“Gcinani Kutiphatsa Kwenu Kukuhle Emkhatsini Webantfu”

1. Kungani kubalulekile kutsi sigcine kutiphatsa kwetfu kukuhle kulemihlangano letako?

¹ Bantfu labaningi bayasinaka nasiya emhlanganweni umnyaka ngamunye, ngako kubalulekile kutsi kutiphatsa kwetfu kummelele kahle Nkulunkulu lesimkhontako. (Lev. 20:26) Simo setfu lesihle kanye nendlela lesembatsa ngayo nalesitilungisa ngayo kufanele ikhombise ngalokucacile kutsi sibalandzeli baKhristu sibili. Njengobe sitawube siya emihlanganweni yesigodzi noma yetive letako, ‘singakugcina njani kutiphatsa kwetfu kukuhle emkhatsini webantfu,’ sikhatimulise Babe wetfu losezulwini?—1 Phet. 2:12.

2. Ngumaphi ematfuba lesinawo ekukhombisa buntfu bebuKhristu ngesikhatsi semhlangano?

² Khombisa Buntfu BebuKhristu: Lutsandvo lesikhombisana lona nendlela lesisebentelana ngayo nebantfu ‘bangephandle’ yehluke kakhulu kuleyo levamile eveni. (Khol. 3:10; 4:5; 2 Thim. 3:1-5) Kufanele sibe nemusa futsi sibeketele nasisebentelana netisebenti tasehhotela netasetitolo tekudlela, ngisho nome sekuphakama tinkinga. Sitawuphindze sikhombise simo lesihle ngekubabonga ngethiphu lefanele labo labatasisita kuleto tindzawo nangabe loko kuyintfo leyentiwako.

3. Bakhunjutwa kutsini batali, futsi ngani?

³ Batali kufanele bagadze bantfwana babo endzaweni yemhlangano, etindzaweni tekudlela kanye nasehhotela. (Taga 29:15) Lomunye meninjeli wasehhotela watsi kulamanye emaKhristu lashadene: “Siyanitsandza. Imindeni yenu kanye nebantfwana benu bafundzisekile futsi bayahlonipha. Tonkhe tisebenti tetfu betikhuluma ngani, futsi sifisa shengatsi ningeta lapha njalo ngetimphelasontfo.”

4. Kufanele sigcoke njani nasisendzaweni lapho kunemhlangano khona?

⁴ Kugcoka Ngendlela Lezitsile: Nasisemhlanganweni kufanele sigcoke kahle, ngesizotsa, hhayi ngendlela lekhombisa ngalokwecile titayela letivamile talelive. (1 Thim. 2:9) Ngisho nome sihambahamba ehhotela, nangesikhatsi sesitiphumulele, kungaba kungaphambi kwemhlangano nome ngemuva kwawo, sifuna kuciniseka kutsi asigcoki ngendlela leyekelelako noma lebudlabha. Loko kutasenta singabi nemahloni ekufaka emabheji emhlangano futsi ngeke sesabe kushumayela nakuvela litfuba lekwenta njalo. Indlela lesitawube sibukeka siphindze sitiphatsa ngayo kulemihlangano angeke igcine nje ngekukhanga bantfu labatsandza kulalela umlayeto losindzisa kuphila weliBhayibheli, kodvwa itawuphindze ijabulise Jehova.—Zef. 3:17.

Tikhumbuto Temhlangano Wesigodzi Wanga-2014

◼ Tikhatsi Teluhlelo: Umculo wekucalisa umhlangano utawucala nga–9:00 ekuseni kuwo omatsatfu emalanga. Ngaleso sikhatsi, sonkhe kufanele sihlale phansi kute luhlelo lucale ngendlela lehloniphekile. NgaLesihlanu nangeMgcibelo ingoma yekwephetsa nemthantazo kutawetfulwa nga–4:25 entsambama kantsi ngeliSontfo kutawetfulwa nga–3:20 entsambama.

◼ Imihlangano Yetive: Kutawuba nemihlangano yetive kuletinye tindzawo. Sicela ninake kutsi lihhovisi leligatja limeme emabandla latsite kanye nebazalwane labasuka kulamanye emave. Loko likwente ngemuva kwekubala tihlalo, tindzawo tekupaka kanye netekulala letikhona. Kungaba nesiminyaminya nangabe bamemeteli bangaya emhlanganweni wetive babe bangakamenywa kuwo. Nangabe timo tibitela kutsi uye emhlanganweni libandla lokulo lelingakabelwa kuwo, akukafaneli ukhetse kutsi loyo mhlangano lotawuya kuwo kube ngulowetive.

◼ Tindzawo Tekupaka: Kuto tonkhe tindzawo temhlangano lesiniketwe ligunya lekupaka kuto, kutawupakwa mahhala, futsi letindzawo titawutfolwa ngibo bonkhe labete emhlanganweni kuye ngekutsi ngubani lofike kucala. Njengobe esikhatsini lesinyenti tindzawo tekupaka tiba tincane, kungaba kuhle kutsi sigibele nalabanye emotweni kunekutsi nguloyo ahambe ngemoto yakhe.

