Jabulela Kwetsembeka Nekutsetselela KwaJehova

1, 2. (a) Yini lesenta sibajabulele bangani labetsembekile nalabatsetselelako? (b) Ngumiphi imibuto lesitawucoca ngayo?

UNGAMCHAZA njani umngani weliciniso? Dzadze longumKhristu libito lakhe lokungu-Ashley, utsi: “Kimi, umngani weliciniso ngumuntfu lohlale akulungele kukusita futsi lokutsetselelako nawumonile.” Sonkhe siyakujabulela kuba nebangani labetsembekile nalabatsetselelako. Bayasisita sitive sivikelekile futsi sitsandvwa.—Taga 17:17.

² Jehova unguMngani lohamba embili lowetsembekile nalotsetselelako lesingaba naye. Kunjengobe umhlabeli asho: “Wena, Nkhosi, ulungile futsi ulungele kutsetselela, umusa wakho [nobe “lutsandvo lolucotfo”] uyabaphuphumela labo labakhala kuwe.” (Hla. 86:5) Kusho kutsini kuba ngulowetsembekile nalotsetselelako? Jehova ubukhombisa njani lobunguye bakhe lobubili? Singasilingisa njani sibonelo sakhe? Timphendvulo talemibuto titawusisita sijulise lutsandvo lwetfu ngeMngani wetfu lohamba embili, Jehova. Titawuphindze tisisite sicinise bungani betfu nalabanye.—1 Joh. 4:7, 8.

JEHOVA WETSEMBEKILE

3. Kusho kutsini kuba ngulowetsembekile?

³ Kwetsembeka buntfu lobuhlanganisa kutinikela, kuba cotfo kanye nekungagucugucuki. Umuntfu lowetsembekile akagucugucuki. Esikhundleni saloko, ngelutsandvo uyanamatsela kulomunye umuntfu (nobe intfo), asondzelane naloyo muntfu (nobe naleyontfo) ngisho nasetimeni letilukhuni. Kuliciniso kutsi Jehova nguye lohamba embili ngekuba ‘ngulowetsembekile.’—Semb. 16:5, NW.

4, 5. (a) Jehova ukukhombisa njani kwetsembeka? (b) Singawatfola njani emandla nasicabanga ngetento taNkulunkulu tekwetsembeka?

⁴ Jehova ukukhombisa njani kwetsembeka? Akalokotsi atishiye tikhonti takhe letetsembekile. Lesinye sikhonti sakhe lokuyiNkhosi Davide, sakufakazela kutsi Jehova wetsembekile. (Fundza 2 Samuweli 22:26.) Ngesikhatsi Davide alingwa, ngekwetsembeka Jehova wamcondzisa, wamvikela waphindze wamkhulula. (2 Sam. 22:1) Davide abati kutsi kwetsembeka kwaJehova akubonakali ngemavi nje kuphela. Yini leyenta Jehova wetsembeka kuDavide? Kungobe Davide naye ‘abetsembekile.’ Jehova uyakujabulela kwetsembeka kwetikhonti takhe futsi naye uyetsembeka kuto.—Taga 2:6-8.

⁵ Singatfola emandla nasicabanga ngetento taJehova tekwetsembeka. Lomunye umzalwane lowetsembekile libito lakhe lokunguReed, utsi: “Kuyangisita kufundza ngendlela Jehova laphatsa ngayo Davide ngetikhatsi letimatima. Ngisho nangesikhatsi Davide abaleka, angena aphuma emihumeni, Jehova wachubeka amvikela. Loko kungikhutsata kakhulu. Kuyangikhumbuta kutsi nobe simo singaba njani, nobe kungaba matima kanjani, Jehova utawuba nami kuphela nje nangetsembekile kuye.” Kufanele kutsi nawe utiva ngaleyo ndlela.—Rom. 8:38, 39.

6. Ngutiphi letinye tindlela Jehova lakhombise ngato kutsi wetsembekile, futsi titizuzisa njani tikhonti takhe?

⁶ Ngutiphi letinye tindlela Jehova lakhombisa ngato kutsi wetsembekile? Uhlale etsembekile etimisweni takhe. Naku lasicinisekisa ngako: “Ngisho nasebudzaleni benu . . . nginguye.” (Isa. 46:4) Uhlale enta tincumo letingagucuki letisekelwe etimisweni takhe talokuhle nalokubi. (Mal. 3:6) Ngetulu kwaloko, Jehova ukhombise kutsi wetsembekile ngekuhlale acotfo kuloko lakwetsembisile. (Isa. 55:11) Ngaleyo ndlela, kwetsembeka kwaJehova kuzuzisa tonkhe tikhonti takhe letetsembekile. Ngayiphi indlela? Nasenta konkhe lokusemandleni kute silalele timiso taJehova, sitawuciniseka kutsi utasigcina setsembiso sakhe sekusibusisa.—Isa. 48:17, 18.

