April

Bantfu baJehova bangetikhatsi tekubhalwa kweliBhayibheli baba netinkinga labangakatilindzeli. Cabanga ngaJakobe. Babe wakhe wamtjela kutsi atsatse umfati emadvodzakatini aLabani, lebekasihlobo lesikhonta Jehova, futsi wamcinisekisa kutsi Jehova bekatambusisa kakhulu. (Gen. 28:1-4) Ngako Jakobe walalela. Watsatsa luhambo loludze esuka eKhenani waya ekhaya laLabani, lobekanemadvodzakati lamabili, lokunguLeya naRakheli. Jakobe watsandza Rakheli, indvodzakati yaLabani lencane, futsi wavuma kusebentela babe wakhe iminyaka lengu-7 kuze ashade naye. (Gen. 29:18) Kodvwa tintfo atizange tihambe ngendlela lebekacabanga ngayo. Labani wamkhohlisa futsi watikhandza sekashade nendvodzakati yakhe lendzala, lokunguLeya. Labani wavuma kutsi Jakobe ashade naRakheli ngemuva kweliviki, kodvwa nangabe nje atawusebenta leminye iminyaka lengu-7. (Gen. 29:26, 27) Labani akazange atsembeke kuJakobe. Ngetulu kwako konkhe, wamphatsa kabi iminyaka lengu-20!​—Gen. 31:41, 42. w23.04 15 ¶5

Singaya kubani nasidzinga kudvudvutwa nekucondziswa? Siyayati imphendvulo yalombuto. Singaya kuJehova Nkulunkulu ngemthantazo. Nguloko Jehova lafuna kutsi sikwente. Ufuna kutsi ‘sihlale sithantaza.’ (1 Thes. 5:17) Singakhululeka sithantaze kuye futsi simcele asicondzise kuko konkhe kuphila kwetfu. (Taga 3:5, 6) Njengobe Nkulunkulu anesandla lesivulekile, akasibaleli kutsi singathantaza kangakhi kuye. Jesu bekati kutsi imithantazo yetfu ibaluleke kakhulu kuJehova. Kusasele sikhatsi lesidze ngaphambi kwekutsi ete emhlabeni, wambona Babe wakhe aphendvula imithantazo yemadvodza nebafati labetsembekile. Sibonelo nje, Jesu bekaseceleni kwaBabe wakhe ngesikhatsi Jehova aphendvula imithantazo lesuka enhlitiyweni yaHana, yaDavide ya-Elija neyaletinye tikhonti takhe letetsembekile. (1 Sam. 1:10, 11, 20; 1 Khos. 19:4-6; Hla. 32:5) Kungako Jesu afundzisa bafundzi bakhe kutsi bahlale bathantaza futsi loko bakwente ngekuciniseka!​—Mat. 7:7-11. w23.05 2 ¶1, 3

Umphristi Lophakeme Jehoyada bekamesaba Jehova. Loku kwabonakala ngesikhatsi indvodzakati yaJezebeli, lokungu-Athaliya, atsatsa bukhosi bakaJuda ngendlovuyangena. Bekanenhlitiyo lembi futsi bekafuna kubusa kangangekutsi waze wetama kubulala yonkhe intalelwane yasebukhosini, lokubatukulu bakhe! (2 Khr. 22:10, 11) Munye kulabantfwana, lokunguJehowashi, wasindza ngobe umfati waJehoyada, lokunguJehoshabathi, wamsindzisa. Yena nendvodza yakhe bafihla lomntfwana futsi bamnakekela. Ngaleyondlela, yena nemyeni wakhe basita kutsi kuvikelwe luhla lwekutalwa lwemndeni waDavide. Jehoyada beketsembekile kuJehova futsi bekangamesabi Athaliya. Ngesikhatsi Jehowashi sekaneminyaka lengu-7, Jehoyada waphindze wakhombisa kutsi wetsembekile kuJehova. Wakha licebo. Naliphumelela lelicebo, Jehowashi bekatawuba yinkhosi, njengobe bekunguye indlalifa lebekufanele ihlale esihlalweni sebukhosi saDavide. Kodvwa nangabe lelicebo lingaphumeleli, kusenekwenteka Jehoyada bekatawufa. Basitwa nguJehova, lelicebo laphumelela. w23.06 17 ¶12-13

