July

Tonkhe tintfo Jesu latisho nalatenta, lokufaka ekhatsi timangaliso latenta, tayiveta kahle indlela Babe wakhe lacabanga ngayo nalativa ngayo. (Joh. 14:9) Yini lesingayifundza kuletimangaliso letentiwa nguJesu? Jesu naBabe wakhe basitsandza kakhulu. Ngesikhatsi alana emhlabeni, Jesu wakhombisa kutsi ubatsandza kakhulu bantfu ngekutsi asebentise emandla akhe lamakhulu ekwenta timangaliso kuze asite labo lebebahlupheka. Ngalelinye lilanga, lamanye emadvodza lamabili langaboni emehlweni amncenga kutsi awasite. (Mat. 20:30-34) Naka kutsi Jesu “wawahawukela” lamadvodza, wabese uyawelapha. Ligama lesiGriki lelisetjentisiwe lelihunyushwe ngekutsi “wawahawukela” lisho luvelo lolusuka ngekhatsi kumuntfu. Loluhlobo lolu lweluvelo lukhombisa indlela Jesu lebekabatsandza ngayo bantfu futsi ngilo lelenta wondla bantfu lebebalambile, waphindze welapha umuntfu lebekanebulephelo. (Mat. 15:32; Mak. 1:41) Siyaciniseka kutsi Jehova longuNkulunkulu ‘lonemusa,’ kanye neNdvodzana yakhe basitsandza kakhulu futsi beva buhlungu nasihlupheka. (Luk. 1:78; 1 Phet. 5:7) Bakubuke ngalabovu kususa tonkhe tinkinga tebantfu! w23.04 3 ¶4-5

Kufanele sente konkhe lokusemandleni etfu kuze sigweme kuba sesimeni lesingenta sibe nemicabango lemibi nobe sitfole imibono leyemukelekako kulelive laSathane. Singagcwalisa tingcondvo tetfu ngemicabango lehlantekile ngekutsi sifundze liBhayibheli futsi silidadishe. Kuba khona emihlanganweni kanye nekuba khona emsebentini wekushumayela nako kutasisita kutsi silondvolote tingcondvo tetfu. Nasesente loko, Jehova wetsembisa kutsi angeke aze asivumele silingwe ngetulu kwaloko lesingakhona kukwetfwala. (1 Khor. 10:12, 13) Ngamunye wetfu kufanele athantaze kakhulu kunakucala, acele kuhlale etsembekile kuJehova kulamalanga ekugcina lamatima. Jehova ufuna sithantaze kuye ‘simtjele konkhe lokusetinhlitiyweni tetfu.’ (Hla. 62:8) Dvumisa Jehova futsi umbonge ngako konkhe lakwentako. Mcele akusite kutsi ube nesibindzi nawushumayela. Mncenge akusite ukhone kubhekana nanobe nguyiphi inkinga futsi ukhone kulwisana nesilingo lokungenteka ubhekane naso. Ungavumeli lutfo futsi ungavumeli muntfu kutsi akuyekelise kuthantaza kuJehova njalo. w23.05 7 ¶17-18

Yini leyenta sibe khona emihlanganweni yelibandla? Ngalokuyinhloko, kuze sidvumise Jehova. (Hla. 26:12; 111:1) Siphindze sibe khona emihlanganweni kuze sikhutsatane kuletikhatsi letimatima. (1 Thes. 5:11) Nasiphakamisa sandla futsi siphendvula, sisuke sidvumisa Jehova futsi sikhutsatana. Kodvwa kunetintfo letingenta kube matima kuphendvula. Kungenteka sesabe kuphendvula nobe kungenteka sifune kuphendvula kodvwa utfole kutsi asikhonjwa tikhatsi lesifisa kukhonjwa ngato. Yini lengasisita nasibhekene naletimo? Umphostoli Pawula watsi kufanele sinake kakhulu ‘kukhutsatana.’ Nangabe sibona kutsi labo labasemihlanganweni bangakhutsatwa yimphendvulo lemelula leveta kukholwa kwetfu, angeke sikwesabe kakhulu kuphendvula. Nangabe singakhonjwa tikhatsi lesifise kukhonjwa ngato, singajabula ngekutsi labanye ebandleni batawutfola litfuba lekuphendvula.​—1 Phet. 3:8. w23.04 20 ¶1-3

INkhosi beyikhiphe simemetelo! EmaJuda lebekatfunjwe eBhabhulona iminyaka lengaba ngu-70, bekakhululekile kutsi abuyele eveni lawo ka-Israyeli. (Ezra 1:2-4) NguJehova kuphela lebekangakwenta loku. IBhabhulona beyingakavami kukhulula bantfu lebeyibatfumbile. (Isa. 14:4, 17) Kodvwa iBhabhulona beyincotjiwe, futsi umbusi wayo lomusha watjela emaJuda kutsi angahamba. Onkhe emaJuda, ikakhulukati tinhloko temindeni, bekufanele ente sincumo: kutsi atawuhamba yini eBhabhulona nobe cha. Bekungasimelula kwenta lesincumo. Kusenekwenteka linyenti lawo beselikhulile kutsi lingatsatsa loluhambo loludze. Ngetulu kwaloko, linyenti lemaJuda belitalelwe eBhabhulona, ngako iBhabhulona bekukuphela kwelikhaya labanalo. Kubo, ka-Israyeli bekuyindzawo yabokhokho bawo, hhayi likhaya labo. Kusenekwenteka lamanye emaJuda besekanemcebo eBhabhulona, ngako bekangakutfola kumatima kushiya emakhaya awo lantofontofo nobe emabhizinisi awo futsi ayohlala eveni langalati. w23.05 14 ¶1-2

