2 Lisisita Sicatulule Tinkinga

KUKHATSATEKA KAKHULU

Rosie utsi, “Ngangikhatsateka kakhulu ngekutsi ngente tinkinga letincane tibe tinkhulu nobe ngicabange ngetintfo lebetingekho.” Ngumaphi emavesi eliBhayibheli lamsita? Lomunye umBhalo lowamsita ngu-Matewu 6:34, lotsi: “Ningacali nikhatsateke ngelilanga lelilandzelako, ngobe nalo litawuba netinkinga talo. Nakani tinkinga talamuhla kuphela.” Nyalo Rosie utsi lamavi aJesu amsita kutsi ayekele kukhatsateka ngaloko bekungahle kwenteke elangeni lelilandzelako. Uphindze utsi, “Bengivele nginetinkinga letenele, ngako bekute sidzingo sekwengeta letinye tinkinga lebetingakenteki nalebekungenteka tigcine tingakenteki.”

Yasmine naye wativa akhatsateke kakhulu. Utsi, “Njalo ngeliviki bengikhala emalanga latsite futsi ngize ngingakhoni nekulala ebusuku. Imicabango lemibi beyingincisha kuthula kwengcongvo.” Ngumuphi umBhalo lowamsita? Wasitwa ngu-1 Phetro 5:7, lotsi: “Phonsani konkhe kukhatsateka kwenu [kuNkulunkulu], ngobe uyanikhatsalela.” Yasmine utsi: “Njengobe sikhatsi sichubeka bengihlala ngithantaza kuJehova futsi wayiphendvula imithantazo yami. Ngativa ngetfulwe umtfwalo lomkhulu emahlombe ami. Imicabango yami lemibi ihle ibuya ngaletinye tikhatsi, kodvwa nyalo sengiyakhona kumelana nayo.”

KUHLEHLISA TINTFO

Lomunye wesifazane losemusha, longu-Isabella, utsi: “Ngicabanga kutsi kuhlehlisa tintfo kulufuto ngobe nababe unjalo nje. Ngiyayekela kwenta tintfo letibalulekile ngenca yekutsi ngifuna kuhlala ngingenti lutfo nobe ngibukele i-TV. Lesi sento lesibi ngobe sibangela kukhatsateka futsi sente umuntfu avilaphe.” Simiso lesamsita siku-2 Thimothi 2:15, lesitsi: “Yenta konkhe lokusemandleni akho kutsi utivete wemukeleka kuNkulunkulu, usisebenti lesite emahloni ngalutfo.” Isabella utsi, “Bengingafuni kutsi Jehova abe nemahloni ngemsebenti wami ngenca nje yekutsi ngihlehlisela tintfo embili.” Nyalo sewenta tintfo ngesikhatsi.

Ngendlela lefanako, Kelsey utsi: “Bengivamise kutsi nanginemsebenti lotsite, ngiwubeke eceleni ngize ngiwente ngalesinye sikhatsi, nakhona sekwephutile. Bengivamise kukhala, ngingakhoni nekulala futsi ngihlale ngikhatsatekile. Loku bekungangijabulisi.” Kelsey wasitwa Taga 13:16, letitsi: “Bonkhe bantfu labacotfo benta tintfo ngelwati; kodvwa silima sibubeka ebaleni bulima baso.” Kuzindla ngalombhalo kwamenta washo nakha emavi latsi: “Kukuhlakanipha kutsatsa sinyatselo ngekushesha futsi uhlele kusengaphambili kutsi utawuwenta njani umsebenti lotsite. Nyalo senginelibhuku lami lengibhala kulo imisebenti lokufanele ngiyente, futsi loku kungisita kutsi ngihleleke, ngingameli kutsi ngize ngente tintfo sekute sikhatsi.”

KUBA NESITUNGE

Kirsten utsi, “Indvodza yami yalishiya likhaya letfu, yangishiya nebantfwana labancane labane.” Ngusiphi simiso lesiseBhayibhelini lesamsita? Taga 17:17, titsi: “Umngani unelutsandvo ngaso sonkhe sikhatsi; kantsi umnakenu utalelwe kutsi netfwalisane naye tinhlupheko.” Kirsten wakha bungani nalabanye labakhonta Jehova njengaye. Waba yini umphumela? Utsi: “Bangani bami bangisekela ngetindlela letinyenti! Labanye bebangibekela tintfo lengitidzingako kanye netimbali emnyango wami. Tikhatsi letintsatfu licembu lebazalwane langisita kanye nebantfwana bami kutsi sitfutsele kuletinye tindlu. Lomunye nje waze wangisita kutsi ngitfole umsebenti. Bangani bami bebahlala bangisekela.”

Delphine, lesikhulume ngaye ekucaleni, naye bekahlushwa situnge. Ngemuva kwekulahlekelwa ngiko konkhe labenako, utsi: “Ngeva ngatsi bonkhe bantfu bayangibona kutsi ngihlupheke kanganani. Nangibona labanye baphila kahle nemindeni yabo, bengitiva nginesitunge lesikhulu.” Wasitwa ngumbhalo we-Tihlabelelo 68:6, lotsi: “Nkulunkulu upha imihambima emakhaya lapho ingahlala khona.” Utsi: “Bengati kutsi lelivesi belingasho likhaya mbamba. Kunaloko, ngacondza kutsi Nkulunkulu usenta sijabulele budlelwane lobuhle nebazalwane betfu kanye nabodzadzewetfu, lokuyindzawo lephephe sibili lokwenta sakhe bungani nebantfu labatsandza Jehova. Kodvwa bengati kutsi kufanele ngisondzelane naJehova kucala ngaphambi kwekutsi ngakhe bungani nalabanye. Ngako Tihlabelelo 37:4 tangisita natitsi: ‘Yenta Simakadze abe yinjabulo yakho, yena-ke utakupha lokufiswa yinhlitiyo yakho.’”

Delphine uphetsa ngekutsi: “Ngabona kutsi bekunesidzingo sekutsi ngisondzelane kakhulu naJehova. Ungumngani lokahle kakhulu. Ngako ngenta luhla lwetintfo lebengingatijabulela nalabanye, kute ngakhe bungani nebantfu labatsandza Jehova. Ngafundza kunaka lokuhle kulabanye futsi ngingawanaki emaphutsa abo.”

Liciniso, bangani labakhonta Nkulunkulu babantfu labanesono. BoFakazi BaJehova nabo bahlangabetana netinkinga njengawo wonkhe umuntfu. Kodvwa liBhayibheli likhutsata bantfu kutsi basite labanye nobe nini nabakhona. Kukuhlakanipha kwakha bungani nebantfu labanjalo. Nobe kunjalo, timiso teliBhayibheli tingasisita yini ekucatululeni tinkinga lesihlangabetana nato onkhe malanga, njengekugula lokungapheli kanye nekufelwa?