June

Jehova wawabusisa emaKhristu ekucala ngenca yekutsi avumelana netimo lebetishintja. Bekavame kuphatfwa kabi, ngaletinye tikhatsi loko bekwenteka angakakulindzeli. Cabanga ngalokwenteka kuBhanabasi nakumphostoli Pawula ngesikhatsi bashumayela eListra. Ekucaleni, labo lebebabalalela babemukela kahle. Kodvwa ngekuhamba kwesikhatsi, baphikisi ‘bagcugcutela sicumbi sebantfu’ futsi labanye kuso bagcoba Pawula ngematje futsi bamshiya bacabanga kutsi sewufile. (Imis. 14:19) Kodvwa Pawula naBhanabasi bachubeka nekushumayela kulenye indzawo. Waba yini umphumela? Bantfu ‘labanyenti baba bafundzi,’ futsi loko labakusho nesibonelo sabo sacinisa bazalwane babo nabodzadze. (Imis. 14:21, 22) Bantfu labanyenti basitakala ngenca yekutsi Bhanabasi naPawula abazange bayekele kushumayela nanobe bebaphatfwa kabi. Natsi nangabe sitawuchubeka senta umsebenti waJehova, sitawubusiswa. w23.04 16-17 ¶13-14

INkhosi Davide beyinetitsa letiyingoti letinyenti kuko konkhe kuphila kwayo futsi beyivame kuthantaza kuJehova kuze ayisite. Davide bekaciniseka kutsi Jehova uyayiva imithantazo yakhe futsi ayiphendvule. Nawe ungaciniseka. LiBhayibheli lisicinisekisa ngekutsi Jehova angasiniketa kuhlakanipha kanye nemandla lesiwadzingako kute sicinisele. Angasebentisa bazalwane betfu nabodzadze nobe labo labasengakamkhonti kutsi basisite. Nanobe Jehova angeke ahlale aphendvula imithantazo yetfu ngendlela lesilindzele ngayo, siyati kutsi utayiphendvula. Utasiniketa loko lesikudzingako nangesikhatsi lesikudzinge ngaso. Ngako chubeka uthantaza futsi wetsembe kutsi Jehova utakuva, uciniseke kutsi utakunakekela nyalo, nangekutsi ‘utawunika tonkhe tintfo letiphilako loko letikufisako’ eveni lelisha.​—Hla. 145:16. w23.05 8 ¶4; 13 ¶17-18

Kuyasita kunaka tintfo lotawutitfola nawufinyelela umgomo wakho. Ngutiphi tibusiso longatinaka? Nangabe umgomo wakho ukufundza liBhayibheli nobe kuthantaza, cabanga kutsi loko kungakusita njani ucinise buhlobo bakho naJehova. (Hla. 145:18, 19) Nangabe umgomo wakho kutfutfukisa buntfu bakho bebuKhristu, cabanga kutsi loko kutakusita njani utfutfukise buhlobo lonabo nalabanye. (Khol. 3:14) Kungakusita kwenta luhla lolunetizatfu letikwenta ufune kufinyelela loyo mgomo. Hlale ulibuka loluhla. Ngetulu kwaloko, citsa sikhatsi nalabo labatakusita kutsi ufinyelele umgomo wakho. (Taga 13:20) Kuliciniso kutsi ahle aba khona emalanga lapho sibabete sifiso sekufinyelela imigomo yetfu. Loko kusho kutsi angeke yini siwufinyelele? Cha. Natsi singawufinyelela umgomo wetfu ngisho site sifiso sekuwufinyelela ngalelo langa. Kuliciniso kutsi loko angeke kube melula, kodvwa utawujabula nangabe uwufinyelela umgomo wakho. w23.05 27-28 ¶5-8

Kwati kutsi kufanele semukele imiphumela yetincumo tetfu kungasenta kutsi sivume tono tetfu, silungise emaphutsa etfu futsi sikugweme kuwaphindza. Kwenta loko kungasisita kutsi sichubeke sikulomncintiswano wekuphila. Nangabe ungeke usishintje sincumo lesibi losentile, yemukela simo lokuso. Ungamoshi sikhatsi kanye nemandla akho wetama kuveta kutsi awukenti liphutsa nobe usimoshe utisola nobe-ke usola labanye. Kunaloko, vuma emaphutsa akho futsi wetame kamatima kwenta kancono esimeni lokuso manje. Nangabe utiva unelicala ngenca yeliphutsa lolentile, thantaza kuJehova uvume liphutsa lakho futsi umcele akucolele. (Hla. 25:11; 51:3, 4) Colisa kulabo lobonile futsi nangabe kudzingekile ucele lusito kulabadzala belibandla. (Jak. 5:14, 15) Fundza emaphutseni akho futsi wetame kungawaphindzi. Nawenta njalo, ungaciniseka kutsi Jehova utakukhombisa umusa futsi akusekele.​—Hla. 103:8-13. w23.08 28-29 ¶8-9

