Indlela Yekusita Bantfu Labacindzetelekile

1. Singamlingisa njani Babe wetfu Jehova lositsandzako?

JEHOVA usitsandza kakhulu. (Joh. 3:16) Natsi sifuna kulingisa Babe wetfu lositsandzako. Ngako-ke setama ‘kuvelana, kutsandzana njengebazalwane, nekuba nesihawu’ kubo bonkhe, ikakhulukati labo “labahlobene natsi ekukholweni.” (1 Phet. 3:8; Gal. 6:10) Siyafuna kusita bazalwane nabodzadzewetfu labacindzetelekile.

2. Sitawucoca ngani kulesihloko?

² Bonkhe labafuna kuba yincenye yemndeni waJehova batawuhlangabetana netimo leticindzetelako. (Mak. 10:29, 30) Njengobe kuphela kwalelive kusondzela, kungahle kudzingeke sibeketelele tinkinga letinyenti. Singasitana njani? Ase sicoce ngalesingakufundza esibonelweni saLoti, saJobe kanye nesaNawomi. Sitawuphindze sicoce ngetinkinga bazalwane nabodzadzewetfu labahlangabetana nato lamuhla nekutsi singabasita njani bakhone kutibeketelela.

BANI NESINEKE

3. Ngusiphi sincumo lesibi Loti lasenta lesifundza ngaso ku-2 Phetro 2:7, 8, futsi waba yini umphumela?

³ Loti wenta sincumo lesibi ngesikhatsi akhetsa kuhlala nebantfu baseSodoma lebebatiphatsa kabi kakhulu. (Fundza 2 Phetro 2:7, 8) Lendzawo beyiyinhle kakhulu, kodvwa Loti wabhekena netinkinga letinyenti njengobe besekahlala khona. (Gen. 13:8-13; 14:12) Kungenteka umkaLoti wabese ulitsandza kakhulu lelidolobha nome labanye bantfu lebebahlala khona lokwamenta wagcina sekangasamlaleli Jehova. Wafa ngesikhatsi Nkulunkulu aletsa umlilo nesibabule eSodoma. Cabanga ngemadvodzakati akhe lamabili. Lamadvodzakati akhe beketsembisene umshado nemadvodza lafa nakubhujiswa iSodoma. Likhaya laLoti labhujiswa kanye netimphahla takhe futsi lokubuhlungu kakhulu kutsi nemkakhe wafa. (Gen. 19:12-14, 17, 26) Jehova wambeketelela yini Loti kulesikhatsi lesimatima? Yebo.

4. Jehova wakhombisa njani kutsi bekambeketelela Loti? (Buka sitfombe lesisekhasini lekucala.)

⁴ Nanobe Loti akhetsa kuhlala eSodoma, Jehova wamhawukela ngekutsi atfumele tingilosi kutsi tisindzise yena nemndeni wakhe. Nobe kunjalo, kunekutsi ngekushesha alalele tingilosi natimtjela kutsi aphume eSodoma, Loti “wabina.” Tingilosi kwadzingeka kutsi tibabambe ngesandla tibasite babaleke kulelidolobha. (Gen. 19:15, 16) Tingilosi tabese tibatjela kutsi babalekele etintsabeni. Esikhundleni sekutsi balalele Nkulunkulu, Loti wacela kuya edolobheni lelisedvute. (Gen. 19:17-20) Jehova wamlalela ngesineke Loti futsi wamvumela kutsi aye kulo. Ngekuhamba kwesikhatsi Loti wabese uyesaba kulelidolobha, wabese uya etintsabeni lapho Jehova bekavele amtjele kutsi aye khona ekucaleni. (Gen. 19:30) Jehova wakhombisa kutsi bekambeketelela kakhulu Loti. Singamlingisa njani?

5-6. Njengobe silingisa Nkulunkulu, singasisebentisa njani seluleko lesiku-1 Thesalonika 5:14?

⁵ NjengaLoti, lomunye umzalwane angenta tincumo letimbi bese timbangela tinkinga. Nakwenteka loko, yini lesitawuyenta? Kungenteka sititfole simtjela kutsi uvuna loko lakutjalile futsi siyobe sicinisile. (Gal. 6:7) Nanobe kunjalo, kukhona lokuncono lesingakusho. Singamsita ngendlela Jehova lasita ngayo Loti. Kanjani?