Bekungaba melula ngeNkhosi Nebukhadnezari kutsi itsi Danyela uvukela umbuso futsi imbulale. Nanobe kunjalo, Danyela wakhombisa sibindzi futsi walichaza leliphupho. Yini lokungenteka yasita Danyela kutsi abe nesibindzi kuko konkhe kuphila kwakhe? Ngesikhatsi asemncane, siyaciniseka kutsi wafundza esibonelweni samake wakhe nesababe wakhe. (Dut. 6:6-9) Danyela bekangagcini nje ngekwati tintfo letisisekelo lebetishiwo nguMtsetfo, lokufaka ekhatsi iMitsetfo Lelishumi, kodvwa bekati lokunyenti lokumayelana nekutsi yini umIsrayeli lokufanele akudle nalokungakafaneli akudle. (Lev. 11:4-8; Dan. 1:8, 11-13) Ngetulu kwaloko, Danyela wafundza ngemlandvo webantfu baNkulunkulu futsi bekakwati loko lokwenteka kubo ngesikhatsi bangaphili ngekuvumelana netimiso taJehova. (Dan. 9:10, 11) Tintfo letenteka kuko konkhe kuphila kwakhe tamenta wetsemba kutsi Jehova netingilosi takhe letinemandla bebamsekela.​—Dan. 2:19-24; 10:12, 18, 19. w23.08 3 ¶5-6

Rebheka bekangumfati lohlakaniphile nalowenta tincumo letihlakaniphile, futsi bekati kutsi kunini lakufanele atsatse khona sinyatselo nekutsi ente njani. (Gen. 24:58; 27:5-17) Nobe kunjalo, bekahlonipha futsi atitfoba. (Gen. 24:17, 18, 65) Nangabe nawe usekela nobe nguliphi lilungiselelo laJehova njengaRebheka, utawuba sibonelo lesihle emndenini wakho nasebandleni. Kwati kutsi kunetintfo longeke ukhone kutenta kubuntfu onkhe emaKhristu lokufanele abe nabo. Esta bekanebuntfu lobujabulisa Nkulunkulu, futsi bekati kutsi kunetintfo labengeke akhone kutenta. Loko kwamvikela kutsi angatigcabhi. Walalela seluleko sabhuti wakhe lomdzala, lokunguModekhayi futsi wasisebentisa. (Esta 2:10, 20, 22) Nawe ungakhombisa kutsi uyati kutsi kunetintfo longeke ukhone kutenta ngekutsi ucele seluleko kulabanye futsi usisebentise. (Thit. 2:3-5) Esta wakhombisa nangalenye indlela kutsi uyakwati loko langeke akhone kukwenta. ‘Bekeme kahle futsi amuhle’; kodvwa bekangenti kutsi kunakwe yena.​—Esta 2:7, 15. w23.12 19-20 ¶6-8

Kutiva sinelicala ngalokwecile kungumtfwalo lokungakafaneli siwetfwale. Nase sisivumile sono setfu, saphendvuka futsi senta lokutsite kuze singasiphindzi lesono, singaciniseka kutsi Jehova usicolele. (Imis. 3:19) Nase sikwentile loko, Jehova akafuni kutsi sichubeke sitiva sinelicala. Uyati kutsi kungasilimata kuchubeka sitiva kanjalo. (Hla. 31:10) Nangabe siva buhlungu ngalokwecile, singahle siyekele kuba kulomncintiswano wekuphila. (2 Khor. 2:7) Nangabe uchubeka utiva unelicala ngalokwecile, naka kakhulu kutsi Nkulunkulu “utsetselelana mbamba.” (Hla. 130:4) Naku lakwetsembisako nakacolela labo labaphendvuke mbamba, utsi: ‘Sono sabo angeke ngiphindze ngisikhumbule.’ (Jer. 31:34) Loku kusho kutsi Jehova angeke akujezisele tono lowatenta esikhatsini lesendlulile. Ungatijeziseli emaphutsa lowawenta esikhatsini lesendlulile ngobe loko kungenta kutsi wente lokuncane nyalo emsebentini waNkulunkulu. Jehova akahlali acabanga ngetono takho, futsi nawe kufanele wente lokufanako. w23.08 30-31 ¶14-15

Ngesikhatsi se-COVID-19, BoFakazi BaJehova labalalela sicondziso lesivela enhlanganweni abazange bakhatsateke ngalokungenasidzingo njengalabo labalalela tindzaba letidukisako. (Mat. 24:45) Kufanele sihlale sinake ‘tintfo letibaluleke kakhulu.’ (Fil. 1:9, 10) Tiphatamiso tingatsatsa sikhatsi setfu lesinyenti nemandla etfu bese asisakusebentiseli kwenta tintfo letibalulekile. Tintfo letivamile ekuphileni njengekudla, kunatsa, kutijabulisa nemsebenti wekutiphilisa, kungaba tiphatamiso nasikwenta kute kucala. (Luk. 21:34, 35) Ngetulu kwaloko, onkhe malanga siva tindzaba letinyenti letimayelana nekungevani kwebantfu netindzaba tepolitiki. Kufanele singativumeli letimphikiswano kutsi tisiphazamise. Ngale kwaloko, singacala kutsatsa luhlangotsi etingcondvweni tetfu nasetinhlitiyweni tetfu. Sathane usebentisa tindlela letehlukene kuze ente kube matima kutsi sente lokulungile. w23.07 16-17 ¶12-13

