Imihlangano Yesigodzi Isikhatsi Sekukhonta Ngenjabulo

1. Imikhosi yaka-Israyeli beyifanana njani nemihlangano yesigodzi yesikhatsi setfu?

¹ Josefa, Mariya, bantfwana babo, kanye nalabanye bantfu bebaya njalo eJerusalema kute bayewuhlanganyela emikhosini yaminyaka yonkhe. Ngalesikhatsi, bona kanye nalamanye emakholwa bebetama kutsi bangacabangi ngetinkinga tamalanga onkhe, bese banaka intfo lebaluleke kakhulu ekuphileni kwabo, lokubuhlobo babo naNkulunkulu. Lemikhosi beyibaniketa sikhatsi sekuhlola nesekukhuluma ngebuhle baJehova, kanye nesekuzindla ngeMtsetfo wakhe. Imihlangano yetfu yesigodzi lesondzelako itawusiniketa litfuba lelifananako lekukhonta Jehova ngenjabulo.

2. Yini lokufanele siyente kute silungiselele kuba khona emhlanganweni wesigodzi losondzelako?

² Kudzingeka Sitilungiselele: Luhambo lolusuka eNazaretha lwaludzinga kutsi umndeni wakuboJesu uhambe libanga lelingaba ngemakhilomitha langu-200 kuya kulemikhosi. Nanobe singati kutsi bebabangakhi bantfwana bakuboJesu, singacabanga ngemalungiselelo kanye nemsebenti lebekudzingeka wentiwe nguJosefa naMariya. Sewuwentile yini emalungiselelo ladzingekako kute ukwati kuhlanganyela kuwo omatsatfu emalanga emhlangano wesigodzi losondzelako? Kungase kudzingeke kutsi utsatse ilifi emsebentini, ukhulume nemcashi wakho nobe thishela wemntfwana wakho umtjele kutsi utawube angekho esikolweni ngalawo malanga. Sewuyihlelile yini indzawo yekulala nangabe loku kutawudzingeka? Ungakwati yini kutsatsa tinyatselo kute usite lotsite ebandleni lonetidzingo letikhetsekile kute naye akwati kuba khona kulomhlangano?—1 Joh. 3:17, 18.

3. Imikhosi yaka-Israyeli beyiwavula njani ematfuba ekuba nebuhlobo lobakhako?

³ Buhlobo Lobakhako: Imikhosi yemaJuda beyivula litfuba lekuba nebuhlobo lobakhako nalamanye emakholwa. Siyaciniseka ngekutsi umndeni wakuboJesu bewukulangatelela kuphindze uhlangane nebangani lesekukudzala wabagcina. Bebawajabulela nematfuba ekutfola bangani labasha esicunjini semaJuda kanye nalabangasiwo emaJuda lebebaba khona kulemikhosi nobe lebebahamba nabo nabasaya nobe sebabuya eJerusalema.

4. Singakhombisa njani kutsi asibubukeli phansi buzalwane betfu bebuKhristu?

⁴ Lesinye sizatfu lesenta sisebenti lesetsembekile nalesihlakaniphile sihlele kutsi sihlangane ndzawonye kute sitewulalela tinkhulumo emhlanganweni wesigodzi kunekutsi sisibhalele lomlayeto emaphepheni, kutsi sifuna sikhutsatane. (Heb. 10:24, 25) Ngako-ke, hlela kutsi ufike ngesikhatsi endzaweni yemhlangano kuwo onkhe emalanga kute ujabulele budlelwane nalabanye ngembikwekutsi sihlalo weluhlelo etfule umculo lositjela kutsi sekufanele sihlale phansi. Kunekuphuma endzaweni yemhlangano ngesikhatsi selikhefu lasemini kute siyewutsenga kudla, sikhutsatwa kutsi sitiphatsele futsi sihlale enkhundleni yemhlangano kute sicoce nalabo labahleti edvute natsi. Buzalwane betfu bebuKhristu busipho lesivela kuJehova lokungakafaneli sisibukele phansi.—Mik. 2:12.

