-Israyeli. Kunekutsi asondzele kuNkulunkulu, afuna kutijabulisa. Kalula nje, ema-Israyeli bekanesimo sengcondvo lesitsi kufanele akujabulele kuphila ngobe kungaphela nobe nini lokungumbono lovamile nalamuhla. Siyati kutsi Jehova utawuvusa labafile, ngako loko kufanele kuyitsintse indlela lesikhetsa ngayo bangani. Bazalwane baseKhorinte bekufanele bangatihlanganisi nalabo labangakholelwa ekuvusweni kwalabafile. Natsi kukhona lesikufundzako lamuhla: Nasicitsa sikhatsi lesinyenti nebangani labanganendzaba naloko lokutawenteka esikhatsini lesitako futsi labacanga kuphela ngekuphila nyalo, batawusenta kutsi sibe nembono lokabi. Nangabe umKhristu weliciniso acitsa sikhatsi lesinyenti nemuntfu lonjalo, simo sakhe sengcondvo lesihle singashintja. Labantfu bangase bamente kutsi ente tintfo Nkulunkulu latenyanyako. Kungako Pawula wasikhutsata watsi: “Sangulukani, nente lokulungile futsi ningachubeki nenta tono.”​—1 Khor. 15:33, 34. w20.12 9 ¶3, 5-6

Lelivesi lichaza indlela Jehova lawuhlele ngayo umndeni wakhe losezulwini nalosemhlabeni. Bunhloko bufaka ekhatsi tintfo letimbili, ligunya nekulandzisa. Njengobe ayinhloko, Jehova unalo lonkhe ligunya futsi unikete labanye ligunya kodvwa batawulandzisa kuye ngendlela labalisebentisa ngayo leligunya. (Rom. 14:10; Ef. 3:14, 15) Jehova unikete Jesu ligunya etikwelibandla, kodvwa Jesu utawulandzisa kuye ngendlela lasiphatsa ngayo. (1 Khor. 15:27) Jehova unikete nendvodza ligunya etikwemfati wayo nebantfwana. Yini lengayenta kuze ibe yinhloko yemndeni lekahle? Kufanele yati kutsi yini Jehova layilindzele kuyo. Kufanele yati nekutsi kungani Jehova enta lilungiselelo lebunhloko, nekutsi ingasilingisa njani sibonelo saJehova naJesu. Kubaluleke ngani loko? Kungobe Jehova unikete tinhloko temindeni ligunya futsi ufuna tilisebentise kahle.​—Luk. 12:48b. w21.02 2 ¶1-3

Senta kahle ngekulingisa Jehova ngekutsi sikhetse kukhohlwa letinye tintfo. Sibonelo saloko kutsi Jehova unelikhono lelihle lekukhumbula, kodvwa nangabe siphendvuka, uyasicolela futsi akhohlwe ngemaphutsa lesiwentako. (Hla. 25:7; 130:3, 4) Ufuna sente lokufanako kubantfu labatisolako nangabe basivise buhlungu. (Mat. 6:14; Luk. 17:3, 4) Singaphindze sikhombise kubonga ngesipho setfu sengcondvo ngekutsi sisisebentisele kudvumisa Loyo lowasipha sona. Labanye bayisebentisa kabi ingcondvo yabo, bayisebentisela kutincumela bona kutsi yini lekahle nalekabi. Ngenca yekutsi Jehova wasidala, kunengcondvo kulindzela kutsi timiso takhe tincono kakhulu kunaleto lesingatibekela tona. (Rom. 12:1, 2) Siba nekuthula nasilalela timiso takhe. (Isa. 48:18) Siphindze sifundze ngaloko Jehova lafuna sikwente, lokukumdvumisa nekumjabulisa.​—Taga 27:11. w20.05 23-24 ¶13-14

Yini lesingayenta kuze sichubeke sibatsandza bazalwane nabodzadze lamuhla? Nasesibati kancono bazalwane nabodzadzewetfu, kungase kube melula kuticondza timo tabo futsi sibatsandze kakhulu. Singaba bangani nabo ngisho nobe babadzala nobe babancane futsi ngisho nobe banemasiko langafani newetfu. Khumbula kutsi Jonathani bekamdzala ngeminyaka lengaba ngu-30 kunaDavide kodvwa baba bangani labakhulu. Ebandleni lokulo, kukhona yini lomncane nobe lomdzala kuwe longaba ngumngani naye? Nawenta njalo, usuke ukhombisa kutsi ‘ubatsandza bonkhe bazalwane.’ (1 Phet. 2:17) Kubatsandza kakhulu bazalwane nabodzadze kusho kutsi sitawuba bangani nabo bonkhe yini bazalwane ebandleni? Cha, loko angeke sekwenteke. Kuvamile kutsi usondzelane kakhulu nalabanye kunendlela losondzelana ngayo nalabanye ngesizatfu sekutsi nitsandza tintfo letifanako. Jesu wabita bonkhe baphostoli bakhe ngekutsi ‘bangani,’ kodvwa bekasondzelene kakhulu naJohane. (Joh. 13:23; 15:15; 20:2) Kodvwa Jesu akazange amphatse ngendlela lekhetsekile Johane kunalalabanye.​—Mak. 10:35-40. w21.01 23 ¶12-13

Umphostoli Pawula akazange ashumayele bantfu betive lebebase-Athene ngendlela lashumayela ngayo emaJuda lebekasesinagogeni. Bekatinaka tintfo lebetenteka futsi bekawanaka nemasiko ebantfu enkholo. (Imis. 17:23) Pawula bekaphindze abuke tintfo lebebavumelana ngato endleleni yabo yekukhonta nangeliciniso lelisemiBhalweni. Ngako Pawula bekakulungele kushintja indlela lebekendlulisela ngayo umlayeto wakhe kubo. Watjela ema-Athene kutsi umlayeto wakhe bewuvela “kuNkulunkulu Longatiwa” futsi lebebasolo betama kumkhonta. Ngisho nobe bantfu betive bebangayati imiBhalo, kodvwa Pawula akazange acabange kutsi bebangeke babe ngemaKhristu. Kunaloko wabatsatsa njengebantfu labafana nakolo losalungele kuvunwa, futsi wayishintja nendlela lebekashumayela ngayo tindzaba letimnandzi. Bani ngumuntfu lonakako njengaPawula. Buka tintfo letitakusita kutsi ukucondze loko bantfu labasensimini yakini labakukholelwako. Umnikati welikhaya ulihlobise njani likhaya nobe imoto yakhe? Ligama lakhe, indlela lagcoke ngayo nobe indlela lakhuluma ngayo kuyakhombisa yini kutsi ukuyiphi inkholo? w20.04 9-10 ¶7-8