Kubantfu baJehova, Sikhumbuto sekufa kwaKhristu sililanga lelibaluleke kakhulu emnyakeni. Leli kuphela kwelilanga Jesu latjela balandzeli bakhe ngalokucondzile kutsi baligubhe. (Luk. 22:19, 20) Sisikhumbuta ngetindlela lesingakhombisa ngato kutsi siyabonga ngenhlawulo yaJesu. (2 Khor. 5:14, 15) Ngetulu kwaloko, sisinika litfuba ‘lekukhutsatana’ nebazalwane betfu nabodzadze. (Rom. 1:12) Labanye baze bakhutsateke kutsi babuyele kuJehova ngenca yekutsi bemukelwe ngetandla letifutfumele. Ngetulu kwaloko, bantfu labanyenti kuyabajabulisa loko labakubonako nalabakuvako futsi bese bafuna kucala kudadisha liBhayibheli. Cabanga futsi ngendlela Sikhumbuto lesenta ngayo bazalwane nabodzadze kutsi babe nebunye emhlabeni wonkhe. Konkhe loku kwenta kutsi Sikhumbuto sikhetseke kakhulu kitsi! w24.01 8 ¶1-3

Nasichubeka sicabangisisa ngelinani lelakhokhwa nguJehova naJesu, sitawucondza kakhulu kutsi batsandza ngamunye wetfu. (Gal. 2:20) Inhlawulo isipho lesikhombisa kutsi uyasitsandza. Jehova ukhombise kutsi uyasitsandza ngekunikela ngalokuligugu kakhulu kuye, lokunguJesu. Jehova wavumela iNdvodzana yakhe kutsi ihlupheke ngenca yetfu futsi isifele. Jehova akabindzi, kepha uyasitjela kutsi uyasitsandza. (Jer. 31:3) Usidvonsele kuye ngobe uyasitsandza. (Catsanisa naDutheronomi 7:7, 8.) Kute lutfo futsi kute muntfu longasehlukanisa nelutsandvo lwakhe. (Rom. 8:38, 39) Lolutsandvo lukwenta utive njani? w24.01 28 ¶10-11

Liligugu kakhulu litsemba lekuyophila ezulwini kumaKhristu lagcotjiwe. Lomunye wawo, lokunguMzalwane Frederick Franz, washo emavi lasuka enhlitiyweni watsi: “Litsemba letfu liyintfo sibili, litawufezeka kubo bonkhe laba labangu-144 000 ngendlela lemangalisa kakhulu kunaleyo lesiyicabangako.” Nga-1991 uMzalwane Franz watsi: “Solo liligugu [kitsi] lelitsemba. . . . Lichubeka liba ligugu kakhulu njengobe kuphela sikhatsi lesidze solo sililindzile. Asitisoli nakancane ngekuchubeka sililindzile . . . Nyalo liligugu kakhulu kimi lelitsemba letfu kunasesikhatsini lesendlulile.” Ngisho nobe silindzele kuphila phakadze ezulwini nobe emhlabeni, sinelitsemba lelihle lelisenta sijabule. Lelitsemba lingachubeka likhula kakhulu. w23.12 9 ¶6; 10 ¶8

Ngephandle kwelithende lekukhontela bekuneli-al’thare lelitfusi lapho bekunikelwa khona imihlatjelo yetilwane kuJehova. (Eks. 27:1, 2; 40:29) Nobe kunjalo, lemihlatjelo beyingenti kutsi bantfu bacolelwe tono tabo ngalokuphelele. (Heb. 10:1-3) Kuchubeka nekwenta imihlatjelo ethendeni lekukhontela bekumelela umhlatjelo munye lebewutawenta kutsi bantfu bacolelwe ngalokuphelele tono tabo. Jesu bekati kutsi Jehova bekamtfume emhlabeni kuze atonikela ngekuphila kwakhe angumuntfu lote sono kube yinhlawulo yebantfu. (Mat. 20:28) Ngako ngesikhatsi Jesu abhajatiswa, watinikela kuze ente loko bekufunwa nguJehova. (Joh. 6:38; Gal. 1:4) Jesu wanikela ngekuphila kwakhe kwaba “kanye kuphela” kuze kube yinhlawulo nobe kumbonye ngalokuphelele tono tabo bonkhe labakhombisa kutsi bayakholwa kuKhristu.​—Heb. 10:5-7, 10. w23.10 26-27 ¶10-11

