Emalanga Lamatsatfu Ekucabuleka Ngekwakamoya
1. Yini lesitawuyitfola emhlanganweni wesigodzi walonyaka?
1 Kulelive laSathane lelomile ngekwakamoya, Jehova uyachubeka nekuticabula tinceku takhe. (Isa. 58:11) Lenye indlela Jehova layisebentisako kute asivuselele ngumhlangano wesigodzi waminyaka yonkhe. Njengobe umhlangano walomnyaka usondzela, singakulungela njani kutfola kucabuleka kwakamoya kanye nekucabula labanye?—Taga 21:5.
2. Ngumaphi emalungiselelo lokufanele sicedzele kuwenta?
2 Nangabe usengakenti njalo, tinike sikhatsi sekuhlela timo takho kanye netasemsebentini kute ukwati kuba khona kuwo omatsatfu lamalanga emhlangano. Sewusibalile yini sikhatsi lotawusisebentisela kuya emhlanganweni lilanga ngalinye kute ukwati kufika kusenesikhatsi futsi utfole indzawo yekuhlala ngembikwekutsi luhlelo lucale? Kute lesifuna kusilahlekele kulokudla kwakamoya lokutawusiniketa emandla Jehova lasihlelele kona! (Isa. 65:13, 14) Sewuhlelile yini kutsi utawulala kuphi nekutsi utawuhamba ngani?
3. Ngutiphi tintfo letingasita tsine kanye nemindeni yetfu kutsi sizuze kakhulu eluhlelweni lwemhlangano?
3 Yini letawukusita kutsi ulalelisise nakuchubeka luhlelo lwemhlangano? Nangabe kungenteka, lala ngalokwenele ngawo onkhe emalanga emhlangano. Naka sikhulumi futsi uvule yonkhe imibhalo eBhayibhelini lakho. Bhala emaphuzu. Kungaba kuhle kutsi imindeni ihlale ndzawonye kute batali bakwati kusita bantfwana babo kutsi balalelisise. (Taga 29:15) Mhlawumbe entsambama ningacoca njengemndeni ngemaphuzu labalulekile leniwatfole emhlanganweni. Kute umndeni wakho uchubeke ucabuleka ngisho nangemuva kwemhlangano, ningahlela sikhatsi ekuKhonteni Kwemndeni kwakusihlwa sekutsi nicoce ngemaphuzu leningawasebentisa.
4. Singabasita njani labanye ebandleni letfu kutsi bacabuleke ngekwakamoya?
4 Sita Labanye Kutsi Bacabuleke: Sifuna kutsi nalabanye bacabuleke ngekwakamoya. Bakhona yini bamemeteli lasebakhulile nobe labanye ebandleni lakini labadzinga lusito kute bakwati kuya emhlanganweni? Ungakwati yini kubasita? (1 Joh. 3:17, 18) Labadzala, ikakhulukati babonisi bemacembu, kufanele baciniseke kutsi bamemeteli labanjalo bayalutfola lusito labaludzingako.
5. Sitawutihambisa njani timemo temhlangano? (Fundza nelibhokisi lelingenhla.)
5 Njengobe sihlale senta, emavikini lamatsatfu ngembikwekutsi kucale umhlangano wetfu sitawuhlanganyela emkhankasweni wekumema labanye kutsi babe khona. Emabandla kufanele atibekele umgomo wekutsi atihambise timemo latitfolile futsi ayihlanganise insimi yawo. Timemo lenitawusala nato nakuphela lomkhankaso kufanele nitiphatse emhlanganweni kute nitisebentise nanifakaza ningakahleli. Nitawuniketwa kwatiswa lokubanti mayelana naloku eluhlelweni lwangaLesihlanu. Timemo leningeke nitisebentise nanisedolobheni lokubanjelwe kulo umhlangano kufanele nitinikete balindzi naningena endzaweni yemhlangano. Sicela kutsi nawe utibekele lesisodvwa, ngobe utawusidzinga enkhulumeni yekugcina ngeLisontfo.
6. Singayiveta ngatiphi tindlela imikhuba lemihle emhlanganweni?
6 Imikhuba Lemihle Iyacabula: Kulesikhatsi lapho bantfu labanyenti ‘batitsandza’ khona futsi bangayicabangeli indlela labanye labativa ngayo, kucabula kakhulu kuba kanye nemaKhristu lalwela kuba nemikhuba lemihle. (2 Thim. 3:2) Singaveta imikhuba lemihle ngekungena endzaweni yemhlangano ngekuthula nangekuhleleka futsi tihlalo sitigcinele kuphela labo lesihlala nabo ekhaya, lesihamba nabo emotweni, nobe labo lesisafundza nabo liBhayibheli. Sitawulalela sicondziso sasihlalo nakasicela kutsi sihlale phansi kute silalele umculo lodlalwa ngembikwekucala kweluhlelo ngalunye. Kungumkhuba lomuhle kubeka bomahlalekhikhini betfu nobe ema-pager esimeni lesingeke siphatamise labanye nakusachubeka umhlangano. Siphindze sivete imikhuba lemihle ngekutsi singakhulumi, singabhali imilayeto ngabomahlalekhikhini, singadli nobe sehle senyuka ngaphandle kwesidzingo nakusachubeka umhlangano.
