May

EmaKhristu ekucala atsintseka ngesikhatsi indlala ihlasela ‘umhlaba wonkhe.’ Siyaciniseka kutsi tinhloko temindeni betikhatsateka ngekutsi titayondla njani imindeni yato. Yini leyenteka ngebantfu labasha lebebahlele kwenta lokunyenti emsebentini wekushumayela? Kusenekwenteka yini kutsi batitjela kutsi asebeme kancane size sibe ncono lesimo? Kunobe ngusiphi simo lebekakuso, lamaKhristu akhona kuvumelana naso. Achubeka ashumayela nganobe nguyiphi indlela lebekangakhona ngayo futsi bekakujabulela kuhlephulelana nebazalwane bawo nabodzadze baseJudiya loko lebekanako. (Imis. 11:29, 30) Lawo lemukela tintfo lebekatidzinga abona kutsi Jehova bekawasita. (Mat. 6:31-33) Kusenekwenteka ativa asondzelene kakhulu nebazalwane bawo nabodzadze labawasita. Ngetulu kwaloko, lawo lanikela nobe lasita nangaletinye tindlela aba nenjabulo letfolakala ngekupha.​—Imis. 20:35. w23.04 16 ¶12-13

Ngaletinye tikhatsi, Jehova uphendvula imithantazo yebantfu bakhe ngekutsi ente labo labangamkhonti babasite. Sibonelo nje, wenta iNkhosi Athazeksesi kutsi ivumele Nehemiya abuyele eJerusalema ayosita ekwakheni kabusha lelidolobha. (Neh. 2:3-6) Nalamuhla, Jehova angenta labo labangamkhonti kutsi basisite nangabe sidzinga lusito. Akukavami kutsi imithantazo yetfu iphendvulwe ngendlela lemangalisako. Kodvwa timphendvulo lesititfolako tiba nguloko kanye lebesikudzinga kuze sihlale setsembekile kuBabe wetfu wasezulwini. Ngako hlale ubuka kutsi Jehova uyiphendvula njani imithantazo yakho. Ubohle uma futsi ucabange ngendlela Jehova layiphendvula ngayo imithantazo yakho. (Hla. 66:19, 20) Asigcini nje kukhombisa kukholwa ngekutsi sithantaze kuJehova kodvwa sikukhombisa nangekutsi semukele nobe nguyiphi indlela imithantazo yetfu lephendvulwa ngayo.​—Heb. 11:6. w23.05 11 ¶13; 12 ¶15-16

Ngesikhatsi sitinikela kuJehova, safunga kutsi sitamkhonta futsi sente intsandvo yakhe. Kufanele sisigcine lesifungo. Akusiwo umtfwalo. Ngetulu kwako konkhe, Jehova wasidala kutsi sente intsandvo yakhe. (Semb. 4:11) Wasidala saba nesifiso sekumati nesekumkhonta futsi wasidala ngemfanekiso wakhe. Ngenca yaloko, siyakhona kusondzelana naye futsi sijabule ngekwenta intsandvo yakhe. Ngetulu kwaloko, nangabe senta intsandvo yaNkulunkulu futsi silingisa iNdvodzana yakhe ‘sititfolela kuphumula.’ (Mat. 11:28-30) Ngako, khulisa indlela lomtsandza ngayo Jehova. Loku ungakwenta ngekutsi ucabangisise ngako konkhe lokuhle lakwentele kona kanye netibusiso lakubekele tona. Nawuchubeka umtsandza Nkulunkulu, kutawuba melula kutsi umlalele. (1 Joh. 5:3) Jesu waphumelela kwenta intsandvo yaNkulunkulu ngobe bekathantaza kuJehova acela kutsi amsite futsi wachubeka anake umvuzo wakhe. (Heb. 5:7; 12:2) NjengaJesu, thantaza kuJehova ucele emandla futsi uhlale ucabanga ngekuphila lokuphakadze. w23.08 27-28 ¶4-5

Sonkhe siyabatsandza bantfu lababeketelako. Sisho ngani? Siyabahlonipha labo labakhonako kulindza lokutsite babe bangatfukutseli. Siyajabula ngekutsi labanye bayasibeketelela nasenta emaphutsa. Ngetulu kwaloko, siyajabula kutsi loyo lowadadisha natsi liBhayibheli wasibeketelela ngesikhatsi sisetama kufundza timfundziso teliBhayibheli, kutemukela nekutisebentisa. Ngetulu kwako konkhe, sijabula kakhulu ngekutsi Jehova Nkulunkulu uyasibeketelela! Nanobe sibatsandza bantfu lababeketelako, singahle sikutfole kumatima kubeketela. Sibonelo nje, singahle sikutfole kumatima kuba nemoya lophansi nangabe sideleze elayinini lelidze kantsi sijakile. Singahle sikutfole kumatima kutibamba nangabe labanye basitfukutselisa. Ngaletinye tikhatsi singahle sikutfole kumatima kuchubeka silindzele live lelisha Jehova lasetsembise lona. Kodvwa, kuto tonkhe letimo, kufanele sibeketele kakhudlwana. w23.08 20 ¶1-2

