Tikhombo Tencwajana Yekubhalela Emhlanganweni Wekuphila KwemaKhristu Nemsebenti Wawo
JULY 4-10
UMCEBO LOSEVINI LANKULUNKULU | TIHLABELELO 60-68
“Dvumisani Jehova, Loyilalelako Imithantazo Ayiphendvule”
(Tihlabelelo 61:1) Lalela kukhala kwami, Nkulunkulu, uve umthandazo wami.
(Tihlabelelo 61:8) Ngako libito lakho ngiyawulidvumisa kuze kube phakadze, kuze ngigcwalise tetsembiso tami imihla ngemihla.
w99 9/15 9 ¶1-4
Kungani Kufanele Utigcine Tetsembiso Takho?
Kutinikela kwetfu kuNkulunkulu kusetsembiso lesibaluleke kakhulu. Ngekutsatsa lesinyatselo, siyakhombisa kutsi sifuna kukhonta Jehova kuze kube phakadze. Nanobe imiyalo yaNkulunkulu ingasiwo umtfwalo, kodvwa kungahle kungabi lula ngaso sonkhe sikhatsi kwenta intsandvo yakhe futsi siphile ngekuvumelana nayo kulelive lelibi. (2 Thimothi 3:12; 1 Johane 5:3) Nangabe ‘sesibambe likhuba’ futsi sesitinikele kuJehova njengetinceku takhe futsi sesibafundzi beNdvodzana yakhe, Jesu Khristu, akukafanele sibuke tintfo talelive lesitishiye emuva.—Lukha 9:62.
Nangabe sithantaza kuJehova, kungenteka simetsembise kutsi sitawulwisana nebutsakatsaka lesinabo, silwele kuba nemfanelo letsite yebuKhristu, nobe sikhulise lizinga lesihlanganyela ngalo emsebentini yebuKhristu. Yini lengasisita kutsi sitifeze letetsembiso?—Catsanisa neMshumayeli 5:2-5.
Tetsembiso letingito tisuka enhlitiyweni nasengcondvweni. Ngako kuze sitifeze tetsembiso lesitente kuJehova, kufanele sitfulule sifuba setfu kuye ngemthantazo, simtjele loko lesikwesabako, tifiso tetfu kanye nebutsakatsaka betfu. Kuthantaza ngesetsembiso lesisentile kutawenta sibe nesifiso sekusifeza. Singafananisa tetsembiso lesitente kuNkulunkulu njengetikweleti. Nangabe sikweleti sisikhulu, sibhadalwa kancane kancane. Ngendlela lefanako, tetsembiso letinyenti lesitente kuJehova titawutsatsa sikhatsi kufezeka. Kodvwa nangabe senta loko lesingakhona kukwenta, singakhombisa kutsi sicinisile kuloko lesikwetsembisile futsi utasibusisa.
Singakhombisa kutsi sitsatsa tetsembiso lesitentile njengaletibalulekile nangabe sihlala sithantaza ngato, mhlawumbe sithantaze ngato onkhe malanga. Loku kutawenta Babe wetfu losezulwini abone kutsi sitimisele kutifeza tetsembiso lesitentile. Kutawuphindze kube yindlela yekusikhumbuta. Davide wasibekela sibonelo lesihle mayelana nalendzaba. Ahlabelela, wancenga Jehova watsi: “Lalela kukhala kwami, Nkulunkulu, uve umthandazo wami. Ngako libito lakho ngiyawulidvumisa kuze kube phakadze, kuze ngigcwalise tetsembiso tami imihla ngemihla.”—Tihlabelelo 61:1, 8.
(Tihlabelelo 62:8) Nine sive, yetsembelani kuye ngato tonkhe tikhatsi, tfululelani kuye tinhlitiyo tenu, Nkulunkulu usiphephelo setfu. (Selah)
Hlale Wetsembele KuJehova!
KUDZINGEKA SETSEMBELE KUJEHOVA
6 Kungenteka unenkinga lematima lekukhatsatako. Wente konkhe lokusemandleni kute uyilungise futsi uthantazile nakuJehova wacela lusito. Ungativa yini uncono ngobe wetsemba kutsi utakusita? Yebo! (Fundza Tihlabelelo 62:8; 1 Phetro 5:7.) Nawufuna kuba nebudlelwane lobuhle naJehova, kubalulekile kutsi ufundze kwetsembela kuye. Kodvwa ngaletinye tikhatsi akusiko melula kwenta njalo. Ngani? Lesinye sizatfu kutsi Jehova angase angayiphendvuli ngekushesha imithantazo yakho.—Hla. 13:1, 2; 74:10; 89:46; 90:13; Hab. 1:2.
7 Kungani ngaletinye tikhatsi Jehova angayiphendvuli ngekushesha imithantazo yetfu? LiBhayibheli litsi Jehova unguBabe wetfu futsi tsine sibantfwana bakhe. (Hla. 103:13) Babe akamniki umntfwana wakhe konkhe lakucelako nobe amnike ngaleso sikhatsi. Uyati kutsi umntfwana angase afune intfo letsite aphindze futsi angasayifuni. Babe uyakwati loko lokulungele umntfwana wakhe, futsi uyati kutsi kungase kubatsintse njani labanye. Uyakwati loko umntfwana lakudzingako nesikhatsi lokufanele akutfole ngaso. Nangabe babe aniketa umntfwana wakhe konkhe lakufunako ngaleso sikhatsi, angaba sisebenti salomntfwana. Jehova longuBabe wetfu wasezulwini, uyasitsandza. Njengobe anguMdali wetfu lohlakaniphile, uyakwati lesikudzingako futsi ukhetsa sikhatsi lesifanele sekusinika kona. Kubalulekile kutsi silindze kute sibone indlela Jehova layiphendvula ngayo imithantazo yetfu.—Catsanisa na-Isaya 29:16; 45:9.
8 Khumbula nekutsi Jehova uyatati tintfo ngamunye wetfu langakhona kutibeketelela nalangeke akhone kutibeketelela. (Hla. 103:14) Ngako-ke usiniketa emandla lesiwadzingako. Kuliciniso kutsi ngaletinye tikhatsi singase sitive siphelelwe ngemandla. Kodvwa Jehova uyasetsembisa kutsi nangabe singasakhoni kulubeketelela luvivinyo, “utawukwenta nendlela yekuphuma.” (Fundza 1 Khorinte 10:13.) Kuyasidvudvuta kwati kutsi singetsemba kutsi Jehova uyakwati loko lesingakubeketelela.
9 Nangabe sithantaza sicela lusito kuJehova kodvwa angasiphendvuli ngekushesha, kufanele sibeketele. Khumbula kutsi Jehova uyafisa kusisita, kodvwa ulindza kuze kube sikhatsi lesikahle sekusinika loko lesikudzingako. LiBhayibheli litsi: “Simakadze ulangatelela kangaka kutsi abe nemusa kini. Uyaphakama kutsi anihawukele, ngobe Simakadze nguNkulunkulu lowehlulela ngemtsetfocotfo. Babusisiwe bonkhe labalindzela yena.”—Isa. 30:18.
(Tihlabelelo 65:1, 2) Yebo Nkulunkulu, lukufanele ludvumo eSiyoni, tetsembiso tetfu kufanele tigcwaliseke kuwe. 2 Wena uva imithandazo uyiphendvule; bonkhe bantfu bafanele kuta kuwe.
Bucine Kangakanani Buhlobo Bakho NaJehova?
13 Cabanga nganaku: Ngaphambi kwekutsi Jesu ete emhlabeni, wabona kutsi Jehova uyayiphendvula imithantazo yetinceku taKhe. Ngesikhatsi asemhlabeni, Jesu wathantaza kuYise wasezulwini amtjela imicabango yakhe nendlela labetiva ngayo. Ngalesinye sikhatsi, waze wathantaza busuku bonkhe. (Luk. 6:12; 22:40-46) Abengakwenta yini loko kube bekacabanga kutsi Jehova akamlaleli? Jesu waphindze wafundzisa balandzeli bakhe indlela yekuthantaza kuJehova. Abengakwenta yini loko nangabe abecabanga kutsi Jehova akayilaleli imithantazo? Kuyacaca-ke kutsi Jesu bekati kutsi Jehova uyilalela mbamba imithantazo. Waze watsi: “Babe, ngiyabonga ngekutsi ungivile. Ngiyati kutsi uhlale ungiva.” Natsi singaciniseka kutsi Jehova uyayilalela imithantazo yetfu.—Joh. 11:41, 42; Hla. 65:2.
14 Ngaletinye tikhatsi kungenteka ungayiboni ngalokucacile imphendvulo yemithantazo yakho. Kodvwa nangabe ucela tintfo leticondzile emithantazweni yakho, utayibona ngalokucacile imphendvulo yaJehova futsi utawuba ngumuntfu mbamba kuwe. Nangabe umtjela tonkhe tintfo letikukhatsatako, Jehova utawusondzela kuwe.
w10 4/15 5 ¶10
Bantfu Labasha, Khulisani Sifiso Senu Sekukhonta Jehova
Indlela Umthandazo Longajulisa Ngayo Lutsandvo Lwenu NgaJehova
10 Imithandazo yenu iyindlela yesibili leningakhulisa ngayo sifiso senu sekukhonta Jehova ngalokusuka enhlitiyweni. Encwadzini yeTihlabelelo 65:2, siyafundza: “Wena uva imithandazo uyiphendvule; bonkhe bantfu bafanele kuta kuwe.” Ngisho nangesikhatsi Nkulunkulu ente sivumelwane nesive sema-Israyeli, betive nabo bebavunyelwe kuthandaza kuye. (1 Khos. 8:41, 42) Nkulunkulu akakhetsi, labo labatfobela imitsetfo yakhe bangaba nelitsemba lekutsi utawubalalela. (Taga 15:8) Kuliciniso, ‘bonkhe bantfu,’ lokufaka ekhatsi nani nine labasha, ningathandaza kuye.
it-2 668 ¶2
Umthantazo
Labo Labeviwa NguNkulunkulu. “Bonkhe bantfu” bangasondzela kuJehova Nkulunkulu ‘lova imithantazo.’ (Hla 65:2; Imi 15:17) Ngisho nangesikhatsi ema-Israyeli ‘asive saNkulunkulu lesilifa,’ bantfu bakhe, bantfu betive bebangathantaza kuJehova uma nje bemukela kutsi Israyeli usive saNkulunkulu lesikhetsiwe futsi lithempheli leliseJerusalema liyindzawo yakhe lekhetsiwe yekwenta iminikelo. (Dut 9:29; 2Khr 6:32, 33; catsanisa na-Isa 19:22.) Ngekuhamba kwesikhatsi, umehluko lebewukhona emkhatsini wemaJuda nebeTive wasuka ngalokuphelele ngekufa kwaKhristu. (Efe 2:11-16) Nakasekhaya laKhoneliyuse waseTaliyane, Phetro wabona kutsi “Nkulunkulu akakhetsi, kodvwa etiveni tonkhe wonkhe umuntfu lomesabako nalowenta lokulungile uyemukeleka kuye.” (Imi 10:34, 35) Ngako lokubaluleke kakhulu yinhlitiyo yaloyo muntfu nekutsi imshukumisela kutsi enteni. (Hla 119:145; Sil 3:41) Labo labalalela imiyalo yaNkulunkulu futsi bente “tintfo letijabulisako emehlweni akhe” bacinisekiswa ngekutsi tindlebe taNkulunkulu tikulungele kubalalela.—1Jh 3:22; Hla 10:17; Tag 15:8; 1Ph 3:12.
