Fundza Lokutsite ‘Eluhlakeni Lweliciniso’
“[Lukuwe] luhlaka lwelwati kanye neliciniso eMtsetfweni.”—ROM. 2:20, NW.
1. Kungani kufanele sibe nesifiso sekucondza kubaluleka kweMtsetfo waMosi?
LOKWABHALWA ngumphostoli Pawula eBhayibhelini kusisita kutsi sivisise tincenye letibalulekile teMtsetfo waMosi. Encwadzini layibhalela emaHebheru, wacacisa kutsi Jesu ‘longumphristi lomkhulu lowetsembekile,’ wangena kanye kwenela kute anikele ‘inhlawulo yetono,’ lebeyitawukwenta kutsi bonkhe labanekukholwa kuyo batfole “kuhlengwa kwaphakadze.” (Heb. 2:17; 9:11, 12) Pawula wachaza kutsi lithende lekuhlangana belimane ‘lisitfunti saloko lokunguko sibili kwasezulwini,’ futsi Jesu waba nguMmeli ‘wesivumelwane lesincono’ kunesaMosi. (Heb. 7:22; 8:1-5) Ngesikhatsi saPawula, tinchazelo letinjalo ngeMtsetfo betibalulekile kumaKhristu, futsi nanyalo tisenjalo. Tisisita kutsi sicondze ngalokugcwele kubaluleka kwemalungiselelo lesiwentelwe nguNkulunkulu.
2. Ngusiphi simo lesincono emaKhristu langemaJuda labekuso nawacatsaniswa nebantfu beTive?
2 Ngesikhatsi Pawula abhalela emaKhristu aseRoma, wacondzisa incenye yemavi akhe kumalunga elibandla langemaJuda, labekafundziswe uMtsetfo waMosi. Waphawula kutsi ngesizatfu sekutayelana kwabo neMtsetfo waNkulunkulu, labanjalo bebasesimeni lesikahle sekucondza ‘luhlaka lwelwati kanye neliciniso’ lolumayelana naJehova kanye netimiso takhe tekulunga. Kucondza ‘luhlaka lweliciniso,’ kanye nenhlonipho lejulile ngalo, kwasita emaKhristu langemaJuda, njengobe kwasita emaJuda emvelo esikhatsini lesendlulile kutsi acondzise, afundzise aphindze akhanyisele labo labebete lwati ngeMtsetfo waJehova labekawunikete bantfu bakhe.—Fundza Roma 2:17-20.
SITFUNTI SEMHLATJELO WAJESU
3. Sizuza njani ngekufundza ngemihlatjelo lebeyentiwa ngemaJuda endvulo?
3 Luhlaka lweliciniso labekakhuluma ngalo Pawula lusabalulekile nakitsi kute sivisise tinjongo taJehova. Timiso lebetisekela uMtsetfo waMosi atikalahlekelwa sitfunti nobe kubaluleka kwato. Nasicabanga ngaloku, ase sihlole sici sinye seMtsetfo waMosi—indlela imihlatjelo neminikelo leyaholela ngayo emaJuda latfobekile kuKhristu, yaphindze yawasita kutsi avisise loko Nkulunkulu bekakufuna kuwo. Njengobe timiso taJehova letisisekelo etincekwini takhe tingakaze tishintje, sitawuphindze sitfole kutsi imitsetfo yaNkulunkulu layibhalela ema-Israyeli lemayelana nemihlatjelo kanye neminikelo ingasisita sihlatiye lizinga lemsebenti wetfu lesimentela wona.—Mal. 3:6.
4, 5. (a) UMtsetfo waMosi bewubakhumbuta ini bantfu baNkulunkulu? (b) Umtsetfo waNkulunkulu ngemihlatjelo bewusitfunti sani?
