December

Jehova unawo yini emandla ekuvusa labafile? Yebo unawo! ‘UnguSomandla.’ (Semb. 1:8) Ngako unemandla ekuncoba nobe ngabe ngusiphi sitsa, lokufaka ekhatsi kufa. (1 Khor. 15:26) Lesinye sizatfu lesenta siciniseke kutsi Nkulunkulu angakhona kubavusa labafile kutsi ukhumbula konkhe. Tonkhe tinkhanyeti utibita ngemagama ato. (Isa. 40:26) Ngetulu kwaloko, uyabakhumbula labo labashona. (Jobe 14:13; Luk. 20:38) Angakhona kukhumbula ngisho netintfo letincane ngabo, lokufaka ekhatsi indlela lebebabukeka ngayo, buntfu babo, loko lokwenteka ekuphileni kwabo kanye naloko lobekusetingcondvweni tabo. Kusebaleni kutsi singasetsemba setsembiso saJehova sekutsi labafile batawuvuswa esikhatsini lesitako, ngobe siyati kutsi unaso sifiso sekubavusa kanye nemandla ekukwenta loko. Cabanga nganasi lesinye sizatfu lesisenta sisetsembe lesetsembiso saNkulunkulu: Jehova uke wabavusa bantfu labafile. Ngetikhatsi tekubhalwa kweliBhayibheli, waniketa emadvodza letsembekile emandla ekuvusa bantfu labafile, lokufaka ekhatsi naJesu. w23.04 9-10 ¶7-9

Nangabe sisebentisa kuhlakanipha futsi sikhulume ngemoya lophansi, manyenti ematfuba ekutsi bantfu basilalele futsi sichubeke sicoca nabo. Nangabe umuntfu afuna kuphikisana natsi nobe kuhlekisa ngetinkholelo tetfu, kute sidzingo sekutsi sichubeke sicoca naye. (Taga 26:4) Kodvwa akusibo bonkhe bantfu labatawuba njalo; linyenti labo lingahle lilalele. Kusebaleni kutsi sisitakala kakhulu nangabe sinemoya lophansi. Thantaza kuJehova umcele akuphe umoya lophansi nawuphendvula imibuto lelukhuni, nobe nawusolwa ngaphandle kwesizatfu. Khumbula kutsi umoya lophansi utawusita kutsi kungafani kwemibono kungagcini sekuyimphikiswano. Nangabe uphendvula ngemoya lophansi nangenhlonipho, loko kungenta labakulalele kutsi bashintje loko bebakucabanga ngatsi nangemaciniso eliBhayibheli. ‘Hlale ukulungele kutiphendvulela’ nawubutwa ngetinkholelo takho, loko ukwente “ngemoya lophansi nangenhlonipho lenkhulu.” (1 Phet. 3:15) Khumbula kutsi kuba nemoya lophansi akusho kutsi ubutsakatsaka! w23.09 19 ¶18-19

Cabanga nganati timo letine lasingakhombisa khona kutsi siyabeketela. Kwekucala, umuntfu lobeketelako uyephuta kutfukutsela. Wetama kwehlisa umoya futsi atibambe angaphindziseli nakaphatfwa kabi nobe nakacindzetelekile. (Eks. 34:6) Kwesibili, umuntfu lobeketelako ulindza ngesineke abe ehlise umoya. Nangabe intfo letsite itsatsa sikhatsi lesidze kunaleso bekasilindzele, umuntfu lobeketelako wehlisa umoya nobe angacansuki. (Mat. 18:26, 27) Kwesitsatfu, umuntfu lobeketelako akabhudvuteli. Umuntfu lobeketelako nakufanele ente intfo letsite lebalulekile, akajaki kuyenta nobe kuyicedza. Kunaloko, ubeka sikhatsi lesenele kuze ahlele kutsi utayenta njani. Ngemuva kwaloko utinika sikhatsi kuze ayente kahle. Kwesine, umuntfu lobeketelako wetama kungakhononi nakabhekene nenkinga. Umuntfu lobeketelako utawenta konkhe langakwenta kuze achubeke acinisela abe anesimo sengcondvo lesihle. (Khol. 1:11) Njengobe singemaKhristu, kudzingeka sikhombise kubeketela kuko konkhe loku lesesicoce ngako. w23.08 20-21 ¶3-6