Jehoyada wasita iNkhosi Jehowashi kutsi ibe ngumuntfu lokahle. Ngenca yaloko, lenkhosi leseyinsha beyifuna kujabulisa Jehova. Kodvwa ngemuva kwekushona kwaJehoyada, Jehowashi wacala kulalela tindvuna lebetihlubukile. (2 Khr. 24:4, 17, 18) Adzabuke kakhulu, Jehova “wachubeka atfumela baphrofethi kutsi bababuyisele . . . , kodvwa bona abazange balalele.” Abazange balalele ngisho naZakhariya, lobekayindvodzana yaJehoyada, lebekangagcini nje ngekuba ngumphrofethi waJehova nemphristi kodvwa abephindze abe ngumzala waJehowashi. Ecinisweni, Jehowashi waze wabulala Zakhariya. (2 Khr. 22:11; 24:19-22) Jehowashi akazange achubeke amesaba Jehova. Naku Jehova lebekakushito: “Labo labangedzelelako batawedzelelwa.” (1 Sam. 2:30) Libutfo lelincane laseSiriya lancoba libutfo laJehowashi “lelikhulu” futsi ‘lamlimata kakhulu.’ (2 Khr. 24:24, 25) Jehowashi wabulawa tisebenti takhe ngenca yekubulala Zakhariya. w23.06 18-19 ¶16-17

Pawula bekase-Efesu ngaphambi kwekutsi abhale letincwadzi, ashumayela futsi afundzisa ngetindzaba letimnandzi. (Imis. 19:1, 8-10; 20:20, 21) Bekabatsandza kakhulu bazalwane bakhe nabodzadze futsi bekafuna kubasita kutsi bahlale betsembekile kuJehova. Base-Efesu bebake bagcilatwa yinkholo yemanga kanye nekukholelwa etintfweni letilite. Bantfu base-Efesu bebadvume ngekutiphatsa kabi kakhulu futsi kona kwabo bekuhambisana nekwedzelela. Imidlalo yabo nemicimbi yabo yenkholo beyivame kukhuluma ngetintfo letingcolile. (Ef. 5:3) Linyenti lebantfu base-Efesu ‘belingasadliwa ngunembeza,’ loko nakuhunyushwe njengobe kunjalo kusho kutsi “bebangasabuva ngisho nalobuncane buhlungu.” (Ef. 4:17-19) Ngaphambi kwekutsi bafundze kutsi yini lelungile nobe lengakalungi, nembeza wabo bewungabekhuti. Kungako Pawula atsi “tingcondvo tabo tisebumnyameni, futsi bakhashane nekuphila kwaNkulunkulu.” Nobe kunjalo, labanye base-Efesu abazange bachubeke basebumnyameni. w24.03 20 ¶2, 4; 21 ¶5-6

Umsebenti waGideyoni wekuba sikhulu bewudzinga kutsi asebente kamatima. Ngesikhatsi bakaMidiyani babaleka emphini, Gideyoni wabacosha kusuka esihosheni saseJezreyeli kuyofika eMfuleni iJordane. (Khu. 7:22) Gideyoni wafike wema yini eJordane? Cha! Nanobe bekadziniwe, yena nalamadvodza langu-300 lebekanawo bewela lomfula futsi bachubeka nekubacosha. Ekugcineni babakhandza bakaMidiyani futsi babancoba. (Khu. 8:4-12) Gideyoni bekaciniseka kutsi Jehova utamnika emandla futsi akazange advumateke. (Khu. 6:14, 34) Ngalelinye lilanga, Gideyoni nemadvodza lebekahamba nawo bebacosha ngetinyawo emakhosi lamabili akaMidiyani lokungenteka bekagibele emakamela. (Khu. 8:12, 21) Nobe kunjalo, ngekusitwa nguJehova ema-Israyeli awancoba. Ngendlela lefanako, labadzala belibandla bangetsembela kuJehova, loyo ‘longadzinwa futsi longakhatsali.’ Utawubanika emandla nabawadzinga.​—Isa. 40:28, 29. w23.06 6 ¶14, 16

Singema sicinile ngisho singabhekana nayiphi inkinga. Ngako yetsemba Jehova. Cabanga ngendlela Bharaki laphumelela ngayo ngenca yekwetsemba sicondziso saJehova. Nanobe bekute lihawu nobe sikhali kulo lonkhe lelive, Jehova watjela Bharaki kutsi alwe nelibutfo lemaKhenani lebeliholwa nguSisera futsi lebelihlome laphelela. (Khu. 5:8) Umphrofethikati Debhora watjela Bharaki kutsi ehlele endzaweni lebekile kuze ahlangane naSisera netincola takhe temphi letingu-900. Nanobe letincola betitawenta kutsi kube melula ngaSisera kutsi ancobe, kepha Bharaki walalela. Njengobe emasotja ehla eNtsabeni iThabori, Jehova wanisa imvula lenkhulu. Tincola temphi taSisera tabisha eludzakeni futsi Jehova wenta kutsi Bharaki ancobe. (Khu. 4:1-7, 10, 13-16) Ngendlela lefanako, Jehova utawusenta sincobe nangabe simetsemba futsi setsemba nesicondziso lasinika sona asebentisa inhlangano yakhe. w23.07 19 ¶17-18

