March

Live lelisha lisengakefiki. Kodvwa cabanga ngaletinye tintfo letikhona, letifaka ekhatsi tinkhanyeti, tihlahla, tilwane kanye nalabanye bantfu. Kute longabatako kutsi letintfo tikhona mbamba, ngisho nobe kwake kwaba nesikhatsi lapho betingekho khona. Lokwenta tibe khona kutsi tadalwa nguJehova. (Gen. 1:1, 26, 27) Nkulunkulu wetfu wetsembise nekutsi utawenta live lelisha. Utasifeza lesetsembiso. Eveni lelisha, bantfu batawujabulela kuphila phakadze futsi babe baphile saka! Siyaciniseka kutsi live lelisha litawufika ngesikhatsi saNkulunkulu lesifanele, silibone njengobe nje sibona yonkhe indalo lesitungeletile. (Isa. 65:17; Semb. 21:3, 4) Kwanyalo, sebentisa onkhe ematfuba lonawo kuze ucinise kukholwa kwakho. Hlale ubonga ngenhlawulo. Cabanga ngemandla aJehova. Yenta tintfo letitakusondzeta kuJehova. Nawenta njalo, utawuba semkhatsini ‘walabo labatfola letetsembiso ngekukholwa nangekubeketela.’​—Heb. 6:11, 12. w23.04 31 ¶18-19

Jesu wabuka ezulwini futsi wathantaza. Bekafuna kuniketa Jehova lonkhe ludvumo ngaloko lebekutakwenteka. Ngemuva kwaloko, Jesu wamemeta watsi: “Lazaro, phuma!” (Joh. 11:43) Lazaro waphuma kulelithuna! Jesu wenta loko labanye lebebacabanga kutsi angeke kwenteke. Lendzaba yenta sisetsembe kakhulu setsembiso sekuvuswa kwalabafile. Kanjani? Khumbula loko Jesu lakwetsembisa Mata nakatsi: “Umnakenu utawuvuka.” (Joh. 11:23) NjengaBabe wakhe, Jesu unesifiso sekufeza lesetsembiso futsi unawo nemandla ekusifeza. Tinyembeti takhe taveta kutsi unesifiso lesikhulu sekuvusa bantfu labafile, acedze nabo bonkhe buhlungu lobubangelwa kufa. Ngesikhatsi Lazaro aphuma ethuneni, Jesu wakhombisa kutsi unemandla ekuvusa labafile. Ngetulu kwaloko, cabanga nangaloko Jesu lakukhumbuta Mata, njengobe kushiwo kulombhalo welusuku lwalamuhla. Sinesizatfu lesihle sekwetsemba kutsi Nkulunkulu utawusifeza setsembiso sakhe sekuvusa bantfu labafile. w23.04 11-12 ¶15-16

Kungahle kudzingeke sikushintje loko lesikuthantazelako nasibona loko lokuyintsandvo yaJehova. Kufanele sikhumbule kutsi Jehova unenjongo, futsi utayifeza ngesikhatsi sakhe lesifanele. Lenjongo ifaka ekhatsi kucedza tonkhe tinkinga letisihluphako lamuhla, letifaka ekhatsi tehlakalo temvelo, kugula kanye nekufa. Jehova utayifeza lenjongo yakhe asebentisa uMbuso wakhe. (Dan. 2:44; Semb. 21:3, 4) Kodvwa kwanyalo, Jehova uvumele Sathane kutsi abuse lomhlaba. (Joh. 12:31; Semb. 12:9) Kube Jehova bekangacatulula tinkinga tebantfu nyalo, bekungabonakala ngatsi kubusa kwaSathane kuyaphumelela. Ngako njengobe silindzele kutsi letinye tetsembiso taJehova tifezeke, loko akusho kutsi uyasibukelela nje. Jehova utasisita. w23.05 8 ¶4; 9-10 ¶7-8

Yini lesingayenta kuze sisite labanye bazuze eSikhumbutweni? Kwekucala kutsi sibameme. Ngetulu kwekumema labo lesibatfola nasenta umsebenti wekushumayela, singaphindze sente luhla lwebantfu lesingabamema. Laba bangafaka ekhatsi tihlobo tetfu, lesisebenta nabo, lesifundza nabo kanye nalabanye. Ngisho nobe site emakhophi lenele lashicilelwe esimemo singabatfumelela ngetintfo tebuchwephesha. Kwatibani nje, mhlawumbe banyenti labangaba khona. (Shu. 11:6) Khumbula kutsi labo lesibamemile bangahle babe nemibuto, ikakhulukati nangabe bangazange sebaye emihlanganweni yetfu. Senta kahle ngekucabanga ngemibuto labangahle babe nayo futsi sikulungele kubaphendvula. Ngisho nangemuva kweSikhumbuto, labo labacalako kuba khona bangahle babe naleminye imibuto. Sifuna kwenta konkhe lesingakwenta ngaphambi kweSikhumbuto, ngesikhatsi seSikhumbuto nangemuva kwaso kuze sisite labo “labatimisele kutfola kuphila” kutsi basitakale kulomkhosi.​—Imis. 13:48. w24.01 12 ¶13, 15; 13 ¶16