Sizatfu lesibalulekile sekuvikela tinhlitiyo tetfu letingumfanekiso kutsi Jehova uyatihlola. Loko kusho kutsi ubuka ngale kwaloko bantfu labakubonako, futsi abone loko lesingiko ngekhatsi. Utasitsandza nangabe sigcwalisa tingcondvo tetfu ngekuhlakanipha lokuvela kuye lokutawenta siphile phakadze. (Joh. 4:14) Nasenta njalo, ngeke sibe khona sikhala etingcondvweni tetfu sekutsi Sathane nelive lakhe basingcolise. (1 Joh. 5:18, 19) Njengobe sisondzelana naJehova, sitamtsandza kakhulu futsi simhloniphe kakhulu. Ngenca yekutsi asifuni kumvisa buhlungu Babe wetfu, sitawenyanya nje ngisho nekucabanga kwenta sono. Lomunye dzadze waseCroatia lokutsiwa nguMarta, lowalingeka kutsi atiphatse kabi wabhala watsi: “Ngakutfola kumatima kucabanga kahle kanye nekulwa nesifiso sekutijabulisa kwesikhashana ngesono. Kodvwa kwesaba Jehova kwangivikela.” Kwamvikela njani kwesaba Nkulunkulu? Marta utsi wacabangisisa ngemiphumela lebeyitawuletfwa kwenta sincumo lesibi. Natsi singenta lokufanako. w23.06 20-21 ¶3-4

Jesu bekati kutsi injongo yaJehova kungcwelisa libito lakhe, alihlante kuko konkhe kuhlantjalatwa. Kungako iNkhosi yetfu yafundzisa balandzeli bayo kutsi bathantaze batsi: “Babe wetfu losemazulwini, alingcweliswe libito lakho.” (Mat. 6:9) Jesu bekati kutsi lena yindzaba lebaluleke kakhulu letsintsa yonkhe indalo. Kute ngisho nasinye sidalwa lesihlakaniphile ezulwini nobe emhlabeni lesilingcwelise ngelizinga leliphakeme libito laJehova kwendlula Jesu. Nobe kunjalo, ngesikhatsi aboshwa, nguliphi licala lamangalelwa ngalo? Kuhlambalata! KuJesu, kuhlanjalatwa nobe kunyundzelwa kwelibito laBabe wakhe lelingcwele bekusono lesibi kakhulu. Kwamphatsa kabi kakhulu kumangalelwa ngaloku. Kungenteka nguloko lokwamenta waba ‘lusizi kakhulu’ ngema-awa langaphambi kwekuboshwa kwakhe.​—Luk. 22:41-44. w24.02 11 ¶11

Kulomncintiswano wekuphila, kufanele simtsandze kakhulu Jehova naJesu kwendlula tihlobo tetfu. (Mat. 10:37) Kodvwa loku akusho kutsi kufanele singasayidlali indzima lesinayo emindenini kube ngatsi iyasivimbela kutsi sijabulise Nkulunkulu naKhristu. Kepha kuze Nkulunkulu naKhristu basemukele, kufanele siyidlale indzima lesinayo emndenini. (1 Thim. 5:4, 8) Nasenta njalo, sitawujabula. Ngetulu kwako konkhe, Jehova wahlela imindeni kutsi ijabule nangabe indvodza nemfati batsandzana futsi bahloniphana, nangabe batali babatsandza bantfwana babo futsi babacecesha nalapho bantfwana bahlonipha batali babo. (Ef. 5:33; 6:1, 4) Ngisho nobe unayiphi indzima emndenini, yetsemba seluleko lesihlakaniphile lesitfolakala eBhayibhelini kunekutsi wente ngendlela lotiva ngayo, nobe ulandzele lisiko nobe ulalele lokushiwo bantfu labatsi bati kakhulu. Tisebentise kahle tincwadzi tetfu letisekelwe eBhayibhelini. Kuto utawutfola kutsi ungatisebentisa njani timiso teliBhayibheli. w23.08 28 ¶6-7

Dzadze kufanele afundze emakhono latamsita. Lamanye emakhono lafundvwa yintfombatane nayiseyincane achubeka ayisita kuko konkhe kuphila kwayo. Sibonelo nje, fundza kufundza kahle nekubhala kahle. Kulamanye emasiko, kutsatfwa ngekutsi akukabaluleki kutsi wesifazane afundze kufundza nekubhala. Nobe kunjalo, lamakhono abalulekile kuwo onkhe emaKhristu. (1 Thim. 4:13) Ngako ungavumeli lutfo lukuvimbe kutsi ufundze kufundza nekubhala kahle. Utawuba yini umphumela? Lamakhono angakusita kutsi utfole umsebenti futsi uwugcine. Ngetulu kwaloko kutawuba melula kutsi udadishe liVi laNkulunkulu futsi ulifundzise labanye. Lokuhle kakhulu kutsi utawusondzelana kakhulu naJehova njengobe ufundza liVi lakhe futsi ucabangisisa ngalokufundza kulo.​—1 Thim. 4:15. w23.12 20 ¶10-11

Cela Jehova akusite ulwisane netilingo. Njengobe sinesono, sihlale silwisana nesilingo sekwenta lokubi. Sathane wenta konkhe langakwenta kuze asishubisele. Lenye indlela lakwenta ngayo loko kwetama kungcolisa tingcondvo tetfu asebentisa kwekutijabulisa lokungcolile. Kutijabulisa lokunjalo kungagcwalisa tingcondvo tetfu ngemicabango lengcolile futsi lemicabango ingangcolisa umuntfu lesinguye ngekhatsi, futsi ingenta kutsi sente sono lesikhulu. (Mak. 7:21-23; Jak. 1:14, 15) Siyakudzinga kusitwa nguJehova nangabe sifuna kuncoba silingo sekwenta lokubi. Naku Jesu lakusho emthantazweni losibonelo: “Ungasingenisi ekulingweni, kodvwa usikhulule kulomubi.” (Mat. 6:13) Jehova uyafuna kusisita, kodvwa kufanele simcele kutsi asisite. Kufanele sente ngekuvumelana nemithantazo yetfu. w23.05 6-7 ¶15-17