LINGISA KWETSEMBEKA KWAJEHOVA

7. Nguyiphi lenye indlela lesingakhombisa ngayo kwetsembeka kwaNkulunkulu?

⁷ Singakulingisa njani kwetsembeka kwaJehova? Lenye indlela lesingakulingisa ngayo kusita labo labasetimeni letilukhuni. (Taga 3:27) Nasi sibonelo: Ukhona yini lenikholwa naye lomatiko kutsi udvumatekile mhlawumbe ngenca yetinkinga temphilo, kuphikiswa ngemalunga emndeni nobe lonetinkinga takhe nje ekuphileni? Ungakhona yini kutsatsa sinyatselo umnikete ‘emavi lamnandzi ekumdvudvuta’? (Zak. 1:13)a Nawenta njalo, usuke ukhombisa kutsi wetsembekile futsi ungumngani weliciniso, ‘losondzela kakhulu kwengca banakenu bengati.’—Taga 18:24.

8. Singakulingisa njani kwetsembeka kwaJehova kulabo lesishade nabo?

⁸ Singaphindze silingise kwetsembeka kwaJehova ngekuhlala setsembekile kulabo lesibatsandzako. Sibonelo saloku kutsi nangabe sishadile, siyati kutsi kufanele setsembeke kulabo lesishade nabo. (Taga 5:15-18) Asenti naletincane tento letingasenta siphinge. (Mat. 5:28) Ngetulu kwaloko, siyakukhombisa kwetsembeka kulabo lesikholwa nabo ngekugwema inhlebo lelimatako nobe kunyundzela, silwele kungayisakati inkhulumo lengakhi singayilaleli ngisho nekuyilalela.—Taga 12:18.

9, 10. (a) Ngubani ngalokukhetsekile lesifuna kuhlale setsembekile kuye? (b) Yini lebangela kutsi kulalela imiyalo yaJehova kungabi lula ngaso sonkhe sikhatsi?

⁹ Ngetulu kwako konkhe, sifuna kuhlale setsembekile kuJehova. Sikwenta njani loko? Ngekwetama kubona tintfo ngendlela yena latibona ngayo—sitsandze lakutsandzako, sikwenyanye lakwenyanyako—bese sitiphatsa kahle. (Fundza Tihlabelelo 97:10.) Nasenta imicabango yetfu nendlela lesitiva ngayo ivumelane neyaJehova, litawukhula lizinga lekuhlonipha imiyalo yakhe.—Hla. 119:104.

¹⁰ Kuliciniso kutsi angeke kube lula ngaso sonkhe sikhatsi kulalela imiyalo yaJehova. Kungase kudzingeke silwe kamatima kute sihlale setsembekile. Sibonelo saloku kutsi lamanye emaKhristu langakashadi ayafisa kushada, kodvwa asengakamtfoli umlingani lokahle kubakhulekeli baJehova. (1 Khor. 7:39) Dzadze longakashadi angase abone kutsi bantfu lasebenta nabo bahlale betama kumfunela umuntfu langashada naye. Lodzadze kungenteka ulwisana nemuva wekuba nesitunge. Nobe kunjalo, utimisele kuhlala agcine bucotfo bakhe kuJehova. Asijabuli yini ngesibonelo lesihle kangaka sekwetsembeka? Asingabati kutsi Jehova utababusisa bonkhe labahlala betsembekile kuye ngisho nobe babhekene netimo letimatima.—Heb. 11:6.

JEHOVA UYATSETSELELA

11. Kusho kutsini kutsetselela?

¹¹ Lobunye bunguye baJehova lobuhamba embili, sifiso sakhe sekutsetselela. Kusho kutsini kutsetselela? Ecinisweni kufaka ekhatsi kutsetselela umuntfu lokonile nangabe kunesizatfu lesivakalako sekwenta njalo. Loko akusho kutsi kutsetselela umuntfu kusho kuvuna sento lesibi nobe kuphika kutsi sentekile. Kunaloko, usuke ukhetsa kwendlulisa intfukutselo. ImiBhalo isifundzisa kutsi Jehova “ulungele kutsetselela” labo labaphendvuka ngebucotfo.—Hla. 86:5.

