Jesu Khristu—Timphendvulo Temibuto Lesinayo Ngaye

“Bantfu batsi ngingubani?”—LUKHA 9:18.

JESU wabuta bafundzi bakhe lombuto ngobe bekati kutsi bantfu bebanemibono lehlukehlukene ngaye. Nanobe kunjalo, bekungakafanele kutsi babe nemibono lengavumelani ngaye. Jesu bekatsandza kuba nebantfu kunekutsi atehlukanise nabo. Bekungumkhuba wakhe kutihlanganisa nebantfu basemaphandleni kanye nebasemadolobheni. Abeshumayela futsi afundzisa ngesizatfu sekutsi abefuna bantfu balati liciniso ngaye.—Lukha 8:1.

Liciniso ngaJesu singalicondza kuloko lakusho nalakwenta lokubhalwe emaVangelini lamane eliBhayibheli—LaMatewu, Makho Lukha, kanye nelaJohane. Lokulandzisa lokuphefumulelwe kusisekelo setimphendvulo temibuto lesinayo ngaJesu.a—Johane 17:17.

UMBUTO: Umlandvo uyakufakazela yini kutsi Jesu wake waphila?

IMPHENDVULO: Yebo. Tati temlandvo letifaka ekhatsi Josephus kanye naTacitus letaphila ngesikhatsi sebaphostoli baJesu, tiyakufakazela kutsi wake waphila. Lokunye lokubalulekile kutsi nemaVangeli ayasicinisekisa kutsi Jesu wake waphila, futsi kuphila kwakhe akusiyo inganekwane. Kulandzisa kwawo kucacile futsi kucuketse imininingwane lemayelana nesikhatsi kanye nendzawo lokwenteka kuyo loko kulandzisa. Sibonelo saloko kutsi umbhali weliVangeli Lukha usitjela ngebabusi labasikhombisa, futsi netati temlandvo tiyafakaza kutsi tiyabati lababusi, lokusisita kutsi sitfole umnyaka Jesu lacala ngawo umsebenti wakhe wekushumayela.—Lukha 3:1, 2, 23.

Bufakazi bekutsi Jesu uyatiwa emlandvweni buyakhanya. Incwadzi letsi-Evidence for the Historical Jesus itsi: “Tati letinyenti tiyavumelana ngekutsi indvodza lebitwa ngekutsi nguJesu waseNazaretha yake yaphila ngelikhulu lekucala leminyaka.”

UMBUTO: Jesu UnguNkulunkulu Yini?

IMPHENDVULO: Cha. Jesu akazange atibone alingana naNkulunkulu. Kunaloko, Jesu washo tikhatsi letinyenti kutsi yena mncane kunaJehova.b Sibonelo saloko kutsi Jesu watsi Jehova ‘unguNkulunkulu wami,’ waphindze watsi ‘unguNkulunkulu longuye yedvwa weliciniso.’ (Matewu 27:46; Johane 17:3) Ngumuntfu losesikhundleni lesiphansi kunalomunye longasebentisa lawo mavi. Sisebenti lesibita umcashi waso ngekutsi “mphatsi wami” nobe “loyo lobukile,” sisuke sikhombisa kutsi sona singephansi kwakhe.

Jesu waphindze wakhombisa kutsi kunemehluko emkhatsini wakhe kanye naNkulunkulu. Ngalesinye sikhatsi nakakhuluma nalabo bebamphikisa futsi bangabata sikhundla sakhe, watsi: “Kubhaliwe emtsetfweni wenu kutsi bufakazi bebantfu lababili bucinisile. Mine ngiyatifakazela, naBabe longitfumile futsi ufakaza ngami.” (Johane 8:17, 18) Jesu wehlukile kuJehova. Kungenteka njani kutsi Jesu kanye naJehova kutsiwe babofakazi lababili?c

UMBUTO: Jesu bekamane nje ayindvodza lelungile yini?

IMPHENDVULO: Cha. Yena bekalunge kakhulu. Jesu bekati kutsi uniketwe tindzima letibalulekile ekwenteni intsandvo yaNkulunkulu. Nati letinye tato:

● ‘INdvodzana yaNkulunkulu lekukuphela kwayo.’ (Johane 3:18) Jesu bekayati imvelaphi yakhe. Waphila sikhatsi lesidze ngembikwekutalwa emhlabeni. Wachaza kutsi yena wehla avela ezulwini. (Johane 6:38) Jesu uyindalo yaNkulunkulu yekucala futsi wasita Nkulunkulu nakadala tonkhe letinye tintfo. Njengobe kunguye kuphela lowadalwa nguNkulunkulu ayedvwa, Jesu abengabitwa kufanele ngekutsi ‘uyiNdvodzana yaNkulunkulu lekukuphela kwayo.’—Johane 1:3, 14; Kholose 1:15, 16.