7. Singacabuleka njani nasinebazalwane betfu futsi natsi singabacabula njani?
7 Budlelwane Lobucabulako: Imihlangano isiniketa ematfuba lamanyenti ekujabulela bunye kanye nebuzalwane bebuKhristu. (Hla. 133:1-3) Kungani ungatsatsi sinyatselo kucala, ‘uvule inhlitiyo’ yakho kute wati bazalwane kanye nabodzadze labasuka kulamanye emabandla? (2 Khor. 6:13) Ungatibekela umgomo wekutsi wati umuntfu munye nobe umndeni munye lilanga ngalinye. Likhefu lasemini lisivulela litfuba lelihle lekwenta njalo. Ngako-ke, phatsa kudla lokumelula futsi ujabulele kudla kanye nekucoca nalabanye labakhona kunekutsi uphume uyewutsenga nobe uye endzaweni yekudlela. Loku kutawukwenta kutsi utfole bangani labasha nalabatawuhlala sikhatsi lesidze.
8. Kungani kufanele sibe tisebenti tekutitsandzela emhlanganweni, futsi loko singakwenta njani?
8 Kucabula kakhulu kusebenta kanye nalabanye lesikholwa nabo emsebentini longcwele! Ungakwati yini kuba sisebenti sekutitsandzela ehhovisini lelitsite nobe usite libandla lakini esabelweni salo sekuhlanta? (Hla. 110:3) Nangabe usengakabi nesabelo, sicela ucabangele kutsintsana neliHhovisi Letisebenti Tekutitsandzela nawufika emhlanganweni. Umsebenti uyajabulisa futsi ube melula nakunetisebenti letinyenti.
9. Kungani kufanele sikunakisise kutiphatsa kwetfu kanye nendlela lesibukeka ngayo nasisemhlanganweni?
9 Kutiphatsa Kwetfu Kuyabacabula Labo Labasibukele: Sisuke sitimenywa temhlangano kuwo omatsatfu emalanga, hhayi nakusachubeka luhlelo kuphela. Labo labasibukele nasisedolobheni lokubanjelwe kulo umhlangano kufanele bakwati kubona umehluko lokhona emkhatsini wetfu nalabo labangasibo boFakazi. (1 Phet. 2:12) Kugcoka nekutilungisa kwetfu endzaweni yemhlangano, endzaweni lesilala kuyo, nobe etindzaweni tekudlela kufanele kudvumise Jehova. (1 Thim. 2:9, 10) Nasifake timbeji, tibukeli titawukwati kubona kutsi siboFakazi BaJehova. Loku kungasivulela litfuba lekutitjela ngalomhlangano nelekuniketa bufakazi lobengetiwe.
10. Singaciniseka njani kutsi tisebenti tasemahhotela nasetindzaweni tekudlela tiba nembono lofanele ngemhlangano wetfu?
10 Singabambisana njani netisebenti tasemahhotela kanye netasetindzaweni tekudlela? Akukafaneli sibhalise emakamelo lamanyenti kunalawo lesitawadzinga, ngobe loko kungenta kutsi labanye bangayitfoli indzawo yekulala. Nangabe lelihhotela liphitsitela nasisangena nobe lapho sesiphuma, kufanele sibeketele futsi sibe nemusa. (Khol. 4:6) Kufanele sishiye ithiphu levamile etisebentini tasetindzaweni tekudlela, nobe kuleto tasemahhotela letisiphatsela imitfwalo, tisihlantele emakamelo, futsi tisentele naleminye imisebenti.
11. Ngukuphi lokuhlanganwe nako lokuveta bufakazi lobuhle lobuletfwa kutiphatsa kwetfu lokuhle kwebuKhristu?
11 Kutiphatsa kwetfu lokuhle emhlanganweni kwenta labanye bacabangeni ngatsi? Ngekusho kwalesinye sihloko seliphephandzaba, umphatsi walesinye sakhiwo lesasetjentiselwa umhlangano watsi: “Labantfu banemusa kakhulu. Siyakujabulela kuba nabo umnyaka ngamunye.” Emnyakeni lophelile, lomunye longasiye Fakazi walahlekelwa sipatji sakhe semali ehhotela lelalisetjentiswa ngulabo labebete emhlanganweni. Ngesikhatsi lesipatji sibuyiselwa kumphatsi walelihhotela sisenako konkhe lobekungekhatsi, naku lakutjela umnikati waso: “Bonga kutsi boFakazi BaJehova bebabambe umhlangano wabo dvutane nalelihhotela, futsi ngibo labebagcwele lana. Ngaphandle kwaloko, lesipatji sakho besingeke sibuye.”