LiVi laNkulunkulu lisikhutsata kutsi sichubeke sicinisela, sibe neluvelo futsi sichubeke sitsandzana. Lukha 21:19 utsi: “Ngekucinisela kwenu nitawusindzisa kuphila kwenu.” KubaseKholose 3:12 utsi: “Gcokani luvelo.” Kantsi 1 KubaseThesalonika 4:9, 10 utsi: “Nifundziswa nguNkulunkulu kutsi nitsandzane. . . . Kodvwa sinikhutsata ngalokugcwele kutsi nichubeke nikwenta.” Onkhe lamavesi bekabhalelwe emaKhristu lebekavele akukhombisile kucinisela, luvelo kanye nelutsandvo. Nanobe kunjalo, bekufanele achubeke atenta letintfo. Natsi kufanele sente lokufanako. Kuze ukhone kukwenta loku, cabanga ngekutsi lamaKhristu ekucala abukhombisa njani lobuntfu. Utawubese uyabona kutsi ungawalingisa njani lamaKhristu, lokutawukwenta ukhombise kutsi ukulungele kuhlupheka lokukhulu. Nakucala kuhlupheka lokukhulu, utawube sewukufundzile kucinisela futsi utawutimisela kuchubeka ucinisela. w23.07 3 ¶4, 8

Ngisho nobe singulabagcotjiwe nobe singemalunga aletinye timvu, kufanele sichubeke sihamba ‘Ngemgwaco Webungcwele.’ Kwenta njalo kutasisita kutsi sichubeke sikhonta Jehova nyalo nasesikhatsini lesitako, lapho uMbuso utawuletsa timo letijabulisako lamhlabeni. (Joh. 10:16) Kusukela nga-1919 C.E., tigidzi temadvodza, bafati nebantfwana tashiya iBhabhulona Lenkhulu, lokungumbuso wemhlaba wenkholo yemanga, futsi tacala kuhamba kulomgwaco longumfanekiso. Ngesikhatsi emaJuda aphuma eBhabhulona, Jehova wasusa tintfo lebetingawavimba endleleni. (Isa. 57:14) Kutsiwani ‘Ngemgwaco Webungcwele’ walamuhla? Eminyakeni leminyenti ngaphambi kwa-1919, Jehova wasebentisa emadvodza lamhlonipha kakhulu kutsi avule indlela lephuma eBhabhulona Lenkhulu. (Catsanisa na-Isaya 40:3.) Enta umsebenti wekulungiselela umgwaco lebewutawenta kutsi bantfu labanetinhlitiyo leticotfo baphume eBhabhulona Lenkhulu futsi bakhonte Jehova nebantfu bakhe. w23.05 15-16 ¶8-9

Jehova ufuna simkhonte sijabulile futsi ngalokusuka enhlitiyweni. (2 Khor. 9:7) Ngako kufanele yini setame kufinyelela umgomo ngisho nobe singakhanuki? Cabanga ngesibonelo saPawula. Watsi: “Ngiwekhuta kamatima umtimba wami futsi ngiwenta sigcili.” (1 Khor. 9:25-27, umbhalo longentasi) Ngisho nobe Pawula bekete sifiso sekwenta loko Jehova bekatsi akakwente, bekaticindzetela kuze akwente. Wakwemukela yini Jehova loko? Yebo. Wambusisa ngaloko beketama kukwenta. (2 Thim. 4:7, 8) Ngendlela lefanako, Jehova uyajabula nakasibona setama kufinyelela umgomo ngisho nobe site sifiso sekwenta kanjalo. Uyajabula ngobe uyati kutsi nanobe singakutsandzi loko lesikwentako, kodvwa siyakwenta ngoba sitsandza yena. Njengobe nje ambusisa Pawula, natsi utasibusisa ngaloko lesetama kukwenta. (Hla. 126:5) Nasibona indlela Jehova lasibusisa ngayo, singabese siba naso sifiso. w23.05 29 ¶9-10

