Umkhankaso Lonetitselo

Nasekusele emaviki lamatsatfu kufike umhlangano wesigodzi, emabandla atawuphindze abe nemkhankaso wekuhambisa timemo kubantfu labangatsandza kutitfola. Kunetinzuzo kuba khona kwalomkhankaso waminyaka yonkhe. Bantfu labatitsatsako timemo bese bayeta emhlanganweni wesigodzi, bavame kujatjuliswa tinkhulumo letisekelwe eBhayibhelini, kuhleleka kwemahhovisi lahlukehlukene lokusebenta kuwo emavolontiya, kutiphatsa kahle kwetfu nebunye betfu. (Hla. 110:3; 133:1; Isa. 65:13, 14) Nome kunjalo, lomkhankaso uba nemiphumela lemihle yini ikakhulukati etindzaweni lapho bantfu labanesifiso sekuya emahlanganweni kudzingeka bahambe emabanga lamadze baye kuwo?

Ngemuva kwemhlangano wesigodzi wanga-2011, lelinye lihhovisi leligatja latfola incwadzi levela kulomunye make lowatfola simemo sibekwe emnyango wendlu yakhe. Bekavame kubhaca nakunconcotsa boFakazi BaJehova. Wabhala watsi: “Benginelikhaya lelihle, indvodza lengiphetse kahle futsi bengicabanga kutsi nginako konkhe lokungangenta ngijabule. Kuyadzabukisa kutsi bengisolo ngingajabuli futsi kuphila kwami bekute injongo. Ngancuma kuhamba ngemoto emakhilomitha langu-320 kuze ngibe khona emhlanganweni wangeMgcibelo.” Wawujabulela kakhulu lomhlangano waze washayela indvodza yakhe wayitjela kutsi utawulala lapho kuze abe khona nangeLisontfo. Uchubeka atsi: “Ngatilalela tonkhe tinkhulumo, ngabona boFakazi BaJehova labanyenti futsi ngancuma kutsi angisafuni kuyekela kuya emihlanganweni yabo.” Nakabuyela ekhaya, wacala kuchutjelwa sifundvo futsi ngemuva kwetinyanga letine, waba ngummemeteli longakabhajatiswa. Uphindze atsi: “Ngijabula kakhulu ngekutsi ngatfola lesa simemo emnyango wakami ngoba nyalo kuphila kwami sekunenjongo.”

Labanye labatfola timemo batawuba khona emhlanganweni. Ngako-ke, timisele kulomkhankaso lobalulekile. Timemo letitawusala, tiphatse emhlanganweni bese usebentisa tona nawufakaza ungakahleli.

[Libhokisi ekhasini 5]

Sitasihambisa Njani Simemo?

Kute sikwati kuhlanganisa insimu, kufanele singakhulumi kakhulu. Singase sitsi: “Sawubona. Sisemkhankasweni wemhlaba wonkhe wekuniketa bantfu lesimemo. Nasi sakho. Utawutfola imininingwane leminyenti kuso.” Bani nemdlandla. Nasihambisa timemo ngetimphelasontfo, kufanele sitihambise nabomagazini nakufaneleka.