Nangabe labashadene batsatsa buhlobo babo naJehova njengalobubalulekile, batakulungela kusebentisa seluleko sakhe, lokutabasita kutsi bagweme tinkinga letingenta kutsi lutsandvo lwabo lunciphe baphindze batincobe. Labo labanebuhlobo lobuhle naJehova betama kumlingisa futsi betama kuveta buntfu bakhe lobunjengemusa, kubeketela nekucolela. (Ef. 4:32–5:1) Nangabe labashadene bakhombisa lobuntfu, kuba melula kutsi lutsandvo lwabo lukhule. Lomunye dzadze lokutsiwa nguLena, lesekuphele iminyaka lengetulu kwalengu-25 ashadile, utsi: “Kumelula kutsandza umuntfu lonebuhlobo lobuhle naNkulunkulu futsi umhloniphe.” Cabanga nganasi sibonelo lesiseBhayibhelini. Ngesikhatsi Jehova akhetsa labatawuba batali baloyo bekatawuba nguMesiya, wakhetsa Josefa naMariya emkhatsini wesitukulwane lesikhulu saDavide. Leni? Nguloyo naloyo bekanebuhlobo lobuhle naJehova, futsi Jehova bekati kutsi bebatamenta ete kucala emshadweni wabo. w23.05 21 ¶3-4

Nanobe Jesu longuMholi wetfu ete sono, labo labasebentisako kutsi bahole emhlabeni banaso. Singahle sikutfole kumatima kubalalela, ikakhulukati nangabe bacela kutsi sente intfo lesingafuni kuyenta. Ngalelinye lilanga umphostoli Phetro wakutfola kumatima kulalela. Ngesikhatsi ingilosi imtjela kutsi adle inyama yetilwane lebetitsatfwa ngekutsi tingcolile ngephansi kweMtsetfo waMosi, Phetro wala, hhayi kanye kodvwa katsatfu! (Imis. 10:9-16) Wentiwa yini? Bekangasiva kahle lesicondziso lesisha. Ngakulolunye luhlangotsi, umphostoli Pawula walalela ngesikhatsi emadvodza lamadzala aseJerusalema amtjela kutsi aye ethempelini nemadvodza lamane futsi atihlambulule kuze akhombise kutsi bekagcina uMtsetfo. Pawula bekati kutsi emaKhristu akasekho ngephansi kweMtsetfo nekutsi kute lokubi lakwentile. Nobe kunjalo, “ngakusasa, Pawula wawatsatsa lamadvodza watihlambulula nawo ngekuvumelana neMtsetfo.” (Imis. 21:23, 24, 26) Kulalela kwaPawula kwenta kutsi kube nebunye.​—Rom. 14:19, 21. w23.10 10 ¶15-16

Mhlawumbe awucabangi kutsi kwesaba kubalulekile kuze bantfu babe bangani labakhulu. Nobe kunjalo, labo labafuna kuba bangani labakhulu baJehova kufanele ‘bamesabe.’ Ngisho nobe sinesikhatsi lesingakanani sikhonta Jehova, sonkhe kufanele sichubeke simesaba. Kodvwa kusho kutsini kwesaba Nkulunkulu? Umuntfu lowesaba Nkulunkulu ngendlela lekahle uyamtsandza futsi akafuni kwenta nobe ngabe yini lengalimata buhlobo bakhe naye. Jesu bekamesaba ngaleyondlela Nkulunkulu. (Heb. 5:7) Bekangamesabi ngendlela yekutsi bekahlale etfukile. (Isa. 11:2, 3) Kunaloko, bekamtsandza kakhulu Nkulunkulu futsi bekafuna kumlalela. (Joh. 14:21, 31) NjengaJesu, simhlonipha kakhulu Nkulunkulu ngobe uyasitsandza, uhlakaniphile, ulungile futsi unemandla. Siyati nekutsi Jehova uyasitsandza futsi unendzaba nekutsi siyasilalela yini sicondziso sakhe. Nasingamlaleli Jehova uva buhlungu, kodvwa nasimlalela uyajabula.​—Hla. 78:41; Taga 27:11. w23.06 14 ¶1-2; 15 ¶5