Umphostoli Pawula wafananisa labo labangeke basindze nebantfu labalele. Ababoni kutsi kwentekani, futsi abanaki kutsi sikhatsi siyahamba. Ngako ababoni nakwenteka tintfo letibalulekile futsi abenti lutfo nakwenteka letintfo. Lamuhla, bantfu labanyenti bafana nebantfu labalele. (Rom. 11:8) Abanendzaba nebufakazi bekutsi siphila ‘emalangeni ekugcina’ nebekutsi kuhlupheka lokukhulu kusondzela ngekushesha. (2 Phet. 3:3, 4) Kodvwa siyati kutsi seluleko lesiphefumulelwe sekutsi sihlale siphapheme siya ngekubaluleka kakhulu lilanga ngelilanga. (1 Thes. 5:6) Ngako, kufanele sihlale sinemoya lophansi futsi sime sicine. Leni? Kuze singatingeneli tindzaba tepolitiki nobe tindzaba letiseveni. Sitawucindzetelwa kakhulu kutsi sitsatse luhlangotsi kuloku njengobe lilanga laJehova liya ngekusondzela. Nobe kunjalo, akukafaneli sikhatsateke ngekutsi sitawenta njani. Umoya waNkulunkulu ungasisita kutsi sihlale sinemoya lophansi futsi sisangulukile engcondvweni siphindze sente tincumo letihlakaniphile.​—Luk. 12:11, 12. w23.06 10 ¶6-7

Yini lefika engcondvweni yakho nawuva ligama laSamsoni? Kungenteka ucabanga ngendvodza lebeyinemandla lamakhulu. Vele beyinemandla. Kodvwa Samsoni wenta sincumo lesibi lesaba nemiphumela lebuhlungu. Nobe kunjalo, Jehova wanaka loko lokwentiwa nguSamsoni kuze amkhonte futsi Nkulunkulu wenta kutsi sibonelo sakhe lesihle sibhalwe eBhayibhelini kuze kusitakale tsine. Jehova wasebentisa Samsoni kutsi afeze tintfo letimangalisako kuze asite bantfu bakhe labakhetsile, lokungema-Israyeli. Ngemuva kwemakhulu eminyaka Samsoni afa, Jehova waphefumulela umphostoli Pawula kutsi asho neligama laSamsoni nakabala emadvodza letsembekile. (Heb. 11:32-34) Singasikhutsata sibonelo saSamsoni. Wetsembela kuJehova, loko wakwenta ngisho nangetikhatsi letimatima. Singafundza esibonelweni sakhe futsi sikhutsateke. w23.09 2 ¶1-2

Lokungasisita kuze sicinisele kutsi sihlale sithantaza kuJehova simtjele konkhe lokusikhatsatako. (1 Thes. 5:17) Mhlawumbe nyalo awukabhekani nenkinga lenkhulu. Nobe kunjalo, uyasicela yini sicondziso saJehova nangabe utfukutsele, udidekile nobe ungati kutsi kufanele wenteni? Nangabe uhlale uthantaza kuNkulunkulu kuze akusite ngetintfo letincane letikukhatsatako tamalanga onkhe, kutawuba melula kutsi wente kanjalo ngisho ubhekana netinkinga letinkhulu esikhatsini lesitako. Nawenta njalo, utawuciniseka kutsi yena uyati kutsi akusite nini nekutsi kanjani. (Hla. 27:1, 3) Manyenti ematfuba ekutsi sikhone kucinisela esikhatsini lesitako ngekuhlupheka lokukhulu nangabe kwanyalo sicinisela nasinetinkinga. (Rom. 5:3) Sisho ngani? Bazalwane nabodzadze labanyenti babonile kutsi njalo nabacinisela nabanetinkinga, loko kuyabasita kutsi bacinisele nababhekana nenkinga lelandzelako. Kucinisela kubaniketa emandla, kwenta betsembe kakhulu kutsi Jehova ukulungele kubasita nekutsi uyafuna kubasita. Ngetulu kwaloko, kukholwa kubasitile kutsi bacinisele nababhekana nalenye inkinga.​—Jak. 1:2-4. w23.07 3 ¶7-8

Kutfobeka kwaJehova nemusa wakhe kumenta kutsi acabangele. Sibonelo nje, kutfobeka kwaJehova kwabonakala ngesikhatsi afuna kubhubhisa bantfu lababi baseSodoma. Asebentisa tingilosi takhe, watjela Loti lebeketsembekile kutsi abalekele esifundzeni lesinetintsaba. Loti bekesaba kuya lapho. Ngako wancenga Jehova kutsi yena nemndeni wakhe babalekele eSowari, lokulidolobha lelincane nalo lebekufanele libhujiswe. Jehova akazange acindzetele Loti kutsi ente loku latsi akakwente. Kunaloko, wenta njengobe Loti acelile, nanobe loko bekusho kutsi iSowari beyingeke isabhujiswa. (Gen. 19:18-22) Ngemuva kweminyaka leminyenti kwenteke loku, Jehova wabakhombisa umusa bantfu baseNineve. Watfumela umphrofethi Jona kutsi amemetele kutsi lelidolobha nebantfu balo lababi kutawubhujiswa. Kodvwa ngesikhatsi bantfu baseNineve baphendvuka, Jehova wabavela buhlungu wabese akasalibhubhisi lelidolobha.​—Jona 3:1, 10; 4:10, 11. w23.07 21 ¶5

