October

Nangabe simati kahle Jesu futsi sicabanga njengaye siphindze sente njengaye, sitawuba bangani bakhe labakhulu. Singamlingisa njani Jesu? Cabanga nganasi sibonelo. Jesu bekahlale acabanga ngekusita labanye kunekutsi ente tintfo lebetitawujabulisa yena. (Mat. 20:28; Rom. 15:1-3) Ngenca yekutsi bekacabanga ngalendlela, bekatidzela futsi atsetselela. Bekangasheshi akhubeke ngenca yetintfo bantfu lebebatikhuluma ngaye. (Joh. 1:46, 47) Jesu bekangavumeli emaphutsa lebekentiwe bantfu esikhatsini lesendlulile kutsi amente ashintje indlela lebekabaphatsa ngayo. (1 Thim. 1:12-14) Jesu watsi: “Nangabe nitsandzana, bonkhe batawukwati kutsi nibafundzi bami.” (Joh. 13:35) Kuhle kutibuta kutsi, “Ngiyamlingisa yini Jesu ngekutsi ngitimisele kuhlale nginekuthula nebazalwane bami kanye nabodzadze?” w20.04 24 ¶11

Ngisho nobe uhlala eveni leligcwele bantfu labahlambalata libito laJehova, ungakhona kulimelela libito laJehova ngekutsi utjele bantfu kutsi Jehova ulungile, ungcwele futsi ulutsandvo. Ungakhombisa kutsi ufuna kubuswa nguye. Ungabasita bantfu bacondze kutsi kubusa kwaJehova kuphela lokulungile futsi lokutawuletsa kuthula nenjabulo kuyo yonkhe indalo. (Hla. 37:9, 37; 146:5, 6, 10) Nasifundzisa bantfu emaciniso laseBhayibhelini, sivame kugcizelela emandla aNkulunkulu, lokusho kutsi Jehova unelilungelo lekubusa umhlaba, futsi loku kuliciniso. Nobe kunjalo, ngisho nobe kubalulekile kufundzisa bantfu ngemitsetfo yaNkulunkulu, umgomo wetfu loyinhloko kubasita kutsi batsandze Jehova longuBabe wetfu futsi betsembeke kuye. Kufanele sibakhombise nebuntfu baJehova lobuhle, sigcizelele naloko lokumelelwa libito lakhe lelitsi Jehova. (Isa. 63:7) Nasifundzisa ngalendlela, sitawusita bantfu kutsi batsandze Jehova futsi bamlalele ngoba bafuna kwetsembeka kuye. w20.06 6 ¶16; 7 ¶19

Ingcondvo yemuntfu idalwe ngendlela lemangalisako. Ngesikhatsi usesesiswini samake wakho, ingcondvo yakho yakheka ngendlela lobekufanele ibe ngayo futsi njalo ngemzuzu bekwakheka ema-cells lamanyenti! Bacwaningi balinganisela kutsi ingcondvo yemuntfu lomdzala inema-cells langu-100 billion labitwa ngekutsi ngema-neurons. Lama-cells akha ingcondvo yetfu lengaba ngu-1.5 kg. Lelinye lemakhono engcondvo lamangalisako kutsi iyakhona kulawula indlela lesikhuluma ngayo. Ingcondvo yetfu ilawula kunyakata kwemisipha lengaba ngu-100 leselulwimini lwetfu, emphinjeni, etindzebeni temlomo, emhlatsini nasesifubeni, nawusho ligama linye nje. Kuze ukhone kuwabita kahle emagama, lemisipha kufanele inyakate ngesikhatsi lesifanele. Lenye incwadzi leyashicilelwa nga-2019 yatsi, bantfwana labasandza kutalwa bayakhona kubamba emagama latsite elulwimi. Lolucwaningo luvumelana naloko lokushiwo bacwaningi labanyenti labatsi sitalwa sinelikhono lekubamba nekufundza tilwimi letitsite. Kuyacaca kutsi likhono letfu lekukhuluma lisipho lesivela kuNkulunkulu. w20.05 22-23 ¶8-9

Abrahama wavuma kushiya imphilo lencono lebekayiphila edolobheni lase-Uri. Kungani? Ngobe bekalindzele “lidolobha lelinetisekelo leticinile.” (Heb. 11:8-10, 16) Lelidolobha Abrahama lebekalilindzele, nguMbuso waNkulunkulu. LoMbuso wakhiwa nguJesu Khristu kanye nemaKhristu lagcotjiwe langu-144000. Pawula watsi loMbuso ‘ulidolobha laNkulunkulu lophilako, lokuyiJerusalema yasezulwini.’ (Heb. 12:22; Semb. 5:8-10; 14:1) Jesu wafundzisa bafundzi bakhe kutsi bathantaze bacele kutsi loMbuso ufike kuze intsandvo yaNkulunkulu yentiwe emhlabeni njengasezulwini. (Mat. 6:10) Abrahama bekayati yini indlela uMbuso waNkulunkulu lobowutawuhlelwa ngayo? Cha. Kwaphela emakhulu eminyaka loko ‘kuyimfihlo lengcwele.’ (Ef. 1:8-10; Khol. 1:26, 27) Nanobe kunjalo, Abrahama bekati kutsi lenye intalelwane yakhe beyitawuba ngemakhosi, ngobe Jehova bekamtsembisile.​—Gen. 17:1, 2, 6. w20.08 2-3 ¶2-4

