Jehova Utayiphendvula Yini Imithantazo Yami?

1-2. Yini lengenta sibone ngatsi Jehova akayiphendvuli imithantazo yetfu?

“JABULA kakhulu ngaJehova, futsi yena utawenetisa tifiso tenhlitiyo yakho.” (Hla. 37:4) Saze saba sihle lesetsembiso! Kodvwa kufanele yini silindzele kutsi Jehova asiphe ngaleso sikhatsi konkhe lesikucelako? Yini lengenta sibute lombuto? Cabanga nganati tibonelo letilandzelako. Dzadze longakashadi uthantazela kuya eSikolweni Sebavangeli BeMbuso. Kodvwa kuphela iminyaka angabitwa. Umzalwane losemusha ucela Jehova kutsi amsite elulame ekuguleni lanako kuze atawukhona kwenta lokunyenti ebandleni. Kodvwa akabi ncono. Batali labangemaKhristu bathantazela kutsi umntfwana wabo ahlale ecinisweni. Kodvwa umntfwana wabo ukhetsa kuyekela kukhonta Jehova.

² Kungenteka nawe uke wacela lokutsite kuJehova kodvwa wangakutfoli. Ngenca yaloko, ungahle ucabange kutsi Jehova uyayiphendvula imithantazo yalabanye kodvwa akayiphendvuli yakho. Nobe ungacabanga kutsi kungenteka kunalokubi lokwentile. Lomunye dzadze lokutsiwa nguJaniceb wativa ngaleyondlela. Yena nendvodza yakhe bathantaza ngesifiso sabo sekuyosebenta eBethel. Utsi: “Bengicabanga kutsi sitawube sesiseBethel kungapheli sikhatsi lesingakanani.” Kodvwa tinyanga taba yiminyaka, futsi bebasolo bangabitwa. Janice utsi: “Ngeva buhlungu futsi ngadideka. Bengitibuta kutsi ngimdvumate ngani Jehova. Bengithantaze kakhulu ngekuyosebenta eBethel. Solo akawuphendvuli ngani lomthantazo wami?”

3. Sitawucoca ngani kulesihloko?

³ Ngaletinye tikhatsi singahle sitibute kutsi Jehova uyayilalela yini imithantazo yetfu. Ngisho nalamanye emadvodza letsembekile asesikhatsini lesendlulile bekatibuta loko. (Jobe 30:20; Hla. 22:2; Hab. 1:2) Yini lengakwenta uciniseke kutsi Jehova utayiphendvula imithantazo yakho? (Hla. 65:2) Kuze siphendvule lombuto, kutawudzingeka sicale siphendvule nayi imibuto lelandzelako: (1) Yini lesingayilindzela kuJehova? (2) Yini Jehova layilindzele kitsi? (3) Yini lengenta kudzingeke kutsi sishintje loko lesikuthantazelako?

YINI LESINGAYILINDZELA KUJEHOVA?

4. Ngekusho kwaJeremiya 29:12, yini Jehova letsembisa kuyenta?

⁴ Jehova wetsembisa kuyilalela imithantazo yetfu. (Fundza Jeremiya 29:12.) Nkulunkulu wetfu uyatitsandza tinceku takhe letetsembekile, ngako utawuhlale ayilalela imithantazo yato. (Hla. 10:17; 37:28) Nobe kunjalo, loko akusho kutsi utasiniketa konkhe lesikucelako. Kungahle kudzingeke silindze size sifike eveni lelisha ngaphambi kwekutsi sitfole letinye tintfo lesiticelako.

5. Yini Jehova lacabanga ngayo nakalalela imithantazo yetfu? Chaza.

⁵ Jehova ucabanga ngekutsi loko lesikucelako kuyitsintsa njani injongo yakhe. (Isa. 55:8, 9) Lenye injongo yakhe ikutsi umhlaba ugcwale bantfu labamlalela bajabulile njengobe anguMbusi wabo. Kodvwa Sathane utsi bantfu bangajabula nabangatibusa bona. (Gen. 3:1-5) Kuze Jehova akhombise kutsi Develi unemanga, uvumele bantfu kutsi batibuse. Kodvwa kutibusa kwebantfu kubangele tinkinga letinyenti lamuhla. (Shu. 8:9) Siyati kutsi Jehova angeke aticedze tonkhe letinkinga nyalo. Kube bekangakwenta loko, labanye bebangatsi kutibusa kwebantfu kuyaphumelela futsi bayakhona kulungisa tinkinga tabo.