Yini lesingayifundza esibonelweni saJehowashi? Jehowashi bekanjengesihlahla lesinetimphandze letimfishane lesidzinga kusekelwa ngelugodvo. Ngesikhatsi Jehoyada lebekamsekela ashona, Jehowashi wacala kulalela tihlubuki futsi wabese akasetsembeki kuJehova. Lesibonelo sikhombisa kutsi akukafaneli silalele Jehova ngenca nje yemalunga emindeni yetfu nalabanye ebandleni labasibekela sibonelo lesihle sekwenta loko. Kuze ngamunye wetfu ahlale asondzelene naJehova, kufanele simtsandze kakhulu futsi simhloniphe kakhulu. Loko singakwenta ngekutsi sihlale sidadisha liBhayibheli, sicabangisise ngalesikufundzako futsi sithantaze. (Jer. 17:7, 8; Khol. 2:6, 7) Jehova akaceli lokungetulu kwemandla etfu. Loko lakucelako kuchazwe kahle kuMshumayeli 12:13, lotsi: “Yesaba Nkulunkulu weliciniso futsi ugcine imiyalo yakhe, ngobe nguloku lokubaluleke kakhulu umuntfu lokufanele akwente.” Nasesaba Nkulunkulu, sitawukhona kubhekana netinkinga esikhatsini lesitako futsi sime sicinile. Kute lokungacedza buhlobo betfu naJehova. w23.06 19 ¶17-19

Jehova usicinisekisa ngemavi latsi: “Loyo lohleti esihlalweni sebukhosi watsi.” (Semb. 21:5a) Lamavi abalulekile ngobe encwadzini yeSembulo, Jehova ukhuluma tikhatsi letintsatfu asebentisa imibono futsi lesi ngulesinye sato. Lesicinisekiso asisiniketwa yingilosi lenemandla nobe nguJesu, kodvwa sishiwo nguJehova matfupha! Loku kusikhombisa kutsi singakwetsemba mbamba loko labese uyakusho. Sisho ngani? Ngobe Jehova ‘angeke acale emanga.’ (Thit. 1:2) Ngako singawetsemba lamavi lesiwafundza kuSembulo 21:5, 6. Kuliciniso kutsi Jehova ukhuluma ngetingucuko letitakwenteka esikhatsini lesitako. Kodvwa uyaciniseka kutsi lesetsembiso sitawufezeka kangangekutsi ukhuluma kube ngatsi letingucuko setivele tiyenteka.​—Isa. 46:10. w23.11 3-4 ¶7-8

Umphostoli Phetro bekalwa nebutsakatsaka bakhe. Cabanga nganati tibonelo letimbalwa. Ngesikhatsi Jesu achaza indlela lebekatawuhlupheka ngayo futsi abulawe ngayo kuze agcwalise siphrofetho seliBhayibheli, Phetro wamekhuta. (Mak. 8:31-33) Ngalokuphindzaphindziwe, Phetro kanye nalalabanye baphostoli bebasolo baphikisana ngekutsi ngubani lomkhulu. (Mak. 9:33, 34) Ngebusuku bekugcina ngaphambi kwekufa kwaJesu, ngekuphamatela Phetro wajuba indlebe yalenye indvodza. (Joh. 18:10) Ngabo lobo busuku, Phetro wesaba futsi waphika tikhatsi letintsatfu kutsi uyamati Jesu lebekangumngani wakhe. (Mak. 14:66-72) Ngenca yaloko Phetro wakhala kabuhlungu. Jesu akazange amlahle lomphostoli wakhe lobekadvumatekile. Nasekavusiwe Jesu, waniketa Phetro litfuba lekukhombisa kutsi solo usamtsandza. Jesu waniketa Phetro umsebenti wekwelusa timvu takhe. (Joh. 21:15-17) Phetro wawemukela lomsebenti. BekaseJerusalema ngelilanga leliPhentekhoste futsi bekasemkhatsini walabo lababa bekucala kutsi bagcotjwe ngemoya longcwele. w23.09 22 ¶6-7

Umphostoli Phetro wakhutsata labadzala belibandla kutsi “beluse umhlambi waNkulunkulu.” (1 Phet. 5:1-4) Nangabe ungulomdzala welibandla, siyati kutsi uyabatsandza bazalwane bakho nabodzadze futsi uyafuna kubelusa. Nobe kunjalo, ngaletinye tikhatsi ungeva ngatsi umatasa kakhulu nobe udzinwe kakhulu kutsi ungenta lomsebenti. Yini longayenta? Thantaza kuJehova, umtjele loko lokukukhatsatako. Phetro wabhala watsi: “Nangabe lotsite asita labanye, loko akakwente etsembele emandleni lavela kuNkulunkulu.” (1 Phet. 4:11) Kungenteka bazalwane bakho nabodzadze babhekene netinkinga letingeke ticatululeke nyalo. Kodvwa khumbula kutsi “umelusi lomkhulu,” lokunguJesu Khristu, angabasita kwendlula nobe ngabe ngubani. Loko angakwenta nyalo naseveni lelisha. Nkulunkulu ucela labadzala belibandla kutsi bamane nje batsandze bazalwane babo, babeluse futsi babe “tibonelo emhlambini.” w23.09 29-30 ¶13-14