Jehova watjela Gideyoni kutsi ajikise cishe onkhe emasotja akhe. Kungenteka Gideyoni wacabanga: ‘Luyadzingeka yini vele lolushintjo? Lendlela itawusebenta yini?’ Nobe kunjalo, Gideyoni walalela. Labadzala lamuhla balingisa Gideyoni ngekutsi balandzele sicondziso senhlangano nayenta lushintjo. (Heb. 13:17) Gideyoni walalela Jehova nanobe bekesaba futsi lomsebenti uyingoti. (Khu. 9:17) Ngemuva kwekucinisekiswa nguJehova, Gideyoni wabese uciniseka ngalokuphelele kutsi Nkulunkulu bekatamsita njengobe avikela bantfu bakhe. Labadzala belibandla labahlala etindzaweni lapho umsebenti wetfu uvinjelwe khona balingisa Gideyoni. Ngesibindzi, bayahola emhlanganweni welibandla nasemsebentini wekushumayela nanobe basongelwa ngekuboshwa, ngekuphenywa ngemibuto, ngekuphelelwa ngumsebenti nobe ngebudlova. Ngesikhatsi sekuhlupheka lokukhulu, kutawudzingeka labadzala babe nesibindzi sekulalela ticondziso labatawutitfola ngisho nobe loko kungaba yingoti kanganani. w23.06 5-6 ¶12-13

Jehova wenta kutsi tento letinhle letentiwa nguMphristi Lophakeme Jehoyada tibhalwe kuze sisitakale nasitifundza. (Rom. 15:4) Ngesikhatsi Jehoyada afa, wahlonishwa ngendlela lekhetsekile ngobe bamngcwaba “eDolobheni laDavide lapho kwangcwatjwa khona emakhosi ngenca yebuhle labekabentile ka-Israyeli, abentela Nkulunkulu weliciniso kanye nendlu yaNkulunkulu.” (2 Khr. 24:15, 16) Indzaba yaJehoyada ingasisita sonkhe kutsi sifundze kwesaba Nkulunkulu. Labadzala belibandla bangamlingisa Jehoyada ngekutsi bahlale baphapheme futsi bavikele umhlambi waNkulunkulu ngekwetsembeka. (Imis. 20:28) Lasebakhulile bangafundza kuJehoyada kutsi nangabe besaba Jehova futsi bahlale betsembekile kuye angabasebentisa kuze bafeze injongo yakhe. Labasebasha bangayinaka indlela Jehova lamphatsa ngayo Jehoyada futsi bamlingise ngekutsi bahloniphe lasebakhulile, ikakhulukati labo lesebanesikhatsi lesidze bakhonta Jehova ngekwetsembeka. (Taga 16:31) Shengatsi singabasekela ngekwetsembeka labo “labasiholako” ngekutsi sibahloniphe.​—Heb. 13:17. w23.06 17 ¶14-15

Nawusemihlanganweni, sebentisa kuhlakanipha nawuncuma kutsi utawuphakamisa kangakhi. Nangabe siphakamisa tikhatsi letinyenti singahle sente umchubi ative acindzetelekile kutsi asikhombe tikhatsi letinyenti ngisho nobe labanye basengakalitfoli litfuba lekuphendvula. Loku kungenta labanye kutsi bangasaphakamisi. (Shu. 3:7) Nangabe babanyenti bamemeteli labaphakamisile nakuchubeka sifundvo, kungenteka singakhoni kuphendvula kanyenti njengobe sifisile. Ngaletinye tikhatsi, umchubi kungenteka angasikhombi kwasanhlobo. Loko kungasidvumata, kodvwa kufanele setame kutsi singakufaki enhlitiyweni. (Shu. 7:9) Nangabe ungakhoni kuphendvula kanyenti njengobe ufisile, ungabalalelisisa labanye nabaphendvula bese ngemuva kwemihlangano uyababonga ngetimphendvulo tabo. Loko kungabakhutsata bazalwane bakho nabodzadze njengobe betitabakhutsata netimphendvulo takho kube ulitfolile litfuba lekutisho. w23.04 23-24 ¶14-16

Dadisha liVi laNkulunkulu futsi ucabangisise ngalokufundza kulo. Njengobe sihlahla singema sicine nangabe sinetimphandze letishonako, natsi singema sicine nangabe kukholwa kwetfu kusekelwe ngalokucinile eVini laNkulunkulu. Njengobe sihlahla sikhula, timphandze taso tishona kakhulu futsi tenabe. Nasidadisha futsi sicabangisisa ngaloko lesikufundzako, sicinisa kukholwa kwetfu futsi siciniseke kakhulu kutsi tindlela taJehova tincono kakhulu. (Khol. 2:6, 7) Cabanga ngekutsi imiyalo yaJehova, ticondziso takhe, nesivikelo sakhe, kutisite njani tikhonti takhe esikhatsini lesendlulile. Sibonelo nje, Hezekeli, wanakisisa ngesikhatsi ingilosi ikala ngekucophelela lithempeli lalibona embonweni. Lombono wamcinisa Hezekeli futsi natsi uyasifundzisa kutsi singatilalela njani timiso taJehova letimayelana nekukhonta lokuhlantekile. (Hez. 40:1-4; 43:10-12) Natsi siyasitakala nasitinika sikhatsi sekudadisha tintfo letijulile letiseVini laNkulunkulu futsi sicabangisise ngato. Natsi singaba nenhlitiyo lengangabati, setsembele ngalokuphelele kuJehova.​—Hla. 112:7. w23.07 18 ¶15-16