5. Yini letawusisita kutsi sizuze kakhulu eluhlelweni lwemhlangano?

⁵ Sikhatsi Sekufundza: Kusukela asemncane, Jesu wasebentisa sikhatsi semikhosi kute afundze ngaBabe wakhe wasezulwini. (Luk. 2:41-49) Yini lengasisita tsine nemindeni yetfu kute sizuze kakhulu etinkhulumeni letitawube tetfulwa? Njengobe kuchubeka luhlelo lwemhlangano, hlaliseka futsi ungakhulumi nakute sidzingo sekwenta njalo. Ungavumeli kutsi mahlalekhikhini, i-pager, nobe letinye tintfo takho tekuchumana tikuphatamise, wena kanye nalabanye. Kufanele unake sikhulumi futsi ubhale nemaphuzu. Hlalani ndzawonye njengemndeni kute niciniseke kutsi bantfwana benu bayalalela. Entsambama, cocani ndzawonye ngemaphuzu leniwajabulele.

6. Yini lokufanele sihlale siyikhumbula mayelana nendlela lesigcoka futsi sitilungise ngayo?

⁶ Kugcoka Kanye Nekutilungisa: Batsengisi labavela kulamanye emave, labebahamba emigwacweni bebasheshe bawubone umndeni wakuboJesu kanye nalamanye emakholwa langemaJuda lebekahamba emigwacweni aya emikhosini. Sizatfu saloku kutsi abegcoka tingubo letinetimvakaza emiphetfweni yato, futsi tatinelucotfo loluluhlata njengesibhakabhaka ngenhla kwalomphetfo. (Num. 15:37-41) Nanobe emaKhristu lamuhla angagcoki timphahla letikhetsekile, atiwa ngekugcoka ngesizotsa kanye nangekuhlanteka. Kufanele siyinake indlela lesibukeka ngayo nasiya nalapho sibuya emhlanganweni, kanye nalapho sisedolobheni lokubanjelwe kulo umhlangano. Ngisho nobe singatishintja timphahla ngemuva kwemhlangano, kodvwa kufanele sigcoke timphahla letiletsa ludvumo kuJehova, futsi sifake netimbeji tetfu temhlangano. Ngekwenta kanjalo, sitawukwehluka kubantfu labangesibo boFakazi, futsi sitawendlulisela umlayeto lomuhle kulabo labasibukele.

7. Kungani kufanele sicabangele kuba tisebenti tekutitsandzela emhlanganweni?

⁷ Sidzingo Setisebenti Tekutitsandzela: Kudzingeka tisebenti letinyenti kute umhlangano uhambe kahle. Ungakwati yini kuba sisebenti sekutitsandzela? (Hla. 110:3) Umsebenti lowentiwa emihlanganweni uyincenye yekukhonta lokungcwele, futsi uniketa bufakazi lobuhle. Umphatsi walenye inkhundla lesetjentiselwa umhlangano wajabula kakhulu ngetisebenti tekutitsandzela letahlanta inkhundla, kangangekutsi watsi: “Ngibonga kakhulu ngemhlangano wenu lomangalisa kunayo yonkhe lengake ngayibona. Bengiloku ngiva kutsiwa boFakazi baJehova babantfu labakhetsekile labatiwa ngekugcina inkhundla ihlantekile kwendlula indlela lebeyingiyo ekucaleni. Nine kanye nenhlangano yenu nente lenkhundla yaba yindzawo lencono kakhulu emmangweni, futsi loku nikwenta nelicembu lebantfu labanemusa lesikujabulele kuhlangana nabo.”

8. Ngumaphi ematfuba ekufakaza latawube akhona edolobheni lokubanjelwe kulo umhlangano?

⁸ Ematfuba Ekufakaza: Bantfu labanyenti labasedolobheni lokubanjelwe kulo umhlangano batawubona tivakashi letigcoke futsi tatilungisa kahle, naletifake timbeji temhlangano. Ngako-ke, loku kungabenta bafise kwati lokunyenti, lokutawusiniketa ematfuba ekubatjela ngemhlangano. Ngemuva kweluhlelo lwemhlangano, umfana loneminyaka lemine budzala waya endzaweni yekudlela nekhophi yakhe yencwadzi lebeyisandza kukhululwa emhlanganweni, futsi wayikhombisa weta. Loku kwaniketa batali balomfanyana litfuba lekumemela lowesifazane emhlanganweni.