⁶ Jehova watfumela tingilosi kutsi tecwayise Loti tiphindze timsite abalekele inhlekelele lebeyitawufika eSodoma. Natsi kungadzingeka simecwayise futsi simsite umzalwane wetfu nangabe sibona kutsi wenta intfo letamfaka enkingeni. Ngisho nobe angasisebentisi ngekushesha seluleko lesivela eBhayibhelini laniketwa sona, kufanele simbeketelele silingise letingilosi letimbili. Kunekutsi simyekele, kufanele sichubeke simsita ngemavi nangetento. (1 Joh. 3:18) Kungenteka kudzingeke simsite kutsi asebentise seluleko laniketwe sona kube ngatsi simbambe ngesandla.—Fundza 1 Thesalonika 5:14.

7. Singamlingisa njani Jehova endleleni labeketelela ngayo Loti?

⁷ Jehova akazange anake emaphutsa aLoti, kunaloko waphefumulela umphostoli Phetro kutsi abhale kutsi Loti bekayindvodza lebeyilungile. Sijabula kakhulu ngekutsi Jehova uyasicolela emaphutsa etfu. (Hla. 130:3) Singamlingisa yini Jehova sibeketelele labanye njengobe enta kuLoti? Nangabe sibuka lokuhle kubazalwane betfu nabodzadze, sitawukhona kubabeketelela kakhudlwana futsi loko kutakwenta kube melula ngabo kwemukela lusito lesibaniketa lona.

BANI NELUVELO

8. Yini lesitawuyenta nangabe sinesihawu?

⁸ Ngalokwehlukile kuLoti, Jobe akazange abhekane netinkinga ngenca yekwenta tincumo letimbi. Waba netinkinga letimatima, walahlekelwa timphahla takhe, lidvumela lakhe endzaweni yakubo, futsi wagula kakhulu. Lokubuhlungu nakakhulu kutsi yena nemkakhe bashonelwa bantfwana. Bangani bakhe labatsatfu bamsola. Ngusiphi sizatfu lesenta badvudvuti bemanga baJobe labatsatfu bangamhawukeli? Bebangasati simo Jobe labebhekene naso. Ngako bafika esiphetfweni lesingasiso futsi bamehlulela kabi. Yini lesingayenta kute singalenti liphutsa labalenta? Khumbula kutsi nguJehova kuphela lowati onkhe emaciniso ngesimo umuntfu labhekene naso. Mlalelisise umuntfu locindzetelekile nakakhuluma. Kunekumane nje ulalele loko lakushoko, yetama kutifaka eticatfulweni takhe. Nguloko kuphela lokutakusita ukhone kumkhombisa indlela lomkhatsalela ngayo umzalwane wakho.

9. Yini lesingeke siyente nangabe sinesihawu, futsi leni?

⁹ Nangabe sinesihawu, ngeke sikhulume kabi ngetinkinga labanye bantfu lababhekene nato. Umuntfu lohlebako akalakhi libandla kodvwa uyalibhidlita. (Taga 20:19; Rom. 14:19) Ute umusa, akacabangelani futsi emavi akhe angamlimata umuntfu locindzetelekile. (Taga 12:18; Ef. 4:31, 32) Kuhle kakhulu kutsi sibuke lokuhle kumuntfu bese sicabanga ngekutsi yini lesingayenta kute simsite akhone kubhekana neluvivinyo.

10. Asifundzisani emavi lakuJobe 6:2, 3?

¹⁰ Fundza Jobe 6:2, 3. Ngaletinye tikhatsi Jobe bekakhuluma ‘emavi lashubile.’ Nobe kunjalo, ngekuhamba kwesikhatsi wavuma kutsi tintfo labekatikhulumile betikabi. (Jobe 42:6) NjengaJobe umuntfu locindzetelekile lamuhla angahle akhulume tintfo letikabi futsi latatisola ngato. Yini lokufanele siyente? Esikhundleni sekutsi simsole kufanele simhawukele. Kufanele sikhumbule kutsi Jehova akafuni ngisho namunye abhekane netinkinga lamuhla futsi acindzeteleke. Ngako siyacondza nangabe inceku yaJehova lecindzeteleke kakhulu ikhuluma ingakacabangi. Ngako ngisho nobe ikhuluma tintfo letikabi ngaJehova nobe ngatsi angeke sitfukutsele nome siyehlulele ngaloko lekushito.—Taga 19:11.