LiBhayibheli likhuluma ngekuvuswa kwebantfu labangu-8. Tidadishe ngekutimisela letindzaba. Njengobe wenta njalo, buka tifundvo longatifundza. Cabanga ngekutsi sibonelo ngasinye sikhombisa njani kutsi Nkulunkulu unesifiso sekuvusa bantfu labafile futsi unawo nemandla ekukwenta loko. Ngetulu kwako konkhe, cabanga ngekuvuswa kwaJesu lokuyintfo lebaluleke kakhulu leyake yenteka. Khumbula kutsi kuvuswa kwakhe kwacinisekiswa ngemakhulu ebantfu labatibonela ngewabo, futsi kusisekelo lesicinile sekukholwa kwetfu. (1 Khor. 15:3-6, 20-22) Sibonga kakhulu ngesetsembiso saJehova sekutsi labafile batawuvuka! Singaciniseka kutsi lesetsembiso sitawufezeka ngobe Jehova unaso sifiso kanye nemandla ekusifeza. Shengatsi singatimisela kuchubeka sisetsemba kakhulu lesetsembiso lesiligugu lesimayelana nekuvuswa kwalabafile. Nasenta njalo, sitawusondzelana kakhulu naNkulunkulu lowetsembise ngamunye wetfu watsi: ‘Bantfu lobatsandzako labafile batawuvuka!’​—Joh. 11:23. w23.04 8 ¶2; 12 ¶17; 13 ¶20

Kulinganisela nekutfobeka kuphose kufane. Umuntfu lolinganiselako utibona ngendlela lekahle futsi uyakwati loko langakhona kukwenta. Umuntfu lotfobekile uyabahlonipha labanye futsi ubatsatsa njengalababalulekile kunaye. (Fil. 2:3) Kafishane nje, umuntfu lolinganiselako utfobekile. Gideyoni bekalinganisela futsi atfobekile. Ngesikhatsi ingilosi yaJehova imtjela kutsi unikwe umsebenti wekusindzisa ema-Israyeli kubakaMidiyani lebebanemandla, lendvodza letfobekile yaphendvula yatsi: “Indlu yami ngulencane esiveni saManase futsi angisilutfo endlini yababe.” (Khu. 6:15) Gideyoni wabona ngatsi lomsebenti bewungetulu kwemandla akhe. Kodvwa Jehova bekati kutsi angakhona kuwenta. Ngekusitwa nguye, wawenta kahle lomsebenti. Labadzala belibandla benta konkhe labangakwenta kuze balinganisele futsi batfobeke kuto tonkhe tintfo. (Imis. 20:18, 19) Abatishayi sifuba ngenca yemakhono abo nobe tintfo labaphumelele kutifeza futsi abacabangi kutsi abasilutfo ngenca yekutsi bente emaphutsa. w23.06 3 ¶4-5

Kusele iminyaka lengetulu kwalengu-1 000 kutsi Sathane afihlitwe inhloko. (Semb. 20:7-10) Ngaphambi kwekutsi loko kwenteke, liBhayibheli likhuluma nganati tintfo letaphrofethwa letitawenteka letitawunyakatisa umhlaba. Kwekucala, tive titawumemetela “kuthula nekulondzeka!” (1 Thes. 5:2, 3) “Ngekushesha lokukhulu,” kutawucala kuhlupheka lokukhulu ngesikhatsi tive tihlasela yonkhe inkholo yemanga. (Semb. 17:16) Ngemuva kwaloko, Jesu utawubese wehlulela bantfu, ehlukanise timvu etimbutini. (Mat. 25:31-33, 46) Nobe kunjalo, Sathane utawube angakahlali nje abukele. Agcwele inzondo, utawubangela tive, liBhayibheli lelitibita ngekutsi nguGogi waseveni lakaMagogi kutsi tihlasele bantfu baJehova. (Hez. 38:2, 10, 11) Kutawuba nesikhatsi lapho labagcotjiwe labaselamhlabeni batawugcogcelwa ezulwini kuze babe naKhristu nelibutfo lakhe lasezulwini futsi balwe imphi ye-Amagedoni, lokuyincenye yekugcina yekuhlupheka lokukhulu. (Mat. 24:31; Semb. 16:14, 16) Ngemuva kwaloko, kutawubese kucala Kubusa KwaKhristu Kweminyaka Leyinkhulungwane lamhlabeni.​—Semb. 20:6. w23.10 20-21 ¶9-10

Lamuhla linyenti lebantfu baJehova lihlala emaveni lapho umsebenti wetfu uvinjelwe khona. Bayatihlonipha tiphatsimandla, kodvwa njenga-Obadiya labazalwane nabodzadze labaligugu banika Jehova lokukwakhe, lokukukhonta yena yedvwa. (Mat. 22:21) Bakhombisa kutsi bayamesaba Nkulunkulu ngekutsi balalele yena kunekulalela bantfu. (Imis. 5:29) Loku bakwenta ngekutsi bashumayele tindzaba letimnandzi baphindze bahlangane ndzawonye ngasense. (Mat. 10:16, 28) Benta lokusemandleni kuze bazalwane babo nabodzadze batfole tintfo labatidzingako kuze bahlale basondzelene naJehova. Cabanga ngesibonelo saHenri, lohlala eveni lelise-Africa lapho umsebenti wetfu bewuvinjelwe khona. Ngaleso sikhatsi, Henri wavolontiya kumikisela bazalwane betfu nabodzadze tincwadzi letisekelwe eBhayibhelini. Wabhala watsi: “Ngingumuntfu lonemahloni. . . . Jehova . . . wanginika sibindzi lebengisidzinga.” Nawucabanga, ungaba naso yini sibindzi njengaHenri? Ungaba naso nangabe umesaba Nkulunkulu. w23.06 16 ¶9, 11