9. Singasilingisa njani sibonelo semndeni wakuboJesu sekujabula ngematfuba ekufundza ngaJehova?

⁹ Imikhosi yasendvulo beyisikhatsi lesijabulisako, futsi emaJuda labefuna kufundza kabanti ngaJehova abehlala ayilangatelela. (Dut. 16:15) Umndeni wakuboJesu bewukujabulela kutidzela kute ube khona futsi uzuze ngalokugcwele kuyo. Natsi siyijabulela ngendlela lefananako imihlangano yetfu yesigodzi, siyitsatsa njengesipho lesivela kuBabe wetfu wasezulwini lonelutsandvo. (Jak. 1:17) Nyalo sesikhatsi sekutsi sitilungiselele lelitfuba lelifika kanye ngemnyaka lekukhonta Jehova ngenjabulo.

[Box on page 5, 6]

Tikhumbuto Temhlangano Wesigodzi

◼ Tikhatsi Teluhlelo: Kuwo omatsatfu emalanga, luhlelo lwemhlangano lutawucala nga-9:00 ekuseni. Nasekwetfulwe umculo lowendvulela kucala kweluhlelo, sonkhe kufanele sihlale phansi kute luhlelo lucale ngendlela lehloniphekile. NgaLesihlanu luhlelo lutawuphela nga-4:15 ntsambama, ngeMgcibelo luphele nga-4:30 ntsambama, kantsi ngeLisontfo lutawuphela nga-3:20 ntsambama.

◼ Tindzawo Tekupaka: Kuto tonkhe tindzawo temhlangano lesiniketwe ligunya lekupaka kuto, kutawupakwa mahhala, futsi letindzawo titawutfolwa ngibo bonkhe labete emhlanganweni nangabe tisekhona. Njengobe esikhatsini lesinyenti tindzawo tekupaka tiba tincane, kugibela nalabanye emotweni kunganciphisa linani letimoto letita endzaweni yemhlangano.

◼ Tindzawo Tekulala: Emafomu eticelo tetindzawo tekulala (CO-5) ayatfolakala kute bamemeteli labawadzingako bakwati kuwagcwalisa. Ikomidi Yemsebenti kufanele ihlole kutsi lommemeteli uyafaneleka yini, isebentise ticondziso letikulelifomu kanye nencwadzi ya-July 15, 2009, lebeyiya kuto tonkhe tigungu talabadzala. Loku kwentelwe kuphela bamemeteli labanekutiphatsa lokuhle, kanye nebantfwana babo nabo labatiphatsa kahle.

◼ Kugcina Tihlalo: Tihlalo ungatigcinela kuphela labo lohamba nabo emotweni nobe labo lohlala nabo ekhaya, kanye nalabo lobachubela tifundvo teliBhayibheli.—1 Khor. 13:5.

◼ Kudla Kwasemini: Sicela nitiphatsele kudla kwasemini kunekutsi niphume endzaweni yemhlangano kute niyewutsenga kudla ngesikhatsi selikhefu lasemini. Ningawaphatsa ema-cooler bag lamancane langangena ngaphansi kwesitulo. Ema-cooler bag lamakhulu kufanele abekwe etindzaweni lenitilayelwa balindzi. Titja letifako kanye netjwala akukavumeleki endzaweni yemhlangano.

◼ Iminikelo: Singakhombisa kubonga kwetfu ngemhlangano ngekutsi sente iminikelo lesitincumele yona yemsebenti wemhlaba wonkhe eHholweni letfu leMbuso nobe endzaweni yemhlangano. Nangabe ufuna kunikela ngelisheke, ungacela ligama le-akhawunti eKomidini Yemhlangano. Imishini lesebentisa likhadi (electronic card) itawube ikhona kuletinye tindzawo temhlangano kute bantfu bakwati kwenta iminikelo ngemakhadi (debit nobe credit card). Sicela utsintse iKomidi Yemhlangano kute utfole kutsi lemishini itawube ikuphi.