4 Akukho kungabata kutsi tici letinyenti teMtsetfo waMosi betigcizelela kuba nesono kwemaJuda asendvulo. Sibonelo saloko kutsi nobe ngabe ngubani lobekatsintse sidvumbu, bekufanele ahlanjululwe. Kute kwentiwe loko, bekudzingeka kuhlatjwe kuphindze kushiswe litfokati lelibovu. Umlotsa walo bekufanele ugcinwe kute kwentiwe ngawo ‘emanti ekuhlambulula,’ lobekufafatwa ngawo umuntfu lohlanjululwako ngelilanga lesitsatfu kanye nelesikhombisa ngemuva kwekungcola kwakhe. (Num. 19:1-13) Kute bahlale bakhumbula kutsi kutala bekwendlulisela sono, umfati lobekasandza kubeleka bekufanele ahlale sikhatsi lesitsite angcolile, futsi ngemuva kwaloko bekufanele ente umnikelo wekubuyisana naNkulunkulu.—Lev. 12:1-8.
5 Imihlatjelo yetilwane beyidzingeka etimeni letinyenti tekuphila, kute kutsetselelwe tono. Ngisho nobe ngabe sikhonti saNkulunkulu besikubona loko nobe cha, leyo mihlatjelo, lokuhlanganisa naleyo lebeyinikelwa kamuva ethempelini laJehova—‘beyisitfunti’ semhlatjelo waJesu lote sono.—Heb. 10:1-10.
UMBONO LOFANELE NGEMINIKELO
6, 7. (a) Ngutiphi ticondziso letasita ema-Israyeli ekukhetseni iminikelo labekayenta, futsi loko bekusitfunti sani? (b) Ngumiphi imibuto lesingatibuta yona?
6 Sici lesibalulekile lesimayelana nanobe ngabe ngumuphi umhlatjelo wesilwane lobewentiwa kuJehova, besikutsi bekufanele ‘ube bete sici’—lokusho kutsi singabi yimphumphutse, singalimali, singachwali nobe kungabi ngulesigulako. (Lev. 22:20-22) Ngesikhatsi ema-Israyeli anikela ngetitselo nobe ngalokuluhlavu kuJehova, bekudzingeka kutsi aletse “sivuno” sekucala, futsi sibe ‘ngulesihle kakhulu.’ (Num. 18:12, 29) Iminikelo yekugcina licala beyingemukeleki kuJehova. Sici lesibalulekile lesimayelana nemihlatjelo yetilwane, besisho kutsi umhlatjelo waJesu bewutawuba bete sici nobe libala, futsi Jehova bekatawunikela ngalokuncono kanye nalokutsandzeka kakhulu kuye kute ahlenge bantfu.—1 Phet. 1:18, 19.
7 Nangabe umuntfu lobekenta umhlatjelo bekanekubonga lokukhulu kuJehova ngebuhle baKhe, bekangeke yini ajabule ngekunikela ngalokuncono kakhulu kuloko bekanako? Lizinga lemnikelo belishiyelwa kumuntfu ngamunye. Nanobe kunjalo, bekati kahle kutsi Nkulunkulu ngeke ajabule ngemnikelo lonesici, ngobe loko bekutawuveta kutsi loyo muntfu bekagcina licala nobe kutsi ukwenta ngekucindzetelwa. (Fundza Malakhi 1:6-8, 13.) Loku kufanele kusente sitibute lemibuto lelandzelako ngemsebenti lesiwentela Nkulunkulu: ‘Nginamuphi umbono ngekukhonta kwami Jehova? Kungaba kuhle yini kutsi ngihlolisise lizinga lemsebenti lengiwentela Nkulunkulu kanye netizatfu tekwenta loko?’
8, 9. Kungani kufanele sicabange ngendlela ema-Israyeli labekenta ngayo iminikelo?