LiBhayibheli linetibonelo letinhle tebantfu labanyenti bazalwane labasebasha labangabalingisa. Lamadvodza asesikhatsini lesendlulile bekamtsandza Nkulunkulu futsi anemisebenti leminyenti lebekayenta kuze anakekele bantfu bakhe. Nawe ungatfola tibonelo letinhle emkhatsini wemadvodza lavutsiwe langemaKhristu emndenini wakini nasebandleni. (Heb. 13:7) Ngetulu kwaloko unesibonelo lesihle kakhulu saJesu Khristu. (1 Phet. 2:21) Njengobe uchubeka udadisha letibonelo, cabanga ngebuntfu babo lobuhle. (Heb. 12:1, 2) Ngemuva kwaloko cabanga ngekutsi utabalingisa njani. Indvodza lenelikhono lekusebentisa kahle ingcondvo iyacabangisisa ngaphambi kwekutsi yente lokutsite. Ngako timisele kuba nalelikhono futsi ulibambisise. Cala ngekufundza timiso teliBhayibheli futsi ucabange ngekutsi tizuzisa ngani. Ngemuva kwaloko, tisebentise kuze wente tincumo letitawujabulisa Jehova. (Hla. 119:9) Loko kutakusita kakhulu kutsi ube ngumKhristu lovutsiwe.​—Taga 2:11, 12; Heb. 5:14. w23.12 24-25 ¶4-5

Batali bangabafundzisa ngendlela lephumelelako bantfwana babo kutsi bangaphendvula njani ngemoya lophansi nabaphikiswa ngetinkholelo tabo. (Jak. 3:13) Ekukhonteni kwemndeni, labanye batali baphrakthiza nebantfwana babo. Bacabanga ngetintfo letingahle tenteke esikolweni, bacoce ngekutsi bangaphendvula njani baphindze bakuphrakthize, futsi bafundzisa bantfwana babo kutsi bangaphendvula njani ngemoya lophansi nangendlela lekahle. Kuphrakthiza kungasita labasebasha kutsi baticinisekise bona ngaloko labakukholelwako futsi bakhone kukuchazela labanye. Luchungechunge loluku jw.org lolutsi “Young People Ask” lunetikhala lapho bangabhala khona labasebasha. Tentelwe kusita labasebasha kutsi baciniseke ngalabakukholelwako futsi bakhone kuphendvula ngemavi abo. Nangabe nidadisha loluchungechunge njengemndeni, nonkhe nitawukhona kumelela kukholwa kwenu ngemoya lophansi nangendlela lekahle. w23.09 17 ¶10; 18 ¶15-16

Ukile yini watibekela umgomo ekukhonteni Nkulunkulu kodvwa kwaba matima kuwufinyelela? Nangabe kunjalo, awusiwedvwa. Sibonelo nje, Philip bekafuna kutfutfukisa imithantazo yakhe kanye nemahlandla lathantaza ngawo, kodvwa bekakutfola kumatima kutfola sikhatsi sekuthantaza. Erika bekatibekele umgomo wekusheshe afike emhlanganweni wangaphambi kwekuyoshumayela, kodvwa bekavame kuphuta kufika. Nangabe unemgomo losengakawufinyeleli, ciniseka kutsi awusiso sehluleki. Ngisho nekufinyelela umgomo lomncane kuvame kudzinga sikhatsi nemetamo. Lokutsi nje uyafuna kufinyelela umgomo wakho kuyakhombisa kutsi ubutsatsa njengalobuligugu buhlobo bakho naJehova futsi ufuna kumniketa lokuncono kakhulu. Jehova uyajabula ngemetamo yakho. Kuliciniso kutsi akalindzeli kutsi wente lokungetulu kwaloko longakhona kukwenta. (Hla. 103:14; Mik. 6:8) Ngako tibekele umgomo lotawukhona kuwufinyelela, kuye ngetimo takho. w23.05 26 ¶1-2

Bantfu labanesibindzi bangahle besabe, kodvwa abakuvumeli loko kutsi kubavimbele kutsi bente lokulungile. Danyela abelijaha lebelinesibindzi kakhulu. Wadadisha loko lebekubhalwe baphrofethi baNkulunkulu, lebekufaka ekhatsi tiphrofetho taJeremiya. Kuloko lakufundza, wabese uyabona kutsi lesikhatsi lesidze sekutfunjwa kwemaJuda eBhabhulona besitawuphela ngekushesha. (Dan. 9:2) Kubona letiphrofetho teliBhayibheli tigcwaliseka kwamenta wametsemba kakhulu Jehova, futsi labo labametsemba kakhulu Nkulunkulu nabo bangaba nesibindzi lesimangalisako. (Catsanisa naKubaseRoma 8:32, 37-39.) Lokubaluleke kakhulu kutsi Danyela bekavame kuthantaza kuBabe wakhe wasezulwini. (Dan. 6:10) Bekavuma tono takhe kuJehova futsi amtjele indlela lativa ngayo. Bekamcela nekutsi amsite. (Dan. 9:4, 5, 19) Danyela bekangumuntfu njengatsi, ngako akatalwanga anesibindzi. Kunaloko, wafundza kuba naso ngekutsi adadishe, athantaze futsi ametsembe Jehova. w23.08 3 ¶4; 4 ¶7