◼ Tingoti Kanye Netimo Letiphutfumako: Nangabe kuvela simo lesiphutfumako setemphilo endzaweni yemhlangano, sicela nitsintse umlindzi losedvute, lotawutsintsa beLusito Lwekucala ngekushesha kute sisebenti lesiceceshiwe lesikulomhlangano sikwati kuhlola simo bese siniketa lusito loludzingekako.

◼ Kwekugwabela: Umnyaka ngamunye kuba nekulimala lokunyenti kwebantfu lokubangelwa ticatfulo. Kuncono kukhetsa ticatfulo letizitsile naletikwenela kahle, kute ukwati kuhamba etitebhisini, etinsimbini letinetikhala, nakuletinye tindzawo letingaba yingoti.

◼ Kutsebula: Tintfo tekutsebula akukafaneli tichunywe kugesi nobe emishinini ye-sound lesendzaweni yemhlangano, futsi kufanele tisetjentiswe ngendlela lengabaphatamisi labanye.

◼ Tincola Tetinswane: Tincola tetinswane akukafaneli tiletfwe enkhundleni yemhlangano. Nanobe kunjalo, temukelekile tihlalo tekuphepha tebantfwana labancane (safety seats) letingabekwa edvute netihlalo tebatali.

◼ Emakha: Imihlangano leminyenti ibanjelwa etindzaweni letivalekile letinetintfo tekungenisa umoya. Ngako-ke, kutawukhombisa kutsi sinelutsandvo nasilinganisela endleleni lesiwasebentisa ngayo emakha, ngisho nalawo lanemandla langalimata umuntfu lonenkinga yekuphefumula nobe lonetinkinga letihlobene naloko.—1 Khor. 10:24.

◼ Emafomu Ekulandzelela: Lifomu lelitsi “Siza Ulandelele” (S-43), ngesiZulu, kufanele lisetjentiswe kute kubhalwe imininingwane yemuntfu lokhombise inshisekelo nakufakazwa kuye ngalokungakahlelwa ngesikhatsi semhlangano. Bamemeteli kufanele baphatse lifomu lelilodvwa nobe lamabili nabeta emhlanganweni. Emafomu lagcwalisiwe ningawayisa Endzaweni Yetincwadzi, nobe niwanikete mabhalane welibandla lenu nasenibuyele ebandleni.—Fundza Umsebenti Wetfu WeMbuso wa-November 2009, likh. 4, ngesiZulu.

◼ Tindzawo Tekudlela: Dvumisa libito laJehova ngendlela lotiphatsa ngayo nawusetindzaweni tekudlela. Kuletindzawo, kuyintfo levamile kushiya ithiphu lengemaphesenti langu-10 kuya kulangu-15.

◼ Umsebenti Wekutitsandzela: Injabulo lesiyitfola ngekuba khona emhlanganweni itawuba yinkhulu kakhulu nangabe siba tisebenti tekutitsandzela kute sisite emisebentini ledzinga kwentiwa endzaweni yemhlangano. (Imis. 20:35) Bonkhe labafisa kwenta kanjalo bangatsintsa liHhovisi Letisebenti Tekutitsandzela emhlanganweni. Bantfwana labangaphansi kweminyaka lengu-16 nabo banganikela ngekutsi basebente nebatali babo nobe nalomunye umuntfu lomdzala.

◼ Tingoma: Emabandla angafisa kutilungiselela kusenesikhatsi tingoma letitawusetjentiswa emhlanganweni. Nati tingoma letitawuhlatjelwa: NgaLesihlanu: 118, 18, 113, 91, 88, kanye na-75. NgeMgcibelo: 92, 85, 60, 65, 69, kanye na-48. NgeLisontfo: 51, 63, 106, 16, 49, kanye na-2.