Ngesikhatsi iNkhosi Uziya iba neligunya, yakhohlwa kutsi nguJehova lebekayinikete leligunya futsi wayenta yaphumelela. Yini lesiyifundzako? Kufanele sikhumbule kutsi nguJehova losinikete tonkhe tintfo letinhle lesinato nekutsi nguye losinike imisebenti enhlanganweni yakhe. Kunekutsi sitigcabhe ngaloko lesiphumelela kukwenta, kufanele sidvumise Jehova. (1 Khor. 4:7) Kufanele sitfobeke, sikhumbule kutsi sinesono nekutsi siyakudzinga kwelulekwa. Lomunye umzalwane loseminyakeni yabo-60 wabhala watsi: “Ngifundze kungakwati nobe kungadvumateki nangabe labanye babona emaphutsa ami. Nangelulekwa ngalamanye emaphutsa ami, ngetama kuwalungisa futsi ngichubeke ngikhonta Jehova.” Nangabe silalela Jehova futsi sihlale sitfobekile, sitawujabula mbamba ekuphileni.​—Taga 22:4. w23.09 10 ¶10-11

EmaKhristu ekucala bekufanele acinisele. Ngetulu kwekuba netinkinga bantfu labanyenti lebebanato, lamaKhristu bekaphindze abe naletinye tinkinga. Linyenti lawo beliphatfwa kabi, hhayi nje kuphela baholi benkholo yemaJuda netiphatsimandla letingemaRoma kodvwa bewaphatfwa kabi nayimindeni yawo. (Mat. 10:21) Ngetulu kwaloko, ngaletinye tikhatsi ebandleni bekudzingeka alwisane nemoya wetihlubuki kanye netimfundziso tato lebetehlukanisa libandla. (Imis. 20:29, 30) Nanobe kunjalo, lamaKhristu acinisela. (Semb. 2:3) Kanjani? Acabangisisa ngetibonelo talabanye labacinisela lokukhulunywa ngabo eBhayibhelini, njengaJobe. (Jak. 5:10, 11) Athantaza acela emandla. (Imis. 4:29-31) Achubeka akhumbula kutsi Jehova utawabusisa nangabe acinisela. (Imis. 5:41) Natsi singacinisela nangabe sihlale sifundza ngetibonelo talabacinisela lokukhunywa ngabo eVini laNkulunkulu nasetincwadzini tetfu futsi sicabangisise ngato. w23.07 3 ¶5-6

Jehova naJesu angeke basilahle. Umphostoli Phetro kwadzingeka ente sincumo lesibalulekile ngemuva kwekuphika Jesu. Bekatawuyekela yini kuba ngumlandzeli waKhristu nobe bekatawuchubeka? Jesu bekancuse Jehova kutsi kukholwa kwaPhetro kungapheli. Jesu wamtjela Phetro ngalomthantazo futsi waveta kutsi bekaciniseka kutsi Phetro bekatawucinisa bazalwane bakhe. (Luk. 22:31, 32) Kungenteka kwamkhutsata Phetro kucabanga ngalamavi aJesu! Nangabe natsi kufanele sente sincumo lesibalulekile, Jehova angasebentisa belusi labakhatsalelako kuze basikhutsate kutsi sihlale setsembekile. (Ef. 4:8, 11) Njengobe Jehova amnakekela Phetro kanye nalabanye baphostoli, utasinakekela natsi nangabe sibeka kucala uMbuso ekuphileni kwetfu. w23.09 24-25 ¶14-15

Jehova unaka ngisho tento letincane lesitentako kuze sikhombise kutsi siyabatsandza labanye. Loko ukutsatsa njengemnikelo loligugu nanjengesikweleti latasibhadala. Nangabe wake waba yinceku lesebentako nobe lomdzala welibandla, Jehova uyawukhumbula umsebenti lowawenta esikhatsini lesendlulile nelutsandvo lolwakwenta kutsi uwente lomsebenti. (1 Khor. 15:58) Uyalunaka nelutsandvo lochubeka ulukhombisa. Jehova ufuna kutsi ikhule kitsi sonkhe indlela lesimtsandza ngayo nendlela lesibatsandza ngayo labanye. Indlela lesimtsandza ngayo Jehova ingakhula nasifundza liVi lakhe, sicabangisise ngaloko lesikufundza kulo futsi sihlale sithantaza. Ingakhula indlela lesibatsandza ngayo bazalwane betfu nabodzadze ngekutsi sibasite. Njengobe lutsandvo lwetfu lukhula, sitawusondzelana nakakhulu naJehova nebazalwane betfu nabodzadze. Ngetulu kwaloko, bungani betfu nabo butawuhlala kuze kube phakadze! w23.07 10 ¶11; 11 ¶13; 13 ¶18