6. Yini leyenta kudzingeke siciniseke kutsi Jehova utawuhlale enta tintfo ngendlela lenelutsandvo nalelungile?

⁶ Jehova angahle aphendvule imithantazo lefanako ngetindlela letingafani. Nasi sibonelo, ngesikhatsi iNkhosi Hezekiya igula kamatima, yancenga Jehova kutsi ayisite ilulame. Jehova wayisita. (2 Khos. 20:1-6) Kodvwa ngesikhatsi umphostoli Pawula acela Jehova kutsi asuse “linyeva enyameni,” lokungenteka bekukugula lokutsite, Jehova akazange ayisuse lenkinga. (2 Khor. 12:7-9) Cabanga nangesibonelo semphostoli Jakobe nemphostoli Phetro. INkhosi Herodi beyifuna kubabulala bobabili. Libandla lathantazela Phetro, futsi kungenteka lamthantazela naJakobe. Nobe kunjalo, Jakobe wabulawa kodvwa Phetro wasindziswa ngalokusimangaliso. (Imis. 12:1-11) Singahle sitibute: ‘Yini leyenta Jehova wasindzisa Phetro kodvwa wangamsindzisi Jakobe?’ LiBhayibheli alisitjeli.c Kodvwa siyaciniseka kutsi Jehova ‘ngeke ente tintfo letingakalungi.’ (Dut. 32:4) Ngetulu kwaloko, siyati kutsi Jehova bekabatsandza bobabili boPhetro naJakobe. (Semb. 21:14) Ngaletinye tikhatsi Jehova angaphendvula imithantazo yetfu ngetindlela lebesingakatilindzeli. Kodvwa ngenca yekutsi siyaciniseka kutsi Jehova utawuhlale aphendvula imithantazo yetfu ngendlela lenelutsandvo nalelungile, asimsoli ngendlela lakhetsa kuyiphendvula ngayo imithantazo yetfu.​—Jobe 33:13.

7. Yini lesetama kuyibalekela, futsi leni?

⁷ Siyetama kubalekela kucatsanisa simo lesibhekene naso nesalabanye. Sibonelo nje, singahle sicele Jehova kutsi asisite ngendlela letsite, kodvwa sicelo setfu singaphendvulwa. Ngekuhamba kwesikhatsi, bese siva kutsi kunalomunye locele lokufanako futsi Jehova umnikile loko bekakucela. Nguloko lokwenteka kulomunye dzadze lokutsiwa ngu-Anna. Wathantazela kutsi indvodza yakhe lokunguMatthew, yelulame kumdlavuza. Ngaleso sikhatsi, bodzadze lababili lasebakhulile nabo bebanamdlavuza. Anna wamthantazela kakhulu Matthew nalabodzadze. Labodzadze baphila, kodvwa Matthew washona. Ekucaleni Anna bekatibuta kutsi nguJehova yini lowente labodzadze baphila. Nangabe kunjalo, yini leyente wangawuphendvuli umthantazo wakhe wekutsi indvodza yakhe yelulame? Kuliciniso kutsi asati kutsi yini leyenta labodzadze lababili baphila. Kodvwa lesikwatiko kutsi Jehova utakucedza konkhe kuhlupheka kwetfu ngalokuphelele nekutsi uyakulangatelela kuvusa bangani bakhe labafile.​—Jobe 14:15.

8. (a) Ngekusho kwa-Isaya 43:2, Jehova usisita njani? (b) Umthantazo ungasisita njani nasibhekene netinkinga letimatima? (Bukela i-video letsi Umthandazo Uyasisiza Sikhuthazele.)

⁸ Jehova utawuhlale asisita. Njengobe Jehova anguBabe wetfu lositsandzako, akajabuli nakasibona siva buhlungu. (Isa. 63:9) Nobe kunjalo, akasivikeli kuto tonkhe tinkinga lesibhekana nato letingafananiswa nemifula nobe emalangabi. (Fundza Isaya 43:2.) Kodvwa wetsembisa kusisita ‘sidzabule emkhatsini’ wato. Angeke avume kutsi tinkinga tetfu tisente siyekele kumkhonta. Jehova uphindze asiphe umoya wakhe longcwele lonemandla kuze usisite sicinisele. (Luk. 11:13; Fil. 4:13) Ngenca yaloko, singaciniseka kutsi sitawuhlale sinaloko lesikudzingako kuze sicinisele futsi sihlale setsembekile kuye.d

YINI JEHOVA LAYILINDZELE KITSI?