Funisisa Umcebo EVini LaNkulunkulu
(Tihlabelelo 63:3) Ngobe umusa wakho uncono kakhulu kunekuphila; umlomo wami uyawukudvumisa.
w06 6/1 11 ¶7
Emaphuzu Lagcamile Encwadzi Yesibili YeTihlabelelo
63:3. ‘Umusa waNkulunkulu uncono kakhulu kunekuphila’ ngobe ngaphandle kwawo kuphila kulite futsi akunanjongo. Sitawube sihlakaniphile nasingacinisa buhlobo betfu naJehova.
(Tihlabelelo 68:18) Wena, Simakadze, wenyukela entsabeni lendze, watfumba labanyenti labatfunjiwe, wemukele tipho kubantfu, watemukela ngisho nakubo labamelene nawe, kuze uhlale khona wena, Simakadze.
w06 6/1 10 ¶5
Emaphuzu Lagcamile Encwadzi Yesibili YeTihlabelelo
68:18—Bekubobani ‘letipho letibantfu’? Lawa bekungemadvodza lebekatsatfwe kulawo lebekatfunjwe ngesikhatsi kuncotjwa eVeni Lesetsembiso. Lamadvodza anikwa umsebenti wekusita emaLevi nakenta imisebenti yawo.—Ezra 8:20.
JULY 11-17
UMCEBO LOSEVINI LANKULUNKULU | TIHLABELELO 69-73
“Bantfu BaJehova Bakukhutsalele Kukhonta Kweliciniso”
(Tihlabelelo 69:9) Ngidliwa kushisekela indlu yakho, tinhlamba talabakwetfukako tehlela etikwami.
w10 12/15 7-11 ¶2-17
Shisekela Kukhonta Kweliciniso
2 KumaKhristu eliciniso lamuhla, kute umsebenti lophutfuma kwendlula kushumayela tindzaba letinhle teMbuso kanye nekwenta bantfu bato tonkhe tive babe bafundzi. (Mat. 24:14; 28:19, 20) Acaphuna emavi lashiwo nguJesu, umfundzi Makho watsi lomsebenti bekufanele wentiwe “kucala,” ngembikwekutsi kufike kuphela. (Mak. 13:10) Lena yintfo lokufanele yentiwe nakanjani. Jesu watsi: “Kuvuna kukhulu, kodvwa tisebenti timbalwa.” Sikhatsi sekuvuna angeke sihlehliswe, futsi sivuno kufanele sibutfwe singakendluli sikhatsi.—Mat. 9:37.
3 Ngesizatfu sekutsi umsebenti wekushumayela ubaluleke kakhulu kitsi, kufanele sinikele ngaso sonkhe sikhatsi setfu, emandla, kanye nekunaka kwetfu. Kuyajabulisa kutsi bazalwane kanye nabodzadze labanyenti bayakwenta loko. Labanye bente kuphila kwabo kwaba melula kute bakwati kungenela umsebenti wasikhatsi sonkhe wekuba ngemahlahlandlela, titfunywa telivangeli, nobe wekukhonta kulelinye lemakhaya aseBethel lasemhlabeni wonkhe. Kuphila kwabo kumatasatasa kakhulu. Bente kutinikela lokukhulu, futsi bunyenti bumatima labahlangabetana nabo. Nanobe kunjalo, Jehova ubabusisa kakhulu, futsi natsi sijabula kanye nabo. (Fundza Lukha 18:28-30.) Nanobe labanye bangakhoni kungenela umsebenti wasikhatsi sonkhe, banikela ngesikhatsi lesengetiwe kulomsebenti losindzisa kuphila, lohlanganisa nekusita bantfwana betfu kutsi nabo basindze.—Dut. 6:6, 7.
4 Njengobe sibonile, umuva wekuphutfuma uvame kuhambisana nesikhatsi lokufanele kucedvwe ngaso umsebenti lotsite, nobe kufika kwekuphela. Siphila esikhatsini sekuphela, futsi sinebufakazi lobunyenti lobusemiBhalweni kanye nebemlandvo bekutsi loko kuliciniso. (Mat. 24:3, 33; 2 Thim. 3:1-5) Nanobe kunjalo, kute umuntfu lowati sikhatsi lesicondzile sekufika kwekuphela. Ngalesikhatsi Jesu asho imininingwane lemayelana ‘nesibonakaliso’ lesiveta ‘kuphela kwetikhatsi,’ ngalokucondzile watsi: “Noko kute lowatiko kutsi lelo langa nemzuzu kuyawufika nini, ngisho netingilosi ezulwini neNdvodzana ayati, lowatiko nguBabe kuphela.” (Mat. 24:36) Ngesizatfu saloko, bantfu labanyenti bangase bakutfole kumatima kulondvolota umuva wekuphutfuma ngaso sonkhe sikhatsi, ikakhulukati nangabe sekusikhatsi lesidze benta njalo. (Taga 13:12) Kuyenteka yini kutsi nawe utive ngaleyondlela ngaletinye tikhatsi? Yini lengasisita kutsi sakhe nobe silondvolote umuva wekuphutfuma ngemsebenti Nkulunkulu Jehova kanye naJesu Khristu labafuna siwente?
Cabanga NgaJesu, Losibonelo Setfu
5 Jesu Khristu usibonelo lesibendlula bonkhe labo labake baba nemuva wekuphutfuma ngemsebenti waNkulunkulu. Lesinye sizatfu lesamenta waphutfuma kutsi kunyenti lokwakufanele akwente ngesikhashana nje lesiminyaka lemitsatfu nencenye. Nanobe kunjalo, kunyenti Jesu lakufeza ekukhonteni kweliciniso kwendlula nobe ngabe ngumuphi lomunye umuntfu. Walenta latiwa libito laBabe wakhe kanye nenjongo yakhe, washumayela tindzaba letinhle teMbuso, wembula batentisi kanye netimfundziso temanga tebaholi benkholo, futsi wasekela bukhosi baJehova kwate kwaba sekufeni. Watinikela ngalokuphelele—ngekutsi afundzise, nangekutsi asite bantfu futsi abelaphe. (Mat. 9:35) Kute umuntfu loke wakwati kufeza tintfo letingaka ngesikhashana njengaye. Jesu wasebenta ngekutimisela lokukhulu.—Joh. 18:37.
6 Yini leyenta Jesu wasebenta ngenkhutsalo kuso sonkhe sikhatsi lasicitsa alapha emhlabeni? Ngekwesiphrofetho saDanyela, Jesu bekati kutsi singakanani sikhatsi labenaso sekufeza umsebenti wakhe ngekuvumelana naloko lobekuhlelwe nguJehova. (Dan. 9:27, NW.) Ngako-ke, njengobe kuvetiwe, umsebenti wakhe lebekufanele awente ngesikhatsi asemhlabeni bewutawutsatsa ‘incenye yeliviki,’ nobe iminyaka lemitsatfu nencenye. Ngemuva nje kwekungena kwakhe ngemphumelelo eJerusalema, entfwasahlobo ya-33 C.E., Jesu watsi: “Sesifikile sikhatsi sekutsi iNdvodzana yemuntfu ikhatimuliswe.” (Joh. 12:23) Nanobe Jesu bekati kutsi kufa kwakhe bekutawukwenteka nakanjani, akazange acabange ngako kakhulu, futsi akazange akuvumele kutsi kube ngiko lokumenta asebente ngenkhutsalo. Kunaloko, wanaka kakhulu kusebentisa onkhe ematfuba lawatfolako kute ente intsandvo yaBabe wakhe kanye nekutsi atsandze bantfu labekanye nabo. Lolotsandvo lwamenta wacecesha bafundzi bakhe, futsi wabatfuma kutsi bayawukwenta umsebenti wekushumayela. Loko wakwenta ngesizatfu sekutsi abefuna bachubeke nemsebenti labewucalile, kanye nekutsi bafeze umsebenti lomkhulu lowendlula loyo yena abewufezile.—Fundza Johane 14:12.
7 Loko lokwentiwa nguJesu ngalelinye lilanga kwaveta kutsi abenenshisekelo lenkhulu. Kwakungesikhatsi asandza kucala umsebenti wekushumayela, ngeliPhasika la-30 C.E. Jesu nebafundzi bakhe baya eJerusalema, nabefika ethempelini bakhandza “bantfu batsengisa tinkhomo, timvu, nematuba; labanye bebantjintja timali bahleti ematafuleni.” Yini Jesu layenta, futsi loku kwabakhumbutani bafundzi bakhe?—Fundza Johane 2:13-17.
8 Loko Jesu lakusho futsi wakwenta ngalelolanga kwakhumbuta bafundzi bakhe emavi lasiphrofetho lahlatjelwa nguDavide: “Ngidliwa kushisekela indlu yakho.” (Hla. 69:9) Kungani bakhumbula lawo mavi? Kungobe loko Jesu lakwenta bekungamfaka engotini lenkhulu. Ngetulu kwaloko, labo labaneligunya kulelithempeli—baphristi, babhali, kanye nalabanye, ngibo labebente lelibhizinisi kute batfole imali. Ngekuveta futsi aphatamise lelichinga labo, Jesu abetenta sitsa sebaholi benkholo. Njengobe bafundzi bakhe bebabukele, bayibona kahle ‘inshisekelo yendlu yaNkulunkulu,’ nobe inshisekelo yekukhonta kweliciniso labenayo. Kodvwa-ke, iyini inshisekelo? Ayifanani yini nekuphutfuma?
