November

Nangabe ungumtali, sita bantfwana bakho kutsi balungiselele timphendvulo letingangabo. Ngaletinye tikhatsi kuyenteka sifundze ngetindzaba letimatima, njengetinkinga letisemishadweni nobe tindzaba tekutiphatsa, nanobe kunjalo singaba khona sigaba nobe timbili umntfwana langaphendvula kuso. Ngetulu kwaloko, sita bantfwana bakho babone kutsi yini lengenta bahle bangakhonjwa nabaphakamisile. Kubachazela loko kungabenta bangadvumateki nangabe kukhonjwa labanye esikhundleni sabo. (1 Thim. 6:18) Sonkhe singalungiselela timphendvulo letitawudvumisa Jehova naletitawukhutsata bazalwane betfu nabodzadze. (Taga 25:11) Nanobe ungasho imphendvulo lemfishane lemayelana nalokwenteke kuwe, kufanele ukubalekele kukhuluma kakhulu ngawe. (Taga 27:2; 2 Khor. 10:18) Kufanele sinake Jehova, liVi lakhe kanye nebantfu bakhe.​—Semb. 4:11. w23.04 24-25 ¶17-18

Lutsandvo lubalulekile kuze sihlale siphapheme futsi sisangulukile. (Mat. 22:37-39) Kutsandza Nkulunkulu kwenta kutsi sichubeke nemsebenti wekushumayela ngisho nobe kwenta njalo kungasibangela tiphi tinkinga. (2 Thim. 1:7, 8) Ngenca yekutsi siyabatsandza bantfu labasengakamkhonti Jehova, siyachubeka sibashumayela, loko size sikwente ngetincingo nangekubhala tincwadzi. Asililahli litsemba lekutsi ngalelinye lilanga bomakhelwane betfu batawushintja futsi bacale kwenta lokukahle. (Hez. 18:27, 28) Kutsandza makhelwane wetfu kusho nekutsandza bazalwane betfu nabodzadze. Lolutsandvo silukhombisa ngekutsi ‘sikhutsatane futsi sakhane.’ (1 Thes. 5:11) Njengemasotja lasemphini kanye kanye, siyakhutsatana. Ngeke sibavise buhlungu ngemabomu bazalwane nabodzadze nobe sibuyisele lokubi ngalokubi. (1 Thes. 5:13, 15) Ngetulu kwaloko, sikhombisa lutsandvo ngekutsi sihloniphe bazalwane labaholako ebandleni.​—1 Thes. 5:12. w23.06 10 ¶6; 11 ¶10-11

Lenye indlela lesingakucinisa ngayo kukholwa kwetfu kutsi sicabangisise ngenhlawulo. Inhlawulo isicinisekisa ngekutsi tetsembiso taNkulunkulu titawugcwaliseka. Nasicabangisisa ngekutsi yini leyenta Jehova wasilungiselela inhlawulo, nekutsi walahlekelwa kangakanani, loko kusisita kutsi setsembe kakhulu kutsi setsembiso saNkulunkulu sekutsi sitawuphila phakadze eveni lelihle sitawugcwaliseka nakanjani. Yini leyenta sisho njalo? Yini leyenteka kuze sigcine sinenhlawulo? Jehova watfumela iNdvodzana yakhe lelitibulo futsi layitsandzako, lebeyisondzelene kakhulu naye isuka ezulwini kuze italwe emhlabeni. Ngesikhatsi Jesu alamhlabeni, wabeketelela tinkinga letinyenti. Wabese uyahlupheka futsi wafa kabuhlungu. Leli bekulinani lelikhulu Jehova lalikhipha! Nkulunkulu wetfu lositsandzako bekangeke avume kutsi iNdvodzana yakhe layitsandzako ihlupheke futsi ife kuze nje sibe nemphilo lencono sikhashana. (Joh. 3:16; 1 Phet. 1:18, 19) Ngenca yekutsi Jehova wanikela ngeNdvodzana yakhe leligugu kuze asisite, utawuciniseka kutsi siphila phakadze eveni lelisha. w23.04 27 ¶8-9

Jehova unaso yini sifiso sekuvusa labafile? Yebo unaso. Waphefumulela babhali beliBhayibheli labanyenti kutsi babhale ngesetsembiso sekuvuswa kwebantfu labafile. (Isa. 26:19; Semb. 20:11-13) Jehova uhlale asifeza setsembiso lasentako. (Josh. 23:14) Jehova uyakulangatelela kuvusa labafile. Cabanga ngemavi lashiwo nguJobe. Bekaciniseka kutsi ngisho angafa, Jehova bekatakulangatelela kuphindze ambone. (Jobe 14:14, 15, umbhalo longentasi) Jehova utiva ngendlela lefanako nangato tonkhe tikhonti takhe letishonile. Uyakulangatelela kutivusa, tiphile saka futsi tijabulile. Kutsiwani ngetigidzigidzi letife tingakalitfoli litfuba lekufundza liciniso ngaJehova? Nkulunkulu wetfu lositsandzako uyafuna kutivusa nato. (Imis. 24:15) Ufuna titfole litfuba lekuba bangani bakhe futsi tiphile phakadze emhlabeni.​—Joh. 3:16. w23.04 9 ¶5-6