Kufanele sikugweme kwetsembela emibonweni yebantfu. Nangabe sibuka tintfo ngendlela bantfu labatibuka ngayo, singahle singasamlaleli Jehova netimiso takhe. (1 Khor. 3:19) “Kuhlakanipha kwalelive” kuvame kujabulisa tifiso tenyama. Lamanye emaKhristu asePhegamu naseThiyathira alalela bantfu labatiphatsa kabi nalabakhonta tithico. Jesu wawanika seluleko lesicinile lamabandla ngenca yekutsi bekakwemukela kutiphatsa kabi. (Semb. 2:14, 20) Lamuhla, sicindzetelwa kutsi semukele imibono yebantfu lengakalungi. Emalunga emndeni kanye nebantfu lesibatiko bangahle batsi sitincisha injabulo futsi basikhutsate kutsi singayilaleli imitsetfo yaJehova. Sibonelo nje, bangahle batsi akusikubi kwenta loko lesikufisako nekutsi timiso teliBhayibheli tekutiphatsa setiphelelwe sikhatsi. Ngalesinye sikhatsi, singahle sicabange kutsi sicondziso lesisinikwa nguJehova asivakali kahle. Singahle silingeke kutsi ‘secele ngale kwetintfo letibhaliwe.’​—1 Khor. 4:6. w23.07 16 ¶10-11

Mariya, longumake waJesu, bekakudzinga kuciniswa. Bekangakashadi, kodvwa bekatawukhulelwa. Bekangakake akhulise bantfwana bakhe, kodvwa nyalo besekufanele akhulise umfana lebekatawuba nguMesiya. Ngetulu kwaloko, bekangakake alale nendvodza, ngako bekatakuchaza njani konkhe loku kuJosefa lebeketsembisene naye umshado? (Luk. 1:26-33) Mariya wawatfola njani emandla? Wafuna lusito kulabanye. Sibonelo nje, wacela Gabhriyeli kutsi amtjele leminye imininingwane lemayelana nalesabelo. (Luk. 1:34) Ngekushesha nje ngemuva kwaloko, waya kaJuda “lokulive lebelinetintsaba” kuze ayovakashela sihlobo sakhe lokungu-Elizabethe. Elizabethe wancoma Mariya, futsi aphefumulelwe nguJehova, washo siphrofetho lesikhutsatako lebesimayelana nemntfwana waMariya lobekangakatalwa. (Luk. 1:39-45) Mariya watsi Jehova ‘bekente tintfo letinkhulu ngesandla sakhe.’ (Luk. 1:46-51) Jehova wamcinisa Mariya asebentisa Gabhriyeli na-Elizabethe. w23.10 14-15 ¶10-12

Kunelicembu lelincane lebafundzi baKhristu leligcotjwe ngemoya longcwele, futsi linebuhlobo lobukhetsekile naJehova. LamaKhristu langu-144 000 atawuba baphristi ezulwini naJesu. (Semb. 14:1) Indzawo leNgcwele yelithende lekukhontela ifanekisela kutsi Nkulunkulu uwafake esiswini, wawenta aba ngemadvodzana akhe asaphila emhlabeni. (Rom. 8:15-17) INgcwelengcwele lesethendeni lekukhontela ifanekisela lizulu lapho Jehova ahlala khona. ‘Indvwangu’ lebeyehlukanisa iNgcwele neNgcwelengcwele ifanekisela umtimba wenyama waJesu lebewumvimbela kutsi angene ezulwini abe ngumPhristi Lophakeme ethempelini lelingumfanekiso. Ngesikhatsi anikela ngemtimba wakhe loyinyama kutsi ube yinhlawulo yebantfu, Jesu wavulela onkhe emaKhristu lagcotjiwe indlela yekutsi ayophila ezulwini. Nawo kufanele angabi nemtimba wenyama kuze atfole umvuzo wawo wekuyophila ezulwini.​—Heb. 10:19, 20; 1 Khor. 15:50. w23.10 28 ¶13

Gideyoni wehlisa umoya ngesikhatsi baka-Efrayimu bamsola. (Khu. 8:1-3) Akazange abaphendvule atfukutsele. Wakhombisa kutsi utfobekile ngekutsi alalele loko bebakhala ngako futsi akhulume nabo ngemusa, loko kwenta lesimo sabancono. Labadzala belibandla labahlakaniphile balingisa sibonelo saGideyoni ngekutsi balalelisise futsi bakhombise kutfobeka nabasolwa. (Jak. 3:13) Nabenta njalo, libandla litawuba nekuthula. Ngesikhatsi Gideyoni advunyiswa ngekuncoba bakaMidiyani, lonkhe ludvumo walunika Jehova. (Khu. 8:22, 23) Labadzala belibandla bangamlingisa njani Gideyoni? Banganika Jehova lonkhe ludvumo nganobe yini labakhona kuyifeza. (1 Khor. 4:6, 7) Nasi sibonelo, nangabe lomdzala welibandla anconywa ngelikhono lakhe lekufundzisa, angenta kutsi kunakwe umtfombo walemfundvo, lokuliVi laNkulunkulu nobe kunakwe kuceceshwa lakutfole enhlanganweni yaJehova. Labadzala bangacabanga nangekutsi kuyenteka yini ngaletinye tikhatsi bente kunakwe bona kakhulu. w23.06 4 ¶7-8