Umehluko Emkhatsini Wekuphutfuma Nenshisekelo
9 Lesinye sichazamagama sitsi “inshisekelo” isho “kulangatelela kwenta intfo letsite,” futsi sitsi lamanye emagama lanenchazelo lefananako ngulatsi sifiso kanye nemdlandla. Kuliciniso kutsi nemsebenti lowentiwa nguJesu singawuchaza ngalamagama. Ngakulokunye, i-Today’s English Version itsi: “Ngidliwa kushisekela indlu yakho.” Kuletinye tilwimi tase-Asia, leligama lelitsi “inshisekelo” lakhiwa tincenye letimbili letisho “inhlitiyo levutsako” natihunyushwe njengobe tinjalo, lokunemcondvo wekusha kwenhlitiyo. Kungako bafundzi bakhe bakhumbula lamavi aDavide ngalesikhatsi bambona ahlanta lithempeli. Ngako-ke, yini leyenta Jesu waba nenshisekelo nobe wenta ngaleyo ndlela?
10 Ligama lelitsi ‘inshisekelo’ engomeni yaDavide lelitsetfwe egameni lesiHebheru, livame kuhunyushwa ngekutsi ‘sikhwele’ kuletinye tincenye teliBhayibheli. Ngaletinye tikhatsi “INguqulo Yezwe Elisha” ilichaza ngekutsi “kutinikela kuye kuphela.” (Fundza Eksodusi 20:5; 34:14; Joshuwa 24:19.) Naku lokwashiwo ngulesinye sichazamagama seliBhayibheli ngaleligama: “Livame kusetjentiswa ngendlela lehlobene nesikhwele lesifanele lesiba khona emshadweni . . . Ngendlela lefananako, Nkulunkulu unelilungelo lekukhontwa ngulabo labaseluhlangotsini lwakhe, futsi uyalilwela lelo lungelo.” Ngako-ke, ngekweliBhayibheli inshisekelo ingetulu kwekumane ube nemfutfo ngentfo lofuna kuyenta, njengobe kwenta bantfu ngemdlalo labawutsandzako. Inshisekelo yaDavide beyisikhwele kodvwa ngendlela lenhle, lokusho kungavumeli lokubi, kumelela emaciniso, kuba nesifiso lesikhulu sekuvikela umuntfu longenacala, nobe kulungisa umonakalo.
11 Bafundzi baJesu bebangenti liphutsa ngekuhlobanisa emavi aDavide naloko labakubona kwentiwa nguJesu ethempelini. Jesu akazange ente loko ngobe nje afuna kucedza umsebenti wakhe, kodvwa wakwenta ngesizatfu sekutsi abenenshisekelo—nobe sikhwele ngelibito laBabe wakhe nangekukhonta kweliciniso. Ngalesikhatsi abona libito laNkulunkulu lingcoliswa futsi ledzelelwa, waba nenshisekelo, nobe sikhwele lesifanele, futsi wasilungisa leso simo. Ngalesikhatsi Jesu abona bantfu labatfobekile baphatfwa kabi futsi bagcilatwa baholi benkholo, inshisekelo yakhe yamenta wabaletsela inkhululeko labo bantfu. Ngemavi lacinile, wasola tento tebaholi benkholo.—Mat. 9:36; 23:2, 4, 27, 28, 33.
Shisekela Kukhonta Kweliciniso
12 Simo kanye netento talabo labatsi batikhonti taNkulunkulu lamuhla siyafanana naleso lesasikhona esikhatsini saJesu, nangabe singasisibi kakhulu kunaso. Nasi sibonelo: Khumbula kutsi intfo yekucala Jesu latsi balandzeli bakhe bayithandazele beyitsintsa libito laNkulunkulu, watsi: “Alingcweliswe libito lakho.” (Mat. 6:9) Baholi benkholo, ikakhulukati labo beTinkholo Letitsi TebuKhristu, bayabafundzisa yini bantfu kutsi bati libito laNkulunkulu futsi balingcwelise, nobe balidvumise? Ngalokwehlukile, bakhuluma kabi ngaNkulunkulu batsi unguMtsatfu Amunye, bafundzisa ngemphefumulo longafi, kanye nangesihogo, baphindze bente Nkulunkulu abonakale angumuntfu lowehlukile, lokungasimelula kumcondza, lonelunya, nalohluphekisa bantfu. Baphindze bahlambalate Nkulunkulu ngemikhuba yabo lemibi kanye nekutentisa kwabo. (Fundza Roma 2:21-24.) Ngetulu kwaloko, bente konkhe lokusemandleni abo kute bafihle libito laNkulunkulu, bate balikhipha nasemahumushweni abo eliBhayibheli. Ngekwenta njalo, bente kutsi bantfu bangakwati kusondzela kuNkulunkulu futsi bangabi nebuhlobo naye.—Jak. 4:7, 8.
13 Jesu waphindze wafundzisa balandzeli bakhe kutsi bathandazele uMbuso waNkulunkulu, batsi: “Umbuso wakho awute. Intsandvo yakho ayentiwe emhlabeni, njengobe yentiwa ezulwini.” (Mat. 6:10) Nanobe baholi beTinkholo Letitsi TebuKhristu bavame kuwusho kanyenti lomthandazo, baye bakhutsata bantfu kutsi basekele tinhlangano tebantfu nobe tetembusave. Ngetulu kwaloko, bababukela phansi labo labetama kushumayela futsi bafakaze ngaloMbuso. Ngesizatfu saloko, bantfu labanyenti labatsi bangemaKhristu abasakhulumi ngeMbuso waNkulunkulu, futsi sebete kukholwa kuwo.
14 Ngesikhatsi athandaza kuNkulunkulu, Jesu washo ngalokucacile watsi: “Livi lakho liliciniso.” (Joh. 17:17) Ngembikwekutsi abuyele ezulwini, Jesu watsi abetawubeka ‘sisebenti lesetsembekile nalesihlakaniphile’ kute sinikete bantfu bakhe kudla kwakamoya. (Mat. 24:45) Nanobe bafundisi beTinkholo Letitsi TebuKhristu batsi bafundzisa bantfu ngeliVi laNkulunkulu, bawente ngekwetsembeka yini umsebenti iNkhosi lebaphatsise wona? Cha. Bavame kutsi loko lokuseBhayibhelini kuyinganekwane. Kunekutsi bafundisi bondle umhlambi wabo ngekudla kwakamoya futsi bawunikete indvudvuto nekukhanya kweliciniso, bakitata tindlebe temakholwa ngekufundzisa emafilosofi ebantfu. Ngetulu kwaloko, baye batifulatsela timiso taNkulunkulu tekutiphatsa kute bafundzise timiso tabo letiphambene.
15 Ngesizatfu sato tonkhe letintfo letiye tentiwa ngelibito laNkulunkulu longumnikati weliBhayibheli, bantfu labanyenti labacotfo baye badvumateka nobe balahlekelwa kukholwa kwabo kuNkulunkulu kanye naseBhayibhelini. Baye batfunjwa nguSathane nalelive lakhe lelibi. Utiva njani nawubona nobe uva ngaletintfo letenteka malanga onkhe? Njengesikhonti saJehova, nawubona lelihlazo kanye nekuhlanjalatwa kwelibito lakhe, awutiva yini ufuna kwenta konkhe lokusemandleni akho kute ulungise lesimo? Nawubona bantfu labacotfo nalabanetinhlitiyo letinhle badukiswa futsi baphatfwa kabi, akukwenti yini ufune kubadvudvuta labo labacindzetelekile? Ngesikhatsi Jesu abona bantfu bangesikhatsi sakhe ‘bakhatsatekile futsi bahlakatekile, banjengetimvu letite umelusi,’ akazange agcine nje ngekuba nesihawu ngabo. “Wabafundzisa ngetintfo letinyenti.” (Mat. 9:36; Mak. 6:34) NjengaJesu, natsi sinato tonkhe tizatfu tekushisekela kukhonta kweliciniso.
16 Nangabe sikhutsele emsebentini wekushumayela, emavi emphostoli Pawula latfolakala ku-1 Thimothi 2:3, 4 aba nenchazelo lebaluleke kakhulu kitsi. (Fundza.) Umsebenti wekushumayela asiwenti ngenshisekelo ngobe nje sati kutsi siphila emalangeni ekugcina, kodvwa sentiwa kucaphela kutsi loko kuyintsandvo yaNkulunkulu. Ufuna kutsi bantfu bati liciniso kute nabo bamkhonte, futsi batfole tibusiso. Intfo lesikhutsata kutsi sitimisele emsebentini wekushumayela akusiko kutsi sikhatsi siyaphela, kodvwa kutsi sifuna kudvumisa libito laNkulunkulu futsi sisite bantfu bati intsandvo yakhe. Sinenshisekelo ngekukhonta kweliciniso.—1 Thim. 4:16.
17 Njengebantfu baJehova, sibusiswe ngelwati lolumayelana neliciniso ngenjongo yakhe ngebantfu kanye nemhlaba. Siyakwati kusita bantfu kutsi batfole injabulo kanye nelitsemba lelicinisekile lelikusasa. Singabakhombisa indlela yekutfola sivikelo nasekubhujiswa lelive lelibi laSathane. (2 Thes. 1:7-9) Kunekutsi sikhatsateke nobe siphele emandla ngobe sibona shengatsi lilanga laJehova alifiki, kufanele sijabule ngekutsi sisekhona sikhatsi sekutsi sibe nenshisekelo yekukhonta kweliciniso. (Mik. 7:7; Hab. 2:3) Singayakha njani inshisekelo lenjalo? Sitawucoca ngalendzaba esihlokweni lesilandzelako.
(Tihlabelelo 71:17, 18) Yebo, Nkulunkulu, wangifundzisa kusukela ebusheni bami, kuze kube ngunyalo ngisayimemetela imisebenti yakho lemangalisako. 18 Nanyalo-ke nome sengigugile sengimphunga, ungangishiyi, Nkulunkulu, kuze ngishumayele ingalo yakho kuso situkulwane, nemandla akho kubo bonkhe labefikako.