Ngesikhatsi bo-Adamu na-Eva bavukela Nkulunkulu, bekungabonakala ngatsi Sathane uyivimbile kutsi iphumelele injongo yaNkulunkulu yekugcwalisa umhlaba ngebantfu labete sono futsi labalalelako. Kungenteka Sathane bekacabanga kutsi kute lokunganani Jehova lebekangakwenta. Mhlawumbe bekacabanga kutsi Jehova utawubulala Adamu na-Eva futsi adale lenye indvodza nemfati kuze bafeze injongo yakhe ngebantfu. Kodvwa kube Nkulunkulu wakwenta loko, Develi bekatamsola ngekutsi ungumcambimanga. Sisho ngani? Ngobe njengobe kubhalwe kuGenesisi 1:28, Jehova watjela bo-Adamu na-Eva kutsi intalelwane yabo beyitawugcwala umhlaba. Nobe mhlawumbe bekacabanga kutsi Jehova utawuvumela bo-Adamu na-Eva kutsi batale bantfwana labanesono futsi lebebatawuhlale banjalo. (Shu. 7:20; Rom. 3:23) Kube wenta loko, siyaciniseka kutsi Develi bekatawumangalela Jehova ngekutsi usehluleki. Sisho ngani? Ngobe loku bekungeke kuyifeze injongo yaNkulunkulu yekugcwalisa umhlaba loliPharadisi ngesitukulwane sa-Adamu na-Eva lesite sono futsi lesilalelako. w23.11 6 ¶15-16

Jehova usinika ticondziso leticacile asebentisa liVi lakhe nenhlangano yakhe. Akukafaneli sengete kuleticondziso lasiniketa tona. (Taga 3:5-7) Ngako, angeke secele ngale kwalokubhalwe eBhayibhelini nobe sishayele bazalwane nabodzadze imitsetfo kuloko umuntfu langatincumela kuko. Sathane usebentisa ‘kuyenga lokulite’ kanye ‘netintfo letitsatfwa njengaletibalulekile eveni’ kuze adukise bantfu futsi abehlukanise. (Khol. 2:8) Ngesikhatsi semaKhristu ekucala, loku bekufaka ekhatsi emafilosofi lasekelwe emicabangweni yebantfu, timfundziso temaJuda letingakasekelwa emibhalweni, nemfundziso yekutsi emaKhristu kufanele agcine uMtsetfo waMosi. Loku bekukhohlisa ngobe kwenta bantfu bangasamnaki Jehova, longuMtfombo wekuhlakanipha. Lamuhla, Sathane usebentisa betindzaba netinhlelo tekuchumana kuze asakate emahemuhemu netindzaba letingemanga letikhutsatwa baholi bepolitiki. w23.07 16 ¶11-12

Kungenteka Sathane yammangalisa kakhulu indlela Jehova lalungisa ngayo kuvukela kwakhe nekwebantfu bekucala. Kunekutsi Jehova abonakale angumcambimanga, wativeta etsembekile ngekuvumela bo-Adamu na-Eva kutsi babe nebantfwana. Ngetulu kwaloko, kunekutsi abonakale asehluleki, Jehova waphumelela. Wachubeka nenjongo yakhe ngekutsi ente kube “nentalelwane” lebeyitawusindzisa situkulwane sa-Adamu na-Eva lesilalelako. (Gen. 3:15; 22:18) Kungenteka lilungiselelo laJehova lekutsi kube nenhlawulo lammangalisa kakhulu Sathane. Sisho ngani? Ngobe lisekelwe elutsandvweni lolute bugovu. (Mat. 20:28; Joh. 3:16) Lobu buntfu lete bona Sathane. Ngako inhlawulo ivule liphi litfuba? Ekupheleni kweminyaka lengu-1 000, situkulwane sa-Adamu na-Eva lesite sono futsi lesilalelako sitawuhlala emhlabeni loliPharadisi njengobe bekuyinjongo yaJehova yasekucaleni. w23.11 6 ¶17

