Kuyawuniketwa Bufakazi Lobunemandla Beliciniso Emihlanganweni Yetfu Yesigodzi
1. Imikhosi yema-Israyeli beyiwaniketa litfuba lekuzindla nekucoca ngamaphi emaciniso emibhalo labalulekile?
1 Israyeli wasendvulo bekaba nemikhosi katsatfu ngemnyaka. Ngisho nobe bekufanele kuye bantfu labadvuna, etikhatsini letinyenti imindeni beyihamba yonkhe iye eJerusalema kute ijabulele lemikhosi. (Dut. 16:15, 16) Imikhosi lenjalo beyiwaniketa litfuba lekuzindla nekucoca ngemaciniso emibhalo labalulekile. Ngumaphi lamanye awo? Lelinye lawo ngulelitsi Jehova unguMuphi lonelutsandvo. (Dut. 15:4, 5) Lelinye ngulelitsi singetsembela kuye kute sitfole sicondziso nesivikelo. (Dut. 32:9, 10) Ema-Israyeli bewangazindla nangekutsi njengobe abantfu lababitwa ngeligama laJehova, bekufanele aphile ngendlela lekhombisa kulunga kwaNkulunkulu. (Dut. 7:6, 11) Lamuhla, imihlangano yetfu yesigodzi yaminyaka yonkhe isizuzisa ngendlela lefananako.
2. Luhlelo lwemhlangano wesigodzi lutasikhanyisela njani emaciniso emibhalo?
2 Luhlelo Lwemhlangano Lusikhanyisela Emaciniso: Emihlanganweni yetfu yesigodzi sijabulela tinkhulumo, emadrama, imiboniso netincociswano lokusisita siwacondze kancono emaciniso eliBhayibheli siphindze siwasebentise. (Joh. 17:17) Kunyenti lesekwentiwe ekulungiseleleni lomhlangano lesiya kuwo. Inhlangano yaJehova isilungiselela luhlelo lolwentelwe kuhlangabetana netidzingo tabo bonkhe bantfu. (Mat. 24:45-47) Uyakulangatelela yini kubona nekuva lokutawenteka kuwo?
3. Yini lokufanele siyente kute sizuze emhlanganweni?
3 Kuliciniso kutsi sitawuzuza kakhulu nangabe sitawuba khona siphindze silalelisise kuwo omatsatfu lamalanga. Nawusengakawenti emalungiselelo, khuluma nemcashi wakho ucele sikhatsi sekuya emhlanganweni. Yenta emalungiselelo ekuphumula kahle busuku ngabunye ngemalanga emhlangano kute ungalali emhlanganweni. Labanyenti bakutfola kulusito kubuka sikhulumi baphindze babhale emaphuzu kafishane kute bahlale baphapheme. Ungamvumeli mahlalekhikhini nobe i-pager kutsi iphatamise wena nobe labanye. Sicela ukubalekele kukhuluma nekutfumela imilayeto ngamahlalekhikhini. Sicela ungadli futsi unganatsi nakuchubeka umhlangano nangabe ute tinkinga temphilo nobe nangabe simo selitulu sikahle.
4. Batali bangabasita njani bantfwababo kutsi bazuze emhlanganweni?
4 Ngeminyaka yemaSabatha ngesikhatsi imindeni yema-Israyeli ihlangana kute itolalela kufundvwa kweMtsetfo ngesikhatsi seMkhosi Wemadlangala, bekufanele ahambe “nebantfwana khona batewulalela bafundze.” (Dut. 31:12) Kukhutsata kakhulu kubona imindeni ihleti ndzawonye nebantfwana bangakalali kodvwa balalele nakuchubeka umhlangano. Entsambama ngayinye, kungaba kuhle kutsi niwabukete ndzawonye emaphuzu leniwajabulele leniwabhale nakuchubeka luhlelo. “Bulima buboshelwe engcondvweni yemntfwana.” Ngaleso sizatfu, batali batawube benta kahle ngekugadza bantfwababo lokufaka ekhatsi labaseminyakeni yekutfomba ngesikhatsi selikhefu nasemahhotela kunekutsi ‘bangabayali.’—Taga 22:15; 29:15.