UmKhristu ngamunye kufanele atincumele kutsi utayinakekela njani imphilo yakhe. Imbalwa imitsetfo eBhayibhelini letsintsa tincumo temKhristu mayelana netindlela tekwelashwa, njengemyalo wekutsi sibalekele ingati futsi singasebentelani nemimoya. (Imis. 15:20; Gal. 5:19, 20) Kuletinye tintfo, umuntfu ngamunye kufanele atentele yena sincumo. Singahle sibe nembono locinile wekutsi indlela letsite yekwelapha iyasita nobe ayisitani, nobe kunjalo, kufanele sihloniphe lilungelo lebazalwane nabodzadze lekutentela sincumo endzabeni yekunakekela imphilo yabo. Ngako kufanele sikhumbule nawa emaphuzu ngalendzaba: (1) NguMbuso waNkulunkulu kuphela lotawelapha bantfu ngalokuphelele. (Isa. 33:24) (2) UmKhristu ngamunye kufanele aciniseke ngaloko lokumlungelako. (Rom. 14:5) (3) Asibehluleli labanye nobe sibe sikhubekiso kubo. (Rom. 14:13) (4) EmaKhristu akhombisa lutsandvo, futsi bunye belibandla kufanele bute kucala kunenkhululeko yawo yekutikhetsela.​—Rom. 14:15, 19, 20. w23.07 24 ¶15

Buligugu yini kuwe buhlobo bakho naJehova? Siyaciniseka kutsi buligugu. Kusukela endvulo, bantfu labanyenti bebativa ngendlela lefanako. (Hla. 104:33, 34) Labanyenti batidzelile kuze bakhonte Jehova. Nguloko lokwentiwa ngemaNaziri, nobe labo lebebatinikele kute bente umsebenti lokhetsekile ngesikhatsi sema-Israyeli asendvulo. Leligama limchaza kahle umIsrayeli lebekashisekela kukhonta Nkulunkulu, lebekente sincumo sekutidzela kuze akhonte Jehova ngendlela lekhetsekile. UMtsetfo waMosi bewuvuma kutsi indvodza nobe umfati ente sifungo lesikhetsekile kuJehova ngekutsi akhetse kuba ngumNaziri sikhatsi lesitsite. (Num. 6:1, 2) Lesifungo besifaka ekhatsi kulandzela ticondziso lebekungakalindzeleki kutsi lamanye ema-Israyeli atilandzele. Ngako yini lebeyingenta umIsrayeli akhetse kuba ngumNaziri? Kungenteka bekungenca yekutsi umtsandza kakhulu Jehova futsi uyabonga ngenca yetipho letinhle latitfole kuye.​—Dut. 6:5; 16:17. w24.02 14 ¶1-2

EBhayibhelini, ligama lesiHebheru lelihunyushwe ngekutsi “kuba cotfo” nobe “lutsandvo lolucotfo,” lisho budlelwane lobuhle futsi livame kusetjentiswa nalichaza lutsandvo Nkulunkulu lanalo ngebantfu bakhe. Leligama liphindze lisetjentiswe nakuchazwa lutsandvo lolusemkhatsini webantfu baNkulunkulu. (2 Sam. 9:6, 7) Njengobe sikhatsi sichubeka, lingakhula lizinga letfu lekuba cotfo. Naka kutsi loku kwenteka njani kuDanyela. Kwetsembeka kwaDanyela kuJehova kwavivinywa kuko konkhe kuphila kwakhe. Kodvwa lokuhamba embili nguloko lokwenteka ngesikhatsi aseminyakeni yabo-90. Tiphatsimandla betimnyanya Danyela futsi betingamhloniphi Nkulunkulu wakhe. Ngako takha licebo lekumbulala. Takha licebo lebelitawuvivinya Danyela kutsi utawetsembeka kuNkulunkulu wakhe yini nobe enkhosini. Kuze Danyela akhombise kutsi wetsembekile enkhosini bekufanele angathantazi kuJehova emalanga langu-30. Danyela akazange avume kukwenta loko.​—Dan. 6:12-15, 20-22. w23.08 5 ¶10-12

Jehova ufuna sichubeke sibatsandza bazalwane betfu nabodzadze. Nangabe umzalwane nobe dzadze ehluleka kukhombisa lobunye buntfu bebuKhristu, singaciniseka kutsi uyafuna kulandzela timiso teliBhayibheli, nekutsi umane nje wenta angakacabangi. (Taga 12:18) Nkulunkulu uyatitsandza tinceku takhe letetsembekile ngisho nobe tihle tenta emaphutsa. Akayekeli kusitsandza nasenta emaphutsa futsi akahlali asitfukutselele. (Hla. 103:9) Ngako kubalulekile kutsi silingise Babe wetfu locolelako! (Ef. 4:32–5:1) Khumbula kutsi njengobe lelive liya ngasekupheleni, kutawudzingeka sihlale sisondzelene nebazalwane betfu nabodzadze. Singalindzela kutsi sichubeke siphatfwa kabi kakhulu. Singaze siboshwe ngenca yekukholwa kwetfu. Nakwenteka loko, sitawubadzinga kakhulu bazalwane betfu nabodzadze.​—Taga 17:17. w24.03 15-16 ¶6-7