Silalela umtsetfo waJehova lomayelana nebungcwele bekuphila nengati. Leni? Ngobe Jehova utsi ingati imelela kuphila, lokusipho lesiligugu lesivela kuye. (Lev. 17:14) Ngesikhatsi Jehova avumela bantfu kutsi badle inyama, wabatjela kutsi bangayidli ingati. (Gen. 9:4) Wawuphindza lomtsetfo ngesikhatsi anika ema-Israyeli uMtsetfo waMosi. (Lev. 17:10) Ngetulu kwaloko, wacondzisa sigungu lesibusako sangesikhatsi semaKhristu ekucala kutsi sitjele onkhe emaKhristu kutsi ‘angayidli ingati.’ (Imis. 15:28, 29) Siyawulalela lomyalo nasincuma kutsi nguyiphi indlela yekwelashwa lesitayemukela. Siphindze silalele timiso letiphakeme taJehova tekutiphatsa. Pawula wasebentisa sitfombemcondvo kuze asecwayise kutsi ‘sibulale’ emalunga emitimba yetfu, lokusho kwenta konkhe lokusemandleni etfu kuze sisuse tifiso letimbi. Siyakugwema kubuka nobe kwenta intfo lengasenta kutsi sigcine sitiphetse kabi.​—Khol. 3:5; Jobe 31:1. w23.07 15 ¶5-6

Kungenteka yini kutsi Samsoni bekametsemba kakhulu Delila futsi avalwe lutsandvo waze wangaboni kutsi bekafuna kwentani? Kunobe ngukuphi, Delila bekahlale amcindzetela kutsi amtjele kutsi uwatsatsaphi emandla akhe, futsi wagcine amtjelile. Lokubuhlungu kutsi leliphutsa lelentiwa nguSamsoni lenta kutsi alahlekelwe ngemandla akhe futsi kwaphela sikhatsi lesitsite Jehova angamemukeli. (Khu. 16:16-20) Samsoni wabhekana nemiphumela lebuhlungu ngenca yekwetsemba Delila kunekwetsemba Jehova. EmaFilisti ambamba futsi amkupuluta emehlo. Amvalela ejele leliseGaza, futsi waba sigcili lesisila lokutinhlavu. EmaFilisti abese abukisa ngaye kulomunye umcimbi labanawo. Enta iminikelo kunkulunkulu wawo Dagoni, ngobe bekacabanga kutsi nguye lonikele Samsoni etandleni tawo. Amkhipha kulelijele ammikisa kulomcimbi kuze ‘atohlekisa ngaye.’​—Khu. 16:21-25. w23.09 5-6 ¶13-14

Mhlawumbe losebenta naye nobe lofundza naye angakubuta kutsi yini lesenta silalele timiso teliBhayibheli letimayelana nekutiphatsa. Sitawenta konkhe lokusemandleni etfu kuze simelele tinkholelo tetfu ngesikhatsi lesifanako sibe sihlonipha umbono walona losibutako. (1 Phet. 3:15) Kunekutsi sicabange kutsi lona losibutako uyasiphikisa, kufanele sicabange kutsi lombuto uyasisita sibone kutsi yini lebalulekile kuye. Kunobe ngukuphi lokungamenta abute lombuto, kufanele simphendvule ngemoya lophansi nangemusa. Imphendvulo yetfu ingamenta kutsi aphindze acabangisise ngembono wakhe. Ase sitsi losebenta naye uyakubuta kutsi sentiwa yini kutsi singalugubhi lusuku lwekutalwa, tibute: Kungenteka yini kutsi uyatibuta kutsi sivumelekile yini kutsi sitijabulise? Singamenta akhululeke ngekutsi sicale simbonge ngekutsi uyatikhatsalela letinye tisebenti. Loko kungasivulela litfuba lekutsi simchazele kutsi litsini liBhayibheli ngekugubha lusuku lwekutalwa. w23.09 17 ¶10-11

Kufanele sisisebentise kahle sikhatsi lesisele kuze sishumayele bantfu bato tonkhe tive. Phetro usikhumbuta kutsi ‘sihlale silikhumbula lilanga laJehova.’ (2 Phet. 3:11, 12) Kanjani? Ngekutsi onkhe malanga nakungenteka, sicabangisise ngetibusiso lesitatitfola eveni lelisha. Ticabange uhogela umoya lohlobile, udla kudla lokunemphilo, wemukela lobatsandzako lesebavusiwe, futsi ufundzisa bantfu lebebaphila eminyakeni leminyenti leyendlulile mayelana nekugcwaliseka kwetiphrofetho teliBhayibheli. Kucabangisisa ngaloku kutakusita kutsi uhlale ulindzile futsi uciniseke kutsi kuphela kutawufika ngekushesha. ‘Nasesinalolwati’ mayelana nelikusasa letfu, angeke ‘sidukiswe’ bantfu labafundzisa emanga. w23.09 27 ¶5-6

Bantfu labasha baphila nalabanye labasha labavame ‘kungabalaleli batali’ babo. (2 Thim. 3:1, 2) Kwentiwa yini kutsi linyenti labo lingalaleli? Labanye babona ngatsi batali babo bayatentisa. Balindzela kutsi labantfwana bente tintfo labehlulekako labatali kutenta. Labanye babona ngatsi seluleko sebatali babo sisidzala, nobe kutsi sinemincele leminyenti. Nangabe ungulosemusha, kuyenteka yini nawe utive ngalendlela? Labanyenti bakutfola kumatima kulalela umyalo waJehova lotfolakala kulombhalo welusuku walamuhla. Yini lengakusita kutsi ulalele? Ungafundza kulalela esibonelweni lesihamba embili saJesu. (1 Phet. 2:21-24) Bekete sono, kepha batali bakhe bebanesono. Kodvwa wabahlonipha nanobe bebahle benta emaphutsa futsi ngaletinye tikhatsi bangamcondzisisi.​—Eks. 20:12. w23.10 7 ¶4-5