8 Kukhetsa silwane lesikahle sekunikela bekungasiyo inkinga nangabe umnikelo wemIsrayeli bewentiwa ngekutsitsandzela kute kuvetwe kubonga kuJehova, mhlawumbe loko akwente ngemnikelo wekushiswa ngobe afuna kwemukelwa nguye. Lesikhonti besitawujabula ngekuniketa Jehova lokuncono kakhulu kwaso. Lamuhla, emaKhristu awayenti iminikelo lebhalwe eMtsetfweni waMosi njengema-Israyeli, kodvwa ayenta ngekutsi anikele ngesikhatsi sawo, emandla kanye nemali yawo kute akhonte Jehova. Umphostoli Pawula wakhuluma ‘ngemilomo levumako’ yelitsemba lemaKhristu kanye ‘nekungayekeli kwenta lokuhle nekuhlephulelana loko lesinako,’ njengeminikelo lejabulisa Nkulunkulu. (Heb. 13:15, 16) Indlela bantfu baJehova labahlanganyela ngayo emisebentini lenjalo iveta kutsi bakubonga kangakanani loko Nkulunkulu labanikete kona. Ngaleso sizatfu, kunekufanana esimeni sengcondvo salabo labahlanganyela emisebentini yebuKhristu lamuhla kanye nesalabo labebenta iminikelo yekutitsandzela etikhatsini tasendvulo.
9 Singaphawula sitsini esimeni lapho uMtsetfo waMosi bewufuna kutsi umuntfu ente umnikelo wesono ngesizatfu seliphutsa lelitsite lalentile? Njengobe kwenta leminikelo bekuyimfuneko, ucabanga kutsi bekulukhuni yini ngemIsrayeli kutsi anikele ngekutitsandzela? Kungenteka yini kutsi iminikelo lenjalo beyinikelwa ngenhlitiyo lebuhlungu? (Lev. 4:27, 28) Bekungeke kube njalo nangabe umuntfu loyentako bekakufuna ngebucotfo kulondvolota buhlobo lobuhle naJehova.
10. Ngumiphi iminikelo lokungase kudzingeke emaKhristu ayente kute alungise buhlobo bawo lobulimele?
10 Ngendlela lefananako nalamuhla, kungenteka ngaletinye tikhatsi ubone kutsi umphatse kabi umzalwane wakho ungakacabangi. Nembeza wakho ungase ukutjele kutsi awuzange utiphatse kahle. Nobe ngabe ngubani lotimisele kukhonta Jehova utawenta konkhe lokusemandleni kute alungise lelophutsa. Loko kungasho kucolisa ngebucotfo kumuntfu lomonile, futsi nangabe kwentiwe sono lesikhulu ucele lusito lwebabonisi labanelutsandvo labangemaKhristu. (Mat. 5:23, 24; Jak. 5:14, 15) Ngako-ke, kudzingeka sente imetamo kute silungise kona lesikwente kumzalwane wetfu nobe kuNkulunkulu. Nasenta iminikelo lenjalo, silondvolota buhlobo lesinabo naJehova kanye nemzalwane wetfu, futsi siba nanembeza lomuhle. Umphumela waloko kungaba kuciniseka ngekutsi indlela yaJehova incono kakhulu.
11, 12. (a) Yini lebeyihlanganisiwe eminikelweni yekuthula? (b) Isisita njani iminikelo yekuthula ekukhonteni lokuhlantekile kwalamuhla?
11 Lolunye luhlobo lweminikelo lobeluchazwa nguMtsetfo waMosi belutsatfwa njengeminikelo yekuthula. Leminikelo beyigcizelela kuba nekuthula naJehova. Umuntfu lobekenta leyo minikelo kanye nemndeni wakhe bekadla inyama yesilwane lobekunikelwe ngaso, mhlawumbe kulenye yetindlu tekudlela lebetisethempelini. Umphristi lomkhulu kanye nalabanye baphristi labebakhonta ethempelini bebatfola incenye letsite yalenyama. (Lev. 3:1; 7:31-33) Lesikhonti saNkulunkulu besenta lomnikelo ngesizatfu sesifiso saso sekujabulela buhlobo lobuhle naYe. Bekuba shengatsi lesikhonti, umndeni waso, baphristi kanye naJehova bebajabulela leso sidlo ndzawonye ngekuthula.