Kukhonta Jehova Tisengakefiki Tinsuku Tekuhlupheka
4 Nangabe sekuphele emashumi eminyaka ukhonta Nkulunkulu, kunembuto loyinhloko lotibuta wona lotsi: ‘Yini lengingayenta ngekuphila kwami nyalo loku ngisenemandla?’ Njengobe ungumKhristu losanesikhatsi, unematfuba langakabavulekeli labanye. Loko lokufundziswe nguJehova ungase ukutjele labasebasha. Ungase ucinise labanye ngekubacocela lokwentekile kuwe lokujabulele ekukhonteni Nkulunkulu. INkhosi Davide yathantazela ematfuba ekwenta njalo. Yabhala yatsi: “Yebo, Nkulunkulu, wangifundzisa kusukela ebusheni bami. . . . Nanyalo-ke nome sengigugile sengimphunga, ungangishiyi, Nkulunkulu, kuze ngishumayele ingalo yakho kuso situkulwane, nemandla akho kubo bonkhe labefikako.”—Hla. 71:17, 18.
5 Lwati lolutfole kuyo yonkhe leminyaka leyendlulile, ungalwendlulisela njani kulabanye? Ungatimema yini tikhonti taNkulunkulu letisetinsha ekhaya lakho kute uticocele? Ungaticela yini kutsi tihambe nawe emsebentini wekushumayela kute tibone injabulo lonayo ngekukhonta Jehova? Elihu lobekaphila kadzeni watsi: “Kukhula lokufanele kukhulume, iminyaka leminyenti lekufanele ifundzise kuhlakanipha.” (Jobe 32:7) Umphostoli Pawula wacela besifazane labangemaKhristu lasebanesikhatsi bakhonta Nkulunkulu kutsi bakhutsate labanye ngemavi nangesibonelo. Wabhala watsi: ‘Bafati labakhulile . . . abafundzise lokuhle.’—Thit. 2:3.
CABANGA NGELIKHONO LONALO KUTE USITE LABANYE
6 Nangabe ungumKhristu losanesikhatsi, unelikhono lelikhulu lekusita labanye. Cabanga ngaloko lokucondzako nyalo lobewungakwati eminyakeni lengu-30 nobe lengu-40 leyendlulile. Ungatisebentisa ngelikhono timiso teliBhayibheli ekuphileni kwakho. Asingabati kutsi unelikhono lekufinyelela tinhlitiyo talabanye bantfu ngeliciniso leliBhayibheli. Nangabe ungulomdzala ebandleni, uyati kutsi ungabasita njani bazalwane labatsatsa sinyatselo lesingesiso. (Gal. 6:1) Mhlawumbe ufundzile kutsi ungayenta njani imisebenti yelibandla, yemahhovisi asemihlanganweni lemikhulu nome umsebenti wekwakhiwa kwemaHholwa EMbuso. Kungenteka uyati kutsi ungabakhutsata njani bodokotela kutsi basebentise tindlela tekwelapha ngaphandle kwengati. Ngisho nome ngabe usandza kucala kufundza liciniso, lokwenteke ekuphileni kwakho kungabasita labanye. Sibonelo saloko kutsi nangabe ukhulise bantfwana, utfole emakhono lalusito kakhulu. EmaKhristu lasakhulile anelikhono lekukhutsata bantfu baJehova ngekubafundzisa, ngekubahola kanye nekucinisa bazalwane nabodzadze.—Fundza Jobe 12:12.
7 Ngutiphi letinye tindlela longasebentisa ngato emakhono akho kute usite labanye? Mhlawumbe ungakhombisa labasebasha indlela yekucalisa tifundvo teliBhayibheli kanye nekutichuba. Nangabe ungudzadze, ungabatjela yini labo labasandza kuba bomake indlela labangase bente ngayo imisebenti lehlobene nekukhonta Nkulunkulu babe banakekela bantfwana labasebancane? Nangabe ungumzalwane, ungabafundzisa yini bazalwane labasebasha kute batibeke ngemdlandla tinkhulumo futsi babe bashumayeli betindzaba letimnandzi labaphumelelako? Ungabakhombisa yini kutsi ubakhutsata njani bazalwane nabodzadze lasebakhulile nawubavakashele? Nangabe sewute emandla lobewunawo kucala, unematfuba lajabulisako ekucecesha labasebasha. LiVi laNkulunkulu litsi: “Ludvumo lwalabasha ngemandla abo; labadzala bahlonishelwa bumphunga babo.”—Taga 20:29.
KUYA LAPHO KUNESIDZINGO LESIKHULU KHONA
8 Umphostoli Pawula wasebentisa onkhe emakhono akhe ekukhonteni Nkulunkulu nasakhulile. Kodvwa ngesikhatsi akhululwa ejele laseRoma cishe nga-61 C.E., besekuphele iminyaka leminyenti awenta ngekutimisela umsebenti wekuba sitfunywa selivangeli futsi bekangayekela kuba sitfunywa selivangeli ashumayele eRoma. (2 Khor. 11:23-27) Bazalwane kulelidolobha lelikhulu akungabateki kutsi bakwatisa kakhulu kubasekela kwakhe ngaso sonkhe sikhatsi. Kodvwa Pawula wabona kutsi kwakunesidzingo lesikhulu kakhulu ngesheya kwetilwandle. Wahamba naThimothi kanye naThithusi nakaphindze acalisa umsebenti wakhe wetitfunywa telivangeli, baya e-Efesu ngemuva kwaloko baya eKhrethe mhlawumbe befika naseMasedoniya. (1 Thim. 1:3; Thit. 1:5) Asati kutsi Pawula wafika yini eSpain kodvwa bekafuna kufika nakhona.—Rom. 15:24, 28.
9 Kungenteka kutsi nemphostoli Phetro besekendlulile eminyakeni lengu-50 ngalesikhatsi aya endzaweni lenesidzingo lesikhulu. Kungani loko kungaba liciniso? Nangabe abenaleyo minyaka njengaJesu nobe mhlawumbe abemdzala kunaye, kungenteka kutsi abecishe abe neminyaka lengu-50 ngalesikhatsi abonana nalabanye baphostoli eJerusalema ngemnyaka wanga-49 C.E. (Imis. 15:7) Ngemuva kwalokuhlangana, Phetro waya kuyewuhlala eBhabhulona. Akungabateki kutsi waya lapho kute ayewushumayela kumaJuda lamanyenti labehlala kuleyo ndzawo. (Gal. 2:9) Abehlala eBhabhulona ngalesikhatsi abhala incwadzi yekucala lephefumulelwe cishe nga-62 C.E. (1 Phet. 5:13) Kujwayela imphilo yakulelinye live kungase kube yinsayeya, kodvwa Phetro akazange avumele kukhula kwakhe ngeminyaka kumente angayitfoli injabulo yekwenta konkhe lokusemandleni akhe ekukhonteni Jehova.
10 Lamuhla, emaKhristu laseminyakeni yabo-50 nobe ngetulu atfola kutsi timo tawo setishintjile nekutsi sekangakhona kwenta lokunyenti ekukhonteni Jehova. Lamanye atfutsele lapho kunesidzingo lesikhulu khona. Nasi sibonelo: Robert wabhala watsi: “Mine nemkami besisemnyakeni wabo-50 nasibona kutsi sivulekelwe ngematfuba lamanyenti. Indvodzana yetfu lelitinyo lekubulala beyingasahlali natsi, besite batali lasebakhulile labadzinga kunakekelwa futsi besitfole lifa lelincane. Ngabala imali yendlu yetfu lebesiyitsengisa ngatfola kutsi itawenela kubhadala imali lesayiboleka iphindze isichube size sitfole imali yemhlalaphansi. Seva kutsi eBolivia bantfu labanyenti bayatsandza kufundza liBhayibheli kodvwa imphilo yakhona iphansi. Ngako-ke satsatsa sincumo sekutfutsa siye khona. Kwakungasimelula kwetayela imphilo lensha. Yayingasafani naleyo lebesiyetayele eNyakatfo yeMelika. Kodvwa sabusiswa ngemetamo lesayenta.”
(Tihlabelelo 72:3) Tintsaba tiyawuletsa kuthula kubantfu, kanjalo nemagcuma kuchuma kwekulunga.
(Tihlabelelo 72:12) Iyamkhulula loyibitako, naloweswele, nalomphofu, nalote umsiti.
(Tihlabelelo 72:14) Ikhulula kuphila kwalabo labasekubandzetelweni nasebudloveni, ingati yabo iligugu emehlweni ayo.
(Tihlabelelo 72:16-19) Shangatsi kungaba nenala emasimini, lenala isibekele ticongo tetintsaba, kube tiphihli, sincane setihlahla taseLebanoni. Shangatsi lamadolobha angagcwala bantfu, babe ngangetjani. 17 Shangatsi libito layo lingahlala ingunaphakadze, lichubeke latiwe njengelilanga. Tive tonkhe atibusiswe ngayo; tiyawumbita ngekutsi yinkhosi lebusisekile. 18 Akabongwe Simakadze, Nkulunkulu, nguye longuNkulunkulu wema-Israyeli, nguye yedvwa lowenta timangaliso. 19 Alibongwe libito lakhe lenkhatimulo, libongwe kuze kube phakadze, shangatsi umhlaba wonkhe ungagcwala inkhatimulo yakhe. Amen! Yebo, Amen!
Imibuto YeliBhayibheli Iyaphendvulwa
Ngubani lotawucedza buphuya?
Nkulunkulu ukhetse Jesu kutsi abuse bantfu. (Tihlabelelo 2:4-8). Jesu utawubanaka bantfu labaphuyile aphindze acedze budlova kanye nekucindzeteleka.—Fundza Tihlabelelo 72:8, 12-14.
w10 8/15 32 ¶19-20
Ngubani Lotawukhulula Bantfu Labakhalela Lusito?
Siligadze Ngalabovu Live Lelisha Lelinenala
19 Ase ucabange ngemehlo engcondvo likusasa lelihle lesetsenjiswe lona eveni lelisha laNkulunkulu nase kubusa Solomoni Lomkhulu. LiBhayibheli liyetsembisa: “Shangatsi kungaba nenala emasimini, lenala isibekele ticongo tetintsaba, kube tiphihli.” (Hla. 72:16) Njengobe inala ingatfolakali eticongweni tetintsaba, lamavi agcizelela kutsi ngaleso sikhatsi umhlaba utawube sewunemandla lamakhulu ekukhicita. Umkhicito wawo utawufanana ‘netihlahla taseLebanoni,’ indzawo leyayikhicita inala ngesikhatsi sekubusa kwaSolomoni. Cabanga nje kutsi kutawube sekute kuswelakala kwekudla, kungondleki kahle ngisho nalolambako. Bonkhe bantfu batawujabulela “lidzili lalokukhuluphele.”—Isa. 25:6-8; 35:1, 2.