12. Njengobe umhlangano usondzela, kufanele ube yini umgomo wetfu, futsi kungani?
12 Imihlangano yalomnyaka seyisedvute. Kucitfwe sikhatsi lesinyenti futsi kwentiwa nemetamo lemikhulu kulungiswa kutsi luhlelo lwemhlangano kanye nendzawo lesitawube sikuyo kusicabule. Tibekele umgomo wekuba khona kuwo omatsatfu emalanga, futsi ukulungele loko Jehova kanye nenhlangano yakhe labakulungiselele kona. Timisele kucabula labanye ngemikhuba yakho lemihle, budlelwane lobakhako, kanye nekutiphatsa kwakho lokuhle. Ngaleyo ndlela wena kanye nalabanye nitawutiva njengalomunye lobekasemhlanganweni emnyakeni lophelile lowabhala: “Kute lokunye lokwake kwangenetisa kanje!”
[Emavi lahambisana nesitfombe ekhasini 4]
Njengobe sihlale senta, emavikini lamatsatfu ngembikwekutsi kucale umhlangano wetfu sitawuhlanganyela emkhankasweni wekumema labanye kutsi nabo babe khona
[Emavi lahambisana nesitfombe ekhasini 6]
Kugcoka nekutilungisa kwetfu endzaweni yemhlangano, endzaweni lesilala kuyo, nobe etindzaweni tekudlela kufanele kudvumise Jehova
[Emavi lahambisana nesitfombe ekhasini 7]
Timisele kucabula labanye ngemikhuba yakho lemihle, budlelwane lobakhako, kanye nekutiphatsa kwakho lokuhle
[Box on pages 4-7]
Tikhumbuto Temhlangano Wesigodzi Wa-2011
◼ Tikhatsi Teluhlelo: Kuwo omatsatfu emalanga, luhlelo lwemhlangano lutawucala nga-9:00 ekuseni. Nasekwetfulwe umculo lowendvulela kucala kweluhlelo, sonkhe kufanele sihlale phansi kute luhlelo lucale ngendlela lehloniphekile. NgaLesihlanu luhlelo lutawuphela nga-4:15 ntsambama, ngeMgcibelo luphele nga-4:30 ntsambama, kantsi ngeLisontfo lutawuphela nga-3:05 ntsambama.
◼ Tindzawo Tekupaka: Kuto tonkhe tindzawo temhlangano lesiniketwe ligunya lekupaka kuto, kutawupakwa mahhala, futsi letindzawo titawutfolwa ngibo bonkhe labete emhlanganweni nangabe tisekhona. Njengobe esikhatsini lesinyenti tindzawo tekupaka tiba tincane, kugibela nalabanye emotweni kunganciphisa linani letimoto letita endzaweni yemhlangano.
◼ Tindzawo Tekulala: Emafomu eticelo tetindzawo tekulala (CO-5) ayatfolakala kute bamemeteli labawadzingako bakwati kuwagcwalisa. Ikomidi Yemsebenti kufanele ihlole kutsi lommemeteli uyafaneleka yini, isebentise ticondziso letikulelifomu kanye nencwadzi ya-December 14, 2010, lebeyiya kuto tonkhe tigungu talabadzala. Loku kwentelwe kuphela bamemeteli labanekutiphatsa lokuhle, kanye nebantfwana babo nabo labatiphatsa kahle.
◼ Kugcina Tihlalo: Tihlalo ungatigcinela kuphela labo lohamba nabo emotweni nobe labo lohlala nabo ekhaya, kanye nalabo lobachubela tifundvo teliBhayibheli.—1 Khor. 13:5.
◼ Kudla Kwasemini: Sicela nitiphatsele kudla kwasemini kunekutsi niphume endzaweni yemhlangano kute niyewutsenga kudla ngesikhatsi selikhefu lasemini. Ningawaphatsa ema-cooler bag lamancane langangena ngaphansi kwesitulo. Ema-cooler bag lamakhulu kufanele abekwe etindzaweni lenitilayelwa balindzi. Titja letifako kanye netjwala akukavumeleki endzaweni yemhlangano.
◼ Iminikelo: Singakhombisa kubonga kwetfu ngemhlangano ngekutsi sente iminikelo lesitincumele yona yemsebenti wemhlaba wonkhe eHholweni letfu leMbuso nobe endzaweni yemhlangano. Nangabe ufuna kunikela ngelisheke, ungacela ligama le-akhawunti eKomidini Yemhlangano. Imishini lesebentisa likhadi (electronic card) itawube ikhona kuletinye tindzawo temhlangano kute bantfu bakwati kwenta iminikelo ngemakhadi (debit nobe credit card). Sicela utsintse iKomidi Yemhlangano kute utfole kutsi lemishini itawube ikuphi.