5. Kutiphatsa kwetfu kahle nasisehhotela, kutalihlobisa njani liciniso?
5 Kutiphatsa Kwetfu Kuhlobisa Liciniso: Kutiphatsa kahle kwetfu endzaweni lokutawuchutjelwa kuyo umhlangano kuyalihlobisa liciniso. (Thit. 2:10) Tisebenti tasehhotela tiyanaka nangabe emakhasimende alandzela imitsetfo yakhona, anesineke nemusa kuto. (Khol. 4:6) Ngesikhatsi labamele ligatja bacocisana nebasehhotela emnyakeni lophelile, umphatsi welihhotela wabatjela kutsi: “Siyatsandza kuba nebantfu benkholo yenu kulelihhotela ngobe babantfu labakahle. Batiphatsa kahle, banemusa futsi batiphatsa kahle njalo tisebenti kanye netakhiwo tetfu.”
6. Singalihlobisa njani liciniso ngendlela lesigcoka ngayo nasisendzaweni lokutawuchutjelwa kuyo umhlangano?
6 Nasifake emabheji emhlangano, loko kukhangisa ngalomhlangano kuphindze kwente labanye labakhona kuwo basati, kunikete nebufakazi kulabanye bantfu. Bantfu labahlala endzaweni lokuchutjelwa kuyo umhlangano batawubona kutsi bantfu labafake emabheji emhlangano bagcoke kahle futsi bazitsile, abakagcoki budlabha nangendlela lecansulako yetitayela letivamile eveni. (1 Thim. 2:9, 10) Ngaleso sizatfu, kufanele siyinakisise indlela lesigcoka siphindze sitilungise ngayo nasisendzaweni lokutawuchutjelwa kuyo umhlangano, lokufaka ekhatsi nasifika ehhotela. Kufika sigcoke tikhindi netikipa akuyiveti inhlonipho. Ngisho nobe umhlangano uchutjelwa enkhundleni yemidlalo levulekile, timphahla tetfu kufanele tihlonipheke. Nasikhetsa kushintja timphahla ngemuva kwemhlangano siye etitolo tekudlela, kufanele sikhumbule kutsi solo sitivakashi talomhlangano futsi akukafanele sigcoke ngendlela lengakahlonipheki.
7. Nguyiphi lenye indlela yekujabulela bunye bebuKhristu emhlanganweni wesigodzi?
7 Emikhosini yaminyaka yonkhe, ema-Israyeli bewajabulela budlelwane nemakholwa lasuka kulentinye tindzawo futsi loko bekutfutfukisa bunye. (Imis. 2:1, 5) Emihlanganweni yesigodzi, buzalwane betfu buyabonakala. Lobunye betfu buvame kubatsintsa labanye bantfu. (Hla. 133:1) Kunekuyotsenga kudla ngesikhatsi selikhefu, kungaba kuhle kakhulu kutsi sitiphatsele kudla lokulula futsi sisebentise lelotfuba kute sicoce nebazalwane nabodzadze labahleti dvutane natsi.
8. Ngutiphi tizatfu lesinato tekuvolontiya nangabe timo tisivumela?
8 Labanye bantfu bavame kutsintseka nababona kuhleleka kwemihlangano yetfu yesigodzi ikakhulukati nabatfola kutsi wonkhe umsebenti wentiwa ngemavolontiya. Ungakhona yini ‘kutinekela’ kute usebente emhlanganweni wesigodzi? (Hla. 110:3) Imindeni ivame kuvolontiya kute iceceshe bantfwana kutsi bafundze kusita labanye. Nangabe unemahloni, kuvolontiya emhlanganweni wesigodzi kuyindlela lekahle yekuhlangana nalabanye bazalwane. Lomunye dzadze watsi: “Ngaphandle kwemndeni wami nebangani labambalwa, bebangasibanyenti bazalwane lengibatiko. Ngalesikhatsi ngiyovolontiya ekuhlanteni, ngahlangana nabodzadze nebazalwane labanyenti. Ngakujabulela kakhulu loko.” Kwakha bungani nalabanye ngaphandle kwebangani betfu, ngekuvolontiya emhlanganweni wesigodzi kutasiletsela injabulo. (2 Khor. 6:12, 13) Nangabe usengakaze uvolontiye, buta labadzala ebandleni lokulo kutsi yini longayenta kute ukhone kuvolontiya.
9. Sitabamema njani labanye kutsi babe khona emhlanganweni wesigodzi?
9 Mema Labanye Kute Batokuva Liciniso: Nasekusele emaviki lamatsatfu kufike umhlangano wesigodzi, sitawuhlanganyela emkhankasweni wekumema labanye kutsi babe khona emhlanganweni njengoba besenta eminyakeni leyengcile. Emabandla angatsandza kuhlanganisa incenye lenkhulu yemasimu awo. (Fundza libhokisi lelitsi “Sitawusihambisa Njani Simemo?”) Tonkhe timemo letitawusala, kufanele niye nato emhlanganweni wesigodzi. Letimemo titawusetjentiswa bamemeteli ekufakazeni bangakahleli endzaweni lokubanjelwe kuyo umhlangano.
