Hlala Wetsembele KuJehova Ngayo Yonkhe Inhlitiyo Yakho
“Ndvodzana yami, yenta Nkulunkulu weyihlo abe ligugu kuwe, umkhonte ngayo yonkhe inhlitiyo yakho.”—1 KHR. 28:9.
BUKA TIMPHENDVULO TALEMIBUTO:
․․․․․
Iyini inhlitiyo lengekwemfanekiso?
․․․․․
Nguyiphi indlela lesingayisebentisa kute sihlole tinhlitiyo tetfu?
․․․․․
Singachubeka njani setsembele kuJehova ngenhlitiyo yonkhe?
1, 2. (a) Ngusiphi sitfo semtimba lokuvame kukhulunywa ngaso kakhulu ngendlela lengekwemfanekiso eVini laNkulunkulu? (b) Kungani kubalulekile kucondza loko lokushiwo yinhlitiyo lengekwemfanekiso?
LIVI LANKULUNKULU livame kukhuluma ngetitfo temtimba wemuntfu ngendlela lengekwemfanekiso. Nasi sibonelo: Jobe watsi: “Tandla tami timsulwa ekulweni.” INkhosi Solomoni yatsi: “Tindzaba letimnandzi ticinisa ematsambo.” Jehova wacinisekisa Hezekeli: “Ngiyakwenta libunti lakho libe lukhuni.” Naku umphostoli Pawula latjelwa kona: “Usiletsele tindzaba letingazange setingene etindlebeni tetfu.”—Jobe 16:17; Taga 15:30; Hez. 3:9; Imis. 17:20.
2 EBhayibhelini kunesitfo semtimba lokuvame kukhulunywa ngaso ngendlela lengekwemfanekiso kakhulu kwendlula letinye. Nguleso Hana lobekatsembekile lakhuluma ngaso emthandazweni wakhe: “Inhlitiyo yami iyajabula kuSimakadze.” (1 Sam. 2:1) Ecinisweni babhali beliBhayibheli bakhuluma ngenhlitiyo tikhatsi leticishe tibe yinkhulungwane, ngendlela lengekwemfanekiso. Kubalulekile kucondza kutsi “inhlitiyo” imelelani ngobe liBhayibheli litsi kufanele siyilondvolote.—Fundza Taga 4:23.
IYINI INHLITIYO LENGEKWEMFANEKISO?
3. Singayicondza njani inchazelo yeligama lelitsi “inhlitiyo” eBhayibhelini? Fanekisa.
3 Nanobe liVi laNkulunkulu lingasiniketi inchazelo yaleligama lelitsi “inhlitiyo,” kodvwa liyasisita kutsi sicondze inchazelo yalo. Ngayiphi indlela? Ase sifanekise: Ase ucabange ngesitfombe lesihle lesentiwe ngematje lamanyenti lamancane. Kute ukwati kubona kwakheka kwaso, kufanele uhlehlele emuva utewusibona kahle. Ngendlela lefananako, kufanele sihlole eBhayibhelini tindzawo lapho kusetjentiswe khona ligama lelitsi “inhlitiyo,” kute sitewukwati kulicondza kahle. Iyini lenhlitiyo lengekwemfanekiso?
4. (a) EBhayibhelini, limelelani ligama lelitsi “inhlitiyo”? (b) Asho kutsini emavi aJesu lakuMatewu 22:37?
4 Babhali beliBhayibheli basebentisa ligama lelitsi “inhlitiyo” kute bachaze loko lesingiko ngekhatsi. Leligama lifaka ekhatsi tifiso tetfu, imicabango, buntfu, indlela lesitiphatsa ngayo, emakhono, imivelo kanye nemigomo yetfu. (Fundza Dutheronomi 15:7; Taga 16:9; Imisebenti 2:26.) Ngaletinye tikhatsi, leligama lelitsi inhlitiyo alisho tonkhe letintfo letibalwe lapha ngenhla. Nasi sibonelo: Jesu watsi: “Uboyitsandza iNkhosi, Nkulunkulu wakho, ngayo yonkhe inhlitiyo yakho, nangawo wonkhe umphefumulo wakho, nangayo yonkhe ingcondvo yakho.” (Mat. 22:37) Kuloku, “inhlitiyo” isho imiva, tifiso kanye naloko umuntfu langiko ngekhatsi. Ngekubala inhlitiyo, umphefumulo kanye nengcondvo, Jesu bekagcizelela kutsi kufanele sivete lutsandvo lwetfu ngaNkulunkulu ngemiva yetfu, ngendlela lesiphila ngayo kanye nangendlela lesicabanga ngayo. (Joh. 17:3; Ef. 6:6) Kodvwa nangabe leligama lelitsi “inhlitiyo” kukhulunywa ngalo kuphela, lisuke lisho loko lesingiko ngekhatsi.
