Tikhombo Tencwajana Yekubhalela Emhlanganweni Wekuphila KwemaKhristu Nemsebenti Wawo
AUGUST 1-7
UMCEBO LOSEVINI LANKULUNKULU | TIHLABELELO 87-91
‘Hlala Usendzaweni Lesitsekile YaLosetikwako Konkhe’
(Tihlabelelo 91:1, 2) Lowo lohlala ekusitsekeni kuLosetikwako Konkhe ukhosele ekhwapheni laSomandla. 2 Angasho kuSimakadze atsi: “Wena usiphephelo sami nenqaba yami, unguNkulunkulu wami lengetsembele kuye.”
w10 2/15 26-27 ¶10-11
Niyemukelwa Endleleni Lencono Kakhulu Yekuphila
Kuvikeleka ‘Endzaweni Lesitsekile’
10 Kutinikela nekubhajatiswa kuphumela kulesinye sibusiso—lilungelo lekuhlala ‘endzaweni lesitsekile yaLosetikwako Konkhe.’ (Fundza Tihlabelelo 91:1.) Lena yindzawo lengumfanekiso yekulondzeka nalesivikelo—isimo sekuvikeleka ekulimaleni ngakamoya. Iyindzawo ‘lesitsekile’ ngobe bantfu labete umbono waNkulunkulu nalabangametsembi, abayati. Ngekuphila ngekuvumelana nekutinikela kwetfu nekumetsemba ngendlela lephelele Jehova, ecinisweni siyobe sitsi: “Wena usiphephelo sami nenqaba yami unguNkulunkulu wami lengetsembele kuye.” (Hla. 91:2) Nkulunkulu Jehova uba yindzawo yetfu levikelekile yekuhlala. (Hla. 91:9) Kute lenye indzawo lesingaphephela kuyo kute sivikeleke ngaphandle kwalena!
11 Kutfola indlela yekungena ‘kulendzawo lesitsekile’ yaJehova kukhombisa kutsi sibusiswe ngelilungelo lekwakha nekukhulisa buhlobo betfu naye. Loku kucala ngekutsi sitinikele siphindze sibhajatiswe. Ngemuva kwaloko, sitfutfukise buhlobo betfu naNkulunkulu ngekutsi sibe nesifundvo setfu seliBhayibheli, sithandaze kuye ngalokusuka enhlitiyweni futsi simlalele. (Jak. 4:8) Kute lowake wasondzelana naJehova ngelizinga lelisetulu kwendlula Jesu, longazange ngisho nakanye agucule umcondvo wakhe ngekwetsembeka kuMdali. (Joh. 8:29) Ngako-ke, asingacali singabate Jehova nobe sifiso sakhe kanye nelikhono lakhe lekusisita kutsi sigcwalise setsembiso setfu sekutinikela kuye. (Shu. 5:4) Emalungiselelo akamoya Nkulunkulu lawentele bantfu bakhe abufakazi lesingeke sibuphike bekutsi uyasitsandza futsi ufuna siphumelele ekumkhonteni.
(Tihlabelelo 91:3) Nguye-ke Simakadze lotakwephula elugibeni lwebacuphi, akuvikele nasetifeni letitsatselwanako.
w07 10/1 26-30 ¶1-18
Kukhululwa Esicupheni Semcuphi Wetinyoni
ONKHE emaKhristu ayatingelwa, atingelwa sidalwa lesihlakaniphe kakhulu kunebantfu nalesinebucili. Natikhuluma ngaso Tihlabelelo 91:3 titsi sifana ‘nemcuphi.’ Singubani lesitsa? Nasikhuluma ngalesitsa Sicongosekulindza saJune 1, 1883 satsi nguSathane Develi. Lesitsa lesesabekako nalesinebucili sidukisa bantfu baNkulunkulu sibabambe njengemcuphi wetinyoni.
2 Kadzeni tinyoni betibanjwa ngenca yekutsi tihlabela kamnandzi, tinetimphiko letinhle, tiyadliwa futsi bebanganikela nangato. Nobe kunjalo, ngekwemvelo tinyoni tihlakaniphile, tisheshe tiyibone ingoti lokwenta kube lukhuni kutibamba. Ngako-ke, umcuphi ufundza ngekucophelela imikhuba yeluhlobo lwenyoni lafuna kulubamba. Ubese ufuna emasu ekuyibamba. LiBhayibheli nalifananisa Sathane nemcuphi wetinyoni lisisita kutsi sicondze tindlela takhe. Sathane uyayinakisisa indlela lesenta ngayo. Unaka imikhuba yetfu bese usibekela tingibe letingabonakali kute asibambe siphila. (2 Thimothi 2:26) Kubanjwa nguye kungalimata buhlobo betfu naNkulunkulu bese ekugcineni kusiholele ekubhujisweni. Kuze sivikeleke kudzingeka siwati emachinga lahlukahlukene ‘alomcuphi.’
3 Umhlabeleli wafananisa emachinga aSathane newelibhubesi nobe etinyoka. (Tihlabelelo 91:13) Njengelibhubesi, Sathane uyasinyenyela ngekutsi asihlasele ngelushushiso nangekushaya imitsetfo lemelene nebantfu baJehova. (Tihlabelelo 94:20) Letindlela tekuhlasela tingasiwisa ekukholweni. Esikhatsini lesinyenti lokuhlasela kwenta bantfu baNkulunkulu babe munye. Sathane uhlasela kanjani ngetindlela letibhacile?
4 Develi usebentisa tindlela takhe letihlakaniphile naletibulala njengesihlungu senyoka kute asikhohlise. Ngalendlela ukhonile kuphumelela ekudukiseni tingcondvo tebantfu baNkulunkulu, abaphambukise ekwenteni intsandvo yaJehova lokuholela emiphumeleni lebuhlungu. Lokujabulisako kutsi sesiyawati emachinga aSathane. (2 Khorinte 2:11) Ase sicabangele tindlela letine letibulalako letisetjentiswa ‘ngulomcuphi.’
Kwesaba Bantfu
5 ‘Lomcuphi’ uyati kutsi bantfu bayakutsandza kwemukeleka kulabanye. EmaKhristu anendzaba nekutsi labanye bativa njani. Ngekukwati loko Develi ufuna kutsi singasabi nendzaba nalabanye kutsi bativa njani. Nasi sibonelo, labanye bantfu baNkulunkulu labangakacini ebuhlotjeni babo naNkulunkulu ubabamba ngelugibe ‘lekwesaba bantfu.’ (Taga 29:25) Tinceku taNkulunkulu tibese tenta tintfo Jehova langatifuni nobe tingasakwenti lokushiwo liVi lakhe ngenca yekwesaba bantfu, basuke sebabanjwe ‘ngulomcuphi.’—Hezekeli 33:8; Jakobe 4:17.
6 Nasi sibonelo, losemusha angacindzetelwa bontsanga yakhe esikolweni kutsi abheme ligwayi. Kubhema ligwayi bekungaba yintfo lebekangayicabangi nakesuka ekhaya aya esikolweni ngalelo langa. Ngekushesha nje utikhandza sekenta intfo letawulimata imphilo yakhe nalengeke imjabulise Nkulunkulu. (2 Khorinte 7:1) Walingeka njani? Mhlawumbe watihlanganisa nebangani lababi futsi bekesaba kubadvumata. Bantfu labasha! ningabanjwa ngulolugibe lwalomcuphi. Indlela yekutivikela kuloku kutsi singatitsatsi tintfo kalula. Lalela seluleko seliBhayibheli sekutihlanganisa nebangani lababi.—1 Khorinte 15:33.
7 Batali labangemaKhristu banaka kakhulu seluleko semBhalo lesimayelana nekondla imindeni yabo kute babe nanembeza lohlobile. (1 Thimothi 5:8) Nanobe kunjalo, umgomo waSathane kwenta emaKhristu kutsi angahluleli kahle kulendzaba. Loku kubenta kutsi bangasayi esifundvweni onkhe malanga bese bafuna kusebenta sikhatsi lesengetiwe emsebentini. Bangesaba kucela sikhatsi sekuya emihlanganweni kute badvumise Jehova bakanye nebazalwane babo. ‘Kwetsemba Jehova’ kungasivikela kulolugibe. (Taga 3:5, 6) Kukhumbula kutsi sonkhe sibantfwana baNkulunkulu nekutsi Jehova wenta sifungo sekutsi utawuhlale asigadzile, kutasisita kutsi sehlulele kahle kulendzaba. Batali, niyametsemba yini Jehova kutsi utawunakekela nine kanye nemindeni yenu nanenta intsandvo yakhe? Nobe nitawubanjwa nguSathane niphila kute anentise intsandvo yakhe ngenca yekwesaba bantfu? Ngako-ke siyanincenga kutsi nicabangele lendzaba ngemthantazo.
Lugibe Lwekufuna Tintfo Letibonakalako
8 Sathane uphindze asebentise kutsandza tintfo letibonakalako kutsi asibambe. Lesimiso setintfo salelive sikhutsata bantfu kutsi bangenele tinhlangano letitabenta kutsi basheshe banjinge lokungenteka tikhohlise bantfu baNkulunkulu. Ngalesinye sikhatsi lomunye angakukhutsata atsi: Kute ufike esikhundleni lesisetulu futsi ukujabulele kuphila, sebenta kamatima, ungaba nalihlahlandlela futsi.” Lamanye emaKhristu lasitakala ngekuhlupheka kwalabanye angasho emavi lafana nalawa. Kubalulekile kucabangisisa ngalesikhutsato. Lesikhutsato asifani yini nekucabanga kwendvodza ‘lete ingcondvo’ Jesu lakhuluma ngayo emfanekisweni wakhe?—Lukha 12:16-21.
9 Sathane ubusa lelive lakhe lelibi ngendlela yekutsi akhutsate bantfu kutsi batsandze tintfo letibonakalako. Lolutsandvo lolunje lungakonakalisa kuphila kwemKhristu, lukwente kuminyeteleke kuphindze ‘kungatseli.’ (Makho 4:19) LiBhayibheli lisikhutsata kutsi senetiswe nguloko lesinako. (1 Thimothi 6:8) Labanye babanjwa ngulolugibe ‘lwalomcuphi’ ngenca yekutsi abasisebentisi leseluleko ekuphileni kwabo. Akusiko yini kutigcabha lokwenta bantfu bative bafuna kuphila loluhlobo lwemphilo lesezingeni lelisetulu? Kutsiwani ngawe? Ngabe lutsandvo lwetintfo letibonakalako luta kucala kunekukhonta Nkulunkulu? (Hagayi 1:2-8) Lokubuhlungu kutsi ngesikhatsi sekuwa kwemnotfo, lamanye emaKhristu adzele buhlobo bawo naNkulunkulu kute abambe lizinga lekuphila lebesebalijwayele. Simo lesinje sekutsandza tintfo letibonakalako siyamjabulisa ‘umcuphi.’
Lugibe Lwekutijabulisa Lokungakalungi
10 Lelinye lichinga ‘umcuphi wetinyoni’ lalisebentisako kutsatsela phasi umuva longokwemvelo bantfu labanawo ngalokulungile nalokungakalungi. Simo sengcondvo sekulawulwa tekutijabulisa lamuhla sifana nesaseSodoma naseGomora. Ngisho nemibiko yetindzaba kuma-TV nakubomagazini iveta budlova futsi ikhutsate nekutiphatsa kabi ngekwelicansi. Tintfo letinyenti tekutijabulisa letibonakala kuma-TV naletifundvwa kubomagazini tifiphalisa likhono lebantfu ‘lekuhlukanisa lokulungile nalokungakalungi.’ (Hebheru 5:14) Kodvwa khumbula emavi aJehova lawasho ngemphrofethi Isaya latsi: “Maye kulabo labatsi lokubi kuhle nalokuhle batsi kubi.” (Isaya 5:20) Kambe ‘lomcuphi wetinyoni’ sokonakalisile yini kucabanga kwakho ngekutijabulisa lokungakalungi? Kubalulekile kutsi sitihlole.—2 Khorinte 13:5.