Kubeketela kubalulekile kuze sisindziswe. Njengebantfu baNkulunkulu labetsembekile basesikhatsini lesendlulile, kufanele simlindzele ngesineke Nkulunkulu kutsi afeze tonkhe tetsembiso takhe. (Heb. 6:11, 12) LiBhayibheli lifananisa simo setfu nesemlimi. (Jak. 5:7, 8) Umlimi usebenta kamatima kuze ahlanyele futsi anisele lakulimile, kodvwa akati ngalokucondzile kutsi kutawukhula nini. Ngako lomlimi ulindzela ngesineke, etsembe kutsi utawuvuna. Ngendlela lefanako, natsi sihlale simatasatasa ngetintfo letiphatselene naNkulunkulu ngisho nobe ‘singalati lilanga iNkhosi yetfu letawufika ngalo.’ (Mat. 24:42) Silindzela ngesineke, siciniseka kutsi Jehova utawutifeza tonkhe tetsembiso takhe ngesikhatsi sakhe lesifanele. Nasingayekela kubeketela, singahle siphelelwe ngemandla ekulindza futsi sicale kushiya liciniso kancane kancane. Singahle sicale kwenta tintfo lesicabanga kutsi titasijabulisa nyalo. Kodvwa nangabe sibeketela, singacinisela kuze kube sekugcineni futsi sisindziswe.​—Mik. 7:7. w23.08 22 ¶7

Nasicatsanisa lesiphrofetho lesikuDanyeli 2:41-43 naletinye letisencwadzini yaDanyela nakuSembulo, singaphetsa ngekutsi letinyawo timelela uMbuso wemaNgisi nemaMelika, lokungumbuso wemhlaba lamuhla. Nakakhuluma ngalombuso wemhlaba, Danyela utsi “lenye incenye yalombuso itawucina, lenye ibe butsakatsaka.” Kwentiwa yini kutsi ibe butsakatsaka? Kwentiwa kutsi bantfu labamelelwa lubumba lolutsambile bawenta ubebete emandla lacine njengensimbi. Sifundza nawa emaciniso labalulekile kulenchazelo yaDanyela yeliphupho lelimayelana nesitfombe. Kwekucala, uMbuso wemhlaba wemaNgisi nemaMelika ukhombisile kutsi unemandla ngetindlela letinyenti. Sibonelo nje, lamave bekasemkhatsini wemave lancoba ngeMphi Yelive Yekucala neMphi Yelive Yesibili. Nobe kunjalo, lombuso sewubutsakatsaka futsi utawuchubeka uba butsakatsaka ngenca yekutsi bantfu labangephansi kwawo balwa bodvwa baphindze balwe nahulumende. Kwesibili, lombuso nguwo umbuso wemhlaba wekugcina lotawubusa ngaphambi kwekutsi uMbuso waNkulunkulu ubhubhise yonkhe imibuso yebantfu. w23.08 10-11 ¶12-13

Ngaletinye tikhatsi, Davide bekativa akhatsatekile ngenca yato tonkhe tinkinga lebekabhekene nato. (Hla. 18:4, 5) Nobe kunjalo, lutsandvo lwaJehova kanye nekunakekelwa nguye bekumvuselela. Jehova waholela lomngani wakhe lokhatsele “emadlelweni laluhlata” ‘nasetindzaweni tekuphumula letinemanti lamanyenti.’ Ngenca yaloko, Davide waphindze waba nemandla futsi wakhona kuchubeka akhonta Jehova ajabulile. (Hla. 18:28-32; 23:2) Ngendlela lefanako lamuhla, kungenca yekutsi ‘Jehova unelutsandvo lolucotfo, kungako singacotfulwa siphele nya’ nasibhekene netinkinga. (Sil. 3:22; Khol. 1:11) Kuphila kwaDavide bekuvame kuba sengotini futsi bekanetitsa letinyenti letinemandla. Nobe kunjalo, lutsandvo lwaJehova lwamenta wativa aphephile futsi avikelekile. Davide bekeva kutsi Jehova unaye kunobe ngusiphi simo lebekabhekene naso, futsi loko bekumenta abe nemandla. Kungako ahlabela watsi: “[Jehova] wangikhulula kuko konkhe lengikwesabako.” (Hla. 34:4) Davide bekesaba tintfo lebetikhona mbamba, kodvwa lutsandvo lwaJehova belunemandla kunaloko lakwesabako. w24.01 30 ¶15-17