Besingeke sikhone kutikhulula esonweni nasekufeni. (Hla. 49:7, 8) Ngako Jehova neNdvodzana yakhe layitsandzako balahlekelwa kakhulu kuze inikele ngekuphila kwayo ngenca yetfu. Nasichubeka sicabangisisa ngaloko Jehova naJesu labakudzela ngenca yetfu sitawubonga kakhulu ngenhlawulo. Ngesikhatsi Adamu ona, walahlekisela yena kanye nabo bonkhe bantfwana bakhe litfuba lekuphila phakadze. Kuze kubhadalwe loko Adamu lakulahla, Jesu wanikela ngekuphila kwakhe lokute sono kwaba ngumhlatjelo. Kuko konkhe kuphila kwakhe alamhlabeni, Jesu “akentanga sono, futsi emlonyeni wakhe akuzange kuphume emanga.” (1 Phet. 2:22) Ngesikhatsi Jesu afa, kuphila kwakhe lokute sono kwalingana ncamashi nekuphila lokwalahlwa ngu-Adamu.​—1 Khor. 15:45; 1 Thim. 2:6. w24.01 10 ¶5-6

Ngemuva kwekuvuswa kwaJesu, wangena eNgcwelengcwele lesethempelini lelingumfanekiso. Kusebaleni kutsi indlela Jehova lasibekele yona yekukhonta lokuhlantekile lesekelwe enhlawulweni yaJesu Khristu nasebuphristini bakhe iphakeme kakhulu. Umphristi lophakeme waka-Israyeli bekangena eNgcwelengcwele leyakhiwe bantfu aphetse ingati yetilwane, kodvwa Jesu wangena “ezulwini lucobo,” lokuyindzawo lengcwele kunato tonkhe kuze eme embikwaJehova. Nakalapho, waletsa kuphila kwakhe angumuntfu lote sono ngenca yetfu “kuze asuse sono ngemhlatjelo wakhe.” (Heb. 9:24-26) Ngisho nobe sinelitsemba lekuphila ezulwini nobe emhlabeni, sonkhe singakhona kukhonta Jehova ethempelini lakhe lelingumfanekiso. w23.10 28 ¶13-14

Cabanga ngemisebenti leyentiwa nguJesu ezulwini njengobe ayiNkhosi yetfu lebusako futsi angumPhristi Lophakeme lovelana natsi. Ngaye siyakhona kusondzela ngemthantazo “esihlalweni sebukhosi [saNkulunkulu] semusa lomkhulu” futsi sicele umusa nelusito “ngesikhatsi lesifanele.” (Heb. 4:14, 15) Shengatsi lingete lashona lilanga singakacabangi ngaloko Jehova naJesu labasentele kona nalabasentela kona. Lutsandvo labasikhombisa lona kufanele lusitsintse ekujuleni kwetinhlitiyo futsi lusente sikhutsale emisebentini lesiyentela Jehova nasekumkhonteni. (2 Khor. 5:14, 15) Lenye indlela lehamba embili lesingakhombisa ngayo kutsi siyabonga kutsi sitimisele kusita labanye babe BoFakazi BaJehova futsi babe bafundzi baJesu. (Mat. 28:19, 20) Nguloko lokwentiwa ngumphostoli Pawula. Bekati kutsi intsandvo yaJehova ikutsi “tonkhe tinhlobo tebantfu tisindziswe, titfole nelwati lolungulonalona lweliciniso.”​—1 Thim. 2:3, 4. w23.10 22-23 ¶13-14

Linyenti letfu livame kuwafundza nalishumayela lamavi ladvudvutako lamayelana nekutsi kutawuba njani kuphila ePharadisi. Yini lengacinisekisa tsine kanye nalabanye kutsi letibusiso lokukhulunywa ngato kuSembulo 21:3, 4 titawugcwaliseka? Jehova usinikete tizatfu letinemandla letisenta siciniseke kutsi utasifeza lesetsembiso. Lamavesi lalandzelako asiniketa tizatfu letisenta siciniseke kutsi Jehova utasifeza setsembiso sakhe seliPharadisi. Atsi: “Loyo lohleti esihlalweni sebukhosi watsi: ‘Ngenta tonkhe tintfo tibe tinsha.’ Waphindze watsi: ‘Bhala ngobe lamavi etsembekile futsi aliciniso.’ Wabuye watsi kimi: ‘Sekwentekile! Mine ngingu-Alfa na-Omega, sicalo nesiphetfo.’”​—Semb. 21:5, 6a. w23.11 3 ¶3-5