ImiBhalo ikhuluma ngalabasebasha labasondzelana naJehova, bemukelwa nguye futsi baphila imphilo lejabulisako. Davide bekangulomunye wabo. Nakasemncane, wakhetsa kukhonta Nkulunkulu, futsi ngekuhamba kwesikhatsi waba yinkhosi leyetsembekile. (1 Khos. 3:6; 9:4, 5; 14:8) Kungakukhutsata kudadisha ngekuphila kwakhe kanye nekukhonta kwakhe Jehova ngekwetsembeka. Nobe ungadadisha ngesibonelo saMakho nobe saThimothi. Bacala kukhonta Jehova basebancane kakhulu futsi bachubeka bamkhonta ngekwetsembeka. Kutsi kuphila kwakho kutawuba njani, kutawuya ngekutsi uphila imphilo lenjani nyalo. Nawetsembela kuJehova kunekutsi wetsembele ekwatini kwakho, yena utawucondzisa tinyatselo takho. Utawujabula ekuphileni futsi uphumelele. Khumbula kutsi Jehova ukutsatsa njengalokuligugu loko lomentela kona. Kute lenye indlela lencono yekuphila leyendlula kukhonta Babe wetfu wasezulwini lositsandzako, lokunguJehova. w23.09 13 ¶18-19

Umphostoli Pawula bekati kutsi bazalwane bakhe nabodzadze banesono. Sibonelo nje, labanye ebandleni abazange bakholwe kutsi sewungumfundzi ngesikhatsi acala kutihlanganisa nelibandla. (Imis. 9:26) Ngekuhamba kwesikhatsi, labanye bakhuluma kabi ngaye futsi bona lidvumela lakhe lelihle. (2 Khor. 10:10) Pawula wabona lomunye umzalwane loniketwe imisebenti leminyenti ebandleni enta sincumo lesibi lebesingakhuba labanye. (Gal. 2:11, 12) Lomunye webangani bakhe lokunguMakho, wamdvumata kakhulu. (Imis. 15:37, 38) Pawula bekangavumela loku labhekana nako kumente kutsi angasatihlanganisi nalabo labamphatsa kabi. Nanobe kunjalo, wachubeka abatsandza bazalwane bakhe nabodzadze futsi wachubeka akhonta Jehova ngekwetsembeka. Yini leyamsita kutsi akwente loko? Pawula bekabatsandza bazalwane bakhe nabodzadze. Lolutsandvo lebekanalo ngalabanye lwamsita kutsi anganaki emaphutsa abo, kodvwa anake buntfu babo lobuhle. Lolutsandvo lwaphindze lwamsita kutsi akwente loko lokubhalwe kulombhalo welusuku lwalamuhla. w24.03 15 ¶4-5

LiBhayibheli linetindzaba letinyenti letikhombisa kutsi uligugu umoya lophansi. Cabanga ngesibonelo sa-Isaka. Ngesikhatsi ahlala eGerari, lebekuyindzawo yemaFilisti, bomakhelwane bakhe labanemona bavala imitfombo yemanti lebeyigutjwe tisebenti tababe wakhe. Kunekutsi Isaka alwele lemitfombo, yena nemndeni wakhe batfutsa futsi bagubha leminye imitfombo. (Gen. 26:12-18) Kodvwa nakuleyo ndzawo emaFilisti atsi lamanti nge-awo. Nobe kunjalo, Isaka wakhombisa kutsi unekuthula. (Gen. 26:19-25) Yini leyamsita kutsi ahlale anemoya lophansi ngisho nangesikhatsi labanye batimisele ngekumtfukutselisa? Siyaciniseka kutsi wanaka sibonelo sebatali bakhe, wafundza lokunyenti endleleni Abrahama bekakutsandza ngayo kuthula, waphindze wanaka ‘umoya wekuthula nalophansi’ waSara.​—1 Phet. 3:4-6; Gen. 21:22-34. w23.09 15 ¶4

Jehova watfumela iNdvodzana yakhe lelitibulo emhlabeni kuze ifundzise bantfu ngaloMbuso futsi isihlawulele esonweni nasekufeni ngenca yekutsi uyasitsandza. Ngemuva kwaloko, Jesu wavuselwa ezulwini kuze abe yiNkhosi yeMbuso waNkulunkulu. Umlayeto loyinhloko weliBhayibheli kutsi libito laJehova litawungcweliswa njengobe afeza injongo yakhe ngemhlaba asebentisa uMbuso loholwa nguKhristu. Kute lotawushintja injongo yaJehova. Usicinisekisile kutsi nakanjani utayifeza. (Isa. 46:10, umbhalo longentasi; Heb. 6:17, 18) Ngekuhamba kwesikhatsi, umhlaba utawushintja ube lipharadisi lapho khona situkulwane sa-Adamu na-Eva lesesite sono ‘sitawuphila kuze kube phakadze.’ (Hla. 22:26) Kodvwa kusenalokunye Jehova latawukwenta. Utawubese wenta kutsi tonkhe tidalwa takhe letihlakaniphile tasezulwini tibe nebunye netasemhlabeni. Ngemuva kwaloko, bonkhe labaphilako batawutitfoba ngekwetsembeka ngephansi kwekubusa kwakhe. (Ef. 1:8-11) Ayikumangalisi yini indlela Jehova latayifeza ngayo injongo yakhe? w23.10 20 ¶7-8