Fundza etincumeni letimbi taJehowashi. Ngemuva kwekufa kwemPhristi Lophakeme Jehoyada, Jehowashi waba nebangani lababi. (2 Khr. 24:17, 18) Wancuma kulalela tindvuna takaJuda lebetingamtsandzi Jehova. Kungenteka uyabona kutsi bekungakafaneli kutsi Jehowashi atihlanganise nalabantfu lababi. Kodvwa walalela labangani lababi. Ecinisweni, ngesikhatsi umzala wakhe Zakhariya etama kumekhuta, Jehowashi wambulala. (2 Khr. 24:20, 21; Mat. 23:35) Loko kwaba kubi kakhulu futsi bekubulima! Jehowashi wacala kahle, kodvwa lokubuhlungu kutsi wabese uba sihlubuki nembulali. Ngemuva kwesikhatsi, tinceku takhe tambulala. (2 Khr. 24:22-25) Loko bekungeke kwenteka kube wachubeka alalela Jehova nalabo lebebatsandza Jehova! w23.09 9 ¶6

Jesu bekati kutsi umphostoli Phetro angahlala etsembekile. Ngako ngemusa watjela Phetro kutsi ‘angesabi.’ Kuphila kwaPhetro kwashintja nakabona kutsi Jesu uyametsemba. Ngekuhamba kwesikhatsi Phetro kanye nemnakabo Andreya bashiya libhizinisi labo lekudweba futsi baba balandzeli baMesiya sikhatsi sonkhe, lokusincumo lesabaletsela tibusiso letinyenti. (Mak. 1:16-18) Phetro wabona tintfo letinyenti letinhle ngesikhatsi angumlandzeli waKhristu. Wabona Jesu elapha labagulako, akhipha emadimoni futsi avusa nalabafile. (Mat. 8:14-17; Mak. 5:37, 41, 42) Phetro waphindze wabona umbono lomayelana nendzima lebeyitawudlalwa nguJesu eMbusweni waNkulunkulu, lokuyintfo leyahlala engcondvweni yakhe. (Mak. 9:1-8; 2 Phet. 1:16-18) Phetro wabona tintfo lebekangayuze atibone kube akazange abe ngumlandzeli waJesu. Siyaciniseka kutsi wajabula kakhulu ngekutsi akazange akuvumele kutibukela phasi kumente alahlekelwe nguletibusiso letinyenti kangaka! w23.09 21 ¶4-5

Encwadzini yekucala umphostoli Phetro layibhala, wasebentisa emavi latsi “tsandzanani kakhulu.” Lolutsandvo alugcini nje ngekumbonya tono letimbalwa, kodvwa lumbonya “tono letinyenti.” (1 Phet. 4:8) Kungenteka Phetro wakhumbula sifundvo lesimayelana nekucolela lasifundziswa nguJesu eminyakeni lengaphambili. Ngaleso sikhatsi, kungenteka Phetro bekacabanga kutsi unemusa nakatsi angamcolela “tikhatsi letingu-7” umnakabo. Kodvwa Jesu wamfundzisa kutsi kufanele acolele ‘tikhatsi letingu-77,’ lokusho kucolela tikhatsi letinyenti angabali, lokusifundvo natsi lasinika sona. (Mat. 18:21) Nangabe ukutfola kumatima kusisebentisa leseluleko, ungapheli emandla! Tonkhe tikhonti taJehova tinesono futsi tihle tikutfola kumatima kucolela. Lokubalulekile nyalo kutsi wente konkhe longakhona kukwenta kuze ucolele umnakenu futsi wakhe kuthula naye. w23.09 29 ¶12

Ngesikhatsi Jona asesiswini senhlanti waciniseka kutsi Jehova bekatawulalela umthantazo wakhe futsi amsite. Ngekuhamba kwesikhatsi, nasekaphumile esiswini senhlanti, besekakulungele kwenta umsebenti lawunikwa nguJehova. (Jona 2:10–3:4) Nawunenkinga, uhle uva ngatsi ukhatsateke kakhulu yini kutsi ungathantaza? Nobe utiva ute yini emandla ekudadisha? Khumbula kutsi Jehova usicondza kahle simo lokuso. Ngako ngisho wenta umthantazo lomfishane ungaciniseka kutsi utakuniketa loko kanye lokudzingako. (Ef. 3:20) Nangabe kumatima kufundza nekudadisha ngenca yekutsi uyagula, udziniwe nobe ukhatsateke kakhulu, ungalalela kufundvwa kweliBhayibheli lokurekhodiwe nobe ulalele tincwadzi tetfu letirekhodiwe. Kungakusita nekulalela tingoma tetfu nobe kubukela i-video ku jw.org. Jehova ufuna kukucinisa, futsi loko utawukwenta nangabe uthantaza kuye futsi ufuna netimphendvulo temithantazo yakho eBhayibhelini nakuletinye tintfo lasiniketa tona. w23.10 13 ¶6; 14 ¶9