11 Eminyakeni lecishe ibe ngu-25 leyendlulile, Sicongosekulindza secwayisa bantfu baNkulunkulu ngemidlalo ye-TV leluchungechunge. Naku lokwaphawulwa ngetindlela letibhacile talemidlalo letsandvwako leluchungechunge ye-TV: “kufuna lutsandvo kusetjentiselwa kutsetselela noma ngabe nguluphi luhlobo lwekutiphatsa kabi. Nasi sibonelo, lomunye losemusha lokhulelwe angakashadi watsi kumngani wakhe: ‘Maye ngiyamtsandza Victor. Ngite inkinga. . . . Kuba nemntfwana wakhe nje kukhulu kimi!’ Umculo . . . lokhalela phasi wenta kube matima kucabanga kutsi kutiphatsa kwakhe kubi. Nawe futsi uyamtsandza Victor. Uyayivela lentfombatane. ‘Uyabona.’ ‘Kuyamangalisa kutsi ungakutsetselela njani loku,’ kwasho lomunye lebekabukela lokwatsi ngemuva kwesikhatsi wayilungisa indlela lebekacabanga ngayo. Ngiyati kutsi kutiphatsa lokubi akukalungi. Kepha ngase ngiyabona kutsi angicabangi kahle.’”
12 Kusukela kwashicilelwa leso sihloko, letinhlelo letonakalisako tiyandza. Etindzaweni letinyenti, tinhlelo leti-nje tisakatwa busuku nemini. Emadvodza, bafati kanye nalabasebasha bavame kondla tingcondvo netinhlitiyo tabo ngaloluhlobo lwekutijabulisa. Akukafanele sonakalise kucabanga kwetfu ngetintfo letingasito. Kukabi kucabanga kutsi kutijabulisa lokungakalungi akusiko kubi kangako njengaloko lesikubonako kulelive. Ngabe kukahle yini kutsi umKhristu atitsetselele ngekukhetsa luhlobo lwekutijabulisa lwebantfu longeke sewukucabange kubamema ekhaya lakho?
13 Labanyenti bayasitakala ngekulalela sicwayiso lesakhishwa “sisebenti lesetsembekile nalesihlakaniphile.” (Matewu 24:45-47) Labanye ngemva kwekufundza seluleko lesicacile nalesisekelwe eBhayibhelini, babhala baveta indlela letihloko letabatsintsa ngayo. Lomunye wavuma watsi: “Sekuphele iminyaka lengu-13 ngiphila ngekubukela imidlalo leluchungechunge ye-TV. Bengicabanga kutsi kwenele nje kutsi ngiye emihlanganweni yebuKhristu nekuhle ngiya ensimini. Lemidlalo ye-TV leluchungechunge yangifundzisa umkhuba welive wekutsi nangabe indvodza yakho ingakuphatsi kahle noma uva ungasatsandvwa, usuke sewunaso sizatfu sekutsi uphinge ngobe ngiyo lebangele loko. Ngako-ke lapho ngiva nje kutsi angiphinge ngangivele ngente njalo, lesento lesibi sangenta ngona kuJehova nakumngani wami wemshado.” Lokubuhlungu lodzadze wayekeliswa kuba nguFakazi. Lokusijabulisako kutsi ngemuva kwesikhatsi walungisa kucabanga kwakhe waphendvuka, futsi wabuyiselwa. Letihloko letecwayisa ngemidlalo ye-TV leluchungechunge tamnika emandla ekuyekela kujatjuliswa nguloko Jehova langakutsandzi.—Amosi 5:14, 15.
14 Lomunye umfundzi naye lobekanalenkinga watsi: “Nangifundza letihloko ngakhala, ngobe ngatfola ukutsi inhlitiyo yami yayingasamkhonti Jehova ngalokuphelele. Ngatsembisa Nkulunkulu kutsi angeke ngiphindze ngigcilatwe ngulemidlalo.” Lomunye dzadze longumKhristu naye lobekadukiswa ngulemidlalo watsi nakafundza letihloko, wavuma kutsi naye bekayengekile futsi wabese ubhala utsi: “Ngatibuta. . . kutsi buhlobo bami naJehova bebungatsintseki yini. [Badlali bale midlalo] babengaba kanjani bangani bami ngibe ngingumngani waJehova?” Nangabe lemidlalo ye-TV seyonakalise tinhlitiyo tebantfu iminyaka lengu-25 leyedlulile, kangakanani-ke lamuhla? (2 Thimothi 3:13) Kufanele siticaphele tingibe taSathane talo lonkhe luhlobo lwekutijabulisa lolungakalungi, ngisho nobe kuyimidlalo ye-TV leluchungechunge, imidlalo yema-video lanebudlova noma ema-video emculo lanekutiphatsa lokubi.
Sicupho Sekungevani
15 Sathane usebentisa lugibe lekungevani lolubanga kwehlukana emkhatsini webantfu baJehova. Noma ngabe sinamaphi emalungelo enkonzo, lolugibe lungasibamba. Labanye babanjwa nguDeveli baphila ngobe bavumela kungevani kuphatamise kuthula nebunye kanye kuhlalisana nebazalwane ngekuvana.—Tihlabelelo 133:1-3.
16 NgeMphi Yelive Yekucala, Sathane wetama kubhubhisa incenye lesemhlabeni yenhlangano yaJehova ngekuyihlasela ngalokucondzile, kodvwa akazange aphumelele. (Sembulo 11:7-13) Kusukela ngaleso sikhatsi, solo wetama ngebucili kuphatamisa kuvana kwetfu. Nangabe sivumela kungevani kubangele kwehlukana, sisuke sesinika ‘umcuphi wetinyoni’ litfuba. Loko kungawuphatamisa umoya longcwele ungasageleti ngalokukhululekile ekuphileni kwetfu kanye nasebandleni. Nakwenteka loko, Sathane angajabula ngobe noma ngangukuphi kuphatamiseka kwekuthula nekuvana ebandleni kuphatamisa umsebenzi wekushumayela.—Efesu 4:27, 30-32.
17 Kufanele wenteni nangabe kunemKhristu longavani naye? Kuliciniso kutsi timo atifani. Noma kunjalo, noma ngabe tinganani tizatfu letingenta kutsi ningevani, kodvwa loko akusho kutsi kungevani kufanele kungalungiswa. (Matewu 5:23, 24; 18:15-17) Seluleko lesiseVini laNkulunkulu leliphefumulelwe, siphelele. Lapho sisetjentiswa, akwenteki kutsi singaphumeleli. Sisebenta ngaso sonkhe sikhatsi!
18 Jehova “ulungele kutsetselela,” futsi “uyasitsetselela.” (Tihlabelelo 86:5; 130:4) Lapho simlingisa sisuke sikhombisa kutsi sibantfwana bakhe. (Efesu 5:1) Sonkhe sitoni futsi siyidinga kakhulu intsetselelo yaJehova. Ngako, kubalulekile kutsi sibatsetselele labanye ngisho nobe singatsandzi kwenta njalo. Singahle sitikhandze sesifana nenceku lesemfanekisweni waJesu layakwala kutsetselela lenye inceku lebeyiyikweleta imali lencane nayicatsaniswa naleyo lebeyiyikweleta inkhosi kodvwa yona yayitsetselela. Lapho inkhosi ikuva loko, yayivalela ejele lenceku lengatsetseleli. Nakaphetsa lomfanekiso wakhe Jesu watsi: “NaBabe losezulwini utawukwenta lokufanako nakini nangabe ningabacoleli labanye bantfu ngalokusuka enhlitiyweni.” (Matewu 18:21-35) Kuzindla ngalomfanekiso nekucabangisisa ngekutsi kukanyenti kangakanani Jehova asitsetselela tono tetfu ngalokukhululekile, kutasisita lapho setama kulungisa kungevani nebazalwane betfu!—Tihlabelelo 19:14.
(Tihlabelelo 91:9-14) Ngobe wena Simakadze umente waba siphephelo sakho, Losetikwako Konkhe umente inqaba yakho. 10 Ungeke wehlelwe ngemashwa, nesifo singeke sisondzele ekhaya lakho. 11 Ngobe Nkulunkulu uyawuyala tingilosi takhe ngawe tikulondvolote ekuhambeni kwakho konkhe. 12 Tiyawukutsatsa tikwetfwale ngetandla, kuze lunyawo lwakho lungete lwakhutjwa etjeni. 13 Uyawuhamba etikwemabhubesi netinyoka, ugcobagcobe etikwemawundlu emabhubesi kanye nasetikwetinyoka. 14 Nkulunkulu yena utsi: “Njengobe naku ubambelele kimi ngelutsandvo, ngitamephula ngimbeke endzaweni lephakeme, ngimvikele ngobe alati libito lami.
w10 1/15 10-11 ¶13-14
Kuba Seluhlangotsini LwaJehova—Ngumusa Lomkhulu
13 Jehova ubavikela njani bantfu bakhe kuletingoti? Umhlabeleli utsi: “Ngobe Nkulunkulu uyawuyala tingilosi takhe ngawe tikulondvolote ekuhambeni kwakho konkhe.” (Hla. 91:11) Tingilosi tiyasicondzisa tiphindze tisivikele kute sikwati kushumayela ngelivangeli lembuso. (Semb. 14:6) Ngetulu kwaloko lokwentiwa tingilosi, labadzala labangemaKhristu ngekubambelela eVini nabafundzisa, bayasivikela ekudukisweni timfundziso temanga. Banganiketa umuntfu ngamunye lowehlulekako kulwisana nenkinga yekuncoba imikhuba yalelive lusito laludzingako. (Thit. 1:9; 1 Phet. 5:2) “Sisebenti lesetsembekile nalesihlakaniphile” naso sisinika kudla kwakamoya lokusivikelako etimfundzisweni letinjengekutigucukela kwemvelo, esifisweni sekutiphatsa lokubi, esifisweni sekufuna umcebo, ludvumo, ngisho nakuletinye tifiso letinyenti letiyingoti. (Mat. 24:45) Yini wena lekusitile kutsi ukwati kumelana naletinye taletingoti?
14 Yini lokudzingeka siyente kute sihlale ‘endzaweni lesitsekile’ yaNkulunkulu yesivikelo? Njengobe kufanele ngaso sonkhe sikhatsi sihlale sitivikela etingotini, ebugebengwini kanye nasekutfoleni tifo letitsatselwanako, ngendlela lefananako, kufanele sitivikele njalo etingotini takamoya. Ngaso sonkhe sikhatsi kufanele sisebentise ticondziso Jehova lasiniketa tona etincwadzini tetfu, emihlanganweni yelibandla kanye nasemihlanganweni lemikhulu. Kufanele sifune seluleko kulabadzala. Asizuzi yini etimfanelweni letinyenti letiboniswa bazalwane nabodzadze wetfu labangemaKhristu? Impela, kutihlanganisa nelibandla kusenta sihlakaniphe.—Taga 13:20; fundza 1 Phetro 4:10.
w01 11/15 19-20 ¶13-19
Jehova Usiphephelo Setfu
‘Ngeke Sehlelwe Ngemashwa’
13 Nanobe singakavikeleki kulelive, Nkulunkulu uta kucala ekuphileni kwetfu, futsi emavi emhlabeleli asinika sibindzi: “Ngobe wena Simakadze umente waba siphephelo sakho, Losetikwako Konkhe umente inqaba yakho. Ungeke wehlelwe ngemashwa, nesifo singeke sisondzele ekhaya lakho.” (Tihlabelelo 91:9, 10) Jehova usiphephelo setfu. Ngako-ke, Nkulunkulu Losetikwako Konkhe simenta abe ‘yinqaba yetfu’ yekutfola sivikelo. Sidvumisa Jehova njengeMbusi weNdzawo yonkhe, ‘siphephela’ kuye njengeMvikeli wetfu futsi simemetele tindzaba letimnandzi teMbuso wakhe. (Matewu 24:14) Ngako-ke, ‘ngeke sehlelwe ngemashwa’—kute lokubi lokutasehlela kuloku lokuchazwe kuleTihlabelelo. Ngisho nobe singahlaselwa tintfo letimbi letinjengekutamatama kwemhlaba, tiphepho, tikhukhula, indlala kanye netimphi, kodvwa angeke kucedze kukholwa kwetfu kanye nekuvikelwa nguNkulunkulu.