Umpostoli Pawula wachaza kutsi imihlatjelo lebeyidzingeka ngephansi kwaloMtsetfo beyingasisusi ngalokuphelele sono. Ngenca yaloko, loMtsetfo ‘wabekelwa eceleni.’ Ngako Pawula wafundzisa lamaKhristu lamanye emaciniso lajulile. Wawakhumbuta ‘ngelitsemba lelincono’ lelisekelwe emhlatjelweni waJesu lebewungawasita kutsi ‘asondzele edvute naNkulunkulu.’ (Heb. 7:19) Pawula wachazela bazalwane bakhe labangemaHebheru kutsi yini lebeyenta indlela emaKhristu lebekakhonta ngayo Nkulunkulu ibe ncono kakhulu kunaleyo bekakhontwa ngayo esikhatsini lesendlulile. Indlela emaJuda lebekakhonta ngayo Nkulunkulu ‘beyisitfunti setintfo lebetiseta, kodvwa lokungiko sibili kukuKhristu.’ (Khol. 2:17) Sitfunti sisitfombe sentfo mbamba, kodvwa asisiyo lentfo mbamba. Ngendlela lefanako, indlela emaJuda labekakhonta ngayo Nkulunkulu esikhatsini lesendlulile beyisitfunti sentfo mbamba lebeyiseta. Kudzingeka siyicondze indlela Jehova layibekile kuze sicolelwe tono tetfu khona sitamkhonta ngendlela layemukelako. w23.10 25 ¶4-5

Danyela sehluko 11 ukhuluma ngemakhosi lamabili nobe bohulumende lababili lababambene ngetihlutfu balwela kubusa umhlaba. Nasicatsanisa lesiphrofetho naletinye tiphrofetho teliBhayibheli singatsi “inkhosi yasenyakatfo” yiRussia nemave layisekelako bese kutsi “inkhosi yaseningizimu” ngumbuso wemhlaba wemaNgisi nemaMelika. Bantfu baNkulunkulu labaphila ngephansi kwembuso ‘wenkhosi yasenyakatfo’ babeketelela kuphatfwa kabi ngulenkhosi. Labanye boFakazi bashayiwe futsi bavalelwa emajele ngenca yekukholwa kwabo. Lokuphatfwa kabi ‘yinkhosi yasenyakatfo’ kucinise kukholwa kwebazalwane betfu, kunekutsi kubacedze emandla. Kwentiwa yini loko? Kungenca yekutsi bayati kutsi kuphatfwa kabi kwebantfu baNkulunkulu kugcwalisa siphrofetho lesashiwo nguDanyela. (Dan. 11:41) Kukwati loko kungacinisa litsemba letfu futsi kwente sihlale setsembekile kuNkulunkulu. w23.08 11 ¶15-16

Ngenca yekutsi Jehova uyasitsandza, usheshe ayinake indlela lesitiva ngayo futsi ufuna mbamba kusivikela. Uva buhlungu nasiva buhlungu. Ngenca yaloko, singathantaza kuye sitsi: “Ngivikele njengenhlavu yeliso lakho.” (Hla. 17:8) Liso lisheshe litsintseke futsi lililunga lemtimba leliligugu kakhulu. Ngako Jehova nakasicatsanisa nenhlavu yeliso lakhe, kuba shengatsi utsi: ‘Nobe ngubani lonilimatako, bantfu bami, ulimata lokuligugu kimi.’ Jehova ufuna siciniseke kutsi utsandza ngamunye wetfu. Kodvwa uyati kutsi ngenca yetintfo letentekile ekuphileni kwetfu, singahle sitibute kutsi uyasitsandza yini vele. Nobe kungenteka nyalo sibhekene netimo letisivivinyako kutsi siyaciniseka yini vele kutsi Jehova uyasitsandza. Yini lesingayenta kuze siciniseke kakhulu kutsi uyasitsandza? Kufundza indlela lakhombisa ngayo Jesu kutsi uyamtsandza, nalakhombisa ngayo labagcotjiwe kanye nendlela lasikhombisa ngayo kutsi uyasitsandza. w24.01 27 ¶6-7

Ezra bekabonile kutsi Jehova ubasekele njani bantfu bakhe etikhatsini letimatima. Nga-484 B.C.E., kungenteka Ezra bekahlala eBhabhulona ngesikhatsi iNkhosi Ahashiveroshi ikhipha umyalo wekutsi kucotfulwe onkhe emaJuda laseMbusweni wasePheresiya. (Esta 3:7, 13-15) Kuphila kwa-Ezra bekusengotini! Ngesikhatsi akuva loko, emaJuda ‘lakuto tonkhe tifundza’ azila kudla futsi alila. Siyaciniseka nekutsi athantaza kuJehova acela kucondziswa. (Esta 4:3) Cabanga nje kutsi wativa njani Ezra nawo onkhe emaJuda ngesikhatsi tintfo tibashintjela labo lebebakhe licebo lekutsi kubulawe emaJuda! (Esta 9:1, 2) Kungenteka letimo letimatima labhekana nato Ezra tamlungiselela letinye tikhatsi letimatima lebetiseta, futsi kungenteka tamenta wetsemba kakhulu kutsi Jehova angabavikela bantfu bakhe. w23.11 17 ¶12-13

