Vumela Kucatsanisa Kukusite

Awuvumi yini kutsi Jesu abenguMfundzisi lomkhulu lowake waphila emhlabeni? Kungenteka uke wetama kulingisa tindlela labefundzisa ngato, letifaka ekhatsi kusebentisa imibuto nemifanekiso. Uke wanaka yini kutsi bekasebentisa nekucatsanisa ekufundziseni kwakhe?

Bantfu labanyenti bayakusebentisa kucatsanisa nabakhuluma. Nawe ungase ukwente loko ungakacabangi. Ungase utsi: “Batsite tonkhe letitselo tivutsiwe; kodvwa, leti tiseluhlata.” Nobe utsi: “Abengumntfwana lonemahloni, kodvwa nyalo sewuhlahlambile.”

Kuletimo letifana naleti, kwekucala usho liciniso nobe umbono ngaleyo ndzaba; ngemuva kwaloko usho sicatsaniso ngekusebentisa inkhulumo lefaka ekhatsi letsi; kodvwa, nobe kunjalo, esikhundleni saloko, nobe letsi ngakulolunye luhlangotsi. Mhlawumbe ungase ucatsanise ngekutsi wengete leminye imininingwane nobe ugcizelele loyo mcondvo. Nawukhuluma ngaleyo ndlela usuke ukhuluma ngendlela lowetayele kukhuluma ngayo futsi kungabasita labanye kutsi bakucondze loko lokushoko.

Ngisho nobe kucatsanisa kungakavami kuletinye tilwimi nobe lamanye emasiko, senta kahle ngekunaka kubaluleka kwako. Kungani sisho njalo? Kungenca yekutsi sitfola lokunyenti kucatsanisa eVini laNkulunkulu leliphefumulelwe. Jesu abekusebentisa kakhulu kucatsanisa. Usakukhumubula yini loku: “Kute umuntfu lokhanyisa sibane bese usibeka ngephansi kwesitja; kodvwa usibeka endzaweni yaso.” “Angiketeli kutewucitsa [uMtsetfo], kodvwa ngitele kutewugcwalisa.” “Nivile kutsi kwatsiwa: ‘Ungaphingi.’ Kepha mine ngitsi kini: Ngulowo nalowo lobuka lomsikati . . . ” “Nivile futsi kutsi kwatsiwa: ‘Liso ngeliso, litinyo ngelitinyo.’ Kodvwa mine ngitsi kini: Ningamelani nalokubi; umuntfu nakakumukula esihlatsini sangesekudla, mnike nalesi lesinye.”—Mat. 5:15, 17, 27, 28, 38, 39.

Kunalokunye kucatsanisa lokutfolakala kuletinye tincwadzi teliBhayibheli. Kungakusita kutsi utfole liphuzu lelitsite nobe ugcizelele indlela lengiyo yekwenta intfo letsite. Nangabe ungumtali, cabanga nganaku kucatsanisa: “Boyise ningabaphatsi kabi bantfwabenu, badzimate babe nenzondo, kodvwa bakhuliseni ngekubayala nangekubacondzisa ngemphilo yebuKhristu.” (Ef. 6:4) Kube umphostoli Pawula wamane nje wabhala kutsi babe (nome make) kufanele bakhulise umntfwana ngekumnika umyalo waNkulunkulu, loko bekungaba seluleko lesihlakaniphile nalesiliciniso. Nobe kunjalo, umcondvo walendzaba uvakala kahle kakhulu nakucatsaniswa ngekutsi “kodvwa bakhuliseni ngekubayala nangekubacondzisa ngemphilo yebuKhristu.”

Kamuva esehlukweni lesifanako, Pawula wabhala watsi: “Ngobe asilwi nebantfu, kodvwa silwa . . . nemabutfo abomoya lababi labasemkhatsini.” (Ef. 6:12) Lokucatsanisa kukwenta ubone kutsi ubhekene nemphi lematima sibili. Awulwi nebantfu labavamile; kodvwa, ulwa nemabutfo abomoya lababi.

LESIKUZUZAKO NAKUSETJENTISWA KUCATSANISA

Kuyo incwadzi yeliBhayibheli ya-Efesu, utawutfola emavesi lamanyenti lapho Pawula asebentise khona kucatsanisa. Kucabanga ngaloku kungasisita kutsi sitfole loko Pawula labekugcizelela futsi sikucondze ngalokucacile lokudzingeka sikwente.

Ungakutfola kuzuzisa futsi kujabulisa kufundza lishadi lelikhombisa kucatsanisa lokutfolakala ku-Efesu sehluko 4 kuya ku 5. Njengobe ufundza kucatsanisa ngakunye, cabanga ngekwakho kuphila. Tibute: ‘Sinjani simo sami sengcondvo? Ngenta njani nangibhekene nalesimo nobe lesinye lesifana naso? Kuloku lokusuke kucatsaniswa, bantfu bangacabanga kutsi ngiwela kukuphi mine?’ Nangabe ubona kutsi kucatsanisa lokutsite kuveta lokutsite lokufanele ukulungise, yetama kukulungisa. Vumela loko kucatsanisa kukusite.

