Simemo Lesiya Kumuntfu Ngamunye

1. Utawucala nini umkhankaso wekumemela bantfu emhlanganweni wesifundza?

¹ Nangabe ucitse sikhatsi sakho netimali ulungiselela sidlo lesikhetsekile lapho utawumema khona umndeni nobe bangani, akungabateki kutsi utawuba nemdlandla nasewubamema. Ngendlela lefanako, kwentiwe umsebenti lomnyenti kakhulu nakulungiselelwa imfundvo lesitawube siniketwa yona emihlanganweni yesifundza letako. Nakusesele emaviki lamatsatfu kutsi kucale umhlangano, Jehova utasiniketa litfuba lekutsi simeme labanye bantfu kutsi nabo babe khona. Yini letawusisita kutsi sibe nemdlandla nasihambisa timemo?

2. Yini letasikhutsata kutsi sihlanganyele ngelizinga lelisetulu kulomkhankaso?

² Nasizindla ngendlela tsine lesizuza ngayo emfundvweni Jehova lasiniketa yona emihlanganweni yesifundza, sitawukhutsateka kutsi sihlanganyele ngelizinga lelisetulu kulomkhankaso. (Isa. 65:13, 14) Kufanele sikhumbule nekutsi lomkhankaso lesiwenta minyaka yonkhe uba nemiphumela lemihle. (Fundza libhokisi lelitsi “Lomkhankaso Uba Nemiphumela.”) Labanye bantfu lesibamemako batawuba khona emhlanganweni, kantsi labanye bona angeke. Kodvwa-ke ngisho nobe bangaba bangakhi bantfu labatawuba khona, kutimisela kwetfu kulomkhankaso kuyamdvumisa Jehova futsi kuveta kutsi wephana ngesandla lesivulekile.—Hla. 145:3, 7; Semb. 22:17.

3. Timemo temhlangano titawuhanjiswa njani?

³ Sigungu salabadzala kufanele sincume kutsi yini lengentiwa kuze simemo sisakatwe etindzaweni letinyenti, kuhlanganise nekutsi singashiywa yini emakhaya lapho kute khona bantfu nobe kutsi kufanele sihanjiswe yini etindzaweni tawonkhe wonkhe letisensimini yenu. Ngetimphelasontfo, bomagazini kufanele bahanjiswe kanye naletimemo nangabe kufanele. Nasewuphelile lomkhankaso kutawusijabulisa kakhulu kwati kutsi sihlanganyele ngekutimisela kuwo nekutsi bantfu labanyenti nabo babe khona kulelidzili lekudla Jehova lasilungiselele lona.

Lomkhankaso Uba Nemiphumela

Eminyakeni lembalwa leyendlulile ngesikhatsi lomunye dzadze ahlanganyela kulomkhankaso wekumema bantfu, abetibuta kutsi yonkhe lemetemo layentako itawuba nayo yini imiphumela. Watibuta: ‘Bantfu batawusemukela yini lesimemo futsi babe khona emhlanganweni?’ Ekuseni ngeMgcibelo wemhlangano, wabona lelinye lijaha lelisenkholweni yebuSikh lihleti edvute naye wabese uyatetfula kulo. Lelijaha lamtjela kutsi belitfole simemo, ngako leta kulomhlangano. Belinemibuto leminyenti futsi lodzadze wakhona kuyiphendvula. Lelijaha lachaza indlela lebeliwujabulela ngayo lomhlangano nekutsi latsintseka kangakanani ngekubona indlela bantfu lebebakulomhlangano lebebagcoke ngayo kanye nendlela lebebatiphetse ngayo. Ngelilanga lelifanako, lodzadze waphindze wacoca nalenye indvodza nemkayo lebebahleti edvutane naye. Nabo bebatfole simemo futsi bebete ngebhasi kulomhlangano. Bebawujabulela lomhlangano futsi bahlela nekutsi baphindze babe khona ngeLisontfo. Ngako-ke lodzadze wabese uyayibona indlela lomkhankaso lowentiwa minyaka yonkhe lobaluleke ngayo.
Emhlanganweni wesifundza losandza kuba khona, lomunye umzalwane nadzadze wakakhe labamahlahlandlela lavamile batetfula kulenye indvodza lekhulile kanye nemkayo. Laba lababili bachaza kutsi bebacala kuba kulomhlangano. Lamahlahlandlela ababuta atsi: “Ngubani lonimemile?” Baphendvula batsi: “Satsi nasifika ekhaya ngalelinye lilanga, satfola simemo ngaphansi kwemnyango.” Basifundza lesimemo baze bagcwalisa ngisho nalesiceshana lesingemuva. Labanye lebebakulomhlangano badla kudla kwabo kwasemini kanye nabo. Bawujabulela kakhulu lomhlangano baze bahlela nekuba khona ngelilanga lelilandzelako. Kwahlelwa kutsi bavakashelwe ekhaya ngobe bebafisa kutfola lwati lolubanti.