Umphostoli Pawula bekakhuluma “ngekwenta loko lokufunwa ngumtsetfo,” lokungumtsetfo waMosi lowanikwa ema-Israyeli eNtsabeni iSinayi. (Rom. 3:21, 28) Kubonakala shengatsi emaKhristu langemaJuda angesikhatsi saPawula bekakutfola kumatima kwemukela kutsi uMtsetfo waMosi kanye nemisebenti lebeyidzingwa nguloMtsetfo besekungasasebenti. Ngako Pawula wasebentisa sibonelo sa-Abrahama kuze akhombise kutsi umuntfu akudzingeki ente loko “lokufunwa ngumtsetfo” kuze Nkulunkulu atsi ulungile. Kudzingeka abe nekukholwa. Kwati loku kuyasikhutsata ngobe kusenta siciniseke kutsi singaba nebuhlobo lobuhle naNkulunkulu. Kusho kutsi singakwakha kukholwa kuNkulunkulu nakuKhristu, lokungasenta semukelwe nguNkulunkulu. Ngakulolunye luhlangotsi, ‘lemisebenti’ lokukhulunywa ngayo kuJakobe sehluko 2 akusiko kwenta loko “lokufunwa ngumtsetfo” Pawula lakhuluma ngako. Jakobe ukhuluma ngemisebenti nobe loko lokwentiwa ngemaKhristu malanga onkhe. (Jak. 2:24) Lemisebenti ngiyo lekhombisa kutsi umKhristu unekukholwa mbamba yini kuNkulunkulu nobe cha. w23.12 3 ¶8; 4-5 ¶10-11

Bodzadze labafuna kushada kufanele bamkhetse ngekucophelela loyo labatawushada naye. Khumbula, inhloko yakho kutawuba ngulomzalwane lotawushada naye. (Rom. 7:2; Ef. 5:33) Ngako tibute: ‘Ungumzalwane lovutsiwe yini? Tintfo letiphatselene nekukhonta Jehova tita kucala yini ekuphileni kwakhe? Wenta tincumo letihlakaniphile yini? Uyawavuma yini emaphutsa akhe? Uyabahlonipha yini bantfu besifazane? Unawo yini emakhono ladzingekile kuze angisite ngibe nebuhlobo lobuhle naNkulunkulu, anginakekele futsi abe ngumngani lokahle?’ Kuliciniso kutsi nangabe ufuna indvodza lekahle, nawe kufanele ube ngudzadze lokahle. Umfati lokahle ‘ungumsiti nemphelelisi’ wendvodza yakhe. (Gen. 2:18) Ngenca yekutsi utsandza Jehova, wenta konkhe lokusemandleni akhe kuze indvodza yakhe ibe neligama lelihle. (Taga 31:11, 12; 1 Thim. 3:11) Ungatilungiselela kuba ngumfati ngekutsi ukhulise indlela lomtsandza ngayo Jehova nangekutsi usite labanye ekhaya nasebandleni. w23.12 22-23 ¶18-19

Jehova wetsembisa kusipha kuhlakanipha lesikudzingako kuze sente tincumo letikahle. Siyakudzinga kuhlakanipha lokuvela kuNkulunkulu nasenta tincumo letitasitsintsa kuphila kwetfu konkhe. Usiniketa emandla ekucinisela. Jehova utasiniketa emandla ekubeketelela tinkinga tetfu, njengobe enta kumphostoli Pawula. (Fil. 4:13) Loko ukwenta asebentisa nebazalwane betfu nabodzadze. Ngebusuku lobebungaphambi kwekufa kwakhe, Jesu wathantaza ngalokujulile. Wancenga Jehova kutsi angavumi kutsi labanye bacabange kutsi bekangumuntfu lohlambalatako. Kunekutsi Jehova ente njalo, wasita Jesu ngekutsi atfume lenye yetingilosi takhe kuze imcinise. (Luk. 22:42, 43) Natsi Jehova angasisita ngekutsi asebentise bazalwane betfu nabodzadze kutsi basishayele lucingo nobe basivakashele. Sonkhe singawafuna ematfuba ekusho “emavi lamnandzi” kubazalwane betfu.​—Taga 12:25. w23.05 10-11 ¶9-11