11. Labadzala bangamlingisa njani Elihu nabeluleka labanye?

¹¹ Ngaletinye tikhatsi umuntfu locindzetelekile angase adzinge seluleko nobe siyalo. (Gal. 6:1) Labadzala belibandla bangameluleka njani? Kufanele balingise Elihu lowalalela Jobe ngesineke. (Jobe 33:6, 7) Elihu weluleka Jobe ngemuva kwekutsi ayicondze kahle indlela Jobe labecabanga ngayo. Labadzala labalingisa sibonelo sa-Elihu batamlalela ngesineke umuntfu nakakhuluma futsi betame kutifaka eticatfulweni takhe. Nabenta njalo, manyenti ematfuba ekutsi batsintse inhlitiyo yemuntfu labamelulekako.

KHULUMA NGENDLELA LEDVUDVUTAKO

12. Waba yini umphumela wekushona kwemyeni waNawomi kanye nemadvodzana akhe lamabili?

¹² Nawomi bekangumfati lowetsembekile futsi bekamtsandza Jehova. Kodvwa ngemuva kwekushona kwemyeni wakhe kanye nemadvodzana akhe lamabili besekafuna kubitwa ngekutsi ‘nguMara,’ lokusho ‘buhlungu.’ (Rut. 1:3, 5, 20) Ruthe makoti waNawomi waba naye kuletikhatsi letimatima lebekabhekene nato. Ruthe akazange agcine nje ngekusita Nawomi ngetintfo labetidzinga kodvwa waphindze wamdvudvuta. Ruthe wakhombisa kutsi umtsandza kakhulu Nawomi futsi wakhombisa ngemavi nangetento kutsi uyamsekela. —Rut. 1:16, 17.

13. Kungani kufanele sibasekele bantfu labashonelwe ngulabashade nabo?

¹³ Nangabe umzalwane wetfu nobe dzadze ashonelwa ngulashade naye usuke akudzinga mbamba kusekelwa. Bantfu labashadile bafanana netihlahla letimbili letikhula tisondzelene kakhulu. Njengobe iminyaka ihamba letimphandze talesihlahla tiyahlangana. Nangabe sihlahla sinye sisishulwa nome sifa, lesi lesinye siphazamiseka kakhulu. Ngendlela lefanako, nangabe umuntfu ashonelwa ngulashade naye angahle eve buhlungu iminyaka leminyenti. Paulab lowashonelwa ngumyeni wakhe angakalindzeli utsi: “Imphilo yami yashintja ngalokuphelele futsi ngaphelelwa ngemandla. Ngalahlekelwa ngumngani wami lomkhulu. Mine nemyeni wami besicoca ngato tonkhe tintfo. Bekajabula nangijabulile futsi angisekela nangibhekene netimo letimatima. Bekangilalela ngesineke nangimtjela ngetinkinga tami. Ngeva buhlungu kakhulu ngekulahlekelwa ngumyeni wami.”

14-15. Singamdvudvuta njani umuntfu loshonelwe ngulashade naye?

¹⁴ Singamdvudvuta njani umuntfu loshonelwe ngulashade naye? Intfo yekucala lebalulekile kutsi sikhulume naye ngisho nome singakhululeki futsi singaciniseki kutsi sitawutsini. Paula lesike sakhuluma ngaye utsi: “Ngiyacondza kutsi kufa kwenta bantfu bangakhululeki. Besaba kutsi bangahle basho intfo letawubakhuba labanye. Kodvwa simo siba sibi kakhulu nangabe bantfu bangakhulumi lutfo.” Kungenteka umuntfu loselusizini angalindzeli kutsi sisho emavi lahlakaniphile kuze advudvuteke. Paula utsi: “Bengijabula kakhulu nangabe bantfu batsi: ‘Ncesi ngekushonelwa ngumyeni wakho.’”

