Yetsembela KuJehova Njengobe Kuphela Kusondzela

‘Yetsembelani kuJehova kuze kube phakadze.’—ISA. 26:4.

1. Ngumuphi umehluko lokhona emkhatsini wetinceku taJehova kanye nebantfu balelive?

KULELIVE lesiphila kulo, tigidzi tebantfu atisati kutsi tingetsemba bani nobe ini, ngobe tiye teva buhlungu nobe tadvumateka tikhatsi letinyenti. Tinceku taJehova tona tehluke kakhulu! Njengobe ticondziswa kuhlakanipha lokuvela kuNkulunkulu, tiyati kutsi akukafaneli tibeke litsemba lato kulelive nobe “etikhulwini” talo. (Hla. 146:3) Kunaloko, tibeka kuphila kanye nelikusasa lato etandleni taJehova, ngobe tiyati kutsi uyatitsandza futsi uhlale alifeza liVi lakhe.—Rom. 3:4; 8:38, 39.

2. Joshuwa wakufakazela njani kwetsembeka kwaNkulunkulu?

² Joshuwa wasendvulo wakufakazela kwetsembeka kwaNkulunkulu. Ngasekupheleni kwekuphila kwakhe, watjela ema-Israyeli: “Nani niyati ngenhlitiyo yenu yonkhe nangemphefumulo wenu wonkhe kutsi kute nome sinye setsembiso lesingazange sifezeke kuto tonkhe letetsembiso letinhle Simakadze Nkulunkulu wenu laninike tona. Tonkhe tetsembiso takhe tifezekile.”—Josh. 23:14.

3. Libito laNkulunkulu livetani ngaye?

³ Jehova uyatifeza tetsembiso takhe, hhayi ngesizatfu selutsandvo ngetinceku takhe kuphela, kodvwa nangesizatfu selibito lakhe. (Eks. 3:14; 1 Sam. 12:22) Nasikhuluma ngelibito laNkulunkulu, setfulo se-“The Emphasized Bible,” sa-J. B. Rotherham, sitsi: “[Lelibito] lisetsembiso lesihle kakhulu; ngesizatfu sekutsi Nkulunkulu unelikhono lekuvumelana nanobe ngutiphi timo, bumatima, kanye nalokunye lokungavela . . . [Lisetsembiso], . . . lisitjela ngaNkulunkulu, futsi lisisita kutsi simkhumbule. Nkulunkulu utawuhlala aphila ngekuvumelana naleLibito; angeke abe nemahloni ngalo.”

4. (a) Isaya 26:4 usikhutsata kutsi senteni? (b) Yini lesitawucoca ngayo kulesihloko?

⁴ Tibute: ‘Ngimati kahle yini Jehova kute ngikhone kumetsemba ngalokuphelele? Likusasa ngililindzele ngekuciniseka yini, ngikhumbula kutsi nguNkulunkulu lolawula tintfo?’ Isaya 26:4 utsi: “Yetsembelani kuSimakadze kuze kube phakadze, ngobe Simakadze nguSimakadze loLidvwala laphakadze.” Kuliciniso kutsi Nkulunkulu angeke avikele bantfu ngalokusimangaliso njengobe abevame kwenta etikhatsini tekubhalwa kweliBhayibheli. Nanobe kunjalo, ‘njengeLidvwala laphakadze,’ singametsemba “kuze kube phakadze.” Nkulunkulu wetfu lowetsembekile utisita njani tikhonti takhe leticotfo lamuhla? Asesihlole tindlela letintsatfu: Uyasicinisa nasicela lusito lwakhe lwekumelana netilingo, uyasisekela nakufanele sibeketelele kunganakwa nobe kuphikiswa lokucondzile, futsi usiniketa emandla lapho sinetinkhatsato letinyenti. Njengobe sihlola letici, lwela kucabanga ngendlela longakucinisa ngayo kwetsembela kwakho kuJehova.

