Kutiphatsa Lokudvumisa Nkulunkulu
1. Kwentiwa yini kutsi boFakazi BaJehova banakeke nabaye emihlanganweni yesigodzi?
1 Nasisemihlanganweni yesigodzi, kuba melula ngebantfu kusibona kutsi site kuyo. Etindzaweni letinyenti lokubanjelwa kuto umhlangano wesigodzi, betindzaba bavame kwatisa sive kutsi sikhona. Emahhotela nasetindzaweni tekudlela kuvame kugcwala bantfu labete emhlanganweni futsi bantfu bakuleyo ndzawo bayanaka kutsi kunetivakashi letinyenti letifake timbeji temhlangano wesigodzi. Letikhumbuto letilandzelako titasisita kutsi sidvumise Nkulunkulu wetfu ngekutiphatsa kwetfu nasisendzaweni yemhlangano.—1 Phet. 2:12.
2. Singamdvumisa njani Nkulunkulu ngekwembatsa sizitse nasisendzaweni yemhlangano wesigodzi?
2 Kwekugcoka Lokuzitsile: Kugcoka kwetfu ngendlela lezitsile nasisemhlanganweni kuyabajabulisa labo labasibonako. Noma kunjalo, indlela lesigcoka ngayo ngaletinye tikhatsi, lokufaka ekhatsi nasifika ehhotela, nasisendzaweni yekudlela, nasiyotsenga, nome nasikuletinye tindzawo isho lukhulu kubantfu labasibonako. Nanobe kungadzingeki sigcoke timphahla lesitigcoka nasisemhlanganweni kuletindzawo, lesikugcokile kufanele kuzitse, kuhlonipheke futsi kungakhombisi budlabha. Labasibonako kufanele bakhone kubona umehluko emkhatsini wetfu nebantfu labangakholwa. (Rom. 12:2) Ngetulu kwaloko, kufanele sifake timbeji tetfu temhlangano wesigodzi kuze tikhangise ngalomhlangano lokutawuvula ematfuba ekufakaza kuphindze kwente nalabanye labete emhlanganweni kutsi basibone.
3. Singabonisa njani kutsi sinesineke nemoya wekubonga?
3 Sineke Nekubonga: Kulesikhatsi lapho bantfu labanyenti emhlabeni baticabangela bona futsi bangabongi, asingabati kutsi batawucabuleka labasibonako nasinesineke nemoya wekubonga lokufaka ekhatsi kwenta loko kulabasebenta ehhotela nasendzaweni yekudlela. (2 Thim. 3:1-5) Nasibeka tindzawo tekuhlala nobe nasifolele kuyotfola tintfo letikhululilwe emhlanganweni, kufanele singaticabangeli tsine kuphela kodvwa sicabangele nalabanye. (1 Khor. 10:23, 24) Ngemuva kwekuba khona emhlanganweni kwekucala ngca, lenye indvodza letsandza kufundza liBhayibheli yatsi: “Kute ngisho nayinye inkhulumo lengiyikhumbulako kuletetfulwa ngalelolanga, kodvwa kutiphatsa kwaboFakazi ngeke ngikukhohlwe.”
4. Yini lesenta sifise kuba ngemavolontiya emhlanganweni wesigodzi nangabe timo tetfu tisivumela?
4 Emavolontiya Latinikele: EmaKhristu eliciniso atiwa ngekuba nesifiso sekuvolontiya. (Hla. 110:3) Ungavolontiya yini kuze usite emhlanganweni wesigodzi? Kulenye indzawo lebekutawuchutjelwa kuyo umhlangano wesigodzi, bazalwane nabodzadze labacishe babe ngu-600 bavolontiya kuhlanta usengakafiki umhlangano. Tisebenti taleyondzawo tatsi: “Siyacala kukubona lokunjena. Kuyamangalisa kutsi bonkhe labantfu labanyenti kangaka bayavolontiya.” Silangatelela kufika kwemihlangano yesigodzi ya-2013 kanye nelitfuba lesitawuba nalo lekungagcini ngekulalela nekufundziswa nguNkulunkulu kuphela kodvwa nelekumkhatimulisa.
[Libhokisi ekhasini 3-6]
Tikhumbuto Temhlangano Wesigodzi Wa-2013
◼ Tikhatsi Teluhlelo: Umculo wekucalisa umhlangano utawucala nga- 9:00 ekuseni kuwo omatsatfu emalanga. Ngaleso sikhatsi, sonkhe kufanele sihlale phansi kute luhlelo lucale ngendlela lehloniphekile. NgaLesihlanu nangeMgcibelo ingoma yekwephetsa nemthantazo kutawetfulwa nga-4:30 entsambama kantsi ngeliSontfo kutawetfulwa nga-3:15 entsambama.
◼ Tindzawo Tekupaka: Kuto tonkhe tindzawo temhlangano lesiniketwe ligunya lekupaka kuto, kutawupakwa mahhala, futsi letindzawo titawutfolwa ngibo bonkhe labete emhlanganweni kuye ngekutsi ngubani lofike kucala. Njengobe esikhatsini lesinyenti tindzawo tekupaka tiba tincane, kugibela nalabanye emotweni kutawunciphisa linani letimoto letita endzaweni yemhlangano.