Yini longayenta kuze uligcine licinile litsemba lonalo? Asesitsi unelitsemba lekuphila phakadze emhlabeni, fundza ngendlela liBhayibheli lelilichaza ngayo liPharadisi futsi ucabangisise ngalo. (Isa. 25:8; 32:16-18) Cabanga ngekutsi kutawuba njani kuphila emhlabeni lomusha. Tibone ngeliso lengcondvo ulapho. Nangabe sihlale sicabanga ngelitsemba lesinalo lemhlaba lomusha, tinkinga lesinato titawuba ‘tesikhashana futsi tibe melula.’ (2 Khor. 4:17) Jehova utakucinisa asebentisa litsemba lakunike lona. Ukunikile loko lokudzingako kuze utfole emandla kuye. Ngako nangabe udzinga lusito lwekwenta sabelo sakho, lekubeketelela tinkinga nobe lekuhlala ujabulile, thantaza kuJehova futsi ufune sicondziso sakhe ngekutsi utidadishele liBhayibheli. Semukele sikhutsato lositfola kubazalwane bakho nabodzadze. Hlale ucabanga ngelitsemba lonalo ngelikusasa. Nawenta njalo ‘utawuciniswa ngawo onkhe emandla ngebukhulu benkhatimulo [yaNkulunkulu] kuze ucinisele ngalokuphelele ngekubeketela nenjabulo.’​—Khol. 1:11. w23.10 17 ¶19-20

Sinetizatfu letinyenti tekubonga Jehova emithantazweni yetfu. Singambonga Jehova nganobe ngabe ngutiphi tintfo letinhle lesinato, kwatise kutsi tonkhe tipho letinhle tivela kuye. (Jak. 1:17) Sibonelo nje, singabonga kuJehova ngemhlaba lomuhle nangendalo lemangalisako. Singaphindze simbonge ngenca yetimphilo tetfu, imindeni yetfu, bangani lesinabo nangelitsemba lesinalo. Singambonga futsi Jehova ngekusivumela kutsi sibe bangani bakhe. Kungahle kudzingeke sitinikete sikhatsi sekucabanga ngetizatfu tekubonga Jehova. Bantfu labanyenti lamuhla ababongi. Bavame kunaka loko labakufunako kunaloko labangakwenta kuze bakhombise kutsi bayabonga ngalabanako. Nangabe natsi besingabalingisa, imithantazo yetfu beyingagcwala ticelo. Kuze loko kungenteki, kufanele sichubeke sikhombisa kutsi siyabonga ngako konkhe Jehova lasentela kona.​—Luk. 6:45. w23.05 4 ¶8-9

Njengobe Jehova anguBabe wetfu lositsandzako, akajabuli nakasibona siva buhlungu. (Isa. 63:9) Nobe kunjalo, akasivikeli kuto tonkhe tinkinga lesibhekana nato letingafananiswa nemifula nobe emalangabi. (Isa. 43:2) Kodvwa wetsembisa kusisita ‘sidzabule emkhatsini’ wato. Angeke avume kutsi tinkinga tetfu tisente siyekele kumkhonta. Jehova uphindze asiphe umoya wakhe longcwele lonemandla kuze usisite sicinisele. (Luk. 11:13; Fil. 4:13) Ngenca yaloko, singaciniseka kutsi sitawuhlale sinaloko lesikudzingako kuze sicinisele futsi sihlale setsembekile kuye. Jehova ulindzele kutsi simetsembe. (Heb. 11:6) Ngaletinye tikhatsi, tinkinga tetfu tingabonakala tingangentsaba. Singahle sicale nekungabata kutsi Jehova utasisita. Kodvwa liBhayibheli lisetsembisa kutsi ‘singakhona kucanca lubondza’ ngenca yemandla aNkulunkulu. (Hla. 18:29) Ngako kunekutsi singabate, kufanele sithantaze sinekukholwa, setsembe kutsi Jehova utayiphendvula imithantazo yetfu.​—Jak. 1:6, 7. w23.11 22 ¶8-9