Nasilalela tiphatsimandla, loko kusita tsine nalabanye. Njani? Kwenta kutsi singasitfoli sijeziso lesitfolwa ngulabo labangalaleli umtsetfo. (Rom. 13:1, 4) Nangabe silalela, tiphatsimandla titawubona kutsi BoFakazi BaJehova bayalalela. Nasi sibonelo, eminyakeni leminyenti leyendlulile eNigeria, emasotja angena eHholweni leMbuso ngesikhatsi kuchubeka imihlangano, afuna labo labangafuni kubhadala imitselo. Indvuna yawo yawatjela kutsi ahambe, yatsi: “BoFakazi BaJehova bayawubhadala umtselo.” Ngaso sonkhe sikhatsi nawulalela umtsetfo, usuke wenta kutsi bantfu baJehova babe neligama lelihle, lokuligama lelingavikela bazalwane bakho nabodzadze ngalelinye lilanga. w23.10 9 ¶13

Sekuphele sikhatsi lesidze letinye tikhonti taJehova tilindzele kuphela kwalelive lelibi. Ngekubuka kwemuntfu, kungabonakala shengatsi sekwephutile kugcwaliseka kwalesetsembiso saNkulunkulu. Kodvwa Jehova uyati kutsi tikhonti takhe titiva njani. Ecinisweni, wacinisekisa umphrofethi Habakhuki watsi: “Kunesikhatsi lesibekiwe salombono kutsi ugcwaliseke, lesikhatsi sitawufika ngekushesha, futsi lombono angeke ube ngemanga. Ngisho nobe ungephuta, chubeka uwulindzele! Ngobe nakanjani utawugcwaliseka. Angeke wephute!” (Hab. 2:3) Loko Nkulunkulu lakutjela Habakhuki kwasita yena kuphela yini? Nobe lamavi aNkulunkulu asho lokutsite kitsi lamuhla? Aphefumulelwe, umphostoli Pawula wasebentisa lamavi kumaKhristu lakulindzele ngalabovu kufika kwelive lelisha. (Heb. 10:37) Ngako, singaciniseka kutsi ngisho nobe kungabonakala ngatsi sekwephutile kukhululwa kwetfu, kodvwa nakanjani kutawenteka. ‘Angeke kwephute!’ w23.04 30 ¶16

Ema-Israyeli lamanyenti awazange abemukele bufakazi lobusebaleni bekutsi Jehova bekasebentisa Mosi kuze ammelele. (Num. 14:10, 11) Ala tikhatsi letinyenti kwemukela kutsi Jehova bekasebentisa Mosi kuze awacondzise. Ngenca yaloko, leso situkulwane sema-Israyeli asizange sivunyelwe kutsi singene eVeni Lesetsembiso. (Num. 14:30) Nobe kunjalo, lamanye ema-Israyeli asilandzela sicondziso saJehova. Sibonelo nje, Jehova watsi: “Khalebi . . . wachubeka angilandzela ngenhlitiyo yonkhe.” (Num. 14:24) Nkulunkulu wambusisa Khalebi, waze wamvumela nekutsi atikhetsele indzawo layifunako eKhenani. (Josh. 14:12-14) Situkulwane sema-Israyeli lesalandzela naso sabeka sibonelo lesihle sekulandzela sicondziso saJehova. Ngesikhatsi Joshuwa sekangumholi lomusha wema-Israyeli esikhundleni saMosi, ema-Israyeli “amhlonipha kakhulu Joshuwa kuko konkhe kuphila kwakhe.” (Josh. 4:14) Ngenca yaloko, Jehova wawabusisa ngekutsi awangenise eveni lebekawetsembise lona.​—Josh. 21:43, 44. w24.02 21 ¶6-7

Njengobe dokotela atfola leminye imininingwane mayelana nekutsi inhlitiyo iphilile yini nobe cha ngekuva kutsi ishaya kangakanani, natsi singatfola leminye imininingwane lemayelana nekutsi simtsandza kanganani Nkulunkulu ngekubuka indlela lesibatsandza ngayo labanye. Nangabe sibona kutsi ngandlela tsite seyehlile indlela lesitsandza ngayo bazalwane betfu nabodzadze, loko kungakhombisa kutsi yehlile nendlela lesimtsandza ngayo Nkulunkulu. Kodvwa nangabe sichubeka sikhombisa kutsi siyabatsandza bazalwane betfu nabodzadze, loko kuluphawu lwekutsi solo simtsandza kakhulu Nkulunkulu. Kufanele sikhatsateke nangabe yehla indlela lesitsandza ngayo bazalwane betfu nabodzadze. Leni? Ngobe loko kusho kutsi buhlobo betfu naNkulunkulu busengotini. Umphostoli Johane ukwenta kucace loko nakasikhumbuta atsi: “Loyo longamtsandzi umzalwane wakhe lambonile, ngeke amtsandze Nkulunkulu langakamboni.” (1 Joh. 4:20) Yini lesiyifundzako? Jehova utasemukela kuphela nangabe ‘sitsandzana.’​—1 Joh. 4:7-9, 11. w23.11 8 ¶3; 9 ¶5-6