14 EmaKhristu lagcotjiwe afana netihambi letehlukile letihlala emathendeni, kulelive lesiphila kulo. (1 Phetro 2:11) ‘Kodvwa kute sifo lesisondzela eceleni kwemathende abo.’ Noma ngabe unelitsemba lekuphila emhlabeni nobe ezulwini, asisiyo incenye yalelive, futsi sivikelekile etintfweni letingalimata buhlobo betfu naNkulunkulu letinjengekutiphatsa kabi kwalo, kutsandza tintfo letibonakalako, inkholo yemanga kanye nekukhonta “silo sasendle” ‘nemfanekiso’ waso, Mhlabuhlangene.—Sembulo 9:20, 21; 13:1-18; Johane 17:16.
15 Nakakhuluma ngesivikelo lesisijabulelako, umhlabeleli watsi: “Ngobe Nkulunkulu uyawuyala tingilosi takhe ngawe tikulondvolote ekuhambeni kwakho konkhe. Tiyawukutsatsa tikwetfwale ngetandla, kuze lunyawo lwakho lungete lwakhutjwa etjeni.” (Tihlabelelo 91:11, 12) Tingilosi tinikwe emandla ekusivikela. (2 Emakhosi 6:17; Tihlabelelo 34:7-9; 104:4; Matewu 26:53; Lukha 1:19) Tiyasivikela ‘ekuhambeni kwetfu konkhe.’ (Matewu 18:10) Njengabamemeteli beMbuso, siyakujabulela kucondziswa nekuvikelwa tingilosi, kutsi singawi ekukholweni. (Sembulo 14:6, 7) Ngisho ‘nematje’ letama kusivimba emsebentini wetfu ngeke akhone kusilahlekisela umusa waNkulunkulu.
16 Umhlabeleli uchubeka atsi: “Uyawuhamba etikwemabhubesi netinyoka, ugcobagcobe etikwemawundlu emabhubesi kanye nasetikwetinyoka.” (Tihlabelelo 91:13) Njengelibhubesi leliselincane lelihlasela ngalokucondzile, letinye titsa tetfu tivele tikhombise kutsi tiphikisana natsi ngekutsi tishaye imitsetfo ngenjongo yekuvimba umsebenti wetfu wekushumayela. Kodvwa siphindze sihlaselwe singakagadzi njengenyoka lehlasela isendzaweni lebhacile. Ngaletinye tikhatsi bafundisi basihlasela ngetindlela letingabonakali basebentisa tishayamtsetfo, emajaji kanye nalabanye. Kodvwa ngelusito lwaJehova, siyakhona kulungisa tintfo ngekuthula etinkantolo, ngesikhatsi lesifanako ‘sivikele tindzaba letimnandzi nasekuticaliseni ngalokusemtsetfweni.’—Filiphi 1:7; Tihlabelelo 94:14, 20-22.
17 Umhlabeleli ukhuluma ngekugcobagcoba “etikwemawundlu emabhubesi kanye nasetikwetinyoka.” Liwundlu lemabhubesi lingaba nelulaka kakhulu, futsi inyoka ingaba silwane lesikhulu. (Isaya 31:4) Ngekulalela Nkulunkulu kunekutsi silalele bantfu sisuke sigcobagcoba libhubesi lelinelulaka ngendlela lengekwemfanekiso. (Imisebenti 5:29) Ngako ‘libhubesi’ leliyingoti ngeke likulimate kukholwa kwetfu.
18 NgesiGriki ligama lelitsi “drago” lisho “inyoka lenkhulu.” Loku kusikhumbuta “drago lomkhulu, inyoka yekucala, lobitwa ngekutsi nguDeveli nangekutsi nguSathane.” (Sembulo 12:7-9; Genesisi 3:15) Unjengesilwane lesikhulu lesibulala ngesibhuku. (Jeremiya 51:34) Lapho Sathane etama kusigegeletela, ngetinkinga talelive, asiphunyule futsi simnyatsele “lodrago.” (1 Phetro 5:8) Kute kugcwaliseke incwadzi yabaseRoma 16:20 emaKhristu lagcotjiwe kumelwe akwente loku.
Jehova—Ngumsindzisi Wetfu
19 Akhuluma ngemaKhristu eliciniso, umhlabeleli watsi: “Nkulunkulu yena utsi: ‘Njengobe naku ubambelele kimi ngelutsandvo, ngitamephula ngimbeke endzaweni lephakeme, ngimvikele ngobe alati libito lami.’” (Tihlabelelo 91:14) Emavi latsi “ngitamephula” nakahunyushwa njengobe anjalo atsi, “ngiyawumphakamisela etulu,” lakungasiko melula kufika khona. Siphephela kuJehova njengetikhonti takhe ikakhulukati ngobe ‘sinelutsandvo.’ (Makho 12:29, 30; 1 Johane 4:19) Nkulunkulu ubese ‘uyasivikela’ etitseni tetfu. Ngeke sisuswe ngalokuphelele emhlabeni. Kunaloko, sitawusindziswa ngobe siyalati ligama laNkulunkulu futsi siyalisebentisa. (Roma 10:11-13) Sitimisele ‘kukhonta Simakadze Nkulunkulu wetfu phakadze naphakadze.’—Mikha 4:5; Isaya 43:10-12.
Funisisa Umcebo EVini LaNkulunkulu
(Tihlabelelo 89:34-37) “Sivumelwane sami ngingeke ngisephule; nemavi lese ngiwakhulumile ngingeke ngiwagucule. 35 Ngifunge kwaba kanye ebungcweleni bami, ngingeke ngiwacale emanga kuDavide. 36 Intalo yakhe iyawuma kuze kube phakadze, nesihlalo sakhe sebukhosi asiyiwugucuka, siyawuma njengelilanga lelisembikwami. 37 Uyawumiswa siphelane, njengenyanga, ngobe yona ingufakazi lowetsembekile losemafini.” (Cabanga)
Bani Nekukholwa Lokucinile EMbusweni
14 Cabanga ngaloko Jehova lakwetsembisa iNkhosi Davide yaka-Israyeli wasendvulo. Wenta setsembiso lokutsiwa sivumelwane lesentiwa naDavide. (Fundza 2 Samuweli 7:12, 16.) Jehova wenta lesivumelwane naDavide ngesikhatsi abusa eJerusalema, futsi wametsembisa kutsi Mesiya abetawuba yintalelwane yakhe. (Luk. 1:30-33) Ngaleyo ndlela, Jehova washo imininingwane lecacile mayelana neluhla lwekutalwa kwalentalo futsi watsi indlalifa yaDavide beyitawuba nelilungelo ‘lokungelayo sibili’ lekuba yinkhosi yeMbuso lobuswa nguMesiya. (Hez. 21:25-27) NgaJesu, bukhosi baDavide ‘butawumiswa siphelane.’ Ecinisweni, intalo yaDavide ‘iyawuma kuze kube phakadze, nesihlalo sayo sebukhosi . . . siyawuma njengelilanga.’ (Hla. 89:34-37) Kubusa kwaMesiya ngeke kuze kukhohlakale futsi tintfo letitawufezwa ngiko titawuhlala phakadze!
w07 7/15 32 ¶3-4
“Ingufakazi Lowetsembekile Losemafini”
Eminyakeni lengetulu kwa-3 000 leyendlulile, Jehova Nkulunkulu wenta sivumelwane seMbuso nenkhosi yaka-Israyeli wasendvulo, Davide. (2 Samuweli 7:12-16) Injongo yaleso sivumelwane yayikubekela Jesu Khristu sisekelo lesisemtsetfweni sekubusa kuze kube phakadze njengendlalifa yaDavide. (Isaya 9:7; Lukha 1:32, 33) Abhekisela esihlalweni sebukhosi ‘sentalo’ yaDavide, umhlabeleli wahlabela watsi: “Uyawumiswa siphelane, njengenyanga, ngobe yona ingufakazi lowetsembekile losemafini.”—Tihlabelelo 89:36, 37.
Iminyaka yekuphila kwetfu ingiminyaka lengemashumi lasikhombisa, nangabe sisacinile iba ngiminyaka lengemashumi lasiphohlongo; noko linyenti laleyo minyaka seliphetse kuhlupheka nelusizi. Kuphila kwetfu kwendlula ngekushesha, yebo, siyandiza sihambe.
(Tihlabelelo 90:10) Iminyaka yekuphila kwetfu ingiminyaka lengemashumi lasikhombisa, nangabe sisacinile iba ngiminyaka lengemashumi lasiphohlongo; noko linyenti laleyo minyaka seliphetse kuhlupheka nelusizi. Kuphila kwetfu kwendlula ngekushesha, yebo, siyandiza sihambe.
(Tihlabelelo 90:12) Sifundzise kutsi sikwati kubala emalanga etfu, kuze sibe nenhlitiyo lehlakaniphile.
w06 7/15 13 ¶4
Emaphuzu Lagcamile Encwadzi Yesitsatfu Neyesine YeTihlabelelo
90:10, 12. Njengobe kuphila kukufishane, kufanele ‘sibale emalanga etfu.’ Njani? Ngekutsi “sibe nenhlitiyo lehlakaniphile,” nome sente ngekuhlakanipha kuze sikhatsi lesisele sisisebentise kahle nangendlela letawujabulisa Jehova. Loku singakwenta ngekutsi sibeke tintfo letiphatselene nebuhlobo betfu naJehova tite kucala ekuphileni kwetfu futsi sisebentise sikhatsi setfu ngekuhlakanipha.—Efesu 5:15, 16; Filiphi 1:10.
w01 11/15 13 ¶19
Jehova Usikhombisa Indlela Yekubala Emalanga Etfu
19 Amavi emhlabeleli angumthantazo wekucela Jehova kutsi afundzise bantfu bakhe indlela yekukhombisa kuhlakanipha ngekusebentisa emalanga lasele ngendlela leyemukelekako kuNkulunkulu. Kuphila kweminyaka lengu-70 kunemalanga langu-25 500. Noma ngabe unganani, ‘asati kutsi kuphila kwenu kutawube kunjani kusasa. Ngobe ninjengenkhungu leba khona sikhashana bese iyanyamalala.’ (Jakobe 4:13-15) Njengobe ‘sikhatsi nematfuba kubehlela bonkhe,’ ngeke sikhone kucombelela kutsi sitawuphila sikhatsi lesingakanani. Ngako-ke, asithantazeni sicele kuhlakanipha kute sikhone kumelana netilingo, siphindze sibaphatse kahle labanye futsi sitimisele emsebentini lesiwentela Jehova sicale nyalo! (Umshumayeli 9:11; Jakobe 1:5-8) Jehova usicondzisa ngeliVi lakhe, ngemoya wakhe longcwele nangenhlangano yakhe. (Matewu 24:45-47; 1 Khorinte 2:10; 2 Thimothi 3:16, 17) Kuhlakanipha kusenta ‘sifune kucala uMbuso waNkulunkulu’ siphindze sisisebentise sikhatsi setfu ngendlela ledvumisa Jehova futsi sente inhlitiyo yakhe ijabule. (Matewu 6:25-33; Taga 27:11) Kuliciniso kutsi kumkhonta ngayo yonkhe inhlitiyo yetfu ngeke kuticedze tonkhe tinkinga tetfu, kodvwa imiphumela lemihle ngiyo letawusenta sijabule kakhulu.