10. Shano lokuhlangenwenako lokukhombisa kutsi imikhankaso yaminyaka yonkhe yekuhambisa simemo inemiphumela lemihle.
10 Bantfu bayeta yini nasibamemele kulomhlangano? Kulomunye umhlangano, umlindzi wasita indvodza nemfati wayo kutsi batfole indzawo yekuhlala. Bamtjela kutsi bebatfole simemo, batsi “basibona sikhanga.” Bahamba ngemoto emakhilomitha langu-320. Lomunye dzadze lobekahamba umuti ngemuti, waniketa indvodza letsite simemo leyabonakala inesifiso sekwati ngalomhlangano. Lodzadze watinika sikhatsi sekumchazela ngalesimemo. Ngemuva kwemalanga lambalwa, nakasemhlanganweni wesigodzi wayibona lendvodza kanye nemngani wayo baphetse incwadzi lekhululwe emhlanganweni.
11. Kubaluleke ngani kutsi sibe khona minyaka yonkhe emihlanganweni yetfu yesigodzi?
11 Imikhosi yaminyaka yonkhe beyililungiselelo lelutsandvo lelivela kuJehova lekusita ema-Israyeli amkhonte “ngekwetsembeka konkhe.” (Josh. 24:14) Ngendlela lefananako, kuba khona kwetfu emihlanganweni yesigodzi yaminyaka yonkhe kusisita kutsi ‘sihambe ecinisweni,’ futsi kuyincenye lebalulekile yekukhonta kwetfu. (3 Joh. 3) Shengatsi Jehova angayibusisa imetamo yekuba khona kulomhlangano yabo bonkhe labatsandza liciniso futsi bazuze kuwo.
[Blurb on page 3]
Kutiphatsa kwetfu lokuhle nasisendzaweni lokuchutjelwa kuyo umhlangano kuhlobisa liciniso
[Blurb on page 4]
Nasekusele emaviki lamatsatfu kufike umhlangano wetfu wesigodzi, sitawuhlanganyela emkhankasweni wekumema labanye kutsi nabo babe khona
[Box on page 5]
Tikhumbuto Temhlangano Wesigodzi Wa-2012
◼ Tikhatsi Teluhlelo: Kuwo omatsatfu emalanga, luhlelo lwemhlangano lutawucala nga-9:00 ekuseni. Indzawo yemhlangano itawuvulwa nga-7:00 ekuseni. Nasekwetfulwe umculo lowendvulela kucala kweluhlelo, sonkhe kufanele sihlale phansi kute luhlelo lucale ngendlela lehloniphekile. NgaLesihlanu nangeMgcibelo luhlelo lutawuphela nga-4:35 ntsambama, kantsi ngeLisontfo lutawuphela nga-3:20 ntsambama.
◼ Tindzawo Tekupaka: Kuto tonkhe tindzawo temhlangano lesiniketwe ligunya lekupaka kuto, kutawupakwa mahhala, futsi letindzawo titawutfolwa ngibo bonkhe labete emhlanganweni nangabe tisekhona. Njengobe esikhatsini lesinyenti tindzawo tekupaka tiba tincane, kugibela nalabanye emotweni kunganciphisa linani letimoto letita endzaweni yemhlangano.
◼ Tindzawo Tekulala: Emafomu latsi “Isicelo Sendawo Yokulala Sezidingo Ezikhethekile” (CO-5-ZU) ayatfolakala kute bamemeteli labawadzingako bawagcwalise. Ikomidi Yemsebenti kufanele ihlole kutsi lommemeteli uyafaneleka yini, isebentise ticondziso letikulelifomu kanye nencwadzi ya-December 14, 2010, leyabhalelwa tonkhe tigungu talabadzala. Lelilungiselelo lentelwe bamemeteli nebantfwababo labasibonelo kuphela.
◼ Kugcina Tihlalo: Indzawo ungayibekela kuphela labo lohamba nabo emotweni nobe labo lohlala nabo ekhaya, kanye nalabo lobachubela tifundvo teliBhayibheli.—1 Khor. 13:5.
◼ Kudla Kwasemini: Sicela nitiphatsele kudla kwasemini kunekutsi niphume endzaweni yemhlangano kute niyewutsenga kudla ngesikhatsi selikhefu. Ningawaphatsa ema-cooler bag lamancane leningawabeka ngaphansi kwesitulo. Ema-cooler bag lamakhulu kufanele abekwe etindzaweni balindzi labatanilayela tona. Titja letifako netjwala akukavumeleki endzaweni yemhlangano.
