“Bantfu Labanyenti Bebangitondza”

KUPHILA KWAMI:

Ngakhulela eSantiago, lokuyinhloko dolobha yaseChile, endzaweni lebeyigcwele kusetjentiswa kwetidzakamiva, emacembu etidlova, kanye nebugebengu. Ngesikhatsi ngineminyaka lesihlanu budzala, babe wabulawa. Ngemuva kwaloko, make wahlala nendvodza lebeyinenhlitiyo lembi. Beyihlale isishaya sobabili. Nanyalo ngisenato leto tilondza enhlitiyweni yami ngenca yetintfo letenteka ngaleyo minyaka.

Njengobe ngikhula, ngaba nebudlova kakhulu ngenca yalokuphatfwa kabi. Bengilalela umculo lonetinsimbi letishaywa ngemandla, ngidzakwa, futsi ngaletinye tikhatsi bengidla tidzakamiva. Bengihlale ngilwa emgwacweni nebantfu labatsengisa tidzakamiva, futsi tikhatsi letinyenti bebafuna kungibulala. Ngalelinye lilanga, licembu letitsa latsenga umuntfu lotsite kutsi angibulale, kepha ngakwati kubaleka nginelinceba lekugwazwa kuphela. Kantsi ngalesinye sikhatsi, licembu lalabatsengisa tidzakamiva langikhomba ngesibhamu enhloko, letama nekungikhunga.

Nga-1996 ngatsandzana naCarolina, futsi nga-1998 sashada. Ngemuva kwekutalwa kwendvodzana yetfu lelitibulo, kwangikhatsata kutsi ngenca yelulaka lebenginalo, bengitawufana nalobabe lowangikhulisa futsi ngihlukumete umndeni wami. Ngako ngafuna lusito endzaweni yekubuyisela similo (rehabilitation center). Kuyo, ngatfola lusito kubodokotela, kodvwa konkhe loku akuzange kusebente. Ngachubeka ngitfukutseliswa ngisho natintfo letincane, futsi bengehluleka kutibamba. Njengobe bengifuna kuyekela kuhlukumeta umndeni wami, ngetama kutibulala. Kodvwa ngiyajabula kutsi ngehluleka.

Besekuphele iminyaka leminyenti ngitsi Nkulunkulu akekho, kodvwa nyalo besengifuna kukholelwa kuye. Ngako ngatihlanganisa nelisontfo lebavangeli sikhashana lesitsite. Ngaleso sikhatsi, umfati wami abefundza liBhayibheli naboFakazi BaJehova. Bengibatondza boFakazi, futsi bengihlale ngibetfuka. Kodvwa ngaso sonkhe sikhatsi bebaba nemusa, lokuyintfo lebengisuke ngingakayilindzeli.

Ngalelinye lilanga, Carolina wangicela kutsi ngifundze Tihlabelelo 83:18 eBhayibhelini lami. Lelivesi likuveta ngalokucacile kutsi libito laNkulunkulu nguJehova. Kwangimangalisa kubona kutsi esontfweni lami bengifundzile ngankulunkulu, kodvwa hhayi ngaJehova. Ekucaleni kwemnyaka wa-2000, nami ngacala kufundza liBhayibheli naboFakazi.

INDLELA LIBHAYIBHELI LELAKUGUCULA NGAYO KUPHILA KWAMI:

Njengobe bengitfutfuka, kwangidvudvuta kwati kutsi Jehova unguNkulunkulu lonemusa futsi lotsetselelako. Sibonelo saloko kutsi ku-Eksodusi 34:6, 7, liBhayibheli litsi Jehova ‘unguNkulunkulu lonesihawu nemusa; lowephuta kutfukutsela andze ngemusa nangekwetsembeka, lobentela umusa labatinkhulungwane, atsetselele emaphutsa, nalokubi, netono.’

Ngisho nangaleso sikhatsi, bekusematima kusebentisa loko lebengikufundza. Ngangiciniseka ngekutsi ngeke ngize ngikwati kulawula lulaka lwami. Ngaso sonkhe sikhatsi nangehluleka, Carolina abengikhutsata ngelutsandvo. Abengikhumbuta kutsi Jehova uyayibona imetamo yami. Kungisekela kwakhe kwanginika emandla ekuchubeka ngetama kujabulisa Jehova, ngisho nobe bengivame kuva shengatsi sekute litsemba ngami.

Ngalelinye lilanga, Alejandro, labengifundzela liBhayibheli watsi angifundze incwadzi yebaseGalathiya 5:22, 23. Lamavesi atsi titselo temoya waNkulunkulu “lutsandvo, injabulo, kuthula, kubeketela, umusa, buhle, kukholwa, umoya lomuhle, nekutibamba.” Alejandro wangichazela kutsi kuze ngibe naletitselo, bengingeke ngikwati kukwenta ngemandla ami, kodvwa bengitawusitwa ngumoya longcwele waNkulunkulu. Loku kwawushintja ngalokuphelele umbono wami!

Ngekuhamba kwesikhatsi ngaya emhlanganweni lomkhulu waboFakazi BaJehova. Kuhleleka, kuhlanteka kanye nebungani lengabubona lapho bangenta ngaciniseka kutsi sengiyitfolile inkholo yeliciniso. (Johane 13:34, 35) Ngabhajatiswa nga-February 2001.

INDLELA LENGIZUZE NGAYO:

Jehova ungente ngagucuka, ngasuka ekubeni ngumuntfu lonebudlova ngaba nekuthula. Ngiva shengatsi ungitakule eludzakeni lebengibhajwe kulo. Bantfu labanyenti bebangitondza, futsi angibasoli ngaloko. Nanobe kunjalo, nyalo ngijabulela kukhonta Jehova ngekuthula ngikanye nemfati wami nemadvodzana etfu lamabili.

Tihlobo tami kanye nebangani bami bakadzeni abayikholwa indlela lesengishintje ngayo. Ngenca yaloko, labanyenti kubo babe nenshisekelo yekufundza liciniso leliseBhayibhelini. Ngiphindze ngaba nelilungelo lekusita labanye kutsi nabo bamati Jehova. Ngijabula kakhulu ngekutsi ngibone liciniso leliseBhayibhelini ligucula nekwabo kuphila!