Simemo Lesikhetsekile
1. Utawucala nini umkhankhaso wekuhambisa timemo temihlangano yanga-2014?
1 Nangabe uhlelela tihlobo nebangani sidlo lesikhetsekile, lesidzinga emalungiselelo lamanyenti netindleko letiphakeme, manyenti ematfuba ekutsi ukujabulele kakhulu kubamema. Ngendlela lefanako, kwentiwe emalungiselelo lamanyenti kute sondliwe kulelidzili lesilihlelelwe nguNkulunkulu, lokuyimihlangano yesigodzi neyetive yanga-2014. Emavikini lamatsatfu ngaphambi kwalomhlangano, sitawuba nelitfuba lekumema labanye bantfu kute babe kanye natsi. Yini letasisita kutsi sikujabulele kumema bantfu?
2. Yini letasenta sihlanganyele ngekutimisela kulomkhankhaso?
2 Kucabangisisa ngekutsi sizuza kanganani edzilini Jehova lasilungiselela lona emihlanganweni yesigodzi, kutawusenta sihlanganyele ngekutimisela kulomkhankhaso. (Isa. 65:13, 14) Kufanele sikhumbule futsi nekutsi lemikhankhaso yaminyaka yonkhe iba nemiphumela lemihle. Labanye bantfu lesibamemile batawuba khona emhlanganweni. Ngisho nome bangaba ngakanani bantfu labatawuta emhlanganweni, kuhlanganyela kwetfu ngekutimisela kulomkhankhaso kutawudvumisa Jehova kuphindze kukhombise kutsi uyephana.—Hla. 145:3, 7; Semb. 22:17.
3. Titawuhanjiswa kanjani timemo?
3 Sigungu salabadzala ngasinye kufanele sincume kutsi libandla litasihambisa kanjani lesimemo kute lihlanganise insimu. Loko kufaka ekhatsi kuncuma kutsi singashiywa yini simemo emakhaya langenabantfu nekutsi banganiketwa yini bantfu labasetindzaweni tawonkhe wonkhe letisensimini yelibandla. Ngetimphelasontfo timemo kufanele tihanjiswe nabomagazini nangabe simo sivuma. Nangabe uMgcibelo wekucala enyangeni utawuba ngesikhatsi salomkhankhaso, kufanele kugcilwe kakhulu ekuhambiseni timemo kunasekucaliseni tifundvo teliBhayibheli. Nasewuphelile lomkhankhaso, kutasijabulisa kakhulu kwati kutsi sihlanganyele ngekutimisela kuwo nekutsi sibameme bonkhe bantfu lebesingakhona kubamemela kulelidzili lesilungiselelwe lona nguJehova.