20 Ngubani lotawudvunyiswa ngato tonkhe letibusiso? Ngalokuyinhloko, yiNkhosi Yendzawo Yonkhe yaPhakadze, Nkulunkulu Jehova. Sonkhe sitawubese sivakalisa emavi etfu ngekuhlanganyela ekuculeni lendzinyana yekugcina yalengoma letsi: “Shangatsi libito layo [iNkhosi Jesu Khristu] lingahlala ingunaphakadze, lichubeke latiwe njengelilanga. Tive tonkhe atibusiswe ngayo; tiyawumbita ngekutsi yinkhosi lebusisekile. Akabongwe Simakadze [Jehova], Nkulunkulu nguye longuNkulunkulu wema-Israyeli nguye yedvwa lowenta timangaliso. Alibongwe libito lakhe lenkhatimulo, libongwe kuze kube phakadze, shangatsi umhlaba wonkhe ungagcwala inkhatimulo yakhe. Amen! Yebo, Amen!”—Hla. 72:17-19.
Funisisa Umcebo EVini LaNkulunkulu
(Tihlabelelo 69:4) Banyenti kunetinwele tenhloko yami badlanga ngemandla labafuna kungibulala, labo labangitondza ngelite. Ngiphocelelwani kutsi ngikhishiswe intfo lengingakayebi?
(Tihlabelelo 69:21) Bangiphakela inyongo esikhundleni sekudla; ekomeni kwami banginatsisa liwayini lelimunyu.
Bebalindzele Mesiya
17 Mesiya abetawutondvwa ngaphandle kwesizatfu. (Hla. 69:4) Umphostoli Johane wacaphuna Jesu nakatsi: “Kube bengingakenti imisebenti lemikhulu lengazange seyentiwe ngumuntfu emkhatsini wabo, ngabe bate licala lesono, kodvwa manje sebangibonile base batondza naBabe. Kodvwa noko, loko bekufanele kwenteke, kuze kutewugcwaliseka loko lokwabhalwa emtsetfweni wabo kwekutsi: ‘Bangitondza ngaphandle kwesizatfu.’” (Joh. 15:24, 25) Esikhatsini lesinyenti, ‘uMtsetfo’ uvame kusho yonkhe imiBhalo. (Joh. 10:34; 12:34) Kulandzisa kwemaVangeli kusiniketa bufakazi bekutsi Jesu watondvwa, ikakhulukati baholi benkholo yemaJuda. Ngetulu kwaloko, Khristu watsi: “Live lingeke linitondze nine, kodvwa mine liyangitondza, ngobe ngifakaza ngalo kutsi imisebenti yalo mibi.”—Joh. 7:7.
Bamtfola Mesiya!
15 Mesiya bekatawuniketwa liwayini lelimunyu kanye nenyongo. Umhlabeli watsi: “Bangiphakela inyongo esikhundleni sekudla; ekomeni kwami banginatsisa liwayini lelimunyu.” (Hla. 69:21) Siyati kutsi lesiphrofetho sagcwaliseka, ngobe Matewu uyasitjela: “Lamnatsisa [Jesu] liwayini lelalibhicwe nenyongo; watsi kube alive walala, wangete walinatsa.” Ngekuhamba kwesikhatsi, “lomunye wabo wagijima masinyane waya kuye nesiponji, wasenya ewayinini lelimunyu, wasihloma elutsini lwemhlanga wetama kumnatsisa.”—Mat. 27:34, 48.
(Tihlabelelo 73:24) Uyawungihola ungicondzise ngeteluleko takho, ekugcineni uyawungikhatimulisa ebukhosini.
Ungavumeli Lutfo Lukuvimbele Ekutfoleni Ludvumo
3 Umhlabeli wakhombisa kuciniseka kutsi Jehova abetambamba ngesandla sangesekudla futsi amcondzise ekukhatimuleni sibili. (Fundza Tihlabelelo 73:23, 24.) Jehova ukwenta njani loko? Jehova ucondzisa tinceku takhe letetsembekile kuloludvumo ngetindlela letehlukehlukene. Utibusisa ngekutsi ticondze injongo yakhe. (1 Khor. 2:7) Unika labo labalalela livi lakhe futsi labamhloniphako ludvumo lwekuba nebuhlobo lobusedvute naye.—Jak. 4:8.
4 Jehova uphindze anike tinceku takhe umcebo loligugu wemsebenti wekushumayela wemaKhristu. (2 Khor. 4:1, 7) Lomsebenti uniketa ludvumo. Naku Jehova lakutsembisa labo labasebentisa lilungelo labo lekumkhonta kute bamdvumise futsi basite labanye: “Labo labangihloniphako ngiyakubahlonipha.” (1 Sam. 2:30) Bantfu labanjalo bayahlonipheka ngobe bayemukeleka kuJehova, futsi kuvamile kutsi bakhulunyelwe kahle nguletinye tinceku taNkulunkulu.—Taga 11:16; 22:1.
JULY 18-24
UMCEBO LOSEVINI LANKULUNKULU | TIHLABELELO 74-78
“Khumbula Imisebenti YaJehova”
(Tihlabelelo 74:16) Imini yakho, nebusuku bakho, nguwe lowenta kukhanya nelilanga.
(Tihlabelelo 77:6) Ngikhumbula kushaya ihabhu yami, ngizindle ngayo enhlitiyweni yami ebusuku, umoya wami ucabangisisa.
(Tihlabelelo 77:11, 12) Yebo, Simakadze, ngitase ngikhumbule imisebenti yaNkulunkulu, yebo, ngikhumbule netimangaliso takho tasendvulo. 12 Ngitawucabangisisa ngawo wonkhe umsebenti wakho, ngijinge ngicabange ngemisebenti yakho yemandla.
Zindla Ngelutsandvo LwaJehova Lolungapheli
3 LaBoFakazi lokukhulunywe ngabo ekucaleni bebaciniseka kutsi Nkulunkulu akabashiyi ngetikhatsi letimatima. Natsi singaciniseka kutsi useluhlangotsini lwetfu. (Hla. 118:6, 7) Kulesihloko, sitawucoca ngetipho letine lesitiphiwe nguJehova letikhombisa kutsi uyasitsandza. Letipho ngunati: (1) Yindalo yakhe, (2) liBhayibheli, (3) ngumthantazo, (4) kanye nenhlawulo. Kuzindla ngetintfo letinhle letentiwe nguJehova, kungasisita kutsi silujabulele kakhulu lutsandvo lwakhe lolungapheli.—Fundza Tihlabelelo 77:11, 12.
ZINDLA NGENDALO YAJEHOVA
4 Nasibuka indalo yaJehova, sibona indlela lasitsandza ngayo. (Rom. 1:20) Sibonelo saloko kutsi Jehova udale umhlaba kuze singagcini nje ngekuhlala kuwo. Usinikete konkhe lesikudzingako kute sijabulele kuphila. Sidzinga kudla, futsi Jehova usinikete tinhlobonhlobo tekudla kute sikujabulele. (Shu. 9:7) Lomunye dzadze lokutsiwa nguCatherine uyakujabulela loko lakubona endalweni, ikakhulukati entfwasahlobo eCanada. Utsi: “Imangalisa mbamba indlela tonkhe tintfo letiba nemphilo ngayo—lokufaka ekhatsi timbali lokufanele timile emhlabatsini kanye netinyoni letibuya eluhambweni lwato, letifaka ekhatsi i-hummingbird lefike idle esitjeni sekudlela tinyoni lesingephandle kwelifasitelo lami lasekhishini. Jehova usinikete letintfo letinhle ngobe uyasitsandza.” Babe wetfu uyayitsandza indalo yakhe, futsi ufuna natsi siyijabulele.—Imis. 14:16, 17.
w04 3/1 19-20
Indlela Lesikhombisa Ngayo Kutsi Siyamtsandza Nkulunkulu
Kutsandza Nkulunkulu akusho nje kumane ube nelwati ngaye. Njengobe tikhonti taNkulunkulu emhlabeni wonkhe, tingasho kutsi lutsandvo sibili ngaNkulunkulu luyakhula nangabe umuntfu sekabati buntfu bakhe, futsi luyacina nangabe sekakwati loko lakutsandzako, lakwenyanyako kanye netimfuneko takhe.
Ngenca yekutsi uyasitsandza, Jehova usinikete livi lakhe liBhayibheli lapho atembula khona. Kulo sifundza indlela Jehova lasingatsa ngayo timo letehlukahlukene. Njengobe incwadzi levela kulotsite lesimtsandzako isijabulisa, nekufundza liBhayibheli kuyasijabulisa ngobe sibona buntfu baNkulunkulu lobusha.
Nobe kunjalo, ngaletinye tikhatsi singabona nasishumayela kutsi kufundza ngaNkulunkulu akumenti umuntfu amtsandze. Naku Jesu lakusho kulamanye emaJuda lebekangabongi: “Nihlola imiBhalo ngobe nicabanga kutsi kuphila lokuphakadze nitakutfola ngayo; kantsi ngiyo lena lefakaza ngami. futsi ngati kahle kutsi animtsandzi Nkulunkulu.” (Johane 5:39, 42) Labanye bantfu bacitsa iminyaka leminyenti bafundza ngetintfo letinhle Jehova latentile kodvwa bangamtsandzisisi kahle. Leni? Bayehluleka kuzindla ngaloko labakufundzako. Ngalokwehlukile, tigidzi tebantfu lesifundza nabo liBhayibheli tiyabona kutsi indlela letimtsandza ngayo Nkulunkulu iyakhula. Leni? Kungobe nato tilandzela sibonelo sa-Asafa njengatsi. Ngayiphi indlela?
Khombisa Kutsi Uyabonga Nawuzindla
Asafa bekatimisele kukhombisa indlela lebekamtsandza ngayo Jehova. Wabhala watsi: “Ngizindle ngayo enhlitiyweni yami. . . ngitase ngikhumbule imisebenti yaNkulunkulu,yebo,ngikhumbule netimangaliso takho tasendvulo. Ngitawucabangisisa ngawo wonkhe umsebenti wakho, ngijinge ngicabange ngemisebenti yakho yemandla.” (Tihlabelelo 77:6, 11, 12) Lutsandvo ngaNkulunkulu lutawukhula nangabe umuntfu azindla ngetindlela taJehova njengobe kwenta umhlabeleli.
