“Kuhlakanipha KwaNkulunkulu Kubonakala Kuliciniso Ngemiphumela Yako”
1. Labanye bantfu bawutsatsa njani umsebenti wetfu?
1 Ngaletinye tikhatsi singase sihlangane nekusabela lokubi kubanikati bemiti labangasicondzi kahle nobe labaye batjelwa tintfo letimbi ngaboFakazi baJehova. Kungenteka kutsi imibiko yetindzaba iye yatsintsa indlela labacabanga ngayo. Kuletinye tindzawo, siye sabitwa ngekutsi “silicembu leliyingoti.” Kufanele sisabele njani nasihlangabetana nekusolwa lokufanana naloku?
2. Yini lengasisita sikubalekele kudvumala nasihlangabetana nekusolwa?
2 Londvolota Simo Sengcondvo Lesihle: Jesu kanye naletinye tinceku taJehova tangelikhulu lekucala leminyaka bebavame kungacondvwa kahle futsi bekukhulunywa kabi ngabo. (Imis. 28:22) Nanobe kunjalo, abazange bavumele kusolwa lokunjalo kubente babe nemahloni ngemsebenti lebebawenta. Jesu watsi: “Kuhlakanipha kwaNkulunkulu kubonakala kuliciniso ngemiphumela yako.” (Mat. 11:18, 19) Wachubeka enta intsandvo yaBabe wakhe ngekutimisela, abeciniseka kutsi labo labebalifuna mbamba liciniso bebatawukubona kubaluleka kwetindzaba letinhle. Singakubalekela kudvumala ngekukhumbula kutsi iNdvodzana yaNkulunkulu nayo yaphatfwa ngendlela lefananako.
3. Kungani kungakafaneli kutsi imibiko lemibi kanye nekuphikiswa kusimangalise?
3 Jesu watsi live belitawubatondza balandzeli bakhe, njengobe nje naye lamtondza. (Joh. 15:18-20) Ngako-ke, imibiko lemibi kanye nekuphikiswa lokukhona lamuhla akukafaneli kusimangalise. Kunaloko, kufanele silindzele kutsi timo titawukuya tiba matima njengobe emalanga ekugcina aya ashuba, futsi nelulaka lwaSathane lukhula. (Semb. 12:12) Singajabula ngobe siyati kutsi letintfo tikhombisa kutsi lelive laSathane selitawubhujiswa madvutane.
4. Kufanele sisabele njani nangabe bantfu bangatemukeli tindzaba letinhle?
4 Phendvula Ngemusa: Nasihlangabetana nekusabela lokubi, ngaso sonkhe sikhatsi kufanele siphendvule ngemusa nangemoya lophansi. (Taga 15:1; Khol. 4:5, 6) Nangabe simo sivuma, singakwati kuchazela umnikati welikhaya locotfo ngekutsi minyenti imibiko lengemanga mayelana naboFakazi BaJehova, nobe simbute kutsi kungani ativa ngaleyondlela. Imphendvulo yetfu lenemusa ingamenta atibute ngaloko lake wakuva ngaboFakazi BaJehova, futsi ingamenta alalele esikhatsini lesitako nabaphindze bamvakashela boFakazi. Nanobe kunjalo, nangabe umnikati welikhaya atfukutsele kakhulu, kungaba ncono kuvele simshiye ngekuthula. Singaciniseka ngekutsi nangetulu kwaloko bantfu labakushoko ngatsi, Jehova uyajabula ngemsebenti wetfu.—Isa. 52:7.