12 Ngendlela lengekwemfanekiso, lelo bekulitfuba lelihle kakhulu lekumema Jehova esidlweni lesinjalo futsi asemukele. Asingabati kutsi lomuntfu lobekenta lomnikelo bekafisa kunikela ngalokuncono kakhulu kulesimenywa sakhe lesihloniphekile. Lilungiselelo leminikelo yekuthula, lebeliyincenye yeluhlaka lweliciniso, beliveta kutsi, ngemnikelo waJesu lophakeme, bonkhe bantfu labanesifiso sekuba nebuhlobo lobusedvute nalobunekuthula neMdali wabo bebangenta njalo. Lamuhla, singabujabulela bungani naJehova njengobe sinikela ngekutitsandzela ngetintfo lesinato kanye nemandla etfu emsebentini wakhe.
TECWAYISO LETIMAYELANA NEMINIKELO
13, 14. Kungani Jehova angawemukelanga umnikelo iNkhosi Sawula lebeyifisa kuwenta?
13 Kute yemukelwe nguJehova, iminikelo lebeyichazwa nguMtsetfo waMosi bekufanele inikelwe ngesimo sengcondvo lesikahle. Nobe kunjalo, liBhayibheli lisiniketa tibonelo letisecwayiso teminikelo Nkulunkulu langazange ayemukele. Yini leyabangela kutsi angayemukeli? Asesicabangele tibonelo letimbili.
14 Umphrofethi Samuweli watjela iNkhosi Sawula kutsi besesifikile sikhatsi sekutsi Jehova ehlulele ema-Amaleki. Ngaleso sizatfu, Sawula bekufanele acotfule leso sive kanye nemfuyo yaso. Ngemuva kwekuncoba, Sawula watjela emasotja akhe kutsi angambulali Agagi, inkhosi yema-Amaleki. Waphindze wangayibulali imfuyo yawo ngesizatfu sekufuna kwentela Jehova umhlatjelo ngayo. (1 Sam. 15:2, 3, 21) Wativa njani Jehova ngalesinyatselo? Wamlahla Sawula ngesento sakhe sekungamlaleli. (Fundza 1 Samuweli 15:22, 23.) Yini lesiyifundzako kulendzaba? Sifundza kutsi kute Nkulunkulu emukele umnikelo wetfu kumelwe uhambisane nekulalela imitsetfo yakhe.
15. Kutiphatsa lokubi kwalamanye ema-Israyeli labekenta imihlatjelo ngesikhatsi sa-Isaya, bekuveta kutsini?
15 Sibonelo lesifananako siyatfolakala nasencwadzini ya-Isaya. Ngesikhatsi sa-Isaya, ema-Israyeli bekamatasatasa ngekwenta iminikelo kuJehova. Nobe kunjalo, kutiphatsa kwawo lokubi, kwenta iminikelo yawo yangasebenti. Jehova wawabuta watsi: “Lemihlatjelo yenu leminyenti iyini lapha kimi? Sengesutsi yiminikelo yekushiswa yetihhanca neyemanoni etifuyo letikhuluphalisiwe, futsi angijatjuliswa yingati yetinkunzi, neyemazinyane etimvu neyetiphongo. . . . Khawulani kuletsa iminikelo lengasho lutfo! Imphepho yenu isinengiso kimi.” Beyiyini inkinga? Nkulunkulu wawatjela watsi: “Nome senenta imithandazo leminyenti kangakanani, ngingeke ngiyilalele. Gezani, nibe ngulabahlantekile. Susani tento tenu letimbi embikwami! Yekelani kwenta lokubi.”—Isa. 1:11-16.