Ngetulu kwaloko, kukhumbula tintfo lesitijabulele nasikhonta Jehova kwenta buhlobo betfu naNkulunkulu bucine. Umphostoli Pawula watsi “sitisebenti letikanye” naNkulunkulu, futsi bungani lobusemkhatsini webantfu labasebenta ndzawonye bukhetseke kakhulu. (1 Khorinte 3:9) Nangabe sikhombisa kutsi siyamtsandza Jehova, uyabonga futsi kuyamjabulisa. (Taga 27:11) Ngako nasicela Jehova kutsi asisite futsi asivikele nasibhekene nebumatima, siyati kutsi unatsi, nendlela lesimtsandza ngayo iyakhula.
Bungani lobusemkhatsini webantfu lababili buyacina nabatjelana indlela labativa ngayo. Ngalokufanako, indlela lesimtsandza ngayo Nkulunkulu iyacina nangabe simtjela kutsi kungani sitinikele kuye. Singatitfola sesicabanga ngemavi lashiwo nguJesu latsi: “Ngako kufanele utsandze Jehova Nkulunkulu wakho ngayo yonkhe inhlitiyo yakho, nangawo wonkhe umphefumulo wakho, nangayo yonkhe ingcondvo yakho, nangawo onkhe emandla akho.” (Makho 12:30) Yini lesingayenta kuze siciniseke kutsi siyachubeka sitsandza Jehova ngenhlitiyo yetfu yonkhe, ngemphefumulo wetfu wonkhe, ngengcondvo yetfu yonkhe, kanye nangemandla etfu onkhe?
Kutsandza Jehova Ngenhlitiyo Yetfu Yonkhe
ImiBhalo ikhuluma ngenhlitiyo lengumfanekiso, lengumuntfu lesinguye ngekhatsi—tifiso tetfu, simo setfu sengcondvo kanye nemiva yetfu. Ngako kutsandza Jehova ngenhlitiyo yetfu yonkhe kusho kutsi sifisa kumjabulisa kwendlula nobe ngabe yini lenye. (Tihlabelelo 86:11) Sisuke sikhombisa kutsi siyamtsandza Jehova nangabe sishintja buntfu betfu kuze semukeleke kuye. Setama kulingisa Nkulunkulu ngekutsi ‘sitondze lokubi futsi sibambisise lokuhle.’—Roma 12:9.
Lutsandvo lwetfu ngaJehova lutsintsa indlela lesitiva ngayo ngato tonkhe tintfo. Sibonelo saloku kutsi singahle sitfole kutsi umsebenti wetfu wekutiphilisa awusijabulisi nobe utsatsa sonkhe sikhatsi setfu, kodvwa inhlitiyo yetfu isuke ilapho yini? Cha. Njengobe sitsandza Jehova ngenhlitiyo yetfu yonkhe, intfo lehamba embili kutsi sonkhe sitikhonti taNkulunkulu. Ngendlela lefanako, sifuna kujabulisa batali betfu, labo lesishade nabo, kanye nemcashi wetfu, kodvwa sikhombisa Jehova kutsi simtsandza ngenhlitiyo yetfu yonkhe ngekutsi sifune kujabulisa yena kwendlula bonkhe. Ngetulu kwaloko, nguye vele lokufanele simtsandze kakhulu.—Matewu 6:24; 10:37.
Kutsandza Jehova Ngemphefumulo Wetfu Wonkhe
Emibhalweni ligama lelitsi “umphefumulo” lisho umuntfu ngekwakhe kanye nendlela laphila ngayo. Ngako kutsandza Jehova ngemphefumulo wetfu wonkhe kusho kusebentisa kuphila kwetfu kute simdvumise siphindze sikhombise kutsi siyamtsandza.
w03 7/1 10 ¶6-7
“Ngempela, Lona NguNkulunkulu Wetfu”
6 Nawume ngephandle, lilanga libalele, yini loyivako esikhunjeni sakho? Kushisa kwelilanga. Ecinisweni usuke uva umphumela wemandla aJehova ekudala. Linemandla kangakanani lilanga? Emantfunjini alo lishisa 15 million degrees Celsius. Nawungahlephula lucetu lelilanga lengangenhloko yenyalitsi futsi ulubeke lapha emhlabeni, bewungeke usondzele kulo ngemakhilomitha langu-140. Njalo ngemzuzwana lilanga likhipha emandla lalingana nekuchuma kwemabhomu e-nuclear latigidzigidzi. Kodvwa umhlaba utungeleta ngendlela lefanele kuloko kushisa lokukhulu kwelilanga. Kube lilanga belisedvute kakhulu, emanti lasemhlabeni bekatawukusha, kube belikhashane kakhulu tonkhe tintfo betitawuba lichwa. Kunobe ngukuphi, loku bekutawenta kube bete lokuphila kuleplanethi.
7 Bantfu labanyenti balitsatsa kalula lilanga nanobe kuphila kwabo kuncike kulo. Abakuboni loko lilanga lelisifundzisa kona. Tihlabelelo 74:16 titsi ngaJehova: “Nguwe lowenta kukhanya nelilanga.” Kuliciniso kutsi lilanga lidvumisa Jehova, ‘uMdali welizulu, nemhlaba.’ (Tihlabelelo 146:6) Nobe kunjalo, lilanga lingulenye yetintfo letinyenti letidaliwe letisifundzisa ngemandla aJehova lamakhulu. Nasifundza lokunyenti ngemandla aJehova ekudala, ijula kakhulu indlela lesimhlonipha ngayo.
(Tihlabelelo 75:4-7) Kulabatigcabhako ngitsite: ‘Ningatigcabhi!’ Kulababi ngatsi: ‘Ningatiphakamisi! 5 Ningatiphakamisi nitikhukhumete, ningakhulumi ngekwedzelela! 6 Ngobe kuphakama nekwehla kwemuntfu akuveli emphumalanga nome enshonalanga, akuveli ngisho nasehlane nasetintsabeni; 7 kodvwa nguNkulunkulu lowehlulelako, wehlisa lomunye aphakamise lomunye.
w06 7/15 11 ¶2
Emaphuzu Lagcamile Encwadzi Yesitsatfu Neyesine YeTihlabelelo
75:4, 5, 10—Lifanekiselani ligama lelitsi “luphondvo”? Timphondvo tesilwane tisikhali lesinemandla. Ngako ligama lelitsi luphondvo lifanekisela emandla. Jehova waphakamisa timphondvo tebantfu bakhe, lokwenta kutsi baphakanyiswe, wase ujuba timphondvo talababi. Siyecwayiswa ngekuphakamisa timphondvo tetfu lokusho kutsi akukafaneli sichoshe nobe sikhulume ngekwedzelela. Njengobe kunguJehova losiphakamisako, tabelo lesititfola ebandleni kufanele sititsatse njengaletivela kuye.—Tihlabelelo 75:7.
it-1 1160 ¶7
Kutfobeka
Onkhe emadvodza nebafati kufanele atitfobe kulabo labaholako futsi alindzele Jehova kunobe ngukuphi kubekwa kwebazalwane nobe tabelo, ngobe kuphakanyiswa kuvela kuye. (Hla 75:6, 7) Lamanye emadvodzana aKhora langemaLevi atsi: “Ngingamane ngibe ngumlindzi wemnyango wendlu yaNkulunkulu, kunekutsi ngingahlala ngibuse emakhaya alababi.” (Hla 84:10) Lokutfobeka sibili kutsatsa sikhatsi kutsi kube khona. ImiBhalo nayikhuluma ngaloko lokudzingekako kuze umuntfu abe ngumbonisi, ichaza ngalokucacile kutsi indvodza lesandza kugucuka akukafaneli ibekwe, ‘ngobe ingahle igcwale umgcabho bese itfola sehlulelo lesatfolwa nguDeveli.’—1Tm 3:6.
(Tihlabelelo 78:11-17) Bakhohlwa ngimisebenti layentile netimangaliso takhe labakhombisa tona. 12 Wenta timangaliso embikwabokhokho babo, endzaweni yaseSowani eveni laseGibhithe. 13 Wehlukanisa lwandle, wabeweta kulo, wemisa emanti, kwaba shangatsi tindvonga. 14 Emini abebahola ngelifu, kutsi ebusuku abahole ngemlilo. 15 Wacheketa emadvwala ehlane, wabanatsisa badzimate bakholwa. 16 Wamilisa imifula edvwaleni, wageletisa emanti shangatsi ngimifula. 17 Noko, bachubeka nekumona, bamhlubuka ehlane Losetikwako Konkhe.
w04 4/1 21-22
Emehlo Akho Abheke Emvuzweni Yini?
Kwati indlela Jehova lativa ngayo ngebantfu bakhe kusiniketa litsemba, lelibaluleke ngalokulinganako nekukholwa. (1 Khorinte 13:13) Ligama lesiGriki lelitsi “litsemba” eBhayibhelini linemgcondvo “wekulindzela lokuhle” ngekulangatelela. Acabanga ngalelitsemba, umphostoli Pawula wabhala: “Sifisa kutsi ngamunye wenu akhutsale ngendlela lefanako kuze nibe nesiciniseko lesiphelele selitsemba kudzimate kube sekugcineni, khona ningetuvilapha, kepha nilingise labo labatfola letetsembiso ngekukholwa nangekubeketela.” (Hebheru 6:11, 12) Naka kutsi nangabe sichubeka sikhonta Jehova ngekwetsembeka, singaciniseka kutsi litsemba letfu litawugcwaliseka. Ngalokungafani nematsemba alelive, lelitsemba “alidvumati.” (Roma 5:5) Singaligcina njani litsemba letfu lilihle futsi licacile?
Indlela Yekuhlala Sinake Tintfo Letimayelana NaNkulunkulu
Emehlo etfu enyama ngeke akhone kunaka tintfo letimbili ngesikhatsi sinye. Kungalokufanako nangembono lesinawo ngetintfo letimayelana naNkulunkulu. Kunaka tintfo talelive lesiphila kulo kungenta singalinaki litsemba lesinalo lemhlaba lomusha. Ngekuhamba kwesikhatsi, ematsemba lebesinawo ngemhlaba lomusha angashabalala etingcondvweni tetfu. Loku kungaba buhlungu kakhulu. (Lukha 21:34) Ngako kubalulekile kutsi sigcine ‘liso letfu lilihle,’ sihlale sinake uMbuso waNkulunkulu kanye nemvuzo wekuphila lokuphakadze.—Matewu 6:22.