12. (a) Jehova ukhombisa njani kutsi uyatsetselela? (b) Kusho kutsini ‘kwesulwa’ kwetono temuntfu?

¹² Jehova ukukhombisa njani kutsetselela? Jehova nakatsetselela, ukwenta loko “ngenkhululeko”; utsetselela ngalokuphelele futsi akhohlwe. (Isa. 55:7) Sati njani kutsi Jehova utsetselela ngalokuphelele? Cabanga ngaloko lesicinisekiswa ngako ku-Misebenti 3:19. (Fundza.) Umphostoli Phetro wancenga labo labebamlalele kutsi ‘baphendvuke, babuyele kuNkulunkulu.’ Nangabe soni siphendvuka ngebucotfo, siyatisola ngalokubi lesikwentile. Sisuke sitimisele kungasiphindzi leso sono. (2 Khor. 7:10, 11) Ngetulu kwaloko, kuphendvuka lokucotfo kwenta soni sigucuke ‘sibuyele kuNkulunkulu,’ siyekele kwenta lokubi futsi silwele kwenta lokujabulisa Nkulunkulu. Bowutawuba yini umphumela nangabe labo labebalalele Phetro bebatawukhombisa kuphendvuka lokunjalo lokucotfo? Phetro watsi ‘belitawesulwa licala letono tabo.’ Lenchazelo itsetfwe egameni lesiGriki lelisho “kwesula nobe kususa.” Ngako-ke, Jehova nakatsetselela tono tetfu, uyatesula, atitsetselele ngalokuphelele.—Heb. 10:22; 1 Joh. 1:7.

13. Emavi latsi ‘tono tabo ngingeke ngisaphindze ngitikhumbule’ asicinisekisa ngani?

¹³ Sati njani kutsi Jehova usitsetselela aphindze akhohlwe? Cabanga ngesiphrofetho saJeremiya lesimayelana nesivumelwane lesisha lesentiwa nemaKhristu lagcotjiwe, lesenta kutsi labo labanekukholwa emhlatjelweni wenhlawulo bakhone kutsetselelwa. (Fundza Jeremiya 31:34.) Jehova utsi: “Ngobe ngiyawubatsetselela bubi babo, tono tabo ngingasaphindzi ngitikhumbule.” Ngako-ke, Jehova uyasicinisekisa kutsi nakatsetselela angeke esikhatsini lesitako asijezise ngenca yetono lesatenta. Akasikhumbuti tono lesitentile kute nje asisole nobe asijezise. Esikhundleni saloko, Jehova uyatitsetselela leto tono, angaphindzi atikhumbule.—Rom. 4:7, 8.

14. Singayitfola njani indvudvuto nasizindla ngekutsetselela kwaJehova? Niketa sibonelo.

¹⁴ Singatfola indvudvuto ngekuzindla ngekutsetselela kwaJehova. Cabanga nganasi sibonelo: Eminyakeni leminyenti leyendlulile, dzadze lesitambita ngekutsi ngu-Elaine, wayekeliswa kuba nguFakazi. Ngemuva kweminyaka letsite, wabuyiselwa. Elaine uyavuma: “Nanobe ngangititjela mine nalabanye kutsi ngikholelwa kutsi Jehova ungitsetselele, ngangihlale ngiva shengatsi ukhashane kimi nekutsi usedvute kulabanye futsi ubakhatsalela kancono kunami.” Nobe kunjalo, Elaine wadvudvutwa kufundza nekuzindla ngemifanekiso leseBhayibhelini lechaza kutsetselela kwaJehova. Elaine uchubeka atsi: “Ngaluva lutsandvo lwaJehova nekunginakekela langibonisa kona ngendlela lengingakaze ngayibona.” Ngalokukhetsekile wakhutsatwa ngulamavi latsi: “Jehova nakatsetselela tono tetfu, akudzingeki sitive shengatsi sisenaleso sono kuphila kwetfu konkhe.”b Elaine utsi: “Ngabona kutsi bengingakholwa kutsi Jehova angangitsetselela futsi bengicabanga kutsi ngitawetfwala leso sono konkhe kuphila kwami. Ngiyati kutsi kutawutsatsa sikhatsi, kodvwa sengiyacala kutiva ngisondzela kuJehova futsi ngiva shengatsi kususwe umtfwalo losindzako kimi.” Kuyacaca kutsi sikhonta Nkulunkulu lonelutsandvo nalotsetselelako.—Hla. 103:9.