Yetsembela KuNkulunkulu Nawulingelwa Kwenta Lokubi

5. Mayelana nekwetsembela kwetfu kuNkulunkulu, lungaba yini luvivinyo lolukhulu?

⁵ Kumelula kwetsembela kuJehova mayelana nesetsembiso sakhe seliPharadisi nobe seluvuko—lokutintfo lesitilangatelelako. Nanobe kunjalo, kungase kube matima kakhulu kwetsembela kuye etindzabeni letitsintsa kutiphatsa, kanye nekuciniseka ngalokuphelele etinhlitiyweni tetfu kutsi kuphila ngekuvumelana netindlela kanye netimiso takhe kulungile futsi kungasiletsela injabulo lenkhulu. INkhosi Solomoni yabhala nasi secwayiso: “Tsemba Simakadze ngayo yonkhe inhlitiyo yakho, ungeyami ekwatini kwakho. Matise kuko konkhe lokwentako, yena uyakucondzisa tindlela takho.” (Taga 3:5, 6) Naka kutsi kukhulunywa ngaloko ‘lesikwentako’ kanye ‘netindlela’ tetfu. Ngako-ke, yonkhe indlela yetfu yekuphila—hhayi litsemba letfu njengemaKhristu kuphela—kufanele ivete kutsi setsembele kuNkulunkulu. Singakuveta njani loko nakuvela tilingo?

6. Singakucinisa njani kutimisela kwetfu kubalekela imicabango lemibi?

⁶ Kufulatsela tintfo letimbi kucala kuloko lesikucabangako. (Fundza Roma 8:5; Efesu 2:3.) Ngako-ke, ungakucinisa njani kutimisela kwakho kutsi ubalekele imicabango lemibi? Cabanga nganati tindlela letisihlanu: 1. Cela lusito lwaNkulunkulu ngemthandazo. (Mat. 6:9, 13) 2. Zindla ngetibonelo letiseBhayibhelini talabo labehluleka kulalela Jehova kanye netalabo labamlalela. Ngemuva kwaloko, naka imiphumela labayitfola.a (1 Khor. 10:8-11) 3. Cabanga ngekutsi sono singakucindzetela njani engcondvweni kanye nasemivelweni, wena kanye nalabo lobatsandzako. 4. Cabanga ngendlela Nkulunkulu lativa ngayo lapho lenye yetinceku takhe yenta sono lesikhulu. (Fundza Tihlabelelo 78:40, 41.) 5. Cabanga ngendlela inhlitiyo yaJehova lejabula ngayo nakabona sikhonti sakhe lesicotfo sibalekela lokubi futsi senta lokulungile, ngisho nobe sisembikwebantfu nobe sisodvwana. (Hla. 15:1, 2; Taga 27:11) Nawe ungakwati kuveta kutsi wetsembele kuJehova.

Yetsembela KuNkulunkulu Nawunganakwa Futsi Uphikiswa

7. Nguluphi luvivinyo Jeremiya lahlangabetana nalo, futsi ngaletinye tikhatsi abetiva njani?

⁷ Bazalwane labanyenti bakhonta emasimini lapho kumatima khona kubeketela. Umphrofethi Jeremiya abekhonta endzaweni lenjalo—embusweni wakaJuda emalangeni awo ekugcina lasiphitsiphitsi. Kwetsembela kwakhe kuJehova bekuvivinywa malanga onkhe ngobe abetimemetela ngekutitfoba tehlulelo taNkulunkulu. Ngalesinye sikhatsi, ngisho naBharuki labengumabhalane wakhe lowetsembekile, wakhonona ngesizatfu sekuphelelwa ngemandla. (Jer. 45:2, 3) Jeremiya wakuvumela yini kuncotjwa kudvumateka? Kuliciniso kutsi ngaletinye tikhatsi abetiva acindzetelekile. Wababata: “Alicalekiswe lilanga lengatalwa ngalo! Ngangiphumelani vele esiswini? Ngaphumela kubona inhlupheko nelusizi, nekucedzela emalanga ami ehlazweni yini?”—Jer. 20:14, 15, 18.

8, 9. Ngekuvumelana nembhalo waJeremiya 17:7, 8 kanye neTihlabelelo 1:1-3, yini lokufanele siyente kute sichubeke sitsela titselo letinhle?

⁸ Nanobe kunjalo, Jeremiya akazange aphele emandla. Wachubeka etsembela kuJehova. Umphumela waloko waba kutsi lomphrofethi lowetsembekile wabona kugcwaliseka kwemavi aJehova labhalwe kuJeremiya 17:7, 8, latsi: “Ubusisiwe umuntfu lowetsembela kuSimakadze, lotsemba lakhe linguSimakadze. Uyawufanana nesihlahla lesihlanyelwe ngasemfuleni wemanti, lesenabisela timphandze taso ngasemfuleni. Asesabi nakuta kushisa, emacembe aso ahlala aluhlata. Asihlupheki nangemnyaka wesomiso, asihlali singatseli titselo taso.”

