‘Jehova Unitsetselele Ngekukhululeka’

“Umuntfu longabatsetseleli labanye usuke abhidlita libhuloho lokufanele yena ngekwakhe awele kulo.” Lamavi a-Edward Herbert, labesati semlandvo saseBrithani sangelikhulu lesi-17 leminyaka, agcizelela lesinye sizatfu lesenta kudzingeke sibatsetselele labanye, lesikutsi: Natsi ngaletinye tikhatsi sitawudzinga kutsi labanye basitsetselele. (Matewu 7:12) Nanobe kunjalo, kunalesinye sizatfu lesibaluleke kakhulu sekutsi sibatsetselele labanye. Naka emavi emphostoli Pawula latfolakala kubaseKholose 3:13.—Fundza.

Njengobe sonkhe sinesono, ngaletinye tikhatsi singabacansula nobe sibaphatse kabi labanye, futsi nabo bangase bente lokufanako kitsi. (Roma 3:23) Singakugcina njani kuthula emkhatsini wetfu nebantfu labanesono njengatsi? Aphefumulelwe nguNkulunkulu, Pawula wasecwayisa kutsi sibeketele futsi sitsetselele. Lesecwayiso sisasebenta nalamuhla njengobe sasisebenta ngesikhatsi sibhalwa eminyakeni lengaba tinkhulungwane letimbili leyengcile. Asesiwabukisise lamavi aPawula.

“Chubekani nibeketelelana.” Lenye incwadzi itsi emaKhristu enta loku ngekutsi “akulungele kubeketelela labo labanemaphutsa nobe buntfu lobungatsandzeki futsi lobubacansulako.” Emavi latsi ‘nibeketelelane’ asitjela kutsi loku kufanele kwentiwe ngibo bonkhe bantfu. Ngako nasikhumbula kutsi natsi sinebuntfu lobubacansulako labanye ngeke sivumele tintfo lesingatitsandzi ngabo tiphatamise kuthula emkhatsini wetfu nabo. Kutsiwani-ke nangabe labanye basona?

“Chubekani . . . nitsetselelana ngekukhululeka.” Ngekusho kwalesinye sati, ligama lesiGriki lelihunyushwe ngekutsi ‘kutsetselelana ngekukhululeka’ “akusilo ligama lelivamile lelisho kucolela nobe kutsetselela . . . kodvwa liligama lelinemcondvo lobanti logcizelela kutsi lokutsetselela kwentiwe ngemusa.” Lomunye umtfombo utsi leligama lingasho “kupha intfo lejabulisako, lebonisa umusa futsi lezuzisako.” Sisuke sikhombisa kutsi sinemusa nasikulungele kutsetselela ngisho nobe ‘sinesizatfu sekukhonona ngalomunye.’ Kungani kufanele sikulungele kubonisa umusa ngalendlela? Kungenca yekutsi ngalesinye sikhatsi natsi kungenteka sidzinge kutsi loyo losonile asibonise umusa ngekusitsetselela.

“Njengobe Jehova anitsetselele ngekukhululeka, nani yentani kanjalo.” Sizatfu lesibaluleke kakhulu sekutsi sitsetselele labanye ngekukhululeka kutsi: Jehova Nkulunkulu usitsetselela ngekukhululeka. (Mikha 7:18) Asewucabange nje ngemusa lomkhulu lawubonisa toni letiphendvukako. Ngalokwehlukile kitsi, Jehova akasenti sono. Kodvwa ukulungele kutsetselela toni letiphendvukako, futsi ukwenta ngekukhululeka ngisho nobe ati kutsi ngeke aze adzinge labo bantfu bambonise umusa lofanako ngekutsi bamtsetselele. Ngako-ke, Jehova usibonelo lesihamba embili sekutitsetselela ngekukhululeka toni letiphendvukako!

Sihawu saJehova sisenta sisondzele kuye futsi sifune kumlingisa. (Efesu 4:32–5:1) Senta kahle ngekutibuta kutsi: ‘Njengobe Jehova angitsetselela ngemusa kangaka, mine ngingahlala njani ngingamtsetseleli umuntfu lonesono njengami, lophendvuka ngebucotfo nangabe angonile?’—Lukha 17:3, 4.