Sekusedvute Kutsi Nkulunkulu Acedze Konkhe Kuhlupheka

“Awu, Simakadze, kuyawudzimate kube ngunini solo ngikhala ngicela lusito, kodvwa wena solomane ungalaleli?” (Habakhuki 1:2, 3) Lawa ngemavi lashiwo nguHabakhuki, indvodza lebeyilungile futsi yemukeleka kuNkulunkulu. Lesicelo sakhe besisho kutsi ute yini kukholwa? Cha. Nkulunkulu wacinisekisa Habakhuki kutsi umise sikhatsi lapho atawucedza kuhlupheka.​—Habakhuki 2:2, 3.

Nangabe wena nesihlobo sakho nihlupheka, kulula kuphetsa ngekutsi Nkulunkulu uyephuta kunisita. Kodwa liBhayibheli liyasicinisekisa: “Jehova akephuti macondzana nesetsembiso sakhe njengobe labanye bacabanga kanjalo, kodvwa uyanibeketelela ngobe akafisi kutsi kubhubhe ngisho namunye, kepha ufisa kutsi bonkhe bantfu baphendvuke.”​—2 Phetro 3:9.

UTAKUCEDZA NINI?

Ngekushesha lokukhulu! Jesu waveta kutsi situkulwane lesitsite besitawubona tintfo letingakavami lebetitawuba sibonakaliso semalanga ekugcina “nesekuphela kwalelive.” (Matewu 24:3-42) Kufezeka kwalesiphrofetho saJesu lamuhla kuveta kutsi ngekushesha Nkulunkulu utawubakhulula bantfu ekuhluphekeni.a

Kodvwa Nkulunkulu utakucedza njani kuhlupheka? Ngesikhatsi Jesu alapha emhlabeni, wakhombisa kutsi Nkulunkulu unemandla ekucedza kuhlupheka kwebantfu. Cabanga nganati tibonelo saloku.

Tehlakalo temvelo: Ngesikhatsi Jesu nebafundzi bakhe bahamba ngesikebhe eLwandle lwaseGalile, kwaba nemoya lomkhulu lowenta lesikebhe sabo sacala kugcwala emanti. Kodvwa Jesu wakhombisa kutsi yena naBabe wakhe bayakhona kulawula emandla emvelo. (Kholose 1:15, 16) Jesu wavele watsi: “Thula utsi nya!” Kwase kwentekani? “Lomoya wabindza, kwase kuba nekuthula lokukhulu.”​—Makho 4:35-39.

Kugula: Jesu bekanemandla ekwelapha timphumphutse, tinchute, labanesifo sekuwa, labanebulephelo nalokunye kugula lobekuphetse bantfu. “Welapha bonkhe lebebagula.”​—Matewu 4:23, 24; 8:16; 11:2-5.

Indlala: Jesu wasebentisa emandla lebekawanikwe nguBabe wakhe kute andzise kudla lebekukuncane. LiBhayibheli litsi ngesikhatsi alapha emhlabeni, wondla tinkhulungwane tebantfu, kabili.​—Matewu 14:14-21; 15:32-38.

Kufa: LiBhayibheli likhuluma ngebantfu labatsatfu labavuswa nguJesu, lokusenta siciniseke kutsi Jehova unemandla ekucedza kufa. Lomunye wabo lowavuswa besekanemalanga lamane afile.​—Makho 5:35-42; Lukha 7:11-16; Johane 11:3-44.