Kwakhiwa Kwemahholwa EMbuso—Ungalikhulisa Yini Lizinga Lofaka Sandla Ngalo Kulomsebenti?
1-3. Jehova uwubusisa njani umsebenti wekwakhiwa kwemaHholwa eMbuso futsi yini lebangela kudzingeke emavolontiya lengetiwe.
1 Kujabulisa kakhulu kubona timemetelo temaHholwa EMbuso lanikelwe inyanga ngayinye ku-Msebenti Wetfu WeMbuso. Kutikhandla kwemavolontiya lakha emaHholwa eMbuso kubangele kutsi kunikelwe emaHholwa eMbuso langetulu kwa-1 000, ensimini lengephansi kweligatja leseNingizimu Afrika. Lonkhe ludvumo luya kuJehova lokungumoya wakhe lokhutsata bantfu bakhe kutsi bente lomsebenti.—Zak. 4:6.
2 Umnyaka ngamunye kusungulwa emabandla lamasha lacishe abe ngu-70 ensimimi yetfu. Loko kusho kutsi kudzingeka emaHholwa lamasha lacishe abe ngu-45, umnyaka ngamunye. Ngemnyaka wemsebenti wanga-2012, kwakhiwe emaHholwa eMbuso lamasha langu-44. Ngenca yaloko, kunesidzingo lesiphutfumako semavolontiya lengentiwe latawusita ekusheshiseni lomsebenti wekwakhiwa KwemaHholwa EMbuso.
3 Ngaphandle kwemaHholwa lesiwadzingako ngenca yekwandza lokuba khona umnyaka ngamunye, sinesikhebesi semaHholwa eMbuso langu-293. Lamanye emabandla lamakhulu solo ahlanganyela emva kwetindlu, emakhaya ebazalwane, amagaragi nasemahholweni lacashiwe. Ngetulu kwaloko, lamanyenti emaHholwa eMbuso lasevele akhiwe adzinga kulungiswa. Utawufezwa njani wonkhe lomsebenti longaka?
4. Itfolakala njani imvume yekwakhiwa kwemaHholwa eMbuso futsi ngutiphi tinzuzo tekusebentisa emapulani kanye netintfo tekwakha letitfolakala enhlanganweni?
4 Kucondziswa Kwekwakhiwa KwemaHholwa EMbuso: Lihhovisi Lekwakhiwa KwemaHholwa EMbuso lelisegatjeni laseNingizimu Afrika lengamela yonkhe imisebenti lehlobene nekwakhiwa nekulungiswa kwemaHholwa eMbuso. Emabandla kudzingeka atfole imvume lebhalwe phansi ehhovisini leligatja asengakayitsengi indzawo yekwakha nome asengakahleli kwakha. Emapulani langasetjentiswa nakwakhiwa emaHholwa EMbuso naletinye tintfo letidzingekako nakwakhiwa kuyatfolakala ehhovisini leligatja.—Fundza loko lokusebhokisini lelitsi “Emapulani Lafananako,” ekhasini 4 kanye nalelitsi “Tintfo Letidzingekako Nakwakhiwa LiHholwa LeMbuso,” ekhasini 6.
5. Ngumaphi emalungiselelo lamabili elutsandvo lentiwe kuze kusitwe emabandla akhone kuhlangabetana netindleko tekwakha emaHholwa eMbuso?
5 Kuhlangabetana Netindleko Tekwakha EmaHholwa EMbuso: Emabandla angaboleka imali enhlanganweni, leyo mali angayibhadala sikhatsi lesingaba yiminyaka lengu-20 ngaphandle kwekukhokha intalo. Nanome kunjalo, lamanye emabandla eswele kakhulu, ngako akakhoni kubhadala imali layibolekile. Ngenca yelutsandvo lesinalo, Sigungu Lesibusako sesentele lawo mabandla lilungiselelo lekutsi akhelwe emaHholwa eMbuso. Ngekwalelilungiselelo, liHhlolwa leMbuso liba lelihhovisi leligatja futsi libandla lenta livi lesincumo lekutsi liyohlale linikelela Sikhwama Sekwakhiwa kwemaHholwa EMbuso Emhlabeni Wonkhe. Ummemeteli ngamunye wenta sincumo sekutsi utabonikela imali letsite, inyanga ngayinye. (Mat. 5:37) Tindleko tekunakekela lihholwa kanye nanome ngutiphi letinye tiba semahlombe elibandla.