LINGISA KUTSETSELELA KWAJEHOVA

15. Singakulingisa njani kutsetselela kwaJehova?

¹⁵ Singakulingisa kutsetselela kwaJehova ngekukhetsa kutsetselelana nakufanele. (Fundza Lukha 17:3, 4.) Khumbula kutsi Jehova nakatsetselela, uyatikhohlwa tono tetfu ngemcondvo wekutsi akasibambeli emagcubu. Nasitsetselela labanye, natsi singakhohlwa ngekutsi singasacabangi ngako futsi singaphindzi sikhulume ngako esikhatsini lesitako.

16. (a) Kutsetselela kusho kuvuna sento lesibi nobe kuvumela labanye badlale ngatsi yini? Chaza. (b) Kute sitsetselelwe nguNkulunkulu, kufanele senteni?

¹⁶ Kuba ngulotsetselelako akusho kuvuna sento lesibi nobe kuvumela labanye badlale ngatsi. Kutsetselela kusho kwendlulisa intfukutselo. Ngako-ke, kubalulekile kutsi silingise kutsetselela kwaJehova lapho sisebentelana nalabanye kute Nkulunkulu asitsetselele. (Mat. 6:14, 15) Luvelo lwenta Jehova akhumbule kutsi “silutfuli.” (Hla. 103:14) Kuliciniso-ke kutsi luvelo kufanele lusente sikhumbule kutsi labanye bayawenta emaphutsa, sikwati kubatsetselela ngekukhululeka.—Ef. 4:32; Khol. 3:13.

17. Yini lengasisita nangabe siphetfwe kabi ngulesikholwa naye?

¹⁷ Ecinisweni, akulula ngaso sonkhe sikhatsi kutsetselela. Ngisho nalamanye emaKhristu lagcotjiwe ekhulwini lekucala akutfola kumatima kucatulula kungevani kwawo. (Fil. 4:2) Nangabe siphetfwe kabi ngulesikholwa naye, yini lengasisita? Cabanga ngaJobe. Waphatseka kabuhlungu ngesikhatsi “bangani” bakhe, bo-Elifazi, Bildadi naSofari bammangalela ngemanga. (Jobe 10:1; 19:2) Ekugcineni, Jehova wabekhuta labamangaleli bemanga. Nkulunkulu wabatjela kutsi baye kuJobe bente umhlatjelo wetono tabo. (Jobe 42:7-9) Kodvwa Jehova watjela Jobe kutsi naye ente lokutsite. Bekuyini loko? Jehova watsi akabathantazele labamangaleli bemanga. Jobe wenta njengobe Jehova abemtjelile, futsi Jehova wambusisa ngekuba nemoya wekutsetselela. (Fundza Jobe 42:10, 12, 16, 17.) Yini lesiyifundzako? Kumthantazela ngebucotfo lotsite losiphetse kabi kungasisita siyendlulise intfukutselo.

CHUBEKA UJABULELA BUNGUYE BAJEHOVA NGALOKUGCWELE

18, 19. Singachubeka njani sikujulisa kubonga kwetfu ngebunguye baJehova?

¹⁸ Ngalokucinisekile sicabulekile ngekucabangela tincenye letehlukene tebunguye baJehova. Sesibonile kutsi uyangeneka, akakhetsi, uyephana, uyacabangela, wetsembekile futsi uyatsetselela. Kuliciniso kutsi simane sacoca ngaletimbalwa. Singaba nenjabulo yekufundza lokwengetiwe ngaJehova kute kube phakadze. (Shu. 3:11) Siyavumelana nemphostoli Pawula lowabhala watsi: “Maye, kujula kwemcebo, nekwenhlakanipho, nekwelwati lwaNkulunkulu”—singakhohlwa lutsandvo naletincenye tebunguye baNkulunkulu letisitfupha lesicoce ngato.—Rom. 11:33.

¹⁹ Shengatsi singachubeka sijulisa kubonga kwetfu ngebunguye baJehova. Singakwenta loku ngekubati kahle bunguye bakhe, sizindle ngabo bese siyabulingisa ekuphileni kwetfu. (Ef. 5:1) Nasenta njalo, sitawuvumelana nemhlabeli lowahlabela watsi: “Kodvwa mine kungilungele kusondzela kuNkulunkulu.”—Hla. 73:28.