IMIBUTO YELIBHAYIBHELI IYAPHENDVULWA

LiBhayibheli liliVi laNkulunkulu sibili yini?

LiBhayibheli lehlukile kuletinye tincwadzi, futsi nguloko lobewungakulindzela ngeliVi laNkulunkulu. Kushicilelwe tigidzigidzi temaBhayibheli ngetilwimi letinyenti kakhulu. Kuhlakanipha lokutfolakala eBhayibhelini kunemandla ekushintja bantfu, kubente baphile imphilo lencono.—Fundza 1 Thesalonika 2:13; 2 Thimothi 3:16.

LiBhayibheli lishaya emhlolweni nalisetjela ngaloko lokutakwenteka esikhatsini lesitako, ngenca yaloko siyaciniseka kutsi livela kuNkulunkulu. Kute umuntfu longenta loko ngekuhlakanipha kwakhe. Ase ucabange nje ngembhalo wa-Isaya. Ikhophi yawo leyentiwa eminyakeni lengetulu kwelikhulu ngaphambi kwekutalwa kwaJesu, yatfolakala emgedzeni eceleni kweLwandle Lolufile. Lombhalo utsi iBhabhulona yayitawuba tindzala. Loko kwagcwaliseka kwekucala eminyakeni leminyenti ngemuva kwekuba khona kwaJesu emhlabeni.—Fundza Isaya 13:19, 20; 2 Phetro 1:20, 21.

Labhalwa kanjani liBhayibheli?

Kubhalwa kweliBhayibheli kwatsatsa cishe iminyaka lengetulu kwalengu-1 600. Loko lokwabhalwa babhali beliBhayibheli labacishe babe ngu-40, kunemcondvo munye loyinhloko futsi akuphikisani. Kungani kuvumelana? Kungobe lababhali bebacondziswa nguNkulunkulu.—Fundza 2 Samuweli 23:2.

Ngaletinye tikhatsi Nkulunkulu abekhuluma nebabhali beliBhayibheli asebentisa tingilosi, imibono, noma emaphupho. Nkulunkulu abevame kufaka imicondvo yakhe engcondvweni yembhali bese uyamvumela kutsi akhetse emagama langawasebentisa kute endlulisele umlayeto waNkulunkulu.—Fundza Sembulo 1:1; 21:3-5.