Lamavi aluchaza kahle lutsandvo sibili! Acinisekisa indvodza nemfati kutsi bangaba nalo lutsandvo lolungapheli. Kutawuya ngalabashadene kutsi batawuba nalo yini lutsandvo lolungapheli. Ase sibekise: Umlilo ungachubeka uvutsa kuphela nangabe ukhwetelwa. Kodvwa nangabe unganakwa, lomlilo utawucisha. Ngendlela lefanako, lutsandvo lolukhona emkhatsini wendvodza nemfati lungahlala lucinile kuphela nangabe bacinisa budlelwane babo. Ngaletinye tikhatsi labashadene bangahle beve shengatsi lutsandvo lwabo luyancipha, ikakhulukati nangabe banetinkinga tetimali, tinkinga temphilo, nobe bacindzetelekile ngenca yekukhulisa bantfwana. Kuze bagcine “lilangabi laJehova” livutsa, indvodza nemfati kufanele bente lokusemandleni kuze babe nebuhlobo lobucinile naJehova. w23.05 20-21 ¶1-3

Yini lesingayenta kuze sibe nesibindzi? Batali betfu bangahle basikhutsate kutsi sibe nesibindzi, kodvwa angeke basente sibe nesibindzi ngisho bona banaso. Kuba nesibindzi kufana nekufundza likhono lelisha. Lenye indlela yekuba nalelikhono kutsi ubukisise lokwentiwa ngulolokufundzisako futsi ulingise sibonelo sakhe. Ngendlela lefanako, siyafundza kuba nesibindzi ngekutsi sinakisise indlela labanye labasikhombisa ngayo futsi silingise sibonelo sabo. NjengaDanyela, kufanele silati kahle liVi laNkulunkulu. Kufanele sakhe bungani naJehova ngekutsi sikhulume naye tikhatsi letinyenti futsi sikhulume naye sikhululekile. Ngetulu kwaloko, kufanele simetsembe Jehova, siciniseke kutsi utasisekela. Nasenta loko, ngisho nobe kukholwa kwetfu kungavivinywa sitawuba nesibindzi. Bantfu labanesibindzi bavame kuhlonishwa ngulabanye. Bangaphindze basite nalabanye kutsi bati Jehova. Ngako sinetizatfu letinhle tekwetama kuba nesibindzi. w23.08 2 ¶2; 4 ¶8-9

Ligama lesiGriki lelihunyushwe ngekutsi “ciniseka” belisetjentiswa nakukhulunywa ngendlela bantfu bebahlola ngayo ligolide nobe lisiliva kutsi kungiko mbamba yini. Ngako kuze sibone kutsi loko lesikuvako nalesikufundzako kuliciniso mbamba yini, kufanele sikuhlole. Loku kutawubaluleka kakhulu ngatsi njengobe kuhlupheka lokukhulu kusondzela. Kunekutsi semukele konkhe lokushiwo ngulabanye, sitawusebentisa likhono letfu lekucabanga kuze sicatsanise loko lesikuvako nalesikufundzako nalokushiwo liBhayibheli nenhlangano yaJehova. Nasenta njalo, ngeke siyengwe tinkhulumo letingemanga letiphefumulelwe ngemadimoni. (Taga 14:15; 1 Thim. 4:1) Siyati kutsi bantfu baJehova batawusindza ngekuhlupheka lokukhulu balicembu. Kodvwa ngamunye wetfu akati kutsi likusasa limphatseleni. (Jak. 4:14) Nobe kunjalo, ngisho sitawusindza ngekuhlupheka lokukhulu nobe sitawufa ngaphambi kwako, sitawunikwa umvuzo wekuphila phakadze nangabe sihlala setsembekile. Shengatsi sonkhe singahlale sinake lelitsemba letfu lelihle futsi sichubeke silungele lilanga laJehova! w23.06 13 ¶15-16

Asati kutsi letinye tiphrofetho teliBhayibheli titawugcwaliseka nini. (Dan. 12:8, 9) Kodvwa ngenca yekutsi asicondzi ngalokuphelele kutsi letinye tiphrofetho titawugcwaliseka njani akusho kutsi angeke tigcwaliseke. Siyetsemba kutsi Jehova utasitjela loko lokufanele sikwati ngesikhatsi lesifanele, njengobe enta esikhatsini lesendulile. Kutawuphuma simemetelo lesitsi “kuthula nekulondzeka.” (1 Thes. 5:3) Ngemuva kwaloko, bohulumende bemhlaba batawujikela inkholo yemanga futsi bayibhubhise. (Semb. 17:16, 17) Batawubese bahlasela bantfu baNkulunkulu. (Hez. 38:18, 19) Letintfo letitawenteka titawuholela emphini yekugcina ye-Amagedoni. (Semb. 16:14, 16) Singaciniseka kutsi letintfo titawenteka ngekushesha. Kuze kube nguleso sikhatsi, shengatsi singachubeka sikhombisa kutsi siyabonga kuBabe wetfu wasezulwini lositsandzako ngekutsi sinake tiphrofetho teliBhayibheli futsi sisite labanye bente lokufanako. w23.08 13 ¶19-20