Ngesikhatsi iNkhosi Jehowashi iseyincane, yenta sincumo lesihlakaniphile. Njengobe beyite babe, yalalela sicondziso lebeyisinikwa nguMphristi Lophakeme futsi lowetsembekile, lokunguJehoyada. Lomphristi wafundzisa Jehowashi kwaba shengatsi uyindvodzana yakhe. Ngenca yaloko, Jehowashi wenta sincumo lesihlakaniphile sekuhola ekukhonteni lokuhlantekile nasekukhonteni Jehova. Jehowashi waphindze wahlela kutsi kulungiswe lithempeli laJehova. (2 Khr. 24:1, 2, 4, 13, 14) Nangabe ufundziswa kutsi utsandze Jehova futsi uphile ngetimiso takhe, usuke unikwa sipho lesiligugu. (Taga 2:1, 10-12) Batali bakho bangakucecesha ngetindlela letinyenti. Batali bakho batawujabula nawusebentisa sicondziso lositfolako lesisekelwe eBhayibhelini. Ngetulu kwako konkhe, Nkulunkulu utawujabula futsi utawakha bungani lobuhlala njalo naye. (Taga 22:6; 23:15, 24) Lesi sizatfu lesihle sekulingisa Jehowashi ngesikhatsi asemncane. w23.09 8-9 ¶3-5

Jehova wetsembisa kuyilalela imithantazo yetfu. Nkulunkulu wetfu uyatitsandza tinceku takhe letetsembekile, ngako utawuhlale ayilalela imithantazo yato. (Hla. 10:17; 37:28) Nobe kunjalo, loko akusho kutsi utasiniketa konkhe lesikucelako. Kungahle kudzingeke silindze size sifike eveni lelisha ngaphambi kwekutsi sitfole letinye tintfo lesiticelako. Jehova ucabanga ngekutsi loko lesikucelako kuyitsintsa njani injongo yakhe. (Isa. 55:8, 9) Lenye injongo yakhe ikutsi umhlaba ugcwale bantfu labamlalela bajabulile njengobe anguMbusi wabo. Kodvwa Sathane utsi bantfu bangajabula nabangatibusa bona. (Gen. 3:1-5) Kuze Jehova akhombise kutsi Develi unemanga, uvumele bantfu kutsi batibuse. Kodvwa kutibusa kwebantfu kubangele tinkinga letinyenti lamuhla. (Shu. 8:9) Siyati kutsi Jehova angeke aticedze tonkhe letinkinga nyalo. w23.11 21 ¶4-5

Jehova wetsembisa kutsi nga-Abrahama ‘tive letinyenti’ betitawubusiswa. Nobe kunjalo, ngesikhatsi Abrahama aneminyaka lengu-100, Sara analengu-90 bebasolo bangakayitfoli lendvodzana labayetsenjisiwe. Ngekubuka kwemuntfu, bekungeke kwenteke kutsi Abrahama naSara babe nendvodzana. Loku kwamvivinya mbamba Abrahama. Kodvwa “wetsemba . . . , wakholwa kutsi utawuba ngubabe wetive letinyenti.” (Rom. 4:18, 19) Ngekuhamba kwesikhatsi lesetsembiso safezeka. Abrahama waba ngubabe wa-Isaka, lendvodzana lebekasolo ayibuke ngalabovu. (Rom. 4:20-22) Nkulunkulu angasemukela futsi kutsiwe silungile, njenga-Abrahama umngani wakhe. Nguloko Pawula lakugcizelela nakabhala atsi: “Lamavi latsi ‘kwatsiwa ulungile’ akazange abhalelwe [Abrahama] kuphela, kodvwa abhalelwa natsi lokutawutsiwa silungile ngobe siyakholwa kuLoyo lowavusa Jesu.” (Rom. 4:23, 24) Njenga-Abrahama, kufanele sibe nekukholwa, sente imisebenti lekhombisa kutsi sinekukholwa futsi sibe nelitsemba. w23.12 7 ¶16-17