Umzalwane losemusha angakhombisa kutsi uyisebentisa kahle ingcondvo ngekutsi ente tincumo letinhle mayelana nekugcoka nekutilungisa. Ngalokuvamile, labo labenta timphahla futsi batikhangise abamhloniphi Jehova. Ngetulu kwaloko, kungenteka baphila imphilo lengcolile. Kucabanga kwabo lokungcolile kubonakala kahle etimphahleni letimpintjanako nobe letenta emadvodza abonakale ngatsi besifazane. Nakakhetsa loko latakugcoka, umzalwane losemusha lofuna kuba ngumKhristu lovutsiwe utawucondziswa timiso teliBhayibheli kanye netibonelo letinhle ebandleni. Angahle atibute: ‘Tincumo tami tiyakhombisa yini kutsi ngibhadlile engcondvweni futsi ngiyabacabangela labanye? Indlela lengigcoka ngayo yenta kube melula yini ngalabanye kutsi betsembe kutsi ngimkhonta mbamba Nkulunkulu?’ (1 Khor. 10:31-33) Umzalwane losemusha losebentisa kahle ingcondvo angeke agcine ngekuhlonishwa bazalwane bakhe nabodzadze kodvwa utawuhlonishwa nanguBabe wakhe losezulwini. w23.12 26 ¶7

Esikhatsini lesendlulile, ‘inkhosi yaseningizimu’ beyibahlasela ngalokucondzile bantfu baJehova. (Dan. 11:40) Sibonelo nje, emkhatsini Wemphi Yelive Yekucala neYesibili, bazalwane labanyenti bavalelwa emajele ngenca yekungalutsatsi luhlangotsi kutepolitiki futsi bantfwana labanyenti baboFakazi bacoshwa etikolweni ngenca yesizatfu lesifanako. Kodvwa eminyakeni yakamuva, kwetsembeka kwebantfu baJehova labahlala emaveni enkhosi yaseningizimu kuvivinywe nangaletinye tindlela letibhacile. Nasi sibonelo, ngetikhatsi tekukhankasela lukhetfo, umKhristu angahle alingeke kutsi asekele licembu lelitsite lepolitiki nobe umholi lotsite. Angahle angayi kuyovota kodvwa atsatse luhlangotsi ngengcondvo nangenhlitiyo. Ngako kubaluleke kakhulu kutsi singalutsatsi luhlangotsi kutepolitiki hhayi nje kuphela ngalesikwentako, kodvwa nangaloko lesikucabangako nendlela lesitiva ngayo!​—Joh. 15:18, 19. w23.08 12 ¶17

Njengobe sigijima kulomncintiswano wekuphila, kufanele ‘sigijime ngendlela letawusenta sitfole umklomelo.’ (1 Khor. 9:24) Jesu watsi ‘singasindvwa kumita, nekudzakwa kanye netinkhatsato tekuphila.’ (Luk. 21:34) Lombhalo kanye naleminye ingakusita kuze ubone lakufanele wente khona lushintjo njengobe usagijima kulomncintiswano wekuphila. Singaciniseka kutsi sitawutfola umklomelo kulomncintiswano wekuphila ngobe Jehova usinika emandla lesiwadzingako. (Isa. 40:29-31) Ngako-ke ungacali wehlise litubane! Lingisa umphostoli Pawula lowagijima ngawo onkhe ematubane akhe kuze atfole umklomelo lebewusembikwakhe. (Fil. 3:13, 14) Kute longakugijimela, kodvwa Jehova angakusita kutsi ufike entsanjeni. Jehova angakusita kutsi utfwale imitfwalo yakho uphindze ulahle imitfwalo lengakadzingeki. Ngekusitwa nguye, utawukhona kucinisela njengobe ugijima kulomncintiswano futsi utfole umklomelo! w23.08 31 ¶16-17

Ngesikhatsi Jesu aneminyaka lengu-12, batali bakhe bamshiya eJerusalema. (Luk. 2:46-52) Bekungumsebenti waJosefa naMariya kucinisekisa kutsi bonkhe bantfwana babo bakulelicembu lebelibuyela ekhaya lisuka kulomkhosi. Ngesikhatsi boJosefa naMariya batfola Jesu, Mariya wamsola ngekutsi ubasebentise kamatima! Jesu bekangabatjela kutsi bete sizatfu lesiphatsekako sekumsola. Kunekutsi ente njalo, wabaphendvula ngenhlonipho. Kodvwa boJosefa naMariya, “abazange bakucondze loko lebekakusho.” Nanobe kunjalo, Jesu “wachubeka abalalela.” Nine labasha, nihle nikutfola kumatima yini kulalela batali benu nabenta emaphutsa nobe nabanganicondzisisi? Yini lenganisita? Cabangani ngendlela Jehova lativa ngayo. LiBhayibheli litsi nanilalela batali benu, “loku kuyayijabulisa iNkhosi.” (Khol. 3:20) Jehova uyabona nangabe batali benu banganicondzisisi nobe nabashaya imitsetfo lokumatima kuyilalela. Kodvwa niyamjabulisa nanibalalela ngetulu kwako konkhe loku. w23.10 7 ¶5-6

