IMIBUTO YELIBHAYIBHELI IYAPHENDVULWA
Singalitfolaphi liciniso ngaNkulunkulu?
Yini leyenta kutsi Nkulunkulu afune silati liciniso? Fundza Johane 17:3
Kadzeni Nkulunkulu abekhuluma nebantfu. Wasebentisa umoya longcwele kute afake imicabango yakhe etingcondvweni tebabhali beliBhayibheli. (2 Phetro 1:20, 21) Ngako-ke liciniso ngaNkulunkulu singalati kuphela nasifundza liBhayibheli.—Fundza Johane 17:17; 2 Thimothi 3:16.
EBhayibhelini, Nkulunkulu usitjela tintfo letinyenti ngaye. Uyasitjela kutsi wasidalelani nekutsi utasentelani, uphindze asitjele nekutsi siphile kanjani. (Imisebenti 17:24-27) Jehova Nkulunkulu ufuna silati liciniso ngaye.—Fundza 1 Thimothi 2:3, 4.
Yini leyenta kutsi Nkulunkulu abatsandze bantfu labatsandza liciniso?
Jehova unguNkulunkulu weliciniso ngiko atfumela Jesu, iNdvodzana yakhe, kutsi itofundzisa bantfu liciniso. Ngako-ke bantfu labatsandza liciniso babonakala ngekutsi batsandze Jesu. (Johane 18:37) Nkulunkulu ufuna kukhontwa bantfu labanjalo.—Fundza Johane 4:23, 24.
Sathane Develi uvimbele bantfu labanyenti kutsi bakhonte Jehova ngekukhuluma kabi ngaNkulunkulu. (2 Khorinte 4:3, 4) Bantfu labangalitsandzi liciniso bayatitsandza timfundziso taSathane. (Roma 1:25) Tigidzi tebantfu tilitfolile liciniso ngaNkulunkulu ngekuhlolisisa lokushiwo liBhayibheli.—Fundza Imisebenti 17:11.