Ungasandzisa Yini Sikhatsi Sakho Kute Wecwayise Labanye?

Ekucaleni kwabo-1900 bantfu bajabulela kubukela lifilimu lelinesihloko lesitsi A Trip Down Market Street. Lelifilimu belikhombisa kuphila kwakadzeni kwase-San Francisco, eMelika. Bakhi balelifilimu bafaka ikhamera ngembili emotweni lencane lehamba ngetintsambo tagesi emoyeni futsi bashutha ngayo titaladi takhona letiphitsitelako. Lelifilimu laveta emahhashi ladvonsa tinkalishi, timoto tangaleso sikhatsi kanye nebantfu lebebatsenga nebatsengisi bemaphephandzaba.

Lokwenta kuvise buhlungu kakhulu kubukela lelifilimu lamuhla, kutsi latsetjulwa cishe nga-April 1906 ngaphambi nje kwekutsi kube nekutamatama kwemhlaba nemlilo lokwabulala tinkhulungwane tebantfu nga-April 18 futsi kwamosha incenye yalelidolobha. Labanye bantfu labakulelifilimu kungenteka kutsi bebasalelwe ngemalanga lambalwa nje ekuphila. Scott Miles lositukulwane sebakhi bemafilimu, utsi: “Ngibona bantfu kulendzawo futsi abati kutsi yini letabehlela. Ngeke ukhone kubasita kodvwa uyabavela.”

Nasicatsanisa lokwenteka ngaleso sikhatsi nalokwenteka lamuhla, loko kusenta sicabangisise. Natsi siyabavela bomakhelwane betfu. Bamatasatasa ekuphileni futsi abati kutsi kunenhlekelele letawugadla masinyane, lokukubhujiswa kwalelive kanye nendlela yalo yekuphila. Lenhlekelele ayifanani nekutamatama kwemhlaba lokungatiwa kodvwa kusenelitfuba lelisele lekwecwayisa bomakhelwane betfu ngelilanga laJehova lekwehlulela. Kungenteka kutsi njalo ngeliviki uhlela sikhatsi sekutsi ushumayele emtini ngemuti, kodvwa ungasandzisa yini leso sikhatsi kute wecwayise labanye?

JESU ABEHLALE ANESIFISO FUTSI AKULUNGELE KUSHUMAYELA

Sibonelo saJesu siyaphawuleka kulendzaba ngobe abehlale anesifiso futsi akulungele kushumayela. Washumayela kubo bonkhe bantfu, lokufaka ekhatsi umtselisi lahlangana naye emgwacweni kanye nemfati lowamkhandza emtfonjeni aphumulile emini. (Luk. 19:1-5; Joh. 4:5-10, 21-24) Ngisho nangesikhatsi sakhe sekuphumula, Jesu ngekutitsandzela bekayekela lakwentako kute afundzise labanye bantfu. Luvelo ngabomakhelwane bakhe lwamenta kutsi afakaze kubo ngekutimisela. (Mak. 6:30-34) Kutimisela kwaJesu kushumayela ngemuva wekuphutfuma bakulingisa njani labanye lamuhla?

BAWASEBENTISA ONKHE EMATFUBA

Melika uhlala kulelinye libhilidi lelivikeleke kakhulu. Bomakhelwane bakhe labanyenti basuka kulamanye emave futsi bafundza sikolwa, kantsi netinombolo tetincingo tabo atikho ebhukwini letinombolo telucingo lelilenga ekungeneni kwalelibhilidi. Uyalijabulela litfuba lanalo lelikhetsekile lekucoca ngetindzaba teliBhayibheli nalacashe nabo labatfola ekungeneni kwalelibhilidi nalabatfola ekheshini. Utsi: “Ngandlela tsite ngingatsi lena yinsimu yami.” Melika uphatsa tincwadzi ngetilwimi letehlukahlukene futsi labanyenti bayawatsatsa emapheshana kanye nabomagazini. Uphindze abatjele nge-Web site yetfu letsi-jw.org. Ngaleyondlela ucalise tifundvo teliBhayibheli letinyenti.

Sonia uhlale akulungele kufakaza kunome ngubani langakhona kufakaza kuye. Usebenta emtfolamphilo lonadokotela futsi utibekele umgomo wekwetfula bufakazi lobuphelele kubo bonkhe lasebenta nabo. Wacale watinika sikhatsi sekwati tidzingo temuntfu ngamunye kanye naloko lakutsandzako. Ngemuva kwaloko, wasebentisa sikhatsi sakhe sekudla kute acoce nalotsite kubo ngeliBhayibheli. Ngekwenta njalo, Sonia ucalise tifundvo teliBhayibheli letimbili. Uhlela nekutsi ngaletinye tikhatsi telikhefu acoce nalabalindze kuyewubona dokotela kulomtfolamphilo.

WASEBENTISE EMATFUBA LOWATFOLAKO

Lomunye lowasindza nga-1906 ekutamatameni kwemhlaba, wakubita ngekutsi “yinhlekelele lenkhulu kunato tonkhe leyehlela lelidolobha.” Nome kunjalo, ngekushesha tonkhe tinhlekelele titawuba lite naticatsaniswa nenhlekelele lenkhulu letako yelilanga lemphindziselo letawehlela bonkhe “labo labangamati Nkulunkulu.” (2 Thes. 1:8) Kusifiso saJehova lesikhulu kutsi bantfu bashintje futsi batsatse sinyatselo nabatfola umlayeto losecwayiso lomenyetelwa boFakazi bakhe.—2 Phet. 3:9; Semb. 14:6, 7.

Unelilungelo lekuvula bantfu emehlo kuletikhatsi letimatima nekubasita kutsi bayekele kunaka tintfo tabo kute bafune Jehova. (Zef. 2:2, 3) Ungawasebentisa yini onkhe ematfuba lowatfolako kute ufakaze kulosebenta nabo kubomakhelwane bakho nakulabo lobabona onkhe emalanga? Utasengeta yini sikhatsi sakho kute wecwayise labanye?