Kufanele sitigweme tintfo letifundziswa bafundzisi bemanga. Kusukela kwacaliswa libandla lebuKhristu, Develi bekasolo etama kwenta emaKhristu kutsi aphelelwe kukholwa kwawo. Ngako-ke, kufanele sikwati kubona umehluko emkhatsini wemanga neliciniso. Titsa tetfu tingase tisebentise i-Internet nobe tindlela tekuchumana kuze tisente singasametsembi Jehova futsi singasabatsandzi bazalwane betfu. Khumbula kutsi ngubani lobangela konkhe loku, futsi ukugweme! (1 Joh. 4:1, 6; Semb. 12:9) Kuze silwisane nemachinga aSathane ekucedza kukholwa kwetfu, kufanele sicinise kukholwa kwetfu kuJesu nakuloko lakwentako kuze kufezeke injongo yaNkulunkulu. Kufanele sibetsembe nalabo Jehova labasebentisako kuze bacondzise enhlanganweni yakhe. (Mat. 24:45-47) Sicinisa kumetsemba kwetfu Nkulunkulu ngekutsi sitadishe liVi lakhe. Nasenta njalo, kukholwa kwetfu kutawufana netimphandze tesihlahla letingene tajula emhlabatsini. Umphostoli Pawula washo intfo lefanako nakabhala lamavi lakulombhalo welusuku walamuhla. w20.07 23-24 ¶11-12

Njengobe sinesono, sivamile kutsi sehlulele bantfu ngendlela lababukeka ngayo. (Joh. 7:24) Kuncane lesikufundzako ngemuntfu kuloko lesikubona ngemehlo etfu. Asesibekise, ngisho nadokotela lonelikhono futsi losanesikhatsi enta umsebenti wakhe angafundza lokuncane kakhulu nakabuka sigulane. Kufanele asilalelisise lesigulane nangabe afuna kwati tinkinga temphilo lesike saba nato esikhatsini lesendlulile, indlela lesitiva ngayo kanye nangesimo lesikuso. Ngalesinye sikhatsi, dokotela kungadzingeka atfumele lesigulane ku-X-ray kuze abone lingekhatsi laso. Nakangenti njalo lodokotela, angasuke aselaphe ngendlela lengakafaneli. Ngendlela lefanako, ngeke sikhone kubati kahle bazalwane betfu nabodzadzewetfu ngekumane sibuke nje indlela labangiyo. Kufanele setame kwati loko labangiko ngekhatsi. Kuliciniso kutsi angeke sikhone kukwati loko bantfu labakucabangako. Kodvwa singakhona kwenta konkhe lokusemandleni etfu kuze silingise Jehova. Uyatilalela tikhonti takhe. Uyayicondza indlela letikhule ngayo kanye netimo letikuto futsi uyativela. w20.04 14-15 ¶1-3

Kufanele sitfobeke ngobe bantfu labatigcabhako abaticabangi “ngendlela lefanele.” Bantfu labatigcabhako batsandza kulwa nekutigabatisa. Tintfo labaticabangako kanye netento tabo tivame kubalimata bona kanye nalabanye. Nabangakacapheli, bangatigcabha futsi Sathane angadukisa tingcondvo tabo. (2 Khor. 4:4; 11:3) Umuntfu lotfobekile ucabanga ngendlela lefanele. Uticabanga ngendlela lekahle futsi uyakhumbula kutsi labanye bakhulu kunaye. (Fil. 2:3) Uyati nekutsi “Nkulunkulu umelene nalabatigcabhako kodvwa ubanika umusa wakhe labo labatfobekile.” (1 Phet. 5:5) Bantfu labacabanga ngendlela lefanele abafuni kutsi Jehova abe sitsa sabo. Kuze sihlale sitfobekile kufanele sisebentise seluleko seliBhayibheli lesitsi: “Khumulani buntfu lobudzala kanye nemikhuba yabo, nigcoke buntfu lobusha.” Kufanele sifundze ngesibonelo saJesu futsi setame kumlingisa.​—Khol. 3:9, 10; 1 Phet. 2:21. w20.07 7 ¶16-17

Sijabula kakhulu ngekuba yincenye yelibandla laJehova. Siba nekuthula nasikhonta Jehova sikanye nebazalwane nabodzadzewetfu. Ngumuphi umsebenti lonawo ebandleni? Umphostoli Pawula wafananisa libandla nemtimba wemuntfu. Waphindze wafananisa lilunga ngalinye lelibandla nemalunga emtimba. (Rom. 12:4-8; 1 Khor. 12:12-27; Ef. 4:16) Sifundvo lesingasifundza emfanekisweni waPawula kutsi sonkhe sinendzima lokufanele siyidlale emndenini waJehova. Pawula ucala lomfanekiso wakhe ngemavi latsi: “Njengobe emtimbeni munye kunemalunga lamanyenti, lamalunga akenti umsebenti munye, ngako natsi nanobe sibanyenti, singumtimba munye ebunyeni naKhristu, futsi singemalunga letsembele kulelinye nalelinye.” (Rom. 12:4, 5) Pawula bekasho kutsini ngalamavi? Nanobe sinemisebenti leyehlukene ebandleni, kodvwa sonkhe sibalulekile. w20.08 20 ¶1-2; 21 ¶4