◼ Tingoti Kanye Netimo Letiphutfumako: Nangabe kuvela simo lesiphutfumako setemphilo endzaweni yemhlangano, sicela nitsintse umlindzi losedvute, lotawutsintsa beLusito Lwekucala ngekushesha kute sisebenti lesiceceshiwe lesikulomhlangano sikwati kuhlola simo bese siniketa lusito loludzingekako.
◼ Imitsi: Nangabe utawudzinga imitsi, sicela uciniseke kutsi uphatsa leyenele, ngobe angeke itfolakale endzaweni yemhlangano.
◼ Kwekugwabela: Umnyaka ngamunye kuba nekulimala lokunyenti kwebantfu lokubangelwa ticatfulo. Kuncono kukhetsa ticatfulo letizitsile naletikwenela kahle, kute ukwati kuhamba etitebhisini, etinsimbini letinetikhala, nakuletinye tindzawo letingaba yingoti.
◼ Kutsebula: Tintfo tekutsebula akukafaneli tichunywe kugesi nobe emishinini ye-sound lesendzaweni yemhlangano, futsi kufanele tisetjentiswe ngendlela lengabaphatamisi labanye.
◼ Tincola Tetinswane: Tincola tetinswane akukafaneli tiletfwe enkhundleni yemhlangano. Nanobe kunjalo, temukelekile tihlalo tekuphepha tebantfwana labancane (safety seats) letingabekwa edvute netihlalo tebatali.
◼ Emakha: Imihlangano leminyenti ibanjelwa etindzaweni letivalekile letinetintfo tekungenisa umoya. Ngako-ke, kutawukhombisa kutsi sinelutsandvo nasilinganisela endleleni lesiwasebentisa ngayo emakha, ngisho nalawo lanemandla langalimata umuntfu lonenkinga yekuphefumula nobe lonetinkinga letihlobene naloko.—1 Khor. 10:24.
◼ Emafomu Latsi “Siza Ulandelele” (S-43): Lifomu lelitsi “Siza Ulandelele” (S-43), kufanele lisetjentiswe kute kubhalwe imininingwane yemuntfu lokhombise inshisekelo nakufakazwa kuye ngalokungakahlelwa ngesikhatsi semhlangano. Bamemeteli kufanele baphatse lifomu lelilodvwa nobe lamabili nabeta emhlanganweni. Emafomu lagcwalisiwe ningawayisa Endzaweni Yetincwadzi, nobe niwanikete mabhalane welibandla lenu nasenibuyele ebandleni.—Fundza Umsebenti Wetfu WeMbuso wa-November 2009, likh. 4, ngesiZulu.
◼ Tindzawo Tekudlela: Dvumisa libito laJehova ngendlela lotiphatsa ngayo nawusetindzaweni tekudlela. Kuletindzawo, kuyintfo levamile kushiya ithiphu lengemaphesenti langu-10 kuya kulangu-15.
◼ Umsebenti Wekutitsandzela: Injabulo lesiyitfola ngekuba khona emhlanganweni itawuba yinkhulu kakhulu nangabe siba tisebenti tekutitsandzela kute sisite emisebentini ledzinga kwentiwa endzaweni yemhlangano. (Imis. 20:35) Bonkhe labafisa kwenta kanjalo bangatsintsa liHhovisi Letisebenti Tekutitsandzela emhlanganweni. Bantfwana labangaphansi kweminyaka lengu-16 nabo banganikela ngekutsi basebente nebatali babo nobe nalomunye umuntfu lomdzala.
◼ Tingoma: Emabandla angafisa kutilungiselela kusenesikhatsi tingoma letitawusetjentiswa emhlanganweni. Nati tingoma letitawuhlatjelwa: NgaLesihlanu: 5, 18, 31, 30, 86, kanye na-19. NgeMgcibelo: 93, 40, 59, 24, 89, kanye na-134. NgeLisontfo: 109, 99, 133, 69, 64, kanye na-2.
[Box on page 5]
Sitawusihambisa Njani Lesimemo?
Kute sikwati kuhlanganisa insimi yetfu, kufanele singakhulumi kakhulu. Singatsi: “Sawubona. Sisemkhankasweni wemhlaba wonkhe wekusakata lesimemo. Nasi sakho. Utawutfola imininingwane leminyenti kuso.” Likhasi lekucala lalesimemo lentelwe kuvusa lilukuluku lebantfu, ngako niketa umnikati welikhaya ngendlela letawumenta alibone. Bani nemdlandla. Nawuhambisa letimemo ngetimphelasontfo, ungahambisa nabomagazini nakufaneleka.