Kugcina liso lilihle akusilula ngaso sonkhe sikhatsi. Malanga onkhe kudzinga sinake tinkinga, tiphatamiso ngisho netilingo. Etimeni letinjalo, singahlala njani sinake uMbuso kanye nelitsemba lekuphila emhlabeni lomusha sibe singayitsatseli phansi leminye imisebenti? Ase sicoce ngetindlela letintsatfu.
Tadisha liVi laNkulunkulu malanga onkhe. Kufundza liBhayibheli njalo Kanye nekufundza tincwadzi letisekelwe eBhayibhelini kusisita sihlale sinake tintfo letimayelana naNkulunkulu. Kuliciniso kutsi kungenteka sesineminyaka leminyenti sitadisha livi laNkulunkulu, kodvwa kufanele sichubeke silitadisha, njengobe nje kudzingeka sichubeke sidla kuze sichubeke siphila. Asiyekeli kudla ngobe nje kadze sacala sidla. Ngako-ke nobe ngabe sesilati kangakanani liBhayibheli, kufanele sichubeke sitondla ngetintfo letimayelana naNkulunkulu kuze sichubeke sigcina litsemba letfu likhanya, sibe nekukholwa lokucinile kanye nelutsandvo sibili.—Tihlabelelo 1:1-3.
Khombisa kutsi uyabonga nawuzindla ngelivi laNkulunkulu. Kubaluleke ngani kuzindla? Kungenca yetizatfu letimbili. Kwekucala, kuzindla kusenta sikwati kukusebentisa loko lesikufundzako futsi sikhombise kutsi siyabonga ngako. Kwesibili, kuzindla kusenta singamkhohlwa Jehova, imisebenti yakhe lemangalisako kanye nelitsemba lalibeke phambi kwetfu. Ase sifanekise, ema-Israyeli laphuma naMosi eGibhithe atibonela ngewawo emandla aJehova lamakhulu. Aphindze asibona nesivikelo sakhe njengobe abewahola awayisa eVeni Lesetsembiso. Nanobe kunjalo, nakasehlane alibangise eVeni Lesetsembiso, ema-Israyeli acala kukhonona, lokwembula kutsi ete kukholwa. (Tihlabelelo 78:11-17) Beyiyini inkinga yawo?
Labantfu babese abasamnaki Jehova kanye nelitsemba lelimangalisako lalibeke embikwabo, kodvwa babese banaka buntofontofo bangaleso sikhatsi. Ngetulu kwetimangaliso netibonakaliso lebebatibonile, ema-Israyeli lamanyenti akhombisa kutsi ayakutsandza kukhonona futsi ete kukholwa. Tihlabelelo 106:13 titsi: “Basheshe bayikhohlwa imisebenti yakhe.” Lokunganaki lokunjalo kwenta lesitukulwane sangangeni eVeni Lesetsembiso.
Ngako, nawufundza imiBhalo nobe tincwadzi letisekelwe eBhayibhelini, tinike sikhatsi sekuzindla ngaloko lokufundzako. Kuzindla lokunjalo kubalulekile kuze ukhulise buhlobo bakho naNkulunkulu. Nasi sibonelo, nawufundza Tihlabelelo 106, incenye yayo lecashunwe ngenhla, zindla ngebuntfu baJehova. Naka indlela lawabeketelela ngayo ema-Israyeli futsi wawakhombisa umusa. Yibone ngeliso lengcondvo indlela lenta ngayo konkhe lokusemandleni akhe kuze awasite afike eVeni Lesetsembiso. Naka indlela ema-Israyeli labesolo akhonona ngayo. Yive indlela Jehova lebekeva ngayo buhlungu njengobe lesive lesingabongi sivivinya umusa wakhe nekubeketela kwakhe. Nasichubeka sizindla ngemavesi 30 na-31 lachaza indlela Finehasi lakumelela ngayo kulunga, siyaciniseka kutsi Jehova akatikhohlwa tinceku takhe letetsembekile futsi utiniketa umvuzo.
Sebentisa timiso teliBhayibheli ekuphileni kwakho. Njengobe silandzela timiso teliBhayibheli, siyatibonela kutsi seluleko saJehova siyasebenta. Taga 3:5, 6 titsi: “Tsemba Simakadze ngayo yonkhe inhlitiyo yakho, ungeyami ekwatini kwakho. Matise kuko konkhe lokwentako, yena uyakucondzisa tindlela takho.” Cabanga indlela kutiphatsa kabi kwebantfu labanyenti lokubabangele ngayo inkinga engcodvweni, emoyeni kanye nasemtimbeni. Ngekutitika ngenjabulo yesikhashana, bantfu labanjalo bakuvunile labakutjalile. Ngalokwehlukile, labo labahamba ‘ngendlela lencane’ banambitsa imphilo yemhlaba lomusha futsi loku kubakhutsata kutsi bachubeke bahamba endleleni yekuphila.—Matewu 7:13, 14; Tihlabelelo 34:8.
Kusebentisa timiso letiseBhayibhelini kungaba yinsayeya. Ngaletinye tikhatsi kungabonakala shengatsi kucatulula indzaba ngaphandle kwekusebentisa imibhalo kunagsheshe kusikhulule kuleso simo. Nasi sibonelo, nasinetinkinga tetimali singaba sesilingweni sekwenta uMbuso ungaseti kucala. Nanobe kunjalo labo labanekukholwa futsi bahlale banake tintfo letimayelana naNkulunkulu bayacinisekiswa kutsi ekugcineni “kuyakubahambela kahle labo labesaba Nkulunkulu.” (Umshumayeli 8:12) UmKhristu kungase kudzingeke asebente sikhatsi lesengetiwe, kodvwa angeke avume kufana na-Esawu lowatilahlekisela bujhlobo bakhe naNkulunkulu ngekutsi anake tintfo letingakabaluleki.—Genesisi 25:34; Hebheru 12:16.
Funisisa Umcebo EVini LaNkulunkulu
(Tihlabelelo 78:2) Ngitawufundzisa ngemifanekiso, ngikhulume imfihlakalo yasemandvulo.
Bebalindzele Mesiya
Leminye Imisebenti YaMesiya Yabiketelwa
14 Mesiya abetawukhuluma asebentisa tindzaba leticanjiwe nobe imifanekiso. Umhlabeli Asafa wahlabela: ‘Ngitawufundzisa ngemifanekiso.’ (Hla. 78:2) Sati njani kutsi lesiphrofetho sagcwaliseka kuJesu? Kungobe Matewu uyasitjela. Ngemuva kwekukhuluma ngemifanekiso leyashiwo nguJesu ngesikhatsi afananisa uMbuso wemazulu nenhlanyelo yendlulamitsi kanye nembiliso, Matewu uchubeka atsi: “Ngaphandle kwemifanekiso kute [Jesu] lakukhuluma kuso, kuze kugcwaliseke loko lokwakhulunywa ngemphrofethi kutsi: ‘Ngitawukhuluma ngemifanekiso, ngiphumisele lokufihlakele seloku kwasekelwa umhlaba.’” (Mat. 13:31-35) Taga kanye nemifanekiso bekunguletinye tindlela letiphumelelako Jesu labetisebentisa nakafundzisa.
(Tihlabelelo 78:40, 41) Kukanyenti kangakanani bamhlubuka ehlane, bamdzabukisa ehlane kalashameshame. 41 Balinga Nkulunkulu njalonjalo, bacansula Longcwele waka-Israyeli.
LiBhayibheli Liyakugucula Kuphila
Njengobe bengitadisha liBhayibheli, indlela lebengimtsatsa ngayo Nkulunkulu yashintja ngalokuphelele. Ngafundza kutsi akusuye lobangela bubi nekuhlupheka kanye nekutsi uva buhlungu nangabe bantfu benta tintfo letimbi. (Genesisi 6:6; Tihlabelelo 78:40, 41) Ngatimisela kwetama kungamvisi buhlungu Jehova. Bengifuna kumjabulisa. (Taga 27:11) Ngayekela kunatsa kakhulu tjwala nekubhema lugwayi, nekutiphatsa kabi. Nga-March 1994 ngabhajatiswa ngaba ngulomunye waBoFakazi BaJehova.
Sondzela KuNkulunkulu
Jehova Unayo Yini Imiva?
NANGABE imphendvulo yalombuto kunguyebo, singatibuta lomunye umbuto: Indlela lesenta ngayo iyamtsintsa yini Nkulunkulu? Ngalamanye emavi singamjabulisa yini Nkulunkulu nobe simvise buhlungu ngendlela lesenta ngayo? Letinye tati tefilosofi tasendvulo tatsi loko ngeke kwenteke. Tatsi kute umuntfu longaba nesandla endleleni yaNkulunkulu yekwenta tintfo, ngako Nkulunkulu ute imiva. Kodvwa liBhayibheli lisho lokwehlukile, litsi Jehova unemiva lejulile futsi unendzaba naloko lesikwentako. Cabanga ngalokushiwo Tihlabelelo 78:40, 41.
Tihlabelelo 78 tikhuluma ngendlela Nkulunkulu lebekawaphatsa ngayo ema-Israyeli. Ngemuva kwekukhulula lesive ekugcilatweni eGibhithe, Jehova wasicela kutsi sibe nebuhlobo lobukhetsekile naye. Wasetsembisa kutsi nasitawulilalela livi lakhe, besitawuba “sive lesingcwele” futsi asisebentise kuze sifeze injongo yakhe. Labantfu bavuma futsi baba ngephansi kwesivumelwane semtsetfo. Bakwenta yini loko lebebakwetsembisile?—Eksodusi 19:3-8.
Umhlabeleli utsi: “Kukanyenti kangakanani bamhlubuka ehlane.” (Vesi 40) Livesi lelilandzelako litsi: “Balinga Nkulunkulu njalonjalo.” (Vesi 41) Umbhali lapha kulamavesi uchaza indlela ema-Israyeli lebakangalaleli ngayo. Lesento lesibi sabonakala ehlane, ngekushesha nje ngemuva kwekukhululwa eGibhithe. Labantfu bacala kububula ngaNkulunkulu, bakhala ngekutsi ingabe utawukhona yini kubanakekela nekutsi uyafisa yini. (Numeri 14:1-4) Lesinye sikhombo lesisita bahumushi beliBhayibheli satsi lamavi latsi: “bamhlubuka” “angasho kutsi ‘bebacinisa tinhlitiyo tabo ngalokumelene naNkulunkulu’ nobe ‘bebatsi “Cha” kuNkulunkulu.’” Nanobe kunjalo, ngenca yekutsi Nkulunkulu unemusa, bekabatsetselela bantfu bakhe nabaphendvuka mbamba. Kodvwa bebabuyela etindleleni tabo futsi bangamlaleli. Loku bekwenteka njalonjalo.—Tihlabelelo 78:10-19, 38.