Nangabe solo asikutfoli loko lesikuthantazelako, singatibuta: ‘Loku lengikuthantazelako kukahle yini?’ Sivame kucabanga kutsi siyakwati loko lokusilungelako. Kodvwa kusenekwenteka tintfo lesitithantazelako ngeke tisisite ngekuhamba kwesikhatsi. Nangabe sithantazela inkinga letsite, ungatfola kutsi kunendlela lencono yekuyilungisa kunaleyo lesiyithantazelako. Ngetulu kwaloko, letinye tintfo lesitithantazelako kungenteka atihambisani nentsandvo yaJehova. (1 Joh. 5:14) Sibonelo nje, cabanga ngebatali labacela Jehova kutsi agcine umntfwana wabo ecinisweni. Loko kubonakala kusicelo lesikahle. Kodvwa Jehova akaphoceleli muntfu kutsi amkhonte. Ufuna kutsi sonkhe sitikhetsele kumkhonta, lokufaka ekhatsi bantfwana betfu. (Dut. 10:12, 13; 30:19, 20) Ngako labatali bebangacela Jehova kutsi abasite bakhone kutsintsa inhlitiyo yemntfwana wabo kuze atsandze Jehova futsi abe ngumngani wakhe.​—Taga 22:6; Ef. 6:4. w23.11 21 ¶5; 23 ¶12

Yini leyenta kudvudvuta labanye kube yindlela lebalulekile yekubakhombisa kutsi siyabatsandza? Ngekusho kwalenye incwadzi, ligama lelasetjentiswa nguPawula lelitsi “kudvudvuta” lisho “kuma eceleni kwalotsite futsi umkhutsate nakabhekene neluvivinyo lolumatima.” Ngako nasidvudvuta umzalwane nobe dzadze locindzetelekile sisuke simsita kutsi achubeke akhonta Jehova ngekwetsembeka. Ngaso sonkhe sikhatsi nasiba lihlombe lekukhalela lemzalwane wetfu nobe dzadze, sisuke sikhombisa kutsi siyamtsandza. (2 Khor. 7:6, 7, 13) Kuba neluvelo kuhlobene nekudvudvuta. Njani? Nangabe lotsite amvela umuntfu locindzetelekile, ufuna kumdvudvuta futsi etame kwenta lokutsite kuze amsite. Ngako sicale simvele; bese siyamdvudvuta. Pawula wachaza kutsi luvelo lwaJehova ngebantfu lumenta abadvudvute. Wachaza Jehova ngekutsi ‘nguBabe wemusa, naNkulunkulu wayo yonkhe indvudvuto.’​—2 Khor. 1:3. w23.11 9-10 ¶8-10

Bonkhe balandzeli baKhristu kufanele batilindzele tinkinga. Cabanga ngaloko lokwenteka kumphostoli Pawula. Watjela baseThesalonika watsi: “Ngesikhatsi sisenani, besinitjela kutsi sitawuhlupheka, futsi nguloko vele lokwentekile.” (1 Thes. 3:4) Wabhalela nebaseKhorinte watsi: “Asifisi bazalwane kutsi ningati ngekuhlupheka lesahlangabetana nako . . . Besesingetsembi nekutsi sitawusindza. (2 Khor. 1:8; 11:23-27) Lamuhla emaKhristu angatilindzela tinkinga. (2 Thim. 3:12) Njengobe ukholwa kuJesu futsi umlandzela, kungenteka tihlobo nebangani bakho bakuphatse kabi. Kutimisela kwakho kutsi wetsembeke kuto tonkhe tintfo kukubangele tinkinga yini emsebentini? (Heb. 13:18) Ukile yini waphikiswa nguhulumende ngenca yekutsi ucocela labanye ngelitsemba lakho? Kodvwa ngisho sibhekene natiphi tinkinga, Pawula utsi kufanele sijabule. w23.12 10-11 ¶9-10

Jakobe wabeketelela tinkinga letinyenti. Emadvodzana aJakobe lamabili, lokunguSimeyoni naLevi, awuhlaza kakhulu lomndeni, ahlaza nelibito laJehova. Ngetulu kwaloko, umfati waJakobe lebekamtsandza, lokunguRakheli, washona ngesikhatsi abeleka umntfwana wabo wesibili. Ngenca yendlala lenkhulu lebeyikhona kulelive, kwadzingeka kutsi Jakobe lebesekakhulile atfutsele eGibhithe. (Gen. 35:16-19; 37:28; 45:9-11, 28) Nanobe Jakobe abhekana nato tonkhe letinkinga, wachubeka ametsemba Jehova netetsembiso takhe. Ngenca yaloko, Jehova wamkhombisa kutsi uyamemukela. Sibonelo nje, Jehova wambusisa ngetintfo letinyenti. Cabanga futsi kutsi wambonga kanganani Jehova ngesikhatsi aphindze abona Josefa lebekacabanga kutsi kadze afa! Buhlobo lobuhle Jakobe lebekanabo naJehova bamsita kutsi akhone kubeketelela tinkinga takhe. (Gen. 30:43; 32:9, 10; 46:28-30) Nangabe natsi sihlale sinebuhlobo lobuhle naJehova, singakhona kubhekana nanobe ngutiphi tinkinga lesingakatilindzeli. w23.04 15 ¶6-7