AUGUST 8-14
UMCEBO LOSEVINI LANKULUNKULU | TIHLABELELO 92-101
“Chubeka Ukhulisa Buhlobo Bakho NaNkulunkulu Ngisho Nobe Sewukhulile”
(Tihlabelelo 92:12) Lolungile uhluma njengelisundvu, akhule njengemsedari waseLebanoni.
w07 9/15 32
‘Kuchubeka Utsela Nasekugugeni’
BANTFU labanyenti emaveni laseMedithera bahlanyela tihlahla telisundvu emabaleni abo. Letihlahla tidvume ngebuhle bato nangetitselo tato letimnandzi. Ngetulu kwaloko, letihlahla tichubeka titsela iminyaka lengetulu kwalelikhulu.
Inkhosi yaka-Israyeli wasendvulo Solomoni, yachaza kubukeka kwentfombatane lenhle yemShulami njengesihlahla selisundvu. (Ingoma yeTingoma 7:7) Incwadzi letsi Plants of the Bible itsi: “Ligama lesiHebheru lesihlahla selisundvu yi ‘tàmâr.’ . . . KumaJuda saba luphawu lwebuhle nekubukeka futsi besifazane labanyenti bebabitwa ngaso.” Nasi sibonelo, sisi waSolomoni lebekamuhle ligama lakhe bekunguThamari. (2 Samuweli 13:1) Labanye batali basabetsa bantfwababo labangemantfombatane leligama.
Akusibo bodvwa besifazane labahle labafananiswa nesihlahla selisundvu. Umhlabeleli wahlabela watsi: “Lolungile uhluma njengelisundvu, akhule njengemsedari waseLebanoni. Labo-ke banjengetihlahla letihlanyelwe endlini yaSimakadze, bachuma etibuyeni taNkulunkulu wetfu. Ebudzaleni babo bayawuchubeka batsele titselo, bafanane netihlahla letihlala tiluhlata, ngobe tona tihlala ticinile.”—Tihlabelelo 92:12-14.
Inkhulumo lengumfanekiso, yalabo labakhonta Nkulunkulu ngekwetsembeka lapho sebakhulile bafana kakhulu nesihlahla selisundvu lesihle. LiBhayibheli litsi: “Budzala bungumvuzo wemphilo yekulunga; timvu tingumchele walabalungile.” (Taga 16:31) Nanobe emandla abo ancipha kancane kancane njengobe iminyaka ihamba, lasebakhulile bangachubeka bakulondvolota kuba yimicemane ebuhlotjeni babo naJehova ngekutsi balitadishe njalo liVi laNkulunkulu, liBhayibheli. (Tihlabelelo 1:1-3; Jeremiya 17:7, 8) Siyawabonga emavi abo lamnandzi kanye netibonelo tabo letinhle. Lasebakhulile labatsembekile basikhutsato lesikhulu kulabanye futsi bayachubeka batsela titselo umnyaka nemnyaka. (Thithusi 2:2-5; Hebheru 13:15, 16) Njengesihlahla selisundvu, lasebakhulile basengachubeka batsela.
w06 7/15 13 ¶2
Emaphuzu Lagcamile Encwadzi Yesitsatfu Neyesine YeTihlabelelo
92:12—Nguyiphi indlela bantfu labalungile ‘labahluma ngayo njengelisundvu’? Sihlahla selisundvu satiwa njengalesitselako. Umuntfu lolungile ufanana nesihlahla selisundvu ngekutsi abonakale amuhle emehlweni aJehova futsi achubeke atsela “titselo letinhle” emisebentini lemihle.—Matewu 7:17-20.
(Tihlabelelo 92:13, 14) Labo-ke banjengetihlahla letihlanyelwe endlini yaSimakadze, bachuma etibuyeni taNkulunkulu wetfu. 14 Ebudzaleni babo bayawuchubeka batsele titselo, bafanane netihlahla letihlala tiluhlata, ngobe tona tihlala ticinile,
Kukhonta Jehova Tisengakefiki Tinsuku Tekuhlupheka
17 Lamuhla, kufanele sihlale sikuphaphamele kusita lasebakhulile nome emaKhristu lanemphilo lebutsakatsaka. Lamanye angatsandza kuba khona emihlanganweni yelibandla nasemihlanganweni lemikhulu kodvwa angase angakhoni ngaso sonkhe sikhatsi kukwenta loko. Kuletinye tindzawo, emabandla ahlela kutsi lasebakhulile balalele imihlangano elucingweni, kantsi kuletinye kungase kungenteki loko. Nobe kunjalo, emaKhristu langeke akhone kuba semihlanganweni angaba nencenye ekusekeleni kukhonta kweliciniso. Sibonelo saloku kutsi imithantazo yawo ifaka sandla emphumelelweni yelibandla lebuKhristu.—Fundza Tihlabelelo 92:13, 14.
w04 5/15 12 ¶9-10
Lasebakhulile—Bangemalunga Laligugu Kubazalwane Betfu BebuKhristu
“Bayawuchubeka Batsele Titselo”
9 Akhuluma ngekutsela kwetinceku taJehova lesetikhulile, umhlabeleli wahlabela: “Lolungile uhluma njengelisundvu, akhule njengemsedari waseLebanoni. Ebudzaleni babo bayawuchubeka batsele titselo, bafanane netihlahla letihlala tiluhlata, ngobe tona tihlala ticinile”—Tihlabelelo 92:12, 14.
10 Ungahlala njani ucinile ebuhlotjeni bakho naJehova nalapho sewukhulile? Kute sihlahla selisundvu sichubeke sisihle kutsi sihlale siwatfola njalo emanti. Natsi singatinakekela ngemanti eliciniso laseBhayibhelini ngekutsi sidadishe liVi laNkulunkulu nangekutihlanganisa nenhlangano yakhe. (Tihlabelelo 1:1-3; Jeremiya 17:7, 8) Kuba nebuhlobo lobucinile naJehova kukwenta ube lusito kulokholwa nabo. Asesicabangele indlela lokwenteka ngayo kumPhristi Lophakeme lebesekakhulile Jehoyada.
(Tihlabelelo 92:15) Kuze kubonakale kutsi Somandla ulungile, yena ulidvwala lami, yena unguSokulunga.
w04 5/15 12-14 ¶13-18
Lasebakhulile—Bangemalunga Laligugu Kubazalwane Betfu BebuKhristu
13 Ake sesitsi ubutsakatsaka noma usesimweni lesikwenta ungakhoni kutfutfukisa indlela lomkhonta ngayo Nkulunkulu. Noma kunjalo, kute intfo lesingatsi ingetulu kwemandla etfu ‘kute sikhonte Nkulunkulu ngekweliciniso endlini yakhe.’ Ungatimisela ekwenteni buhlobo bakho naJehova bukhule ngekutsi uye onkhe malanga esifundvweni futsi ushumayele nobe nini lapho kuvela litfuba. Kuhlala ukulungele kusebentisa seluleko seliBhayibheli kanye nekusekela “sisebenti lesetsembekile nalesihlakaniphile” ngekwetsembeka loku kutalisita libandla lebuKhristu kutsi libe nebudlelwane lobucinile. (Matewu 24:45-47) Futsi ‘singabakhutsata’ lesikholwa nabo “elutsandvweni nasemisebentini lemihle.” (Hebheru 10:24, 25; Filemoni 8, 9) Utawuba nalusito kulabanye nangabe wenta ngekuvumelana neseluleko semphostoli Pawula lesitsi: “Emadvodza lakhulile kufanele atitsibe, angatsatsi tintfo melula, abe nengcondvo lebhadlile, aphile ekukholweni, elutsandvweni, nasekuciniseleni. Ngendlela lefanako, bafati labakhulile kufanele batiphatse ngendlela ledvumisa Nkulunkulu, banganyundzeli, bangatitiki ngeliwayini lelinyenti, futsi babe bafundzisi balokuhle.”—Thithusi 2:2-4.
14 Sewunesikhatsi lesidze yini ukhonta njengalomdzala ebandleni? Lomdzala welibandla losanesikhathi lesidze wakhutsata watsi:” Kusebentise kahle kuhlakanipha kwakho njengobe ukhula ngeminyaka. Niketa labanye imitfwalo yemfanelo, ucocele labanye labatimisele kutfutfuka tintfo letenteke ekuphileni kwakho. . . Hlala ukuphaphamele kubona emakhono alabanye ladzinga kutfutfukiswa. Bese wetama kuwakhulisa. Kute atoba lusito esikhatsini lesitako.” (Dutheronomi 3:27, 28) Nasitimisela emsebentini weMbuso lokhulako bazalwane betfu batojabulela tibusiso letinyenti.
Landzisa “Kutsi Somandla Ulungile”
15 Tinceku taNkulunkulu lesetikhulile tiwufeza ngenjabulo umsebenti wato wekulandzisa “kutsi Somandla ulungile.” Emavi emKhristu losakhulile, netento takhe angakhombisa labanye kutsi Jehova ‘ulidvwala lakho, yena unguSokulunga.’ (Tihlabelelo 92:15) Sihlahla selisundvu sifakaza ngetimfanelo letinhle kakhulu teMdali waso. Kodvwa Jehova ukunike lilungelo lekufakaza ngaye kulabo labemukela kukhonta kweliciniso. (Dutheronomi 32:7; Tihlabelelo 71:17, 18; Joweli 1:2, 3) Kubaluleke ngani loku?
16 Lapho Joshuwa umholi wema-Israyeli ‘asamdzala akhulile ngeminyaka,’ “wabita onkhe ema-Israyeli: tibondza tawo, nebaholi bawo, netikhulu, kanye netindvuna,” wabakhumbuta indlela Nkulunkulu bekabaphetse ngayo. Watsi: “Kute nome sinye setsembiso lesingazange sifezeke kuto tonkhe letetsembiso letinhle Simakadze Nkulunkulu wenu laninike tona. Tonkhe tetsembiso takhe tifezekile.” (Joshuwa 23:1, 2, 14) Lamavi abacinisa bantfu kutsi batimisele kuhlala betsembekile. Ngemva kwekufa kwaJoshuwa “kwavela lesinye situkulwane . . . lesasingazange simati Simakadze singatani nangetintfo lake watentela sive saka-Israyeli. Ngako sive sema-Israyeli senta lokubi emehlweni aSimakadze; sakhonta boBhali.”—Tikhulu 2:8-11.
17 Libandla lebuKhristu lamuhla aliketsembeli kuloko lokushiwo tinceku taNkulunkulu lesetikhulile. Noma kunjalo, kukholwa kwetfu kuJehova nasetitsembisweni takhe kuyacina nasiva labanye balandzisa ‘ngetintfo letinkhulu’ latentele bantfu bakhe kulamalanga ekugcina. (Tikhulu 2:7; 2 Phetro 1:16-19) Nangabe sewuneminyaka leminyenti usenhlanganweni yaJehova, ungase ukhumbule ngesikhatsi kunebamemeteli beMbuso labambalwa kakhulu endzaweni noma eveni lakini noma lapho umsebenti wekushumayela wawuphikiswa kakhulu. Njengobe sikhatsi sichubeka, Jehova ususe titsiyo letitsite kute umsebenti weMbuso wentiwe ‘ngekushesha lokukhulu.’ (Isaya 54:17; 60:22) Uyinakile indlela emaciniso eliBhayibheli lacaciswe ngayo futsi uyibonile nendlela inhlangano yaNkulunkulu letfutfuka ngayo. (Taga 4:18; Isaya 60:17) Uyetama yini nawe kwakha labanye ngekutsi ubacocele ngetintfo letenteke ekuphileni kwakho nendlela Jehova lakusekele ngayo? Kwenta kwakho kanjalo kutabacinisa kuphindze kubakhutsate bazalwane.