SIZATFU LESENTA SIVIKELE INHLITIYO YETFU
5. Kungani sifuna kwenta konkhe lokusemandleni etfu kute sikhonte Jehova ngenhlitiyo yonkhe?
5 Mayelana nenhlitiyo, naku iNkhosi Davide leyakukhumbuta Solomoni: “Ndvodzana yami, yenta Nkulunkulu weyihlo abe ligugu kuwe, umkhonte ngayo yonkhe inhlitiyo yakho nangengcondvo levumako, ngobe Simakadze uhlolisisa tonkhe tinhlitiyo acondzisise tonkhe tinjongo temicabango.” (1 Khr. 28:9) Jehova uhlola tonkhe tinhlitiyo, lokufaka ekhatsi netetfu. (Taga 17:3; 21:2) Loko lakutfolako etinhlitiyweni tetfu kubutsintsa kakhulu buhlobo betfu naye kanye nelikusasa letfu. Ngaleso sizatfu, kufanele silalele seluleko saDavide lesiphefumulelwe sekwenta konkhe lokusemandleni etfu kute sikhonte Jehova ngenhlitiyo yonkhe.
6. Yini lokufanele siyicaphele ngesincumo setfu sekukhonta Jehova?
6 Kwenta kwetfu imisebenti yaJehova ngenkhutsalo, kuveta kutsi sinesifiso lesijulile sekukhonta Nkulunkulu ngenhlitiyo yonkhe. Ngesikhatsi lesifananako, siyacaphela kutsi kucindzetela kwelive laSathane lelibi kanye nesifiso sekwenta lokubi, kunemandla lamakhulu langasenta sinciphise lizinga lesikhonta ngalo Nkulunkulu. (Jer. 17:9; Ef. 2:2) Ngako-ke, kute sibone kutsi sincumo lesisitsetse sekukhonta Nkulunkulu asiphatanyiswa lutfo, kufanele sichubeke sihlola tinhlitiyo tetfu. Singakwenta njani loko?
7. Yini leveta simo senhlitiyo yetfu?
7 Kusebaleni kutsi loko lesingiko ngekhatsi akubonakali, njengobe singeke sikubone loko lokungekhatsi esihlahleni. Nobe kunjalo, njengobe Jesu eNshumayelweni yakhe yaseNtsabeni achaza kutsi titselo tiveta simo sesihlahla, ngendlela lefananako imisebenti yetfu iveta loko lesingiko ngekhatsi. (Mat. 7:17-20) Ase sihlole lenye indlela lesingakuveta ngayo loko lesingiko.
LENYE INDLELA LESINGAYIHLOLA NGAYO INHLITIYO YETFU
8. Emavi aJesu lakuMatewu 6:33 ahlobene njani nenhlitiyo yetfu?
8 Enshumayelweni yakhe, Jesu watjela tilaleli takhe loko lebetingakwenta kute tivete sifiso sato sekukhonta Jehova ngenhlitiyo yonkhe. Watsi: “Funani kucala umbuso waNkulunkulu kanye nekulunga kwakhe, khona tonkhe letintfo titakwengetelwa kini.” (Mat. 6:33) Loko lesikufuna kucala ekuphileni kwetfu, kuveta loko lesikufisako, imicabango kanye naloko lesihlela kukwenta. Kuhlola loko lokubaluleke kakhulu ekuphileni kwetfu, kungulenye indlela lesingabona ngayo kutsi simkhonta ngenhlitiyo yonkhe yini Nkulunkulu.