◼ Tindzawo Tekulala: Emafomu latsi “Isicelo Sendawo Yokulala Sezidingo Ezikhethekile” (CO-5-ZU) ayatfolakala kute bamemeteli labawadzingako bawagcwalise. Ikomidi Yemsebenti Yelibandla kufanele ihlole kutsi lommemeteli uyafaneleka yini, isebentise ticondziso letikulelifomu kanye nencwadzi yanga-October 27, 2013, leyabhalelwa tonkhe tigungu talabadzala. Lelilungiselelo lentelwe bamemeteli nebantfwana babo labasibonelo.

◼ Kubeka Indzawo Yekuhlala: Nakuvulwa emasango endzaweni yemhlangano njalo ekuseni, sicela ningagijimeli kuyobeka tindzawo lanitsandza khona kuze kube shengatsi seniyancintisana. Kutidzela lokusenta sifise kwentela labanye lokuhle, ngiko lokusiphawula njengemaKhristu eliciniso futsi kwente nalabasibukile badvumise Nkulunkulu. (Joh. 13:34, 35; 1 Khor. 13:4, 5; 1 Phet. 2:12) Indzawo ungayibekela kuphela labo lohamba nabo emotweni nobe labo lohlala nabo ekhaya kanye nalabo lobachubela tifundvo teliBhayibheli. Kunendzawo lekhetsekile lelungiselelwe labakhululile nalababutsakatsaka. Njengobe lendzawo iyincane, kungase kuhlale munye noma babili kuphela labasita labakhululile nobe lababutsakatsaka.

◼ Kudla Kwasemini: Sicela nitiphatsele kudla kwasemini kunekutsi niphume endzaweni yemhlangano niyewutsenga kudla ngesikhatsi selikhefu. Ningawaphatsa ema-cooler bag lamancane leningawabeka ngephansi kwetitulo. Ema-cooler bag lamakhulu kufanele abekwe etindzaweni balindzi labatanilayela tona. Titja letifako netjwala akukavumeleki endzaweni yemhlangano.

◼ Iminikelo: Singakhombisa kubonga kwetfu ngemalungiselelo alomhlangano ngekunikela iminikelo lesitincumele yona yemsebenti wemhlaba wonkhe nasisemhlanganweni. Nangabe ufuna kunikela ngelisheke, kufanele ulibhale kutsi “Christian Congregation of Jehovah’s Witnesses of South Africa.” Emihlanganweni leminyenti kutawemukeleka kunikela usebentisa i-debit nobe i-credit card.

◼ Tintfo Letisetjentiselwa Kwelapha: Nangabe utawudzinga imitsi, sicela uciniseke kutsi uphatsa leyenele, ngobe ngeke itfolakale endzaweni yemhlangano. Imijovo netinyalitsi talabanesifo sashukela kufanele ilahlwe endzaweni lelungiselelwe kulahla tintfo letiyingoti hhayi emigconyeni yetibi lesemhlanganweni nasemahhotela.

◼ Ticatfulo: Sicela nikuphaphamele kakhulu kuvikela tingoti letingabangwa kushelela nekugileka. Njalo ngemnyaka kuba nebantfu labalimalako ngenca yeticatfulo, ikakhulukati emantonto. Kuncono kukhetsa ticatfulo letizitsile naletikwenela kahle kute ukhone kuhamba etitebhisini, etinsimbini letinetikhala, nakuletinye tindzawo letingaba yingoti.

◼ Tincola Tetinswane Netitulo Tekuhlala Ngephandle: Tincola tetinswane kanye netitulo tekuhlala ngephandle akukafaneli tifakwe ngekhatsi ehholeni lemhlangano. Nome kunjalo, temukelekile tihlalo tebantfwana labancane (safety seats) nangabe tingakhona kufaselwa esitulweni lesisedvute nebatali.

◼ Emakha: Imihlangano leminyenti ibanjelwa etindzaweni letivalekile letinetintfo tekungenisa umoya. Ngako-ke, kutawukhombisa kutsi sinelutsandvo nasilinganisela endleleni lesiwasebentisa ngayo emakha lanemandla langeke amphatse kahle umuntfu lonenkinga yekuphefumula nobe lonetinkinga letihlobene naloko.—1 Khor. 10:24.

◼ Emafomu Latsi “Siza Ulandelele” (S-43-ZU): Lifomu lelitsi “Siza Ulandelele” (S-43-ZU), kufanele lisetjentiswe kute kubhalwe imininingwane yemuntfu lokhombise kutsi uyakutsandza kufundza nakufakazwa kuye kungakahlelwa ngesikhatsi semhlangano. Emafomu lagcwalisiwe ningawayisa Endzaweni Yetincwadzi nobe niwanikete mabhalane welibandla lenu nasenibuyele emuva.

◼ Tindzawo Tekudlela: Dvumisa ligama laJehova ngekutiphatsa kahle nawusetindzaweni tekudlela. Gcoka ngendlela lefanele umKhristu. Shiya ithiphu lefanele nangabe loko kuyintfo leyentiwako endzaweni lokuyo.

◼ Umsebenti Wekutitsandzela: Bonkhe labafisa kuvolontiya bangaya eHhovisini Letisebenti Tekutitsandzela emhlanganweni. Bantfwana labangaphansi kweminyaka lengu-16 budzala nabo banganikela ngekusebenta nebatali babo, nome nalabo lababanakekelako nobe-ke nalomunye umuntfu lomdzala lovunyelwe ngumtali noma loyo lomnakekelako.