18 Kutsiwani nangabe utibonele wena kunakekelwa nguJehova ngelutsandvo nekucondziswa nguye ekuphileni kwakho? (Tihlabelelo 37:25; Matewu 6:33; 1 Phetro 5:7) Lomunye dzadze losakhulile ligama lakhe lokunguMartha wakhutsata labanye watsi: “Noma kwentekani, ungacali umshiye Jehova. Utakusekela.” Leseluleko samsita kakhulu Tolmina, longulomunye lobekafundza naMartha liBhayibheli lowabhatjathiswa ekucaleni kweminyaka yabo-1960. Tolmina watsi: “Lapho ngishonelwa yindvodza yami, ngadvumateka kakhulu, kodvwa lamavi angenta ngatimisela kutsi ngiye njalo esifundvweni. Jehova wangicinisa kuze ngichubeke.” Ngalokufananako naTolmina weluleka labanye lafundza nabo liBhayibheli kuleminyaka leyendlulile. Empeleni kukhutsata labanye ngekubacocela ngendlela Jehova lakusekele ngayo, kungakucinisa kukholwa kwabo.
Funisisa Umcebo EVini LaNkulunkulu
(Tihlabelelo 99:6, 7) BoMosi kanye na-Aroni baba ngulabanye bebaphristi bakhe. Samuweli abengulomunye walabo bebabita libito lakhe. Bakhala kuSimakadze, wabaphendvula. 7 Wakhuluma kubo asensikeni yelifu, bayigcina imiyalo yakhe kanye netimiso takhe labebanike tona.
Yenta Imetamo Kute Utfutfukise Kuthula Kubantfu BaNkulunkulu
5 Nasidvumisa Jehova, sisuke silingisa sibonelo setinceku taNkulunkulu letetsembekile letichazwa kuTihlabelelo 99:1-3, 5. (Fundza.) Emadvodza letsembekile lafaka ekhatsi Mosi, Aroni kanye naSamuweli alisekela ngalokugcwele lilungiselelo laNkulunkulu lekukhonta kweliciniso esikhatsini lesendlulile. (Tihlabelelo 99:6, 7) Ngaphambi kwekutsi labagcotjiwe labasesemhlabeni bakhonte njengebaphristi naJesu ezulwini, ngekwetsembeka bakhonta Jehova eluhlangotsini lolusemhlabeni lwalelithempeli laNkulunkulu lamuhla. Tigidzi ‘taletinye timvu’ tibasekela ngekwetsembeka. (Johane 10:16) Omabili lamacembu akhonta Jehova ngebunye. Nanobe kunjalo, kufanele sitibute: ‘Ngilisekela ngalokugcwele yini lilungiselelo laJehova lekukhonta kweliciniso?’
(Tihlabelelo 101:2) Angicaphelisise kuhamba ngendlela yebucotfo. Uyawuze ufike nini kimi? Ngiyawuhamba ngimsulwa endlini yami.
w05 11/1 24 ¶14
Utawuhamba Nkulunkulu Yini?
Hamba Shengatsi “Uyambona Loyo Longabonakali”
14 Kute sikhonte Jehova, kufanele simtsatse njengemuntfu sibili. Khumbula kutsi Jehova wacinisekisa ema-Israyeli asendvulo kutsi bekatawuchubeka anawo. Ngendlela lefanako nalamuhla utiveta kubantfu bakhe anjengeMfundzisi Lomkhulu. Ngabe Jehova ungumuntfu sibili yini kuwe, kube shengatsi ume phambi kwakho uyakufundzisa? Kudzingeka kukholwa lokunjalo nasifuna kuba tikhonti taNkulunkulu. Mosi bekanekukholwa lokunjalo, “ngobe wachubeka acinile shengatsi uyambona Loyo longabonakali.” (Hebheru 11:27) Nangabe Jehova simtsatsa njengemuntfu sibili, ngaphambi kwekutsi sitsatse tincumo sitawucale sicabange kutsi utotiva njani. Nasi sibonelo, ngeke kufike ngisho nekufika nje etingcondvweni tetfu kwenta intfo lembi bese sifihlela emadvodza lamadzala elibandla. Kunaloko, sitawuchubeka sikhonta Nkulunkulu ngisho nalapho bangasiboni labanye. Njengenkhosi Davide, leyatsi: “Ngiyawuhamba ngimsulwa endlini yami.”—Tihlabelelo 101:2.
AUGUST 15-21
UMCEBO LOSEVINI LANKULUNKULU | TIHLABELELO 102-105
“Jehova Uyakhumbula Kutsi Silutfuli”
(Tihlabelelo 103:8-12) Simakadze unemusa nesihawu, uyephuta kutfukutsela, andze ngemusa. 9 Akatsetsi ngaso sonkhe sikhatsi, futsi akahlali atfukutsele kuze kube phakadze. 10 Akasiphatsi njengalokufanele tono tetfu, futsi akasivuzi njengekwemacala etfu. 11 Njengobe emazulu aphakeme ngetulu kwemhlaba, unjalo-ke nemusa wakhe kulabamesabako. 12 Njengobe imphumalanga yehlukene nenshonalanga utikhweshise kangako-ke tono tetfu kitsi.
Jabulela Kwetsembeka Nekutsetselela KwaJehova
14 Singatfola indvudvuto ngekuzindla ngekutsetselela kwaJehova. Cabanga nganasi sibonelo: Eminyakeni leminyenti leyendlulile, dzadze lesitambita ngekutsi ngu-Elaine, wayekeliswa kuba nguFakazi. Ngemuva kweminyaka letsite, wabuyiselwa. Elaine uyavuma: “Nanobe ngangititjela mine nalabanye kutsi ngikholelwa kutsi Jehova ungitsetselele, ngangihlale ngiva shengatsi ukhashane kimi nekutsi usedvute kulabanye futsi ubakhatsalela kancono kunami.” Nobe kunjalo, Elaine wadvudvutwa kufundza nekuzindla ngemifanekiso leseBhayibhelini lechaza kutsetselela kwaJehova. Elaine uchubeka atsi: “Ngaluva lutsandvo lwaJehova nekunginakekela langibonisa kona ngendlela lengingakaze ngayibona.” Ngalokukhetsekile wakhutsatwa ngulamavi latsi: “Jehova nakatsetselela tono tetfu, akudzingeki sitive shengatsi sisenaleso sono kuphila kwetfu konkhe.” Elaine utsi: “Ngabona kutsi bengingakholwa kutsi Jehova angangitsetselela futsi bengicabanga kutsi ngitawetfwala leso sono konkhe kuphila kwami. Ngiyati kutsi kutawutsatsa sikhatsi, kodvwa sengiyacala kutiva ngisondzela kuJehova futsi ngiva shengatsi kususwe umtfwalo losindzako kimi.” Kuyacaca kutsi sikhonta Nkulunkulu lonelutsandvo nalotsetselelako.—Hla. 103:9.
Khonta Nkulunkulu Wenkhululeko
Kuliciniso kutsi sonkhe siyawenta emaphutsa ngaletinye tikhatsi. (Shu. 7:20) Nakwenteka loko, ungaphelelwa ngemandla nobe utibone ungakabaluleki. Nangabe uwa, vuka uchubekele embili—ngisho nobe loko kungadzinga kutsi ufune lusito lwalabadzala. Jakobe wabhala: “Umthandazo [wabo] wekukholwa uyawumphilisa logulako, iNkhosi imvuse, nome entile tono uyawutsetselelwa tona.” (Jak. 5:15) Ungakhohlwa kutsi Nkulunkulu unemusa futsi wakudvonsela ebandleni ngobe abona lokuhle kuwe. (Fundza Tihlabelelo 103:8, 9.) Ngako-ke, nangabe uchubeka wetsembele kuJehova, angeke akushiye.—1 Khr. 28:9.
(Tihlabelelo 103:13, 14) Njengobe uyise anesihe kubantfwabakhe, ngalokufananako Simakadze unesihe kulabamesabako. 14 Ngobe uyakwati kubunjwa kwetfu, uyakhumbula kutsi silutfuli nje.
Hlale Wetsembele KuJehova!
8 Khumbula nekutsi Jehova uyatati tintfo ngamunye wetfu langakhona kutibeketelela nalangeke akhone kutibeketelela. (Tihlabelelo 103:14) Ngako-ke usiniketa emandla lesiwadzingako. Kuliciniso kutsi ngaletinye tikhatsi singase sitive siphelelwe ngemandla. Kodvwa Jehova uyasetsembisa kutsi nangabe singasakhoni kulubeketelela luvivinyo, “utawukwenta nendlela yekuphuma.” (Fundza 1 Khorinte 10:13.) Kuyasidvudvuta kwati kutsi singetsemba kutsi Jehova uyakwati loko lesingakubeketelela.
Jabulela Kwephana Nekucabangela KwaJehova
16 Ticabange ungumIsrayeli futsi uphuyile. Nawufika ethendeni lekukhontela nafulaha lomncane kute unikele ngaye njengemhlatjelo, ubona ema-Israyeli lanjingile anikela ngetilwane. Bowungase utive uhlazekile ngemnikelo wakho longasho lutfo wafulaha. Bese uyakhumbula kutsi emehlweni aJehova, umnikelo wakho ubalulekile. Yini lebeyingabangela loko? Kungobe Jehova abefuna kutsi lofulaha ube welizinga lelisetulu. Ecinisweni, Jehova abetsi kuma-Israyeli laphuyile: ‘Ngiyati kutsi angeke nikhone kunikela ngendlela labanikela ngayo labanye, kodvwa ngiyati kutsi loko leningipha kona ngulokuncono kakhulu.’ Kuliciniso kutsi Jehova ukhombisa kucabangela ngekutsi akhumbule kutsi tinceku takhe tilinganiselwe futsi netimo tato atifani.—Hla. 103:14.
(Tihlabelelo 103:19) Simakadze wasimisa ezulwini sihlalo sakhe sebukhosi, konkhe lokukhona kungaphansi kwembuso wakhe.
(Tihlabelelo 103:22) Bongani Simakadze, nonkhe nine misebenti yakhe, kuto tonkhe tindzawo embusweni wakhe. Mphefumulo wami, dvumisa Simakadze.
w10 11/15 25 ¶5
Jehova UyiNkhosi Yetfu LenguMbusi!
NjengeMdali, Nkulunkulu Jehova unguMbusi wemhlaba wonkhe kanye nendzawo yonkhe. (Fundza Sembulo 4:11.) Jehova unguMehluleli wetfu, Sishayamtsetfo setfu, kanye neNkhosi ngobe nguye lokhipha tehlulelo, imitsetfo kanye nekucondzisa hulumende wakhe losendzaweni yonkhe. (Isa. 33:22) Njengobe sikweleta Nkulunkulu ngekuphila kwetfu futsi setsembele kuye, kufanele simtsatse njengeNkhosi yetfu lenguMbusi. Nangabe sihlala sikhumbula kutsi “Simakadze wasimisa ezulwini sihlalo sakhe sebukhosi, konkhe lokukhona kungaphansi kwembuso wakhe,” sitawuba nenshisekelo yekusekela sikhundla sakhe lesiphakeme.—Hla. 103:19; Imis. 4:24.
w07 12/1 21 ¶1
Bukhosi BaJehova NeMbuso WaNkulunkulu
“SIMAKADZE wasimisa ezulwini sihlalo sakhe sebukhosi, konkhe lokukhona kungaphansi kwembuso wakhe.” (Tihlabelelo 103:19) Ngalawo mavi, umhlabeleli waveta liciniso lelisisekelo leliphatselene nebukhosi. Njengobe anguMdali, Jehova Nkulunkulu kulilungelo lakhe kuba nguMbusi Lophakeme wendzawo yonkhe.
Funisisa Umcebo EVini LaNkulunkulu
(Tihlabelelo 102:12) Kodvwa wena, Simakadze, uyawuba khona kuze kube phakadze. Uyawukhunjulwa titukulwane ngetitukulwane.
(Tihlabelelo 102:27) Kepha wena seloku unjalo nje, iminyaka yakho ayinasiphetfo.