● “INdvodzana yeMuntfu.” (Matewu 8:20) Etikhatsini letinyenti, Jesu watibita ngekutsi ‘uyiNdvodzana yeMuntfu.’ Wasebentisa lamavi lavela cishe tikhatsi letingu-80 emaVangelini. Lamavi akhombisa kutsi bekanemtimba wenyama futsi angasuye Nkulunkulu lonemtimba wenyama. Kwenteka njani kutsi iNdvodzana yaNkulunkulu letelwe yodvwana italwe njengemuntfu? Asebentisa umoya longcwele, Jehova wafaka kuphila kwaJesu esinyeni sentfombi lengumJuda, Mariya, lowabangela kutsi ikhulelwe. Ngaleyo ndlela, Jesu watalwa ete sono futsi ete nesici.—Matewu 1:18; Lukha 1:35; Johane 8:46.

● “Umfundzisi.” (Johane 13:13) Jesu wakucacisa kutsi umsebenti labekawuniketwe nguNkulunkulu, ‘bekukufundzisa . . . nekushumayela livangeli ngeMbuso.’ (Matewu 4:23; Lukha 4:43) Ngemavi lacacile kanye nalamelulula, Jesu wachaza kutsi uyini uMbuso waNkulunkulu kanye nekutsi yini loMbuso lotayenta kute kwenteke intsandvo yaJehova.—Matewu 6:9, 10.

● “Livi.” (Johane 1:1) Jesu waba nguMlomo waNkulunkulu—bekayindlela yaNkulunkulu yekukhuluma nalabanye kanye neyekubaniketa ticondziso. Jehova watfuma Jesu kutsi atjele bantfu imilayeto yaKhe.—Johane 7:16, 17.

UMBUTO: Jesu unguye yini Mesiya lobekutsenjiswe kutsi uyeta?

IMPHENDVULO: Yebo. Tiphrofetho teliBhayibheli takhuluma kusenesikhatsi ngekuta kwaMesiya nobe Khristu, lokusho kutsi “Logcotjiwe.” Lona Lobekutsenjiswe kutsi uyeta, abetawuba nendzima lebalulekile ekufezekeni kwenjongo yaJehova. Ngalelinye lilanga, lomunye umfati waseSamariya watsi kuye: “Ngiyati kutsi Mesiya, lokutsiwa nguKhristu, utawufika.” Jesu wase utsi kuye: “Nginguye mine lengikhuluma nawe.”—Johane 4:25, 26.

Bukhona yini bufakazi bekutsi Jesu bekanguMesiya mbamba? Kunebufakazi lobutigaba letintsatfu lobuliciniso lobungeke buhlotjaniswe nalomunye umuntfu lesingabufananisa nemigca yetandla tebantfu ngobe ayifanani. Lobo bufakazi buyasebenta yini kuJesu? Cabanga nganabu lobulandzelako:

● Situkulwane sakubo. LiBhayibheli lasho kutsi Mesiya utawuba ngumtukulu wa-Abrahama lobekatawuvela emndenini waDavide. (Genesisi 22:18; Tihlabelelo 132:11, 12) Jesu abengumtukulu wabo bobabili.—Matewu 1:1-16; Lukha 3:23-38.

● Tiphrofetho letagcwaliseka. ImiBhalo yesiHebheru leyatiwa nangekutsi Lithestamende Lelidzala, icuketse tiphrofetho letinyenti letimayelana nekuphila kwaJesu nakasemhlabeni, lokufaka ekhatsi imininingwane lemayelana nekutalwa kanye nekufa kwakhe. Tonkhe letiphrofetho tagcwaliseka kuJesu. Letinye tato ngunati: Watalelwa eBhetlehema (Mikha 5:2; Lukha 2:4-11), kwatsiwa akaphume eGibhithe (Hoseya 11:1; Matewu 2:15) futsi nakabulawa awazange ephulwe ematsambo akhe (Tihlabelelo 34:20; Johane 19:33, 36). Angeke kwenteke kutsi kunendlela letsite leyasetjentiswa nguJesu kute ashintje kuphila kwakhe kuvumelane nato tonkhe letiphrofetho letimayelana naMesiya.d

● Bufakazi lobuvela kuNkulunkulu. Ngalesikhatsi kutalwa Jesu, Nkulunkulu watfuma tingilosi kutsi tiyotjela belusi kutsi Mesiya sewutelwe. (Lukha 2:10-14) Emahlandla lamanyenti ngesikhatsi Jesu asemsebentini wakhe wekushumayela, Nkulunkulu abekhuluma naye asezulwini, aveta kutsi uyamemukela. (Matewu 3:16, 17; 17:1-5) Jehova wasita Jesu kutsi ente timangaliso, lokwaniketa bufakazi bekutsi bekanguMesiya.—Imisebenti 10:38.