Nawubhekene nenkinga lekwenta wesabe, khumbula kutsi Jehova uyayibona lenkinga nekutsi ikwenta utive njani. Sibonelo nje, Jehova akagcinanga ngekubona kuphatfwa kabi kwema-Israyeli ngesikhatsi aseGibhithe, kodvwa wabona ‘nebuhlungu lakubo.’ (Eks. 3:7) Nobe kunjalo, kungenteka uyatibuta kutsi Jehova ukusita njani nawubhekene nenkinga lekwesabisako. Ngako mcele akusite ubone indlela lakusita ngayo. (2 Khos. 6:15-17) Ngemuva kwaloko, cabanga ngaloku: Ikhona yini inkhulumo loyive emihlanganweni yelibandla nobe imphendvulo yalotsite lekukhutsatile? Ikhona yini incwadzi, i-video nobe ingoma levela eMsakatweni we-JW lekukhutsatile? Ukhona yini lokukhutsate ngemavi latsite nobe lokukhutsate ngembhalo? Singasheshe silukhohlwe lutsandvo lwebazalwane betfu nabodzadze nesikhutsato lesisitfola eVini laNkulunkulu. Kodvwa leti tipho letinhle kakhulu letivela kuJehova. (Isa. 65:13; Mak. 10:29, 30) Tibufakazi bekutsi uyakukhatsalela. (Isa. 49:14-16) Tikhombisa nekutsi kuyamfanela kutsi umetsembe. w24.01 4-5 ¶9-10

Ngaphambi nje kwekutsi Jesu abuyele ezulwini, wakhumbuta bafundzi bakhe ngemsebenti bekabanikete wona wekufakaza ngaye “eJerusalema, kuyo yonkhe iJudiya neSamariya, nakuto tonkhe tincenye temhlaba.” (Imis. 1:8; Luk. 24:46-48) Ngekushesha ngemuva kwaloko, baholi bemaJuda babopha umphostoli Phetro nemphostoli Johane futsi babamikisa eNkantolo Lephakeme YemaJuda. Lamadvodza letsembekile atjelwa kutsi ayekele kushumayela, aze asongelwa. (Imis. 4:18, 21) Phetro naJohane batsi: “Kutawubona nine kutsi kulungile yini emehlweni aNkulunkulu kutsi silalele nine kunekutsi silalele Yena. Kodvwa tsine ngeke siyekele kukhuluma ngetintfo lesitibonile nalesitivile.” (Imis. 4:19, 20) Ngesikhatsi boPhetro naJohane sebakhululiwe, bathantaza kuJehova mayelana nekwenta intsandvo yakhe. Jehova wawuphendvula lomthantazo wabo losuka enhlitiyweni.​—Imis. 4:31. w23.05 5 ¶11-12

Sekuphele iminyaka leminyenti kakhulu Jehova kanye neNdvodzana yakhe layitsandzako batsandzana. Lobu kuphela kwebudlelwane lesebukhona iminyaka leminyenti kuko konkhe lokudaliwe. Jehova waluveta ngalokucacile lutsandvo lanalo ngaJesu, njengobe kubhalwe kulombhalo welusuku walamuhla. Jehova bekangatsi: ‘Lona ngiyamemukela.’ Kodvwa bekafuna sati kutsi umtsandza kakhulu Jesu, ngako wambita ngekutsi “yiNdvodzana [yakhe] letsandzekako.” Jehova bekatigcabha ngaJesu nangaloko lebekatawukwenta. (Ef. 1:7) Ngetulu kwaloko, Jesu bekangangabati kutsi Babe wakhe bekamtsandza. Jesu bekaluva ngekhatsi enhlitiyweni lutsandvo Jehova lebekanalo ngaye. Washo ngekuciniseka tikhatsi letinyenti kutsi Babe wakhe uyamtsandza.​—Joh. 3:35; 10:17; 17:24. w24.01 28 ¶8

Cabanga nganaku: Ase sitsi umuntfu lomtsandzako ukhuluma kabi ngawe. Uyati kutsi unemanga; kodvwa labanye bayakwetsemba loku lakushoko. Lokubuhlungu kakhulu kutsi babese bayawasakata lamanga futsi labanyenti bayawetsemba. Ungativa njani? Siyaciniseka kutsi lokunyundzelwa kutakuvisa buhlungu. Lomfanekiso usisita sibone indlela Jehova lativa ngayo ngesikhatsi koniwa lidvumela lakhe. Lenye yemadvodzana akhe lengumoya yakhuluma emanga ngaye ku-Eva, umfati wekucala. Wawetsemba lamanga, futsi enta kutsi batali betfu bekucala bavukele Jehova. Ngenca yaloko, kwangena sono nekufa kubantfu. (Gen. 3:1-6; Rom. 5:12) Tonkhe tinkinga letikhona lamuhla emhlabeni, letifaka ekhatsi kufa, timphi nekuhlupheka tingumphumela wemanga lasakatwa nguSathane. Jehova kumvisa buhlungu yini lokunyundzelwa nemiphumela yako? Yebo kumvisa buhlungu. Kodvwa akahlali atfukutsele, ecinisweni uchubeka ‘anguNkulunkulu lojabulako.’​—1 Thim. 1:11. w24.02 8 ¶1-2