Batali, ningasilingisa njani sibonelo saJehova sekutfobeka? Nangabe kufanele, funani imibono yebantfwana benu ngekutsi ingentiwa njani imisebenti letsite. Nangabe imibono yabo ikahle, ningayisebentisa. Jehova wasibekela sibonelo sekubeketela ngesikhatsi labo lebebamkhonta bambuta ngetincumo latentako. Walalela ngesikhatsi Abrahama aveta kukhatsateka kwakhe ngesincumo sakhe sekubhubhisa iSodoma neGomora. (Gen. 18:22-33) Cabanga ngendlela Jehova lamphatsa ngayo Sara, lobekangumfati wa-Abrahama. Jehova akazange aphatseke kabi nobe atfukutsele ngesikhatsi Sara ahleka nakametsembisa kutsi utawukhulelwa ngisho nobe sekakhulile. (Gen. 18:10-14) Esikhundleni saloko, wamhlonipha Sara. Yini lengafundvwa batali nalabadzala belibandla esibonelweni saJehova? Wenta njani nangabe bantfwana bakho nobe labanye ebandleni bangavumelani netincumo takho? Usheshe ubatjele kutsi benta liphutsa yini nobe wetama kucondza indlela labativa ngayo? Imindeni nemabandla iyazuza nangabe labo labanemalungelo betama kulingisa Jehova. w20.08 10 ¶7-9

Ngesikhatsi sisacala kufundza liciniso, kungenteka besilufuna lusito lwalabanye ngobe besati kutsi kusekunyenti lokufanele sikufundze. (1 Khor. 3:1, 2) Kusenjalo yini nyalo? Nangabe sekuphele iminyaka leminyenti sikhonta Jehova futsi sekukunyenti lokwentekile ekuphileni kwetfu, kungase kube matima ngatsi kutsi semukele lusito ikakhulukati nasilinikwa ngumuntfu lote sikhatsi lesidze njengatsi akhonta Jehova. Nanobe kunjalo, Jehova uvame kusebentisa bazalwane betfu nabodzadzewetfu kuze basicinise. (Rom. 1:11, 12) Nangabe sifuna kutsi Jehova asiphe emandla, kufanele semukele lusito lwebazalwane betfu nabodzadzewetfu. Kuphumelela kwemuntfu akuyi ngekutsi unemandla kanganani, ufundze kanganani, unjinge kanganani nobe watiwa kanganani, kodvwa kuya ngekutsi utfobeke kanganani nekutsi umetsemba kanganani Jehova. Shengatsi sonkhe singatimisela (1) ngekutsi setsembeke kuJehova, (2) sifundze etibonelweni letiseBhayibhelini nekutsi (3) semukele lusito kubazalwane nabodzadzewetfu. Ngisho nobe singase sitive sibutsakatsaka, Jehova utawusenta sibe nemandla. w20.07 14 ¶2; 19 ¶18-19

Kungaba matima kutsi sibe nesineke nasishumayela tihlobo tetfu letingasibo boFakazi. Umshumayeli 3:1, 7 unesimiso lesingasisita. Utsi: “Kunesikhatsi . . . sekubindza nesikhatsi sekukhuluma.” Kutiphatsa kahle kwetfu kungenta tihlobo tetfu tifune kuwulalela umlayeto wetfu. Kodvwa ngesikhatsi lesifanako, kufanele sihlale sikulungele kutitjela ngaJehova. (1 Phet. 3:1, 2) Kufanele sishumayele futsi sifundzise ngemdlandla, kodvwa kufanele sibe nesineke kubo bonkhe bantfu lokufaka ekhatsi tihlobo tetfu. Singafundza kuba nesineke etibonelweni tebantfu lebebanesineke lokukhulunywa ngabo eBhayibhelini nasetibonelweni talamuhla. Habakhuki bekafuna kutsi buphele bubi, kodvwa wakhombisa kutsi bekanesineke nakatsi: “Ngitawuma embonisweni yami ngibuke.” (Hab. 2:1) Umphostoli Pawula watsi bekafuna kucedza umsebenti wakhe. Nobe kunjalo, ngesineke, wachubeka ‘afakaza ngetindzaba letimnandzi.’​—Imis. 20:24. w20.09 11-12 ¶12-14

Ngisho nobe kunguJehova kuphela lomkhulu kunaJesu, Jesu akaticabangi amkhulu kunaloko langiko. NjengaJesu, nangabe sitfobekile, sitabatsandza kakhulu labanye. Jesu washo kutsi tikhonti taNkulunkulu betitawubonakala ngekutsi titsandzane. (Luk. 9:48; Joh. 13:35) Yini lokufanele uyente nangabe uva shengatsi tinkinga ebandleni aticatulwa ngendlela lekahle? Kunekutsi ukhonone, ungakhombisa kutfobeka ngekutsi ubasekele labo labaholako. (Heb. 13:17) Kuze ukhone kukwenta loko, tibute: ‘Letinkinga lengitibonako setinkhulu kangangekutsi tifuna kulungiswa yini? Lesi sikhatsi lesikahle yini sekutilungisa? Kungumtfwalo wami yini kutilungisa? Ngetama kwenta libandla libe nebunye yini noma ngetama kutiveta njengalobalulekile?’ Kutfobeka kubaluleke kakhulu kuJehova kunemakhono lesinawo futsi kubalulekile kutsi sibe nebunye, nebunye bubalulekile kunemisebenti lesiyentako. Ngako-ke, yenta konkhe lokusemandleni akho kuze ukhonte Jehova ngekutfobeka. Nawenta njalo utawube ukhutsata bunye ebandleni.​—Ef. 4:2, 3. w20.07 4-5 ¶9-11