UMBUTO: Kungani Jesu ahlupheke waphindze wafa?

IMPHENDVULO: Njengobe Jesu bekayindvodza lete sono, bekungakafanele kutsi ahlupheke. Bekungakafanele nekutsi abetselwe elugodvweni lwekuhlushwa njengesigebengu aphindze ashiywe lapho kute afe kufa lokulihlazo. Nanobe kunjalo, Jesu abekulindzele loko futsi wakwemukela ngekutitsandzela.—Matewu 20:17-19; 1 Phetro 2:21-23.

Tiphrofetho letimayelana naMesiya taveta kutsi Mesiya abetawuhlupheka futsi afe kute kutsetselelwe tono tebantfu. (Isaya 53:5; Danyela 9:24, 26) Jesu watsi ‘wetela kutawukhonta nekunikela ngemphilo yakhe.’ (Matewu 20:28) Bonkhe labanekukholwa emhlatjelweni wakhe wenhlawulo naloko lotakufeza banelitsemba lekusindziswa esonweni, ekufeni kanye nelekutfola kuphila lophakadze emhlabeni loliPharadisi.e—Johane 3:16; 1 Johane 4:9, 10.

UMBUTO: Singakukholelwa mbamba yini kutsi Jesu wavuswa ekufeni?

IMPHENDVULO: Yebo. Jesu bekakulindzele kutsi utawuvuswa ekufeni. (Matewu 16:21) Nanobe kunjalo, kubalulekile kunaka kutsi Jesu kanye nalababhala liBhayibheli abazange basho kutsi utawuvuswa ngumuntfu. Akusilo liciniso kutsi Jesu wavuswa ngumuntfu. Esikhundleni saloko, liBhayibheli litsi: “Nkulunkulu wamvusa kulabafile; wamkhulula etinhlungwini tekufa.” (Imisebenti 2:24) Nangabe sikwemukela kutsi kunaNkulunkulu longuMdali wato tonkhe tintfo, sinetizatfu tekukholelwa kutsi abengayivusa iNdvodzana yakhe ekufeni.—Hebheru 3:4.

Bukhona yini bufakazi bekutsi Jesu wavuswa ekufeni? Cabangela nabu lobulandzelako:

● Bufakazi bebantfu labambona avusiwe. Eminyakeni lecishe ibe ngu-22 ngemuva kwekufa kwaJesu, umphostoli Pawula wabhala kutsi kunabofakazi labangetulu kwa-500 lababona Jesu savusiwe futsi linyenti kubo bebasaphila ngesikhatsi Pawula abhala lokulandzisa. (1 Khorinte 15:6) Fakazi munye nobe lababili kungaba melula kubaphikisa, kodvwa ngubani longaphikisa bufakazi bebantfu labangu-500?

● Bofakazi labetsembekile. Bafundzi baJesu bekucala labebanelwati ngekuvuka kwakhe, bamemetela ngesibindzi kutsi uvusiwe ekufeni. (Imisebenti 2:29-32; 3:13-15) Ecinisweni, bebatsatsa imfundziso yekukholelwa ekuvusweni kwakhe njengalebalulekile ekukholweni kwemaKhristu. (1 Khorinte 15:12-19) Labafundzi, bebatimisele ngisho nekufa kunekutsi bayekeliswe kukholwa nguJesu. (Imisebenti 7:51-60; 12:1, 2) Ukhona yini umuntfu lomatiko longavuma kubulawelwa intfo lengasilo liciniso?

Sesicoce ngetimphendvulo temibuto lesitfupha letiseBhayibhelini letimayelana naJesu. Letimphendvulo tisicacisele kutsi Jesu ungubani. Kodvwa-ke kubalulekile yini kwati letimphendvulo? Kumcoka yini loko wena lokhetsa kukukholelwa ngaJesu?

[Imibhalo lengentansi]