Indlela Yekulondvolota Simo Sengcondvo Lesihle
UMTHANTAZO “WEMUNTFU LOHLUPHEKAKO”
19 Umbhali weTihlabelelo 102 abesesimeni lesimatima. ‘Abehluphekile,’ acindzeteleke kakhulu enyameni nasemoyeni futsi angasakhoni nekubeketelela tinkinga takhe. (Hla. 102, umbhalo longenhla) Emavi akhe asenta sibone kutsi abesebuhlungwini lobukhulu, ativa ayedvwa, futsi ahlushwa yimiva yakhe. (Hla. 102:3, 4, 6, 11) Abeciniseka ngekutsi Jehova ufuna kumlahla.—Hla. 102:10.
20 Kodvwa-ke lomhlabeli wachubeka asebentisa kuphila kwakhe kute advumise Jehova. (Fundza Tihlabelelo 102:19-21.) Njengobe kuvetwa kuTihlabelelo 102, ngisho nebantfu labasekukholweni bangaba sebuhlungwini lobukhulu futsi bakutfole kumatima kucabanga ngaletinye tintfo. Umhlabeli weva shengatsi ‘ufanana nenyoni ledliwa situnge, lehleti etikwendlu,’ kwaba shengatsi intfo lebeyikhona nje bekutinkinga takhe kuphela. (Hla. 102:7) Nangabe kwenteka utiva ngaleyo ndlela, tfululela sifuba sakho kuJehova njengobe kwenta umhlabeli. Imithantazo yakho nawuhluphekile ingakusita nawulwisana nemicabango lengakafaneli. Jehova wetsembisa kutsi ‘utayinaka imikhuleko yalabangenabani, angayibukeli phansi imithantazo yabo.’ (Hla. 102:17) Kufanele usetsembe lesetsembiso.
21 Tihlabelelo 102 tiphindze tisikhombise loko lesingakwenta kute sibe nesimo sengcondvo lesihle. Umhlabeli wakwenta loku ngekutsi anake buhlobo bakhe naJehova. (Hla. 102:12, 27) Wadvudvuteka kakhulu ngekwati kutsi Jehova utawuhlale abasekela bantfu baKhe nabavivinywa. Ngako-ke, nangabe kuba nemiva lengakafaneli kukuphatamisa kwesikhashana ekwenteni loko lobewungafisa kukwenta emsebentini waNkulunkulu, kufanele uthantaze ngako. Cela Nkulunkulu kutsi awuve umthantazo wakho, kungabi ngenjongo yekutsi ukhululeke ekucindzetelekeni kwakho kuphela kodvwa “kuze bantfu bavakalise libito laSimakadze.”—Hla. 102:20, 21.
(Tihlabelelo 103:13) Njengobe uyise anesihe kubantfwabakhe, ngalokufananako Simakadze unesihe kulabamesabako.
Hlale Wetsembekile KuJehova!
7 Kungani ngaletinye tikhatsi Jehova angayiphendvuli ngekushesha imithantazo yetfu? LiBhayibheli litsi Jehova unguBabe wetfu futsi tsine sibantfwana bakhe. (Tihlabelelo 103:13) Babe akamniki umntfwana wakhe konkhe lakucelako nobe amnike ngaleso sikhatsi. Uyati kutsi umntfwana angase afune intfo letsite aphindze futsi angasayifuni. Babe uyakwati loko lokulungele umntfwana wakhe, futsi uyati kutsi kungase kubatsintse njani labanye. Uyakwati loko umntfwana lakudzingako nesikhatsi lokufanele akutfole ngaso. Nangabe babe aniketa umntfwana wakhe konkhe lakufunako ngaleso sikhatsi, angaba sisebenti salomntfwana. Jehova longuBabe wetfu wasezulwini, uyasitsandza. Njengobe anguMdali wetfu lohlakaniphile, uyakwati lesikudzingako futsi ukhetsa sikhatsi lesifanele sekusinika kona. Kubalulekile kutsi silindze kute sibone indlela Jehova layiphendvula ngayo imithantazo yetfu.—Catsanisa na-Isaya 29:16; 45:9.
AUGUST 22-28
UMCEBO LOSEVINI LANKULUNKULU | TIHLABELELO 106-109
“Bongani Jehova’’
(Tihlabelelo 106:1-3) Haleluya, dvumisani Simakadze! Bongani Simakadze ngobe muhle, nemusa wakhe ume kuze kube phakadze. 2 Ngubani longalandzisa ngemisebenti lemikhulu yaSimakadze, avakalise lonkhe ludvumo lwakhe? 3 Babusisiwe labo labahamba ngebucotfo bente kulunga ngato tonkhe tikhatsi.
Bonga Jehova Futsi Utfole Tibusiso
JEHOVA, longuMuphi wato “tonkhe tipho letinhle naletiphelele,” ukufanele kubongwa. (Jak. 1:17) Njengobe anguMelusi wetfu lonelutsandvo, utinakekela ngemusa tonkhe tidzingo tetfu tenyama naletitsintsa buhlobo betfu naye. (Hla. 23:1-3) ‘Usiphephelo setfu nemandla etfu’—ikakhulukati etikhatsini tebumatima! (Hla. 46:1) Ngako sinetizatfu letinyenti tekuvumelana nemhlabeli lowabhala watsi: “Bongani [Jehova] ngobe muhle, nemusa wakhe ume kuze kube phakadze.”—Hla. 106:1.
w02 6/1 18 ¶19
19 Kulamalanga layingoti nalangenalo litsemba, kujabulela bulungisa baJehova kuyindlela yekutfola sivikelo. Kulombuto lotsi: “Simakadze! Ngubani longaba nemvume yekungenisa ahlale ethempelini lakho, acabe umuti wakhe entsabeni yakho lengcwele?” INkhosi Davide yawuphendvula yatsi: “Ngulomuntfu lonetindlela letimsulwa, abe ngumuntfu lowenta lokulungile.” (Tihlabelelo 15:1, 2) Ngekulandzela sibonelo saNkulunkulu sebulungisa futsi sisijabulele, sitawutigcina sinebuhlobo lobuhle naye futsi sijabulele umusa nesibusiso sakhe. Nasenta njalo sitawutfola kwenetiseka, kuhlonipheka siphindze sibe nekuthula. LiVi laNkulunkulu litsi: “Umuntfu lowetama kutiphatsa ngekulunga nangekwetsembeka, uyawuphila imphilo lehloniphekile.” (Taga 21:21) Ngetulu kwaloko, nasenta konkhe lokusemandleni etfu kute sente lokulungile sitawujabulela kuba nebuhlobo lobuhle nalabanye siphindze sitfutfuke ebuntfwini betfu, ekutiphatseni kanye nasebuhlotjeni betfu naNkulunkulu. Umhlabeleli watsi: “Babusisiwe labo labahamba ngebucotfo bente kulunga ngato tonkhe tikhatsi.”—Tihlabelelo 106:3.
(Tihlabelelo 106:7-14) Ngesikhatsi bokhokho baseseGibhithe abazange bacaphele timangaliso takho, futsi abazange bakhumbule bunyenti betento takho temusa, kodvwa bakuhlubuka ngaseLwandle Lolubovu. 8 Noko, Simakadze wabasindzisa, ngenca yelibito lakhe, kuze abonakalise emandla akhe lamakhulu. 9 Wakhalimela Lwandle Lolubovu, lwasha, wabeweta ekujuleni kwalo, kwaba shangatsi bahamba ehlane. 10 Ngako wabasindzisa esandleni sesitsa, wabahlenga emandleni esitsa. 11 Emanti atimbonya titsa tabo, kute ngisho nasinye sato lesasala. 12 Base bayawakholwa emavi akhe, bahlabela, bamdvumisa. 13 Kodvwa basheshe bayikhohlwa imisebenti yakhe, abazange basatilindzela teluleko takhe. 14 Bahamba bashangashanga ehlane, bamlinga Nkulunkulu kalashameshame.
(Tihlabelelo 106:19-25) Babumba sitfombe selitfole eHorebe, bakhotsama kuso sithico lesibunjiwe. 20 Babumba sitfombe selitfole eHorebe, bakhotsama kuso sithico lesibunjiwe. Bamnyembenya lowo abeludvumo lwabo, bakhetsa sitfombe senkhomo ledla tjani. 21 Bamkhohlwa Nkulunkulu, uMsindzisi wabo, labebentele tintfo letinkhulu eGibhithe, 22 lekwakuyimisebenti lemangalisako eveni lakaHhamu, netintfo letesabekako ngaseLwandle Lolubovu. 23 Ngako-ke watsi utababhubhisa, kepha Mosi, lokhetsiwe wakhe, wema emkhatsini, wabalamlela ngekubashweletela kuNkulunkulu, kutsi lulaka lwakhe lungababhubhisi. 24 Baledzelela live lelihle, abazange balikholwe livi laSimakadze. 25 Bakhonona basemathendeni abo, abazange balilalele livi laSimakadze.
(Tihlabelelo 106:35-39) Kodvwa batihlanganisa nebetive, bafundza kwenta imikhuba yato. 36 Bakhonta tithico tato, letagucuka taba lugibe kubo. 37 Banikela ngemadvodzana abo nemadvodzakati abo, kutsi abe yimihlatjelo yemadimoni. 38 Bacitsa ingati lete licala, ingati yemadvodzana abo nemadvodzakati abo, labawahlabela tithico taseKhenani; ngaloko bangcolisa lonkhe live ngengati. 39 Batingcolisa ngetintfo lababetenta, bangete betsembeka kuNkulunkulu, bafana netiphingi.
Bonga Jehova Futsi Utfole Tibusiso
2 Kubaluleke ngani kutsi sicabangisise ngalendzaba yekubonga? Njengobe kwabiketelwa, kungabongi kwebantfu sekwandzile kulamalanga ekugcina. (2 Thim. 3:2) Bantfu labanyenti batitsatsa kamelula tibusiso labanato. Njengobe tigidzi tebantfu tihungwe tekutsengiselana netekukhangisa, tihlale tifuna tintfo letinyenti esikhundleni sekutsi tenetiseke ngaloko letinako. Natsi ungasingena lomoya wekungabongi. Njengema-Israyeli asendvulo, natsi singatitfola sesibantfu labangabongi futsi sesibutsatsa kamelula buhlobo betfu lobuligugu naJehova kanye netibusiso lasiniketa tona.—Hla. 106:7, 11-13.
3 Cabanga nangaloko lokungenteka nasibhekene nekuvivinywa lokumatima. Etikhatsini letinjalo, singatitfola sesikhatsateke kakhulu bese siyatikhohlwa tibusiso lesinato. (Hla. 116:3) Ngako-ke, singahlala njani sibantfu lababongako? Yini letasisita kutsi sihlale sinembono lomuhle ngisho nobe sibhekene nekuvivinywa lokumatima? Ase sibone.
w01 6/15 13 ¶1-3
Ningabi Kulabevako Bese Bayakhohlwa
“UNGAKHOHLWA” ligama lelitichaza kahle timangaliso letentiwa nguJehova eGibithe. Ngeke siphike kutsi sishayo ngasiyinye kuleti letatilishumi betesabeka. Leto tishayo talandzelwa kukhululwa kwema-Israyeli eLwandle Lolubovu. (Dutheronomi 34:10-12) Kube wawukhona ngaleso sikhatsi futsi wabona kwenteka letintfo bewungeke uze umkhohlwe loyo lotentile. Kepha umhlabeleli wahlabela watsi: “[Bantfu baka-Israyeli] bamkhohlwa Nkulunkulu, uMsindzisi wabo, labebentele tintfo letinkhulu eGibhithe, lekwakuyimisebenti lemangalisako eveni lakaHhamu, netintfo letesabekako ngaseLwandle Lolubovu.”—Tihlabelelo 106:21, 22.