16. Yini lencuma kutsi Nkulunkulu uyayemukela iminikelo yetfu?
16 Jehova akajatjuliswanga yiminikelo lebeyentiwa toni lebetingaphendvuki. Nanobe kunjalo, imithandazo kanye neminikelo yalabo labacotfo labenta konkhe lokusemandleni kute baphile ngekuvumelana nemitsetfo yaNkulunkulu, iyemukeleka kuye. Luhlaka lweMtsetfo lafundzisa labanjalo ngesimo sabo sekuba nesono kanye nesidzingo sekutsetselelwa. (Gal. 3:19) Kucondza loko kubangela umuntfu kutsi abe nenhlitiyo letisolako. Nalamuhla, kufanele sinake sidzingo lesinaso semhlatjelo waKhristu lesinemandla ekususa tono tetfu. Nangabe sisicondza siphindze sisijabulela, Jehova utawujabula kakhulu ngaloko lesikunikela kuye emsebentini wakhe.—Fundza Tihlabelelo 51:17, 19.
BANI NEKUKHOLWA EMHLATJELWENI WAJESU
17-19. (a) Singaveta njani kuJehova kutsi siyawujabulela umhlatjelo wesihlengo saJesu? (b) Yini lesitawucoca ngayo esihlokweni lesilandzelako?
17 Tsine, sisesimeni lesincono kubantfu labaphila ngembikwetikhatsi tebuKhristu ngobe asisaphili esikhatsini lapho sibona ‘sitfunti’ setinjongo taNkulunkulu. (Heb. 10:1) Imitsetfo lemayelana neminikelo yakhutsata emaJuda kutsi atfutfukise simo sengcondvo lesihle kute abe nebuhlobo lobuhle naNkulunkulu—lokusho kubonga lokucotfo kuye, sifiso sekumnika lokuncono kakhulu kanye nesidzingo sekukhululwa esonweni. Sijabula kakhulu ngetinchazelo letitfolakala emiBhalweni yemaKhristu yesiGriki, letisenta sicondze kutsi ngesihlengo, Jehova utawususa yonkhe imiphumela yesono futsi kwanyalo sitiva sinanembeza lokhululekile. Umhlatjelo wesihlengo saJesu ulilungiselelo lelihle kakhulu!—Gal. 3:13; Heb. 9:9, 14.
18 Kuliciniso kutsi sidzinga lokungetulu kwekumane sicondze umhlatjelo wesihlengo kute sizuze kuwo. Umphostoli Pawula wabhala: “Umtsetfo wasebenta njengemcondzisi wetfu wekuyisa kuKhristu, kuze sibe ngulabemukeleka kuNkulunkulu kutsi silungile ngekukholwa kwetfu.” (Gal. 3:24) Kukholwa lokunjalo kumelwe kuhambisane nemisebenti. (Jak. 2:26) Ngaleso sizatfu, Pawula wakhutsata emaKhristu angelikhulu lekucala labekaneluhlaka lelwati lobelubhalwe eMtsetfweni waMosi kutsi alusebentise. Ngekwenta njalo, kutiphatsa kwawo bekutawuvumelana netimiso taNkulunkulu labekatifundzisa.—Fundza Roma 2:21-23.
19 Nanobe emaKhristu lamuhla kungakalindzeleki kutsi agcine uMtsetfo waMosi, kumelwe achubeke enta iminikelo leyemukelekako kuJehova. Kutsi singakwenta njani loko, sitawucoca ngako esihlokweni lesilandzelako.
TFOLA TIMPHENDVULO TALEMIBUTO LELANDZELAKO:
․․․․․
Imihlatjelo lebeyichazwa nguMtsetfo waMosi beyisitfunti sani?
․․․․․
Ngukuphi kufana lokukhona emkhatsini weminikelo lebeyentiwa ngema-Israyeli kanye naleyentiwa ngemaKhristu lamuhla?
․․․․․
Yini lencuma kutsi Jehova utayemukela iminikelo nobe angeke ayemukele?
[Emavi lacashuniwe lasekhasini 17]
Timiso taJehova letisisekelo etincekwini takhe atikaze tishintje
[Sitfombe ekhasini 18]
Ngusiphi silwane lobewunganikela ngaso kuJehova kuleti?
[Sitfombe ekhasini 19]
Labo labenta iminikelo leyemukelekako kuJehova bajabulela buhlobo lobuhle naye