Lithende lekukhontela kanye nemathempeli lakhiwa ngekuhamba kwesikhatsi eJerusalema bekunetintfo letifanako ngekhatsi. Ngekhatsi ‘bekunendzawo leNgcwele’ ‘neNgcwelengcwele,’ lebetehlukaniswa yindvwangu lenemihlobiso. (Heb. 9:2-5; Eks. 26:31-33) Ngekhatsi endzaweni leNgcwele bekunesibane lesakhiwe ngeligolide, li-al’thare lekushisa imphepho kanye nelitafula lesinkhwa. Bekungulabo ‘labagcotjwe kutsi babe baphristi’ kuphela lebebavumeleke kutsi bangene endzaweni leNgcwele kuze bente imisebenti yabo. (Num. 3:3, 7, 10) Endzaweni leNgcwelengcwele bekunelibhokisi lesivumelwane lelakhiwe ngeligolide lebelifanekisela kuba khona kwaJehova. (Eks. 25:21, 22) Ngumphristi lophakeme kuphela lebekavumeleke kutsi endlule lendvwangu futsi angene eNgcwelengcwele Ngelilanga Lekubuyisana NaNkulunkulu lebeliba khona kanye ngemnyaka. (Lev. 16:2, 17) Bekangena nengati yetilwane kuze ayohlawulela tono takhe netaso sonkhe lesive. Ekugcineni, Jehova wakwenta kwacaca kutsi mbambambamba letintfo betimelela ini.​—Heb. 9:6, 7. w23.10 27 ¶12

EVini laNkulunkulu, siwutfola tikhatsi letinyenti umyalo wekutsi ‘sitsandzane.’ (Joh. 15:12; Rom. 13:8; 1 Thes. 4:9; 1 Phet. 1:22; 1 Joh. 4:11) Kodvwa lutsandvo yindlela lesitiva ngayo ngekhatsi enhlitiyweni, futsi kute umuntfu longakhona kubona ngekhatsi. Ngako yini lesingayenta kuze kubonakale kutsi siyatsandzana? Singakhombisa ngemavi nangetento. Tinyenti tindlela lesingakhombisa ngato kutsi siyabatsandza bazalwane betfu nabodzadze. Nati letinye tibonelo: “Nibokhuluma liciniso kulomunye nalomunye.” (Zak. 8:16) “Nihlalisane ngekuthula.” (Mak. 9:50) “Nihambe embili ekuhloniphaneni.” (Rom. 12:10) “Yemukelanani.” (Rom. 15:7) “Chubekani . . . nitsetselelana.” (Khol. 3:13) “Chubekani nitfwalisana imitfwalo lesindzako.” (Gal. 6:2) “Chubekani nidvudvutana.” (1 Thes. 4:18) “Chubekani . . . nakhana.” (1 Thes. 5:11) “Nithantazelane.”​—Jak. 5:16. w23.11 9 ¶7-8

Onkhe malanga senta tincumo letidzinga kutsi sibe nekukholwa lokucinile. Sibonelo nje, senta tincumo letifaka ekhatsi kutsi sitawutihlanganisa nabobani, loko lesitawutijabulisa ngako, imfundvo, umshado, bantfwana kanye nemsebenti wekutiphilisa. Senta kahle nasitibuta nayi imibuto: ‘Tincumo tami tiyakhombisa yini kutsi ngiyaciniseka kutsi lelive liyendlula futsi esikhundleni salo kutawuba nelive lelisha laNkulunkulu? Tintfo lengitentako tiyafana yini naleto letentiwa bantfu labangakholelwa kutsi bangaphila kuze kube phakadze?’ (Mat. 6:19, 20; Luk. 12:16-21) Sitawenta tincumo letikahle nangabe sitawenta lokutsite kuze setsembe kakhulu kutsi live lelisha selisemnyango. Siphindze sibhekane netinkinga letidzinga sibe nekukholwa lokucinile. Singahle siphatfwe kabi, sigule kakhulu, nobe sibhekane naletinye timo letingasenta sidvumateke. Ekucaleni singahle sibone ngatsi siyakhona kubeketelela letinkinga. Kodvwa nangabe titsatsa sikhatsi lesidze, njengobe tivame kwenta, singabese sidzinga kukholwa lokucinile kuze sikhone kutibeketelela futsi sichubeke sikhonta Jehova sijabulile.​—1 Phet. 1:6, 7. w23.04 27 ¶4-5

Jehova ulindzele kutsi sente ngekuvumelana nemithantazo yetfu. Sibonelo nje, umzalwane angahle acele Jehova amsite kutsi acele sikhatsi kuze akhone kuya emhlanganweni wesifundza. Jehova angawuphendvula njani lomthantazo? Anganika lomzalwane sibindzi lasidzingako kuze akhone kukhuluma nemcashi wakhe. Kodvwa kutawudzingeka kutsi lomzalwane aye kulomcashi ayocela. Kungahle kudzingeke kutsi amcele tikhatsi letinyenti. Kungenteka kudzingeke nekutsi acele kushintjana nalesinye sisebenti nobe acele kungabhadalwa ngalamalanga latawube angasebenti ngawo. Jehova ulindzele kutsi sichubeke sithantazela tinkinga tetfu. Emavi aJesu akhombisa kutsi leminye imithantazo yetfu ngeke iphendvulwe ngaleso sikhatsi. (Luk. 11:9) Ngako ungapheli emandla! Chubeka uthantaza tikhatsi letinyenti. (Luk. 18:1-7) Nasenta njalo, sisuke sikhombisa Jehova kutsi sitimisele ngaloko lesikucelako. Ngetulu kwaloko, sisuke sikhombisa kutsi siyetsemba kutsi Jehova utasisita. w23.11 22 ¶10-11