2 Ngemuva kwekuba ema-Israyeli awele Lwandle Lolubovu, “acalela phansi kwesaba Simakadze nekubeka litsemba lawo kuye.” (Eksodusi 14:31) Emadvodza aka-Israyeli ahlanganyela naMosi ekuhlabeleleleni Jehova ingoma yekuncoba, Miriyamu nalabanye besifazane bebashaya tigubhu futsi bagidza. (Eksodusi 15:1, 20) Awuvumi yini kutsi tento taJehova letinemandla tabajabulisa bantfu bakhe? Kodvwa kujabulela kwabo leto tento taJehova temandla kwaphelela eteni. Ngekushesha nje tento talabanyenti babo takhombisa kutsi sebakhohliwe. Bacala kukhonona ngaJehova. Labanye bacala kukhonta titfombe baphindze batiphatsa kabi ngekwelicansi.—Numeri 14:27; 25:1-9.
Yini Lengasenta Sikhohlwe?
3 Kuyamangalisa kutsi masinyane nje ema-Israyeli ayekela kubonga. Nakitsi kungenteka intfo lefanako. Kuliciniso, kutsi kungenteka asizange sesitibone timangaliso letinkhulu. Nobe kunjalo tikhona tintfo lesingeke sesitikhohlwe lesitentelwe nguJehova. Labanye betfu bangase bakhumbule lapho batfola liciniso leliseBhayibhelini. Letinye tikhatsi letijabulisako tingase tihlanganise umthandazo wetfu wekutinikela kuJehova nekubhajatiswa kwetfu emantini njengemaKhristu eliciniso. Labanyenti betfu bakubonile kukhululwa nguJehova etimeni letitsite ekuphileni kwabo. (Tihlabelelo 118:15) Ngetulu kwaloko, ngesisekelo semhlatjelo waJesu Khristu iNdvodzana yaNkulunkulu, sonkhe sinelitsemba lekusindziswa. (Johane 3:16) Noma kunjalo, ngesizatfu sekutsi asikapheleli, sihle sifisa kwenta tintfo letimbi siphindze sicindzetelwe tinkinga tekuphila, bese kuba lula kutsi sitikhohlwe tintfo letinhle Jehova lasentele tona.
(Tihlabelelo 106:4, 5) Awu, Simakadze, ngikhumbule nawusentela umusa sive sakho, nami ungisindzise kanye naso, 5 kuze ngibone kuchuma kwalabakhetsiwe bakho, ngitfokote ekujabuleni kwesive sakho, ngitigabise kanye nalabalifa lakho.
(Tihlabelelo 106:48) Akabongwe Simakadze, Nkulunkulu wema-Israyeli, kusukela phakadze kuze kube phakadze! Sive sonkhe asitsi: “ Amen!” Haleluya! Dvumisani Simakadze!
Asijabuleni Ndzawonye!
Nanobe kunjalo, emaKhristu ehlukile, kanjalo nangesimo sawo. Umphostoli Pawula wabhala: “Tfokotani njalo.” (1 Thes. 5:16) Tinyenti tintfo letingasenta sijabule ndzawonye. Sikhonta Nkulunkulu Losetikwako Konkhe, Jehova; siyawucondza umlayeto weliBhayibheli loliciniso; sinelitsemba lekusindza kanye nelekuphila phakadze; futsi singasita nalabanye kutsi nabo batfole tibusiso letifananako.—Hla. 106:4, 5; Jer. 15:16; Rom. 12:12.
w03 12/1 15-16 ¶3-6
“Banini Ngulababongako”
Tizatfu Tekubonga
3 NguJehova Nkulunkulu, uMdali wetfu futsi longuMniki-kuphila, lokufanele simbonge, ikakhulukati nasicabanga ngetipho letinkhulu lasiphe tona. (Jakobe 1:17) Kufanele simbonge onkhe malanga Jehova ngekutsi siyaphila. (Tihlabelelo 36:9) Sibubona onkhe malanga bufakazi bemsebenti Jehova lawentile, njengelilanga, inyanga netinkanyeti. Iplanethi yetfu lengumhlaba inetintfo letinyenti letisekela kuphila, njengemoya-mphilo nemijikeleto leyinkimbinkimbi yendalo, konkhe kufakazela kutsi sinetizatfu tekumbonga Babe wetfu losezulwini lonelutsandvo. INkhosi Davide yahlabelela yatsi: “Yebo, Simakadze, Nkulunkulu wami, timangaliso losentele tona tinyenti, tingeke tibalwe, wasikhumbula tikhatsi letinyenti. Kute nome munye nje lofana nawe! Kube bengingatilandzisa tonkhe betingeke tibaleke tonkhe.”—Tihlabelelo 40:5.
4 Nanobe sikhashane nekutfola live lelisha, tinceku taJehova namuhla tijabulela kuthula naNkulunkulu. EmaHholweni etfu eMbuso nasemihlanganweni yetfu yesigodzi neyesifundza, sibona titselo temoya waNkulunkulu kulesikholwa nabo. Labanye boFakazi nabashumayela bantfu labanelwati loluncane ngenkholo nome labangakholwa, babakhombisa loko lokwashiwo nguPawula encwadzini yakhe layibhalela baseGalathiya. Bacala ngekubachazela ‘ngemisebenti yenyama’ bese bababuta kutsi bayakucondza yini loko. (Galathiya 5:19-23) Labanyenti bayavuma kutsi lunje luhlobo lwebantfu lesiphila nabo. Nabachazelwa ngetitselo temoya waNkulunkulu nalapho bamenywa kutsi bete esifundvweni bavele batibonele ngewabo bufakazi baloku, labanyenti bavele batsi: “Nembala Nkulunkulu unani.”(1 Khorinte 14:25) Loku akwenteki eHholeni LeMbuso lakuleyo ndzawo kuphela. Kuyo yonkhe indzawo, lapho uhlangana naBoFakazi BaJehova, utfola kutsi nabo banemoya lofanako. Ecinisweni, lobudlelwane lobakhako busizatfu sekumbonga Jehova, losiniketa umoya wakhe kuze kwenteke loku.—Zefaniya 3:9; Efesu 3:20, 21.
5 Sipho lesikhulu kunato tonkhe, lesiphelele kunato tonkhe Jehova lasiphe sona, yiNdvodzana yakhe, Jesu, leyaba ngumhlatjelo loyinhlawulo. Umpostoli Johane wabhala watsi: “Nangabe Nkulunkulu asitsandze ngalendlela, natsi sibophekile kutsi sitsandzane.” (1 Johane 4:11) Sonkhe sikhombisa kutsi siyabonga ngalenhlawulo hhayi nje ngekukhombisa lutsandvo nekubonga kuphela kuJehova kodvwa nangekuphila ngendlela lekhombisa kutsi siyabatsandza labanye.—Matewu 22:37-39.
6 Singafundza lokunyenti mayelana nekukhombisa kubonga ngekuhlola indlela Jehova lasebentelana ngayo nema-Israyeli asendvulo. Asebentisa uMtsetfo lawuniketa sive ngaMosi Jehova wawafundzisa tintfo letinyenti. Ngekusebentisa ‘sisekelo selwati neseliciniso leliseMtsetfweni,’ singafundza lokunyenti lokutosisita silandzele seluleko saPawula lesitsi: “Banini ngulababongako.”—Roma 2:20; Kholose 3:15.
Funisisa Umcebo EVini LaNkulunkulu
(Tihlabelelo 109:8) Shangatsi imihla yekuphila kwakhe ingafinyetwa, lomunye atsatse sikhundla sakhe.
w00 12/15 24 ¶20
Mani Ucine Futsi Uciniseke Ngalokuphelele
20 Akungakuphatamisi nobe kukucedze emandla kutsi akusibo bonkhe bantfu labahlala batsembekile nalabanekukholwa lokucinile. Labanye bangase behluleke, baphambuke, nobe bamane bayekele. Loko kwenteka kulabanye lebebasondzelene kakhulu naJesu, baphostoli bakhe. Ngesikhatsi Judasi ahlubuka Jesu, labanye baphostoli baphelelwa mandla noma bayekela yini? Cha! Phetro wasebentisa emavi lakuTihlabelelo 109:8 kuze akhombise kutsi sikhundla saJudasi besitawutsatfwa ngulomunye. Kwakhetfwa lomunye, futsi kwatsi nalaba labanye labetsembekile bachubeka ngenkutsalo nemsebenti wabo wekushumayela. (Imisebenti 1:15-26) Bebatimisele kuhlala batsembekile futsi banekukholwa lokucinile.
it-1 857-858
Kwati Kusengaphambili, Kuhlela Kusengaphambili
Nkulunkulu besekavele akuhlelile yini kutsi Judasi bekatawutsengisa Jesu kuze kutawugcwaliseka siphrofetho sakhe?
Ngesikhatsi Judasi atsengisa Jesu bekugcwaliseka siphrofetho lesabiketelwa ngaye kanye neNdvodzana yaNkulunkulu. (Hla 41:9; 55:12, 13; 109:8; Imi 1:16-20) Noma singete sasho kutsi Nkulunkulu besekavele akuhlelile kutsi nguJudasi lotawukwenta loko. Tiphrofetho tabiketela kutsi Jesu abetawutsengiswa ngumngani wakhe lametsembako, kepha atizange tisho ngalokucondzile kutsi bekutawuba ngubani. Timiso atisho kutsi Nkulunkulu abekuhlele kusengaphambili loko lebekutawentiwa nguJudasi. Simiso lesashiwo ngumphostoli Pawula sitsi: “Ungajaki kubeka nobe ngumuphi umuntfu tandla, futsi ungahlanganyeli etonweni talabanye, kodvwa tigcine umsulwa.” (1Tm 5:22; catsanisa na-3:6.) Ngesizatfu sekutsi abefuna kuciniseka kutsi ubakhetsa kahle baphostoli bakhe labangu-12, Jesu wacitsa busuku bonkhe athandaza kuBabe wakhe ngaphambi kwekutsi abakhetse. (Luk 6:12-16) Kube besekuvele kwatiwa kutsi Judasi utawutsengisa Jesu, loku bekutawusho kutsi sicondziso saJehova lesimayelana nekubusa kwakhe siyashintjashintja futsi loku bekutawufana nekutsi uhlanganyela etonweni talabanye.
Ngako kuyacaca kutsi ngesikhatsi Judasi akhetfwa kutsi abe ngumphostoli akazange akhombise ngisho kancane kutsi angahle ajikele Jesu. Wavumela “imphandze lenashevu” kutsi ivele futsi umphumela waba kutsi akazange alalele Jehova kodvwa wavumela Sathane kutsi amkhohlise. (Heb 12:14,15;Joh 13:2; Imi 1:24,25; Jak 1:14,15; fundza naJUDA 4) Ngesikhatsi lesento saJudasi sifika ezingeni lelitsite, Jesu abesamati loyo lotamtsengisa.—Joh 13:10, 11.
Kuliciniso kutsi labanye baphostoli bekubakhuba loko Jesu bekabafundzisa kona ngobe Johane 6:64 utsi: “Kusukela ekucaleni, Jesu bekati kutsi bobani labo lebebangakholwa nekutsi ngubani lona labetamtsengisa.” Ligama lelitsi “ekucaleni” (Gr., ar·kheʹ) lelisetjentiswe ku-2 Phetro 3:4 libhekisela ekucaleni kwendalo futsi lingaphindze libhekisele kuletinye tikhatsi. (Luk 1:2; Joh 15:27) Nasi sibonelo, ngesikhatsi umphostoli Phetro akhuluma ngemoya longcwele lowehlela kulabangesiwo emaJuda “njengobe nje wehlela nakitsi ekucaleni,” kuyacaca kutsi abengabhekiseli esikhatsini lacala ngaso kuba ngumphostoli kodvwa abebhekisela esikhatsini lesibalulekile emsebentini wakhe wekushumayela, lokulilanga leliPhentekhoste nga-33.C.E., “ekucaleni” ngesikhatsi kwehla umoya longcwele ngenjongo letsite. (Imi 11:15; 2:1-4) Nakukhulunyelwa umbhalo waJohane 6:64 i-Lange’s Commentary on the Holy Scriptures (p.227 ) itsi: “Ekucaleni, awusho nje ekucaleni kwato tonkhe tintfo nobe ngesikhatsi Jesu acala kuba nebangani, nobe ngesikhatsi acala kukhetsa bafundzi bakhe, nobe ngesikhatsi acala kushumayela kodvwa usho ngesikhatsi Jesu acala kwembula imfihlo letsite [leyabakhuba labanye baphostoli]. Abemati kusukela ekucaleni loyo abetamtsengisa.”—Translated and edited by P. Schaff, 1976; catsanisa na-1Joh 3:8, 11, 12.
