SIHLOKO SEKUCALA: UTAWUBA KHONA NINI UMHLABA LOTE LUBANDLULULO?
Lubandlululo Inkinga Yemhlaba Wonkhe
JONATHAN, wekutalwa eMelika, lonebatali labatalwa eKorea, bekasolo ahlushwa lubandlululo kusukela asengumntfwana. Ekukhuleni kwakhe, wafuna indzawo lapho angeke abandlululwe khona ngenca yekubukeka kwakhe nobe ngenca yelibala lakhe. Waba ngudokotela edolobheni lelisenyakatfo ne-Alaska, eMelika, indzawo latfola kuyo kutsi linyenti letigulane takhona tibukeka ngendlela lefana neyakhe. Bekanelitsemba lekutsi kuleyondzawo besekaphunyukile elubandlululweni.
Ematsemba lebekanawo ashabalala ngesikhatsi elapha umfati loneminyaka lengu-25. Satsi lesigulane nasiphuma ku-coma, sabuka Jonathan emehlweni sakhipha emagama lagcwele lubandlululo ngenca yekutsi kusukela ebuncaneni baso safundziswa kutsi sibenyanye bantfu base-Korea. Lesigigaba sakhumbuta Jonathan kabuhlungu kutsi yonkhe imetamo yakhe lebekayentile yekusuka endzaweni latalelwa kuyo ete kulendzawo futsi abe yincenye yayo, ayimsitanga kutsi abalekele lubandlululo.
Lokwenteka kuJonathan kwembula liciniso lelitsite lelibuhlungu. Lubandlululo lutse citsi saka emhlabeni wonkhe. Kubonakala shengatsi lakunebantfu khona, nalo lukhona.
Nanobe lubandlululo lusabalele emhlabeni wonkhe, bantfu labanyenti bavame kungahambisani nalo. Loku kuyindida. Kungenteka kanjani kutsi intfo leyenyanywako iphindze ngesikhatsi lesifanako isabalale emhlabeni wonkhe? Kuliciniso kutsi linyenti lebantfu labangalusekeli lubandlululo, abatiboni kutsi nabo banalo. Kunjalo yini nakuwe? Ungaphendvula utsini?
INDZABA LECONDZENE NEMUNTFU NGAMUNYE
Siyakuphawula loko nome asikuphawuli, kodvwa kulukhuni kutibona kutsi sinelubandlululo etinhlitiyweni tetfu. LiBhayibheli liyachaza kutsi kubangelwa yini loko, nalitsi: “Inhlitiyo iyayengana ngetulu kwato tonkhe tintfo.” (Jeremiya 17:9) Ngaleso sizatfu singase sitikhohlise sititjele kutsi semukela bantfu bato tonkhe tinhlobo. Nome singahle sititsetselele sititjele kutsi sinesizatfu lesiphatsekako sekungabevisisi bantfu beluhlobo lolutsite.
Bewungenta njani nawungaba kulesimo?
Asesibekise kuze sichaze bulukhuni bekutibona kutsi kungenteka sinelubandlululo lolubhacile: Uhamba wedvwa ebusuku esitaladini. Ubona emajaha lamabili longazange sewuke uwabone, eta ngakuwe. Abonakala atidlakela futsi munye wawo kubonakala shengatsi kukhona lakuphetse esandleni.
Ingabe ufinyelela esiphetfweni sekutsi lamajaha lamabili alusongo kuwe? Kuyavunywa, lokwenteka kuwe esikhatsini lesendlulile kungase kukukhumbute ngesidzingo sekucaphela kodvwa engabe loko kusizatfu lesiphatsekako yini sekuphetsa ngekutsi lamajaha lamabili ayingoti? Umbuto wekutihlola ungaba kutsi, ucabanga kutsi lamajahla aluhlanga luni? Imphendvulo yakho kulombuto ingembula lokusenhlitiyweni yakho. Ingase ivete kutsi ngelizinga lelitsite sewunalo lubandlululo.
Nasingatikhohlisi, kufanele sivume kutsi ekhatsi ekujuleni kwetinhlitiyo tetfu sonkhe sinalo lubandlululo lolutsite. Ngisho neliBhaybheli liyavuma kutsi kuneluhlobo lolutsite lwelubandlululo loluvamile. Loko likusho nalitsi: “Umuntfu ubuka lingaphandle lemuntfu.” (1 Samuweli 16:7) Njengobe sonkhe sinalenkinga bonkhe bantfu labanayo, lokuhambisana nemiphumela lebuhlubungu, likhona yini litsemba lekutsi singalucedza lubandlululo ekuphileni kwetfu? Siyawuke sifike yini sikhatsi lapho emhlabeni wonkhe kutawuba bete lubandlululo?