Jesu walujabulela lusito lebekalutfola kubafati lebebesaba Nkulunkulu futsi lebebamsita “basebentisa tintfo tabo.” (Luk. 8:1-3) Wabafundzisa emaciniso labalulekile ngentsandvo yaNkulunkulu. Sibonelo saloko kutsi wabatjela kutsi utawufa aphindze avuswe. (Luk. 24:5-8) Watjela labafati ngetinkinga lebebatawubhekana nato njengobe nje bekabatjelile nebaphostoli bakhe. (Mak. 9:30-32; 10:32-34) Ngisho nobe baphostoli bakhe babaleka ngesikhatsi aboshwa, labanye balabafati lebebamsekela bebaseceleni kwakhe ngalesikhatsi afa elugodvweni. (Mat. 26:56; Mak. 15:40, 41) Bafati labesaba Nkulunkulu baba bekucala kubona kutsi Jesu uvusiwe. Wacela labafati kutsi bayotjela baphostoli kutsi sewuvusiwe ekufeni. (Mat. 28:5, 9, 10) Kungenteka kutsi ngeliPhentekhoste langa-33 C.E. ngesikhatsi umoya longcwele utfululwa, nebafati bebakhona futsi nabo ngalokusimangaliso bakhuluma ngetilwimi futsi batjela labanye “tintfo letimangalisako taNkulunkulu.”​—Imis. 1:14; 2:2-4, 11. w20.09 23 ¶11-12

Umsebenti wekwenta bafundzi usindzisa kuphila kwebantfu! Sikwati njani loko? Jesu washo umyalo lobhalwe kuMatewu 28:19, 20, lotsi: “Hambani nente . . . bafundzi . . . , nibabhabhatise.” Kubaluleke ngani kutsi umuntfu abhajatiswe? Kubalulekile nangabe umuntfu afuna kusindziswa. Umuntfu lofuna kubhajatiswa kufanele akholwe kutsi angaphila phakadze ngenca yekutsi Jesu wasifela waphindze wavuswa. Kungako umphostoli Phetro atjela emaKhristu labekanye nawo watsi: “Lubhabhatiso seluyanisindzisa . . . ngekuvuswa kwaJesu Khristu.” (1 Phet. 3:21) Ngako nangabe umfundzi lomusha abhajatiswa, angaba nelitsemba lekuphila phakadze. Kuze sikhone kwenta bafundzi, kufanele sibe ‘nelikhono lekufundzisa.’ (2 Thim. 4:1, 2) Leni? Ngobe Jesu wasiyala watsi: “Hambani nente . . . bafundzi . . . , nibafundzise.” Umphostoli Pawula watsi “phikelela” kulomsebenti, “ngobe nawenta njalo utawutisindzisa wena nalabo labakulalelako.” w20.10 14 ¶1-2

Umfundzi Phetro wafundza kutsandza kuba ngumdwebi webantfu. Ngesizatfu sekutsi bekasitwa nguJehova, Phetro wakhona kuwenta kahle umsebenti wakhe wekudweba bantfu. (Imis. 2:14, 41) Siyashumayela ngesizatfu sekutsi sitsandza Jehova, futsi leso sizatfu lesibalulekile lesisikhutsata kutsi sente lomsebenti. Kutsandza Jehova kusenta sitjele labanye ngaYe ngisho nobe ngaletinye tikhatsi siva ngatsi akusifaneli kwenta lomsebenti. Ngesikhatsi Jesu atjela Phetro kutsi abe ngumdwebi webantfu, watsi: “Ungesabi.” (Luk. 5:8-11) Phetro akazange esabe kutsi kutawentekani nakangaba ngumfundzi. Kunaloko, watfuswa simangaliso Jesu lebekasentile sekutsi babambe tinhlanti letinyenti futsi Phetro wativa angakufanele kubitwa nguJesu kutsi asebente naye. Ngendlela lefanako, kungenteka nawe ukhatsateke nawucabanga ngaloko lokufanele ukwente kuze ube ngumfundzi waKhristu. Nangabe kunjalo, cinisa lutsandvo lonalo ngaJehova, ngaJesu nangabomakhelwane futsi loko kutakukhutsata kutsi wemukele sicelo saJesu sekuba ngumdwebi webantfu.​—Mat. 22:37, 39; Joh. 14:15. w20.09 3 ¶4-5

