“Nihlalisane Ngekuthula Nebantfu Bonkhe”
1. Ngusiphi seluleko seliBhayibheli lokufanele sisisebentise nasitfola bantfu labasicasukelako?
1 Bantfu BaJehova batsandza kuthula futsi umsebenti wetfu wekushumayela unekuthula. (Isa. 52:7) Ngaletinye tikhatsi sitfola bantfu labacasulwa kutsi sibavakashele. Yini letasisita kutsi sibe nekuthula etimeni letinjalo?—Rom. 12:18.
2. Kubaluleke ngani kutsi siticondze timo tebantfu?
2 Ticondze Timo Tebantfu: Ngisho nome labanye basitfukutselela ngobe bangalifuni liciniso, labanye singabatfola batfukutseliswe nguletinye tintfo letingakahlobani nemlayeto lesibatjela wona. Kungenteka kutsi sibafikele ngesikhatsi lesikabi. Lesicoca naye kungenteka kutsi ukhatsatwa tinkinga takhe. Ngisho nome atfukutseliswa tindzaba letimnandzi, kufanele sikhumbule kutsi kungenteka unemagama ekutjelwa ngatsi. (2 Khor. 4:4) Kucondza kutasisita kutsi singacasuki futsi sibone kutsi lomuntfu akatfukutseliswa ngitsi.—Taga 19:11.
3. Singakhombisa njani kutsi siyamhlonipha lesicoca naye?
3 Bani Nenhlonipho: Bantfu labanyenti ensimini basime etinkholelweni letitsite. (2 Khor. 10:4) Banelilungelo lekutikhetsela kutsi batasilalela yini nome cha. Asifuni nanini kutsi sikubukele phansi labakukholelwako nome sivete kutsi tsine silati kakhulu liBhayibheli kunabo. Nangabe basicela kutsi sihambe, kufanele sente njalo ngenhlonipho.
4. Kusho kutsini kukhuluma ngemusa?
4 Khuluma Ngemusa: Ngisho nome sikhahlametwa ngemavi, kufanele siphendvule ngemusa. (Khol. 4:6; 1 Phet. 2:23) Kunekutsi ususe imphikiswano, yetama kutfola lenivumelana ngako. Mhlawumbe singase simbute ngemusa lesicoca naye ngesizatfu lesenta angatsandzi kucoca natsi. Kuze sibalekele kucasula lesicoca naye, ngaletinye tikhatsi kuhle kutsi singezami kuphocelela kutsi sichubeke sikhuluma.—Taga 9:7; 17:14, NW.
5. Ngumiphi imiphumela levetwa kuba nekuthula nasisensimini?
5 Nasinekuthula, lesicoca naye angase ayikhumbule indlela lesenta ngayo futsi esikhatsini lesitako angamlalela lomunye nakafakaza kuye. (Rom. 12:20, 21) Ngisho nome angabonakala aphikisa kakhulu angafuni lutfo, ngalelinye lilanga angase abe ngumzalwane wetfu. (Gal. 1:13, 14) Sitawukhatimulisa Jehova siphindze sihlobise kufundzisa kwetfu nasilwela kutibamba sibe nekuthula ngisho nome lesicoca naye angalifuni liciniso.—2 Khor. 6:3.