⁹ Njengesihlahla setitselo lesikhula kahle “lesihlanyelwe ngasemfuleni wemanti,” nobe lesikanye netihlahla letiniselwa kahle, Jeremiya akazange ‘ayekele kutsela titselo.’ Akazange avumele kuhungwa baphukuti labangakalungi labephila nabo. Kunaloko, wachubeka abambelele eMtfonjeni ‘wemanti’ lasekela kuphila, futsi wakusebentisa konkhe Jehova labemtjela kona. (Fundza Tihlabelelo 1:1-3; Jer. 20:9) Jeremiya usibonelo lesihle kitsi, ikakhulukati kulabo labakhonta Nkulunkulu emasimini langatseli. Nangabe nawe usesimeni lesinjalo, chubeka wetsembela kakhulu kuJehova, lotawukunika kubeketela njengobe ‘uvuma libito lakhe.’—Heb. 13:15.

10. Ngutiphi tibusiso lesinato, futsi yini lokufanele sitibute yona?

¹⁰ Jehova usinikete tintfo letinyenti kute asisite ebumatimeni lesihlangabetana nabo ekuphileni kwetfu kulamalanga ekugcina. Lenye intfo lasiphe yona liVi lakhe, lelichubeka lihunyushelwa etilwimini letinyenti ngalokunembile. Wente nekutsi kutfolakale kudla kwakamoya lokunyenti lokufika ngesikhatsi lesifanele, asebentisa sisebenti lesetsembekile nalesihlakaniphile. Usiphe nebangani labasisekelako labasicumbi lesikhulu sebantfu lesikholwa nabo lesibatfola emihlanganweni yelibandla kanye nasemihlanganweni lemikhulu. Utisebentisa ngalokugcwele yini letinhlelo? Bonkhe labatisebentisako ‘batawuhlabela ngesizatfu senjabulo lephuma etinhlitiyweni tabo.’ Kantsi labo labehluleka kulalela Nkulunkulu ‘bayawukhala ngesizatfu sekudzabuka kwetinhlitiyo, balile ngesizatfu sekudzabuka kwemoya.’—Isa. 65:13, 14.

Yetsembela KuNkulunkulu Nawubeketelela Tinkhatsato

11, 12. Sicabanga ngetinkinga talelive, yini lokukuhlakanipha kuyenta?

¹¹ Njengobe kwabiketelwa, bantfu bahlangabetana netinkinga letinyenti. (Mat. 24:6-8; Semb. 12:12) Nakunesikhukhula, bantfu bavame kubalekela etindzaweni letiphakeme nobe bagibele eluphahleni lwendlu—nanobe ngukuphi lapho kuphakeme khona. Ngendlela lefananako, njengobe tinkinga talelive tikhula, tigidzi tebantfu tifuna siphephelo etinhlanganweni letiphakeme tetemnotfo, tetembusave, tetenkholo, kanye nakusayensi nakutebucwephesha. Konkhe loku akusiletsi sivikelo mbamba. (Jer. 17:5, 6) Ngakulokunye, tinceku taJehova tinesivikelo lesicinile—‘lesiLidvwala laphakadze.’ (Isa. 26:4) Umhlabeli watsi: ‘[Jehova] ulidvwala lami, nensindziso yami.’ (Fundza Tihlabelelo 62:6-9.) Silenta njani leLidvwala kutsi libe siphephelo setfu?

¹² Sisuke sibambelela kuJehova nasisebentisa liVi lakhe lelehlukile ekuhlakanipheni kwebantfu. (Hla. 73:23, 24) Nasi sibonelo: Labo labahungwa kuhlakanipha kwebantfu bangase batsi: ‘Unekuphila lokukodvwa, ngako-ke, kusebentise ngalokugcwele.’ ‘Phishanekela umsebenti loncono.’ ‘Bani nemali lenyenti.’ ‘Tsenga nobe ngabe yini loyifunako.’ ‘Hamba tindzawo; ujabulele lomhlaba.’ Ngakulokunye, kuhlakanipha kwaNkulunkulu, kuvumelana nanasi seluleko: ‘Labo labasebentisa lelive ababe njengalabangalisebentisi ngalokugcwele, ngobe simo salelive siyendlula.’ (1 Khor. 7:31) Ngendlela lefananako, Jesu usikhutsata kutsi sibeke tintfo teMbuso kucala futsi ngekwenta njalo sibe ‘sitibekela umcebo emazulwini,’ lapho utawube uphephe khona.—Mat. 6:19, 20.