6, 7. (a) Liyini Licembu Lekwakha LiHholwa LeMbuso? (b) Ngumuphi umsebenti lowentiwa nakukhetfwa indzawo iphindze yentiwa ibe semtsetfweni? (Fundza libhokisi.)
6 Emacembu Ekwakha EmaHholwa EMbuso: Sekwentiwe lilungiselelo lelisha kuze kuhlangatjetwane nesidzingo lesiphutfumaka sekwakhiwa kwemaHholwa eMbuso lengetiwe. Lihhovisi leligatja selisungule Emacembu Lasitfupha Ekwakha EmaHholwa EMbuso eNingizimu Afrika. Ligatja liphindze lengamele emaKomidi Ekwakhiwa KwemaHholwa EMbuso langu-22. Lena yintfo lengakavami njengobe emagatja lamanyenti anelilungiselelo linye lekunakekela kwakhiwa kwemaHholwa EMbuso.
7 Emacembu Ekwakhiwa KwemaHholwa EMbuso abelwe kutsi akhe emaHholwa EMbuso kuphela. Ahlanganisa tisebenti tasikhatsi sonkhe tekwakha EmaHholwa EMbuso kanye nemavolontiya esikhashana ekwakha EmaHholwa EMbuso. Kokubili loku kunguleminye yemikhakha yemsebenti wasikhatsi sonkhe. Tisebenti Tekwakha EmaHholwa EMbuso kanye nemavolontiya banakekelwa ngendlela lefanako naleyo lokunakekelwa ngayo labo labakuleminye imikhakha yemsebenti wasikhatsi sonkhe lokhetsekile. Nakwakhiwa EmaHholwa EMbuso, labazalwane nabodzadze labanemakhono basebenta kanye nemavolontiya alelo bandla bawaceceshe emisebentini letsite. Ungatsandza yini kusita?
8. Yini lokufanele uyilindzele nangabe uba sisebenti sekwakha EmaHholwa EMbuso?
8 Emavolontiya ekwakha EmaHholwa EMbuso abelwa kutsi asebente sikhatsi lesingaze sibe tinyanga letintsatfu. Nangabe kunesidzingo, lihhovisi leligatja lingase licele livolontiya lelitsite kutsi lifake sicelo sekuba sisebenti sekwakha emaHholwa eMbuso. Natenta lomsebenti, tisebenti tekwakha emaHholwa EMbuso tiniketwa imadlana letsite yekunakekela tindleko tato. Tonkhe letisebenti tekutitsandzela titsi tenta umsebenti wato wekwakha tibe tingayishiyeli ngemuva inchubo levamile yekhonta Jehova. Licembu Lekwakha EmaHholwa EMbuso licitsa sikhatsi lesitsite emsebentini wekushumayela, lijabulele sifundvo se-Sicongosekulindza ndzawonye liphindze liye emihlanganweni yelibandla njalo. Ngalokuvamile, lelicembu lihlala enkambu noma endzaweni lecashiwe leseceleni kwalapho lakha khona liHholwa leMbuso. Baphila imphilo lelula futsi timo labaphila ngaphansi kwato atihlali tilula, kodvwa bativa bajabule kakhulu nababona tinkhulungwane tebazalwane tihlangene etindzaweni letihloniphekile letikhatimulisa ligama laJehova.
9, 10. (a) Uyini umsebenti Wekomidi Yekwakhiwa KwemaHholwa futsi itsembele kubani kuze lomsebenti uphumelele? (b) Nguliphi litfuba lelivulekele imindeni?
9 Emakomidi Ekwakha EmaHholwa EMbuso: Emavolontiya aleyo ndzawo labekwe yiKomidi Yekwakha EmaHholwa asita ekwakheni nasekulungiseni emaHholwa EMbuso. Avame kusebenta ngetimphelasontfo. Emakomidi Ekwakha EmaHholwa kudzingeka aphindze aceceshe labanye kutsi bahlole baphindze banakekele emaHholwa EMbuso lasavele akhona.