◼ Tindzawo Tekulala: Emafomu latsi “Isicelo Sendawo Yokulala Sezidingo Ezikhethekile” (CO-5-ZU) ayatfolakala kute bamemeteli labawadzingako bawagcwalise. Ikomidi Yemsebenti Yelibandla kufanele ihlole kutsi lommemeteli uyafaneleka yini, isebentise ticondziso letikulelifomu kanye nencwadzi ya-December 14, 2010, leyabhalelwa tonkhe tigungu talabadzala. Lelilungiselelo lentelwe bamemeteli nebantfwababo labasibonelo.
◼ Kugcina Tihlalo: Indzawo ungayibekela kuphela labo lohamba nabo emotweni nobe labo lohlala nabo ekhaya kanye nalabo lobachubela tifundvo teliBhayibheli. Yincane indzawo lelungiselelwa kuhlala labakhulile nalababutsaka, ngako-ke kungase kungenteki kutsi onkhe emalunga emndeni wabo ahlale nabo. Sicela letihlalo nitishiyele labakhulile, lababutsaka kanye nalabo lababasitako.—1 Khor. 13:5.
◼ Kudla Kwasemini: Sicela nitiphatsele kudla kwasemini kunekutsi niphume endzaweni yemhlangano niyewutsenga kudla ngesikhatsi selikhefu. Ningawaphatsa ema-cooler bag lamancane leningawabeka ngephansi kwetitulo. Ema-cooler bag lamakhulu kufanele abekwe etindzaweni balindzi labatanilayela tona. Titja letifako netjwala akukavumeleki endzaweni yemhlangano.
◼ Iminikelo: Singakhombisa kubonga kwetfu ngemalungiselelo alomhlangano ngekunikela iminikelo lesitincumele yona yemsebenti wemhlaba wonkhe nasisemhlanganweni. Nangabe ufuna kunikela ngelisheke, kufanele ulibhale kutsi “Christian Congregation of Jehovah’s Witnesses of South Africa.” Emihlanganweni leminyenti kutawemukeleka kunikela usebentisa i-debit nobe i-credit card.
◼ Tintfo Letisetjentiselwa Kwelapha: Nangabe utawudzinga imitsi, sicela uciniseke kutsi uphatsa leyenele, ngobe ngeke itfolakale endzaweni yemhlangano. Imijovo netinyalitsi talabanesifo sashukela kufanele ilahlwe endzaweni lelungiselelwe kulahla tintfo letiyingoti hhayi emigconyeni yetibi lesemhlanganweni nasemahhotela.
◼ Ticatfulo: Njalo ngemnyaka kuba nebantfu labalimalako ngenca yeticatfulo, ikakhulukati emantonto. Kuncono kukhetsa ticatfulo letizitsile naletikwenela kahle kute ukhone kuhamba etitebhisini, etinsimbini letinetikhala, nakuletinye tindzawo letingaba yingoti.
◼ Tincola Tetinswane Netitulo Tekuhlala Ngephandle: Tincola tetinswane kanye netitulo tekuhlala ngephandle akukafaneli tifakwe ngekhatsi ehholeni lemhlangano. Nome kunjalo, temukelekile tihlalo tebantfwana labancane (safety seats) nangabe tingakhona kufaselwa esitulweni lesisedvute nebatali.
◼ Emakha: Imihlangano leminyenti ibanjelwa etindzaweni letivalekile letinetintfo tekungenisa umoya. Ngako-ke, kutawukhombisa kutsi sinelutsandvo nasilinganisela endleleni lesiwasebentisa ngayo emakha lanemandla langalimata umuntfu lonenkinga yekuphefumula nobe lonetinkinga letihlobene naloko.—1 Khor. 10:24.
◼ Emafomu Latsi “Siza Ulandelele” (S-43-ZU): Lifomu lelitsi “Siza Ulandelele” (S-43-ZU), kufanele lisetjentiswe kute kubhalwe imininingwane yemuntfu lokhombise kutsi uyakutsandza kufundza nakufakazwa kuye kungakahlelwa ngesikhatsi semhlangano. Emafomu lagcwalisiwe ningawayisa Endzaweni Yetincwadzi nobe niwanikete mabhalane welibandla lenu nasenibuyele ebandleni.
◼ Tindzawo Tekudlela: Dvumisa ligama laJehova ngekutiphatsa kahle nawusetindzaweni tekudlela. Gcoka ngendlela lefanele umKhristu. Kuletindzawo, kuyintfo levamile kushiya ithiphu lengemaphesenti langu-10 kuya kulangu-15.
◼ Umsebenti Wekutitsandzela: Bonkhe labafisa kuvolontiya bangaya eHhovisini Letisebenti Tekutitsandzela emhlanganweni. Bantfwana labangaphansi kweminyaka lengu-16 budzala bangasebenta nebatali babo nobe nalomunye umuntfu lomdzala ngemvume yemtali.