Sisebentisa sikhatsi setfu, emandla etfu nemali yetfu kuze sifune labo ‘labatimisele kutfola kuphila lokuphakadze.’ (Imis. 13:48) Nasenta loko, sisuke silandzela sibonelo saJesu. Watsi: “Kudla kwami kwenta intsandvo yaloyo longitfumile nekutsi ngicedze umsebenti wakhe.” (Joh. 4:34; 17:4) Natsi nguloko lesikufisako. Sifuna kuwucedza umsebenti lesinikwe wona. (Joh. 20:21) Sifuna nalabanye lokufaka ekhatsi labo lesebayekele kushumayela kutsi babe natsi kulomsebenti. (Mat. 24:13) Akusiko melula kwenta loko Jesu lasiyale kutsi sikwente. Nobe kunjalo, asiwenti sodvwa lomsebenti. Jesu wetsembisa kutsi utawuba natsi. Nasenta bafundzi, “sitisebenti letikanye naNkulunkulu” futsi “sikanye naKhristu.” (1 Khor. 3:9; 2 Khor. 2:17) Ngako singakhona kuwucedza. Kusijabulisa kakhulu kwenta lomsebenti nekusita labanye kutsi bawente!​—Fil. 4:13. w20.11 7 ¶19-20

Ngalokuvamile, tincumo letentiwa batali tibatsintsa sikhatsi lesidze bantfwana. Nangabe batali benta tincumo letimbi, bangababangela tinkinga bantfwana babo. Kodvwa nangabe benta tincumo letikahle, basita bantfwana babo kutsi bajabule ekuphileni. Kodvwa nebantfwana kufanele bente tincumo letikahle. Sincumo lesincono kakhulu umuntfu langasenta kutsi akhonte Jehova, Babe wetfu losezulwini lonelutsandvo. (Hla. 73:28) Batali baJesu bebatimisele kusita bantfwana babo kutsi bakhonte Jehova, futsi tincumo labatenta takhombisa kutsi kukhonta Jehova bekuyintfo lebaluleke kakhulu ekuphileni kwabo. (Luk. 2:40, 41, 52) NaJesu wenta tincumo letikahle, letamsita wenta loko Jehova lebekafuna akwente. (Mat. 4:1-10) Jesu wakhula waba yindvodza lenemusa, leyetsembekile nalenesibindzi. Nobe ngumuphi umtali lotsandza Jehova bekangatigcabha futsi ajabule ngekuba nendvodzana lefana naye. w20.10 26 ¶1-2

Cabanga nganati tibonelo letilandzelako. Dzadze losakhulile ucabanga ngetikhatsi letimnandzi latijabulela esikhatsini lesendlulile. Ngisho nobe kuphila kwakhe sekumatima nyalo, uyachubeka enta konkhe langakwenta emsebentini waJehova. (1 Khor. 15:58) Onkhe malanga uticabanga anemndeni wakhe nebangani bakhe ePharadisi. Lomunye dzadze ukhumbula kutsi wake waphatfwa kabi ngulomunye ebandleni, kodvwa ukhetsa kungachubeki acabanga ngako. (Khol. 3:13) Umzalwane uwakhumbula kahle emaphutsa lawenta, kodvwa nyalo unaka kakhulu kuhlala etsembekile kuJehova. (Hla. 51:10) LamaKhristu lamatsatfu afana ngani? Onkhe ayakukhumbula lokwenteka esikhatsini lesendlulile, kodvwa akahlali acabanga ngako. Kunaloko, alibuke ngalabovu likusasa. Kubaluleke ngani loko? Njengobe umuntfu angeke akhone kuhamba acondze abe abuke emuva, natsi angeke sichubeke sikhonta Jehova nangabe sihlale sicabanga ngetintfo letenteka nobe lesatenta esikhatsini lesendlulile.​—Luk. 9:62. w20.11 24 ¶1-3

Davide bekabonakala abutsakatsaka kulelichawe lebelinemandla lobekutsiwa nguGoliyathi. Goliyathi bekamkhulu, ahlomile futsi bekaceceshelwe imphi. Davide bekasengumfana lomncane futsi bekasengakaceceshelwa imphi. Davide wetsemba kutsi Jehova utamnika emandla futsi wasincoba sitsa sakhe. (1 Sam. 17:41-45, 50) Kwadzingeka kutsi Davide abhekane nalenye inkinga lebeyitawumenta ative aphelelwa ngemandla. Davide waba sisebenti lesetsembekile senkhosi yaka-Israyeli lokutsiwa nguSawula lebeyibekwe nguJehova. INkhosi Sawula yacale yamhlonipha Davide. Ngekuhamba kwesikhatsi, kutigcabha kwenta Sawula waba nemona ngaDavide. Sawula wamphatsa kabuhlungu Davide waze wetama nekumbulala. (1 Sam. 18:6-9, 29; 19:9-11) Ngisho nobe Davide aphatfwa kabuhlungu yiNkhosi Sawula, wachubeka ayihlonipha ngobe beyibekwe nguJehova. (1 Sam. 24:6) Davide wetsemba kutsi Jehova bekatamnika emandla lebekawadzinga kuze acinisele ngesikhatsi lesimatima.​—Hla. 18:1. w20.07 17 ¶11-13