Ngesikhatsi umphostoli Pawula akhuluma ngekukholwa, litsemba nelutsandvo wephetsa ngemavi latsi, “lokubaluleke kakhulu kuko konkhe lutsandvo.” (1 Khor. 13:13) Yini leyenta Pawula washo lamavi? Esikhatsini lesitako, ngeke kudzingeke sibe nekukholwa etetsembisweni taNkulunkulu telive lelisha, nobe setsembe kutsi letetsembiso titawugcwaliseka ngobe titawube setigcwalisekile. Kodvwa kutawudzingeka sichubeke sitsandza Jehova kanye nebantfu. Ecinisweni, lutsandvo lesinalo ngabo lutawuchubeka lukhula kuze kube phakadze. Lesinye sizatfu kutsi emaKhristu eliciniso abonakala ngelutsandvo. Jesu watjela baphostoli bakhe watsi: “Nangabe nitsandzana, bonkhe batawukwati kutsi nibafundzi bami.” (Joh. 13:35) Ngetulu kwaloko, kutsandzana kwenta kutsi sibe nebunye. Pawula watsi lutsandvo “lusibopho lesiphelele sebunye.” (Khol. 3:14) Umphostoli Johane wabhalela bazalwane bakhe nabodzadze watsi: “Loyo lotsandza Nkulunkulu kufanele atsandze nemzalwane wakhe.” (1 Joh. 4:21) Nangabe sikhombisa kutsi siyabatsandza labanye, sisuke sikhombisa kutsi siyamtsandza Nkulunkulu. w23.11 8 ¶1, 3

Njengobe singemaKhristu, liBhayibheli lifananisa kuphila kwetfu nemncintiswano. Labo labatawugijima baze bawucedze lomncintiswano batawutfola kuphila lokuphakadze. (2 Thim. 4:7, 8) Kufanele sente konkhe lesingakwenta kuze sichubeke sigijima, ikakhulukati ngobe sekusedvute kutsi sishaye intsambo. Umphostoli Pawula washo loko lokungasisita kuze natsi sikhone kushaya intsambo. Watsi kufanele ‘silahle konkhe lokusindzako siwugijime ngekucinisela umncintiswano losembikwetfu.’ Pawula bekasho kutsi kute yini umtfwalo emaKhristu lokufanele awetfwale? Cha, bekangasho njalo. Kunaloko, bekasho kutsi kufanele siyekele kwetfwala imitfwalo lokungakafaneli siyetfwale. Imitfwalo lenjalo ingasenta kutsi sinciphise lizinga lesigijima ngalo futsi isente siphelelwe ngemandla. Kuze sichubeke sigijima, kufanele sisheshe siyibone imitfwalo lengakadzingeki lengasicedza emandla futsi siyilahle. Ngesikhatsi lesifanako, asifuni kulahla imitfwalo lokufanele siyetfwale. Ngale kwaloko singatenta singasakufaneli kuba kulomncintiswano.​—2 Thim. 2:5. w23.08 26 ¶1-2

Kucabangela kusisita kutsi sihloniphe imibono yalabanye. Nasi sibonelo, labanye bodzadze bayakutsandza kutimonyonga, kantsi labanye abakutsandzi. Lamanye emaKhristu anatsa tjwala ngekulinganisela kodvwa lamanye akhetsa kungabutsintsi sanhlobo. Onkhe emaKhristu afuna kuhlala aphile saka, kodvwa akhetsa tindlela letingafani tekwelashwa. Nangabe sicabanga kutsi tincumo tetfu ngito letikahle, singahle setame kwenta labanye ebandleni batemukele futsi loko kungabakhuba labanye kuphindze kubangele kwehlukana ebandleni. (1 Khor. 8:9; 10:23, 24) Kunekutsi Jehova abeke imitsetfo endleleni lokufanele sigcoke ngayo, usinikete timiso lesingatisebentisa. Kufanele sigcoke ngendlela lelungela bantfu labakhonta Nkulunkulu, lekhombisa kucabangela, kuzitsa ‘nekuvutfwa.’ (1 Thim. 2:9, 10) Ngako asifuni kutidvonsela emehlo ebantfu ngaloko lesikugcokako. Timiso teliBhayibheli tiphindze tisite labadzala belibandla kutsi bangabeki imitsetfo ngendlela yekugcoka nendlela yekulungisa tinwele. w23.07 23-24 ¶13-14