9. Ngekuvumelana naJakobe 1:6, 7, kubaluleke ngani kutsi setsembe kutsi Jehova utasisita?

⁹ Jehova ulindzele kutsi simetsembe. (Heb. 11:6) Ngaletinye tikhatsi, tinkinga tetfu tingabonakala tingangentsaba. Singahle sicale nekungabata kutsi Jehova utasisita. Kodvwa liBhayibheli lisetsembisa kutsi ‘singakhona kucanca lubondza’ ngenca yemandla aNkulunkulu. (Hla. 18:29) Ngako kunekutsi singabate, kufanele sithantaze sinekukholwa, setsembe kutsi Jehova utayiphendvula imithantazo yetfu.​—Fundza Jakobe 1:6, 7.

10. Fanekisa kutsi singenta njani ngekuvumelana nemithantazo yetfu.

¹⁰ Jehova ulindzele kutsi sente ngekuvumelana nemithantazo yetfu. Sibonelo nje, umzalwane angahle acele Jehova amsite kutsi acele sikhatsi kuze akhone kuya emhlanganweni wesifundza. Jehova angawuphendvula njani lomthantazo? Anganika lomzalwane sibindzi lasidzingako kuze akhone kukhuluma nemcashi wakhe. Kodvwa kutawudzingeka kutsi lomzalwane aye kulomcashi ayocela. Kungahle kudzingeke kutsi amcele tikhatsi letinyenti. Kungenteka kudzingeke nekutsi acele kushintjana nalesinye sisebenti. Nangabe kunesidzingo, angaze acele kungabhadalwa ngalamalanga latawube angasebenti ngawo.

11. Kubaluleke ngani kutsi sichubeke sithantazela tinkinga tetfu?

¹¹ Jehova ulindzele kutsi sichubeke sithantazela tinkinga tetfu. (1 Thes. 5:17) Emavi aJesu akhombisa kutsi leminye imithantazo yetfu ngeke iphendvulwe ngaleso sikhatsi. (Luk. 11:9) Ngako ungapheli emandla! Chubeka uthantaza tikhatsi letinyenti. (Luk. 18:1-7) Nasichubeka sithantaza ngendzaba letsite, sisuke sikhombisa Jehova kutsi sitimisele ngaloko lesikucelako. Ngetulu kwaloko, sisuke sikhombisa kutsi siyetsemba kutsi Jehova utasisita.

YINI LENGENTA KUDZINGEKE SISHINTJE LOKO LESIKUTHANTAZELAKO?

12. (a) Ngumuphi umbuto lesingatibuta wona mayelana naloko lesikuthantazelako, futsi leni? (b) Yini lesingayenta kuze siciniseke kutsi imithantazo yetfu iyakhombisa kutsi siyamhlonipha Jehova? (Buka libhokisi lelitsi “Imithantazo Yami Iyakhombisa Yini Kutsi Ngiyamhlonipha Jehova?”)

¹² Nangabe solo asikutfoli loko lesikuthantazelako, singatibuta nayi imibuto lemitsatfu. Wekucala: ‘Loku lengikuthantazelako kukahle yini?’ Sivame kucabanga kutsi siyakwati loko lokusilungelako. Kodvwa kusenekwenteka tintfo lesitithantazelako ngeke tisisite ngekuhamba kwesikhatsi. Nangabe sithantazela inkinga letsite, ungatfola kutsi kunendlela lencono yekuyilungisa kunaleyo lesiyithantazelako. Ngetulu kwaloko, letinye tintfo lesitithantazelako kungenteka atihambisani nentsandvo yaJehova. (1 Joh. 5:14) Cabanga ngalabatali lesike sakhuluma ngabo. Bacela Jehova kutsi agcine umntfwana wabo ecinisweni. Loko kubonakala kusicelo lesikahle. Kodvwa Jehova akaphoceleli muntfu kutsi amkhonte. Ufuna kutsi sonkhe sitikhetsele kumkhonta, lokufaka ekhatsi bantfwana betfu. (Dut. 10:12, 13; 30:19, 20) Ngako labatali bebangacela Jehova kutsi abasite bakhone kutsintsa inhlitiyo yemntfwana wabo kuze atsandze Jehova futsi abe ngumngani wakhe.​—Taga 22:6; Ef. 6:4.