Incenye lenkhulu yesiphrofetho lesimayelana nenkhosi yasenyakatfo nenkhosi yaseningizimu seyivele igcwalisekile, ngako singaciniseka kutsi nalelenye itawugcwaliseka. Kuze sisicondze lesiphrofetho lesibhalwe kuDanyela sehluko 11, kufanele sikhumbule kutsi lesiphrofetho sikhuluma ngemakhosi nangabohulumende lababuse etindzaweni lebetinebantfu baNkulunkulu labanyenti. Ngisho nobe tikhonti taNkulunkulu titincane kakhulu ngelinani naticatsaniswa nelinani lebantfu labakhona emhlabeni wonkhe, tivame kuba bosogcamile nakwenteka tintfo letitsintsa umhlaba. Kungani? Kungobe umgomo waSathane kanye nalelive ukususa bonkhe bantfu labakhonta Jehova futsi labalalela Jesu. (Gen. 3:15; Semb. 11:7; 12:17) Ngetulu kwaloko, lesiphrofetho lesabhalwa nguDanyela kufanele sivumelane naletinye tiphrofetho letiseVini laNkulunkulu. Liciniso likutsi kufanele sibuke naletinye tincenye letiseBhayibhelini kuze sisicondze kahle lesiphrofetho saDanyela. w20.05 2 ¶1-2

Bantfu labanyenti lamuhla banemibono leyehlukene ngaloko lokwentekako kumuntfu nakafa. Kodvwa lifundzisani liBhayibheli? Nangabe umuntfu afa, umtimba wakhe uyabola. Kodvwa Loyo lowadala indzawo yonkhe angamvusa loyo muntfu futsi amnike umtimba lokahle. (Gen. 1:1; 2:7) Umphostoli Pawula wasebentisa umfanekiso kuze akhombise kutsi Nkulunkulu angeke kudzingeke amnikete umtimba lofanako loyo muntfu. Cabanga ngenhlanyelo. Nangabe lenhlanyelo ihlanyelwa, iyamila futsi ibe sihlahla lesisha. Lesihlahla lesisha lesimilile asifani nalenhlanyelo. Pawula wasebentisa lomfanekiso kuze akhombise kutsi uMdali wetfu angasiniketa umtimba “ngendlela latsandza ngayo.” Pawula waphindze watsi “kunemitimba yasezulwini nemitimba yasemhlabeni.” Bekasho kutsini? Emhlabeni sinemitimba yenyama, kodvwa ezulwini kunemitimba yemoya, njengeyetingilosi.​—1 Khor. 15:36-41. w20.12 9-10 ¶7-9

Sonkhe siyafuna kuba nekuthula. Kute kitsi lokutsandzako kuhlale akhatsatekile. Kodvwa ngaletinye tikhatsi singahle sitive sikhatsatekile futsi sitibute umbuto lofanako nalowabutwa yiNkhosi Davide njengobe sibona kulombhalo welusuka walamuhla. Tinyenti tintfo letingasenta sikhatsateke futsi angeke sikhone kutivimba kutsi tenteke. Nasi sibonelo, ngeke sikhone kuvimba kukhula kwemali yekutsenga kudla, timphahla nobe kukhula kwemali yekubhadala indzawo yekuhlala njalo ngemnyaka. Ngeke sikhone kuvimba lesisebenta nabo nobe lesifundza nabo kutsi bayekele kwetama kusenta singetsembeki nobe sitiphatse kabi, futsi ngeke sikhone kuvimba bantfu kutsi bangenti bugebengu endzaweni lesihlala kuyo. Sinaletinkinga ngobe siphila eveni lapho bantfu labanyenti bangenti tincumo ngekuvumelana netimiso teliBhayibheli. Sathane, longuNkulunkulu walelive uyati kutsi labanye bantfu batawuvumela “tinkinga talelive” tibente bangasamkhonti Jehova. (Mat. 13:22; 1 Joh. 5:19) Ngako asimangali kutsi lelive ligcwele tinkinga letenta bantfu bakhatsateke kakhulu! w21.01 2 ¶1, 3

Umphostoli Johane wasikhutsata kutsi singabatondzi bazalwane nabodzadzewetfu. Nasehluleka kusilalela leseluleko, Sathane angatfola litfuba lekusidukisa. (1 Joh. 2:11) Loku kwenteka kulamanye emaKhristu ekupheleni kwelikhulu lekucala C.E. Sathane wetama kwenta kutsi tikhonti taNkulunkulu titondzane futsi tehlukane ekhatsi. Ngesikhatsi Johane abhala tincwadzi takhe, bantfu lebebanemoya lofanako newaSathane, besebavele bakhona ebandleni. Nasi sibonelo, Diyotrefesi bekehlukanisa emaKhristu kulelinye libandla. (3 Joh. 9, 10) Bekangabahloniphi bazalwane lebebahambela emabandla batfunywe sigungu lesibusako. Wetama nekucosha labanye ebandleni lebebemukela bantfu lebakangabatsandzi. Bekenta intfo lembi kakhulu! Sathane solo uyetama kwehlukanisa nekucedza bantfu baNkulunkulu lamuhla. Kufanele singacali sibatondze bazalwane betfu nabodzadzewetfu futsi kufanele singakuyekeli kubasita. w21.01 11 ¶14