(Tihlabelelo 109:31) Ngobe ume ngesekudla salomphofu kutsi amsindzise kulabamgwebela intsambo.
w06 9/1 14 ¶8
Emaphuzu Lagcamile Encwadzi Yesihlanu YeTihlabelelo
109:30, 31; 110:5. Ngalokuvamile sandla sesekudla selisotja lebesiphatsa inkemba besingavikelwa sihlangu, ngobe sasibanjwa ngesandla sesencele. Ngekwesifananiso, Jehova ‘usesandleni sesekudla’ setinceku takhe kuze atilwele. Ngako, uyativikela futsi atisite—lesi sizatfu lesihle sekutsi ‘simdvumise kakhulu’!
AUGUST 29–SEPTEMBER 4
UMCEBO LOSEVINI LANKULUNKULU | TIHLABELELO 110-118
“Ngiyawumentelani Jehova?”
(Tihlabelelo 116:3, 4) Tingibe tekufa tangitungeleta, iminjunju yekufa yangihlasela, ngabandzetelwa tinhlupheko nelusizi. 4 Ngase ngibita libito laSimakadze, ngatsi: “Awu, Simakadze, ngiyakuncenga, ngisindzise.”
(Tihlabelelo 116:8) Wena, Simakadze, uwephulile umphefumulo wami ekufeni, wephula emehlo ami etinyembetini netinyawo tami ekuweni.
w87 3/15 24 ¶5
Nkulunkulu Lojabulako, Bantfu Labajabulako
◆ 116:3—Tiyini “Tingibe tekufa”?
Kwabonakala shengatsi kufa kwakutungelete umhlabeleli ngetingibe kangangekutsi abengeke akhone kuphunyuka. Tintsambo lebetiboshwa ticiniswe emilenteni tatibangela buhlungu lobukhulu, nobe iminjunju, futsi lihumusho le-Septuagint yesiGriki lihumusha ligama lesiHebheru lelitsi “tintsambo” ngekutsi “iminjunju.” Ngako-ke, ngesikhatsi Jesu Khristu afa, abeboshwe kwaciniswa, nobe abeboshwe ngetintsambo letatimbangela iminjunju, yekufa. Ngako-ke, ngesikhatsi Jehova avusa Jesu, ‘abemkhulula ekuboshweni kufa.’—Imisebenti 2:24.
(Tihlabelelo 116:12) Ngiyawumentelani Simakadze, ngimbonge ngako konkhe lokuhle langentela kona?
w09 7/15 29 ¶4-5
Yemukela Ngekwatisa—Uphe Ngenhlitiyo Yonkhe
Umhlabeleli watibuta watsi: “Ngiyawumentelani Jehova ngimbonge ngako konkhe lokuhle langentela kona?” (Hla. 116:12) Ngutiphi tintfo letinhle lebekakhuluma ngato? Jehova abemsekele ngesikhatsi abandzetelwe “tinhlupheko nelusizi.” Ngetulu kwaloko, Jehova ‘abewephulile umphefumulo wakhe ekufeni.’ Manje, umhlabeleli abesafuna ‘kumentela’ lokutsite Jehova. Bekangamentelani? Watsi: “Tifungo tami ngiyawutifeza kuSimakadze.” (Hla. 116:3, 4, 8, 10-14) Bekatimisele kufeza tonkhe tifungo labetente kuJehova.
Nawe ungenta lokufananako. Njani? Ngekuphila njalo ngendlela lekhombisa kutsi uyayilalela imitsetfo netimiso taNkulunkulu. Ngako, ciniseka kutsi kukhonta kwakho Jehova kuhlale kuyintfo lebaluleke kunato tonkhe ekuphileni kwakho futsi uvumela umoya wakhe ukucondzise kuko konkhe lokwentako. (Shu. 12:13; Gal. 5:16-18) Kuliciniso kutsi angeke ukhone kumentela lokutsite Jehova ngalokugcwele ngetintfo lakwentele tona. Nobe kunjalo, ‘uyajabula’ nangabe akubona utinikela ngenhlitiyo yakho yonkhe emsebentini wakhe. (Taga 27:11) Kulilungelo lelimangalisako kujabulisa Jehova ngale ndlela!
w98 12/1 24 ¶3
Seluleko Sekuvalelisa Salabafundzisako
Kwalandzela tinkhulumo letintsatfu temalunga alabo labafundzisa eGiliyadi. Karl Adams wacale wakhuluma ngesihloko lesitsi: “Uyawumentelani Jehova?” Inkhulumo yakhe beyisekelwe kuTihlabelelo 116, lokungenteka Jesu walihlabelela ngebusuku bangaphambi kwekufa kwakhe. (Matewu 26:30) Abecabangani Jesu ngesikhatsi ahlabela lamavi latsi: “Ngiyawumentelani Jehova ngimbonge ngako konkhe lokuhle langentela kona?” (Hla 116:12) Kungenteka kutsi abecabanga ngemtimba lote sono Jehova abemlungiselele wona. (Hebheru 10:5) Ngakusasa, abetawunikela lomtimba njengemhlatjelo, akhombisa indlela labemtsandza ngayo Jehova. Bafundzi belikilasi lesi-105 bebanambitse buhle baJehova etinyangeni letisihlanu letendlulile. Manje besebatawukhombisa kutsi bayamtsandza Nkulunkulu ngekutsi basebente ngekutimisela etabelweni tabo tetitfunywa tevangeli.
(Tihlabelelo 116:13, 14) Ngiyawuphakamisa indzebe yensindziso, ngikhuleke kuSimakadze, ngibonga libito lakhe. 14 Tifungo tami ngiyawutifeza kuSimakadze, embikwabo bonkhe bantfu bakhe.
(Tihlabelelo 116:17, 18) Ngiyawunikela kuwe ngemhlatjelo wekubonga, ngikhuleke kuSimakadze, ngibonga libito lakhe. 18 Tifungo tami ngitatifeza kuSimakadze embikwabo bonkhe bantfu bakhe.
w10 4/15 27, libhokisi
Umlandzela Ngenkhutsalo Yini Khristu?
Yini Lengakusita Kutsi Uchubeke Ulandzela Khristu?
▪ Fundza liVi laNkulunkulu malanga onkhe futsi uzindle ngaloko lokufundzako.—Hla. 1:1-3; 1 Thim. 4:15.
▪ Thandaza njalo ucele lusito kanye nesicondziso semoya waNkulunkulu.—Zak. 4:6; Luk. 11:9, 13.
▪ Tihlanganise nalabo labakhombisa inkhutsalo lesuka enhlitiyweni ngemsebenti wabo wekushumayela.—Taga 13:20; Heb. 10:24, 25.
▪ Khombisa kutsi uyakubona kuphutfuma kwalesikhatsi lesiphila kuso.—Ef. 5:15, 16.
▪ Caphela imiphumela yekuba ‘netaba’ tekungayilandzeli imiyalo yaNkulunkulu.—Luk. 9:59-62.
▪ Ngaso sonkhe sikhatsi khumbula sifungo sekutinikela kwakho kanye netibusiso letinyenti letiba ngumphumela wekukhonta Jehova nekulandzela Khristu ngenhlitiyo yonkhe.—Hla. 116:12-14; 133:3; Taga 10:22.
Funisisa Umcebo EVini LaNkulunkulu
(Tihlabelelo 110:4) Simakadze wafunga, futsi angeke agucuke, watsi: “Wena ungumphristi loyawuhlala akhona kuze kube phakadze ngekuma kwaMelkhisedeki.”
Bani Nekukholwa Lokucinile EMbusweni
SIVUMELWANE SEKUBA KHONA KWEMPHRISTI
15 Nanobe sivumelwane lesentiwa na-Abrahama naleso lesentiwa naDavide sisicinisekisa kutsi intalo yemfati beyitawuba yinkhosi, kodvwa leyo ndzima iyodvwa beyingeke ikhone kwenta kutsi bantfu bato tonkhe tive babusiswe. Kuze babusiswe ngalokuphelele, bekutawudzingeka bakhululwe ekubeni nesono futsi babe yincenye yemndeni waJehova. Kuze loku kwenteke, kudzingeka kutsi lentalo iphindze yente umsebenti webaphristi. UMdali wetfu lohlakaniphile wente indlela yekutsi loku kwenteke asebentisa lelinye lilungiselelo lelisemtsetfweni, lokutsiwa sivumelwane sekuba ngumphristi njengaMelkhisedeki.
16 Asebentisa iNkhosi Davide, Jehova waveta kutsi abetawenta sivumelwane naJesu lesinetinjongo letimbili: kutsi ‘ahlale ngesekudla saNkulunkulu’ kuze kube ngulapho ancoba titsa takhe futsi abe ‘ngumphristi loyawuhlala akhona kuze kube phakadze ngekuma kwaMelkhisedeki.’ (Fundza Tihlabelelo 110:1, 2, 4.) Kungani kutsiwa utawuba ngumphristi “ngekuma kwaMelkhisedeki”? Kungobe ngaphambi kwekutsi intalelwane ya-Abrahama ingene eVeni Lesetsembiso, Melkhisedeki, lobekayinkhosi yaseSalema abekhonta ‘njengemphristi waNkulunkulu Losetikwako Konkhe.’ (Heb. 7:1-3) NguJehova lucobo lwakhe lowambeka kulesosikhundla. Nguye kuphela lokukhulunywa ngaye emiBhalweni yesiHebheru lowakhonta njengenkhosi nanjengemphristi. Ngetulu kwaloko, njengobe bekute lowaba nalesosikhundla ngaphambi kwakhe nangemuva kwakhe, ubitwa ngekutsi ‘ngumphristi kuze kube phakadze.’
17 Jesu ubekwe ngalokucondzile kutsi abe ngumphristi ngalesivumelwane Jehova lasenta naye, futsi utawuchubeka ‘angumphristi kuze kube phakadze njengaMelkhisedeki.’ (Heb. 5:4-6) Loku kuveta ngalokucacile kutsi Jehova wente sicinisekiso sekutsi utawusebentisa uMbuso lobuswa nguMesiya kuze afeze injongo labenayo ekucaleni ngebantfu labasemhlabeni.
w06 9/1 14 ¶1
Emaphuzu Lagcamile Encwadzi Yesihlanu YeTihlabelelo
110:4—Ngusiphi ‘lesifungo’ lelivesi lelikhuluma ngaso? Lesifungo sisivumelwane Jehova lasenta naJesu Khristu sekutsi abe yiNkhosi nemPhristi Lophakeme.—Lukha 22:29.
(Tihlabelelo 116:15) Kuligugu emehlweni aSimakadze kufa kwalabangcwele bakhe.
Imibuto Levela Kubafundzi
Nakubekwa inkhulumo yemngcwabo wemKhristu, akukafaneli kusetjentiswe Tihlabelelo 116:15 nakukhulunywa ngalona lofile, ngisho nobe afe ayinceku yaJehova lecotfo. Kungani? Kungobe lamavi alomhlabeli anenchazelo leyenabile. Asho kutsi kufa kwebantfu baNkulunkulu njengelicembu kubita kakhulu kuye kutsi angakuvumela kwenteke.—Fundza Tihlabelelo 72:14; 116:8.