Jehova uyasikhombisa kutsi singaba nelikusasa lelijabulisako. Labo labemukela simemo ‘kulomfati losilima’ futsi lomemetako banake nje kutijabulisa emasitseleni. Siphetfo sabo ‘sisekujuleni kweliThuna.’ (Taga 9:13, 17, 18) Kungulokwehlukile kulabo labemukela simemo ‘ekuhlakanipheni lokungiko’! (Taga 9:1) Sifundza kutsandza loko Jehova lakutsandzako nekwenyanya loko lakwenyanyako. (Hla. 97:10) Siyajabula ngenca yekutsi simema labanye kutsi bafundze ‘ekuhlakanipheni lokungiko.’ Kuba ngatsi ‘siyamemeta sisetindzaweni letiphakeme telidolobha sitsi: “Bonkhe bantfu labete lwati abangene lapha.”’ Tibusiso letitawutfolwa ngitsi kanye nalabo labemukela lesimemo atisito nje tanyalo kuphela. Kodvwa taphakadze, titawenta kutsi siphile phakadze njengobe ‘sihamba endleleni lekhombisa kutsi sinekucondza.’​—Taga 9:3, 4, 6. w23.06 24 ¶17-18

Utiva njani nangabe losebenta naye nobe lofundza naye akubuta ngetinkholelo takho? Ushaywa luvalo yini? Linyenti letfu litiva kanjalo. Kodvwa lombuto ungasenta sibone kutsi lomuntfu ukholelwani nobe ucabangani, lokungasinika litfuba lekutsi simcocele tindzaba letimnandzi. Kodvwa ngalesinye sikhatsi lomuntfu angahle abute lombuto ngobe afuna kususa imphikiswano. Loko akukafaneli kusimangalise. Labanye bantfu batjelwe emanga ngetinkholelo tetfu. (Imis. 28:22) Ngetulu kwaloko, siphila “emalangeni ekugcina,” lokusikhatsi lapho bantfu labanyenti “bangavumi kwenta tivumelwane” futsi baze “babe nelulaka.” (2 Thim. 3:1, 3) Kungenteka uyatibuta: ‘Yini lengingayenta kuze ngibe nemusa nangabe lotsite afuna kususa imphikiswano ngetinkholelo tami?’ Yini letakusita? Ngumoya lophansi. Umuntfu lonemoya lophansi akasheshi atfukutsele, kodvwa uyatibamba nangabe lotsite afuna kumtfukutselisa nalapho angati kutsi aphendvule atsini. w23.09 14 ¶1-2

Ngalesinye sikhatsi sitfola seluleko lesisisita kutsi singatsandzi kakhulu imali futsi sisivikele ekwenteni tintfo letingenta sephule imitsetfo yaNkulunkulu. Nakuletimo, kuyasisita kulalela sicondziso saJehova. (Isa. 48:17, 18; 1 Thim. 6:9, 10) Siyaciniseka kutsi Jehova utawuchubeka asebentisa bantfu labammelele kuze asinikete sicondziso ngekuhlupheka lokukhulu kuze kube sikhatsi Sekubusa Kweminyaka Leyinkhulungwane. Utawuchubeka yini ulalela sicondziso? Kutawuba melula kukwenta loko nangabe utawuchubeka ulandzela sicondziso saJehova nyalo. Ngako shengatsi singahlale silandzela sicondziso saJehova, ngisho naleso lesisinikwa ngulabo labakhetfwe kutsi basihole. (Isa. 32:1, 2; Heb. 13:17) Nasenta njalo, sitawuba nesizatfu lesivakalako sekwetsemba loyo losicondzisako, lokunguJehova, losisita kutsi singayi etindzaweni letiyingoti kodvwa siye lapho sifuna kuya khona, eveni lelisha. w24.02 25 ¶17-18

Umphostoli Pawula bekakujabulela kukhonta Jehova, kodvwa ngaletinye tikhatsi bekahle abhekana netinkinga. Bekavame kuhamba libanga lelidze, futsi ngaleto tikhatsi loko bekungasiko melula. Nakasendleleni, Pawula bekahle ‘aba setingotini temifula,’ “nasetingotini tetigelekece.” Ngaletinye tikhatsi titsa takhe betihle timshaya. (2 Khor. 11:23-27) Bazalwane baPawula bebahle bangabongi ngekutikhandla kwakhe kuze abasite. (2 Khor. 10:10; Fil. 4:15) Yini leyasita Pawula kutsi achubeke akhonta Jehova? Pawula wafundza lokunyenti ngebuntfu baJehova emiBhalweni nakuloko lokwenteka ekuphileni kwakhe. Pawula bekaciniseka kutsi Jehova Nkulunkulu uyamtsandza. (Rom. 8:38, 39; Ef. 2:4, 5) Naye wamtsandza kakhulu Jehova. Pawula wakhombisa kutsi uyamtsandza Jehova ngekutsi ‘asite labangcwele futsi achubeke abasita.’​—Heb. 6:10. w23.07 9 ¶5-6