13. Sikhumbula umbhalo wa-1 Johane 2:15-17, yini lokufanele sitibute yona?

¹³ Simo sakho sengcondvo ‘ngalelive’ kanye ‘netintfo letikulo’ siveta kutsi wetsembele kuNkulunkulu ngalokuphelele yini? (1 Joh. 2:15-17) Imicebo yakamoya kanye nemisebenti loyentela Jehova iyatsandzeka yini kuwe iphindze ibaluleke kwendlula tintfo lelive lelikunika tona? (Fil. 3:8) Ulwela kutigcina ‘uneliso lelilula’ yini? (Mat. 6:22) Kuliciniso kutsi Nkulunkulu akafuni ube ngumuntfu longakahlakaniphi futsi longacabangeli, ikakhulukati nawunemndeni lokufanele uwunakekele. (1 Thim. 5:8) Kunaloko ulindzele kutsi tinceku takhe tetsembele kuye ngalokuphelele—hhayi kulelive laSathane lelinetinkinga.—Heb. 13:5.

14-16. Labanye bantfu baye bazuza njani ngekulondvolota ‘liso lelilula’ kanye nekubeka tintfo letimayelana neMbuso kucala?

¹⁴ Asewucabange ngesibonelo sa-Richard na-Ruth, lababatali bebantfwana labancane labatsatfu. Richard utsi: “Bengiva enhlitiyweni yami kutsi ngingakwati kwentela Jehova lokwengetiwe. Bengiphila imphilo lentofontofo kodvwa bengiva shengatsi Nkulunkulu ngimnika lokuncane kakhulu kunaloko lokulindzelekile. Ngemuva kwekuthandaza ngalendzaba kanye nekubuka timo tami, mine na-Ruth savumelana ngekutsi kufanele ngicele umcashi wami kutsi angehlisele sikhatsi lengisisebentako kute ngisebente emalanga lamane liviki ngalinye, ngisho nobe live letfu belinetinkinga temnotfo. Sicelo sami semukelwa, futsi ngacala kusebenta ngalendlela ngayo leyo nyanga.” Richard utiva njani nyalo?

¹⁵ Utsi: “Nanobe sengihola imali leseyinciphe ngemaphesenti langu-20 kunalena lebengiyihola ekucaleni, ngemnyaka sengiba nemalanga langu-50 lengetiwe langisita ngikwati kuba nemndeni wami futsi ngiceceshe nebantfwana bami. Sengiye ngakwati kwandzisa sikhatsi lengisicitsa emsebentini wekushumayela, kwandzisa tifundvo teliBhayibheli lengitichubako, futsi sengiyakwati nekulihola kahle libandla. Njengobe senginesikhatsi lesinyenti sekutsi ngisite ekunakekeleni bantfwana, Ruth uye wakwati kukhonta njengelihlahlandlela lelisitako tikhatsi letitsite. Ngitimisele kuchubeka ngikwenta loku yingci nje nangabe sikhatsi sisavuma.”

¹⁶ Roy kanye na-Petina, labasahlala nendvodzakati yabo, bakhonile kunciphisa imisebenti yabo yekutiphilisa kute bakwati kuhlanganyela emsebentini wekushumayela ngalokugcwele. Roy utsi: “Sengisebenta emalanga lamatsatfu evikini, kantsi Petina yena usebenta lamabili. Siye satfutsa endlini lebesihlala kuyo saya kulenye lencane lokumelula kuyinakekela. Besike saba ngemahlahlandlela ngembikwekutsi sitfole bantfwana, futsi lesifiso asikake sasuka kitsi. Ngako-ke, batsite nasebakhulile bantfwana, saphindze sangenela umsebenti wasikhatsi sonkhe. Kute linani lemali lelilingana netibusiso lesiye satitfola.”