Ngesikhatsi semphi yelive yekucala, umbuso waseGerman kanye nembuso waseBritain wahlupha tikhonti taNkulunkulu lebetingafuni kuyokulwa emphini. Hulumende wase-United States wavalela ejele bonkhe lebebahamba embili ekwenteni umsebenti wekushumayela. Lokuhlushwa kwebantfu baNkulunkulu bekugcwalisa siphrofetho lesibhalwe kuSembulo 11:7-10. Eminyakeni yabo-1930, nangesikhatsi semphi yelive yesibili, inkhosi yasenyakatfo yahlasela bantfu baNkulunkulu kabuhlungu. Hitler kanye nebalandzeli bakhe bawuvala umsebenti wekushumayela. Lenkhosi yasenyakatfo yabulala bantfu baJehova labangacishe babe ngu-1 500 futsi labanyenti yabayisa etinkambu tekuhlushwa. Lenkhosi yasenyakatfo yakhona ‘kungcolisa inqaba yelithempeli’ futsi yakhona ‘nekucedza imihlatjelo yemalanga onkhe’ ngekutsi ivimbe kwentiwa kwemsebenti wekushumayela. (Dan. 11:30b, 31a) Hitler lobekangumholi waseGermany wetsembisa kutsi utawubulala bonkhe bantfu baNkulunkulu lebebaseGermany. w20.05 6 ¶12-13

Nasitsandzana kakhulu, angeke setame kuba ncono kunalabanye ebandleni. Khumbula kutsi Jonathani akazange abe nemona ngaDavide futsi afune kube nguye inkhosi esikhundleni sakhe. (1 Sam. 20:42) Sonkhe singasilingisa sibonelo saJonathani. Ungabi nemona ngemakhono ebazalwane bakho, ‘kodvwa ngekutfobeka batsatse njengalabakhulu kunawe.’ (Fil. 2:3) Khumbula kutsi sonkhe kunalokutsite lesingakwenta kuze sisite libandla. Nasitfobekile, sitawukhona kubona buntfu lobuhle bebazalwane nabodzadzewetfu futsi sizuze etibonelweni tabo tekwetsembeka. (1 Khor. 12:21-25) Nangabe sitsandzana, siyabadvudvuta bazalwane nabodzadzewetfu nababhekene netimo letimatima. Senta kutsi kuhlale kunebunye emkhatsini webantfu baNkulunkulu. Sikhombisa kutsi sibafundzi baJesu futsi loko kwenta bantfu bafune kukhonta Jehova. Ngetulu kwako konkhe sidvumisa ‘Babe wemusa, naNkulunkulu wayo yonkhe indvudvuto,’ lokunguJehova.​—2 Khor. 1:3. w21.01 24 ¶14; 25 ¶16

Lamuhla, bantfu labanyenti ababahloniphi BoFakazi BaJehova futsi bahlekisa ngabo ngobe bacabanga kutsi babantfu labangakahlakaniphi futsi lababutsakatsaka. Kungani? Kungobe asenti tintfo letentiwa bantfu lesiphila nabo. Siyetama kutfobeka futsi silalele. Lamuhla, bantfu batsandza bantfu labatigcabhako, labatiphakamisako futsi labavukelako. Ngetulu kwaloko, asitingeneli tepolitiki futsi asibi yincenye yembutfo wemasotja. Sehlukile kubantfu labaseveni lamuhla, kungako bacabanga kutsi sibantfu labaphansi. (Rom. 12:2) Ngisho nobe bantfu bakulelive bacabanga kutsi sibutsakatsaka, Jehova uyasisebentisa kuze ente tintfo letinkhulu. Uyawuphumelelisa umsebenti lomkhulu wekushumayela lowentiwa emhlabeni wonkhe. Lamuhla, tikhonti takhe tikhicita bomagazini labanyenti futsi labahunyushelwe etilwimini letinyenti letikhona emhlabeni, futsi basebentisa liBhayibheli kuze basite tigidzi tebantfu kutsi titfutfukise kuphila kwato. Lonkhe ludvumo luya kuJehova ngobe nguye lowenta lomsebenti kutsi uphumelele. w20.07 15 ¶5-6

Jesu uyalihlonipha ligunya laJehova, hhayi ngobe angakahlakaniphi nobe ete emakhono latsite. Bekafundzisa ngendlela lemelula nalecacile futsi loko kuyakhombisa kutsi uhlakaniphile. (Joh. 7:45, 46) Jehova bekati kutsi Jesu unemakhono latsite, futsi wamvumela kutsi asebente naye ngesikhatsi adala tonkhe tintfo ezulwini nasemhlabeni. (Taga 8:30; Heb. 1:2-4) Ngemuva kwekutsi Jehova avuse Jesu, wamnika “lonkhe ligunya ezulwini nasemhlabeni.” (Mat. 28:18) Ngisho nobe Jesu anemakhono lamanyenti, uyachubeka acela sicondziso kuJehova. Leni? Kungobe uyamtsandza Babe wakhe. Emadvodza kufanele anake kutsi Jehova akazange ente umfati kutsi ahloniphe indvodza yakhe ngesizatfu sekutsi utsatsa bafati njengalabangakabaluleki kunemadvodza. Loku sikusho ngobe Jehova wakhetsa bafati kanye nemadvodza kutsi babuse naJesu. (Gal. 3:26-29) Jehova wakhombisa kutsi uyayetsemba iNdvodzana yakhe ngekutsi ayinikete ligunya. Ngendlela lefanako, indvodza lehlakaniphile itawuniketa umfati wayo ligunya. w21.02 11 ¶13-14

