Kufunwa Timphendvulo

UMBHALI STAN GUTHRIE watsi: “Kubonakala shengatsi wonkhe umuntfu kukhona lakucabangako ngekutsi ungubani [Jesu]. Ngisho nobe sikholwa kangakanani nobe sinekungabata ngaye, siyatibuta kutsi, ‘Ingubani lendvodza?’”

BANTFU banesifiso sekwati kabanti ngaJesu. Tincwadzi letikhuluma ngaye titsengiswa kakhulu. Emabhayisikobho lamayelana naye atiwa kakhulu. Nanobe kunjalo, bantfu labanyenti bayachubeka nekutibuta ngaye. Bantfu banemibono leyehlukahlukene ngekutsi bekangubani mbambambamba Jesu.

Eminyakeni lembalwa leyengcile, tintsatseli letimbili tacela bantfu kutsi baphendvule umbuto lotsi, “Abengubani Jesu?” Tatfola letimphendvulo letilandzelako:

● “Kubonakala shengatsi bekangu-rabbi (umfundzisi) lobekavelana nebantfu.”

● “Bekayindvodza lebeyiphila imphilo leyehlukile kuyalabanye bantfu.”

● “Abukho bufakazi bekutsi Jesu wake waphila emhlabeni.”

● “Jesu uyiNdvodzana yaNkulunkulu leyatalwa, yafa, yaphindze yavuswa kute isisindzise etonweni tetfu. Nanyalo usaphila futsi utawuphindze abuye emhlabeni.”

● “Ngikholelwa kutsi Jesu Khristu nguye kuphela indvodzana yaNkulunkulu futsi unemtimba wenyama kanye newemoya ngesikhatsi lesifananako.”

● “Kubuntfwana kukholelwa kuJesu futsi lokushiwoko ngaye kuyinganekwane.”

Kuyacaca kutsi imibono leyehlukehlukene lefanana nalena angeke ibe liciniso yonkhe. Ukhona yini umtfombo welwati longasitjela timphendvulo lesingatetsemba temibuto lesinayo ngaJesu? Bashicileli balomagazini bakholelwa kutsi liBhayibheli liliVi laNkulunkulu futsi ngilo lelisitjela onkhe emaciniso ngaJesu.a—2 Thimothi 3:16.

Esihlokweni lesilandzelako sitawucoca ngetimphendvulo teliBhayibheli taleminye yemibuto levame kubutwa bantfu ngaJesu. Yena lucobo lwakhe watsi indlela leholela ekusindzisweni ivulekile ‘kunome ngubani lokholwa nguye.’ (Johane 3:16) Siyakucela kutsi utihlolele wena timphendvulo bese utentela sincumo ngekutsi uyafisa yini kufundza kabanti ngaJesu nekukhombisa kukholwa nguye.

[Umbhalo longentansi]