Jehova wetsembisa umngani wakhe Abrahama kutsi tonkhe tive temhlaba betitawubusiswa ngentalelwane yakhe. (Gen. 15:5; 22:18) Ngenca yekutsi Abrahama bekanekukholwa lokucinile kuNkulunkulu, bekaciniseka kutsi setsembiso saNkulunkulu sitawufezeka. Ngisho nangesikhatsi Abrahama aneminyaka lengu-100 futsi umkakhe analengu-90, bebasolo bete indvodzana. (Gen. 21:1-7) Nobe kunjalo, liBhayibheli litsi: “Abrahama wetsemba . . . , wakholwa kutsi utawuba ngubabe wetive letinyenti njengobe kwakushiwo.” (Rom. 4:18) Uyati kutsi lesetsembiso lebekanikwe sona Abrahama safezeka. Waba ngubabe walendvodzana lebekasolo ayilindzile, lokungu-Isaka. Yini lebeyenta Abrahama aciniseke kutsi Jehova utasigcina lesetsembiso? Ngenca yekutsi Abrahama bekanebuhlobo lobuhle naJehova, “bekaciniseka kutsi loko Nkulunkulu bekametsembise kona utawukhona kukwenta.” (Rom. 4:21) Jehova bekamemukela Abrahama, futsi watsi ulungile ngenca yekukholwa kwakhe.​—Jak. 2:23. w23.12 8 ¶1-2

Umzalwane losemusha lowetsenjwa ngulabanye uwenta kahle wonkhe umsebenti wakhe. Cabanga ngesibonelo lesihle saJesu. Bekatimisela. Wayenta yonkhe imisebenti layinikwa nguJehova, ngisho nalapho kulukhuni kuyenta. Bekabatsandza bantfu, ikakhulukati bafundzi bakhe, futsi waze wanikela ngekuphila kwakhe ngenca yabo. (Joh. 13:1) NjengaJesu, sebenta kamatima kuze wente imisebenti lonikwe yona. Nangabe ungati kutsi wentiwa njani, tfobeka futsi ucele bazalwane labavutsiwe kutsi bakusite. Ungatikhiphi ecaleni. (Rom. 12:11) Kunaloko, wucedze umsebenti wakho, ‘kube shengatsi uwentela Jehova hhayi bantfu.’ (Khol. 3:23) Kuliciniso kutsi unesono, ngako tfobeka futsi uvume emaphutsa akho.​—Taga 11:2. w23.12 26 ¶8

Siyajabula nasibhajatiswa futsi sibe yincenye yemndeni waJehova. Labo labanebuhlobo lobuhle naJehova bayavumelana naloko lokwashiwo ngumhlabeleli Davide nakatsi: “Uyajabula loyo lomkhetsako [wena Jehova] futsi umsondzete kuwe kute ahlale emabaleni akho.” (Hla. 65:4) Jehova akavumeli nobe ngubani kutsi ahlale emabaleni akhe. Udvonsa labo labakhombisako kutsi bayafuna kuba nebuhlobo lobuhle naye. (Jak. 4:8) Nawutinikela kuJehova futsi ubhajatiswe, ungaciniseka kutsi ngemuva kwekubhajatiswa Jehova ‘utawutfululela tibusiso etikwakho kuze kube bete ngisho nendzawo yekutigcina.’ (Mal. 3:10; Jer. 17:8) Kubhajatiswa kumane nje kusicalo. Utawufuna kwenta konkhe longakwenta kuze uphile ngekuvumelana nesifungo lowasenta nawutinikela, ngisho nalapho ulingwa nobe kukholwa kwakho kuvivinywa. (Shu. 5:4, 5) Njengobe ungumfundzi waJesu, utasilandzela edvute sibonelo sakhe futsi wente konkhe longakwenta kuze ulalele imiyalo yakhe.​—Mat. 28:19, 20; 1 Phet. 2:21. w24.03 8 ¶1-3