Lofundza naye angahle atsi BoFakazi BaJehova kufanele bashintje umbono wabo ngebutabani. Kungahle kudzingeke simcinisekise ngekutsi siyalihlonipha lilungelo lebantfu lekutentela tincumo. (1 Phet. 2:17) Singabese siyamchazela kutsi kusita ngani kuphila ngetimiso teliBhayibheli. Nangabe sihlangana nemuntfu longavumelani mbamba natsi ngendzaba letsite, akukafaneli sisheshe sicabange kutsi siyati kutsi ukholelwani. Sibonelo nje, ase sitsi lofundza naye utsi akusiko kuhlakanipha kukholelwa kuNkulunkulu. Loko kusho kutsi kufanele sicabange kutsi ukholelwa ekutigucukeleni kwemvelo yini futsi wati lokunyenti ngako? Ecinisweni, kusenekwenteka akacabangisisi kangako ngalendzaba. Ungahle umkhombise tintfo letikhuluma ngendalo letitfolakala ku jw.org. Ngekuhamba kwesikhatsi angahle avume kutsi nicoce ngesihloko nobe i-video letfolakala lapho. Nangabe simphendvula ngendlela lenenhlonipho, lomuntfu angahle ashintje ingcondvo. w23.09 17 ¶12-13

Singaciniseka kutsi Jehova utasisebentisa futsi asibusise ngisho nobe sente emaphutsa, nangabe nje senta konkhe lesingakwenta kuze silungise emaphutsa etfu futsi sichubeke setsembela kuye. (Taga 28:13) Samsoni bekanesono, kepha akazange ayekele kwetama kukhonta Jehova, ngisho nangetulu kwekwenta liphutsa nakutiwa endzabeni yaDelila. Ngetulu kwaloko, Jehova akazange amlahle. Nkulunkulu waphindze wamsebentisa ngendlela lemangalisako. Jehova bekambona njengendvodza lenekukholwa lokucinile, kangangekutsi wenta kutsi ligama lakhe libhalwe KubaseHebheru sehluko 11 nakubalwa bantfu labetsembekile. Kusikhutsata kakhulu kwati kutsi sikhonta Babe losezulwini lositsandzako, lokufuna mbamba kusicinisa, ikakhulukati nasibutsakatsaka! Ngako njengaSamsoni, natsi singancenga Jehova sitsi: “Ngicela ungikhumbule, futsi ngicela ungicinise.”​—Khu. 16:28. w23.09 7 ¶18-19

Njengobe sibona kutsi lilanga laJehova lisondzela ngekushesha, sifuna kwenta konkhe lesingakwenta kuze sitjele labanye tindzaba letimnandzi. Kodvwa ngalesinye sikhatsi singahle sesabe kukwenta loko. Leni? Ngenca yekutsi sesaba bantfu. Nguloko lokwenteka kuPhetro. Ngebusuku lokwatekwa ngabo licala laJesu, Phetro wesaba kutiveta kutsi ungumlandzeli waJesu, waze waphika ngalokuphindzaphindziwe kutsi uyamati. (Mat. 26:69-75) Nobe kunjalo, ngekuhamba kwesikhatsi, yena kanye lomphostoli washo ngesibindzi watsi: “Ningakwesabi loko labakwesabako, futsi ningaphatamiseki.” (1 Phet. 3:14) Emavi aPhetro ayasicinisekisa kutsi singakhona kuncoba kwesaba bantfu. Yini lengasisita kutsi sincobe kwesaba bantfu? Phetro watsi: “Ngcwelisani Khristu njengeNkhosi etinhlitiyweni tenu.” (1 Phet. 3:15) Loku kufaka ekhatsi kutikhumbuta kutsi Khristu Jesu uyiNkhosi yetfu nekutsi unemandla lamakhulu. w23.09 27-28 ¶6-8

Kufanele sichubeke silwisana ‘nemisebenti yebumnyama lengasiti ngalutfo.’ (Ef. 5:11) Bufakazi bukhombisa kutsi nangabe umuntfu achubeka abuka, alalela nobe akhuluma ngetintfo letingcolile nobe letinekutiphatsa lokubi, manyenti ematfuba ekutsi agcine ente lokubi. (Gen. 3:6; Jak. 1:14, 15) Live laSathane letama kusiyenga kutsi sikholelwe kutsi akusikubi loko Jehova latsi kukutiphatsa kabi futsi kungcolile. (2 Phet. 2:19) Kusukela kadzeni, Develi bekasebentisa lichinga lekudida bantfu kuze bangakhoni kubona kutsi yini lelungile nalengakalungi. (Isa. 5:20; 2 Khor. 4:4) Kungako ema-movie lamanyenti, tinhlelo te-TV kanye nema-website kukhutsata tintfo letiphambene netimiso taJehova letilungile! Sathane wetama kusiyenga kuze sicabange kutsi kwenta tintfo letingcolile nekutiphatsa kabi kuyemukeleka, kumnandzi futsi akusiyo ingoti.​—Ef. 5:6. w24.03 22 ¶8-10