10 Emavolontiya aleyo ndzawo aligugu Ekomidini Yekwakhiwa KwemaHholwa EMbuso. Lamavolontiya abelwa kutsi asebente nemacembu latsite futsi angaphindze acecesheshelwe kutsi ente leminye imisebenti lemcoka. Lamavolontiya abantfu labatinikele ngekutitsandzela, labacinisekako kutsi imitfwalo labanayo ekukhonteni Jehova abayishiyeli ngemuva futsi labahlanganyela njalo emsebenti wekushumayela ngeMbuso. Batali bakhutsatwa kutsi basebente nebantfwababo. Emavolontiya laneminyaka lesemkhatsini wa-13 kanye na-15, angase asebente ngephansi kwekucondzisa kwebatali bawo. Kuphindze kube nemalungiselelo ekugadza bantfwana labancane endzaweni ledvutane nalapho kusebentela khona batali babo. Ngaleyo ndlela, kungenteka kutsi wonkhe umndeni ube nesandla kulomsebenti lojabulisako.
11. Ungasita kanjani emsebentini wekwakha emaHholwa eMbuso kanye nekuwanakekela ngisho nome timo takho tingakuvumeli kutsi loko ukwente sikhatsi sonkhe?
11 Akukaze ngaphambili kwaba nesidzingo lesiphutfuma kangaka semavolontiya latawusita ekwakheni nasekunakekeleni emaHholwa eMbuso. Kungenteka kutsi awukhoni kuba livolontiya lasikhatsi sonkhe kwamanje. Ungakhona yini kodvwa kutsi ube livolontiya lelisebenta ngetimphelasontfo? Ungase usite ekuphekeni noma ulungisele lamanye emavolontiya indzawo yekulala. Nome ngumuphi umetamo, noma ungaze ube mncane kanganani, uyasifaka sandla ekuphumeleliseni injongo yaJehova.
12. Ngubani lonemtfwalo wekugcina liHholwa leMbuso lisesimeni lesihle?
12 Kugcinwa Kwemahholwa EMbuso Asesimeni Lesihle: Bajabula kakhulu bazalwane labasebandleni nakwakhiwa liHholwa labo leMbuso. Naseliphelile, kungumtfwalo wemmemeteli ngamunye walelo bandla kugcina leloHholo lisesimeni lesihle.
13. Libito laJehova litsintseka njani ngesimo seliHholwa leMbuso?
13 Asesitsi ufikelwa tivakashi ekhaya lakho ungakalindzeli. Njengobe tingena emnyango longembili, uyaphawula kutsi kuhliphike ngalenye indlela ekamelweni lekuphumula. Nakanjani, ungativa uhlazeke kakhulu. Kungabangelwa yini loko? Ngobe simo likhaya lakho lelikuso sisho lokutsite ngemndeni wakho. Ngendlela lefanako, liHholwa leMbuso limelela Nkulunkulu Jehova kanye nebantfu bakhe. Bantfu nabafika eHholweni leMbuso, bakhandza kunjani? Engabe imithoyi ihlantekile yini? Titulo nemakhaphethi kusesimeni lesihle futsi kulungiswe kahle yini? Emafasitela ahlobile yini? Simo seliHholwa letfu leMbuso simmelela kahle yini Jehova, longuNkulunkulu lohlelekile ‘nalongcwele’?—Taga 9:10; 1 Khor. 14:33.
14, 15. Singakhombisa njani kutsi siyabonga ngekuba neliHholwa leMbuso?
14 Kudzingeka sikhumbule kutsi liHholwa letfu leMbuso lisipho lesivela kuNkulunkulu nekutsi indlela lesilinakekela ngayo ikhomba indlela lesibonga ngayo ngalesipho. Senta kahle nasitibuta kutsi: Ngiyasifaka yini sandla ekugcineni liHholwa leMbuso licocekile futsi lihlantekile? Ngiyanikela yini ngesikhatsi sami nangemandla ami ekunakekeleni liHholwa leMbuso?