Bantfu labanyenti bayavuma kutsi siyabadzinga bohulumende nekutsi kufanele silalele leminye imitsetfo lebekwa “tiphatsimandla.” Kodvwa bangahle bangayilaleli imitsetfo labangayitsandzi nobe lababona ngatsi ayicabangeli. LiBhayibheli liyavuma kutsi bohulumende bebantfu babangela kuhlupheka, balawulwa nguSathane futsi batawubhujiswa ngekushesha. (Hla. 110:5, 6; Shu. 8:9; Luk. 4:5, 6) Liphindze litsi “loyo lomelene netiphatsimandla usuke amelene nalokubekwe nguNkulunkulu.” Kwanyalo Jehova uvumele bohulumende kutsi babuse kuze kube nekuhleleka futsi ulindzele kutsi sibalalele. Ngako, kufanele kutsi “bonkhe sibanike loko lokubafanele,” lokufaka ekhatsi imitselo, inhlonipho nekulalela. (Rom. 13:1-7) Leminye imitsetfo singahle siyibone ngatsi ayisilungeli, ayicabangeli nobe kulukhuni kuyilalela. Kodvwa silalela Jehova, futsi usitjela kutsi silalele labo labasemagunyeni, nangabe nje loko labakushoko kungaphambani nemitsetfo yakhe.​—Imis. 5:29. w23.10 8 ¶9-10

Ngesikhatsi Samsoni atalwa, emaFilisti bekabusa sive saka-Israyeli futsi bekasicindzetela. (Khu. 13:1) Lokuwabusa kwawo ngelunya kwenta ema-Israyeli acindzeteleka kakhulu. Jehova wakhetsa Samsoni kutsi ‘ahole ekusindziseni sive saka-Israyeli esandleni semaFilisti.’ (Khu. 13:5) Kuze akhone kuwenta lomsebenti, bekutawudzingeka etsembele kuJehova. Ngalelinye lilanga, libutfo lemaFilisti laya eLehi, lokungenteka beyikaJuda kuze libambe Samsoni. Emadvodza akaJuda esaba, ngako ancuma kumnikela etitseni takhe. Bantfu besive sakubo bambopha ngetintsambo letinsha letimbili futsi bammikisa kumaFilisti. (Khu. 15:9-13) Nobe kunjalo, “umoya waJehova wabese unika Samsoni emandla” futsi wakhona kutinyomula. “Wabese utfola umhlatsi losemusha wembongolo lendvuna,” wawutsatsa futsi wabulala ngawo emaFilisti langu-1 000!​—Khu. 15:14-16. w23.09 2 ¶3-4

Jehova bekasolo asembulela “injongo [yakhe] yaphakadze” eBhayibhelini. Uhlale aphumelela ngobe “wenta kutsi tonkhe tintfo tigcwalise injongo yakhe.” (Taga 16:4) Ngetulu kwaloko, umphumela waloko Jehova lakwentako utawuhlala kuze kube phakadze. Iyini injongo yaJehova, futsi nguluphi lushintjo lalwentile kuze ayifeze? Nkulunkulu watjela bantfu bekucala injongo yakhe ngabo. Bekufanele ‘batalane bandze bagcwale emhlabeni futsi bawuncobe, babuse tonkhe tilwane’ letisemhlabeni. (Gen. 1:28) Ngesikhatsi bo-Adamu na-Eva bavukela, futsi babangela kutsi bantfu babe nesono, loko akuzange kumvimbe Jehova kutsi afeze injongo yakhe. Washintja indlela lebekatayifeza ngayo. Ngekushesha wancuma kubeka uMbuso ezulwini lebewutawufeza injongo yakhe yasekucaleni ngebantfu nangemhlaba.​—Mat. 25:34. w23.10 20 ¶6-7

Jehova angasisita kutsi singapheli emandla. Kungenteka kube matima, ikakhulukati nangabe sekusikhatsi lesidze silwa nebutsakatsa lobutsite. Ngaletinye tikhatsi butsakatsaka lesinabo bungabonakala bumatima kunalobo umphostoli Phetro lebekabhekene nabo. Kodvwa Jehova angasiniketa emandla kuze singalilahli litsemba. (Hla. 94:18, 19) Sibonelo nje, kwaphela iminyaka leminyenti lomunye umzalwane asitabane ngaphambi kwekutsi afundze liciniso. Wakushintja ngalokuphelele kuphila kwakhe futsi waphila ngetimiso teliBhayibheli. Nobe kunjalo, ngaletinye tikhatsi uhle alwisana netifiso letimbi. Yini lemsitile kutsi angapheli emandla? Utsi: “Jehova ungicinisile.” Wengeta utsi: “Ngemoya waJehova . . . , ngifundzile kutsi umuntfu angachubeka asecinisweni . . . Jehova unginike imisebenti letsite futsi nanobe nginebutsakatsaka lobutsite uyachubeka angicinisa.” w23.09 23 ¶12