9. Ngusiphi simemo Jesu lasiniketa lamanye emadvodza, futsi indlela lenta ngayo yaveta ini ngawo?
9 Ngekushesha ngemuva kwekutsi Jesu akhutsate balandzeli bakhe kutsi ‘bafune kucala umbuso,’ kunalokutsite lokwenteka lokwabonisa indlela inhlitiyo yemuntfu lekuveta ngayo loko lokubaluleke kakhulu ekuphileni kwakhe. Umbhali weliVangeli Lukha ucala lendzaba ngekutsi atsi Jesu “watimisela kutsi aye eJerusalema,” nanobe abekwati loko lokwakuyowenteka kuye lapho. Ngesikhatsi yena nebaphostoli bakhe “basesendleleni,” Jesu wahlangana nemadvodza lawamema watsi: ‘Ngilandzeleni!’ Lamadvodza abefuna kulandzela Jesu kodvwa bekunetintfo labefuna kutenta kucala. Lenye indvodza yamphendvula yatsi: “Asewungivumele ngiyewungcwaba babe.” Lenye yatsi: “Ngitakulandzela, Nkhosi, kodvwa asewungivumele sengiyewuvalelisa likhaya lami.” (Luk. 9:51, 57-61) Siyawubona umehluko lobewukhona emkhatsini wekuba kwaJesu nesibindzi sekufuna kwenta intsandvo yaNkulunkulu, kanye nendlela lamadvodza lenta ngayo nawatfola simemo saJesu sekutsi amlandzele. Ngekungabeki titsakatelo teMbuso kucala ekuphileni kwawo, lamadvodza akhombisa kutsi tinhlitiyo tawo betingaketsembeli kuNkulunkulu ngalokuphelele.
10. (a) Yini leyentiwa balandzeli baKhristu nabeva simemo sakhe? (b) Ngumuphi umfanekiso lomfishane Jesu lawuchaza?
10 Ngalokwehlukile kulamadvodza, tsine sisemukele ngekuhlakanipha simemo saJesu sekuba balandzeli bakhe futsi siyachubeka sikhonta Jehova malanga onkhe. Ngekwenta njalo, siveta indlela lesitiva ngayo ngaJehova. Nanobe sikhutsele ebandleni, kufanele sikhumbule kutsi inhlitiyo yetfu ingaba sengotini. Ngayiphi indlela? Ngesikhatsi Jesu akhuluma nalamadvodza labetawuba balandzeli bakhe, wayiveta leyongoti nakatsi: “Wonkhe lobambe likhuba alima bese ubuka emuva, akawufaneli umbuso waNkulunkulu.” (Luk. 9:62) Ngusiphi sifundvo lesingasitfola kulomfanekiso?
‘SIYAKUBAMBISISA YINI LOKUHLE’?
11. Yini leyenteka emsebentini walomhlanyeli losemfanekisweni waJesu, futsi kungani?
11 Kute sente lomfanekiso waJesu ucace, ase singete leminye imininingwane kuwo. Sisebenti besimatasatasa sihlanyela. Ngesikhatsi sihlanyela, besiloku sicabanga likhaya laso lapho kunemndeni waso khona, bangani, kudla, umculo, injabulo kanye nemtfunti. Besikukhumbula kakhulu konkhe loku. Ngemuva kwekuhlanyela indzawo lenkhulu, sifiso salesisebenti mayelana naletintfo lebesiticabanga saba nemandla kakhulu kangangekutsi sase ‘sibuka emuva.’ Nanobe kunemsebenti lomnyenti lokufanele wentiwe ngembikwekutsi lensimi ihlanyelwe, lesisebenti siyachubeka siphatamiseka futsi nemsebenti waso asiwenti kahle. Kuliciniso kutsi umcashi waso akajabuli ngekwehluleka kwaso kubeketela.
12. UmKhristu angatitfola njani asesimeni lesifanana nesemhlanyeli losemfanekisweni waJesu?
12 Nyalo ase sibone kutsi lomfanekiso ungasebenta njani esikhatsini setfu. Umhlanyeli angamelela umKhristu lobonakala enta kahle kodvwa buhlobo bakhe naJehova busengotini. Nasi sibonelo: Ase sicabange ngemzalwane lomatasatasa ngetintfo takamoya. Nanobe aba khona njalo emihlanganweni yelibandla kanye nasensimini, uyachubeka acabanga ngetintfo talelive letimkhangako futsi enhlitiyweni yakhe ufisa kuba nato. Ekugcineni, ngemuva kwekutsi abe matasatasa ngetintfo takamoya iminyaka leminyenti, sifiso sakhe sekuba netintfo talelive siba nemandla kakhulu kangangekutsi ‘ubuka emuva.’ Nanobe kunemsebenti lomnyenti lokufanele wentiwe ensimini, akalibambisisi “livi lekuphila” futsi uyaphatamiseka endleleni lakhonta ngayo Nkulunkulu. (Fil. 2:16) Jehova ‘umnikati wekuvuna’ uphatseka kabi nakabona sisebenti sakhe siyekela kubeketela.—Luk. 10:2.