Ngesikhatsi emaJuda lebekabuya eBhabhulona efika eJerusalema, abhekana nesimo setemnotfo lesintengantengako, simo lesingasisihle setepolitiki kanye nekuphikiswa. Ngako lamanye akutfola kumatima kunaka umsebenti wekwakha kabusha lithempeli laJehova. Ngako Jehova watfuma baphrofethi lababili, lokunguHagayi naZakhariya, futsi loko kwaphumelela. (Hag. 1:1; Zak. 1:1) Nobe kunjalo, ngemuva kweminyaka lengaba ngu-50, lamaJuda aphindze aphelelwa ngemandla. Ezra lebekangumbhali weMtsetfo lonelikhono wefika eJerusalema esuka eBhabhulona kuze atokhutsata bantfu baNkulunkulu kutsi bakwente kute kucala kukhonta Jehova. (Ezra 7:1, 6) Tiphrofetho taHagayi netaZakhariya tasita bantfu baNkulunkulu kutsi bachubeke bametsemba Jehova ngesikhatsi baphikiswa, futsi tingasisita lamuhla kutsi setsembe kutsi Jehova utasisita nasibhekene netikhatsi letimatima.​—Taga 22:19. w23.11 14-15 ¶2-3

Silukhombisa njani lutsandvo kubazalwane nakubodzadze? Lenye indlela kutsi sibadvudvute. Sitawukhona ‘kuchubeka sidvudvutana’ nangabe sineluvelo. (1 Thes. 4:18) Yini lesingayenta kuze luhlale lucinile lutsandvo lwetfu ngalabanye? Singasitwa kwenta konkhe lokusemandleni etfu kuze sibacolele. Yini leyenta kubaluleke kakhulu lamuhla kutsi sitsandzane? Naka nasi sizatfu lesashiwo nguPhetro nakatsi: “Kuphela kwato tonkhe tintfo sekusondzele. Ngako-ke, . . . tsandzanani kakhulu.” (1 Phet. 4:7, 8) Yini lokufanele siyilindzele njengobe kusondzela kuphela kwalelive lelibi? Akhuluma ngebalandzeli bakhe, Jesu waphrofetha watsi: “Nitawutondvwa tive tonkhe ngenca yelibito lami.” (Mat. 24:9) Kuze sikhone kubeketelela lokutondvwa, kufanele sihlale simunye. Nasenta njalo, loko Sathane letama kukwenta kuze asehlukanise ngeke kuphumelele, ngobe lutsandvo lutawusenta sisondzelane kakhulu.​—Fil. 2:1, 2. w23.11 13 ¶18-19

Liciniso leliseVini laNkulunkulu linemandla lamakhulu. Ngenca yekutsi sifundzisa bantfu ngaJehova nangebuntfu bakhe, sibona intfo lemangalisako. Bantfu babese bayabona kutsi Sathane unemanga futsi babese bacala kubona buntfu lobuhle baBabe wetfu. Abamangalisa kakhulu emandla akhe langapheli. (Isa. 40:26) Bafundza kumetsemba ngenca yekutsi ulunge ngelizinga leliphelele. (Dut. 32:4) Bafundza lokunyenti ekuhlakanipheni kwakhe lokukhulu. (Isa. 55:9; Rom. 11:33) Bayadvudvuteka nabafundza kutsi ulutsandvo. (1 Joh. 4:8) Njengobe basondzelana naJehova, litsemba labo lekuphila phakadze liba yintfo mbamba kubo. Sinelitfuba lelihle lekusita bantfu kutsi basondzelane naBabe wabo! Nasenta njalo, Jehova usitsatsa ‘njengetisebenti letikanye’ naye.​—1 Khor. 3:5. w24.02 12 ¶15

Nangabe udadisha liBhayibheli naBoFakazi BaJehova nobe ukhuliswa batali lababoFakazi, utibekele yini umgomo wekubhajatiswa? Loyo ngumgomo lomuhle kakhulu! Kodvwa ngaphambi kwekutsi ubhajatiswe, kufanele utinikele kuJehova. Utinikela njani kuJehova? Uyathantaza kuye umetsembise kutsi utawukhonta yena yedvwa nekutsi utawenta intsandvo yakhe ite kucala ekuphileni kwakho. Usuke wetsembisa Jehova kutsi utawuchubeka umtsandza “ngayo yonkhe inhlitiyo yakho, nangawo wonkhe umphefumulo wakho, nangayo yonkhe ingcondvo yakho, nangawo onkhe emandla akho.” (Mak. 12:30) Loko ukwenta uwedvwa, kube semkhatsini wakho naJehova. Kantsi kubhajatiswa ukwenta embikwebantfu; kukhombisa lababukile kutsi sewutinikele kuye. Lesetsembiso asisiwo umdlalo, umgomo wakho kufanele ube kusigcina futsi nguloko naJehova lalindzele kutsi ukwente.​—Shu. 5:4. w24.03 2 ¶2; 3 ¶5