Tihlabelelo 23 yingoma leveta kuciniseka kwemhlabeleli ngekutsi Jehova uyamtsandza futsi utamnakekela. Davide longumbhali walesihlabelelo, uchaza budlelwane lobuhle lobusemkhatsini wakhe neMelusi wakhe, lokunguJehova. Davide bekativa avikelekile ngekuvumela Jehova kutsi amcondzise, futsi beketsembele kuye ngalokuphelele. Bekati kutsi lutsandvo lwaJehova belutamlandzela onkhe emalanga ekuphila kwakhe. Yini leyamenta waciniseka ngaloku? Davide bekativa anakekeleke kahle ngobe Jehova bekahlale amnika konkhe lakudzingako. Ngetulu kwaloko, bekanebuhlobo lobuhle naJehova futsi bekamemukela. Kungako bekaciniseka ngekutsi nanobe kungentekani esikhatsini lesitako, Jehova bekatawuchubeka anakekela tidzingo takhe. Ngenca yekutsi Davide beketsemba kutsi Jehova uyamtsandza nekutsi utamnakekela, loko kwamsita wangakhatsateki, esikhundleni saloko wajabula futsi wenetiseka.​—Hla. 16:11. w24.01 29 ¶12-13

Kusukela ngeMphi Yelive Yesibili, bantfu baJehova emaveni lamanyenti bajabulele kuthula nenkhululeko lesezingeni lelitsite nabasenta umsebenti wekushumayela. Ecinisweni, lomsebenti ube yimphumelelo. Lamuhla Sigungu Lesibusako siyachubeka nekufuna sicondziso saKhristu. Sifuna kutsi ticondziso lesitinika bazalwane tivumelane nembono waNkulunkulu. Sisebentisa babonisi labajikeletako nalabadzala belibandla kuze banike emabandla ticondziso. Labadzala belibandla ‘basesandleni saKhristu sangesekudla.’ (Semb. 2:1) Kuliciniso kutsi labazalwane banesono futsi bayawenta emaphutsa. Njengebaphostoli, boMosi naJoshuwa nabo bebahle benta emaphutsa. (Num. 20:12; Josh. 9:14, 15; Rom. 3:23) Nobe kunjalo, Khristu uyachubeka acondzisa sisebenti lesetsembekile kanye nalabadzala belibandla, futsi utawuchubeka enta njalo. Ngako sinesizatfu lesivakalako sekusetsemba sicondziso lasinika sona asebentisa labo labaholako. w24.02 23-24 ¶13-14

Lamuhla singamjabulisa Jehova ngekutsi sikhulume ngaye ngendlela lekhombisa kutsi simtsandza kakhulu futsi simhlonipha kakhulu. Nasenta umsebenti wekushumayela, sihlale sikhumbula kutsi umgomo wetfu kusita bantfu kutsi basondzelane naJehova futsi sibasite bative ngendlela lesitiva ngayo ngaBabe wetfu lesimtsandzako. (Jak. 4:8) Siyakujabulela kukhombisa bantfu indlela liBhayibheli lelimchaza ngayo Jehova, livete lutsandvo lwakhe, kulunga, kuhlakanipha, emandla kanye nalobunye buntfu bakhe lobuhle. Siphindze simdvumise futsi simjabulise nasenta konkhe lokusemandleni kuze simlingise. Nasenta njalo, siyehluka kulelive lelibi. Bantfu bangahle banake kutsi sehlukile futsi batibute kutsi kwentiwa yini loko. (Mat. 5:14-16) Njengobe sicoca nabo nobe ngukuphi, singabachazela kutsi kwentiwa yini kutsi sehluke. Ngenca yaloko, bantfu labacotfo bangasondzelana naNkulunkulu wetfu. Nasidvumisa Jehova ngaletindlela, sisuke sijabulisa inhlitiyo yakhe.​—1 Thim. 2:3, 4. w24.02 10 ¶7

Kuze ube ngumKhristu lovutsiwe, kufanele ufundze emakhono lalusito. Loku kutakusita kutsi wente imisebenti letsite ebandleni, utfole umsebenti kuze utinakekele nobe unakekele umndeni wakho futsi ube nebuhlobo lobuhle nalabanye. Sibonelo nje, fundza kufundza kahle nekubhala kahle. LiBhayibheli litsi umuntfu lojabulako nalophumelelako ngulotinika sikhatsi onkhe malanga afundze liVi laNkulunkulu futsi acabangisise ngalo. (Hla. 1:1-3) Kufundza liBhayibheli onkhe malanga kutawumenta ati indlela Jehova lacabanga ngayo, lokutamsita kutsi acabange kahle futsi afundze kusebentisa imiBhalo. (Taga 1:3, 4) Bazalwane betfu nabodzadze betsembele kubazalwane labakhonako kubafundzisa futsi babanikete seluleko lesivela eBhayibhelini. Nangabe ukhona kufundza kahle nekubhala kahle, utawukhona kulungiselela tinkhulumo kanye netimphendvulo letitawusita labanye futsi ticinise kukholwa kwabo. Ngetulu kwaloko, utawukhona kubhala emaphuzu lalusito latakusita kutsi ucinise kukholwa kwakho futsi ukhutsate nalabanye. w23.12 26-27 ¶9-11