13. Kufaka ekhatsi ini kukhonta Jehova ngenhlitiyo yonkhe?
13 Sifundvo lesisitfola kulendzaba siyacaca. Kukhonta Jehova ngenhlitiyo yonkhe kusho kuba khona njalo emihlanganweni yelibandla kanye nasensimini, kodvwa kuphindze kufake ekhatsi nalokunye. (2 Khr. 25:1, 2, 27) Nangabe umKhristu achubeka ‘abuka emuva’—lokusici salelive lelibuswa nguSathane, usengotini yekulahlekelwa buhlobo lanabo naNkulunkulu. (Luk. 17:32) Nangabe ‘sitondza lokubi, futsi sibambisisa lokuhle’ ‘sitawufanelekela umbuso waNkulunkulu.’ (Rom. 12:9; Luk. 9:62) Sonkhe kufanele siciniseke kutsi kute intfo kulelive laSathane lengabonakala ilusito nobe ijabulisa lengasenta singakhonti Nkulunkulu ngenhlitiyo yonkhe.—2 Khor. 11:14; fundza Filiphi 3:13, 14.
HLALA UPHAPHEME
14, 15. (a) Sathane wetama njani kushintja simo senhlitiyo yetfu? (b) Fanekisa kutsi yini leyenta lendlela yaSathane ibe yingoti.
14 Lutsandvo lwetfu ngaJehova lusente satinikela kuye. Sekuphele iminyaka leminyenti labanye kitsi bavete kutsembela kwabo kuJehova ngenhlitiyo yonkhe. Nanobe kunjalo, Sathane wetama kamatima kusidukisa kute alimate tinhlitiyo tetfu. (Ef. 6:12) Uyati kutsi angeke sivele nje siyekele kukhonta Jehova. Ngaleso sizatfu, wetama kusiphatamisa asebentisa “tintfo tasemhlabeni” kute acedze inkhutsalo yetfu kancane kancane. (Fundza Makho 4:18, 19.) Kungani lendlela yaSathane iphumelela?
15 Kute siphendvule lombuto, ase uticabange ufundza incwadzi ukhanyise lilambu lelikhanya kakhulu, lelo lambu bese liyasha. Njengobe sekumnyama, ngekushesha ufaka lilambu lelisha kuphindze kukhanye endlini. Ngelilanga lelilandzelako, ufundza ukhanyise lilambu lelifananako. Ungati, lotsite ulishintjile lelilambu wafaka lelinemandla ekukhanya lamancane kunalelo bewulifakile. Utawukwati yini kubona umehluko? Cha, angeke uwubone. Kutsiwani nangabe ngelilanga lelilandzelako lotsite aphindze afaka lilambu lelikhanya kancane kakhulu kwendlula lelo belifakiwe? Nalapho angeke uwubone umehluko. Kungani kunjalo? Kungobe lokukhanya kuncipha kancane kancane ngendlela lenganakeki. Ngendlela lefananako, lelive laSathane linganciphisa inkhutsalo yetfu kancane kancane. Nakwenteka loko, Sathane usuke aphumelele ekunciphiseni inkhutsalo yetfu emsebentini lesiwentela Jehova ngenhlitiyo yonkhe. Nangabe umKhristu anganaki, angeke alubone ngisho nelushintjo lolwenteka kuye kancane kancane.—Mat. 24:42; 1 Phet. 5:8.
UMTHANDAZO UBALULEKILE
16. Singativikela njani emachingeni aSathane?
16 Singativikela njani kulamachinga aSathane futsi sichubeke setsembele kuJehova ngenhlitiyo yonkhe? (2 Khor. 2:11) Umthandazo ubalulekile. Pawula wakhutsata emakholwa labekanye nawo kutsi ‘abe nemandla ekumelana nebucili baSathane.’ Wase utsi kuwo: “Khulekani ngaso sonkhe sikhatsi nikumoya ngekukhuleka konkhe nekuncenga.”—Ef. 6:11, 18; 1 Phet. 4:7.