Ungamlingisa njani Josefa futsi uhlale wetsembekile nawulingwa? Ungancuma nyalo loko lotawukwenta nakungavela silingo. Tifundzise kutibalekela ngekushesha tintfo Jehova latenyanyako futsi ungacabangi ngisho nangato. (Hla. 97:10; 119:165) Nawenta njalo, angeke ukwente loko lolingeka kutsi ukwente. Kungenteka uyati kutsi sewulitfolile liciniso nekutsi ufuna kukhonta Jehova ngenhlitiyo yakho yonkhe, kodvwa kukhona lokukwenta wesabe kutsi utinikele futsi ubhajatiswe. Kungakusita kucabanga ngesibonelo seNkhosi Davide. Ungancenga Jehova utsi: “Awu Nkulunkulu, ngihlolisise futsi wati inhlitiyo yami. Ngiphenyisise futsi wati imicabango lengikhatsatako. Buka kutsi ngisengakacali yini kuhamba endleleni leyingoti futsi ungicondzise ngihambe endleleni yaphakadze.” (Hla. 139:23, 24) Jehova uyababusisa labo “labamfuna ngekutimisela.” Nawenta konkhe lokusemandleni akho kute ufinyelele umgomo wekutinikela futsi ubhajatiswe loko kutamkhombisa kutsi umfuna ngekutimisela.​—Heb. 11:6. w24.03 6 ¶13-15

Umphristi lophakeme bekamelela bantfu embikwaNkulunkulu. Aroni waba ngumphristi lophakeme wekucala wema-Israyeli lowakhetfwa nguJehova ngesikhatsi kuniketelwa lithende lekukhontela. Nobe kunjalo, umpostoli Pawula watsi “labanyenti babe baphristi ngekulandzelana ngobe kufa bekubavimba kutsi bachubeke babaphristi.” (Heb. 7:23-26) Ngenca yekutsi baphristi labaphakeme bebanesono, bekudzingeka kutsi nabo batentele imihlatjelo yetono tabo. Loku kuveta umehluko lomkhulu emkhatsini webaphristi labaphakeme bema-Israyeli kanye naJesu Khristu umPhristi Lophakeme kakhulu. Njengobe Jesu angumPhristi wetfu Lophakeme, ‘usisebenti sasethendeni lelingulonalona, lelo lelamiswa nguJehova hhayi bantfu.’ (Heb. 8:1, 2) Pawula wachaza kutsi “ngenca yekutsi [Jesu] uchubeka aphila kuze kube phakadze, kute lotawungena esikhundleni sakhe.” Pawula wengeta watsi Jesu ‘uhlantekile, akafani netoni’ futsi ngalokwehlukile kubaphristi labaphakeme bema-Israyeli, yena “akadzingi kwenta iminikelo malanga onkhe” ngenca yetono takhe. w23.10 26 ¶8-9

“Lizulu lelidzala” lisho bohulumende labalawulwa nguSathane nemadimoni akhe. (Mat. 4:8, 9; 1 Joh. 5:19) EBhayibhelini, ligama lelitsi “umhlaba” lingasho bantfu labahlala emhlabeni. (Gen. 11:1; Hla. 96:1) Ngako ‘umhlaba lomdzala’ usho bantfu lababi labakhona lamuhla. Jehova angeke alungise “lizulu nemhlaba” lokukhona nyalo, kunaloko utakususa ngalokuphelele bese ubeka lokunye esikhundleni sako. Esikhundleni selizulu lelikhona nyalo nemhlaba lokhona, utawubeka “lizulu lelisha nemhlaba lomusha,” lokusho hulumende lomusha kanye nebantfu labalungile. Jehova utakwenta umhlaba nebantfu kube ngatsi kusha ngekutsi ente bantfu babe bete sono futsi ente umhlaba ube muhle kakhulu. Njengobe Isaya aphrofetha, umhlaba wonkhe utawuba yindzawo lenhle, ufanane nensimu yase-Edeni. Ngetulu kwaloko, Jehova utawusenta sonkhe sibe basha ngekutsi aselaphe ngalokuphelele. Labachutako, labangaboni emehlweni nalabangeva etindlebeni batawelashwa, ngisho nalabafile batawuvuswa ekufeni.​—Isa. 25:8; 35:1-7. w23.11 4 ¶9-10

‘Kuhlupheka lokukhulu’ kutawucala ngekushesha. (Mat. 24:21) Kodvwa kutawehluka kuletinye tinhlekelele ngoba siyati kutsi kuyeta. Cishe eminyakeni lengu-2 000 leyendlulile, Jesu wecwayisa balandzeli bakhe kutsi balilungele lelo langa. Nangabe sililungele, kutawuba melula kutsi sicinisele nalifika futsi sisite nalabanye kutsi bente kanjalo. (Luk. 21:36) Sitawudzinga kucinisela kuze silalele Jehova futsi setsembe kutsi utasivikela. Sitawenta njani nangabe bazalwane betfu balahlekelwa tintfo tabo nobe konkhe labanako? (Hab. 3:17, 18) Kutawudzingeka sibe neluvelo kuze sibasite ngaloko labakudzingako. Sitawenta njani nangabe kutawudzingeka kutsi sihlale endzaweni lencane nebazalwane betfu nabodzadze ngesikhatsi kuhlasela tive letihlangene? (Hez. 38:10-12) Kubatsandza kakhulu kutasisita kutsi sibeketelele lesikhatsi lesimatima. w23.07 2 ¶2-3