Mhlawumbe ungalifundza lelishadi ekukhonteni kwemndeni. Kwekucala, onkhe emalunga emndeni angakufundza lokucatsanisa. Lomunye angasho incenye yekucala yalokucatsanisa, anikete sikhatsi lamanye emalunga emndeni kutsi etame kukhumbula liphuzu leligcanyiswa ngulencenye yesibili. Loko kungaphumela encociswaneni lemnandzi yemndeni yekutsi ningakwati njani kakhudlwana kusebentisa loku lokushiwo ngulencenye yesibili yalokucatsanisa. Kuhlola lokucatsanisa ngalendlela kungase kusite labasebasha nalabadzala kutsi balwele kutiphatsa njengemaKhristu emndenini nakuletinye tindzawo.

Ungayikhumbula yini incenye yesibili yalokucatsanisa?

Njengobe ukucondza kubaluleka kwekucatsanisa, ungaba setfubeni lelihle lekukubona eBhayibhelini, futsi ungase utfole kutsi kuyakusita kakhulu emsebentini wekushumayela. Ungase utsi kumnikati welikhaya: “Bantfu labanyenti batsi umuntfu unemphefumulo longafi, kodvwa ake sewunake kutsi liVi laNkulunkulu litsini lapha.” Esifundvweni seliBhayibheli ungase utsi: “Bantfu labanyenti kulendzawo bakholelwa kutsi Nkulunkulu naJesu ngumuntfu munye; nobe kunjalo, yini leshiwo liBhayibheli ngalendzaba? Wena yini loyikholelwako?”

ImiBhalo isiniketa kucatsanisa lokunyenti lokufundzisako lokungasisita sihambe endleleni yaNkulunkulu. Singakusebentisa kucatsanisa kute sisite labanye balati liciniso leliBhayibheli.

Lokunye Kucatsanisa Encwadzini Ya-Efesu Sehluko 4 na-5

Yetama kusebentisa lelishadi ekukhonteni kwemndeni.

‘Ngeke . . . sigujuteliswe . . . timfundziso tekukhohlisa kwebantfu labanebucili bekudukisa.’—4:14.

“Kodvwa asikhulume liciniso ngelutsandvo, kuze sikhule ngako konkhe kuye, longuyena ayinhloko, Khristu.”—4:15.

“[Bantfu betive] bahlwelwe engcondvweni . . , ngobe abati lutfo, ngenca yebulukhuni benhlitiyo.”—4:18, 19.

“Kepha nine anizange nimfundze Khristu kanjalo, nangabe-ke nimvile nafundziswa futsi kuye.”—4:20, 21.

“Khumulani umuntfu lomdzala wesimilo sakucala, lose onakala ngetinkhanuko tenkhohliso.”—4:22.

‘Kodvwa . . . nentiwe nibe basha emoyeni nasengcondvweni yenu. Yembatsani umuntfu lomusha.’—4:23, 24.

“Lisela alingabe liseba.”—4:28.

“Kepha kunaloko alikhutsale, lisebente lokuhle ngetandla talo.”—4:28.

“Akungabe kusaphuma nalinye livi lelibolile emlonyeni wenu.”—4:29.

“Kodvwa kube ngulelilungele kwakha.”—4:29.

“Konkhe lokubabako, nelulaka, nekutfukutsela, nemsindvo, nekuhlambalata akususwe kini, kanye nako konkhe lokubi.”—4:31.

“Kodvwa phatsanani ngebumnene, nihawukelane, nitsetselelane.”—4:32.

“Kepha bugwadla nebuphingi, nako konkhe kungcola, nome kungeneliswa, kungaphatfwa ngisho nangeligama emkhatsini wenu.”—5:3.

‘Kodvwa esikhundleni saloko banini nekubonga.’—5:4.

“Kucala nanibumnyama.”—5:8.

“Kepha nyalo senikukhanya eNkhosini.”—5:8.

“Ningahlanganyeli emisebentini yebumnyama, lete titselo.”—5:11.

“Kunaloko niboyeneka ebaleni.”—5:11.

“Ngako-ke caphelani kutsi nitiphatsa njani. Ningatiphatsisi kwebantfu labangakahlakaniphi.”—5:15.

“Kepha njengalabahlakaniphile, nibambisise ematfuba, ngobe emalanga mabi.”—5:15, 16.

“Ngako-ke ningabi tilima.”—5:17.

“Kodvwa yatini loko lokuyintsandvo yeNkhosi.”—5:17.

“Ningadzakwa [liwayini], ngobe kuvela kuko inkhanuko.”—5:18.

‘Kodvwa gcwaliswani ngemoya.’—5:18.

“Khona [Khristu] atetimisela libandla lelinebukhosi, lingabi nabala nome sici nome yini lokunjalo.”—5:27.

“Kodvwa libe ngcwele lingabi nacala.”—5:27.

“Phela kute umuntfu lowake watondza umtimba wakhe.”—5:29.

“Kepha uyawondla, awunakekele, njengobe naKhristu enta ebandleni.”—5:29.