13. Ngekusho kwembhalo waKumaHebheru 4:16, kukunini lapho Jehova atasisita khona? Chaza.

¹³ Umbuto wesibili utsi: ‘Sikhatsi lesikahle yini sekutsi Jehova aphendvule umthantazo wami?’ Singahle sibone ngatsi siyidzinga ngekushesha imphendvulo yemithantazo yetfu. Kodvwa liciniso likutsi Jehova uyasati sikhatsi lesikahle sekusisita. (Fundza KumaHebheru 4:16.) Nangabe asikutfoli loko lesikucelako ngaleso sikhatsi, singahle sicabange kutsi imphendvulo yaJehova ‘ngucha.’ Kantsi kusenekwenteka ‘nguhhayi nyalo.’ Sibonelo nje, cabanga ngalomzalwane losemusha lebekathantazela kutsi elulame ekuguleni kwakhe. Kube Jehova wamelapha ngalokusimangaliso, Sathane bekangatsi lomzalwane uchubeka akhonta Jehova ngenca yekutsi umelaphile. (Jobe 1:9-11; 2:4) Ngetulu kwaloko, Jehova sewuvele usibekile sikhatsi latawucedza ngaso konkhe kugula. (Isa. 33:24; Semb. 21:3, 4) Njengobe sisengakefiki leso sikhatsi, angeke silindzele kutsi sitawelashwa ngalokusimangaliso. Ngako lomzalwane angacela Jehova kutsi amuphe emandla nekuthula kwengcondvo kuze akhone kubeketelela kugula kwakhe futsi achubeke amkhonta ngekwetsembeka.​—Hla. 29:11.

14. Yini loyifundza kulokwenteke kuJanice?

¹⁴ Cabanga ngalokwenteka kuJanice, lowathantazela kuyosebenta eBethel. Ngemuva kweminyaka lesihlanu, wabona kutsi Jehova bekawuphendvule njani umthantazo wakhe. Utsi: “Jehova wasebentisa leso sikhatsi kuze angifundzise tintfo letinyenti futsi angisite ngibe ngumKhristu loncono. Bekufanele ngimetsembe kakhulu Jehova. Bekudzingeka ngitfutfukise nendlela lengidadisha ngayo liBhayibheli. Ngetulu kwaloko, bekudzingeka ngifundze kutsi ngingajabula ngisho nobe ngimkhonta ngikuphi.” Ngekuhamba kwesikhatsi, Janice nendvodza yakhe bacelwa kutsi bente umsebenti wekujikeleta. Nakabuka emuva, Janice utsi: “Jehova wayiphendvula imithantazo yami, kodvwa hhayi ngendlela lebengiyilindzele. Kwatsatsa sikhatsi kubona kutsi imphendvulo yaJehova beyifana nesipho lesihle, futsi ngibonga kakhulu ngekutsi ngalubona lutsandvo lwakhe nemusa wakhe.”

15. Yini lengenta kudzingeke kutsi ngalesinye sikhatsi singenti umthantazo locondzile? (Buka netitfombe.)

¹⁵ Umbuto wesitsatfu utsi: ‘Kufanele ngithantazele lokunye yini?’ Nanobe kuyintfo lenhle kutsi sente imithantazo lecondzile, kodvwa ngalesinye sikhatsi kungaba kuhle kutsi singakwenti loko kuze sibone kutsi iyini intsandvo yaJehova. Cabanga ngesibonelo sadzadze longakashadi lebekasolo athantazela kuya eSikolweni Sebavangeli BeMbuso. Ufuna kuya kulesikolwa kuze akhone kuyosita lapho kunesidzingo lesikhulu khona sebamemeteli. Nakasathantazela kuya kulesikolwa, angaphindze acele Jehova amsite abone kutsi yini langayenta kuze ente lokunyenti emsebentini wekushumayela. (Imis. 16:9, 10) Ngemuva kwaloko, angenta ngekuvumelana nemthantazo wakhe ngekutsi abute umbonisi wesigodzi kutsi nguliphi libandla lelidvute lelinesidzingo semahlahlandlela. Nobe angabhalela lihhovisi leligatja abute kutsi ngukuphi lapho kunesidzingo khona sebamemeteli.e

16. Yini lesingaciniseka ngayo?

¹⁶ Njengobe sesifundzile, singaciniseka kutsi Jehova utawuphendvula imithantazo yetfu ngendlela lenelutsandvo nalelungile. (Hla. 4:3; Isa. 30:18) Ngalesinye sikhatsi singahle singayitfoli imphendvulo lebesiyilindzele. Kodvwa Jehova utawuhlale ayilalela imithantazo yetfu. Usitsandza kakhulu futsi akayoze asilahle. (Hla. 9:10) Ngako chubeka ‘umetsemba ngaso sonkhe sikhatsi,’ utfulule inhlitiyo yakho kuye ngemthantazo.​—Hla. 62:8.