LiVi laNkulunkulu lifana nesibuko, lisisita sibone lapho kudzingeka silungise khona nekutsi singalungisa kanjani. (Jak. 1:23-25) Nasi sibonelo, ngemuva kwekutsi sifundze liBhayibheli, singase sibone kutsi kudzingeka silawule intfukutselo yetfu. Ngekusitwa nguJehova sifundza kuba nemoya lophansi nangabe bantfu nobe tinkinga tisitfukutselisa. Nyalo sesiyakhona kucabanga kahle futsi sente tincumo letikahle. (Jak. 3:13) Kubaluleke kakhulu kutsi silati kahle liBhayibheli! Ngaletinye tikhatsi senta liphutsa kucala ngaphambi kwekutsi sifundze ngaloko lokungakafaneli sikwente. Indlela lencono yekutfola kuhlakanipha kufundza kulokuhle lokwentiwa ngulabanye futsi ufundze nasemaphutseni labawenta. Kungako Jakobe asikhutsata kutsi sifundze etibonelweni tebantfu labaseBhayibhelini njenga-Abrahama, Rahabi, Jobe, na-Elija. (Jak. 2:21-26; 5:10, 11, 17, 18) Letikhonti taJehova letetsembekile takhona kubeketelela tinkinga lebetingatenta kutsi tingajabuli. Tibonelo tato tekwetsembeka tikhombisa kutsi Jehova angasisita natsi kutsi sente lokufanako. w21.02 29-30 ¶12-13

Nakuchutjwa sifundvo seliBhayibheli, ngumsebenti wemfundzisi kusita umfundzi kutsi acondze liVi laNkulunkulu. Nangabe lona lofundzisako akumeme kutsi ube khona nakachuba lesifundvo, kufanele ukhumbule kutsi uyele kuyomsita. (Shu. 4:9, 10) Yini longayenta kuze ube lusito nakuchutjwa lesifundvo? Silungiselele lesifundvo seliBhayibheli. Cale ucele lona lofundzisako akutjele lokutsite ngemfundzi. Yini loyatiko ngalomfundzi? Nitawube nifundza siphi sihloko? Nguliphi liphuzu lofuna umfundzi alicondze? Yini lokufanele ngiyente nobe ngingayenti futsi yini lokufale ngiyisho nobe ngingayisho? Ngingamkhutsata njani umfundzi kutsi atfutfuke? Kuliciniso kutsi umfundzisi angeke akutjele tindzaba temfundzi letiyimfihlo, kodvwa loko latakutjela kona kungaba lusito. Joy, lositfunywa selivangeli utsi: “Loko kusita lengihamba naye kutsi abe nendzaba nemfundzi futsi ati naloko langakusho nakusachubeka lesifundvo.” w21.03 9 ¶5-6

Ngaletinye tikhatsi sitondvwa ngenca yekutsi siphila ngekuvumelana netimiso taNkulunkulu letilungile. Loko Nkulunkulu latsi kukahle nalatsi kukabi kuhlukile kuloko bantfu balelive labakushoko. Nasi sibonelo, bantfu labanyenti lamuhla bayavumelana nemikhuba leyenyanyekako lefana naleyo beyentiwa bantfu baseSodoma nebaseGomora Nkulunkulu lababhubhisela yona! (Juda 7) Ngenca yekutsi silalela imiyalo leseBhayibhelini lemayelana nemikhuba lenjalo, bantfu labanyenti bahlekisa ngatsi futsi batsi sinetingcondvo letilukhuni. (1 Phet. 4:3, 4) Yini lengasisita sicinisele nangabe bantfu basenyanya futsi basetfuka? Kufanele sibe nekukholwa lokucinile kutsi Jehova utasisita. Njengesihlangu, kukholwa kwetfu ‘kungacima tonkhe tikhali letivutsako talomubi.’ (Ef. 6:16) Kodvwa sidzinga lokungetulu nje kwekukholwa. Sidzinga nelutsandvo. Kungani? Ngobe lutsandvo “alucansuki.” Lubeketelela tonkhe tintfo letibuhlungu futsi lucinisele. (1 Khor. 13:4-7, 13) Kutsandza Jehova, nebazalwane betfu kanye netitsa tetfu kutasisita kutsi sicinisele nasitondvwa. w21.03 20-21 ¶3-4

Ngaletinye tikhatsi, sikhombisa kutsi siyabatsandza bazalwane nabodzadze ngaloko lesingakwenti. Sibonelo saloko kutsi asisheshi sitfukutsele nangabe bakhulume lokutsite. Cabanga ngaloko lokwenteka ngemalanga ekugcina aJesu alapha emhlabeni. Watjela bafundzi bakhe kutsi kuze batfole kuphila, bekufanele badle inyama yakhe futsi banatse nengati yakhe. (Joh. 6:53-57) Loko Jesu lakusho kwabetfusa bafundzi bakhe labanyenti kangangekutsi baze bamshiya, kwasala kuphela bangani bakhe mbamba. Bebangakucondzi loko Jesu lakusho futsi kungenteka nabo bamangala. Labangani baJesu labetsembekile abazange bacabange kutsi loko Jesu lebekakukhulumile bekukabi, nobe kubatfukutselise. Kunaloko, bebametsemba ngobe bebati kutsi ukhuluma liciniso. (Joh. 6:60, 66-69) Kubalulekile kutsi singasheshi sitfukutsele ngenca yaloko labanye labakushoko! Kunaloko, sibanika litfuba lekuchaza kutsi basho kutsini.​—Taga 18:13. w21.01 11 ¶13