Yonkhe imishado inetinkinga. LiBhayibheli likubeka ebaleni kutsi bantfu labashadile “batawuba nelusizi enyameni.” (1 Khor. 7:28) Kwentiwa yini loku? Ngenca yekutsi kushada bantfu lababili labanesono, banebuntfu lobehlukene, batsandza tintfo letingafani, futsi netintfo labangatitsandzi atifani. Kungenteka bakhuliswe ngemasiko langafani nobe ngendlela lengafani. Ngekuhamba kwesikhatsi, bangahle bente tintfo lebetinganakeki basengakashadi. Konkhe loku kungabanga tinkinga. Kunekutsi babuke kutsi kukhona umuntfu ngamunye lakwentile kuze kube nalenkinga futsi betame kuyilungisa, bangacala kusolana. Bangaze babone ngatsi kuhlala ngekwehlukana nobe kudivosa kungayilungisa lenkinga. Kodvwa loko kulikhambi letinkinga tabo yini? Cha. Jehova utsi labashane kufanele balihloniphe lilungiselelo lemshado ngisho nobe indvodza nobe lomfati enta kuphila kwalona lashade naye kube matima. w24.03 16 ¶8; 17 ¶11

Ngemuva kwekutinikela futsi ubhajatiswe, litsemba lakho lekuphila phakadze emhlabeni lolipharadisi, lichubeke lacina njengobe ufundza lokunyenti futsi uba ngumKhristu lovutsiwe. (Heb. 5:13–6:1) Kungenteka kwentekile kuwe loko lokushiwo KubaseRoma 5:2-4. Ukile wabhekana netinkinga letehlukahlukene kodvwa wacinisela futsi wabona kutsi Nkulunkulu uyakwemukela. Njengobe uciniseka kutsi Nkulunkulu uyakwemukela, sewunesizatfu lesicinile sekulindzela kutitfola tonkhe tintfo latetsembisile. Litsemba lakho selicine kakhulu kunasekucaleni. Seliyintfo mbamba kuwe, selikutsintsa kakhulu. Likutsintsa konkhe kuphila kwakho, lishintje indlela lophatsa ngayo umndeni wakho, tincumo lotentako kanye nendlela losisebentisa ngayo sikhatsi sakho. Umphostoli Pawula wengeta nali lelinye liphuzu lelibalulekile mayelana nelitsemba lakho nasewemukelwe nguNkulunkulu. Uyakucinisekisa kutsi litsemba lakho litawugcwaliseka.​—Rom. 15:13. w23.12 12-13 ¶16-19

Nasibhekene nesikhatsi lesimatima, indlela lesitiva ngayo, lesikucabangako naloko lesikwentako kuyehluka kuloko lesivame kukwenta. Njengemkhumbi loyiswa lena nalena ngemagagasi, natsi kungenteka indlela lesitiva ngayo ishintjashintje ngekushesha. Jehova usisita njani nasitiva kanjalo? Jehova utawusenta sivikeleke, lokungaphindze kubekwe ngekutsi utasisimisa. Nangabe umkhumbi utfolwa sivunguvungu, ungahle ucale kuya lena nalena. Kuze loko kungenteki, imikhumbi leminyenti inetintfo letiwusimisako ngalana nangale letiba ngephansi kulomkhumbi. Letintfo tekuwusimisa tenta kutsi lomkhumbi ungayi kakhulu lena nalena, loko kwenta kutsi labawugibele baphephe futsi bakujabulele kuhamba ngawo. Nobe kunjalo, letintfo tekuwusimisa tisebenta kahle nangabe lomkhumbi uhamba. Ngendlela lefanako, Jehova utasisimisa nangabe sichubeka simkhonta ngekwetsembeka nasibhekene netimo letimatima. w24.01 22 ¶7-8

Nangabe wesaba, tibute: ‘Yini Jehova lasavele ayentile?’ Cabangisisa ngetintfo latidalile. Sibonelo nje, ‘nasinakisisa’ indlela Jehova lanakekela ngayo tinyoni netimbali letingakadalwa ngemfanekiso wakhe futsi letingakhoni kumkhonta, loko kutasisita setsembe mbamba kutsi utasinakekela natsi. (Mat. 6:25-32) Cabanga futsi ngaloko Jehova lakwentele bantfu labamkhontako. Ungadadisha ngemuntfu lokukhulunywa ngaye eBhayibhelini lowakhombisa kukholwa lokucinile, nobe ungafundza ngesibonelo salamuhla sesikhonti saJehova. Ngetulu kwaloko, cabangisisa ngendlela Jehova lakunakekele ngayo. Ukudvonsele njani ecinisweni? (Joh. 6:44) Uyiphendvule njani imithantazo yakho? (1 Joh. 5:14) Ikusita njani onkhe malanga inhlawulo yeNdvodzana yakhe layitsandzako?​—Ef. 1:7; Heb. 4:14-16. w24.01 4 ¶6; 7 ¶17