15 Shengatsi ngamunye wetfu kuhlanganise nemindeni singathantaza njengoba sicabanga ngetindlela lesingakhulisa ngato lizinga letfu lekutikhandla ekunakekeleni tindzawo tekukhontela Jehova. Mayelana nekusekela lithempeli lakhe, Jehova watsi: “Libito lami. . . emehlo ami nenhlitiyo yami kuyawuhlala kulapho kulo ngaso sonkhe sikhatsi.”—1 Khos. 9:3.
Kuze utfole imininingwane lengentiwe tsintsa:
Lihhovisi Lekwakhiwa KwemaHholwa EMbuso
Lucingo: +27 11 761 1431
I-Fax: +27 11 761 1890
I-E-mail: khcd@za.jw.org
[Emavi lacashuniwe lasekhasini 3]
• Kwengamela
• Kunakekela Tindleko
• Emapulani Lafananako
• Emacembu Ekwakha EmaHholwa EMbuso
• Licembu Lelikhetsa Indzawo Liphindze Liyente Ibe Semtsetfweni
• Ikomidi Yekwakhiwa KwemaHholwa EMbuso
• Kuligcina Lisesimeni Lesikahle
• Tintfo Letidzingekako Nakwakhiwa LiHholwa LeMbuso
[Emavi lacashuniwe lasekhasini 4]
• Kwengamela
• Kunakekela Tindleko
• Emapulani Lafananako
• Emacembu Ekwakha EmaHholwa EMbuso
• Licembu Lelikhetsa Indzawo Liphindze Liyente Ibe Semtsetfweni
• Ikomidi Yekwakhiwa KwemaHholwa EMbuso
• Kuligcina Lisesimeni Lesikahle
• Tintfo Letidzingekako Nakwakhiwa LiHholwa LeMlbuso
[Libhokisi/Sitfombe ekhasini 4]
Emapulani Lafananako
Ayavumelana Nemitsetfo Yekwakha
Anciphisa Tindleko: Ligatja laseNingizimu Afrika litsenga tintfo tekwakha tibe tinyenti, ngaleyondlela litfole tintfo letisezingeni lelisetulu ngemanani laphansi.
Kulula kuwanakekela: Lamapulani lasetjentiswako afaka ekhatsi tintfo tekwakha lokulula kutinakekela, loko lokwenta kube melula kugcina liHholwa leMbuso lisesimeni lesikahle.
Onga sikhatsi: Emabandla akusadzingeki acitse sikhatsi lesidze akhetsa ipulani latayisebentisa naletinye tintfo tekwakha.
Asita ekutfutfukiseni lwati: LiHhovisi Lekwakhiwa KwemaHholwa EMbuso lisebentisa tindlela tekwakha letincono kakhulu letike tasetjentiswa kuleminye imisebenti yekwakha.
Emahholwa lasabomahambangendlwana: Kungase kusetjentiswe takhiwo letisabomahambangendlwana emabandleni lamancane noma lawo langakhoni kutfola indzawo yekwakha yawo.
[Libhokisi/Sitfombe ekhasini 4, 5]
Licembu Lelikhetsa Indzawo Liphindze Liyente Ibe Semtsetfweni
Licembu lebazalwane nabodzadze lisebenta sikhatsi sonkhe lifuna umhlaba wekwakha, likhulumisane nebanikati bawo futsi lente bunikati bawo bube semtsetfweni. Kwamanje lelicembu lichumana nemabandla langaba ngu-350 futsi lisebenta ngetindzawo lokwakhiwa kuto emaHholwa eMbuso letingaba ngu-300. Lisita emabandla laseNingizimu Afrika kanye nalawo lasemaveni labomakhelwane.
[Libhokisi/Sitfombe ekhasini 5]
Kutsiwani Ngawe?
Livolontiya Lekwakha EmaHholwa EMbuso
Ngiyafaneleka yini?