Labo labaphelelwe ngumdlandla wekukhonta Nkulunkulu lababakhona eSikhumbutweni kungenteka besabe kutsi angeke bemukelwe kahle. Ngako ungababuti imibuto lengabenta badliwe ngemahloni nobe usho lokutsite lokungabavisa buhlungu. Laba bazalwane betfu nabodzadze. Siyajabula kuphindze sikhonte nabo Nkulunkulu! (Hla. 119:176; Imis. 20:35) Sibonga kakhulu ngekutsi Jesu wasitjela kutsi sikhumbule kufa kwakhe njalo ngemnyaka. Nasikhumbula kufa kwakhe, loko kusita tsine ngetindlela letinyenti kuphindze kusite nalabanye. (Isa. 48:17, 18) Indlela lesimtsandza ngayo Jehova naJesu iyakhula. Sikhombisa kutsi sibonga kakhulu ngaloko labasentele kona. Sicinisa buhlobo betfu nebazalwane betfu nabodzadze. Ngetulu kwaloko, sisita labanye bafundze kutsi yini labangayenta kuze nabo batfole tibusiso letitawuba khona ngenca yenhlawulo. Ngako shengatsi singenta konkhe lokusemandleni etfu kuze silungele Sikhumbuto salomnyaka, lokulilanga lelibaluleke kakhulu emnyakeni! w24.01 14 ¶18-19

Usicondzisa njani Jehova? Ngalokuyinhloko usebentisa liVi lakhe liBhayibheli. Kodvwa uphindze asebentise nebantfu labammelele. Sibonelo nje, usebentisa ‘sisebenti lesetsembekile nalesihlakaniphile’ kuze sisinike imfundvo levela kuye lesisita kutsi sente tincumo letihlakaniphile. (Mat. 24:45) Jehova uphindze asebentise nalamanye emadvodza kuze asicondzise. Sibonelo nje, babonisi betigodzi nalabadzala belibandla bayasikhutsata baphindze basinikete ticondziso letisisita kutsi sibhekane netikhatsi letimatima. Sijabula kakhulu ngaleticondziso lesitetsembako lesititfola kulamalanga ekugcina lamatima! Tisisita kutsi sichubeke semukelwa nguJehova futsi sichubeke sihamba endleleni leholela ekuphileni. Nobe kunjalo, ngaletinye tikhatsi singahle sikutfole kumatima kulandzela sicondziso saJehova, ikakhulukati nasisinikwa bantfu labanesono. Etikhatsini letinjalo, kufanele setsembe mbamba kutsi nguJehova locondzisa bantfu bakhe nekutsi kulandzela ticondziso takhe kuhlale kusisita. w24.02 20 ¶2-3

Indlela lesimtsandza ngayo Nkulunkulu ingachubeka ikhula ngekutsi silifundze ngekutimisela liVi lakhe. Njengobe ufundza liBhayibheli, yetama kubona kutsi livesi ngalinye livetani ngaJehova. Tibute: ‘Lendzaba lengiyifundzako ikhombisa njani kutsi Jehova uyangitsandza? Inginika tiphi tizatfu tekutsandza Jehova?’ Lenye indlela lolungakhula ngayo lutsandvo lwetfu ngaJehova kutsi sihlale sithantaza kuye simtjele loko lokusetinhlitiyweni tetfu. (Hla. 25:4, 5) Jehova utayiphendvula imithantazo yetfu. (1 Joh. 3:21, 22) Kufanele ikhule indlela lesibatsandza ngayo bantfu. Ngemuva kweminyaka umphostoli Pawula aphendvukile, wahlangana nalelinye lijaha lokutsiwa nguThimothi. Thimothi bekamtsandza Jehova futsi abatsandza nebantfu. Pawula watjela baseFiliphi watsi: “Ngite muntfu lonenhlitiyo [lenjengeyaThimothi], lotawunakekela tindzaba tenu ngebucotfo.” (Fil. 2:20) Pawula yamjabulisa indlela Thimothi bekabatsandza ngayo bazalwane bakhe nabodzadze. Siyaciniseka kutsi emabandla bekavakashelwa nguThimothi bekahlale akubuke ngalabovu kuta kwakhe.​—1 Khor. 4:17. w23.07 9 ¶7-10

Mosi wafa ngaphambi kwekutsi ema-Israyeli angene eVeni Lesetsembiso. Besebasele ebaleni yini bantfu baNkulunkulu ngemuva kwekufa kwalendvodza leyetsembekile? Cha. Jehova wabanakekela kuso sonkhe lesikhatsi betsembekile kuye. Ngaphambi kwekutsi Mosi afe, Jehova bekamtjelile kutsi akhetse Joshuwa kuze ahole labantfu. Besekuphele iminyaka Mosi amcecesha. (Eks. 33:11; Dut. 34:9) Ngetulu kwaloko, bekunemadvodza lamanyenti letsembekile lebekahola, lokufaka ekhatsi baholi betinkhulungwane, bemakhulu, bemashumi lasihlanu nebemashumi. (Dut. 1:15) Bantfu baNkulunkulu bebanakekelwa kahle. Kwenteka lokufanako nasendzabeni ya-Elija. Besekuphele iminyaka leminyenti ahola ekukhonteni lokuhlantekile. Kodvwa ngekuhamba kwesikhatsi, Jehova wamnika umsebenti lowehlukile, endzaweni leseningizimu yakaJuda. (2 Khos. 2:1; 2 Khr. 21:12) Besebasele bodvwa yini bantfu labetsembekile kulombuso waka-Israyeli wetive letilishumi? Cha. Besekuphele iminyaka Elija acecesha Elisha. Jehova wachubeka afeza injongo yakhe futsi wanakekela bantfu bakhe labetsembekile. w24.02 5 ¶12