Yini labashadene labangayenta nangabe bangatsandzi kucitsa sikhatsi ndzawonye? Yini leningayenta? Cabanga ngemlilo. Awusuki emalangabi usawubasa. Kunaloko, kudzingeka uchubeke ufaka tinkhuni kancane kancane. Ngendlela lefanako, ningacala ngekucitsa sikhashana ndzawonye njalo ngelilanga. Cinisekani kutsi nenta tintfo lenititsandza nobabili. (Jak. 3:18) Nanicala kancane kancane, ningaluvusetela lutsandvo lwenu. Inhlonipho ibalulekile emshadweni. Injengemoya lowenta umlilo uchubeke uvutsa. Nakute umoya, umlilo usheshe ucishe. Ngendlela lefanako, nangabe labashadene bangahloniphani, lutsandvo lwabo lungasheshe luphele. Kantsi nangabe benta konkhe lokusemandleni abo kuze bahloniphane, benta kutsi lutsandvo lwabo luchubeke luvutsa. Nobe kunjalo, khumbula kutsi lena akusiyo indzaba yekutsi wena ucabanga kutsi uyamhlonipha yini, kodvwa yindzaba yekutsi lona loshade naye utiva ahlonishwa yini. w23.05 22 ¶9; 24 ¶14-15

EBhayibhelini, tikhonti taNkulunkulu tikhuluma ngetikhatsi lebeticindzeteleke ngato futsi tesatjiswa titsa tato. Takhuluma nangalokunye lebekuticindzetela. (Hla. 18:4; 55:1, 5) Ngendlela lefanako, kungenteka natsi siyaphikiswa esikolweni, emsebentini nobe siphikiswa ngemalunga emindeni yetfu nobe nguhulumende. Kungenteka siyesaba kutsi sitawufa ngenca yesifo lesinaso. Ngetikhatsi letinjalo, kungenteka sitive singakavikeleki kuhle kwemntfwana. Jehova usisita njani etikhatsini letinjalo? Uyasidvudvuta futsi asente sijabule. Ngako kufanele uhlale ucitsa sikhatsi naJehova ngekutsi uthantaze kuye futsi ufundze liVi lakhe. (Hla. 77:1, 12-14) Nawenta njalo, intfo yekucala lotayicabanga nawucindzetelekile kwetsembela kuBabe wakho wasezulwini. Tjela Jehova loko lokwesabako naloko lokukukhatsatako. Mvumele akhulume nawe ngemiBhalo futsi akudvudvute.​—Hla. 119:28. w24.01 24-25 ¶14-16

Kuze ufinyelele imigomo yakho ekukhonteni Nkulunkulu, kufanele ube nesifiso. Nangabe unesifiso lesikhulu sekufinyelela umgomo wakho, utawusebenta kamatima kuze uwufinyelele. Ngetulu kwaloko, nangabe sinesifiso lesikhulu sekufinyelela imigomo yetfu, manyenti ematfuba ekutsi siyifinyelele. Ngako yini longayenta kuze ube nesifiso sekufinyelela umgomo? Thantazela kuba nesifiso lesikhulu. Asebentisa umoya wakhe, Jehova angakusita kutsi uwufinyelele umgomo wakho. Ngalesinye sikhatsi sitibekela umgomo ngobe siyati kutsi kufanele, futsi leyo yintfo lenhle. Kodvwa singahle sibe bete sifiso sekuwufinyelela. Cabangisisa ngaloko Jehova lakwentele kona. (Hla. 143:5) Umphostoli Pawula wacabangisisa ngemusa lomkhulu Jehova lebekamkhombise wona, futsi loko kwamenta waba nesifiso lesikhulu sekusebentela Jehova. (1 Khor. 15:9, 10; 1 Thim. 1:12-14) Ngendlela lefanako, nawuchubeka ucabangisisa ngaloko Jehova lakwentele kona, utawuba nesifiso lesikhulu sekufinyelela umgomo wakho.​—Hla. 116:12. w23.05 27 ¶3-5

Sijabulisa Babe wetfu wasezulwini nasidvumisa libito lakhe. (Hla. 119:108) Kodvwa loko kusho kutsi Nkulunkulu Somandla ufana nemuntfu lofuna kudvunyiswa ngenca yekutsi ufuna kucinisekiswa yini nobe ngenca yekutsi ufuna kukhutsatwa? Cha. Nasidvumisa Babe wetfu wasezulwini, sisuke sikhombisa kutsi loko Sathane lakushoko ngatsi kungemanga. Sathane utsi kute umuntfu lotawumelela libito laNkulunkulu ngekwetsembeka. Utsi kute ngisho namunye emkhatsini wetfu locotfo. Uphindze atsi sonkhe sitamshiya Nkulunkulu nasibona ngatsi kukhona lesitakutfola ngekwenta njalo. (Jobe 1:9-11; 2:4) Kodvwa Jobe lebeketsembekile wakhombisa kutsi Sathane unemanga. Wena utawenta njani? Ngamunye wetfu unelitfuba lekumelela libito laBabe wetfu futsi simjabulise ngekutsi simkhonte ngekwetsembeka. (Taga 27:11) Lelo litfuba lelihle kakhulu! w24.02 8-9 ¶3-5