Nawutiva wesaba, cabangisisa ngaloko Jehova latakwenta esikhatsini lesitako nasekangekho Sathane. Emhlanganweni wesifundza wa-2014 kwaba nemboniso walomunye babe bekacoca nemndeni wakhe ngekutsi umbhalo wa-2 KuThimothi 3:1-5 bewungabekwa njani kube lamavesi bekasho kutsi kutawuba njani kuphila ePharadisi, watsi: “Emhlabeni lomusha kutawuba netikhatsi letijabulisako. Ngobe bantfu batawutsandza labanye, batsandze liciniso, balinganisele, batfobeke, badvumise Nkulunkulu, balalele batali, babonge, betsembeke, batsandze imindeni yabo, bavume kwenta tivumelwane, bahlale bakhuluma kahle ngalabanye, batibambe, babe nemoya lophansi, batsandze lokuhle, bakhulume liciniso, batfobele labanye, bangatigcabhi, batsandze Nkulunkulu kunekutsandza injabulo, indlela labaphila ngayo ikhombise kutsi bamhlonipha mbamba Nkulunkulu; bantfu labanjalo ubonamatsela kubo.” Kuyenteka yini kutsi wena nemndeni wakho nobe nalabanye bazalwane nicoce ngekutsi kutawuba njani kuphila emhlabeni lomusha? w24.01 6 ¶13-14

Kujabulisa kakhulu kwati kutsi Jehova uyabemukela bantfu bakhe! LiBhayibheli litsi: “Jehova uyabatsandza bantfu bakhe.” (Hla. 149:4) Kodvwa ngaletinye tikhatsi singahle sidvumateke kakhulu size sitibute: ‘Jehova uyajabula yini ngami?’ Tikhonti taJehova letinyenti letetsembekile tangesikhatsi sekubhalwa kweliBhayibheli betitibuta lombuto. (1 Sam. 1:6-10; Jobe 29:2, 4; Hla. 51:11) LiBhayibheli lisho ngalokucacile kutsi bantfu labanesono bangemukelwa nguJehova. Njani? Kufanele sibe nekukholwa kuJesu Khristu futsi sibhajatiswe. (Joh. 3:16) Nasenta njalo, sikhombisa labanye kutsi sesiphendvukile etonweni tetfu futsi setsembisa Nkulunkulu kutsi sitawenta intsandvo yakhe. (Imis. 2:38; 3:19) Jehova uyajabula nasikwenta loko kuze sibe nebuhlobo lobuhle naye. Nangabe senta konkhe lesingakwenta kuze sigcine setsembiso lesasenta nasitinikela kuJehova, yena uyasemukela futsi asitsatse njengebangani bakhe labakhulu.​—Hla. 25:14. w24.03 26 ¶1-2

Singabalingisa labafundzi ngekutsi sichubeke nemsebenti wekushumayela ngisho nobe tiphatsimandla titsi asiwuyekele. Singaciniseka kutsi Jehova utasisita siwente umsebenti wekushumayela. Ngako singathantaza sicele sibindzi nekuhlakanipha nekutsi sikhone kubeketelela tinkinga. Linyenti letfu liyagula nobe licindzetelekile emoyeni, sishonelwa bantfu lesibatsandzako, sinetinkinga temindeni, siphatfwa kabi naletinye nje tinkinga. Tifo letihlasela umhlaba wonkhe kanye netimphi tenta linyenti laletinkinga kube matima kakhulu kubhekana nato. Tfulula sifuba sakho kuJehova, mtjele ngalesimo ngendlela longatjela ngayo umngani wakho lomkhulu. Ciniseka kutsi Jehova “utakusita.” (Hla. 37:3, 5) Kuphikelela emthantazweni kutasisita kutsi ‘sicinisele nasihlushwa.’ (Rom. 12:12) Jehova uyakwati loko bantfu bakhe lababhekene nako, “uyabeva nabakhalela lusito.”​—Hla. 145:18, 19. w23.05 5-6 ¶12-15

Nakufanele sente tincumo letibalulekile, kufanele sicondze kutsi “iyini intsandvo yaJehova” bese senta ngekuvumelana nayo. (Ef. 5:17) Nasifuna timiso teliBhayibheli letingasisita esimeni lesikuso, sisuke sifuna umbono waNkulunkulu ngaleyo ndzaba. Nasisebentisa timiso takhe, sitawukhona kwenta tincumo letikahle. ‘Lomubi,’ lokusitsa setfu Sathane, ufuna sibe matasatasa kakhulu ngetintfo talelive size sibebete sikhatsi sekwenta tintfo letiphatselene nekukhonta Nkulunkulu. (1 Joh. 5:19) UmKhristu angacala kunaka kakhulu kwakha imali lenyenti, imfundvo nemsebenti kunekutsi anake iminyango leminyenti lemvulekele emsebentini waJehova. Nangabe loko bekungenteka, bekungakhombisa kutsi sewucala kucabanga njengebantfu balelive. Kuliciniso kutsi letintfo atisitimbi, kodvwa akukafaneli tite kucala ekuphileni kwetfu. w24.03 24 ¶16-17