Labashadene bangafundza esibonelweni sa-Akhwila naPhrisila, lebebatsandvwa ngemaKhristu ekucala lamanyenti. (Rom. 16:3, 4) Bebasebenta ndzawonye, bashumayela ndzawonye, futsi basita labanye ndzawonye. (Imis. 18:2, 3, 24-26) Ecinisweni, ngaso sonkhe sikhatsi liBhayibheli nalikhuluma nga-Akhwila naPhrisila, likhuluma ngabo bobabili. Labashadene bangabalingisa njani? Cabanga ngetintfo letinyenti wena naloshade naye lokudzingeka nitente. Letintfo ningatenta yini ninobabili kunekutsi utente uwedvwa? Sibonelo nje, Akhwila naPhrisila bebashumayela ndzawonye. Nivamile yini kushumayela ndzawonye? Bo-Akhwila naPhrisila bebaphindze basebente kanye kanye. Kungenteka ninemisebenti lengafani yekutiphilisa, kodvwa ningayenta yini imisebenti yasekhaya ndzawonye? (Shu. 4:9) Nangabe nisitana kuze nente imisebenti letsite, niyabona kutsi nibambisene futsi niba nelitfuba lekucoca. w23.05 22-23 ¶10-12

Sonkhe sihle sesaba. Sibonelo nje, ngesikhatsi iNkhosi Sawula ifuna Davide kuhle kwenyalitsi, wancuma kubalekela edolobheni lemaFilisti lokutsiwa yiGathi. Ngekushesha iNkhosi Akhishi yaseGathi yeva kutsi Davide ngulelichawe lebekuhlatjelwa ngalo kutsiwa libulele emaFilitsi ‘langemashumi etinkhulungwane.’ Davide ‘wesaba kakhulu.’ (1 Sam. 21:10-12) Bekakhatsateke ngaloko Akhishi bekatawukwenta kuye. Wakuncoba njani lokwesaba? KuTihlabelelo 56, Davide uveta indlela lebekativa ngayo ngesikhatsi aseGathi. Lesihlabelelo sikuchaza kahle kwesaba kwakhe, kodvwa siphindze sivete indlela lakuncoba ngayo. Ngesikhatsi Davide esaba, wetsembela kuJehova. (Hla. 56:1-3, 11) Kwenta njalo akuzange kumdvumate. Ngekusitwa nguJehova, Davide wakha licebo lebelingakavami kodvwa lelamphumelelisa: Wenta ngatsi uyahlanya! Kunekutsi Akhishi afune kumbulala, bekafuna kutsi asuke embikwakhe, ngako Davide wakhona kubaleka.​—1 Sam. 21:13–22:1. w24.01 2 ¶1-3

Bobani laba lokukhulunywa ngabo kulombhalo welusuku lwalamuhla? NgemaKhristu lagcotjiwe lasavusiwe! Ngako ngemuva kwekutsi labagcotjiwe lebebasele lamhlabeni sebaye ezulwini ngasekupheleni kwekuhlupheka lokukhulu, lomunye umsebenti labatawufike bawente kulwa. Ngemuva kwekuvuselwa ezulwini batawuba naKhristu kanye netingilosi takhe futsi balwe netitsa taNkulunkulu emphini yekugcina. Cabanga nganaku. Labanye labagcotjiwe labalamhlabeni sebakhulile futsi bayagula. Kodvwa nasebavuselwe ezulwini batawuba tidalwa letinemandla futsi letingeke tife, letinikwe umsebenti wekulwa tikanye naJesu Khristu, iNkhosi yabo Lelichawe. Ngemuva kwe-Amagedoni, batawusebenta naJesu kuze basite bantfu babe bete sono. Siyaciniseka kutsi kunyenti kakhulu labatakwentela bazalwane babo nabodzadze nasebasezulwini kunaloko labakwentako nyalo basebantfu labanesono! w24.02 6-7 ¶15-16

Nanobe labanye sebakulungele kutinikela nekubhajatiswa, solo bayesaba. Kungenteka bayatibuta: ‘Ngitawenta njani nangenta sono lesikhulu futsi ngiyekeliswa kuba nguFakazi?’ Nangabe wesaba loko, ciniseka kutsi Jehova utakunika konkhe lokudzingako “kuze uhambe ngendlela lefanele [embikwakhe], khona utewumjabulisa ngalokuphelele.” (Khol. 1:10) Jehova utawuphindze akunike emandla ekwenta lokulungile. Ukhombisile kutsi angakhona kukwenta loko ngekutsi asite labanye. (1 Khor. 10:13) Nguleso lesinye sizatfu lesenta kutsi babe mbalwa labayekeliswa kuba BoFakazi BaJehova. Jehova uyabasita bantfu bakhe kutsi bahlale betsembekile. Njengobe sonkhe sinesono, siyalingeka kutsi sente tintfo letimbi. (Jak. 1:14) Nobe kunjalo, kukuwe kutsi utakwenta yini loko lolingeka kutsi ukwente. Liciniso likutsi nguwe lotawenta sincumo sekutsi ufuna kuphila imphilo lenjani. Nanobe labanye bangakutjela lokwehlukile, kodvwa ungakhona kulawula tifiso takho letimbi. w24.03 5 ¶11-12