Vumela “Kuthula KwaNkulunkulu” Kulondvolote Inhlitiyo Yakho

17. Njengobe kuphila kute sicinisekiso, imiBhalo iye yakudvudvuta njani?

¹⁷ Kute umuntfu lowatiko kutsi kusasa kutawukwentekani, ngobe sonkhe sehlelwa “sikhatsi nematfuba.” (Shu. 9:11) Nanobe kunjalo, kungakwati kwetfu loko lokutawukwenteka kusasa akukafaneli kusicedzele kuthula kwengcondvo, njengobe kwenteka kulabo labete kulondzeka lokutfolakala ngekuba nebuhlobo lobusedvute naNkulunkulu. (Mat. 6:34) Umphostoli Pawula wabhala: “Ningakhatsateki ngalutfo. Kepha kuko konkhe ticelo tenu atatiwe nguNkulunkulu, ngekukhuleka nekuncusa kanye nekubonga. Kuthula kwaNkulunkulu lokwendlula konkhe kwati kutawulondvolota tinhlitiyo tenu nemicabango yenu.”—Fil. 4:6, 7.

18, 19. Nkulunkulu usidvudvuta ngatiphi tindlela? Niketa sibonelo.

¹⁸ Bazalwane kanye nabodzadze labanyenti labahlangabetana netimo letimatima baye batfola kuthula lokuvela kuJehova. Lomunye dzadze utsi: “Dokotela wetama kanyenti kungesabisa kute angente ngivume kumpontjelwa ingati. Lenye yetintfo labetisho nakangibona kutsi: ‘Unani wena, yini ungafuni kumpontjelwa ingati?’ khona lapho kanye nangaletinye tikhatsi, ngathandaza kuJehova futsi ngaba nekuthula lokuvela kuye. Ngativa ngicinile njengelidvwala. Nangetulu kwesimo sami sekubabete ingati leyenele, ngakwati kumniketa inchazelo lecacile levela emBhalweni yekutsi kungani ngikhetse ngaleyondlela.”

¹⁹ Ngaletinye tikhatsi, Nkulunkulu angase asinikete lusito lesiludzingako asebentisa umKhristu lesikanye naye nobe kudla kwakamoya lokufika ngesikhatsi. Kungenteka kutsi uke wamuva umzalwane nobe dzadze atsi: “Lesihloko singuloko lebengikudzinga, futsi shengatsi sibhalelwe mine!” Ngisho nobe sihlangabetana nanobe ngutiphi timo nobe tidzingo, Jehova utawusivetela lutsandvo lwakhe nangabe setsembela kuye. Angitsi vele ‘sitimvu’ takhe, futsi uye wasibita ngelibito lakhe.—Hla. 100:3; Joh. 10:16; Imis. 15:14, 17.

20. Kungani tinceku taJehova titawuhlala ngekulondzeka mzukwana lelive laSathane libhujiswa?

²⁰ ‘Ngelilanga lelulaka lwaJehova’ lelisondzela ngekushesha, tonkhe tintfo lelive laSathane leletsembele kuto titawubhujiswa. Igolide, isiliva kanye naletinye tintfo letiligugu angeke tikuletsele kulondzeka. (Zef. 1:18; Taga 11:4) Lokukuphela kwentfo letawuba siphephelo setfu, ‘Lidvwala laphakadze.’ (Isa. 26:4) Ngako-ke, asivete kumetsemba kwetfu ngalokugcwele Jehova ngekutsi sihambe etindleleni takhe tekulunga ngekutfobeka, simemetele umlayeto weMbuso wakhe nangetulu kwekunganakwa nobe kuphikiswa, futsi siyise tonkhe tinkhatsato tetfu kuye. Nasenta kanjalo, ‘sitawuhlala siphephile, sikhululekile, futsi singesabi lutfo lolubi.’—Taga 1:33.

[Umbhalo longentansi]

Ungachaza?

Singetsembela njani kuNkulunkulu

• nasilingelwa kwenta lokubi?

• nasinganakwa nobe siphikiswa?

• nasibeketelela tinkhatsato tekuphila?

[Sitfombe ekhasini 15]

Kubambelela etimisweni taNkulunkulu kuholela enjabulweni

[Sitfombe ekhasini 17]

‘Jehova uLidvwala laphakadze’