Lithende lekukhontela belakhiwe lafana nelithende futsi ema-Israyeli bekaletfwala nakasuka kulenye indzawo aya kulenye. Alisebentisa iminyaka lengaba ngu-500 kwaze kwaba ngulapho kwakhiwa lithempeli eJerusalema. (Eks. 25:8, 9; Num. 9:22) Lelithende beliba semkhatsini wema-Israyeli kuze akhone kwentela khona imihlatjelo futsi akhontele kulo. (Eks. 29:43-46) Nobe kunjalo, lelithende lekukhontela beliphindze limelele lokutsite lokukhulu kakhulu. ‘Belisitfunti setintfo tasezulwini,’ futsi belifanekisela lithempeli lelikhulu laJehova lelingumfanekiso. Umphostoli Pawula watsi “lelithende lingumfanekiso lomayelana nalesikhatsi sanyalo.” (Heb. 9:9) Ngako ngesikhatsi abhalela emaHebheru, lelithempeli lelingumfanekiso beselikhona. Lacala kuba khona nga-29 C.E. Ngaloyo mnyaka, Jesu wabhajatiswa, futsi wacala kuba ‘ngumphristi lophakeme kakhulu’ kulelithempeli lelingumfanekiso.​—Heb. 4:14; Imis. 10:37, 38. w23.10 25-26 ¶6-7

Kuze sichubeke sikhonta Jehova sijabulile, natsi kufanele sivumelane netimo nasibhekana nebulukhuni ekuphileni. Kanjani? Ngekutsi sivumelane netimo natishintja futsi sihloniphe imibono yalabanye netincumo tabo. Njengobe sibantfu baJehova, sifuna kucabangela. Sifuna nekutfobeka futsi sibe nemusa. Jehova ubitwa ngekutsi “uLidvwala” ngobe ucinile futsi akanyakatiswa. (Dut. 32:4) Nanobe kunjalo, uphindze acabangele. Njengobe tintfo tishintja emhlabeni, Nkulunkulu wetfu uyachubeka nekuvumelana netimo kuze afeze injongo yakhe. Jehova wadala bantfu ngemfanekiso wakhe, baba nelikhono lekuvumelana netimo letishintjako. Usinikete timiso leticacile eBhayibhelini letisisita kutsi sente tincumo letihlakaniphile ngisho singabhekana natiphi tinkinga. Sibonelo saJehova netimiso takhe kusiniketa bufakazi bekutsi nanobe ‘aLidvwala,’ kodvwa uphindze acabangele. w23.07 20 ¶1-3

EBhayibhelini, Jehova utifananisa namake lonelutsandvo. (Isa. 66:12, 13) Cabanga ngamake lonakekela luswane lwakhe ngelutsandvo, wenta konkhe langakwenta kuze lutfole loko lelikudzingako. Nangabe siva buhlungu, singaciniseka kutsi Jehova uyasitsandza. Akasilahli nangabe senta intfo lembi. (Hla. 103:8) Sive sema-Israyeli samdvumata tikhatsi letinyenti Jehova; nobe kunjalo, ngesikhatsi bantfu bakhe baphendvuka, wabacinisekisa ngelutsandvo lwakhe lolungapheli, watsi: “Ube ligugu emehlweni ami, uhlonishiwe futsi ngikutsandzile.” (Isa. 43:4, 5) Lutsandvo lwaNkulunkulu alukashintji. Ngisho nobe sente emaphutsa lamakhulu, Jehova akasilahli, nasiphendvuka futsi sibuyela kuye, sitalukhandza solo lunjalo lutsandvo lwakhe. Wetsembisa kutsi ‘utasitsetselela ngekukhululeka lokukhulu.’ (Isa. 55:7) LiBhayibheli litsi kucolelwa nguye kutawenta sitfole “sikhatsi sekuvuseleleka lesivela kuJehova.”​—Imis. 3:19. w24.01 27 ¶4-5