◼ Iminikelo: Singakhombisa kubonga kwetfu ngemhlangano ngekunikela iminikelo lesitincumele yona yemsebenti wemhlaba wonkhe endzaweni yemhlangano. Nangabe ufuna kunikela ngelisheke, kufanele ulibhale kutsi “Christian Congregation of Jehovah’s Witnesses of South Africa.” Emihlanganweni leminyenti, kutawemukeleka kunikela usebentisa emakhadi lokutsiwa yi-debit/credit card.
◼ Tingoti Netimo Letiphutfumako: Nangabe kuvela simo lesiphutfumako setemphilo endzaweni yemhlangano, sicela nitsintse umlindzi losedvute, lotawutsintsa beLusito Lwekucala ngekushesha kute sisebenti lesiceceshiwe lesikulomhlangano sihlole simo bese siniketa lusito loludzingekako.
◼ Imitsi: Nangabe utawudzinga imitsi, sicela uciniseke kutsi uphatsa leyenele, ngobe ngeke itfolakale endzaweni yemhlangano. Imijovo yalabanesifo sashukela kufanele ilahlwe endzaweni lefanele njengetintfo letiyingoti futsi akukafanele ilahlwe emigconyeni yetibi emhlanganweni nasemahhotela.
◼ Ticatfulo: Umnyaka ngamunye kuba nekulimala lokunyenti kwebantfu lokubangelwa ticatfulo. Kuncono kukhetsa ticatfulo letizitsile naletikwenela kahle, kute ukwati kuhamba etitebhisini, etinsimbini letinetikhala, nakuletinye tindzawo letingaba yingoti.
◼ Tincola Tetinswane: Tincola tetinswane akukafaneli tiletfwe enkhundleni yemhlangano. Nanobe kunjalo, temukelekile tihlalo tebantfwana labancane (safety seats) letingabekwa edvute netihlalo tebatali.
◼ Emakha: Imihlangano leminyenti ibanjelwa etindzaweni letivalekile letinetintfo tekungenisa umoya. Ngako-ke, kutawukhombisa kutsi sinelutsandvo nasilinganisela endleleni lesiwasebentisa ngayo emakha lanemandla langalimata umuntfu lonenkinga yekuphefumula nobe lonetinkinga letihlobene naloko.—1 Khor. 10:24.
◼ Emafomu Latsi “Siza Ulandelele” (S-43-ZU): Lifomu lelitsi “Siza Ulandelele” (S-43-ZU), kufanele lisetjentiswe kute kubhalwe imininingwane yemuntfu lokhombise kutsi uyakutsandza kufundza nakufakazwa kuye kungakahlelwa ngesikhatsi semhlangano. Bamemeteli kufanele baphatse lifomu linye nobe lamabili nabeta emhlanganweni. Emafomu lagcwalisiwe ningawayisa Endzaweni Yetincwadzi, nobe niwanikete mabhalane welibandla lenu nasenibuyele ebandleni.—Fundza Umsebenti Wetfu WeMbuso wa-May 2011, likhasi 3.
◼ Tindzawo Tekudlela: Dvumisa libito laJehova ngendlela lotiphatsa ngayo nawusetindzaweni tekudlela. Kuletindzawo, kuyintfo levamile kushiya ithiphu lengemaphesenti langu-10 kuya kulangu-15.
◼ Umsebenti Wekutitsandzela: Bonkhe labafisa kuvolontiya bangaya eHhovisi Letisebenti Tekutitsandzela emhlanganweni. Bantfwana labangaphansi kweminyaka lengu-16 budzala bangasebenta nebatali babo nobe nalomunye umuntfu lomdzala ngemvume yemtali.
◼ Tingoma: Emabandla angafisa kutiphrakthiza kusenesikhatsi tingoma letitawuhlatjelwa emhlanganweni. Nati tingoma letitawuhlatjelwa: NgaLesihlanu: 52, 57, 113, 106, 116, kanye na-98. NgeMgcibelo: 96, 68, 58, 67, 95, kanye na-89. NgeLisontfo: 110, 61, 134, 73, 36, kanye na-49.
[Box on page 4]
Sitawusihambisa Njani Simemo?
Kute sikwati kuhlanganisa insimu, kufanele singakhulumi kakhulu. Singase sitsi: “Sawubona. Sisemkhankasweni wemhlaba wonkhe wekusakata lesimemo. Nasi sakho. Utawutfola imininingwane leminyenti kuso.” Bani nemdlandla. Nawuhambisa simemo ngetimphelasontfo, kufanele usihambise nabomagazini nakufaneleka.