◻ Kuba lokungenani nemnyaka munye ubhajatisiwe
◻ Kuba neminyaka lephakatsi kwa-19 kuya kulengu-55 budzala
◻ Kuba ngulongakhona kuvolontiya sikhatsi sonkhe kuze kube ngulokungenani tinyanga letintsatfu
◻ Kuba ngummemeteli lobika njalo nalonenshisekelo
◻ Kuba ngulongakhona kwenta umsebenti lodzinga emandla
◻ Kuba ngulophile kahle emtimbeni nalolawula imivelo yakhe
◻ Kuba ngulonesifiso sekwenta noma ngabe ngumuphi umsebenti loniketwa wona
Ngisifaka njani sicelo?
✔ Gcwalisa lifomu i-“Application for Kingdom Hall Construction Volunteer Program” (A-25-E)
✔ Niketa Ikomidi YeMsebenti Yelibandla lifomu leligcwalisiwe
Livolontiya Lendzawo
Ngingafaneleka yini?
◻ Kuba ngulobhajatisiwe
◻ Kuba nguloneminyaka lokungenani lengu-16 budzala
◻ Kuba ngulongakhona kuvolontiya ikakhulukati ngetimphelasontfo
◻ Kuba ngummemeteli lobika njalo nalonenshisekelo
◻ Kuba ngulongakhona kwenta umsebenti lodzinga emandla
◻ Kuba ngulophile kahle emtimbeni nalolawula imivelo yakhe
◻ Kuba ngulonesifiso sekwenta noma ngabe ngumuphi umsebenti loniketwa wona
Ngisifaka njani sicelo?
✔ Gcwalisa lifomu lokutsiwa “Ifomu Lemibuzo Yezisebenzi Zokuzithandela Zamahholo Ombuso” (S-82-ZU)
✔ Niketa Ikomidi YeMsebenti Yelibandla lifomu leligcwalisiwe
[Emavi lacashuniwe lasekhasini 6]
• Kwengamela
• Kunakekela Tindleko
• Emapulani Lafananako
• Emacembu Ekwakha EmaHholwa EMbuso
• Licembu Lelikhetsa Indzawo Liphindze Liyente Ibe Semtsetfweni
• Ikomidi Yekwakhiwa KwemaHholwa EMbuso
• Kuligcina Lisesimeni Lesikahle
• Tintfo Letidzingekako Nakwakhiwa LiHholwa LeMbuso
[Libhokisi ekhasini 6]
Tintfo Letisetjentiswa Ekwakheni LiHholwa LeMbuso
Lihhovisi leligatja lilawula tintfo letinyenti letidzingekako tekwakha emaHholwa eMbuso lamasha nobe lasavele akhona. Loku kufaka ekhatsi kwenta lucwaningo ngaletintfo nekutitsenga ngebunyenti, lokwenta titfolakale ngemanani laphansi. Emabandla akhutsatwa kutsi a-ode letintfo eHhovisini Lekwakhiwa KwemaHholwa EMbuso.
Imininingwane lemayelana naleto tintfo nekutsi tibita malini iyatfolakala ku-jw.org, encenyeni letsi-“Documents.” Labanye labadzala kanye netinceku letisebentako bangakhona kubuka letintfo ku-jw.org baphindze batitsatsele khona emafomu ekuti-oda. I-Web site yetfu lesemtsetfweni seyiyindlela lencono kakhulu lihhovisi leligatja leliyisebentisako kuze lichumane nemabandla futsi kuyisebentisa konga sikhatsi nemali.
[Libhokisi/Sitfombe ekhasini 6]
Umndeni Wakho Ungasita Njani?
Bani nencenye njalo ekuhlantweni kweliHholwa leMbuso
Ngelilanga lelibekiwe lekugcina liHholwa leMbuso lisesimeni lesikahle, bani khona uphindze usebente ngekutimisela
Fundzisa bantfwabakho kugcina liHholwa leMbuso licocekile nemithoyi ihlantekile
Bikela bazalwane labanakekela liHholwa leMbuso nangabe ubona lokutsite lokudzinga kulungiswa kulo
[Titfombe ekhasini 3]
Sakhiwo lebesisetjentiswa lisengakakhiwa
Nalisakhiwa
LiHholwa LeMbuso Seliphelile
Libandla kanye NeLicembu Lekwakha EmaHholwa