Nine bazalwane labasebasha, angeke kutentakalele kutsi nibe ngemadvodza lavutsiwe. Kufanele nikhetse tibonelo letinhle lenitatilingisa, nibe nelikhono lekusebentisa kahle ingcondvo, netsenjwe ngulabanye, nifundze emakhono lalusito futsi nilungele imisebenti lenitayenta esikhatsini lesitako. Ngaletinye tikhatsi ungahle uve shengatsi mnyenti kakhulu umsebenti lokufanele uwente. Kodvwa ungakhona kuwenta. Khumbula kutsi Jehova ufuna mbamba kukusita. (Isa. 41:10, 13) Nebazalwane bakho nabodzadze nabo batakusita. NasewungumKhristu lovutsiwe, imphilo yakho itawujabulisa. Siyanitsandza nine bazalwane labasebasha! Shengatsi Jehova angachubeka anibusisa njengobe netama kuba ngemadvodza lavutsiwe. w23.12 29 ¶19-20

Ase sitsi nihlangene ndzawonye nebazalwane nabodzadze. Nijabulela sikhatsi lesimnandzi, futsi nitsatse sitfombe. Nibese nitsatsa letinye letimbili nentele kusebentisa tona nakwenteka lesekucala singaphumi kahle. Nyalo seninetitfombe letintsatfu. Kodvwa ubese uyanaka kutsi kusinye sato kunemzalwane loswacile. Ngako uyasisusa ecingweni lakho ngobe unetitfombe letimbili lapho khona nonkhe nimoyitela, lokufaka ekhatsi nalomzalwane. Sivame kutikhumbula tikhatsi letimnandzi lesiticitse nebazalwane betfu nabodzadze. Kodvwa ase sitsi kuletinye taletikhatsi umzalwane nobe dzadze usho lokutsite nobe wenta lokutsite lokungasiphatsi kahle. Kufanele sente njani ngaloko? Kufanele setame kukususa engcondvweni njengobe nje sisusa sitfombe lesingakaphumi kahle. (Ef. 4:32) Singakhona kumcolela umzalwane nobe dzadze ngobe tinyenti tintfo letinhle lesitikhumbulako ngaye nasibe ndzawonye. Nguleto-ke tintfo lokufanele sitigcine engcondvweni futsi tibe ligugu kitsi. w23.11 12-13 ¶16-17

Ligama lesiGriki lelisetjentisiwe liveta kutsi bodzadze kufanele bagcoke ngendlela lehloniphekile nalekhombisa kutsi banendzaba nendlela labanye labativa ngayo nobe ngemibono yabo. Sibatsandza kakhulu bodzadze labavutsiwe, labagcoka ngendlela lezitsile! Ngetulu kwaloko, bodzadze labavutsiwe kufanele babe nekucondza. Kuyini kucondza? Kukhona kubona lokulungile nalokukabi bese ukhetsa kwenta lokulungile. Cabanga ngesibonelo sa-Abigayili. Indvodza yakhe yenta sincumo lesibi lebesitawuba nemphumela lomubi kuwo wonkhe umndeni wayo. Abigayili wenta lokutsite ngekushesha. Ngenca yekutsi wabona kutsi kukunini lakufanele ente khona lokutsite, loko kwasindzisa kuphila kwebantfu. (1 Sam. 25:14-23, 32-35) Kucondza kuphindze kusisite sibone kutsi kunini lapho kufanele sikhulume khona nalapho kufanele sibindze khona. Ngetulu kwaloko, nangabe sikhatsalela lotsite kucondza kusisita kutsi singakwenti ngendlela letamenta ative angakhululeki.​—1 Thes. 4:11. w23.12 20 ¶8-9

Umphostoli Pawula wabhalela libandla laseRoma lamavi. Bazalwane nabodzadze kulelibandla bebafundzile ngaJehova naJesu, baba nekukholwa futsi baba ngemaKhristu. Ngako Nkulunkulu ‘watsi balungile ngenca yekukholwa,’ futsi wabagcoba ngemoya longcwele. (Rom. 5:1) Baba nelitsemba lelihle. Ngekuhamba kwesikhatsi, Pawula wabhalela emaKhristu lagcotjiwe ase-Efesu ngalelitsemba lebekanalo. Lelitsemba belifaka ekhatsi kutfola ‘lifa lalabangcwele.’ (Ef. 1:18) Pawula watjela nebaseKholose kutsi lelitsemba labo belitawufezeka kuphi. Walibita ngekutsi “litsemba lenibekelwe lona ezulwini.” (Khol. 1:4, 5) Ngako litsemba lemaKhristu lagcotjiwe lekuvuselwa ezulwini aphile phakadze futsi abuse naKhristu.​—1 Thes. 4:13-17; Semb. 20:6. w23.12 9 ¶4-5