17. Ngusiphi sifundvo lesisitfola emithandazweni yaJesu?
17 Kute simelane naSathane, kubalulekile kutsi silingise indlela Jesu labethandaza ngayo, lebeyiveta sifiso sakhe lesikhulu sekwetsembela kuJehova ngenhlitiyo yonkhe. Naka loko Lukha lakubhala mayelana nendlela Jesu lathandaza ngayo ngebusuku bangembikwekuba afe: “Inhlitiyo yakhe yayilusizi; wathandaza ngekuciniseka lokukhulu.” (Luk. 22:44) Ngaso sonkhe sikhatsi Jesu bekathandaza ngekuciniseka, kodvwa ngalobo busuku wathandaza “ngekuciniseka lokukhulu” ngobe abetawubeketelela kuvivinywa lokukhulu futsi umthandazo wakhe waphendvulwa. Sibonelo saJesu siveta kutsi ngaletinye tikhatsi imithandazo yetfu ingaba nemandla kunaleminye. Ngako-ke, nasichubeka sibhekana netilingo futsi naSathane achubeka etama kusidukisa, kufanele sithandazele sivikelo saJehova “ngekuciniseka lokukhulu.”
18. (a) Ngumuphi umbuto lokufanele sitibute wona ngemthandazo, futsi kungani? (b) Ngutiphi tici letitsintsa inhlitiyo yetfu, futsi ngatiphi tindlela? (Fundza libhokisi lelisekhasini 16.)
18 Imithandazo lenjalo ingasitsintsa njani? Pawula watsi: “Kuko konkhe ticelo tenu atatiwe nguNkulunkulu, ngekukhuleka nekuncusa kanye nekubonga. Kuthula kwaNkulunkulu lokwendlula konkhe kwati kutawulondvolota tinhlitiyo tenu.” (Fil. 4:6, 7) Kuliciniso kutsi kufanele sithandaze njalo kanye nangekuciniseka, kute sihlale setsembele kuJehova ngenhlitiyo yonkhe. (Luk. 6:12) Ngako-ke tibute, ‘Ngithandaza njalo yini futsi nangekuciniseka?’ (Mat. 7:7; Rom. 12:12) Imphendvulo yakho iveta sifiso lesijulile lonaso sekukhonta Nkulunkulu ngenhlitiyo yonkhe.
19. Yini longayenta kute uchubeke wetsembele kuJehova ngenhlitiyo yonkhe?
19 Njengobe sesifundzile, tintfo letita kucala ekuphileni kwetfu ngito letiveta simo senhlitiyo yetfu. Sifuna kuciniseka kutsi tintfo lesitishiye emuva kanye nemachinga aSathane awasenti sehlise lizinga lesikhonta ngalo Jehova. (Fundza Lukha 21:19, 34-36.) NjengaDavide, siyachubeka sithandaza kuJehova sitsi: “Yenta inhlitiyo yami ihlose intfo yinye.”—Hla. 86:11.
[Libhokisi ekhasini 16]
TICI LETINTSATFU LETITSINTSA INHLITIYO YETFU
Njengobe singenta imetamo kute sizuzise tinhlitiyo tetfu, kufanele sitsatse tinyatselo letidzingekile kute sigcine inhlitiyo yetfu lengekwemfanekiso iphilile. Asewucabange ngaletici letintsatfu letibalulekile:
1 Kudla: Inhlitiyo yetfu idzinga kudla lokunemphilo lokwenele. Ngendlela lefananako, kufanele siciniseke ngekutsi sitfola kudla kwakamoya lokunemsoco ngekutsi sibe nesifundvo lesitichubela sona njalo, sizindle futsi sibe khona nasemihlanganweni yelibandla.—Hla. 1:1, 2; Taga 15:28; Heb. 10:24, 25.
2 Kuvivinya umtimba: Kute sibe nemphilo, ngaletinye tikhatsi inhlitiyo yetfu idzinga kutsi ishaye ngemandla. Ngendlela lefananako, kuhlanganyela ngenkhutsalo emsebentini wekushumayela—mhlawumbe sitidzele ngekutsi sitfutfukise imisebenti yetfu—loko kungagcina inhlitiyo yetfu lengekwemfanekiso iphilile.—Luk. 13:24; Fil. 3:12.
3 Indzawo lesiphila kuyo: Lelive lelibi lelingamhloniphi Nkulunkulu lokufanele sisebente kulo futsi sihlale kulo lingayicindzetela inhlitiyo yetfu lengekwemfanekiso. Nanobe kunjalo, kucindzeteleka lokunjalo singakunciphisa ngekutsi sitihlanganise nalabo lesikholwa nabo, labasikhatsalelako futsi labanetinhlitiyo letetsembele kuNkulunkulu ngalokuphelele.—Hla. 119:63; Taga 13:20.