Ukhona Yini Lova Imithandazo?

“Bengingabata kutsi Nkulunkulu ukhona kodvwa bengike ngithandaze ngaletinye tikhatsi. Bengingaciniseki kutsi ukhona longilalele kodvwa ngiyavuma kutsi benginalo litsemba lekutsi ukhona. Bengingajabuli futsi ngingenayo injongo ekuphileni. Bengisaba kukholelwa kuNkulunkulu ngobe bengicabanga kutsi bantfu labangatetsembi kuphela labakholelwa kuNkulunkulu.”—PATRICIA,a WASE-IRELAND.

WAKE wativa yini njengaPatricia? Uyathandaza yini ngisho nobe ungabata kutsi Nkulunkulu ukhona? Nangabe kunjalo, awuwedvwa. Cabanga nganaku lokulandzelako.

◼ Kubantfu labangu-2 200 lokwacocwa nabo nakwentiwa luhlolo eBhrithani, kwatfolakala kutsi ngemaphesenti langu-22 kuphela kubo labakholelwa kutsi ukhona Nkulunkulu lowadala umhlaba nalova imithandazo. Nanobe kunjalo, kulabantfu lokwacocwa nabo kuloluhlolo, lokungenani labangemaphesenti langu-55 bayathandaza ngaletinye tikhatsi.

◼ Kubantfu labangu-10 000 lokwacocwa nabo nakwentiwa luhlolo kumavekati lamatsatfu, kwatfolakala kutsi cishe emaphesenti langu-30 alabantfu batsi abakholelwa kuNkulunkulu kodvwa bayathandaza ngaletinye tikhatsi.

Yini Lebenta Bangabate?

Allan, indvodza yaseNgilandi utsi: “Bengivame kutsi angikholelwa kuNkulunkulu ngobe bengicabanga kutsi inkholo yentelwe kulawula timphilo tebantfu nekwenta imali. Bengicabanga nekutsi kube Nkulunkulu ukhona ngabe akukho lokungaphatseki kahle kwebantfu lokwandze kangaka emhlabeni, kodvwa ngaletinye tikhatsi bengike ngihlale ngithule ngikhulume ‘nalokutsite.’ Bengike ngitibute nekutsi, ‘ngaba khona kanjani?’”

Umuntfu ngamunye lonemiva lenjalo unetizatfu takhe letimenta angabate kutsi imithandazo iyaphendvulwa. Etikhatsini letinyenti, kungabata kungabangelwa kungatfoli timphendvulo temibuto lenjengaletsi:

◼ Ukhona yini uMdali?

◼ Kwentiwa yini kutsi etikhatsini letinyenti kube yinkholo lebangela tintfo letimbi?

◼ Nkulunkulu ukuvumelelani kuhlupheka?

Nawungatfola timphendvulo talemibuto ungativa unaso yini sibindzi sekuthandaza?

[Umbhalo longentansi]