Ngemuva kwemalanga aMosi naJoshuwa, Jehova wakhetsa behluleli kuze bacondzise bantfu bakhe. Nasekubusa emakhosi, Jehova wakhetsa baphrofethi kuze bacondzise bantfu bakhe. Emakhosi letsembekile bekasisebentisa seluleko salabaphrofethi. Sibonelo nje, iNkhosi Davide yatfobeka futsi yemukela siyalo leyasinikwa ngumphrofethi Nathani. (2 Sam. 12:7, 13; 1 Khr. 17:3, 4) INkhosi Jehoshafati yalalela sicondziso semphrofethi Jahaziyeli futsi yakhutsata bantfu bakaJuda kutsi ‘bakukholwe lokushiwo baphrofethi’ baNkulunkulu. (2 Khr. 20:14, 15) Ngesikhatsi iNkhosi Hezekiya icindzetelekile, yacela lusito kumphrofethi Isaya. (Isa. 37:1-6) Ngaso sonkhe sikhatsi lamakhosi nawalandzela sicondziso saJehova, bewabusiswa futsi nalesive besivikeleka. (2 Khr. 20:29, 30; 32:22) Kusebaleni kutsi Jehova bekasebentisa labaphrofethi bakhe kuze acondzise bantfu bakhe. w24.02 21 ¶8

Sathane ufuna sitihlanganise nebantfu labenta kube matima kutsi silalele timiso taJehova. Kufanele sikhumbule kutsi bantfu lesitihlanganisa nabo akusibo nje kuphela labo lesibonana nabo buso nebuso. Bafaka ekhatsi labo lesicoca nabo etintfweni tebuchwephesha. Kufanele silwisane nekucabanga kwalelive kutsi kutiphatsa kabi kuyemukeleka. Siyalati liciniso. (Ef. 4:19, 20) Ngako kufanele sitibute: ‘Ngenta konkhe lengingakwenta yini kuze ngingatihlanganisi ngalokungenasidzingo nalabo lengisebenta nabo, lengifundza nabo nobe labanye labangatihloniphi timiso taJehova letilungile? Nginesibindzi yini sekumelela timiso taJehova ngisho nobe labanye batsi ngilukhuni?’ Njengobe kuvetiwe ku-2 KuThimothi 2:20-22, kufanele sicaphelisise ngisho nalapho sikhetsa bangani ebandleni lebuKhristu. Sihlale sikhumbula kutsi labanye bangahle bangasisiti kutsi sichubeke setsembekile kuJehova. w24.03 22-23 ¶11-12

Ukile yini wetama kucabanga kutsi Jehova ubukeka njani? Nanobe Jehova angabonakali, liBhayibheli limchaza ngetindlela letehlukahlukene. Litsi “ulilanga nesihlangu,” liphindze litsi “ungumlilo locotfulako.” (Hla. 84:11; Heb. 12:29) Uchazwa nangekutsi ufana nelitje lesafire, ucwebetela kuhle kwensimbi futsi kukhanya kwakhe lokukhulu kufana nemushi wenkosazana. (Hez. 1:26-28) Ngenca yekutsi asimboni Jehova, singahle sikutfole kumatima kukholelwa kutsi uyasitsandza. Labanye bacabanga kutsi Jehova akayuze abatsandze ngenca yetintfo letentekile ekuphileni kwabo. Jehova uyayicondza indlela lesitiva ngayo nekutsi isitsintsa njani. Kuze asisite, usivetele buntfu bakhe lobuhle eVini lakhe. Linye ligama lelichaza Jehova, lutsandvo. (1 Joh. 4:8) Jehova ulutsandvo. Lutsintsa konkhe lakwentako. Lutsandvo lwakhe lukhulu futsi lunemandla kangangekutsi ulukhombisa ngisho nalabo labangamtsandzi.​—Mat. 5:44, 45. w24.01 26 ¶1-3

Jehova wakhetsa Mosi kutsi ahole ema-Israyeli awakhiphe eGibhithe, wenta kutsi kube nensika yelifu emini futsi kube nensika yemlilo ebusuku. (Eks. 13:21) Mosi nema-Israyeli bayilandzela futsi yabaholela eLwandle Lolubovu. Labantfu besaba ngesikhatsi bacabanga kutsi sebavimbeteleke emkhatsini welwandle nelibutfo lebaseGibhithe lebelibacosha. Kodvwa lelo bekungasilo liphutsa. Jehova bekasebentise Mosi kuze aholele bantfu bakhe lapho. (Eks. 14:2) Nkulunkulu wabese ubakhulula ngendlela lemangalisa kakhulu. (Eks. 14:26-28) Eminyakeni lengu-40 leyalandzela, Mosi wachubeka etsembele kulensika yelifu kuze acondzise bantfu baNkulunkulu ehlane. (Eks. 33:7, 9, 10) Jehova bekakhuluma naMosi akulensika, futsi yena bekabese utjela labantfu ticondziso taNkulunkulu. Ema-Israyeli bekanebufakazi lobunyenti bekutsi Jehova bekasebentisa Mosi kuze awacondzise. w24.02 21 ¶4-5