¹⁵ William lowashonelwa ngumkakhe eminyakeni leyengcile utsi: “Ngiyajabula nangabe bantfu bacoca ngalobekwentiwa ngumkami, loko kuyangicinisekisa kutsi bebamtsandza futsi bamhlonipha. Loko kube lusito kakhulu kimi. Emavi abo angidvudvuta kakhulu ngobe umkami bekaligugu kakhulu futsi ayincenye yekuphila kwami.” Bianca longumfelokati utsi: “Ngidvudvuteka kakhulu nangabe labanye bathantaza nami futsi bangifundzela umBhalo munye nome lemibili. Ngiyajabula nangabe labanye bakhuluma ngemyeni wami futsi bangilalela nangikhuluma ngaye.”

16. (a) Yini lokufanele siyentele bantfu labashonelwe ngulabashade nabo? (b) Ngekusho kwaJakobe 1:27 ngumuphi umsebenti lokufanele siwente?

¹⁶ Njengobe Ruthe amsita Nawomi, natsi kufanele sibasekela labo labashonelwe ngulababatsandzako. Paula lokukhulunywe ngaye ekucaleni utsi: “Bantfu bangisekela kakhulu futsi bangisita ngemuva kwekushonelwa ngumyeni wami, kodvwa njengobe sikhatsi sichubeka baphindze baba matasa ngemisebenti yabo yamalanga onkhe. Kodvwa imphilo yami beseyishintje ngalokuphelele. Kusita kakhulu kutsi bantfu bati kutsi umuntfu loshonelwe uyakudzinga kusekelwa ngisho nobe sekwendlule tinyanga neminyaka ashonelwe.” Kuliciniso kutsi bantfu abafani. Labanye bayakhona kusheshe betayelane nesimo lasebakuso. Nobe kunjalo, labanye bayamkhumbula umuntfu loshonile njalo nabenta intfo lebebayenta naye. Tintfo letentiwa bantfu nabaselusizini atifani. Kufanele sikhumbule kutsi Jehova usinikete lilungelo kanye nemsebenti wekunakekela labo labashonelwe ngulabebashade nabo.—Fundza Jakobe 1:27.

17. Kungani kufanele sibasekele labo labashiywe bantfu labashade nabo?

¹⁷ Labanye babhekana nelusizi kanye nekucindzeteleka kwekushiywa bantfu labashade nabo. Joyce lowashiywa ngumyeni wakhe ngenca yekutsi besekatsandzana nalomunye utsi: “Buhlungu lobabangelwa yidivosi baba bukhulu kakhulu kunebuhlungu lebengitabuva nangabe bekashonile. Kube wafa engotini yemoto nome wagula, kute lebekangakwenta. Kodvwa lokubuhlungu kakhulu kutsi umyeni wami watikhetsela yena kungishiya. Loko kwangenta ngahlazeka futsi ngatenyanya.”

18. Yini lesingayenta kute sisite labo labashonelwe ngulabashade nabo?

¹⁸ Tento letincane temusa lesitentela bantfu labashonelwe bantfu labashade nabo tingabacinisekisa kutsi sibatsandza kangakanani. Bayabadzinga bangani labakahle ngenca yekutsi banesitunge. (Taga 17:17) Ungakhombisa njani kutsi ungumngani lokahle? Ungabamema kute nidle ndzawonye futsi ucitse sikhatsi nabo nanitijabulisa nome nanisemsebentini wekushumayela. Ungaphindze ubacele kutsi babe khona ekukhonteni kwenu kwemndeni. Nawenta njalo utawujabulisa Jehova ngobe “uhlala asedvute nabo labanetinhlitiyo letephukile,” futsi ‘ungumlondvoloti webafelokati.’—Hla. 34:18; 68:5.

19. Ucabanga ngemBhalo wa-1 Phetro 3:8, yini lotimisele kuyenta?

¹⁹ Madvutane uMbuso waNkulunkulu utawubusa emhlabeni futsi tonkhe tinhlupheko tingeke tikhunjulwe. Silangatelela sikhatsi lapho “tintfo takadzeni tingeke tikhunjulwe futsi tingeke tisabuya nasengcondvweni.” (Isa. 65:16, 17) Njengobe leso sikhatsi sisengakefiki, shengatsi singachubeka sikhombisa ngemavi nangetento kutsi sibatsandza kakhulu bazalwane betfu.—Fundza 1 Phetro 3:8.