Umbuto Lovela Kubafundzi . . .

Ngubani Lowatfumela “Inkhanyeti”?

▪ Uke wayibona yini imidlalo ledlalwa ngaKhisimusi lemayelana nekutalwa kwaJesu lekhombisa emakhosi lamatsatfu nobe emadvodza lahlakaniphile avakashela luswane lolunguJesu lolulele emkhombeni? Kulemidlalo, Nkulunkulu usebentisa inkhanyeti kute acondzise lamadvodza esitebeleni lesiseBhetlehema. Bantfwana labanyenti sebaze bawabamba ngenhloko emabito alamakhosi lamatsatfu—lokubo-Melchior, Caspar, kanye na-Baltazar. Lomdlalo lotayelekile uyavumelana yini nalokushiwo liBhayibheli? Chake. Awuvumelani nako ngetindlela letinyenti.

Kwekucala, abebobani lamadvodza? Ngelulwimi lwesiGriki sekucala, liBhayibheli aliwabiti ngekutsi bekangemakhosi nobe tati. Bekababhuli ngetinkhanyeti. Kuyaphawuleka kutsi lamadvodza bekabhula asebentisa tinkhanyeti ngendlela yemacaba. Kulandzisa kweliBhayibheli akuwaveti emagama awo nekutsi bekamangakhi.

Kwesibili, avakasha nini lamadvodza? Awavakashanga ngesikhatsi Jesu aseseluswane lolusemkhombeni. Sikwati njani loko? UmVangeli Matewu utsi: “Tangena endlini, tabona umntfwana naMariya, unina.” (Matewu 2:11) Naka kutsi ngaleso sikhatsi, Jesu abengasasilo luswane kodvwa ‘besekangumntfwana,’ futsi boMariya naJosefa besebahambile esitebeleni, sebahlala ekhaya labo.

Kwesitsatfu, ngubani lowatfuma ‘lenkhanyeti’ kutsi ihole lababhuli? Bafundisi bemasontfo bafundzisa kutsi nguNkulunkulu lowatfuma ‘lenkhanyeti.’ NguNkulunkulu yini vele lowayitfuma? Khumbula kutsi ‘lenkhanyeti’ ayizange icale ngekubaholela eBhetlehema. Esikhundleni saloko, yabaholela kuHerodi iNkhosi eJerusalema. Lababhuli batjela leNkhosi lenemona nalengumbulali lonelunya kutsi kunaJesu, baphindze bamenta wamtfukutselela kakhulu lomntfwana lobekatawuba ‘yinkhosi yemaJuda.’ (Matewu 2:2) Ngebucili, Herodi wabatjela kutsi babobuya kuye batombikela kutsi lomntfwana uhlala kuphi kute atewuyakhona ayomkhotsamela. ‘Lenkhanyeti’ yase ibaholela kuJosefa naMariya. Kube Nkulunkulu akangenelanga, bese kusele kancane kutsi lababhuli betinkhanyeti bafake kuphila kwalomntfwana engotini. Kuyajabulisa kutsi wangenela. Herodi watfukutsela kakhulu nakabona kutsi lababhuli ababuyi kuye kangangekutsi wate wakhipha umyalo wekutsi kubulawe bonkhe bantfwana labadvuna labaneminyaka lemibili kuya phansi eBhetlehema nakuto tonkhe tindzawo tangakhona.—Matewu 2:16.

Ngekuhamba kwesikhatsi, Jehova watsi Jesu ‘uyiNdvodzana yakhe, letsandzekako, lajabulako ngayo.’ (Matewu 3:17) Cabanga ngaloku: Nkulunkulu lonelutsandvo nalolungile, bekangabakhetsa yini babhuli betinkhanyeti labebasebentelana nemimoya futsi benta umkhuba longahambisani neMtsetfo wakhe kutsi babe titfunywa takhe? (Dutheronomi 18:10) Abengayisebentisa yini inkhanyeti kute ihole lababhuli kutsi baye kuHerodi, umbulali loyingoti kulelo live, bamtjele umlayeto lobewutawuvusa inzondo yaHerodi lehambisana nelunya? Nkulunkulu abengayisebentisa yini lenkhanyenti kanye nalababhuli kute akhombise Herodi kutsi ikuphi indvodzana yakhe, lebeyingeke ikwati kutivikela?

Ase sibekise: Khomandande lonemusa welibutfo lemphi utfumela lisotja lakhe lelilichawe kutsi liyohlola endzaweni yetitsa, lokuyintfo leyingoti. Angatitjela yini letitsa kutsi tingalitfola kuphi lelisotja? Angeke akwente loko. Ngendlela lefananako, Jehova watfumela iNdvodzana yakhe kulelive leliyingoti. Abengamembulela yini Herodi, iNkhosi lembi kutsi ikuphi iNdvodzana yakhe lebeyingeke ikhone kutivikela? Cha, bekangeke akwenteke loko.

‘Lenkhanyenti,’ nobe lentfo leyacondzisa babhuli yatfunywa ngubani? Ngubani lobekanesifiso lesikhulu sekubona umntfwana longuJesu abulawa, avinjwe kutsi akhule futsi angasifezi sabelo labekatfunyelwe sona lapha emhlabeni? Ngubani lofuna kudukisa bantfu, lokhutsata kukhulunywa kwemanga, budlova kanye nekubulala? Jesu lucobo lwakhe wamveta loyo ‘longumcambimanga neyise wawo onkhe emanga labekavele angumbulali webantfu kusukela ekucaleni,’ watsi nguSathane Develi.—Johane 8:44.