Bekativa njani Jehova lapho bantfu bakhe bangamlaleli? Livesi 40 litsi: “Bamdzabukisa” Lelinye lihumusho litsi “bebamvisa buhlungu.” Lesinye sikhombo seliBhayibheli sitsi: “Indzaba lapha ikutsi tento temaHebheru betivisa buhlungu, njengetemntfwana longalaleli.” Njengemntfwana longabalaleli batali bakhe ngaleyondlela abavise buhlungu, ema-Israyeli langalaleli ‘amcansula Longcwele waka-Israyeli.’—Vesi 41.
Singafundzani kuletihlabelelo? Kuyasijabulisa kwati kutsi Jehova uyatitsandza tikhonti takhe futsi uyatibeketelela. Ngesikhatsi lesifanako kusenta sinake kutsi Jehova unayo imiva futsi kutiphatsa kwetfu kuyamtsintsa. Kukwati loko kukutsintsa njani? Kuyakushukumisela yini kutsi wente tento letilungile?
Kunekutsi sente tento letingasiholela esonweni futsi simvise buhlungu Jehova, singenta tento letinhle, kanjalo sente inhlitiyo yakhe ijabule. Nguloko kanye lakucela etikhontini takhe nakatsi: “Hlakanipha, khona ngitewujabula.” (Taga 27:11) Kute intfo lebalulekile lesingayinika Jehova kwengca kuphila ngendlela letawumjabulisa.
JULY 25-31
UMCEBO LOSEVINI LANKULUNKULU | TIHLABELELO 79-86
“Ngubani Umuntfu Lobaluleke Kakhulu Ekuphileni Kwakho?”
(Tihlabelelo 83:1-5) Awu, Nkulunkulu! Ungathuli, utente simungulu. Ungatsalalisi, Nkulunkulu. 2 Ase ubuke nje, titsa takho tiyaphitsitela, nalabo labakutondzako bayakucoloshela. 3 Benta sigungu, bahlangane ngebantfu bakho, bafakane imilomo ngalabo labeluswe nguwe. 4 Batsi: “Wotani sibacotfule bangabe basaba ngiso sive, kuze libito laka-Israyeli lingaphindze likhunjulwe.” 5 Bacebisana ngawe nganhlitiyo yinye, bente sivumelwane ngawe.
w08 10/15 13 ¶7-8
Jehova Uyawuphendvula Umthantazo Losuka Enhlitiyweni
7 Yini lebeyimkhatsata kakhulu umhlabeleli? Kuliciniso kutsi kungenteka bekakhatsateke ngekuphepha kwakhe kanye nekwemndeni wakhe. Nanobe kunjalo, ingcikitsi yalomthantazo beyimayelana nekuhlanjalatwa kwelibito laJehova kanye nekuphatfwa kabi kwesive sakhe lebesibitwa ngelibito lakhe. Shengatsi sisonkhe singaba nembono lofanako njengobe sibeketelela bumatima kulamalanga ekugcina kulelive laSathane.—Fundza Matewu 6:9, 10.
8 Nakakhuluma ngaloko titsa tema-Israyeli letakusho, umhlabeleli watsi: “Wotani sibacotfule bangabe basaba ngiso sive, kuze libito laka-Israyeli lingaphindze likhunjulwe.” (Hla. 83:4) Letive betibenyanya bantfu baNkulunkulu labakhetsiwe. Kodvwa bekunalokunye lebebakuhlosile. Bebafisa kuba nelive lema-Israyeli futsi batsi: “Asidle lelive libe lifa letfu, lelive lelingemadlelo aNkulunkulu!” (Hla. 83:12) Kwenteka intfo lefanako yini nalamuhla? Yebo.
(Tihlabelelo 83:1-5) Yebo, Simakadze! Tsela buso babo ngelihlazo, badzimate balifune libito lakho.
w08 10/15 15 ¶16
Jehova Uyawuphendvula Umthantazo Losuka Enhlitiyweni
Thantazela Kulwelwa Kweligama LaJehova
16 ‘Kulamalanga ekugcina,’ Jehova uvimbe yonkhe imetamo yekucedza bantfu bakhe. (2 Thim. 3:1) Umphumela waloko ube kutsi baphikisi bahlazekile. Tihlabelelo 83:16 tabiketela ngaloku natitsi: “Yebo, Simakadze! Tsela buso babo ngelihlazo, badzimate balifune libito lakho.” Emaveni lamanyenti, baphikisi behlulekile kuthulisa BoFakazi BaJehova. Kulawo mave, kukhutsatela kwetikhonti taNkulunkulu weliciniso kube bufakazi kulabo labanetinhlitiyo letinhle, futsi labanyenti ‘balifunile libito laNkulunkulu.’ Kulamanye emave lapho BoFakazi BaJehova bebaphatfwa kabi, sekunetinkhulungwane tetikhonti taJehova letijabulako. Loku kube kuncoba lokukhulu kwaJehova. Titsa takhe tihlazeke kakhulu.—Fundza Jeremiya 1:19.
(Tihlabelelo 83:17, 18) Shangatsi bangahlazeka baphele emandla kuze kube phakadze, shangatsi bangehluleka babhubhe 18 Shangatsi bangati kutsi nguwe wedvwa lolibito lakhe linguSimakadze, nguwe Losetikwako Konkhe, lophakeme abuse umhlaba wonkhe.
Ngubani Lobaluleke Kakhulu Ekuphileni Kwakho?
MHLAWUMBE bewucala kubona libito laJehova ngesikhatsi bakukhombisa lona emBhalweni weTihlabelelo 83:18. Kungenteka kutsi wamangala nawufundza lamavi latsi: “Shangatsi bantfu bangati kutsi nguwe wedvwa lolibito lakhe [linguJehova, NW], nguwe Losetikwako Konkhe, lophakeme abuse umhlaba wonkhe.” Kusukela ngaleso sikhatsi, akungabateki kutsi nawe uye walisebentisa lelivesi kute usite labanye bati Nkulunkulu wetfu lonelutsandvo, Jehova.—Rom. 10:12, 13.
2 Ngisho nobe kubalulekile kutsi bantfu balati libito laJehova, kodvwa akukeneli kutsi bagcine ngaloko kuphela. Naka indlela umhlabeli layigcizelela ngayo lenye intfo lebalulekile kute sisindziswe, nakatsi: “Nguwe wedvwa . . . Losetikwako Konkhe, lophakeme abuse umhlaba wonkhe.” NguJehova lobaluleke kakhulu endzaweni yonkhe. Njengobe anguMdali wato tonkhe tintfo, unelilungelo lekulindzela kutsi tonkhe tidalwa takhe timtfobele ngalokuphelele. (Semb. 4:11) Ngako-ke, sinesizatfu lesihle sekutibuta nangumbuto: ‘Ngubani lobaluleke kakhulu ekuphileni kwami?’ Kubalulekile nekutsi ngamunye wetfu ayihlolisise imphendvulo yakhe kulombuto.
w08 10/15 15-16 ¶17-18
Jehova Uyawuphendvula Umthantazo Losuka Enhlitiyweni
17 Siyati kutsi lemphi isengakapheli. Ngako siyachubeka sishumayela tindzaba letimnandzi ngisho nakulabo labasiphikisako. (Mat. 24:14, 21) Nanobe kunjalo, lelitfuba lelivulekele labaphikisi lekutsi baphendvuke futsi batfole kusindziswa litawuphela ngekushesha. Kungcweliswa kwelibito laJehova kubaluleke kwendlula kusindziswa kwebantfu. (Fundza Hezekeli 38:23.) Nasekusikhatsi sekutsi tive tihlangane kuze tilwe nebantfu baNkulunkulu njengobe kwabiketelwa, sitawukhumbula emavi emhlabeleli nakathantaza atsi: “Shangatsi bangahlazeka baphele emandla kuze kube phakadze, shangatsi bangehluleka babhubhe.”—Hla. 83:17.
18 Labo labaphikisa bukhosi baJehova batawuhlazeka. LiVi laNkulunkulu lembula kutsi labo “labangatilaleli tindzaba letimnandzi” batawubhujiswa e-Amagedoni futsi ‘batawubhujiswa phakadze.’ (Thes. 1:7-9) Lokubhujiswa kwabo kanye nekusindza kwalabo labakhonta Jehova ngeliciniso kutawuba bufakazi bekutsi Jehova nguye kuphela Nkulunkulu weliciniso. Emhlabeni lomusha, lokuncoba ngeke sikukhohlwe. Labo labatawuvuswa nasekuvuswa ‘labalungile nalabangakalungi’ batawucocelwa ngalesento saNkulunkulu lesikhulu. (Imis. 24:15) Emhlabeni lomusha kutawuba sebaleni kutsi kukuhlakanipha kucondziswa bukhosi baJehova. Labo labatfobekile batawubona kutsi Jehova nguye kuphela Nkulunkulu weliciniso.
Funisisa Umcebo EVini LaNkulunkulu
(Tihlabelelo 79:9) Sisite, Nkulunkulu wensindziso yetfu, sisite ngenca yenkhatimulo yelibito lakho, sihlenge usitsetselele tono tetfu, ngenca yelibito lakho lelihloniphekile.
w06 7/15 12 ¶5
Emaphuzu Lagcamile Encwadzi Yesitsatfu Neyesine YeTihlabelelo
79:9. Jehova uyayilalela imithantazo yetfu, ikakhulukati leyo lemayelana nekungcweliswa kwelibito lakhe.
(Tihlabelelo 86:5) Ngobe wena, Nkhosi, ulungile futsi ulungele kutsetselela, umusa wakho uyabaphuphumela labo labakhala kuwe.
w06 7/15 12 ¶9
Emaphuzu Lagcamile Encwadzi Yesitsatfu Neyesine YeTihlabelelo
86:5. Siyajabula ngekutsi Jehova “ulungele kutsetselela”! Unaka nobe ngabe yini lengamenta abe nemusa kumuntfu lowente bubi kodvwa lophendvukile.