Ligama lelitsi ‘kulondvolota’ belivame kusetjentiswa kuze lichaze emasotja lebekagadza lidolobha futsi alivikele kutsi lingahlaselwa. Bantfu labahlala kulelidolobha leligadziwe bebalala ngekuthula, ngobe bebati kutsi kunemasotja labavikele. Ngendlela lefanako, nangabe kuthula kwaNkulunkulu kulondvolota tinhlitiyo netingcondvo tetfu, siyakhona kwehlisa umoya ngobe siyati kutsi sivikelekile. (Hla. 4:8) Ngisho nobe simo setfu singashintji ngekushesha, njengobe kwenteka kuHana, singachubeka sinekuthula. (1 Sam. 1:16-18) Nasehlise umoya, kuba melula kutsi sicabange kahle futsi sente tincumo letikahle. Yini lesingayenta? Njengobe bantfu labahlala kulelidolobha bangabita lisotja kuze libavikele, nawe ungacela Jehova kutsi akusite. Njani? Ngekutsi uthantaze uze utfole kuthula kwaNkulunkulu. (Luk. 11:9; 1 Thes. 5:17) Nangabe ubhekene nesimo lesimatima, chubeka uthantaza futsi Jehova utakunika kuthula lokutawulondvolota ingcondvo yakho nenhlitiyo yakho.​—Rom. 12:12. w24.01 21 ¶5-6

Kuze Jesu angcwelise libito laBabe wakhe, wabeketelela konkhe kuphatfwa kabi, kwetfukwa nekunyundzelwa. Bekati kutsi ulalele Babe wakhe kuto tonkhe tintfo; kute lebekangaba nemahloni ngako. (Heb. 12:2) Bekati nekutsi bekahlaselwa nguSathane ngalokucondzile ngaleso sikhatsi lesimatima. (Luk. 22:2-4; 23:33, 34) Sathane bekatimisele kwenta Jesu kutsi angetsembeki; kodvwa wakha phansi! Jesu wakhombisa kutsi Sathane ungumcambimanga lomubi nekutsi Jehova unato tikhonti takhe letetsembekile, letichubeka ticotfo kuye ngisho tibhekene netimo letimatima kakhulu! Uyafuna yini kujabulisa iNkhosi yakho lebusako? Chubeka udvumisa libito laNkulunkulu, usite labanye kutsi bati liciniso ngaNkulunkulu wetfu. Nawenta njalo, ulingisa Jesu. (1 Phet. 2:21) NjengaJesu, wenta Jehova kutsi ajabule futsi ukhombisa kutsi sitsa sakhe lesinguSathane sinemanga lamabi! w24.02 11-12 ¶11-13

Kuleminyaka lesihlanu leyendlulile, kubhajatiswe bantfu labangetulu kwesigidzi baba BoFakazi BaJehova. Nawutinikela kuJehova, usuke ukhetsa kuba ngumfundzi waJesu Khristu futsi wente intsandvo yaNkulunkulu ibe yintfo lebaluleke kakhulu ekuphileni kwakho. Yini letawulindzeleka kuwe nasewutinikele? Jesu watsi: “Nangabe umuntfu afuna kungilandzela, akatidzele.” (Mat. 16:24) Ligama lesiGriki lelihunyushwe ngekutsi ‘kutidzela’ lingasho “kungasatiphileli wena.” Njengobe usikhonti saJehova lesitinikele, kutawudzingeka ungasatenti tintfo letingahambisani nentsandvo yaNkulunkulu. (2 Khor. 5:14, 15) Loko kufaka ekhatsi kugwema “imisebenti yenyama,” lenjengebugwadla. (Gal. 5:19-21; 1 Khor. 6:18) Kulalela lemitsetfo kutawenta ungasakujabuleli yini kuphila? Angeke nangabe umtsandza Jehova futsi uciniseka kutsi imitsetfo yakhe isita wena.​—Hla. 119:97; Isa. 48:17, 18. w24.03 2 ¶1; 3 ¶4

Jehova ubapha umoya longcwele labo labemukelako. (Mat. 12:18) Singatibuta: ‘Ngiyatikhombisa yini titselo temoya waNkulunkulu ekuphileni kwami?’ Sewubabeketelela kakhudlwana yini labanye kunangalesikhatsi usengakamati Jehova? Nawuchubeka ukhombisa titselo temoya waNkulunkulu, kutawuba sebaleni kutsi Jehova uyakwemukela! Jehova wenta kutsi labo labemukelako bazuze enhlawulweni. (1 Thim. 2:5, 6) Kodvwa yini lesingayenta nangabe tinhlitiyo tetfu tingavumi kutsi Jehova uyasemukela ngisho nobe sinekukholwa enhlawulweni futsi sibhajatisiwe? Khumbula kutsi ngeke sihlale siyetsemba indlela lesitiva ngayo kodvwa singametsemba Jehova. Utsi balungile labo labanekukholwa enhlawulweni futsi wetsembisa kubabusisa.​—Hla. 5:12; Rom. 3:26. w24.03 30 ¶15; 31 ¶17