Emakhristu ase-Efesu besekakwemukele kukhanya kweliciniso lelisemiBhalweni. (Hla. 119:105) Labantfu base-Efesu bebashiye imikhuba yenkholo yemanga nekutiphatsa kabi. ‘Balingisa Nkulunkulu’ futsi benta konkhe lokusemandleni abo kuze bamkhonte futsi bamjabulise. (Ef. 5:1) Ngendlela lefanako, natsi besisebumnyameni ngenca yenkholo yemanga nangenca yekutiphatsa kabi ngaphambi kwekutsi sifundze liciniso. Labanye betfu bebagubha imikhosi yenkholo yemanga futsi labanye bebatiphatsa kabi. Kodvwa satsi nasifundza ngetimiso taJehova talokulungile nalokungakalungi, sashintja. Sacala kuphila ngekuvumelana nemitsetfo yakhe yalokulungile. Loko kwente kutsi sitfole tibusiso letinyenti. (Isa. 48:17) Nobe kunjalo, siyachubeka sibhekana netinkinga. Kufanele sichubeke setama kungahlali ebumnyameni lesabushiya kodvwa ‘sichubeke sihamba njengebantfwana bekukhanya.’ w24.03 21 ¶6-7

Kungenteka uve shengatsi usengakakulungeli kutinikela nekubhajatiswa. Kungenteka kusadzingeka wente lushintjo endleleni lophila ngayo kuze ivumelane netimiso taJehova, nobe kungenteka usadzinga sikhatsi lesinyentana sekucinisa kukholwa kwakho. (Khol. 2:6, 7) Akusibo bonkhe bafundzi labatfutfuka ngendlela lefanako, futsi akusibo bonkhe labasebasha labalungela kutinikela nekubhajatiswa nasebafike eminyakeni letsite. Yetama kubona kutsi nguluphi lushintjo lokufanele ulwente bese uyalwenta, futsi ungaticatsanisi nalomunye umuntfu. (Gal. 6:4, 5) Ngisho nobe ubona ngatsi usengakakulungeli kutinikela kuJehova, hlale ukwenta umgomo wakho. Cela Jehova akusite kutsi wente lushintjo loludzingekile ekuphileni kwakho. (Fil. 2:13) Ungaciniseka kutsi utawuva umthantazo wakho futsi awuphendvule.​—1 Joh. 5:14. w24.03 5 ¶9-10

Ngalelinye lilanga Sara bekatfukutsele, futsi wakhiphela intfukutselo yakhe ku-Abrahama, waze wamsola. Abrahama bekati kutsi Sara bekatitfoba kuye futsi amsekela. Wamlalela futsi wetama kucatulula lenkinga. (Gen. 16:5, 6) Yini lesingayifundza? Nine madvodza, ninemsebenti wekwenta tincumo emndenini wenu. (1 Khor. 11:3) Nobe kunjalo, nitawube nikhombisa lutsandvo nangabe nibalalelisisa bafati benu futsi nicabange ngendlela labativa ngayo ngaphambi kwekwenta sincumo, ikakhulukati nangabe sitabatsintsa. (1 Khor. 13:4, 5) Ngalelinye lilanga, Abrahama watikhombisa umusa tivakashi lebekangakatilindzeli. Wacela Sara kutsi ayekele loko bekakwenta futsi alungise tinkhwa letinyenti. (Gen. 18:6) Sara wakwenta ngekushesha loko futsi wasekela sincumo sakhe. Nine bafati, ningamlingisa Sara ngekutsi nisekele tincumo temadvodza enu. Nanenta njalo, nicinisa umshado wenu.​—1 Phet. 3:5, 6. w23.05 24-25 ¶16-17

Ngemuva kwekutsi Gideyoni abekwe kutsi abe sikhulu, kwadzingeka alalele futsi abe nesibindzi. Wanikwa umsebenti loyingoti wekubhidlita li-al’thare laBhali lebelilababe wakhe. (Khu. 6:25, 26) Ngekuhamba kwesikhatsi, ngemuva kwekutsi sekahlanganise libutfo watjelwa kabili kutsi alinciphise. (Khu. 7:2-7) Ekugcineni, watjelwa kutsi aye enkambu yesitsa afike asihlasele ekhatsi nebusuku. (Khu. 7:9-11) Labadzala belibandla kufanele ‘bakulungele kulalela.’ Lomdzala lolalelako uhlale akulungele kutfobela loko lokushiwo yimiBhalo nesicondziso lesivela enhlanganweni yaNkulunkulu. Ngako ubabekela sibonelo lesihle labanye. Kodvwa ngalesinye sikhatsi kungahle kube matima ngalomdzala kutsi alalele. Sibonelo nje, angahle akutfole kumatima kuhambisana neticondziso latitfolako. Kuletinye timo, angahle atibute kutsi sicondziso lesitsite sitawusebentiseka yini vele nobe kutsi sihlakaniphile yini. Nobe angahle acelwe kutsi ente umsebenti longenta aboshwe. Labadzala bangasilingisa njani sibonelo saGideyoni sekulalela etimeni letinjengaleti? Silalelisise sicondziso futsi usisebentise. w23.06 4-5 ¶9-11