Jehova angasisita nasibhekene nesimo lesimatima. Sibonelo nje, nangabe sicela sikhatsi kumcashi kuze siye emhlanganweni wesifundza, nobe sicela ashintje sikhatsi lesisisebentako kuze siye kuyo yonkhe imihlangano yelibandla, sisuke sivula litfuba lekubona sandla saJehova ekuphileni kwetfu. Kungasimangalisa loko lokungenteka, futsi loko kungasenta simetsembe kakhulu Jehova. Ezra watitfoba futsi wathantaza kuJehova acela lusito. Njalo nakakhatsatekile ngemisebenti yakhe, Ezra bekatitfoba futsi athantaze kuJehova. (Ezra 8:21-23; 9:3-5) Ngenca yekutsi Ezra beketsembela kuJehova, labo lebekanabo bebakulungele kumsekela futsi balingisa kukholwa kwakhe. (Ezra 10:1-4) Nangabe natsi sikhatsateke ngekutsi sitawutinakekela njani tidzingo tetfu nobe nasikhatsateke ngekuphepha kwemndeni wetfu, kufanele sithantaze kuJehova. w23.11 18 ¶15-17

Jehova akasho kutsi nangabe sifuna kutsiwe silungile kufanele sikwente ncamashi loko lokwentiwa ngu-Abrahama. Ecinisweni, tinyenti tindlela lesingakukhombisa ngato kukholwa kwetfu. Singabemukela labo labasandza kucala kuta emihlanganweni yelibandla, sisite bazalwane nabodzadze labadzinga lusito futsi siwentele lokuhle emalunga emindeni yetfu, lokutintfo letitawemukelwa nguNkulunkulu futsi asibusise ngenca yato. (Rom. 15:7; 1 Thim. 5:4, 8; 1 Joh. 3:18) Umsebenti lobaluleke kakhulu lesingakhombisa ngawo kutsi sinekukholwa kutsi siwente ngekutimisela umsebenti wekushumayela. (1 Thim. 4:16) Sonkhe singakhombisa ngaloko lesikwentako kutsi siyakholwa kutsi Jehova utawutifeza tetsembiso takhe nekutsi indlela yakhe yekwenta tintfo incono kakhulu. Nasenta njalo, singaciniseka kutsi Nkulunkulu utawutsi silungile futsi utawusibita ngekutsi sibangani bakhe. w23.12 2 ¶3; 6 ¶15

Naseyitawufa, iNkhosi Davide yatjela Solomoni lamavi langenhla. (1 Khos. 2:1, 3) Onkhe emadvodza langemaKhristu enta kahle ngekusebentisa leseluleko. Kuze akhone kwenta njalo, kufanele alalele imitsetfo yaNkulunkulu futsi asebentise timiso letiseBhayibhelini kuko konkhe kuphila kwawo. (Luk. 2:52) Kubaluleke ngani kutsi bazalwane labasebasha babe ngemaKhristu lavutsiwe? Indvodza lengumKhristu inemisebenti leminyenti lebalulekile emndenini nasebandleni. Kungenteka nine bazalwane labasebasha nike nacabanga ngemisebenti lokungenteka nibe nayo esikhatsini lesitako. Kungenteka ninemgomo wekuba tisebenti tasikhatsi sonkhe, wekuba yinceku lesebentako futsi ngekuhamba kwesikhatsi nibe ngulabadzala belibandla. Kungenteka futsi nishade nibe nebantfwana. (Ef. 6:4; 1 Thim. 3:1) Kuze niyifinyelele lemigomo futsi niphumelele, kufanele nibe ngemaKhristu lavutsiwe. w23.12 24 ¶1-2

Labadzala belibandla baniketwe umsebenti wekunakekela timvu taJehova letiligugu. Ubalulekile kubo lomsebenti wekunakekela bazalwane babo nabodzadze futsi basebenta kamatima kuze babe ‘belusi labelusako.’ (Jer. 23:4; 1 Phet. 5:2) Sijabula kakhulu ngekuba nalamadvodza emabandleni lesikuwo! Labadzala belibandla bangafundza esibonelweni saGideyoni lebekaSikhulu. (Heb. 6:12) Bekavikela bantfu baNkulunkulu futsi abelusa. (Khu. 2:16; 1 Khr. 17:6) NjengaGideyoni, labadzala belibandla banikwe umsebenti wekunakekela bantfu baNkulunkulu kulesikhatsi lesimatima. (Imis. 20:28; 2 Thim. 3:1) Singafundza endleleni Gideyoni bekalinganisela ngayo, atfobekile futsi alalela. Kubeketela kwakhe kwavivinyeka kuso sonkhe lesikhatsi enta umsebenti wakhe. Ngisho nobe singulabadzala belibandla nobe singasibo, sonkhe singatifundzisa kubonga ngemsebenti lomuhle lowentiwa ngulabazalwane. Singabasekela labazalwane labasebenta kamatima kuze basinakekele.​—Heb. 13:17. w23.06 2 ¶1; 3 ¶3